Shkruan: Nuhi Ismaili
Në Kosovë nuk ka elektorat me bindje ideologjike që do ta përcaktonte fituesin e zgjedhje. Ky elektorat që voton për shkak të bindjeve ideologjike në elektoratin e përgjithshëm në Kosovë, nuk arrin as pesë përqind dhe së paku edhe dhjetë vjet në Kosovë fitoret e partive politike nuk do të ndodhin për shkak të bindjeve ideologjike e djathtë e majtë, prandaj edhe debatet e tilla nuk kanë asnjë efekt tek elektorati.
Në këto zgjedhje të parakohshme për herë të parë dihet fituesi i zgjedhjeve, pyetja është se cila do të jetë përqindja e fitores. Tani e gjithë vëmendja është përqendruar tek dilema se a do të lejohet Albin Kurti të kandidoi në këto zgjedhje apo jo dhe me kënd mund ta bëjë qeverinë Lëvizja Vetëvendosje nëse fitorja nuk është aq e thellë sa po synon LVV-ja.
Oferta programore edhe kësaj radhe nuk do të ketë ndonjë ndikim e po ashtu as premtimet nuk do ti marr kush seriozisht. Qytetarët kanë vendosur ta ndëshkojnë keqqeverisjen dhe kontratën e pashkruar të partive politike të cilat me çdo kusht po përpiqen ta pengojnë ndryshimin me të cilin janë identifikuar tashmë Lëvizja Vetëvendosje dhe Vjosa Osmani.
Nuk ka ndodhë ndonjëherë në historinë e shkurtër parlamentare në Kosovë, që votuesit e partive që kanë qeverisë deri tani (PDK-LDK-AAK dhe dy copëzat tjera AKR- Nisma Socialdemokate) të shkojnë tek kutitë e votimit të sigurt që partia e tyre nuk i fiton zgjedhjet. Kësaj radhe për PDK-në, LDK-në dhe AAK-në do të votoi vetëm elektorati klientelist dhe militantët e thekur, prandaj edhe rënia e përqindjes tek këto parti do të jetë e dukshme.
Lëvizja Vetëvendosje, fitoren e ka të garantuar, beteja e saj politike është për një fitore sa më të madhe ku diferencën edhe kësaj radhe do ta bëjë diaspora. Nëse nuk i lejohet Albin Kurtit që të jetë kandidat për deputet kjo nuk e zbeh fare fitoren, madje ka gjasa që ta thelloi ate. Mungesa e Kurtit do të jetë një hendikep nëse nuk zgjedhet kryeministër, atëherë fryma e fitores dhe mënyra e qeverisjes do të duket pak më e zbehtë.
Kurse sa u takon debateve dhe dilemave se me kënd do të bëjë koalicion pas zgjedhjeve LVV-ja, pavarësisht rezultatit, kjo dilemë është e sajuar si propagandë kundër LVV-së e cila i ka hequr vijat e kuqe dhe pas zgjedhjeve i ka katër mundësi për ta formuar koalicionin qeverisës.
-Fitore e thellë mbi 50 për qind dhe koalicion qeverisës me minoritetet të cilat edhe postet ministrore i kanë të garantuara.
-Koalicion me LDK-në; koalicion me PDK-në apo koalicion me AAK-në. Të tri këto parti në këto zgjedhje do të kenë rënie të votave, prandaj e kanë të pamundur që ta përdorin variantin e Qeverisë Hoti duke e eliminuar partinë e parë, pra LVV-në dhe Vjosa Osmanin. Të tri këto parti pas zgjedhjeve kushtet për të bërë koalicion me LVV-në do ti kenë pothuaj se minimale edhe nga frika se mos po mbesin në opozitë. Të tri këto parti pas zgjedhjeve e kanë ofertën e njëjtë nga LVV-ja, postin e Kryetarit të Kuvendit dhe sa më pak ministri.
Dyshimet se LVV-ja do ti fitoi zgjedhjet por do ta ketë vështirë të formoj koalicionin qeverisës janë shpikje të qëllimshme. Po ashtu edhe kritikat që po i bëhen Vjosa Osmanit që pas deklarimit publik se do të jetë kandidate serioze për postin e Presidentit se gjoja po e tradhton elektoratin e saj janë tendencioze. Më tradhti do të ishte që të bënte fushatë pa treguar se çfarë synon dhe pas zgjedhjeve të bëhej Presidente, ky veprim do të ishte edhe një lloj mashtrimi i elektoratit. Vjosa u tregua shumë e sinqertë dhe votuesit e saj i ka njoftuar me kohë se çfarë synon pas zgjedhjeve, kushdo që e voton Vjosën e ka të çartë pse po e bënë një gjë të tillë.
Vjosa Osmani, ka përkrahje të plotë nga faktori ndërkombëtar që të zgjedhet Presidente e Kosovës, këtë fakt nuk e përmend askush, por hedhin ashkla jo e majtë jo e djathtë dhe po krijojnë opinion të rrem se gjoja posti i Presidentit do të jetë kushti kryesor i partive që do të bëjnë koalicion qeverisës me LVV-në. E para parti që nuk do ta ketë kusht postin e Presidentit do të jetë PDK-ja.
Po ashtu edhe deklarimet se nëse LVV-ja bënë koalicion qeverisës me PDK-në Vjosa Osmani do të largohej nga marrëveshja me LVV-në janë tendencioze dhe nuk do të ndodhë fare dhe nuk ka asnjë arsye për tu larguar.
PDK-ja edhe pse e hendikepuar ka krijuar një komoditet brenda partisë e zgjodhi Enver Hoxhajn si ushtrues të detyrës së kryetarit të partisë, një njeri kozmopolit me një përformancë artificiale edhe si politikan edhe si intelektual, prandaj me gjithë pakënaqësitë që ekzistojnë brenda PDK-së për zgjedhjen e tij, ato nuk u shfaqën publikisht, por dilema është si e vlerëson elektorati i PDK-së Enver Hoxhajn në krye të partisë.
Prurjet e reja në PDK nuk do të kenë kurfarë efekti elektoral, sepse janë figura pa përfaqësim dhe vota e tyre e re që do ta sjellin në PDK do të jetë simbolike.
Në fakt PDK-ja është pajtuar që nuk mund të jetë partia e parë, por me shumë gjasa do të jetë partia e dytë që si renditje do të konsiderohet si sukses edhe pse do të ketë rënie të elektoratit.
LDK-ja në këto zgjedhje po hynë e plagosur politikisht më shumë se PDK-ja. E prishi koalicionin me LVV-në duke bërë alenca të fshehta me PDK-në, vendosi ta qeverisë vendin me një kryeministër as mish as peshk e shkarkoi nga kryesia e partisë Vjosa Osmanin (kandidaten për kryeministre në zgjedhjet e kaluara), angazhoi dy gardian në Kuvendin e Kosovës për ta mbrojtur Dullen, të cilët për herë të parë nisën të kultivojnë një arrogancë politike e pa parë ndonjëherë në radhët e LDK-së dhe tash duhet të paguaj gabimet që ia shkaktuan mercenarët që i ka në kryesi e në strukturat tjera të partisë.
AAK-ja do të jetë e kënaqur nëse e ruan kuotën tradicionale të saj 8 për qind. Në fushatë do të garoi me një paradoks politik, Ramush Haradinaj President.
E gara për programe e bindje ideologjike urojmë që të ndodhë në zgjedhjet tjera. Pandemia ka treguar se “dora e padukshme” e tregut privat, nuk mund të llogaritet si e sigurt për të ofruar të mira publike, dhe aq më pak për të mbrojtur interesin publik. Dora e dukshme e shtetit duhet të kontribuojë, përmes funksionimit të institucioneve efektive dhe qeverisjes së mirë. Në thelb, masat e shëndetit dhe sigurisë, janë një kujtesë e vazhdueshme fizike e pranisë së shtetit, e cila ka munguar kaq shumë në vitet e fundit. Disa e kanë përqafuar këtë ndërhyrje, duke njohur një përgjegjësi të përbashkët, ndërsa të tjerët kanë qenë kritikë. Por që të gjithë janë të vetëdijshëm për rolin e qeverisë.
Prandaj Lëvizja Vetëvendosje përveç fitores dhe qeverisjes e ka një shansë historike që të dëshmoi se e mira publike nuk mund të zëvendësohet me të mirën private duke dëshmuar që social demokracia është zgjidhja, sepse neo-liberalizmi po dështon. A do të filloi ndryshimi dhe qeverisja e mirë pas 14 shkurtit, shpresat janë të mëdha. A do të ketë ndryshim rrënjësor në mandatin e parë qeverisës pak e besueshme./Lajm.co
