Kryeministri Edi Rama, i tronditur nga molepsja personale në afera të shumta korrupsioni; i tejlodhur prej qeverisë së degraduar në çdo aspekt, dhe i rënë moralisht prej mashtrimeve e dështimeve, ka nisur një fushatë demagogjike për t’u dukur sikur e mbështet populli dhe sikur mendon për hallet popullit.
Pas farsës me Këshillimin Kombëtar, të inskenuar sipas stilit “Vetë pyet e vetë përgjigjet”, Edi Rama organizoi dhe kongresin e PS, të cilin e ka ideuar në formën e një mitingu militantësh e patronazhistësh brenda dhe jashtë sallës, ku oratori sundues do jetë jetë vetëm ai.
Ndërsa pas tij, do nxjerrë disa të rinj që do recitojnë ese të hartuara po nga vetë Rama, me deklarata se gjoja kanë lënë jetën e punët në vendet e BE, për të shijuar parajsën ekonomike që ka krijuar pushteti “Rilindja” dhe të ardhmen europiane në Shqipëri.
Sipas skenarit, në kongresin e premtimeve dhe realizimeve “3D” do flasin dhe fermerë, invalidë, freshistë e të moshuar që kanë fëmijët në punë shteti apo do joshen me nga një “çek”, të cilët do përzgjidhen nga deputetët, ministrat e kryebashkiakët.
Me këtë model, Rama prej 17 vitesh kryetar i PS pa asnjë proces zgjedhor, nuk po bën kongres partie për t’u votëbesuar, ose për të hapur garën e zgjedhjeve të reja për kryetar partie e drejtuesish qendror të saj, por për të bërë show demagogjik me premtime të përsëritura brenda sallës dhe miting me brohoritje militantësh jashtë saj.
Këtë e zbuloi Erjon Braçe para dy ditësh, kur tha se fermerët e Divjakës do flasin në kongresin e PS, por dhe Taulant Balla ditën e premte, duke bërë thirrje që njerëzit të marrin pjesë në kongresin e PS për t’i bërë pyetje udhëheqësit.
Ndërsa kryeministri Rama, i ka lënë detyrë çdo deputeti zone e kryetari bashkie, për të sjellë në Tiranë nga 50 militantë me shpenzimet tyre, dhe t’i mbajnë para monitorëve te sheshi, për të ndjekur fjalën e “Zeusit” dhe 5 ministrave që ai ka caktuar për të folur.
Ndërsa nga 3 militantë nga çdo bashki, do jenë prezent në sallën e kongresit, për të bërë pyetje të porositura dhe lavdrime për qeverinë e udhëheqësin në “emër të popullit”; por ndoshta dhe ndonjë emigrant nga Italia, si ai që Rama e përdori për mashtrimin me faturën e energjisë elektrike
Pa menduar se po e ekzagjerojmë në krahasim, mund të themi se ky kongres i PS me monitor në bulevard, është si mbledhja e Byrosë Politike të Partisë Komuniste më 23 nëntor 1961, kur populli u detyrua të mbushte sheshet në çdo qytet, për të dëgjuar në artopalante, fjalën e Enver Hoxhës kundër revizionizmit hrushovian, rrugën e pagabueshme të udhëheqësit dhe arritjet ekonomike madhështore të sjella prej tij./Pamfleti
