Përmes një artikulli, e përditshmja gjermane Frankfurter Allgemeine Zeitung shkruan se tregues i kësaj çarje mes dy “vëllezërve” janë raportet dhe vlerësimet e herëpashershme kritike në “perandorinë e televizioneve, portaleve dhe tabloideve të drejtuar nga bashkëpunëtorët e Vuçiçit, të cilët shpesh e “ndihmojnë” liderin serb duke raportuar si të dojë ai”.
“Ndonjëherë këndohen vetëm himne kur bëhet fjalë për Putinin. Afërsia vëllazërore e serbëve dhe rusëve theksohej vazhdimisht në këto media. Tani kjo nuk është më plotësisht kështu”, shkruan FAZ.
“Tone të tilla tregojnë se presidenti i Serbisë nuk është vetëm në radhë të parë një ideolog, por edhe një njeri i fuqishëm pragmatik. Nuk ka kundërshtime për vëllazërinë me Rusinë kur përdoret në politikën e tij të brendshme. “Por në mes të luftës, ai nuk dëshiron të hyjë në një vëllazëri gjaku me Rusinë, e cila përfundimisht mund të shkatërrojë ekonominë serbe”, vlerëson e përditshmja gjermane, duke shtuar se Vuçiç madje së fundmi vizitoi në mënyrë “demonstrative” refugjatët ukrainas në jug të Serbisë, i mirëpriti dhe u ofroi të gjithëve ndihmë.
“Deklarata dhe gjeste të tilla ndryshojnë dukshëm nga tonet e ditëve të para të luftës, kur një gazetë veçanërisht besnike ndaj presidentit botoi titullin “Ukraina sulmoi Rusinë“- shkruan FAZ.
Kjo gjysmë kthesë e diplomacisë serbe tregon se në kushtet aktuale është shumë e vështirë të ruhet politika e Vuçiçit mes Lindjes dhe Perëndimit. Dëshmi e kësaj është edhe pikëpyetja e madhe nëse kancelari gjerman Olaf Scholz do ta vizitojë Serbinë, pasi kjo vizitë nuk do të kryhej nëse nëpër rrugët e Beogradit do të shkelte fillimisht ministri i Jashtëm rus, Sergei Lavrov.
Vlen të theksohet se, në prag të vizitës së anuluar të Lavrovit, Vuçiç deklaroi se mungesa e Scholz-it do të ishte një lajm i keq. Madje, si për të parashikuar fatin e zi të vizitës së shefit të diplomacisë ruse, në mënyrë profetike tha: “Të shohim fillimisht nëse Lavrov do të mund të vijë dhe pastaj të vlerësojmë situatën”.
Marrë shkas nga sjellja e Lavrov, i cili vlerësoi në mars vendimin e Serbisë për të mos iu bashkuar sanksioneve perëndimore kundër Rusisë, FAZ vlerëson se tani e tutje Kremlinit mund të mos i pëlqejnë disa vendime të ardhshme të Beogradit. E përditshmja gjermane kujton se në vitin 2017, Vuçiç citoi një thënie që i atribuohet shkrimtarit amerikan Ambrose Beers, se “lufta është mënyra e Zotit për t’u mësuar njerëzve gjeografinë“.
“Këto ditë edhe rusofilët serbë kanë marrë një mësime gjeografie – Serbia mund të kufizohet me Rusinë në imagjinatën e tyre, por jo në hartë. Vuçiç e dinte këtë të vërtetë të thjeshtë edhe më parë, dhe ndoshta tani do të veprojë në përputhje me të”, përfundon FAZ.
