Në Serbi, dalin me propozim për ndarjen e Kosovës, i duan 4 komunat veriore

Një think –tank serb që drejtohet nga Jelena Milic,e cila mbahet si proeuropiane, ka dalë me një propozim për ndarjen e Kosovës

Në publikimin e fundit të Qendrës për Studime Euroatlanike, të titulluar West Side Story, propozohet haptas që të “korrektohet linja administrative ndërmjet Kosovës dhe Serbisë e cila do të shkonte pak a shumë përgjatë katër komunave në Veri të Kosovës (Mitrovica e Veriut, Zveçanit, Zubin Potoku dhe Leposaviqi), të banuara me shumicë serbe, siç thuhet si një nxitje për të arritur një marrëveshje gjithëpërfshirëse, duke pasur parasysh se formati aktual i negociatave nën ombrellën e BE’së ka arritur në një pikë bllokade.

Kjo qendër (CEAS) sugjeron që negociatat për korrektimin e linjës administrative ndërmjet Serbisë dhe Kosovës të organizohen nën ombrelllën e Perëndimit.

“Ky korrigjim do të pasohej menjhërë me një marrëveshje për normalizimin e marrëdhënieve (Serbi –Kosovë). CEAS sugjeron që kjo të bëhet në një format më të zgjeruar, në prani të Shqipërisë, Maqedonisë, Malit të Zi Bosnjë e Hercegovinës dhe Kroadcisë ku disa konteste kufitare ndërmjet Bosnjës dhe Krocisë e ndoshta edhe disa tjera do të mund të zgjidheshin e po ashtu edhe disa cështje të hapura që kanë mbetur nga shpërbërja e Jugosllavisë dhe luftërat e viteve 90’të, para së gjithash ajo e personave të zhdukur” thekson CEAS.

Kjo organizatë beson se duke treguar gatishmëri për të mbështetur një qasje të prezantuar në këtë raport, administrata e SHBA’së si një shtet kyc i NATO’s, do të demonstronte aftësinë e saj standarte për të implementuar rrethanat e reja në terren, një qëndrim të pakompromis ndaj Kremlinit, përkrahejen e BE’së dhe para së gjithash maturitetin për fuqizimin e kohezionit në NATO pa koncesione të mëdha financiare dhe politike.

Luftë bërthamore e pashmangshme brenda vitit 2040? E pashmangshme

Zhvillimi i Inteligjencës Artificiale do të shkaktojë një luftë bërthamore brenda 2040-ës që mund të shkatërrojë njerëzimin dhe mund të mos ketë mundësi për ta evituar këtë. Ky është paralajmërimi që jep një grup ekspertësh për sigurinë në teknologji

Ata pretendojnë se makineritë e avancuara të Inteligjencës Artificiale mund të inkurajojnë shtetet e fuqishme që të ndërmarrin hapin ekstrem e të përdorin arsenalin nuklear.

Gjatë Luftës së Ftohtë, frika për shkatërrim reciprok krijoi një paqe të paqëndrueshme midis superfuqive. Të dyja palët kishin një nxitje të madhe për të nisur një sulm bërthamor, por asnjëra nuk guxonte të sulmonte për shkak të pasojave nga kundërpërgjigjja.

Gjithsesi, avancimi në Inteligjencën Artificiale do të thotë që kjo paqe nuk është më e garantuar, pasi nëse një prej superfuqive do t’i shkatërronte mundësinë për t’u kundërpërgjigjur palës tjetër, atëherë do të ekzistonte edhe mundësia që ata të përdornin arsenalin nuklear, e kjo vështirë se mund të parandalohet në të ardhmen.

Pretendimet vijnë nga “Rand Corporation”, një organizatë jofitimprurëse në Santa Monica të Kalifornisë, e cila ofron hulumtime dhe analiza për forcat e armatosura të Shteteve të Bashkuara të Amerikës mbi çështjet e politikave globale.

Kurti flet për ndërrimin e Qeverisë

Kryetari i Lëvizjes Vetëvendosje, Albin Kurti ka folur për buxhetin e Kosovës, për të cilin ka thënë se është tejet i ngjashëm nga viti në vit. Ai përmes një postimi në Facebook, ka shkruar se Kosova duhet të ndërrojë Qeverinë dhe buxhetin

Postimi i plotë:

Në Kosovë nuk është e vërtetë se ndërrohen qeveritë.

Buxheti i Kosovës është tejet i ngjashëm nga viti në vit: gati gjysma paga e mëditje dhe mallra e shërbime, çereku shpenzime kapitale (3/4 aty në asfalt) si dhe po aq subvencionet e transferet.

Të hyrat vetanake të komunave të Kosovës (gjysma prej të cilave tatim në pronë) nuk janë as 50 milionë euro në vit. 30 herë më shumë janë të hyrat tatimore e të cilat përbëjnë mbi 2/3 e të hyrave buxhetore (me ç’rast afër 90% të tyre janë tatimet indirekte: TVSh, dogana dhe akcizë).

Në vitin 2017 nuk pati fare të hyra nga fitimet e nxjerra nga korporatat përmes dividentave.
Ndërkaq, tatimi në të ardhurat e korporatave ishte 75 milionë euro apo vetëm 5% e të hyrave tatimore.

Zhvillim ekonomik? Rrugëtim evropian? E pamundur me këtë strukturë dhe me këso shifrash.

Është e vërtetë se në Kosovë duhet të ndërrojë qeveria.

Sepse, duhet të ndryshojë buxheti: të hyrat dhe shpenzimet, planifikimi dhe realizimi i këtyre, gjithnjë në dritën e një vizioni zhvillimor socio-ekonomik për të ardhmen, e jo nën hijen e një administrimi dembel për mbijetesë në të tashmen.

Zhveshja ‘historike’ e Thaçit!

Nga Petrit Musolli

Hashim Thaçi s’asht nji politikan naiv, as s’ban gabime naive! Thaçi ka aftësinë e jashtëzakonshme me u imponue si negociator, mandej – konvertue në fuqi personale politike. Deri tash, i ka funksionue për mrekulli nji strategji e tillë.

Bazue në përvojën e tij politike, Thaçi, e ka kuptue ma mirë se tanë tjerët ‘urgjencën’ e perëndimit me e funksionalizue investimin e tij (Kosovën) mbrenda projektit të parapamë dhe, në të njajtën kohë, me e ndërtue besimin e Serbisë te perëndimi, e rrënueme, sidomos, me bombardimin e saj gjatë luftës së Kosovës.

Natyrisht se perëndimi s’do nji vend europian të shndërruem në bazë ruse, por, njikohësisht asht e dukshme se, shumica e vendeve europiane ende ruejn simpatinë e miqësisë së dikurshme me Serbinë. Dhe, e duen mbrenda!

Gjetja (imponimi) në rolin e protagonistit në nji projekt kaq krucial (por edhe kompleks) për interesat afatgjata të perëndimit, asht nji furnizues i vazhdueshëm fuqie politike, e që, mandej, mvarësisht prej formimit politik të përvetësuesit të kësaj fuqie politike – përcaktohet edhe orinetimi i tij, nëse ka me u personalizue ose kapitalizue për nji interes të përgjithshëm!

Nji mundësi për përfitim personal politik nga nji rol i tillë, e kishte nuhat edhe kryeministri i Shqipnisë, Edi Rama, por që përpjekjet e tij u shuen nga përvoja e Thaçit në këte terren manovrimi. Megjithatë, si çdo njeri i magjepsun nga mbivlerësimi për vetën, nji ditë ka me u përballë me zgjimin… edhe Thaçi!

Erdogani s’asht perëndimi! Ai s’e njeh xhentilesën politike, asht i ashpër si tanë autokratët! Për ma shumë, s’e preokupojnë të njajtat shqetësime që ka perëndimi për e lidhun me Kosovën. Erdogani beson se, tashma, asht i etabluem (politikisht, ekonomikisht dhe kulturalisht) në Kosovë, ndër popullatën shumicë, prandaj s’e ndjen as nevojën ma të vogël me kalkulue e koketue me politikanë kosovar!

Thanë ndryshe, Thaçi u gjet pa nji grimcë terren negocimi në kërkesat eksplicite të Erdoganit! I mbështetun për muri, mes zgjedhjes së fatit të tij politik apo atij shtetnor, Thaçi, sërish s’befason! Me gjithë çmimin e paguem të zhveshjes totale të figurës së tij politike! Pajtoi nënshtrimin e përuljen deri ku s’prek ma fytyra e njeriut.

I po njajti njeri që i ‘tregonte dhëmbët’ Bashkimit Europian! Kidnapimi dhe deportimi i gjashtë të përndjekurve turq nga regjimi i Erdoganit, shpërfaqi haptas pozicionin e ndjeshëm të nji presidenti të shantazhuem në tana anët! E pamë tanë se si shkel mbi gjithçka përpara nji president i shantazhuem – kur s’i mbetet nji grimcë hapësine kalkulimi e negocimi! E pamë tanë se s’asht ai presidenti kërkues e kërcënues si ndaj miqve tanë, shumë herë tolerues. Thjesht, ai, veçse s’ishte përballë asnjiherë ma parë me nji Erdogan, për me e zhvesh cullak, si tashma tanë e pamë!

Ish shefi i shërbimit sekret serb shan Haradinajn, lavdëron Thaçin

Ish-kreu i inteligjencës ushtarake serbe, Momir Stojanoviç, në një intervistë dhënë Agjencisë propaganduese ruse, e ka fyer kryeministrin e Kosovës, Ramush Haradinajn duke thënë se përbënë rrezik për sigurinë. Stojanoviç, ka përmendur dallimet në mes të Haradinajt dhe presidentit të Kosovës Hashim Thaçit. Thotë se Thaçi ka një kokë më të ftohtë se Haradinaj

“Haradinaj është një ushtarak dhe si i tillë, ai mund të jetë një kërcënim për sigurinë. Thaçi ka një kokë më të ftohtë, edhe pse ai është gjithashtu ekstremist”, tha Stojanoviç.

Tutje ish shefi i shërbimit sekret serb, ka folur edhe rreth arrestimit dhe më pastaj dëbimit nga Kosova të Marko Gjuriqit. Stojaniviç ka thënë se me këtë veprim qeveritarët kosovarë kanë rritur presionet në mes të Kosovës dhe Serbisë.

Sipas Momir Stojanoviç, kryeministri i Kosovës, Ramush Haradinaj, veprimin për arrestimin e dëbimin e Gjuriqit e bëri kundër dëshirës së serbëve të Kosovës, duke paralajmëruar se do të bëheshin arrestime nëse veprime të tilla bëhen sërish nga zyrtarët serb.

Ai shtoi se Serbia duhet të apelojë ndaj bashkësisë ndërkombëtare për të detyruar Prishtinën të ndërpresë retorikën e saj luftuese dhe të rifillojë dialogun.

Dialogu Prishtinë – Beograd nën tensionet e reja

Fillimi i fazës së re të dialogut ndërmjet Kosovës dhe Serbisë që po zhvillohet në Bruksel me ndërmjetësimin e Bashkimit Evropian, po përcillet me tensione e nervozë reciproke, që pasojnë zhvillimet e fundit në veri të Kosovës pas arrestimit dhe më pas deportimit të Marko Gjuriqit nga Policia e Kosovës

Tensionet në Kosovë të krijuara nga vizita e Gjuriqit e realizuar pa lejen e institucioneve të Kosovës dhe reagimi më pas i autoriteteve të Prishtinës, ndodhën vetëm tri ditë pasi që presidentët e Kosovës dhe Serbisë, Hashim Thaçi e Aleksandar Vuçiq përfunduan raundin e ri të dialogut në një darkë pune në Bruksel me lehtësimin e Përfaqësueses së Lartë të BE-së, Federica Mogherini.

Kjo fazë e re e dialogut, për përfaqësuesit politikë të Kosovës po interpretohet si pjesa finale, që duhet të përmbyllet me një marrëveshje normalizimi dhe e cila do t’i hapte rrugën Kosovës drejt anëtarësimit në Kombet e Bashkuara dhe mekanizmat e organizatat tjera ndërkombëtare.

Ndërkohë që Bashkimi Evropian proklamon që qëllim i këtij dialogu është relaksimi i raporteve ndërmjet dy vendeve, në mënyrë që Kosova dhe Serbia të vazhdojnë tutje me procesin e integrimit evropian.

Megjithatë, zhvillimet e fundit në veri të Kosovës, mënyra se si po zhvillohen bisedimet dhe si po paraqiten ato para opinionit, sipas politologut, Ramush Tahirit, po çon drejt një tensionimi të ri.

Në një bisedë për Radion Evropa e Lirë, ai tha se, ky lloji tensionimi po vërehet pas takimeve të zyrtarëve të të dyja vendeve, ngase të dyja palët po transmetojnë shpjegime të ndryshme rreth karakterit të bisedimeve.

Tahiri flet edhe për ndikimin e mundshëm që mund të ketë arrestimi i Gjurqit nga autoritetet në Kosovë, në dialogun mes Kosovës dhe Serbisë.

“Rasti i Gjuriqit është një rast i veprimit ilegal dhe është vepër kundërvajtëse e dënohet më ligjet e Kosovës. A ndikon në dialog apo jo? Varet se si palët do të trajtojnë. Pala kosovare konisderon se nuk ndikon sepse edhe në dialogun në Bruksel janë marrë vesh për procedurat se si do ndiqen kur një zyrtar i Serbisë vjen në Kosovë. Dhe këto procedura nuk janë ndjekur në këtë rast sepse përkundër refuzimit nga Ministria e Punës se Jashtme, drejtori i të ashtuquajturës Drejtori për Kosovë dhe Metohi, ka hyrë ilegalisht në Kosovë”, tha Tahiri.

Edhe analisti tjetër i çështjeve politike, Ilir Ibrahimi, thotë se kjo fazë kur dialogu po i afrohet pjesës finale të bisedimeve, po karakterizohet me tensionim të pozicioneve. Sidomos, sipas tij, te pala serbe po vërehet që me çdo mënyrë po përpiqet të provokojë situatën për të forcuar pozicionin e vetë negociues.

“Duke parë edhe provokimet që po ndodhin në veri të Kosovës, po duket se presidenti Aleksandar Vuçiq nuk është shkëputur plotësisht nga politika e Sllobodan Millosheviqit, i cili gjithmonë me provokimet e tilla ka arritur te caqet e veta në politikën e jashtme”.

“Kjo po shihet edhe nga zoti Vuçiq, sepse ne e dimë se ai ka bërë një deklaratë se çfarë do të donte të shihte si një zgjidhje për Kosovën dhe ndarja e Kosovës është një nga këto pika. Dhe nga këto veprime që po i shohim po duket se kjo strategji ka filluar të vihet në funksion”, thekson Ibrahimi.

Dialogu ndërmjet Kosovës dhe Serbisë zhvillohet në dy nivele, atë politik, ku delegacionet përfaqësohen nga presidentët e shteteve apo kryeministrat, dhe niveli teknik, që zhvillohet përmes ekipeve të ekspertëve, ministrave dhe përfaqësuesve të institucioneve nga të dyja shtetet.

Sidoqoftë, zhvillimet e fundit dhe vendimi i Listës Serbe me mbështetjen e Beogradit që njënashëm të themelojë Asociacionin e komunave me shumicë serbe, si një prej arritjeve më të mëdha të këtij dialogu, tashmë e kanë vënën nën pikëpyetje gjithë procesit dhe pritjet janë që këto çështje t’i adresojë me palët Bashkimi Evropian dhe vetë Përfaqësuesja e Lartë e BE-së, Federica Mohgerini.

Mogherini: Kosova drejt Evropës pa viza

Përfaqësuesja e lartë e BE-së për politikë të jashtme, Federica Mogherini ka mirëpritur ratifikimin e demarkacionit nga deputetët e Kuvendit të Kosovës

Mogherini ka shkruar në Twitter se ky është një lajm i mirë nga Prishtina.

“Lajme të mira nga Prishtina: ratifikimi i marrëveshjes për demarkacionin e kufirit me Malin e Zi, Kosova drejt Evropës pa viza për qytetarët e saj”, ka shkruar Mogherini.

Athina jep pëlqimin për emrin e ri ‘Gorna Makedonija’, por ka një kusht

Nikos Kotzias do të shkojë në Shkup më 22 mars me paktin gati për emrin e Maqedonisë. Negociatat janë në vijën e fundit dhe ka shumë të ngjarë që marrëveshja ndërkombëtare të shkojë në parlamentin grek në fillim të majit

Burime të cituara nga faqja e internetit hellasjournal thonë se qëllimi kryesor është të përshpejtohet procesi në mënyrë që çdo gjë të përfundojë në qershor – përcjell ResPublica.

Të njëjtat burime argumentuan se qeveria greke është plotësisht e kënaqur me emrin Gorna Makedonija në gjuhën sllave.

Kotzias i konsideron ndryshimet në emrat e aeroportit dhe të autostradës “zhvillime të mira” por thekson se kjo nuk mjafton. Në paketën greke ndryshimi i kushtetutës së Maqedonisë është një kusht për të përfunduar marrëveshjen.

Lidhur me ndryshimin e Kushtetutës, Zaev thotë se nuk ka votat e nevojshme as në parlament edhe as në partinë e tij.

Në të njëjtën kohë, përplasjet për pranimin e gjuhës shqipe si gjuhë e dytë zyrtare pritet të ndikojnë negociatat për emrin, pasi popullsia shqiptare nuk e sheh veten në emërtimin e ri.

Erzen Rrustemi mbron titullin e botës

Boksieri shqiptar, Erzen Rrustemi, ka mbrojtur me sukses titullin e botës në pesha të rënda WBF. Ai në Karsluhe të Gjermanisë, ka mundur boksierin argjentinas, Juan Pedro Gugli Elmetti, shkruan albinfo.ch

Boksieri i cili jeton dhe vepron në Zvicër, ka qenë mjaft i mirë në fillim të meçit, duke e hedhur dy herë kundërshtarin në tapetë. Ndodhi kjo në raundin e dytë, ku gjyqtari e ndërpreu meçin dhe e shpall fitues, boksierin shqiptar.

Edhe në këtë meç një numër i madh i bashkatdhetarëve kishin shkuar për të përkrahur boksierin shqiptar, i cili i ka falënderuar për përkrahjen e madhe që i kanë dhënë.

Përveç mbrojtjes së titullit, Erzen Rrustemi fitoi edhe titullin GBU (Global Boxing Union).

Akademia Serbe e Shkencave paralajmëron libër për Kosovën

Akademia Serbe e Shkencave dhe Artit (SANU) ka paralajmëruar që së shpejti, ndoshta deri në fund të këtij muaji, të dalë me një libër që përmban mendimet e anëtarëve të saj rreth Kosovës, që lidhen me dialogun e brendshëm të iniciuar nga presidenti i Serbisë Aleksandar Vuçiq, bëjnë të ditur mediat e Beogradit

Nënkryetar i këtij institucioni, Lubomir Maksimoviq, bëri të ditur se në këtë libër do të përfshihen më shumë se dhjetë tekste autoriale të akademikëve, ndër ta Vuksanoviqit, Varadit, Çavoshkit…”

Po ashtu në të do të përfshihen edhe diskutimet që u zhvilluan rreth kësaj çështjeje nëpër seksionet e kësaj akademie, ndërsa libri do të ketë 250 faqe dhe do të botohet në tirazh të madh.

Disa nga pikëpamjet e këtyre akademikëve për Kosovën, të publikuara deri më tash në mediat serbe, nuk dallojnë nga ato të shfaqur përmes Memorandumit të kësaj akademie dekada më parë, që çuan në luftëra të përgjakshme midis Serbisë e pjesëve të tjera të Ish-Jugosllavisë, transmeton Koha.net.