Federata e Atletikës mbështet Smajlajn: E penalizuan në mënyrë të turpshme

Në foto është momenti që shkaktoi zemërim në delegacionin shqiptar të atletikës gjatë garimit të Izmir Smajlajt në kërcimin së gjati në Evropianin që po zhvillohet në Berlin

Presidenti i Federatës Shqiptare të Atletikës, Gjergj Ruli në një prononcim për Top Channel shprehu indinjatën e tij për manipulimin që iu bë rezultatit të 25-vjecarit, rezultat që e la jashtë luftës për medalje.

“Do t’ua dokumentoj të gjithë mediave shqiptare se çfarë ka ndodhur me të vërtetë me rezultatin e Izmirit. Në kërcimin e tretë, ka kërcyer në kufirin e 8 metrave dhe duhet të ishte në mënyrë absolute finalist. Fillimisht u dha nëj rezultat më i dobët dhe më pas e korrigjuan, por sërish nuk na dhanë hakun”, tregoi Ruli.

Ruli deklaroi gjithashtu se e gjithë kjo ishte një turp i madh dhe se gjyqtarët e garës u munduan ta mbulonin, duke deklaruar se ka pasur ankesa edhe nga Federata të tjera.

“Për të mos marrë përsipër gjyqtaria turpin apo gabimin, tha se ka ankesë nga Suedia, Polonia, Ukraina dhe Shqipëria. Unë do ta quaja një turp, që atletit tonë iu hoqën pretendimet për medalje”, deklaroi Ruli.

Në fund presidenti i Federatës Shqiptare të Atletikës deklaroi se Smajlaj do të marrë pjesë në evenimentin e përvitshëm që zhvillohet në nder të rekordmenit evropian të kërcimit të gjati, Robert Emmiyan, ku shkodrani do të kërkojë të vëjë nderin në vend për padrejtësite që iu bënë në këtë evropian.

Vizat, pengesë për sportistët kosovarë

Regjimi i vizave për shtetin e Kosovës, vazhdon t’u sjellë shumë telashe edhe sportistëve kosovarë. Si pasojë e mospajisjes me viza nga Bosnje dhe Hercegovina, basketbollistët e Përfaqësueses U16 të Kosovës, rrezikojnë të humbin Kampionatin Evropian, FIBA-U16, që do të mbahet në Sarajevë nga 9 deri më 18 gusht

Ka tri ditë që basketbollistët e Kosovës, po presin para Ambasadës së Bosnje dhe Hercegovinës në Shkup, për t’i marrë vizat, mirëpo ende nuk kanë marrë përgjigje pozitive. Federata e Basketbollit të Bosnjës e Hercegovinës përmes një komunikate për shtyp, ka bërë të ditur se janë duke pritur pëlqimin e ministrit të Jashtëm, Igor Crnadak, që basketbollistët e Kosovës t’i marrin vizat.

“Federata e Basketbollit e Bosnjës dhe Hercegovinës i ka ndërmarrë të gjitha masat që përfaqësuesja e Kosovës me kohë të marrë viza për hyrje në shtetin tonë. Nga ambasada jonë në Maqedoni e kemi marrë njoftimin se vizat janë të gatshme, dhe se vetëm pritet që ministri i Jashtëm, Igor Crnadak, të japë pajtimin që vizat t’i lëshohen përfaqësueses së Kosovës”, thuhet në komunikatë.

Kjo që ka ndodhur, sipas drejtuesve të Federatës së Basketbollit të Kosovës, është tërësisht politike, pasi ministri i Jashtëm i Bosnjës, Igor Crnadak, nuk ka dhënë pëlqimin për lëshimin e vizave Përfaqësues së Kosovës në Shkup.

Sekretarja e Federatës së Basketbollit të Kosovës, Elvira Dushku, thotë për Radion Evropa e Lirë, se kjo pengesë është e pakuptueshme dhe tërësisht politike.

Ajo thotë se ministri i Jashtëm i Bosnjës e Hercegovinës është serb dhe po pengon basketbollistët e rinj që të marrin pjesë në kampionat.

“Ne vetëm po e presim përgjigjen, sepse deri tani jemi treguar të durueshëm dhe kemi qenë shumë transparentë edhe me FIBA-n edhe me Federatën e Basketbollit të Bosnjë e Hercegovinës, por në momentin që ne marrim përgjigje negative, atëherë ne do të bëjmë notë proteste, edhe në FIBA edhe në Komitetin Olimpik Ndërkombëtar, sepse kjo çfarë me të vërtetë ka ndodhur, nuk të bëjë asgjë me sport. Kjo është e tëra politike dhe ne nuk do ta lejojmë një gjë të tillë”, thotë Dushku.

Edhe kryetari i Komitetit Olimpik të Kosovës, Besim Hasani, thotë se kjo çfarë po ndodh me Përfaqësuesen e Kosovës, është tërësisht politike.

“Ky vendim është tërësisht politik dhe bie në kundërshtim me të gjitha qëndrimet, konventat e sportit, në përgjithësi. Unë po besoj se ata do t’i marrin vizat,përndryshe kjo do të ishte vërtet edhe një goditje e sportit nga ana e politikës dhe një intervenim apo ndërhyrje e politikës në sport”, deklaron Hasani.

Një situatë e tillë, më së shumti ndikon te basketbollistët e rinj, të cilët, sipas sekretares së FBK-së, Elvira Dushku, janë demoralizuar. Ajo thotë se është e padrejtë që sportistët e rinj të Kosovës, të mos jenë të barabartë me pjesëmarrësit e tjerë në këtë kampionat.

“Ky është një demotivim, për të mos thënë një demoralizim, për basketbollistët e rinj. 23 shtete së bashku me basketbollistët e tjerë, tashmë u është dhënë e drejta për të marrë pjesë në këtë kampionat, ndërsa vetëm këta janë ata që nuk mund të marrin pjesë. Normalisht, që për ta është dëshpëruese, sepse nuk e shohin veten të barabartë, edhe pse jemi të barabartë me shtetet tjera”, thotë Dushku.

Ndaj kësaj ndalese ka reaguar edhe Ministria e Punëve të Jashtme të Kosovës, duke kërkuar nga shteti i Bosnjës që të mos e përziejë sportin me politikë. Në reagim, MPJ-ja ia ka rikujtuar Bosnjës se pavarësisht qëndrimeve politike, sportistët e Kosovës janë respektuar edhe nga Federata Ruse.

Bosnje e Hercegovina nuk e njeh pavarësinë e Kosovës dhe të dyja shtetet, aplikojnë ndaj njëra-tjetrës regjimin e vizave.

Ja çka bënë Xhaka dhe Shaqiri, pas përjashtimin e Behramit

Prapaskenat pas përjashtimit të Behramit. Granit Xhaka dhe Xherdan Shaqiri kanë qenë të gatshëm ta lënë Kombëtaren pas përjashtimit të Valon Behramit

Lajmi konfirmohet nga ky i fundit, që ka arritur t’i qetësojë shokët e tij, përcjellë “Lajmi.net”.

“Ata kanë pasur arsye shumë të forta ta lënë këtë kombëtare. Unë kam tentuar t’i qetësoj dhe të komunikoj me ta”, deklaroi Behrami.

“Sekretari i Përgjithshëm më ka ftuar që ti qetësoj shokët e mi”.

“Unë e kam bërë këtë sepse kam dëshirë të bashkoj njerëz dhe jo ti ndaj ata”, shtoi ai.

Formacioni i frikshëm i Juventusit me Ronaldon e Bonuccin

Trajneri i Juventusit, Massimiliano Allegrit, pas ndeshjes me “MLS All-Stars” ku ekipi i tij fitoi me penallti, konfirmoi se Leonardo Bonucci do të rikthehet te bardhezinjtë pas një viti, ndërsa Mattia Caldara dhe Gonzalo Higuain kanë marrë drejtimin e kundërt, drejt Milanos

Kjo është një goditje e madhe në merkato për Juven, pas transferimit të shekullit, Cristiano Ronaldos nga Real Madridi për 100 milionë euro.

Juve vazhdon të ëndërrojë Championsin, ëndërr të cilën duan ta bëjnë realitet dhe me skuadrën që kanë ndërtuar, pasi kanë transferuar edhe Cancelon e Emre Canin, atëherë mund ta ngritin lartë trofeun me veshë.Mediet në Itali kanë publikuar skuadrën e frikshme të Juves, nga dy lojtarë në çdo pozitë, teksa 11-shja do të jetë si kurrë më parë; Szczęsny, Sandro, Chiellini, Bonucci, Cancelo; Can, Pjanic, Matuidi, Dybala, Costa dhe Ronaldo. /Insporti.com/

Modriç tek Interi? Ja të gjithë skenarët e mundshëm

Sugjerim, ëndërr, negociatat janë pothuajse të pamundura. E tillë është ideja “Luka Modric” për Interin, që i lejon tifozët zikaltër të ëndërrojnë se mund ta bëjnë të tyrin mesfushorin më të mirë të Kupës së Botës në Rusi

E gjitha filloi nga propozimi i bërë në rrethin e kampionit kroat (i ndihmuar nga gruaja e tij, Vanja Bosnic), teksa klubi zikaltër tashmë ishte duke përfunduar sulmin mbi Arturo Vidal, për të cilin duket se ka arritur një marrëveshje në parim me Bayern Munich për një huazim, me të drejtën e shpengimit të vendosur në shifrat 18-20 milionë euro, me një kontratë trevjeçare prej 4.5 milionë euro në sezon.

Kiliani është duke ngrirë zhvillimet në pritje të mëtejshme të situatës me Modric, por kjo nuk është rastësi, që agjenti i tij, Fernando Felicevich, është parë në Milano. Sinjal se përfaqësuesit e kroatit duan të shohin në mënyrë të qartë, për të kuptuar nëse vërtetë Inter ka ndërmend ta mbyllë me Vidalin, i cili tashmë e ka premtuar veten në të gjitha aspektet ndaj zikaltërve.

Por, në qoftë se horizonti premton një mundësi të rëndësishme si kjo, për të marrë Modric, ndryshimi i kursit nga udhëheqja e Interit duket e ligjshme dhe e justifikueshme. Siç raportohet nga “La Gazzetta dello Sport”, megjithatë, do të jetë në dorën e agjentëve të kroatit për të gjetur një zgjidhje me Real Madridin.

Siç ndodhi edhe me Cristiano Ronaldon. Interi nuk mund të përballojë akord direkt me Florentino Perez, ndaj përfundimisht do të presë një kërkesë shumë të veçantë të mesfushorit për lamtumirë nga “Bernabeu”.

Rritja e kolonisë kroate tek Interi, nga dy deri në tre lojtarë (Vrsaljko është i fundit), përveç faktit për të besuar se ciklit të tij në Spanjë i ka arhur fundi, do ta shtyjë Modric në këtë aventurë të re. Interi mund të përballojë një huazim të kushtueshëm, me të drejtën e shpengimit të plotë. Një zgjidhje që nënkupton angazhimin prej 10 milionë eurosh fitime neto në sezon, shumëzuar për katër vite kontratë në Milano.

Aktualisht, Modric është me pushime në Sardenjë, por pas kthimit të tij (që do të ndodhë së shpejti), gjithçka mund të ndryshojë: kroatin ose Vidal, në çdo rast, Interi do të marrë njërin prej tyre. Dhe, nëse do t’i merrte të dy, atëherë qëllimi për diçka të madhe në sezonin e ri do të ishte më shumë se i ligjshëm./TeleSport

Ja kur do të takohen dy “bishat” Fury dhe Wilder

Tyson Fury e ka konfirmuar se është në bisedime të avancuara për ta caktuar një luftë me Deontay Wilder për titullin e botës WBC

Fury është rikthye në qershor pas një pauze dy vjeçare, kur e mposhti boksierin shqiptar Sefer Seferin, duke e nisur rrugëtimin drejt majave të peshave të rënda.

Ish kampioni i botës do të përballet me Francesco Pianeta në Belfast muajin e ardhshëm, por ka zbuluar se ekipi i tij është në fazë të avancuar që të bien dakord për një marrëveshje me boksierin amerikan Wilder, që do të zhvillohet këtë vit më vonë (dhjetor).

“Unë mund ta konfirmoj se unë dhe Deontay Wilder jemi në negociata” ka thënë fillimisht Fury në një video të postuar në Tëitter. “Jemi shumë afër për t’u marr vesh”.

“Unë mund ta zbuloj se negociatat janë shumë të forta për në dhjetor. Ne jemi gati me këtë marrëveshje, por nuk do ta anuloj takimin me Francesco Pianeta, pasi me të do ta marr përgatitjen që të jem gati për Deontay Wilder”.

“Duhet ta mposht atë së pari dhe pastaj Wilderin, le të kërcejmë”, ka thënë Fury, ku nuk ka munguar as thumbimi drejt Anthony Joshuas dhe menaxherit të tij.

Pamjet e këtij autogoli po bëjnë xhiron e rrjetit (video)

Futbollisti i ekipit kinez, Beijing Guoan, Wei Shihao e mbylli ndeshjen ndaj Shanghai Shenhua me një episod, i cili vështirë se mund të besohet

Shihao u aktuivizua në minutën e fundit të takimit, kur skuadra e tij po kryesonte me rezultatin 2-1, një lëvizje kjo e ndërmarrë nga trajneri i Beijing për të fituar kohë. Por, pas vetëm 43 sekondash në fushën e lojës, Wei Shihao u bë protagonist i një prej autogolave më të pabesueshëm në futboll.

Ai gjuajti fort me të djathtën në zonën e skuadrës së tij, duke e mposhtur portierin dhe duke iu dhuruar kundërshtarëve një barazim, të cilin ata nuk e prisnin.

Transferimi i verës nga Barcelona shënon golin e parë

Transferimi i Barcelonës në verë, Arthur Melo, ka debutuar në mënyrë fantastike me ekipin e ri

Ai realizoi gol të jashtëzakonshëm ndaj Tottenhamit. Melo shënoi me një goditje të fuqishme dhe të saktë nga distanca. Sfida u mbyll 2:2 ndërsa Barca fitoi me penallti. Melo bëri një paraqitje fantastike.

Shaqiri flet pas golit dhe debutimit me Liverpoolin

Xherdan Shaqiri ka debutuar në mënyrën më të mirë të mundshme te Liverpool. Skuadra e tij ka shënuar fitore bindëse (4:1) ndaj rivalit të përjetshëm, Manchester United, ndërsa mesfushori nga Kosova, i cili u aktivizua në lojë në minutën e 68-të, ka shënuar gol spektakolar në mënyrë akrobatike

“Është një ditë e mrekullueshme për mua. Ky është një ekip i shkëlqyer me lojtarë të mrekullueshëm. Jam shumë i lumtur që ndodhem këtu”, tha fillimisht Shaqiri për LFCTV.

“Unë gjithmonë shënoj kësi gola në stërvitje pasi më pëlqen të gjuaj kështu. Është një gol i mrekullueshëm, por më mahnitëse e bën gjëja që luaj për këtë klub. Jam shumë i lumtur”.

“Krejt çfarë dua është të tregojë lojën time, të luaj futbollin që di. Kam shumë përvojë dhe dëshiroj ta ndihmoj këtë ekip të shkojë përpara. Jam me të vërtetë i lumtur për golin që gëzoi tifozët”.