Dëbimi që sfidon rrugëtimin e Kosovës drejt BE-së

Arrestimi i gjashtë shtetasve turq që jetonin në Kosovë dhe deportimi i tyre në Turqi, konsiderohet se mund të sjell një gjendje të re edhe në raportet e Kosovës me Bashkimin Evropian dhe procesin e saj integrues

Bashkimi Evropian ka vlerësuar se arrestimi dhe deportimi i gjashtë shtetasve që kanë jetuar ligjërisht në Kosovë, ka ngritur pyetje për respektimin e procesit të rregullt gjyqësor.

“Sundimi i ligjit është parim themelor i Bashkimit Evropian”, i kanë rikujtuar institucionet e Kosovës, zyrtarët në Bruksel.

Përpjekjet e Kosovës për forcimin e demokracisë dhe shtetin e së drejtës, ashtu siç parasheh edhe Marrëveshja e Stabilizim Asocimit, në këtë rast kanë dështuar, thonë njohës të aspekteve ligjore dhe ata të proceseve integruese evropiane.

Florent Spahija, ekspert ligjor nga Instituti Demokratik i Kosovës (KDI) tha për Radion Evropa e Lirë se institucionet e Kosovës kanë shkelur disa të drejta dhe liri themelore të njeriut në momentin kur kanë ndodhur këto veprime, dhe këta persona në mënyrë të kundërligjshëm janë larguar nga shteti i Kosovës.

Ai thotë se Kosova si vend demokratik dhe me ligje duhet të ndjekë të gjitha procedurat e veta që i ka të brendshme për deportim të njerëzve dhe vendin ku i deporton, siç thotë ai, duhet të jetë vend ku respektohen rregullat dhe ligjet.

“Kosova kur e ka bërë depërtimin e gjashtë shtetasve turq ka shkuar në mënyrë arbitrare, pasi që asnjë informatë nuk lëshohet për publikun se kush ka dhënë urdhër dhe çfarë urdhri është bërë, a është respektuar e drejta e atyre personave për t’u ankuar tek organet kompetente, fillimisht te Gjykata Themelore me afat prej tetë ditësh pasi që ta pranojnë vendimin. Pastaj te Gjykata e Apelit tetë ditë të tjera për të apeluar atë vendim dhe nuk kemi asnjë vendim gjykate ose ndonjë instance tjetër shtetërore, siç e parasheh ligji për të deportuar këta shtetas të huaj, të cilët kanë pasur leje qëndrimi sipas rregullave të vendit tonë”, thotë Spahija.

Më 29 mars, në Kosovë u arrestuan dhe më pas u deportuan për në Turqi gjashtë shtetas turq. Pesë prej të dëbuarve ishin punonjës në shkollat “Mehmet Akif” në Kosovë, pronë e klerikut turk Fethullah Gulen, ndërkaq personi i gjashtë ishte një mjek turk.

Erdogan, e fajëson klerikun Gulen për një përpjekje grusht-shteti në Turqi më 2016.

Të gjitha këto zhvillime nga analistë të fushës thuhet se do të sjellin efekte negative për vendin.

Avni Mazreku, profesor i të Drejtës Evropiane, duke folur për Radion Evropa e Lirë, tha se e gjithë kjo situatë e krijuar në Kosovë nga disa akterë, nuk i shërbejnë asaj çka Kosova ka më së teprimi nevojë të dëshmojë, e që janë kapacitetet institucionale demokratike.

“Kosova jo vetëm tash, por edhe në të kaluarën është kualifikuar si një vend që nuk ka stabilitet institucional. Një situatë kaotike e ndërveprimit institucional që ka ndodhur në këtë rast, nuk do të jetë notë pozitive për Kosovën, e mbi të gjitha, asnjëri nga vendet e Bashkimit Evropian nuk i është nënshtruar një toni agresiv të Erdoganit për deportim apo për dorëzimin e këtyre njerëzve që janë të akuzuar nga Qeveria e tij për grusht-shtetit”, thotë Mazreku.

“Këto veprime nuk i kanë ndërmarrë shtetet tjera gjithmonë për shkakun se atje nuk garantohet një proces gjyqësor ‘fer’ për njerëzit që janë të akuzuar”, tha ai.

Blerta Deliu-Kodra, kryetare e Komisionit për integrime evropiane në Kuvendin e Kosovës, thotë për Radion Evropa e Lirë se ende nuk kanë zhvilluar diskutime me përfaqësues të Bashkimit Evropian për të parë nëse ka pasur efekte zhvillimet e fundit.

“Është një situatë e re kjo që ka ndodhur në Republikën e Kosovë pas arrestimit të gjashtë pjesëtarëve turq, por ne ende nuk i kemi marrë imputet e fundit. Nuk jemi takuar ende për të zhvilluar diskutime, qoftë me përfaqësues të Bashkimit Evropian, qoftë me përfaqësues brenda, për të parë nëse ka pasur efekte të qarta ky fenomen”, thekson Deliu-Kodra.

“Megjithatë, unë jam optimiste që ne do të vazhdojnë angazhimin tonë, të fuqizojmë mekanizmat institucionalë dhe besoj se do të arrijmë të kemi një zgjidhje të këtij problemi”, tha ajo.

Pas deklaratave fillestare nga BE-ja, pritet që detajet tjera rreth përparimeve, sfidave dhe ngecjeve të Kosovës të publikohet pikërisht në kuadër të Raportit të Progresit, të cilin Komisioni Evropian e publikon çdo vit për vendet të cilat aspirojnë integrimet evropiane dhe arritjen e standardeve të BE-së në të ardhmen.

Kosova dhe Bashkimi Evropian kanë nënshkruar deri më tani një marrëveshje kontraktuale dhe ajo është Marrëveshja e Stabilizim Asociimit. Pas deklarimeve verbale, me nënshkrimin e MSA-së, Kosova ishte zotuar se do të respektojë standardet dhe normat evropiane, të cilat vlejnë për shtetet aspirante për integrim në BE.

Marrëveshja e Stabilizim Asocimi e cila ka hyrë në fuqi më 1 prill të vitit 2016. synon të mbështes përpjekjet e Kosovës për forcimin e demokracisë dhe shtetin e së drejtës.

MSA-ja kërkon nga një vend që synon anëtarësimin në BE, të sigurojë që mekanizmat e tij të qeverisjes dhe të shoqërisë civile t’i përmbushin standardet e aplikuara të Bashkimit Evropian.

Marrëveshja e Stabilizim Asociimit, është marrëveshja e parë kontraktuale ndërmjet Kosovës dhe Bashkimit Evropian, e cila ishte konsideruar si hapi i parë në kuadër të proceseve integruese evropiane për Kosovën.

Rama: BE të heqë vizat për kosovarët. Kurti: Rama të heqë taksën e Rrugës së Kombit

Nën patronazhin e Partisë Europiane Socialiste u zhvillua në Tiranë konferenca ballkanike e të majtëve të rajonit, ku Kosova u përfaqësua nga Albin Kurti i Vetëvendosjes dhe Fatmir Limaj i Nismës

Edi Rama i kërkoi me këtë rast Brukselit që të mbajë fjalën e të heqë vizat për qytetarët e Kosovës.

“Për ne shqiptarët është me rëndësi që Bashkimi Europian të mbajë fjalën dhe të liberalizojë lëvizjen për të gjithë qytetarët e Kosovës dhe jam i bindur se Presidenti i Partisë Socialiste Europiane ndan të njëjtin qëndrim”,- deklaroi Kryeministri.

Ndërsa Albin Kurti i kërkoi Tiranës që të heqë taksën e Rrugës së Kombit, gjë të cilën nënvizoi se ia kishte thënë edhe Edi Ramës.

“Taksa është e shtrenjtë, kosovarët nuk janë të pasur. Është më mirë mirëmbajtja nga taksat e shtetit”,- deklaroi Kurti./TCH/

Burimi më i vlefshëm në botë, jo nafta por informacioni

Industria e të dhënave kërkon qasje të re me rregulla kundër trusteve dhe monopolizimit. Dalja e një burimi të ri nxit gjithnjë një industri të re e joshëse, duke kërkuar po ashtu edhe rregulla anti-trust për të kufizuar ata që e kontrollojnë fluksin

Një shekull më parë, burimi në fjalë ishte nafta. Tashmë, shqetësime të ngjashme me atë kohë po ngrihen nga gjigandët që menaxhojnë të dhënat, naftën e epokës dixhitale. Këta titanë – Alphabet (kompania nënë e Google), Amazon, Apple, Facebook dhe Microsoft- duken të pandalshëm.

Ato janë pesë kompanitë e listuara si më të shtrenjtat në botë. Përfitimet e tyre po vërshojnë: së bashku ato kapën 25 miliardë dollarë fitime neto në

çerekun e parë të vitit 2017. Amazon merr gjysmën e të gjithë dollarëve që shpenzohen online në Amerikë. Google dhe Facebook kanë marrë pothuajse gjithë rritjen e të ardhurave që u raportua në reklamimin dixital në Amerikë, vitin e kaluar.

Një dominim i tillë ka nxitur apelet që gjigandët e teknologjisë të thyhen, ashtu si u bë me Standard Oil në fillim të shekullit të 20-të.

Në fakt, vetëm madhësia nuk përbën krim. Suksesi i gjigandëve ka sjellë përfitime edhe për konsumatorët. Pak duan të jetojnë pa motorrin kërkimor Google, pa përcjelljen e përditshme të Amazon dhe pa përditësimin e Facebook. As vetë kompanitë nuk e kanë problem kur aplikohen standardet kundër trusteve.

Jo vetëm që ato nuk rëndojnë konsumatorin, por shumë prej shërbimeve të tyre janë pa pagesë (përdoruesit paguajnë në fakt, duke u dhënë kompanive më shumë të dhëna). Merr llogaritë e rivalëve offline dhe aksionet e tyre nuk do përbëjnë me shqetësim.

Dhe hyrja në treg e markave të reja si Snapchat sugjeron se edhe të sapombërriturit në treg mund të arrijnë sukses.

Por, ka një arsye për t’u shqetësuar. Kontrolli i të dhënave u jep kompanive të internetit, pushtet të pamatshëm. Mënyrat e vjetra të të menduarit për konkurrencën, që vijnë nga epoka e naftës, duken të vjetëruara në atë që tashmë po quhet “ekonomia e të dhënave”. Duhet një qasje e re.

Çfarë ka ndryshuar? Telefonët smart dhe interneti ka sjellë bollshmëri të dhënash dhe me më shumë vlerë.

Nëse nisesh për vrap, sheh televizor apo thjesht qëndron duke pritur në trafik, virtualisht çdo aktivitet krijon një gjurmë dixhitale – më shumë lëndë të parë për distileritë e të dhënave.

Pasi mjetet që nga ora dixhitale e deri tek makinat lidhen me internetin, volume rritet: ka nga ata që vlerësojnë se një makinë pa shofer do të gjenerojë 100 gigabajtë për sekondër. Ndërkaq, teknikat e inteligjencës artificiale nxjerrin më shumë vlerë nga të dhënat.

Algoritmet mund të parashikojnë se kur një klient është gati të blejë, kur një makinë ka nevojë për servis apo kur një person rrezikohet nga një sëmundje.

Gjigandët industrial si GE dhe Siemens tashmë e shesin veten si kompani të dhënash.

Ky bollëk të dhënash ndryshon natyrën e konkurrencës. Gjigandët e teknologjisë gjithnjë kanë përfituar nga efektet e rrjetit: sa më shumë përdorues hyjnë në Facebook, as më tërheqës kjo bëhet për të tjerët.

Duke mbledhur më shumë të dhëna, një kompani hap rrugën për të përmirësuar produktet e veta dhe kjo tërheq më shumë përdorues, duke gjeneruar edhe më shumë të dhëna e kështu me radhë.

Natyra e të dhënave i bën metodat e vjetra të kontrollit të trusteve më pak të efektshme. Ndarja e një kompanie si Google në pesë të tjera, nuk do të ndalë efektet e rrjetit: me kohën, një prej këtyre kompanive do të bëhet sërish dominuese.

Rikrijimi i masave kundër trusteve në epokën e informacionit nuk do të jetë i lehtë. Në këtë detyrë ka plot rreziqe: nxjerrja e më shumë të dhënave për shembull, mund të cënojë privatësinë.

Por nëse qeveritë nuk duan një ekonomi të të dhënave të dominuar nga pak gjigandë, do t’u duhet të veprojnë shpejt.(tesheshi)

Avokati i Popullit: Shumë shkelje në procesin e deportimit të shtetasve turq

Pas hetimeve të para, Avokati i Popullit, Hilmi Jashari, ka thënë se kanë vënë re shumë shkelje në procesin e deportimit të gjashtë shtetasve turq

Sipas tij, deportimi i “Gylenistëve” pa i vendosur para gjykatave ishte shkelja e parë. Në “Express Intervistën” në KTV, Jashari ka thënë se edhe nëse gjykata do të vendoste për dëbim, Kosova do të duhej të merrte parasysh vendimet e gjykatave ndërkombëtare, që janë shprehur kundër deportimeve të tilla.

“Ajo që është më e rëndësishmja, në procedurë të tillë kur dikush akuzohet për kërcënim të sigurisë, ai duhet të dalë para gjykatave. Nëse ka interes apo arsye për të dëbuar dikë, pas një procesi normal gjyqësor konstatohet se duhet të dëbohet dikush apo jo. Nëse merret vendimi gjyqësor që një person të dëbohet duhet të ketë siguri se në vendin pritës i dëbuari të mos pritet në rreziqe të caktuara. Gjykata ndërkombëtare ka konstatuar se në Turqi ka rrezik për të dëbuarit dhe kjo është dashur të merret parasysh. Konsiderohet shkelje kur kthehet në vendin ku ka rrezik për trajtimin jo të mirë njerëzor”, është shprehur Jashari.

Jashari po ashtu ka bërë të ditur se shtetasit turq nuk kanë pranuar urdhër dëbimi disa ditë para deportimit në fund të muajit mars. Sipas tij, atyre nuk u është lejuar assesi që të shfrytëzojnë të drejtën e ankesës.

Sipas informatave të para, Jashari ka thënë se shtetasit turq kanë pasur leje qëndrimi në Kosovë, dhe jo siç ishte deklaruar se këto leje tashmë ishin të skaduara.

Jashari ka thënë po ashtu se Kosova nuk mund të paditet në Gjykatën e Evropës, pasi nuk është akoma anëtare e Këshillit të Evropës. Sipas tij, po të ishte dhe të konstatohej se Kosova ka bërë shkelje, Kosova do të duhej të paguante dëmshpërblim, sipas vendimit. Ai ka shprehur shpresë se anëtarët e familjeve të shtetasve të dëbuar do të shfrytëzojnë Gjykatën Kushtetuese për të parë a janë shkelur të drejtat e tyre apo jo.

Thaçi e Haradinaj të pakoordinuar rreth shefit të AKI-së

Vendimi i kryeministrit të Kosovës, Ramush Haradinaj për lirimin nga detyra të drejtorit të Agjencisë së Kosovës për Inteligjencë, Driton Gashi, nuk bëhet i plotfuqishëm pa një miratim e presidentit Hashim Thaçi

Kryeministri i Kosovës, Ramush Haradinaj ka përsëritur se pas vendimit të tij, tani shkarkimi i Gashit nga posti i shefit të AKI-së do të ndodhë pasi që vendimin ta marrë edhe presidenti i shtetit, Hashim Thaçi.

“Rezultat i prishjes se marrëdhënieve ndërinstitucionale ka pasuar shkresa, vendimi im për lirim nga përgjegjësitë për të dytë. Ministri i Punëve të Brendshme është kompetencë vetëm e imja. Kurse shefi i AKI-së është proces i përbashkët i lirimit me presidentin e Kosovës. Gjysma e punës ka përfunduar, unë e kam liruar dhe gjysma tjetër i mbetet presidentit. Presidenti i ka procedurat e veta”, ka thënë Haradinaj.

Por, në anën tjetër Presidenti i Kosovës nuk ka dhënë ndonjë përgjigje se a do të largojë nga pozita shefin e AKI-së.

Ky i fundit, ndonëse ishte ftuar të raportonte para Komisionit Parlamentar për Mbikëqyrjen e Agjencisë së Kosovës për Inteligjencë nuk është paraqitur aty fare. Raportimi i tij ndërlidhej me vendimin për deportimin e gjashtë shtetasve turq nga Kosova, përkundër që ata kishin leje valide qëndrimi.

Zëvendëskryetarja e Komisionit, deputetja Ganimete Musliu tha se zyrtarët e AKI-së kanë kërkuar që raportimin ta bëjnë pasi të hartojnë një raport për ngjarjet e fundit, të kërkuar nga kryeministri Ramush Haradinaj.

Në anën tjetër, anëtarët e Komisionit thanë se nuk kanë informacione se a është duke punuar apo jo shefi i AKI-së, pas vendimit të kryeministrit për lirimin e tij nga detyra, pasi që presidenti ende nuk ka marrë vendimin e njëjtë.

Deputeti Arbër Rexhaj, anëtari i Komisionit nga Lëvizja Vetëvendosje, ka kritikuar shefin e AKI-së për neglizhencë.

“Për herë të tretë po e neglizhon komisionin parlamentar, komisionin i cili i bënë kontroll demokratike AKI-së”, tha ai.

“Drejtori i AKI-së, nuk dihet a është i shkaktuar apo jo sepse deri më tash nuk na ka ardhur asnjë vendim”, tha Rexhaj.

Ndryshe, në bazë të Ligjit për Agjencinë e Kosovës për Inteligjencë, presidenti së bashku me kryeministrin e Kosovës, emërojnë Drejtorin e AKI-së brenda njëzet ditësh pune nga dita kur pozita mbetet e lirë.

Ai, thuhet se do t’i përgjigjet drejtpërdrejt kryeministrit. Kurse shkarkimi i tij bëhet nëpërmjet procesit të njëjtë me të cilin është emëruar, pra nga presidenti dhe kryeministri.

Javën e kaluar, bashkëpunimi ndërmjet shërbimeve të inteligjencës të Turqisë dhe Kosovës, ka çuar në arrestimin dhe më pas edhe deportimin e gjashtë shtetasve turq nga Kosova.

Pesë prej tyre ishin punonjës në shkollat “Mehmet Akif” në Kosovë, pronë e klerikut turk Fethullah Gulen, ndërkaq i dëbuari i gjashtë ishte mjek turk.

Presidenti turk, Recep Tayip Erdogan e fajëson klerikun fetar, Fethullah Gulen se qëndron prapa një tentim grusht-shteti më 2016.

Deportimi i këtyre personave, siç kanë deklaruar krerët e shtetit të Kosovës, ëshët bërë pa njoftimin e tyre, vetëm nga ana e Ministrisë së Punëve të Brendshme dhe Agjencisë së Kosovës për Inteligjencë.

Një zhvillim i tillë kishte detyruar më pas kryeministrin e Kosovës, t’i lironte nga detyra ministrin e Punëve të Brendshme, Flamur Sefaj, i cili tashmë është larguar nga Qeveria, si dhe drejtorin e AKI-së, Driton Gashi. Por, ky i fundit pret edhe vendimin e presidentit të Kosovës.

Haradinaj: Ia jap edhe votat e mia LDK-së nëse janë për zgjedhje

Kryeministri i Kosovës, në një konferencë për media pas mbledhjes së Qeverisë, ka folur për tërheqjet e njohjeve për Kosovën

Ai gjithashtu ka thënë se edhe koalicioni Qeverisës e përkrahë kërkesën e LDK-së për zgjedhje të reja.
“ Për me shku në zgjedhje edhe Aleanca dhe koalicioni qeverisës ia jep votat nëse janë për zgjedhje”, ka deklaruar Haradinaj pas mbledhjes së Qeverisë, shkruan Persikopi.

Kjo kërkesë e Lidhjes Demokratike e Kosovës për zgjedhje të reja ka ardhur si pasojë e zhvillimeve të fundit në vend, ku u deportuan 6 shtetas turq nga Kosova.

Ndërkohë kjo kërkesë është cilësuar si joserioze nga Lëvizja Vetëvendosje dhe PDK-ja. Haradinaj gjithashtu ka folur për tërheqjen e njohjes nga shteti i Burundit. Haradinaj tha se mundësia e tërheqjes së njohjeve ekziston si mundësi dhe nuk jemi të mbrojtur nga kjo.

“Duhet të jemi të kujdesshëm në deklarime. Nuk di sa është e vërtetë se për çka ka ndodhur tërheqja e njohjes nga Burundi”, deklaroi Haradinaj.

Ai gjithashtu ka falënderuar ish-ministrin e brendshëm Flamur Sefaj, për punën e deritanishme të realizuar.

Haradinaj ka thënë se nuk ka qenë i informuar për rastin e të deportuarve të shtetasve turq, as në mënyrë zyrtare por as dhe në atë private. I pari i qeverisë, ka thënë po ashtu se tash e tutje duhet të ruajnë kredibilitetin e institucioneve.

“Arma me të cilën u vra Xhemajl Mustafa, më plagosi mua”

Gazeta prestigjoze amerikane New York Times ka realizuar një reportazh lidhur me Gjykatën Speciale për Krime Lufte të Kosovës. Në vëmendje të gazetës amerikane është Fetah Rudi, ish-mësues dhe aktivist politik, i cili ishte plagosur 18 muaj pas përfundimit të luftës

Fetah Rudi, një ish-mësues dhe aktivist politik, e përdor një karrige me rrota tash e 17 vjet, që kur persona të armatosur ende të paidentifikuar i kishin shkarkuar atij 14 plumba në stomak dhe në shpatull, në një incident që kishte ndodhur në afërsi të fshatit Rud.

Atij i kanë humbur shpresat për të ecur sërish me këmbë, por falë një gjykate të re për krime lufte më në fund atij i është rikthyer shpresa. Pas 10 vitesh shtet, Kosova do të ballafaqohet me një temë të veçantë tabu: pse shqiptarët etnikë si ai vazhdonin të ishin cak të sulmeve dhe në disa raste u vranë edhe pasi torturuesit serbë kishin ikur nga Kosova.

Rudit i kishte humbur shpresa gjatë viteve të fundit, pasi Kombet e Bashkuara dhe më pas Bashkimi Evropian nuk arritën të jepnin drejtësi për një valë dhune që pasoi pas tërheqjes së Serbisë në Kosovë.

Në një intervistë me gazetaën prestigjoze amerikane New York Times, ish-mësuesi thotë se plumbat që gati e vranë atë në dhjetor të vitit 2000 – 18 muaj pas përfundimit të luftës dhe largimit të forcave serbe – ishin shtënë nga e njëjta armë që një muaj më parë ishte përdorur për të vrarë gazetarin Xhemajl Mustafa.

Në një artikull të publikuar sot, me titull: “Pas luftës në Kosovë, sulmet vazhduan. Një gjykatë tani premton drejtësi”, New York Times shkruan se të dy sulmet ndodhën përkundër prezencës së më shumë se 45,000 trupave të NATO-s në Kosovë, një forcë që bëri pak për të ndaluar konfliktet pas luftës në Kosovë.

Si Fetah Rudi ashtu edhe Xhemajl Mustafa ishin përkrahës të Lidhjes Demokratike të Kosovës, një grupi pacifist të udhëhequr nga Ibrahim Rugova.

Paralajmërimi i aktakuzave të para nga Gjykata Speciale për Krime Lufte e ka gëzuar Fetah Rudin, i cili ishte mbajtur në një burg sekret të UÇK-së dhe ishte rrahur dhunshëm në fund të luftës dhe, pas përfundimit të konfliktit, ai thotë se ishte në shënjestrën e UÇK-së.

Ai tha se do të largohej nga Kosova dhe do të shkonte në perëndim të Evropës me gruan e tij dhe katër fëmijë, nëse do shfuqizohej Gjykata Speciale. Gjykata, thotë Rudi, është “mundësia e fundit për ta liruar popullin tonë”. /Insajderi.com

Gjykata Speciale frikëson Hashim Thaçin

“Presidenti është i involvuar me biznese e klane nga më të ndryshme turke kohë të gjatë, prej të cilave ai dhe klani i tij kanë fituar shumë dhe pandalshëm. Tani, kur Ankaraja zyrtare ka marrë kurs anti-perëndimor, Presidenti i Kosovës nuk mund të thotë ‘jo edhe kur ‘po’-ja ndaj kërkesave për deportim të shtetasve turq është e dëmshme për interesat vitale të Kosovës” ka thënë Faton Abdullahu

Sipas Abdullahut, ajo çfarë bënë pushtetarët aktual, sidomos Thaçi, me rastin ‘gylenistët’ është brengosëse dhe shumë e dëmshme për shumë arsye. “Ata brenda dy ditëve i devalvuan e besa edhe i hodhën në baltë pikët pozitive të përfituara mundimshëm dhe gjatë me kalimin e demarkacionit në Kuvend. Tani, në vend se Brukseli të na shpërblej në rrugëtimin tonë drejtë BE-së për demarkacionin e kaluar, ajo tash ka drojën se ky rreshtim anti-perëndimor në krah me Erdoganin kërkon disiplinim konceptual dhe politik ndaj Kosovës gjë që mund të na marr kohë, mund e energji të panevojshme” ka thënë analisti politik Faton Abdullahu.

Sipas Abdullahut, ajo çfarë bënë pushtetarët aktual, sidomos Thaçi, me rastin ‘gylenistët’ është brengosëse dhe shumë e dëmshme për shumë arsye. “Ata brenda dy ditëve i devalvuan e besa edhe i hodhën në baltë pikët pozitive të përfituara mundimshëm dhe gjatë me kalimin e demarkacionit në Kuvend. Tani në vend se Brukseli të na shpërblej në rrugëtimin tonë drejtë BE-së për demarkacionin e kaluar, ajo tash ka drojën se ky rreshtim antiperëndiomor në krah me Erdoganin kërkon disiplinim konceptual dhe politik ndaj Kosovës gjë që mund të na marr kohë, mund e energji të panevojshme”, ka thënë ai.

Veprimet avatureske nga droja e Speciale

Në anën tjetër, sipas tij, sa nga dëshira e papërmbajtur për të qeverisur vetëm dhe me klanin e tij, sa nga droja se mund të jetë viktimë e Gjykatës Speciale, Thaçi po i ofron Kosovës një balancë të ri gjeopolitik – edhe Perëndimi edhe Turqia e Erdoganit.

“Duhet të jesh në zor të madh të mendosh se kjo mund të funksionoj në Kosovë. Kjo është e pamundur. Ankaraja zyrtare ka marr kurs anti-perëndimor. Është vetëm Thaçi dhe klani i tij, që nuk dëshirojnë ta kuptojnë këtë. Duket se këtë lojë ai e ka mësuar nga Beogradi zyrtar e cila pretendon të jetë edhe me perëndimin edhe me Rusinë e Putinit. Kosova nuk mund dhe nuk do ta bëjë këtë lojë të re, kjo duhet t’i bëhet me dije atij guximshëm dhe me zë të lartë. Në të vërtetë për shkak të këtij kursi erdoganist, Thaçi duhet të pensionohet urgjentisht. Opozita, dhe jo vetëm, duhet t’i prijë kësaj ‘ceremonie mortore politike’ të një politikani që në shkatërrim e sipër, do të na marrë edhe neve me veti” ka thënë Abdullahu.

Ai po ashtu ka deklaruar se për më keq si mund të bindet tani Brukseli zyrtarë se, këta pushtetarë kështu të pakoordinuar, kështu të papërgjegjshëm, sikundër ishin me rastin “gylenistët’ mund të jenë efikas dhe unik në luftimin e korrupsionit.

“Kjo është brengosëse, sidomos kur dihet se për ti përfituar vizat dhe benefit tjera nga Brukseli na ka mbetur edhe një raund politik, ku duhet të jemi sidomos efikas në luftimin e korrupsionit. Thënë përmbledhtazi Thaçi, sa nga dëshira për të mbetur në pushtet dhe për të vazhduare të kontrolloj e qeverisë më shumë se që këtë ja lejon pozita kushtetuese e Presidentit, aq edhe nga droja se mund të jetë viktimë e Gjykatës Speciale, po ndërmerr veprime avantureske, antikushtetuese që në fund të fundit e mbrojnë atë dhe klanin e tij, por jo interesat e Kosovës dhe të qytetarëve të saj” ka përfunduar analisti Faton Abdullahu.

Kelmendi: I terë ky veprim e ka çelësin dhe nismën nga Hashim Thaçi

Ngjarjet e fundit në Kosovë kanë bërë që të ketë tensione, fillimisht për arrestimin e shefit të ashtuquajturës Zyrës për Kosovën, Marko Gjuriq nga Policia e Kosovës, për shkak të hyrjes ilegale, e më pas për shkak të arrestimit dhe deportimi të gjashtë shtetasve turq, nga Kosova në Turqi.

Në anën tjetër, nga Gjykata Speciale ende nuk ka filluar ngritja e aktakuzave të para. Se sa mund të ndikojë e gjithë situata e krijuar në vend, në punën e Speciales, kanë folur nga Gjykata Speciale. Chris Bennett, zëdhënës i Zyrës së Kryeprokurorit, për gazetën “Bota sot”, ka thënë se nuk e komenton kohën e ngritjes së aktakuzave të mundshme dhe se vazhdon hetimet sipas mandatit të saj, pavarësisht zhvillimeve të jashtme.

“Zyra e Prokurorit të Specializuar vazhdon hetimet e saj sipas mandatit të saj, pavarësisht nga zhvillimet e jashtme. Për më tepër, Zyra e Prokurorit të Specializuar nuk komenton – as nuk do të komentojë – kohën e ngritjes së akuzave të mundshme”, thuhet në përgjigjen e Zyrës së Kryeprokurorit.

Kurse njohësi i çështjeve juridike, Muhamet Kelmendi, ka shpjeguar se a është Gjykata Speciale problem për presidentin, Hashim Thaçi.

“Edhe pse jam kundër kësaj gjykate, sepse vepron mbi baza thjeshtë nacionale, duke kapur vetëm shqiptarët e jo kriminelet serb duket se kjo gjykatë nga gjendja nuk dihet kur do të filloj. Nën këtë trysni të përditshme, kemi edhe shumë veprimtari të dëmshme që po bëhen. I terë ky veprim e ka çelësin dhe nisen nga Hashim Thaçi. Unë nuk dua të konkludoj se shumë veprime antishtetërore sidomos marrëveshjen më shtetin serb janë bërë nga Thaçi për frikë. Më vjen shumë rendë më deportimin e qytetareve turq në Turqi. Nuk mendoj se ministrat dhe drejtori i AKI-së kanë vepruar në kokë në vete. Nëse kryeministri s’kanë informata sikundër edhe krye parlamentari vjen në pyetje vetëm Thaçi si urdhërdhënës” ka thënë Kelmendi.

Mehmeti: Hashimi po krijon situata fiktive

Edhe opinionisti, Faton Mehmeti, ka thënë për “Bota sot” se të gjitha veprimet e Hashim Thaçit kanë të bëjnë më Gjykatën Speciale. “Thaçi është libër i lexuar, vetëm duhet të jesh shumë injorant mos të kuptosh atë çfarë ai mendon dhe benë. Hashim Thaçi s’ka shokë, ai ka vetëm interesin e tij dhe asgjë tjetër. Tani që rrethi po i ngushtohet dhe Gjykata Specialë është afër, Hashimi po krijon situata fiktive vetëm e vetëm për të mbajtur gjendjen e tensionuar, kështu që Gjykata Specialë do shtyhet” ka thenë Mehmeti.

Vjen reagimi nga Bashkimi Evropian: Arrestimi i 6 shtetasve turq, arbitrar dhe kundër të drejtave të njeriut

Bashkimi Evropian ka reaguar pas arrestimit dhe deportimit të gjashtë shtetasve turq nga Kosova. Maja Kocijançiq, zëdhënëse e Përfaqësueses së lartë të Bashkimit Evropian, Federica Mogherini, ka thënë përmes një komunikate se “arrestimi dhe deportimi i gjashtë shtetasve që kanë jetuar ligjërisht në Kosovë, ngrit pyetje për respektimin e procesit të rregullt gjyqësor”

“Sundimi i ligjit është parim thelemor i Bashkimit Evropian. Në përputhje me vendosshmërinë për të ndërtuar një të ardhme të lirë dhe demokratike, siç edhe përcaktohet me Marrëveshjen e Stabilizim Asociimit, të gjitha veprimet e institucioneve lokale të Kosovës janë të lidhura me respektimin e sundimit të ligjit dhe promovimit të të drejtave universale dhe lirive themelore të njeriut. Procedurat arbitrare lidhur me arrestimin, ndalimin apo azilin janë kundër këtyre parimeve”, është thënë në deklaratë.

Tutje në deklaratë thuhet se pavarësisht të drejtës së Turqisë për të kuptuar detajet lidhur me tentimet e dështuara për grushtshtet më 2016, gjykimi i drejtë duhet të respektohet për secilin.

“Sa i përket Turqisë, ne e kuptojmë se ky vend ka nevojë për të sjellë para drejësisë përpjekjet për gushtshtet më 15 korrik mirëpo çdo keqbërje e supozuar lidhur me këtë proces duhet të jetë subjekt i normave ndërkombëtare kur kërkohet ekstradimi. Duhet të respketohet e drejta e secilit për gjykim të drejtë. Si një shtet kandidat për anëtarësim në Bashkimin Evropian dhe si anëtar i Këshillit të Evropës, Turqia tashmë ka nënshkruar këto parime”, ka deklaruar Kocijançiq përmes deklaratës.

Më 28 mars, është bërë e ditur se autoritetet e Kosovës kanë arrestuar dhe deportuar drejt Turqisë pesë punonjës të Institucionit Arsimor Gulistan, pronë e klerikut turk Fethullah Gulen, si dhe një mjek turk.

Krerët më të lartë shtetërorë kanë deklaruar se nuk kanë qenë në dijeni për një hap të tillë.

Pak kohë pas njoftimit, kryeministri i Kosovës, Ramush Haradinaj ka liruar nga pozita ministrin e Brendshëm, Flamur Sefaj, dhe drejtorin e Agjencisë së Kosovës për Inteligjencë (AKI), Driton Gashi.

Pas këtij veprimi kanë reaguar përfaqësues të lartë vendorë si dhe organizata ndërkombëtare.

Grupi Parlamentar i LDK-së e ka parashtruar kërkesën që Kryesia e Kuvendit të caktojë seancën për të mërkurën në orën 14:00 për të diskutuar lidhur me këtë çështje.

Ndërkohë një zëdhënës i Departamentit amerikan të Shtetit, duke komentuar për incidentin i ka thënë Zërit të Amerikës se SHBA-ja është e inkurajuar për faktin që institucionet shtetërore të Kosovës kanë njoftuar vendosmërinë e tyre për të shqyrtuar këtë ngjarje dhe për të përmirësuar garancitë procedurale për mbrojtjen e të drejtave në bazë të procesit ligjor.

Haradinaj: Deportimi i shtetasve turq – ishte një lloj “vjedhje” e njerëzve nga Kosova

Kryeministri i Kosovës Ramush Haradinaj tha në një intervistë për Zërin e Amerikës se nuk i kupton reagimet e presidentit turk ndaj tij, ndërsa theksoi se askush nga jashtë nuk do të marrë vendime për punët e brendshme të Kosovës. Në intervistën dhënë Zërit të Amerikës në Prishtinë, Leonart Shehu, kryeministri Haradinaj tha se nuk dëshiron të paragjykojë se kush mund të ketë urdhëruar operacionin e arrestimeve dhe deportimit që sipas tij ishte një lloj vjedhjeje e njerëzve nga Kosova

Zëri i Amerikës: Zoti Kryeministër për tri ditë me radhë jeni sulmuar nga presidenti turk Erdogan për shkak të qëndrimit tuaj ndaj arrestimit dhe deportimit të gjashtë shtetasve turq, si i patë këto sulme?

Kryeministri Haradinaj: Kosova ka një kujdes në marrëdhëniet me të gjitha shtetet tjera edhe me Republikën e Turqisë. Jemi mirënjohës për njohje, për përkrahje në planin ndërkombëtar në anëtarësim në organizata ndërkombëtare, tani kemi aplikuar për Interpol në këtë vit dhe kemi qenë shumë të kujdesshëm që të mos ndërhyjmë në punë të brendshme të ndonjë shteti tjetër edhe të Republikës së Turqisë. Ndalimi i gjashtë shtetasve turq në Kosovë dhe deportimi i tyre ka paqartësi, pra te mënyra e revokimit të lejes së qëndrimit, ishte procedurë shumë e shpejt dhe deportim i fshehtë dhe bazuar në këtë dhe për faktin që nuk kam qenë i informuar, do të thotë kam marrë vendim dhe i kam shkarkuar parevokueshëm ministrin e Brendshëm dhe drejtorin e agjencisë së inteligjencës së Kosovës. Reagimet e presidentit (Erdogan) nuk i kuptoj, ne nuk ndërhyjmë në punët e brendshme të Turqisë, këto janë punë të brendshme tona edhe askush nuk do të ketë vendimmarrje në punët e brendshme të Kosovës.

​Zëri i Amerikës: A mund të ndikojnë këto në marrëdhëniet e ardhshme me shtetin turk?

Kryeministri Haradinaj: Tani duhet të shkojmë me kujdes, ne jemi të kujdessshëm, edhe si popull shqiptar jemi popull i respektueshëm. Mirëpo gjithashtu, gjithkush duhet t’i dijë kufijtë e vet. Kosova është shtet i pavarur dhe duhet respektuar zhvillimet e brendshme institucionale, kushtetutën e vendit tonë.

Zëri i Amerikës: Arrestimi dhe deportimi i gjashtë shtetasve turq vazhdon të jetë i mjegulluar. Kush është përgjegjës për këtë operacion?

Kryeministri Haradinaj: Operacioni ka ndodhur në Kosovë, jemi ne, institucionet e Kosovës dhe udhëheqësit politik e institucional. Meqenëse operacioni ka ndodhur prej dikastereve, njëri është ekzekutiv, pra ministria e punëve të brendshme, por po ashtu roli i agjencisë së inteligjencës, do të thotë Kosova e ka ndërmarrë veprimin më të madh të mundshëm dhe ka shkarkuar kokat e sigurisë në vend. Do të thotë janë shkarkuar përgjegjësit, por po ashtu kemi nisur edhe hetim të gjithanshëm për këtë.

Zëri i Amerikës: Kur flisni për hetim të gjithëmbarshëm, kush pritet të përfshihet?

Kryeministri Haradinaj: Për shembull në Agjencinë e Kosovës për Inteligjencë veç ka ardhë raporti i parë nga Inspektorati për mënyrën se si ka ndodhur operacioni. Në ministrinë e Punëve të Brendshme, policia veç e ka dhënë raportin; njëkohësisht mund të ketë edhe institucione tjera, por tani nuk dua të paragjykoj, që mund të përfshihen.

Zëri i Amerikës: Një nga arsyet e arrestimit dhe deportimit të gjashtë shtetasve turq ka qenë edhe vlerësimi se janë persona të rrezikshëm për vendin. Për çfarë rreziku bëhet fjalë?

Kryeministri Haradinaj: Agjencia e Kosovës për Inteligjencë ka krijuar një dosje për këtë, bazuar në transaksione financiare dhe në aktivitete, që sipas kësaj agjencie mund të sjellin rreziqe për Kosovën. Megjithatë, këto informata nuk janë të procesuara në një proces serioz dhe ky është raportim i brendshëm nga AKI, pra e vërteton edhe atë nxitimin për të cilin kemi shprehur shqetësim të gjithë.

Zëri i Amerikës: Zoti kryeministër, një aksion i tillë sipas njohësve të çështjes nuk do të mund të bëhej pa mbështetje të politikës. Ju vazhdimisht keni hedhur poshtë pohimet se jeni njoftuar për aksionin. Kujt i raporton agjencia e zbulimit?

Kryeministri Haradinaj: Agjencia AKI, drejtori në bazë të përgjegjësive të veta i raporton presidentit dhe kryeministrit, emërohet nga presidenti bashkë me kryeministrin, por emërohet nga presidenti, ndërsa ministri i punëve të brendshme drejtpërdrejt i raporton kryeministrit.

Zëri i Amerikës: Por, sipas jush, as ju e as presidenti Thaçi nuk keni qenë të informuar për këtë operacion?

Kryeministri Haradinaj: Për faktin që një operacion i tillë, që ka pasoja të mëdha për sigurinë në vend, për pozicionin gjeostrategjik të Kosovës edhe në aspektin e të drejtës njerëzore dhe në aspektin human, ka ndodhur pa informimin paraprak për mua në këtë rast si kryetar qeverie. Unë e kam humbur besimin te këta dy të ngarkuarit kryesor, pra te të dy shefat e institucioneve, njëri është shefi i AKI-së dhe tjetri shefi i ministrisë së punëve të brendshme edhe i kam liruar nga përgjegjësia. Kuptohet për AKI-në lirimi duhet të vijë edhe nga presidenti, por sa i përket pjesës time është i liruar.

Zëri i Amerikës: Kur pritet të ndodhë kjo?

Kryeministri Haradinaj: Ata janë të liruar dhe nuk mund të ushtrojnë funksionet e veta. Që nga momenti i nënshkrimit të letrës nga ana ime ata nuk janë më funksional.

Zëri i Amerikës: Presidenti Erdogan krahas sulmit ndaj jush, në të njëjtën kohë ka falënderuar presidentin Thaçi. Nisur nga kjo a qëndron presidenti pas operacionit?

Kryeministri Haradinaj: Shikoni, unë nuk kam pasur rast të njihem personalisht ndonjëherë me presidentit Erdogan, ne kemi interes për një partneritet strategjik me Turqinë në planin ndërkombëtar dhe në marrjen e njohjeve dhe nuk dua të paragjykoj asgjë. Ajo që është me rëndësi, që në Kosovë, e thashë edhe njëherë, nuk mundet dikush t’i kryejë punët tona në emrin tonë, i kryejmë ne vet, kur besojmë në to edhe nuk mundet dikush me vjedhë njerëz në Kosovë. Kjo ishte një lloj vjedhjeje e njerëzve nga Kosova.

Zëri i Amerikës: Çfarë do të ndërmerrni që një situatë e tillë të mos përsëritet më?

Kryeministri Haradinaj: Nuk ka mundësi të përsëritet, kjo është një mësim besoj për të gjithë ne, askush nuk do të mund të veprojë më njëjtë si ka ndodhur kësaj here.

Zëri i Amerikës: Ku po bazoheni në këtë?

Kryeministri Haradinaj: Besoj që veprimet që kemi ndërmarrë e dëshmojnë këtë, pra kushdo që guxon t’ia bëjë Kosovës këtë si kësaj here, pasojat do t’i ketë të mëdha.

Zëri i Amerikës: Aksioni ka ngjallur reagime të shumta, si në vend edhe jashtë Kosovës. Çfarë pasoja mund të ketë kjo për të ardhmen evropiane të vendit?

Kryeministri Haradinaj: Kosova është e përcaktuar, është euro-atlantike. Kur themi euro-atlantike mendojmë në përcaktimin në anëtarësim në Bashkimin Evropian, në NATO dhe miqësi me Amerikën. Në planin botëror, në politikë të jashtme ne përcjellim politikën e jashtme të Amerikës. Në kontinentin tonë jemi të përcaktuar që t’i takojmë familjes evropiane, ky është përcaktimi ynë, është publik, edhe jemi krenarë për këtë dhe vetëm këtij përcaktimi do t’i shërbejmë.

Zëri i Amerikës: Por këto veprimet e fundit në Shtetet e Bashkuara të Amerikës dhe vendet e Bashkimit Evropian nuk kanë ndodhur, për shembull deportimi…

Kryeministri Haradinaj: Kjo nuk e dëshmon përcaktimin tonë, një aksident që i ka ndodhur Kosovës, për sanimin e të cilit kemi nevojë për ndihmën e të gjithëve. Kjo nuk është dëshmi e përcaktimit tonë. Përcaktimi ynë është euro-atlantik, i vetmi dhe i tillë mbetet.

Zëri i Amerikës: Po gjatë javës që lamë pas Kosova përjetoi edhe një ngjarje tjetër që bëri bujë pas arrestimit dhe dëbimit të zyrtarit serb Marko Gjuriç. Pas kësaj përfaqësuesit e serbëve paralajmëruan formimin e Asociacionit të komunave serbe deri më 20 prill, nëse institucionet e Kosovës nuk ndërmarrin hapa vet për një gjë të tillë. Si do të veproni ju?

Kryeministri Haradinaj: Ne kemi një dinamikë të aktiviteteve tona qeverisëse dhe e vërteta është se nuk kam arritur ende të merrem me këtë temë për shkak të plot temave që kishim në tavolinë dhe jo të lehta. Ende jemi në vështirësi të mëdha me gjendjen në arsim, në shëndetësi, në ekonomi dhe vendet e punës, fatmirësisht stabilizuam energjinë në një masë të caktuar dhe kemi hapur investime dhe kemi vërtetë investime të mëdha në energji. Asociacioni, sa i përket dinamikës sonë qeverisëse mund të vijë në të ardhmen, pra mund të jetë në agjendën e qeverisë, kemi një bazë të qartë me vendimin e gjykatës Kushtetuese dhe nuk shohim vështirësi në zbatim. Qëndrimet se kush e themelon dhe deri në çfarë afati e ultimatumet nuk i ndihmojnë kësaj teme, përkundrazi e dëmtojnë këtë temë për shkakun se nuk mund ta amputosh në një farë mënyre ose t’ia ngjesësh një institucion të caktuar kushtetutës sonë, nëse nuk krijohet nga procesi i paraparë kushtetues. Pra është një produkt i jashtëm dhe i cili nuk ka bazë në Kosovë.

Zëri i Amerikës: Si do t’ia bëni? Serbët e kundërshtojnë vendimin e gjykatës kushtetuese. Ata dëshirojnë që Asociacioni të themelohet në bazë të marrëveshjes së Brukselit?

Kryeministri Haradinaj: Ne e respektojmë interesimin e serbëve të Kosovës për Asociacionin dhe jemi të interesuar për të thelluar dialogun me ta, jo vetëm për këtë temë, por për të gjitha. Por, të gjithë ne jetojmë në Kosovë dhe dihet se gjykata kushtetuese ka fuqi në Kosovë, pra është institucion i respektuar, ka rrëzuar dy presidentë edhe ata që jetojnë në Kosovë e dinë që nuk guxon të dalësh nga të gjeturat e vendimit të gjykatës. Por, mund të përparojmë pra në të drejtat e komuniteteve në Kosovë edhe të serbëve së bashku, ndërsa ndaras nga një proces institucional, kushtetues e ligjor, nuk bëjmë asgjë edhe mua më vjen keq që dikush i nxitë serbët e Kosovës, kryesisht Beogradi në këtë rast që të veprojnë ndaras. E vetmja zgjidhje është duke qenë në tavolinë, duke qenë pjesë e institucioneve që të mund të ecim përpara.

Zëri i Amerikës: Nëse një gjë e tillë ndodhë nga serbët e Kosovës, si do ta trajtoni këtë çështje?

Kryeministri Haradinaj: E tillë nuk ka peshë as kushtetuese e as ligjore, pra është e parëndësishme.

Zëri i Amerikës: A mund të ndikojë në të ardhmen në bisedime?

Kryeministri Haradinaj: Nuk ka efekt, nuk krijon efekt, çfarëdo efekti apo çfarëdo natyre nuk krijon efekt, as kushtetues, as ligjor, do të thotë është inekzistente. Mund të quhet një vullnet i dikujt, por nuk e fiton bazën, as ligjore, as kushtetuese.

Zëri i Amerikës: Zoti kryeministër, Lista Serbe tashmë nuk është pjesë e qeverisë dhe rrjedhimisht nuk keni numra në parlament. Sa do të ndikojë kjo në të ardhmen e qeverisë suaj?

Kryeministri Haradinaj: Qeveria jonë ka shumicën në parlament edhe sot, do të ketë edhe për një kohë. Largimi i Listës Serbe nuk është dëmtim i argumenteve qeverisëse për këtë qeveri, përkundrazi do ta quaja një dëshmi se jemi të hapur për partneritet, por edhe kemi kujdesin për të ruajtur interesin e vendit dhe sovranitetin. Unë me të vërtetë kam përvojë të mirë me Listën Serbe dhe partneritet korrekt, kemi punuar dhe besojmë që do të punojmë prapë në të ardhmen, mirëpo krahas kësaj, grupe deputetësh të Parlamentit të Kosovës, pra nga partitë politike shqiptare, i kanë dhënë përkrahje qeverisë dhe do t’i japin.

Zëri i Amerikës: A jeni duke diskutuar më partitë në opozitë për zgjerim të koalicionit qeverisë?

Kryeministri Haradinaj: Jo për zgjerim ashtu klasik, vetëm për të hequr një partner dhe për të fituar një tjetër, por për temat që e presin vendin e qeverinë për një partneritet më shumë po e quaj ashtu strategjik, pra që Kosova t’i kalojë këto tema që ka para vetes, në mënyrë që në të ardhmen të jemi të shkarkuar prej temave tjera e të vështira që e kanë ngarkuar Kosovën qe një kohë.

Zëri i Amerikës: Kur të kalohen këto tema, siç po thoni ju, të rënda, pastaj shkohet në zgjedhje të parakohshme?

Kryeministri Haradinaj: Vjen afati dikur, nuk e shoh Kosovën duke shkuar në zgjedhje tani, të paktën.

Zëri i Amerikës: Jo, gjatë këtij viti?

Kryeministri Haradinaj: Të paktën nuk e shoh se do të ndodh.

Zëri i Amerikës: Zoti kryeministër, një pjesë e opozitës po kërkon vazhdimisht zgjedhje. Si i përgjigjeni?

Kryeministri Haradinaj: Edhe unë jam për zgjedhje kurdo, më mirë është të shkohet në zgjedhje në fakt, por e shoh që spektri politik nuk i ka rrethanat për zgjedhje tani.