E këto pasoja janë natyrisht e në radhë të parë në politikën që Prishtina zyrtare do të konturojë përballë botës shqiptare dhe botës tjetër, por në radhë të parë në hapësirën e brendshme.
Jemi 2 javë pas zgjedhjeve dhe Kosova sot ka një vakum, ndërkohë që duhet të ziente. LDK dhe PDK si parti opozitare, natyrisht jo Isa me Hashimin, ngaqë kanë edhe telashe të tjera, por faktorët e tjerë duhet të zienin në logjikën opozitare të dialektikës normale. Duke nisur nga qeveria e Avdullah Hotit, që është në largim.
Por çfarë po ndodh sot në Kosovë?
Qeveria e Hotit po bën lojën e inercisë, sikur partia e saj ka fituar zgjedhjet, LDK-ja është në një kaos pa ide për të zënë vendin e Isa Mustafës, pasi kërkojnë të marrin izmën e tij të kandidimit, kurse nga PDK-ja është më keq, kaosi po përkthehet në një luftë të brendshme, të egër për të marrë në dorë fuqitë parlamentare të opozitës kryesore.
Por asnjëra prej këtyre faktorëve nuk po i bën opozitë apo kritikë fituesve të rinj, që realisht ka për çfarë t’i kritikosh. Kjo ndodh gjithmonë, jo më sot kur Albin Kurti me heshtjen e gjatë po e bën vakumin si një fenomen real të politikës së Kosovës.
Në fakt situata është mjaft e komplikuar në partitë që kanë humbur zgjedhjet e 14 shkurtit në Kosovë. E kjo situatë, është në dijeninë e atyre që politikën e njohin mirë realisht e jo si tallava. Albini e njeh më shumë se të tjerët. Por realisht ka dy rrugë; Vetëvendosja ka fituar shumë vota përveç zgjedhësve të saj tradicional dhe qendrestar edhe nga një pjesë e rëndësishme e ish-votuesve të PDK-së. Por më shumë si pasojë dhe e koalicionit me Vjosa Osmanit ka fituar nga votuesit tradicional të LDK-së.
Ky rezultat do të sjellë një pasojë të rëndësishme në politikën e Kosovës: një nga forcat e mëdha do të zhduket apo rrudhet në margjina si LDD e Dacit dikur apo Nisma e Fatmir Limajt sot.
Nëse vihet re në mediat e klikës së vjetër sot po yshtet Vjosa Osmani të marrë drejtimin e LDK-së, çka duket si një logjikë absurd. Ngaqë LDK-ja realisht po shikohet si një korpus i përbashkuar me Vetëvendosjen; të paktën një pjesë e saj.
Por edhe një pjesë e PDK-së, që ka pasqyrimin e saj në Drenicë me Bekim Jasharin po e sheh më afër Vetëvendosjen si një parti që pasqyron vlerat reale të UÇK-së. Po dreqin çfarë po ndodh? Albin Kurti po i merr të gjitha?!
Jo, Albin Kurti nuk do ti marrë të gjitha, ka thjesht një vakum real dhe një proces nga i cili njëra nga dy partitë e vjetra; PDK apo LDK do të shkrihet përfundimisht. Që padyshim do të ketë zhvillime të tjera, por njëra prej dy partive të mëdha nuk ka arsye që të qëndrojë. Pasi parti personale dhe krahinore në Kosovë nuk ka më.
Po kush do e hajë: PDK apo LDK? Kjo varet nga faktorët apo forcat që do të dalin në këto parti për t’i dalë përballë Albin Kurtit edhe si rival, por edhe si partner në procesin e madh të forcimit të shtetësisë së Kosovës. Deri tani, rrezikohen të dyja partitë e vjetra, pasi të vegjlit thuajse nuk ekzistojnë…
