Zyrtare: Ronaldo fiton ‘Topin e Artë’

Cristiano Ronaldo ka fituar “Topin e Artë” për vitin 2017

Ylli i Real Madridit e fiton këtë çmim për herë të pestë në karrierë, duke e barazuar kështu rivalin e tij, Lionel Messin.

Ky çmim për reprezentuesin portugez vjen pas një edicioni të shkëlqyeshëm, gjatë të cilit fitoi ligën spanjolle, Ligën e Kampionëve, Superkupën Spanjolle dhe atë Evropiane.

Champions League/ Reali fiton me Dortmundin, eleminohet Napoli, Liverpuli siguron kreun

Real Madrid ka fituar me rezultatin 3-2 ndaj Borussia Dortmund, në kuadër të fazës së grupeve të Ligës së Kampionëve

Kampionet e Evropës, kane marre nje fitore te veshtire kunder gjermaneve në “Santiago Bernabeu.”
Golat për vendësit i shënuan Mayoral, Ronaldo dhe Vazquez, ndërsa për miqte të dy golat i shënoi Aubameyang.

Me golin e sotëm Ronaldo bëhet lojtari i parë që shënon në gjashtë ndeshje të fazës së grupeve dhe shënon 60 gola në këtë fazë, duke barazuar kështu Leo Messin.

​Manchester City është mposhtur me shifrat 2-1 ndaj Shakhtar Donetsk, për të përfunduar fazën e grupeve si kryesues, ndërsa ukrainasit në vendin e dytë

Shakhtar Donetsk me kete fitore kualifikohet në mesin e 16 skuadrave më të mira në Evropë.

Golat për vendësit i shënuan Bernard dhe Ismail në pjesën e parë, ndërsa për Cityn shënoi Aguero nga penalltia.

Pas kësaj ndeshje, Manchester City mbetet lider në Grupin F me 15 pikë, tre më shumë se sa Shakhtar në vendin e dytë.

Napoli pas kësaj ndeshje ka mbetur jashtë Ligës së Kampionëve, pasi renditet vetëm në vendin e tretë më 6 pikë, duke siguruar kalimin në Europa League.

Rezultatet e mbremjes se sotme te “Uefa Champions League”.

Porto 5-2 Monaco

Feyenoord 2-1 Napoli

Liverpool 7-0 Spartak Moscow

Maribor 1-1 Sevillia

Lepzing 1-2 Besikatas

Real Madrid 3-2 B. Dortmund

Shakhtar Donetsk 2-1 Manchester City

Tottenham 3-0 APOEL

Dy lokacione, një stadium – Qeveria shuan nesër dilemat

Plani i qeverisë Mustafa për ndërtimin e stadiumit kombëtar në Bërnicë nuk i pëlqeu qeverisë së re – të emëruar në shtatorin e këtij viti – edhe pse projekti i qeverisë Mustafa kishte kaluar disa procedura të rëndësishme. Vetëm një muaj më vonë, Ministri i Sportit në Qeverinë Haradinaj, Kujtim Gashi foli për zhvendosjen e stadiumit kombëtar – nga Prishtina në Drenas

Kur në marsin e vitit të kaluar Isa Mustafa doli të inspektonte tokën e ndarë nga Qeveria e Kosovës në Bernicë për ndërtimin e Stadiumit Kombëtar, ish-kryeministri deklaronte se “së shpejti” do nisnin punimet që do ta bënin Kosovën me një stadium modern. Mustafa thoshte se Kosova do të bëhej me një stadium kombëtar që do t’ia kishin zili edhe vendet e rajonit, e ato të Bashkimit Evropian.

Ish-ministri i Kulturës, Rinisë dhe Sportit në qeverinë Mustafa, Kujtim Shala, kishte deklaruar për Insajderin se Qeveria e Kosovës kishte shpronësuar tokën në fshatin Bërnicë. Madje, Shala kishte thënë se gjatë kohës sa kishte shërbyer ai si ministër, ishte hapur tender ndërkombëtar për studimin e fizibilitetit të lokacionit.

“Derisa isha ministër, qe hapur tender ndërkombëtar për studimin e fizibilitetit të lokacionit në Bërnicë të Poshtme (Prishtinë). Patën konkurruar nëntë kompani të huaja. Në këtë fazë ka qenë ky projekt në kohën kur unë e kam lënë detyrën e ministrit”, kishte thënë për Insajderin, Kujtim Shala, në një intervistë të realizuar një muaj më parë.

Por, plani i qeverisë Mustafa për ndërtimin e stadiumit kombëtar në Bërnicë nuk i pëlqeu qeverisë së re – të emëruar në shtatorin e këtij viti – edhe pse projekti i qeverisë Mustafa kishte kaluar disa procedura të rëndësishme.

Vetëm një muaj më vonë, Ministri i Sportit në Qeverinë Haradinaj, Kujtim Gashi foli për zhvendosjen e stadiumit kombëtar – nga Prishtina në Drenas. Për këtë vendim të marrë, ministri Gashi tha se ka disa arsye.

“Ne jemi duke e analizuar, pasi mundësi pak më e mirë po na duket Drenasi, për shkak se e ka aeroportin afër, autostradën, dhe gjitha. Dhe është në mes të Kosovës”, deklaronte Gashi, ideja e së cilit u mbështet publikisht edhe nga kryeparlamentari Kadri Veseli. Nesër, Qeveria e Kosovës do të vendos rreth projektit të Stadiumit Kombëtar.

Oferta e Hungarisë për ndërtimin e Stadiumit Kombëtar

Vetëm një ofertë konkrete ka marrë Qeveria e Kosovës për financimin e Stadiumit Kombëtar: Qeveria e Hungarisë i kishte prezantuar qeverisë kosovare një projekt për ndërtimin e këtij stadiumi përmes një kredie të favorshme në Bankën Shtetërore të Hungarisë.

Oferta për stadiumin dhe marrëveshja e pa arritur – rrëfimi i Ambasadorit të Hungarisë

Negociatat mes dy qeverive kishin nisur në verën e vitit 2016, për ndërtimin e stadiumit që si model do të kishte “Groupama Arena” – stadiumin kombëtar të Hungarisë që është ndërtuar para tri vitesh.

Në një intervistë dhënë Insajderit, Ambasadori i Hungarisë në Kosovë, Laszlo Markusz kishte thënë se oferta hungareze për stadiumin qëndron ende, teksa ka rrëfyer për negociatat e zhvilluara mes dy qeverive.

“Hungaria është e gatshme të ofrojë përvojat e qeverisë në ndërtimin e stadiumit dhe firmat hungareze janë gjithashtu të gatshme të ofrojnë ekspertizën e tyre”, kishte thënë Márkusz, teksa publikisht i kishte bërë ofertë Qeverisë së Kosovës për projektin e ndërtimit të Stadiumit Kombëtar.

Megjithatë, fakti se një marrëveshje mes Hungarisë dhe Kosovës për projektin dhe financimin e tij nuk është arritur, kishte bërë që mënyra e financimit të Stadiumit Kombëtar – për të cilin u bë zhurmë e madhe rreth ndërrimit të lokacionit të tij nga Prishtina në Drenas – të mos dihet ende.

Ministria nuk u konsultua me FFK-në për zhvendosjen e lokacionit të stadiumit

Muajin e kaluar, ministri i Sportit, Kujtim Gashi njoftoi se lokacioni i Stadiumit Kombëtar do të zhvendoset nga Bërnica e Prishtinës, në Korreticë të Drenasit. Për këtë ndërrim të lokacionit, ai dha disa arsye.

“Ne jemi duke e analizuar, pasi mundësi pak më e mirë po na duket Drenasi, për shkak se e ka aeroportin afër, autostradën, dhe gjitha. Dhe është në mes të Kosovës. Do të thotë është një ide që po na pëlqen edhe neve”, ishte shprehur Gashi, në një intervistë me Gazetën Express.

Por, për një vendim të tillë kishte thënë të mos jetë njoftuar kryetari i Federatës së Futbollit të Kosovës, Fadil Vokrri. Shefi i FFK-së i kishte thënë Insajderit se Ministria e Sportit nuk është konsultuar me federatën për projektin e Stadiumit Kombëtar.

“Ne zyrtarisht nuk jemi informuar ende për këtë vendim dhe për arsyet e zhvendosjes së lokacionit. Momentalisht nuk mund të them asgjë pa i marrë zyrtarisht arsyet dhe fundi i fundit, federata nuk ka qenë e konsultime as atëherë as tash”, kishte thënë Vokkri për Insajderin.

Vokrri kishte thënë se për FFK-në është me rëndësi që të bëhet Stadiumi Kombëtar, pa dashur të jepte preferencë se ku do dëshironte të ndërtohej ky stadium.

“Ata [Qeveria e Kosovës] janë financues përmes fondeve ndërkombëtare, për ne është me rëndësi që të bëhet stadiumi. Për mua do të kishte më shumë rëndësi që të thirren ekspertët për të propozuar lokacionin”, kishte deklaruar Vokrri. /Insajderi

Romela Begaj, medalje ari në Botërorin e Peshëngritjes

Spektakël jashtëzakonshëm i peshëngritjes shqiptare me Romela Begajn në Botërorin e Peshëngritjes që po zhvillohet në Shtetet e Bashkuara të Amerikës

Sportistja shqiptare që garon në peshën deri në 69 kg mori medaljen e artë në shkëputje dhe u shpall nënkampione e botës në dygarësh.

Begaj i kaloi me sukses të tre provat në stilin e shkëputjes, me 103, 105 dhe 107 kg. Në ketë stil, Romela konkurroi fort me dy peshëngritëset kolumbiane, duke u rrëmbyer medaljen e arit, raporton Tch.

Edhe në shtytje Romela bëri një garë të mirë me dy provat e para të realizuara me sukses, me 125 dhe 128 kg. Me provën e tretë Romela Begaj tentoi 131 kg, por nuk mundi të realizojë ngritjen.

Në përfundim në dygarësh Romela Begaj arriti në 235 kg, duke u shpallur nënkampione e botës, rezultati më i mirë i saj në një botëror dhe padyshim rezultat historik për peshëngritjen shqiptare.

Hidhet shorti i Kampionatit Botëror ‘Rusia 2018

Është hedhur shorti për Kampionatin Botëror Rusia 2018, ku nuk mungojnë grupet shumë të forta.Ishte presidenti i Rusisë, Vladimit Putin, ai që ka hapur ceremoninë, duke iu uruar mirëseardhje të gjitha kombëtareve që do të jenë të pranishme në këtë event madhor

11 qytet dhe 12 stadiume do ta presin Kampionatin Botëror, ku Rusia ka investuar shumë dhe sipas FIFA-s do të jetë njëri ndër më të bukurit të organizuar.

Presidenti i FIFA-s, Gianni Infantino, i cili foli mbi investimet dhe formatin e këtij Kampionati Botëror.

Shorti u hedh nga legjenda të futbollit si Laurent Blanc, Gordon Banks, Cafu, Fabio Cannavaro, Diego Forlan, Diego Maradona, Carles Puyol dhe Nikita Simonyan.

Tete vendos rekord të ri botëror në boks, nokauton kundërshtarin për vetëm 11 sekonda (video)

Claxton dhuron një goditje ‘vrasëse’ në debutimin e tij në MMA, gjyqtari ndërprenë ndeshjen pas vetëm 11 sekondash. Kështu, gjyqtari u detyrua ta ndërpresë luftën pas vetëm 11 sekondave – vendosje e një rekordi të ri botëror në një finale boks.

Rekordi i mëparshëm në boks ishte për 17 sekonda pas ndeshjes midis boksierëve Daniel Jimenez dhe Harald Geier në vitin 1994. Boksieri Gonya, pas nokautit mori trajtim mjekësor brenda ringut para se të kthehej në këmbë, duke kërkuar një maskë oksigjeni.

“E dija që meçi me Gonyan nuk do të zgjaste, unë fitova në raundin e parë!’, ka thënë fillimisht Tete pas ndeshjes. “Trajnerët e mi janë ata që bëjnë punën prapa skenave, dëshiroj t’i falënderoj”, përfundoi boksieri nga Afrika e Jugut.

Ndryshe, boksieri Tete ka 29 ndeshje të zhvilluara si profesionist, ku nga to ka 26 fitore, 21 prej tyre me nokaut dhe tri humbje.

Super dueli: Ilir Latifi vs Tyson Pedro, ia vlenë të rishikohet (video)

Përballja në Edmonton, Alberta, Canada në Ultimate Fighting Championship, Artet e Kombinuara Marciale ndërmjet Latifit dhe Pedros

Dueli në Ultimate Fighting Championship mes Ilir Latifit me origjinë shqiptare dhe Tyson Pedros ka rezultuar me fitoren e Latifit. Por jo vetëm kjo, Latifi ka fituar mendjen dhe zemrën e tifozëve gjithashtu te presidentit të UFC Dana White.

Ai pas ndeshjes me Pedron tha se dëshiron të përballet me Ovince St-Preux, dhe duket se kjo i ka hyrë në vesh Preux dhe trajnerit të tij, pasiqë në ndeshjen e fundit Preux pasi fitoi me KO ai tha se jam i gatshëm ti përgjigjem thirrjes së Latifit dhe se dua që kjo të ndodh sa më shpejt.

Rezultati Final në ndeshjen e Ilir Latifi dhe Tyson Pedro-s ishte në anën e Latifit, me vendim të gjyqtarëve (29-28, 29-28, 30-27).

Rrëfimi prekës i Xhakës për ‘The Guardian’: Im atë i burgosur në ish-Jugosllavi, forca ime

Mesfushori i Arsenalit flet për përballjen me Tottenhamin, përse Londra i kujton fëmijërinë e tij dhe pse beson se forca e tij mendore vjen nga historia e babait të tij si i burgosur politik në ish-Jugosllavi

Është historia që e ka formuar Granit Xhakën dhe që ka ushqyer personalitetin e zjarrtë brenda tij. Detajet janë të ashpra, mezi të kuptueshme, dhe është e çuditshme se si mesfushori i Arsenalit mund t’i artikulojë ato. Pastaj, ashtu si babai i tij, Ragipi – i cili kaloi tri vjet e gjysmë si i burgosur politik në Jugosllavi – Xhaka nuk është një njeri që fshihet.

“Me sa di unë, muajt e parë të tij në burg ishin në rregull,” thotë Xhaka. “Por pastaj filluan torturat.”
“Krimi” i babait të Granit Xhakës ishte pjesëmarrja në demonstrata kundër qeverisë qendrore komuniste në Beograd.

Ishte viti 1986 dhe ai ishte një student 22-vjeçar në Universitetin e Prishtinës në Kosovë, e cila asokohe ishte një krahinë autonome në Jugosllavi. Ai do të arrestohej dhe do të mbahej në burg për më shumë se tri vjet, raporton “The Guardian”.

“Si biri i tij, kjo është një histori që më prek shumë thellë – është me të vërtetë në zemrën time”, thotë Xhaka. “Për ta përshkruar babain tim siç duhet, ju duhet të vlerësoni atë thellësisht. Është kaq tragjike. Ndonjëherë e pyes: ‘Më trego përsëri’, sepse unë ende mendoj se ai s’i ka zbuluar të gjitha. Ka patur gjithmonë momente të heshtura, ku unë kam parë se ai ka gëlltitur diçka dhe nuk ka zbardhur të vërtetën. Ndoshta ishte e shumtë dhe ai donte t’i kursente fëmijët e tij nga pikëllimi.”

“Ai ishte një kosovar krenar dhe mendonte se ata kishin të drejtë të ekzistojnë. Ai po qëndronte në këmbë për të drejtat e tyre dhe ishin të drejta themelore demokratike, siç është mundësia për të votuar. Nuk ishte vetëm ai. Ishin arrestuar edhe të tjerë, përfshirë xhaxhain e tij, i cili ishte burgosur disa vite më përpara. Ai qëndroi 15 vjet në burg. Ishin burgime krejtësisht politike. Babai im po pyeste veten: ‘Pse nuk kemi demokraci këtu? Ne meritojmë të jemi demokratë. Ne meritojmë që zëri ynë të dëgjohet’”.

Ta kuptosh Xhakën, do të thotë ta kuptosh familjen e tij; se si ata kanë vuajtur, se si ata kanë qëndruar të bashkuar dhe se si kanë punuar pa u lodhur për të arritur në jetë. Parimet e tij janë besnikëria dhe respekti. Kur ai bën diçka, ai e bën atë me zemër dhe me shpirt – ashtu si babai i tij dhe ashtu si nëna e tij, Eli.

“Një nga detajet më interesante në lidhje me prindërit e mi është se ata u bashkuan me njëri-tjetrin vetëm tre muaj para arrestimit të babait tim”, thotë Xhaka, shkruan Insajderi. “Kam një respekt të pabesueshëm për nënën time. Unë kurrë nuk kam dëgjuar për një grua që ka qenë me një burrë për vetëm tre muaj – në atë moshë të re – dhe që pastaj e ka pritur atë për tri vjet e gjysmë. Nëna ime është thjesht një person i pabesueshëm.”

“Një nga gjërat më të çuditshme është se ne nuk e dimë pse babai im u lirua herët nga dënimi i tij, por ai e la burgun në të njëjtën kohë me xhaxhain tim. Asnjë nga familja nuk e dinte që janë liruar, derisa ata ishin kthyer në shtëpi.Prindërit e Xhakës e dinin se kishin nevojë për një fillim të ri dhe, në vitin 1990, ata emigruan në Zvicër. Djali i tyre i parë, Taulanti, do të lindte në Basel në vitin 1991, me Granitin pas 18 muajsh.

“Babai im tregoi një forcë të pabesueshme dhe Taulanti e unë u rritëm me forcën e tij mendore”, thotë Xhaka. “E kemi pasur këtë idhull, këtë shembull, i cili na mësoi se duhet të jesh i fortë për të arritur gjëra. Pra, ne u rritëm shumë të fortë. Kjo është arsyeja pse në fushë, ne kemi këtë forcë mendore për t’i bërë gjërat mirë”.

Xhaka i detyrohet gjithçka Zvicrës, dhe mundësitë që atij i ka ofruar ky shtet, por ai nuk mund dhe nuk do t’i harrojë rrënjët e tij shqiptare, të cilat vazhdojnë ta prekin atë edhe në Londër. Gjatë fotografimit për këtë intervistë në Camden Town, një kalimtar shqiptar pothuajse hyn në rrugën ku po bënim fotot, pasi ai e njeh Xhakën. Ai u gëzua shumë kur Xhaka e përshëndeti atë në gjuhën shqipe.

“Kam gjetur këtu disa shqiptarë vërtet të mirë”, thotë Xhaka. “Disa prej tyre drejtojnë një autolarje të veturave dhe unë e dërgoj veturën time atje. Ne bisedojmë dhe, sigurisht, flasim për futboll. Disa prej tyre janë mbështetës të Liverpoolit, disa të Manchester United-it dhe ka shumë tifozë të Arsenalit. Bëjmë shumë shaka”.

Xhaka jeton në Barnet me bashkëshorten e tij, Leonitën, por ata kanë gjetur një shtëpi shumë afër lagjes Camden – një nga lagjet më eklektike të kryeqytetit britanik. Ata shkojnë atje disa herë në javë – për të bërë shoping, për të drekuar apo vetëm për t’u qetësuar.

“Ndjej një lidhje me Camdenin që më kthen në fëmijërinë time”, thotë Xhaka. “Kur Taulanti dhe unë ishim fëmijë, bëmë udhëtimin tonë të parë me autobus nga Baseli në Prishtinë, në mënyrë që të mund t’i vizitonim gjyshërit tanë për herë të parë. Mamaja dhe babai im kishin punë me orar të plotë dhe, kështu ata punonin natën si pastrues zyrash. Autobusi ndalonte në vende të ndryshme dhe kisha parë diku dyqane të ngjashme, të cilat Camden mi kujton tani.”

“Unë jam një njeri shumë i thjeshtë, e dua normalitetin dhe i dua njerëzit e thjeshtë. Më pëlqen të ha ushqim normal. Ka të bëjë me mënyrën se si jam rritur. Në Camden, më pëlqen atmosfera. Është e thjeshtë dhe është mirë. Dhe janë edhe njerëzit. Më pëlqen të bashkëveproj me ta sepse ata janë të thjeshtë dhe edhe unë jam i thjesht. Njerëzit ndoshta nuk presin që një lojtar i Arsenalit të vijë në Camden Lock dhe, të jetë një djalë i thjeshtë”.

Teksa po ecte në rrugë me gazetarin e The Guardian, Xhaka ndalohet nga një person me emrin Çarls, një nigerian tifoz i Arsenalit. Ajo cfarë i thotë ai Xhakës nuk është edhe aq miqësore.
“Ju jeni lojtar i mirë, por…”, fillon Çarlsi. Ai vazhdon të argumentojë se Xhaka ka nevojë të luajë me një futbollist më të aftë, siç është Eden Hazard i Chelseat. “Do të ishte shumë më i mirë sesa Alexis Sánchez,” shton Çarls.

Në gjuhën e tij të katërt – pas atyre gjermane, shqiptare dhe franceze – Xhaka nuk i kupton të gjitha gjërat që Çarlsi i thotë dhe kërkon sqarime. Por, Xhaka është kurioz dhe i interesuar. Ai e di se të gjithë janë kritikë dhe e pranon se tani Arsenali ka shumë tifoz të tillë.

Arsenali qëndron e gjashta në tabelën e Premier Ligës, tre vende dhe katër pikë më poshtë se Tottenham Hotspur, me të cilët “topçinjtë” do të luajnë të shtunën pasdite në Emirates Stadium.

Xhaka, që u transferua te Arsenali në vitin 2016, regjistron 54 paraqitje dhe katër gola.Në Gjermani te Borussia Mönchengladbach, ai luajti për katër sezone duke bërë 140 paraqitje dhe shënuar katër gola.Ndërsa në Basel, ku edhe e nisi karrierën, Xhaka bëri 61 paraqitje në dy sezone me ekipin e parë, duke shënuar 2 gola.

Deri më tani, shqiptari regjistron 254 paraqitje në nivel klubesh, ku ka realizuar 16 gola, ndërsa ka bërë edhe 57 paraqitje me Zvicrën, për të cilën përfaqësuese ka shënuar tetë gola./insajder

Krasniqi merrë medaljen e artë në “Grand Prix Prague”

Distria Krasniqi është shpallur kampione në kategorinë 52 kilogramë në “Grand Prix Prague”

Ajo në finale e mposhti me ippon xhudisten spanjolle, Estrella Lopez Sheriff.

Krasniqi kishte fituar tre meçe për të arritur në finale të këtij turneu të rëndësishëm.