Krasniqi merrë medaljen e artë në “Grand Prix Prague”

Distria Krasniqi është shpallur kampione në kategorinë 52 kilogramë në “Grand Prix Prague”

Ajo në finale e mposhti me ippon xhudisten spanjolle, Estrella Lopez Sheriff.

Krasniqi kishte fituar tre meçe për të arritur në finale të këtij turneu të rëndësishëm.

Zvicra e shqiptarëve merr biletën për Rusi

Zvicra ka siguruar kualifikimin për në Kampionatin Botëror “Rusia 2018”, pasi ka eliminuar në “Play-Off” Irlandën Veriore

Përfaqësuesja zvicerane, në të cilën luajnë pesë shqiptarë, siguroi fazën finale të Botërorit falë fitores në ndeshjen e parë si mysafire, 0 me 1.

Në ndeshjen e kthimit dy ekipet barazuan pa gola, me Zvicrën që pati më shumë raste për gol.

Sa i përket futbollistëve shqiptarë, në këtë ndeshje u paraqitën Blerim Xhemaili, Xherdan Shaqiri, Granit Xhaka dhe Admir Mehmedi, ndërsa Valon Behrami ishte jashtë për shkak të lëndimit.

S’ka fitues në përballjen Angli – Gjermani

Ndeshja e zhvilluar në stadiumin ‘Wembley’, ka përfunduar 0-0

Ka përfunduar pa fitues përballja mes Anglisë dhe Gjermanisë. Miqësorja e luksit mes dy kombëtarëve të mëdha, nuk ka sjellë fitues. Ndeshja e zhvilluar në stadiumin ‘Wembley’, ka përfunduar 0-0.

Suedia një makth, Italia komplikon kualifikimin

Me mbështetjen e 50 mijë tifozëve në shkallët e stadiumit, Suedia ia ka dalë të hedhë një hap të rëndësishëm drejt kualifikimit në botërorin ‘Rusi 2018’. Skandinavët mposhtën 1-0 Italinë, në një takim të luftuar shumë dhe do të jenë më të qetë në ndeshjen e kthimit, pas 3 ditëve në Milano

Pjesa e parë ishte me një ritëm mjaft të lartë, ku vendasit, të nxitur edhe nga tifozëria e zjarrtë, tentuan të vënë në vështirësi italianët me anë të presingut të vazhdueshëm. Gjithsesi, skuadra e Venturës u mbrojt mirë, ndërsa kërcënoi disa herë rrezikshëm me anë të kundërsulmeve. Vlen të përmendet një karton i verdhë i Verratit, që i kushton atij mungesën në sfidën e ardhshme, në ‘San Siro’, të hënën në mbrëmje.

Në pjesën e dytë Italia shfaqet më kërkuese, por golin e gjen Suedia. Daniele De Rossi është i pafat, pasi devijon në rrjetë një goditje të Johansson, me topin që po shkonte jashtë portës dhe shtang Buffonin.

‘Të kaltrit’ reagojnë menjëherë dhe hidhen në sulm, ndërsa i shkojnë shumë pranë golit, me anë të mbrojtësit të Manchester United-it, Darmian, që gjuajti nga jashtë zone, por topi u përplas në shtyllën e portierit të Suedisë. Trajneri i Italisë, Ventura hedh në fushë sulmuesit Eder dhe Insigne, por sërish nuk arrin të gjejë golin e barazimit.

Me këtë rezultat, Italia ka komplikuar rrugën për në Rusi, pasi në ‘San Siro’ do t’i duhet një fitore me 2 gola diferencë për të siguruar kualifikimin, ose të paktën me të njëjtin rezultat, për të çuar takimin në shtesë.

61’ – Suedia kalon në avantazh. Daniele De Rossi është i pafat, pasi devijon në rrjetë një goditje të Johansson, me topin që po shkonte jashtë portës dhe shtang Buffonin.

Distria Krasniqi, kampione e Evropës

Distria Krasniqi (52 kg) bëri paraqitje shumë të mirë në finale ndaj rumunes Alexandra-Larisa Florian, duke triumfuar dhe fituar titullin e Evropës U-23. Ajo tregoi teknikë të përsosur dhe me plotë meritë e mundi rivalen

Xhudistja Distria Krasniqi kualifikohet në finalen e madhe të Kampionatit Evropian U-23, e cila do të takohet me rumunen Alexandra-Larisa Florian. Distria po kalon formë të mirë e cila deri me tani ka shkatërruar një nga një rivalet, si në rrethin e parë Betina Temelkova (Izraeli), pastaj në çerekfinale Daria Bobrikova (Rusia) dhe në gjysmëfinale Francesca Giorda (Italia).

Kampionati mbahet në kryeqytetin malazez, Podgorica. Flaka Loxha (57 kg) është eliminuar në disiplinën 57 kg, e cila shënoi një fitore e pësoi një humbje. Ajo fitoi ndaj turkes Meltem Dindar dhe humbi nga italiania Miriam Boi. Ndërkaq, Leutrime Kelmendi (57 kg) e mposhti azerbajxhanasen Ichinkhorloo Munkhtsedev dhe u mposhtë nga Tihea Topolovec (Kroacia). Kelmendi dhe Loxha me gjithë luftërat e mira nuk vazhduan me tej.

Zvicra bën hapin e madh drejt Rusisë

Zvicra ka bërë një hap të madh drejt kualifikimit për Botërorin “Rusia 2018”.

Zviceranët mposhtën 0 me 1 Irlandën Veriore në takimin e parë të “Play-Offit”.

Ricardo Rodriguez realizoi golin e vetëm të ndeshjes në minutën e 58-të. Ai shënoi nga penaltia.

Për Zvicrën u paraqitën edhe yjet shqiptare Xherdan Shaqiri, Granit Xhaka, Blerim Xhemaili dhe Admir Mehmedi. Ndeshja e kthimit do të zhvillohet pas tre ditësh në Zvicër.

Veseli: Stadiumi Olimpik do të ndërtohet në Drenas

Është përuruar faza e parë e stadiumit të qytetit të Kaçanikut që mban emrin e dëshmorit “Besnik Begunca”, e që ndërtimi i tij ka kushtuar mbi 300 mijë euro

Për të përuruar këtë stadium ishte edhe kryetari i Kuvendit të Kosovës, njëkohësisht kryetari i PDK-së, Kadri Veseli, i cili premtoi se në katër vitet e ardhshme do të investojnë rreth 100 milionë euro në stadiume.

Po ashtu, Veseli përmendi ndërtimin e Stadiumit Olimpik të Kosovës për të cilin tha se do të ndërtohet në Drenas.

“Do të vazhdojmë investimet në sport, sporti do të jetë prioritet ynë për katër vitet e ardhshme. Do të investojmë minimalisht në këto katër vitet rreth 100 milionë euro vetëm në stadiume, të jeni të sigurt. Ky stadium nuk është përfunduar është në fazën fillestare do të ndërtohen edhe tribunat. Në të njëjtën kohë do të vazhdojmë edhe stadiumin në Vushtrri, do ta ndërtojmë një stadium i cili do t’i përmbushë të gjitha kriteret për lojëra ndërkombëtare. Jemi në fazën finale të një investimi i cili do të jetë afër Stadiumit më të madh Olimpik, e cila do të jetë edhe qendër sportive në Drenas të cilën do ta ndërtojmë një investim 50 milionë euro , në të njëjtën kohë do të vazhdojmë në komunën e Prizrenit stadiumin e dytë më të madh në Republikën e Kosovës”, tha Veseli në Kaçanik, raporton Kosovapress.

Po ashtu, ai tha se stadiumi “Adem Jashari” në Mitrovicë do të finalizohet shumë shpejt, si dhe stadiumi i Prishtinës, për të cilin tha se edhe pse i vogël është në qendër të Kosovës dhe është krenari e futbollit.

Veseli tha se do të vazhdojnë të ndërtojnë edhe shumë stadiume të futbollit të vogël dhe në të njëjtën kohë në çdo shkollë do të ndërtohen terrene sportive.

Ministri i Kulturës, Rinisë dhe Sportit, Kujtim Gashi, tha se janë dakorduar që do të vazhdojnë edhe me fazën e dytë të ndërtimit të këtij stadiumi e që do të rregullojnë edhe tribunat.

Ministri Gashi tha se gjatë mandatit të tij do të bëjë përpjekje që të realizojnë nga një stadium në çdo qytet.

“Unë e kam marrë një porosi qysh në fillim të mandatit nga kryetari i Kuvendit Veseli për ta bërë çdo qytet me stadium, prandaj po mundohemi që në kuadër të objektivave të Ministrisë së Kulturës të kemi investime të stadiumeve në çdo qytet. Prandaj, edhe kërkesat e tjera edhe iniciativat tjera që do të vijnë nga kryetari i Komunës ne fuqishëm do ti mbështesim”, tha ministri.

Shembull të mirë dhe që duhet ndjekur edhe nga komunat e tjera e quajti kryetari i Federatës së Futbollit të Kosovës, Fadil Vokrri. I cili tha se shpreson që nga Kaçaniku të vazhdohet edhe në qytetet e tjera ndërtimi i stadiumeve të tilla.

“Është një shembull i cili duhet të ndiqet edhe në komunat e tjera dhe unë shpresoj meqenëse mjaft çalojmë në infrastrukturën sportive anë e mbanë Kosovës dhe shpresoj që këtu nga Kaçaniku të vazhdojmë edhe në komunat e tjera”, tha Vokrri.

Ndërsa, kryetari aktual i Komunës së Kaçanikut, Besim Ilazi, i cili më 19 nëntor do të përballet në balotazh me Basri Kodrën e Vetëvendosjes tha se ndërtimi i këtij stadiumi u bë fal ndihmës nga niveli qendror.

“Falë punës dhe përkrahjes që e kemi pasur nga niveli qendror, konkretisht nga Qeveria, respektivisht edhe nga ministri i Kulturës, ne sot kemi arritur ta përmbyllim një projekt apo fazën e parë të projektit të stadiumit që mban emrin e dëshmorit ‘Besnik Begunca’. Një stadium të cilin sot po e përurojmë koston e së cilës ka pasur diku 300 e 23 mijë euro në bashkëfinancim me komunën e Kaçanikut”, tha Ilazi.

Ndërtimi i stadiumit të qytetit të Kaçanikut “Besnik Begunca” është bërë në financim nga Ministria e Kulturës, Rinisë dhe Sportit dhe nga Komuna e Kaçanikut.

Anthony Joshua mbron titullin e botës

Anthony Joshua është rikonfirmuar kampion i botës në peshat e rënda në boks, duke mbrojtur titujt IBF, WBA dhe IBO

Anthony Joshua është rikonfirmuar kampion i botës në peshat e rënda në boks pasi e mposhti boksierin nga Kameruni, Carlos Takam, në një meç të zjarrtë në Cardiff.

Britaniku të shtunën mbrëma mbrojti titullin në Cardiff në “Principality Stadium”, para më shumë se 70 mijë shikuesve dhe milionave të tjerë para ekraneve, duke e mposhtur Carlos Takamin.

Joshua dominoi meçin që nga fillimi. Ai fillimisht i çau syrin e djathtë kundërshtarit e më pas gjatë raundeve edhe atë të majtë, çka shtyri gjyqtarin të ndërpresë me meçin, për t’ia mundësuar Joshuas të mbrojë titullin e botës.

Kjo ishte fitorja e 20 në 20 meçe deri më tani në karrierë për Joshuan, 19 me nokaut dhe kjo tani e ndërprerë para kohe për shkak të përgjakjes së kundërsharit.

Sigal Prishtina shënon edhe fitoren e tretë rresht në FIBA Europe Cup

Sigal Prishtina nuk po njeh kundërshtarë, vjen edhe fitorja e tretë rresht në FIBA Europe Cup. Prishtinasit kanë qenë mysafirë të skuadrës ukrainase të Khimikut, megjithëse, ndeshja u zhvillua në Pallatin Rinisë dhe Sporteve në Prishtinë

Bardhekaltërit kanë triumfuar kundër skuadrës ukrainase me rezultat 78-59, ku dominuan gjatë gjithë ndeshjes së sotme. Në çerekun e parë kampionët tanë treguan se edhe në ndeshjen e dytë do të triumfojnë pasi që e përmbyllën me 12 pikë epërsi, 26:14.

Periudha e dytë ishte më e barazuar pasi që “Plisat” shënuan vetëm 15 pikë ndërsa pranuan një më shumë dhe kështu pjesa e parë përfundoi me rezultat 40:31. Edhe në njëzet minutshin e dytë prishtinasit ishin më të mirë se kundërshtarët e tyre dhe kështu triumfuan edhe në takimin e dytë ndaj bardhegjelbërve.

Periudhën e tretë, të besuarit e trajnerit Ahmet Kandemir kanë arritur epërsinë më të thellë prej 16 pikëve në saje të rezultatit 60:44. Në dhjetë minutshin e tretë si duket kundërshtarët u dorëzuan krejtësisht pasi që Sigal Prishtina triumfoi me rezultat prej 78:59. Basketbollisti më efikas te vendasit ishte Adrien Arians me 12 pikë ndërsa te mysafirët u veçua me lojë të bukur Andrew Lawrence me 15 pikë.

Kujtojmë se te dyja takimet u zhvilluan në kryeqytetin e Kosovës, pas një marrëveshje në mes të dy klubeve, meqenëse Ukraina nuk i njeh pasaportat e shtetit tonë. Në ndeshjen e radhës kundërshtar i Sigalit do të jetë skuadra turke e Demir Insaat Buyukcekmece, e cila renditet në vendin e dytë.

Pas kësaj, Prishtina ka bilanc prej tre fitoreve nga po aq ndeshje ndërsa ukrainasit kanë tre humbje dhe asnjë fitore në grupin G. /Telegrafi/