Në konferencën që u mbajt për shtyp, krerët e Brukselit nuk e përfillën fare Ballkanin. Shefja e KE, Von Der Leyen anuloi daljen me 3 liderët e rajonit. Plani ishte që të kishim një konferencë shtypi të përbashkët mes BE dhe krerëve të Ballkanit, por në fund dolën vetëm kryeministri Edi Rama, kryeministri maqedonas Kovaçevski dhe presidenti serb Aleksandër Vuçiç. Pra Samiti i BE përfundoi te treshja e Ballkanit të Hapur.
Madje dhe në koferencë që të tre e treguan qartë se më shumë e gjejnë veten te Ballkani i Hapur sesa në BE. “Përmendët a do të behet një bashkëpunim rajonal. Më duhet t’iu them që Ballkani i Hapur është bashkëpunimi, mekanizmi i parë vërtetë rajonal. Pse e them? Se po prodhon rezultate për njerëzit, fermerët tregtarët. nëse doni të kontrolloni duke qenë se Ballkani nuk është vendi i Jezu Krishtit, është i Shën Thomait, nuk besojmë nëse nuk vëmë dorën në plagë. Shkoni në kufi dhe shikoni ndryshimin, ka një korridor të gjelbër dhe nuk ka asnjë sekondë pritje për kamionët mallrat, prodhimet bujqësore. Ndërkohë nëse e çon qumështin në vende që nuk janë pjesë e Ballkanit, është bërë kos. Është një tryezë e hapur për këdo. Aleksandri e quajti e ashtuquajtura Kosovë, unë e quaj Kosovë dhe pikë. Ky është një projekt. Nuk duhet të jetë problemi i qeverisë së Kosovës për të ardhur, por duhet të kishte qenë problemi i presidentit të Serbisë për të pranuar. Ndihem i privilegjuar të punoj përmes këtij mekanizmi që do sjellë edhe paqen, kjo paqe do të vijë përmes Ballkanit të Hapur“, tha Rama.
Në një linjë me të ishte dhe Vuçiç, i cili tha: “Thjesht hidhini një sy luftimeve në Ukrainë. Doni ta shihni sërish në Ballkan? Unë nuk dua? Prandaj mos e nënvlerësoni nismën tonë, sepse bashkon vendet“.
Më tej kryeministri Rama sulmoi ashpër Brukselin dhe Bullgarinë. Sipas tij, vetoja bullgare është e turpshme dhe po mbahen peng dy vende anëtare të NATO-s. Po ashtu ai drejtoi gishtin edhe nga vetë BE.
“Maqedonia ndryshoi edhe emrin. Mendoni që Franca të ndryshojë emrin. Shqipëria është në pritje prej 8 vitesh, mu desh një mandat i tretë që të vijoj të prisja çeljen për anëtarësim. Arsyeja nuk është thjesht Bullgaria, është një fatkeqësi, nuk është vetëm Bullgaria, është fryma e deformuar e zgjerimit. Bullgaria është shprehja më e dukshme e saj. Turp një vend i NATO që merr peng dy vende të NATO, ndërkohë që në oborr të Europës ka një luftë. Putin është shumë sëmurë, mund të jetë shumë mirë, por ky vendi këtu nuk duket shumë i shëndetshëm”, tha Rama.
Kryeministri nuk i ka ndalur as ironitë. Rama tha se Shqipëria do të jetë duke pritur edhe shekullin tjetër, ndërsa përballë do të ketë një Bullgari të tretë.
“Sulmi i një pandemie në shkallë globale, një sulm tragjik dhe as një luftë kaq kërcënues që mund të shndërrohet në luftë tragjike globale, nuk kanë mundur t’i bëjnë bashkë. Ç’të bëjmë?! Kemi shumë për të bërë. Ne kemi bërë dhe bëmë për të mbështetur idenë e Macron. Ne do të vazhdojmë në rrugëtimin tonë drejt anëtarësimit, me shpresën se shekullin tjetër do të jemi anëtardhe do të përballemi me një tjetër Bullgarie, me një Bullgari të tretë. Do e vlerësonim shumë nëse ky komunitet i Europës ngrihet për të qenë bashkë si një familje e vetme. Pavarësisht se jemi në kate të ndryshme, por në dhomën e ndenjes jemi bashkë”, tha Rama.
I zhgënjyer ishte edhe kryeministri maqedonas. Dimitar Kovaçevski tha në konferencën për shtyp se BE duhet të mbajë premtimin dhe nuk mundet që një vend të mbajë peng Ballkanin.
“Ka 18 vite që Maqedonia është kandidate. Në 2020 BE mori vendimi për fillimin e negociatave pa kushte, por jemi këtu dhe ende nuk kemi një vendim. Maqedonia e Veriut dhe Shqipëria nuk mund të jenë në këtë situatë pasi një vend i vetëm nuk lejon integrimin. Maqedonia e veriut njihet si vend që është i angazhuar duke gjetur zgjidhje të ndërsjella. Në të njëjtën ide jemi futur për të negociuar me Bullgarinë. Bullgaria ka vendosur të kthehet në të shkuarën dhe të rivendosë një bllokadë. Maqedonia e Veriut ka bërë shumë deri tani, kemi marrë vendime të vështira. Është koha që BE të përmbushe premtimet e veta, sesa të kërkojë të tjera gjëra. Ne kemi shpallur qëndrimin tonë, se propozimi i Macron duhet të pranojë këto elemente kyçe. Kushtet historike nuk mund të jenë pjesë në kuadrin negociues. Duhet garantohet nga BE që Bullgaria nuk do të bëjë kërkesa të reja”, tha Kovaçevski.
Deklarata e tyre u mbështet edhe nga presidenti serb. Aleksandër Vuçiç. Ky i fundit deklaroi se Shkupi e Tirana e meritojnë hapjen e negociatave pasi kanë përmbushur kushtet e vëna nga BE.
