Sami Frashëri: Pellazgët janë kombi më i vjetër Arian i Evropës

Shqiptarët flasin një nga më të vjetra e më të bukura gjuhë të dheut. Gjuhët që kanë qënë të ngjashme dhe bashkëkohëse me gjuhën shqipe janë zhdukur prej mijëra vjetësh, dhe nuk fliten më në asnjë vend të botës

Në vendin e tyre fliten gjuhët që rrjedhin prej tyre. Shqipja si gjuhë është e ngjashme me greqishten e vjetër, me latinishten, me sanskritishten gjuhë e vjetër e Indisë, me zendishten gjuhë e Persisë së vjetër, me keltishten, me teutonishten etj.

Por këto gjuhë që numëruam më sipër janë me të reja se gjuha shqipe dhe kanë mijëra vjet që nuk fliten më, dhe rrojnë të shkruara vetëm në faqet e disa librave shumë të vjetër. Këto gjuhë quhen “gjuhë të vdekura”, dhe shqipja, gjuha jonë që është më e vjetër nga ato është e gjallë dhe flitet edhe sot si në kohën e Pellazgëve.

Pa dyshim Pellazgët janë kombi më i vjetër arian i Europës. Ka shumë fakte dhe shumë rrëfime që na tregojnë se Pellazgët që ne na duken si një përrallë për faktin që janë një komb shumë i lashtë, kanë folur këtë gjuhë që flasim edhe ne sot e kësaj dite. Emrat e perëndive që Pellazgët u faleshin, i ka huazuar mitologjia e grekëve dhe romakëve, por edhe shumë fjalë të tjera që historia i ka ruajtur si emra vendesh etj,.. duken që janë fjalë thjeshtë shqip edhe na tregojnë që Pellazgët kanë folur mijra vjet më parë të njëjtën gjuhë që flasim edhe ne sot, pothuajse pa ndryshime, ose me aq pak ndryshime saqë po të dilte ndonjë pellazg do të mund të flisnim me të si flet një gegë me një toskë.

Emrat e perëndive që Pellazgët u faleshin, i ka huazuar mitologjia e grekëve dhe romakëve, por edhe shumë fjalë të tjera që historia i ka ruajtur si emra vendesh etj,.. duken që janë fjalë thjeshtë shqip edhe na tregojnë që Pellazgët kanë folur mijra vjet më parë të njëjtën gjuhë që flasim edhe ne sot, pothuajse pa ndryshime, ose me aq pak ndryshime saqë po të dilte ndonjë pellazg do të mund të flisnim me të si flet një gegë me një toskë.

Gramatika e gjuhës shqipe, lakimi dhe zgjedhimi, hollësia e nyjeve, dhe e përemrave e të tjera bukuri të kësaj gjuhe, që jo vetëm asnjë nga gjuhët e sotme nuk i ka, por as gjuhët e vjetra nuk i kanë, na tregojnë që shqipja është një gjuhë shumë e vjetër dhe na vjen nga kohët e qëmotëshme e ruajtur e paprishur dhe e pandryshuar. Shënja e kombit është gjuha. Çdo komb njihet me anë të gjuhës. Ata njerëz që harrojnë apo nuk flasin më gjuhën e tyre, me kalimin e kohës bëhen qytetarë të atij kombi që i flasin gjuhën. Shumë qytetërime që janë zhdukur mos pandehni se vdiqën ose u vranë të gjithë, jo, por u përzien me kombe të tjerë dhe morën gjuhën e tyre dhe u bënë pjesë e tyre.

Kështu u zhdukën Maqedonasit, Thrakët, Frigasit, dhe shumë popullësi të tjera që nuk ishin pellazgë d.m.th. shqiptarë si ne, pra këto popullësi sot nuk janë por u zhukën dhe u harruan sepse humbën gjuhën e tyre. Por shqiptarët e atij vendi që sot quhet Shqipëri e kanë ruajtur fort mirë gjuhën e tyre, dhe kështu edhe sot në këtë vend flitet gjuha e Pellazgëve të lashtë.

Gruaja e Enver Zymberit paditë babain e heroit

Bashkëshortja e heroit Enver Zymberi, thotë se është në telashe me prindërit e Enverit. Ajo po akuzon familjen e burrit të saj se e lanë pa shtëpi dhe ia morën paratë të cilat qytetarët dhe institucionet i dhanë pas rënies së Enver Zymberit

Për këtë, Drita Zymberi ka paditur vjehrrin dhe kunatin duke kërkuar nga ata kthimin e shtëpisë në emër të fëmijëve të saj. Ajo thotë se pasi ia vranë burrin në veri të Mitrovicës të gjitha paratë që u grumbulluan ia mori familja e burrit e me to i thanë se do i ndërtojnë shtëpi.

“Ka pasë shumë njerëz që kanë dhënë pare, sa nuk e dimë as vetë. Ka qenë pare shumë e madhe. Te unë në bankë kanë qenë vetëm 52 mijë euro, e tjerat nuk e di sa kanë qenë, po i kanë marrë vjehrrit. Qato 32 mijë euro jam kanë shtatzënë edhe më kanë marrë vjehrri me gjithë valluan e vet edhe jam kanë në ndikim të barnave edhe nuk kam ditë, edhe masi që kam hyrë në veturë më kanë thënë që shpijnë e kam me qit në emër të tënd, sot e asaj ditë e ka në emër të Egzonit”, thotë Zymberi.

Për këto padrejtësi që thotë se po i bëhen gruaja e Enver Zymberit është drejtuar edhe në Gjykatë.
“Unë kërkoj veç drejtësinë. Shtëpinë që ma kanë marrë me ma kthye, e du hisen që më takon”, shprehet Zymberi.

Tashmë padia e bashkëshortes së Enver Zymberit kundër familjes së burrit është dorëzuar në Gjykatën Themelore të Mitrovicës. Një lëndë për vërtetim pronësie është edhe në këtë institucion të drejtësisë.

I paditur është babai i heroit. Këtë e ka konfirmuar edhe avokati i Drita Zymberit, Skender Musa, i cili potencon se kanë prova të mjaftueshme që mjetet e grumbulluara janë keqpërdorur nga babai dhe vëllai i Enver Zymberit ndërkaq paditësja nuk ka marrë asgjë.

“Padia është dorëzuar në Gjykatë edhe pse bahet fjalë për një çështje civile, por duke marrë parasysh natyrën besoj që shpejt do të caktohen edhe seancat në Gjykatën Themelore në Mitrovicë. Ne kemi prova të mjaftueshme i kemi dëshmitë bankare përmes së cilës janë deponuar mjetet financiare, po ashtu ka edhe dëshmi që paret janë dorëzuar në familje pasi shumë njerëz kanë kontribuar për këtë rast duke dhanë mjete”, shprehet Musa.

Kërkesa e Drita Zymberit është t`i kthehet shtëpia që po pretendon që u ble me paratë e grumbulluara.
“Pikërisht për këtë shkak pala na ka autorizuar që të përgatisim padi dhe të kthejmë pronën në emër të fëmijëve të saj, është rast i interesat pasi që prona nuk ka kërkuar që prona të kthehet n emër të saj, por në emër të djalit dhe të vajzave”, thotë avokati Musa.

E Muharrem Zymberi, babai i heroit, me një mënyrë e pranon se kanë marrë mjete që janë grumbulluar nga qytetarët për ta ndihmuar këtë familje, por jo edhe ato që i takonin bashkëshortes së heroit.

“Çka janë ardhë në emër të saj i ka marrë ajo, çka janë ardhë për mu i kam marrë unë, edhe qysh po e sheh e kemi ndërtua këtë shpi, borxhe kemi pas. Vallahi 34 veç trualli, tani tjerat janë investuar këtu. E kom lut sikur evladin ajo veç lëshoma shpijnë dilni ju, po i rri i kam thanë sa të jem gjallë. S’ka pranuar. Me dëshirë të saj e kemi qit në emër të djalit, unë si kam thënë dil, ajo qytu u ardhë me babë te vet na ka ba presion edhe pse kina mujt me ba llom. Me dëshirë të sajna nuk ka pas asnjë presion na se kemi shti me zor me i marrë paret aty, për me jetuar kwtu”, thotë Zymberi.

Zymberi thotë, po ashtu, se ajo u largua nga shtëpia pasi për këtë ndikuan familja e saj. “Familja e vet sa pat pare, e murrën ata na e këqyrem, o zotëri ti nuk mundesh me i këqyrë fëmijën e huaj se nuk është gjaku i yt. Kish qejf ajo me qenë pak e lirë”, thotë babai i Enver Zymberit. Por pavarësisht kësaj, 64-vjeçari thotë se ajo e ka derën e hapur nëse dëshiron të kthehet në shtëpi./T7

Protagonistë të bisedimeve të Vjenës kritikojnë idenë e ndryshimit të kufirit

Ideja e ndryshimit të kufirit, sipas së cilës Kosova merr territor të ri, por nuk jep asgjë, nuk ka logjikë, ka deklaruar ish-presidenti i Kosovës, Fatmir Sejdiu. Këto komente, ai i bëri gjatë një debati për dialogun me Serbinë, të organizuar nga Grupi për Studime Juridike dhe Politike

Aty, përveç Fatmir Sejdiut, panelistë ishin disa prej politikanëve të Kosovës që kanë qenë pjesë e negociatave gjatë procesit të bisedimeve për definimin e statusit të Kosovës në Vjenë, si ish-kryetari i Kuvendit të Kosovës, Jakup Krasniqi, dhe ish-zëvendëskryeministri Hajredin Kuçi.

Panelistët thanë se Prishtina duhet ta ketë një platformë dhe një unitet politik për fazën e ardhshme të bisedimeve me Serbinë. Ish-presidenti Fatmir Sejdiu tha se kjo është një fazë e ndjeshme dhe kërkoi që përfaqësimi i Kosovës në dialog të ketë mandat nga Kushtetuta dhe Kuvendi.

Ai e cilësoi si jo të logjikshme idenë e ndryshimit apo siç po prezantohet nga presidenti aktual Hashim Thaçi, të korrigjimit të kufirit. “Cila është esenca e asaj ideje që po marrim dhe korrigjojmë territore, po marrim pjesë nga vendi tjetër dhe s’po japim asgjë. Po flas me një logjikë që mund të pyes secili njeri i zakonshëm”, tha Sejdiu.

Në anën tjetër, ish-zëvendëskryeministri Hajredin Kuçi, nënkryetar i Partisë Demokratike të Kosovës, ngriti nevojën për unitet brenda faktorit politik kosovar në bisedimet me Serbinë. Ai tha se procesi i bisedimeve duhet t’i ketë garancitë e bashkësisë ndërkombëtare se kjo do të jetë marrëveshja e fundit me Serbinë.

“Frika ime më e madhe është frika pas dialogut. Unë po e them me sinqeritetin më të madh, ne edhe atëherë kemi menduar se kjo është marrëveshja finale me Serbinë (bisedimet për dialogun në Vjenë). Duhet kërkuar garanci shumë të forta nga partnerët ndërkombëtarë se a do të jetë kjo marrëveshja finale”.

“Imagjinoni nëse ne e bëjmë një marrëveshje dhe pastaj prapë nuk kalon në Këshill të Sigurimit, prapë nuk ndodh diçka, atëherë ku është finalja tjetër”, theksoi Kuçi.

Sa i përket idesë së ndryshimit të kufijve, Kuçi theksoi se secila ide që buron nga udhëheqësit politikë, do të duhej të sqarohej në detaje në mënyrë që të shihen limitet kushtetuese të zbatimit të saj.

Përderisa mungon pajtueshmëria në Kosovë për vazhdimin e dialogut me Serbinë dhe kontestohet roli prijës i presidentit Thaçi në këtë dialog, kryetari i Këshillit Kombëtar të Partisë Nisma Socialdemokrate, Jakup Krasniqi, tha se askush nuk ka të drejtë të bisedojë për ndryshim të kufijve, demarkacion apo bashkim të ndonjë hapësire tjetër me Kosovën.

“Shikoni është shumë e këndshme të thuash se dua t’ia bashkoj Kosovës, Kosovën Lindore, Preshevën, Mevdegjën dhe Bujanocin. Shikoni, është një mashtrim që iu bëhet qytetarëve që janë andej, por edhe këtyre këndej. Do të thotë kjo Serbia nuk po të njeh pa atë pjesë, e jo ti do t’ia marrësh atë pjesë e t’i normalizosh marrëdhëniet, kjo vërtet është pak fyerje e inteligjencës”, tha Krasniqi.

Prishtina dhe Beogradi po hyjnë në fazën finale të bisedimeve me synimin që të arrijnë një marrëveshje të obligueshme ndërkombëtare për të dy shtetet. Nisur nga ky fakt, presidenti i Kosovës, Hashim Thaçi, ka deklaruar se aty do të shtrojë edhe çështjen e korrigjimit, siç e quan ai, të kufirit të Kosovës, me përfshirjen e tri komunave në Serbi, por që kanë popullatë shqiptare, Preshevë, Medvegjë e Bujanoc.

Sidoqoftë, kjo ide tash për tash nuk ka gjetur mbështetjen e pjesës më të madhe të spektrit politik në Kosovë.

Bushati i mbyll derën Turqisë për FETO-n, kujton rilindasit

Ministri i Jashtëm i Turqisë, Mevlut Çavusoglu, në konferencën e përbashkët për shtyp me homologun Ditmir Bushati, në Tiranë, i kërkoi shtetit shqiptar që të largojë “terroristët turq”, që sipas tij kanë hyrë nëpër institucionet shqiptare

Kërkesa u referohet anëtarëve të institucioneve të klerikut Fejtullah Gylen, i cili në Turqi është shpallur drejtuesi i organizatës terroriste FETO, pas grushtit të shtetit.

Kërkesës publike të ministrit tukr, ministri shqiptar Ditmir Bushati ju përgjigj duke theksuar se Shqipëria respekton procedurat ndërkombëtare të ekstradimeve.

”Përsa i përket çështjes që ju shtroni, përgjigja e shtetit shqiptar është ajo përgjigje që i kemi dhënë qoftë Turqisë, por dhe në planin ndërkombëtar. Shqipëria ka qenë një ndër vendet e para që është solidarizuar me çka ndodhi në Turqi, në rrethanat e grushtit të shtetit, por nga ana tjetër është një vend anëtar i NATO-s, është një vend kandidat për në BE, ka aderuar në disa dokumente të rëndësishëm ndërkombëtare në fushën e ekstradimit dhe çdo politikë e tillë, ndiqet në rrugë diplomatike dhe asesi në konferenca shtypi”,-është shprehur Ministri i Jashtëm, Ditmir Bushati.

Të pyetur nëse Turqia ka kushtëzuar praninë e zyrtarëve të saj në inaugurimin e Xhamisë së Namazgjasë me shkarkimin e Skënder Bruçjat, kreu i Komunitetit Mysliman Shqiptar, Çavusoglu dhe Bushati mbajtën qëndrime të ndryshme.

Ministri turk iu shmang përgjigjes duke u fokusuar vetëm te investimet turke në xhamitë shqiptare, duke theksuar se “Turqia nuk ka synime të tjera”, ndërsa ministri Bushati i konsideroi spekulime lajmet për shkarkimin e Bruçajt. Gjithsesi theksoi se asnjë vend i huaj, përfshirë Turqinë, nuk mund të përfshihet në çështjet fetare të Shqipërisë.

“Në median shqiptare ka patur lloj-lloj spekulimesh mbi këtë çështje. Në fakt është ai qëndrim i njohur që ka të bëjë me ADN e kombit shqiptar, me parimin e laicitetit që ishte udhërrëfyes i rilindasve tanë, i etërve themelues të shtetit shqiptar dhe do të ishte absurde të mendohej që shteti shqiptar mund të përfshihet në çështjet fetare dhe jo më një vend i huaj apo vend mik, siç është Turqia”, u shpreh Bushati.

Rexhep Qosja Fjalorin Enciklopedik të Mehmet Krajës e quan vepër kundërkombëtare

“Fjalori Enciklopedik i Kosovës – fjalor kundërkombëtar”; kështu shprehet shkrimtari Rexhep Qosja në Facebook ndaj botimit më tē fundit të Akademisë së Shkencave të Kosovës nën kujdesin e Mehmet Krajës

Ky është shkrimi i plotë i Qosjës:

Fjalori Enciklopedik i Kosovës – fjalor kundërkombëtar

Fjalori i ashtuquajtur Enciklopedik i Kosovës është përmbledhje dyvëllimëshe që nuk i plotëson kriteret elementare për t’u quajtur vepër profesionale, shoqërore e kombëtare.

Fjalori në fjalën është vepër e konceptuar dhe e përgatitur prej diletantëve të punës shkencore e punës profesionale.

Në këtë Fjalor nuk çmohen as masa, as kriteri, as parimi, as merita, as vlera, që janë parimet themelore të cilave duhet t’u përmbahen përpiluesit e enciklopedive.

Do parë kush krejt është futur në të dhe do parë kush krejt është lënë jashtë tij për t’u bindur se çfarë injorance e ka konceptuar atë Fjalor.

Do parë cilat institucione të përtashme e cilat institucione historike janë futur në të e cilat janë lënë jashtë tij për të parë çfarë fanatikësh politikë e partiakë e kanë konceptuar atë Fjalor!

Fjalori Enciklopedik i Kosovës është përmbledhje njësish shkrimore, kur e kur shkarravinash, në të cilin cenohet plotësisht dhe qëllimisht njësia e historisë, e gjeografisë, e kulturës, e qytetërimit shqiptar: e historisë politike, e arteve, e shkencave, e traditës dhe e jetës kombëtare në përgjithësi në historinë dhe në të përtashmen e saj.

Në këtë mënyrë Fjalori në fjalë është bërë përmbledhje e konceptit serb për ndarjen e Kombit shqiptar në dy kombe: në kombin e shqiptarëve të Shqipërisë të quajtur albanci dhe në kombin e shqiptarëve të Kosovës e të ish Jugosllavisë në përgjithësi të quajtur shiptari ose shiftari!

Cenimi i këtillë i njësisë së Kombit shqiptar e bën Fjalorin në fjalë vepër kundërkombëtare që komprometon vetëdijen historike, shkencore dhe kombëtare të shqiptarëve në përgjithësi, kurse të shqiptarëve të Kosovës në veçanti!

Fjalori Enciklopedik i Kosovës është fryt i zi i privatizimit partiak të Akademisë së Shkencave dhe Arteve të Kosovës!

Fjalori Enciklopedik i Kosovës është fryt i zi i privatizimit të kësaj Akademie prej një Klani mafioz!

Fjalori në fjalë është fryt i zi i korrupsionit të pandalshëm e të shumëllojshëm që e ka gllabëruar këtë institucion.

Vizita e djeshme e tre pushtetarëve të lartë të Kosovës në Akademinë e Shkencave dhe të Arteve të Kosovës tregon se sa janë fundosur dija, vetëdija, drejtësia, ligji, ndërgjegjshmëria në institucionet më të larta të Kosovës: në Presidencën dhe në Qeverinë!

Me praninë e tyre aty ata në të vërtetë i shpallën të ligjshme edhe privatizimin partiak, edhe privatizimin klanor, edhe korrupsionin, edhe zhvatjet, edhe vjedhjet, edhe krimin në Akademinë e Shkencave dhe të Arteve të Kosovës sot. Dhe, i shpallën të ligjshme në vend se t’i propozojnë Kuvendit të Kosovës, si finansues i asaj Akademie të shpërfytyruar, të degjeneruar, që të marrë masat ligjore për shërimin e për shpëtimin e saj sa më të shpejtë prej gjithë atyre të këqijave që e sundojnë sot!

Deri kur do ta lejojë populli i Kosovës këtë analfabetizëm shkencor e profesional, këtë korruptim, këtë degjenerim, këtë shfrenim në Akademi dhe në politikën shtetërore të Kosovës?!

Amerika përkrah ushtrinë e Kosovës në mes të Beogradit

Zëvendësndihmësi i Sekretarit të Shtetit, Matthew Palmer, një ditë pas votimit të tri projektligjeve për formimin e ushtrisë së Republikës së Kosovës, ka shprehur hapur në Beograd mbështetjen e Shteteve të Bashkuara të Amerikës për formimin e ushtrisë së Kosovës

“Për një kohë të gjatë, Shtetet e Bashkuara të Amerikës e kanë përkrahur themelimin e ushtrisë së Kosovës. Është një proces që do të marrë kohë të gjatë, dhe ne po punojmë me partnerët tonë në Prishtinë po punojmë për t’u siguruar që ky proces të shkojë siç duhet”, ka thënë Palmer në Beograd.

Lidhur me këtë qëndrim të Palmer, ka folur presidenti i Serbisë, Aleksander Vuçiq. Sipas tij, një qëndrim i tillë i SHBA-së karshi Republikës së Kosovës nuk është diçka e re dhe nuk duhet habitur.

Përveç tjerash Palmer përgjatë kësaj vizite në Beograd ka folur edhe rreth dialogut ndërmjet Kosovës dhe Serbisë. AI ka thënë se nuk mund të flasin për detaje specifike të një marrëveshje të mundshme, përderisa nuk kanë parë të jetë arritur diçka konkrete në këtë aspekt.

Dje Kuvendi i Republikës së Kosovës me shumicë unanime të votave ka miratuar tri-projektligjet për shndërrimin e FSK-së në ushtri të Republikës së Kosovës. Në votim nuk kanë marrë pjesë vetëm deputetët e Listës Serbe të cilët e kanë lëshuar sallën në momentin kur është bërë votimi.

Nisma për shndërrimin e FSK-së në ushtri, ka ardhur pas vizitës së kryeministrit të Republikës së Kosovës në SHBA dhe takimit të tij me sekretarin amerikan të Mbrojtjes, James Mattis.

Pas kthimit në Kosovë, Haradinaj kishte thënë se e kishte ‘aminin’ e Amerikës për të vazhduar përpara me formimin e ushtrisë. \

Dyshimet dhe intrigat e rrënuan perandorinë e Aleksandrit të Madh

Arritjet e Aleksandrit të Madh në shekullin IV P.E.S ishin mbresëlënëse. Si djali i një mbreti të fuqishëm dhe një mbretëreshe ambicioze, lindi në vitin 356 P.E.S. Ai studioi nën drejtimin e filozofit të njohur grek Aristotelit deri në moshën 16 vjeçare, dhe u bë mbret i Maqedonisë në moshën 20 vjeçare

Nga Juan Pablo Sanchez

Gjatë sundimit të tij 13-vjeçar, Aleksandri bashkoi Greqinë e lashtë, pushtoi Persinë, dhe krijoi një perandori që shtrihej nga Evropa në Azi. Ai e imagjinonte veten pasardhës të Akilit, dhe si djali i Zeusit. Ndërsa fuqia e Aleksandrit u rrit, po kështu ndodhi edhe me frikën e tij për ta humbur atë që kishte arritur.

Herë megalomaniakal dhe herë paranojak, ai nisi të shihte kudo rreziqe, duke përfshirë edhe personat më afër tij. Ai besonte se ata e kishin zili, dhe se e donin pushtetin e tij. Ai besonte se ata donin që ai të vdiste. Fillimi i shkëlqyer i karrierës së Aleksandrit, i solli atij shumë besnikë, shokë armësh që e ndihmuan në ngjitjen e tij të shpejtë drejt lavdisë.

Në vitin 334 P.E.S, forcat e Aleksandrit përparuan pa pengesa në gjithë Anadollin (Turqia e sotme) dhe pushtuan Perandorinë Akamane (Persiane). Pasi hodhi poshtë një ofertë për një armëpushim nga Dari III i Persisë, Aleksandri hyri në Egjiptin e kontrolluar nga persët në vitin 332 P.E.S.

Ai u prit atje si një çlirimtar nga sunduesit persianë, dhe themeloi Aleksandrinë, qytetin më të famshëm që do të merrte emrin e tij. Në udhëtimin e tij thellë nëpër shkretëtirë pranë kufirit të sotëm me Libinë, Aleksandri pati një vegim hyjnor, që vetëm sa e ushqeu ndjenjën e tij të plotfuqishmërisë.

Mbreti i ri dhe njerëzit e tij përshkruan shkretëtirën për në Oazin Siua, shtëpia e orakullit Amun – i lidhur nga grekët me Zeusin- priftërinjtë e të cilit e shpallën atë Djalin e Zotit. Pasi e mposhti Darin në Gaugamela, Aleksandri u mirëprit ngrohtë në Babiloni nga Mazeusi, tirani persian lokal.

Ndonëse Aleksandri e konsideroi Babiloninë si selinë e qeverisë së tij të re në Azi, ai e lejoi Mazeusin të vazhdonte në pozitën e tij, me disa fuqi të kufizuara. Ky vendim ishte thelbësor për forcimin e pushtetin të Aleksandrit, por disa prej mbështetësve të tij maqedonas u inatosën me Mazeusin, i cili kishte luftuar kundër tyre në Betejën e Gaugamelës.

Ai incident shënoi lindjen e një prirje të vazhdueshme:Aleksandri ndërtoi një oborr paralel me aziatikë, respektonte ritualet vendase, dhe madje u martua me një princeshë baktriane, Roksanën. Shoqëruesit e tij maqedonas të moshuar, që kishin luftuar për babain e Aleksandrit, Filipin II, filluan të distancohen prej këtyre sjelljeve. Madje nisën të përgatiten komplote për vrasjen e mbretit.

Parmenidi kishte qenë krahu i djathtë i babait të Aleksandrit, dhe më pas shërbeu si zv/komandant në ushtrinë e Aleksandrit. Ai gëzonte lidhje të ngushta me oborrin dhe ushtrinë. Tashmë në të 70-tat, Parmenidi ai kishte disa djem që shërbenin nën urdhrat e Aleksandrit. Më i madhi prej tyre, Filotasi, ishte ndoshta më i shquari.

Aleksandri e kishte zgjedhur atë të komandonte kalorësinë, një trupë elite e formuar tërësisht nga pjesëtarët e fisnikërisë maqedonase. Filotasi kishte reputacionin e një trimi, punëtori të madh, si dhe atë të një miku bujar dhe besnik. Por disa mendonin se ai ishte arrogant, sillej në mënyrë të dyshimtë, dhe qe ndoshta ziliqar për arritjet e Aleksandrit.

Filotasi nuk ishte gjithnjë dakord me Aleksandrin, madje ndonjëherë qe një kritik i zëshëm, veçanërisht mbi mënyrën se si mbreti ishte adhuruar si një perëndi në Egjipt. Disa nga gjeneralët e Aleksandrit, të udhëhequr nga Kraterusi, dëgjuan zëra se Filotasi mund të komplotonte kundër Aleksandrit.

Ata urdhëruan spiunët e tyre ta mbanin nën vëzhgim, por dëshmia e vetme e tradhtisë së tij u gjet nga një prostitutë greke. Ajo u tha atyre se Filotasi i kishte thënë në konfidencë, se si ai dhe Parmenidi ishin përgjegjës për fitoret e Aleksandrit.

Kraterusi ia raportoi këtë Aleksandrit, i cili nuk i dha shumë peshë një bisede krevati. Ai i besonte Filotasit, dhe nuk donte të konfliktohej me Parmenidin, të cilit i kishte besuar prej një kohe të gjatë. Në vitin 330, zërat zbuluan një tjetër komplot të Filotasit.

Ndërsa dimëronte me ushtrinë e tij në Frada (Farah-un e sotëm në Afganistan), Aleksandri mësoi se një njeri me emrin Dimnus, kishte planifikuar ta vriste. Një informator, i kishte treguar dy here Filotasit për komplotin, por ky nuk kishte bërë asgjë. Së fundmi, si shkoi dhe u rrëfye direkt tek Aleksandri.

Para se të arrestohej, Dimnusi vrau veten, duke lënë shumë mistere të pazgjidhura. Pasi u dyshua për mikun e tij, Aleksandri i bëri thirrje Filotasit të shpjegohej se pse nuk e kishte raportuar komplotin tek udhëheqësi i tij. Ky i fundit mohoi të ishte pjesë e një komploti për të vrarë mbretit.

Në fund Filotasi ra dakord që të ishte ushtria, ajo që do të përcaktonte fatin e tij. Pas dëgjimit të të gjitha provave ushtria e shpalli Filotasin fajtor për tradhëti, dhe e dënoi atë me vdekje. Rrethi i brendshëm i Aleksandrit, ishte shumë i shqetësuar nga ambiciet dhe xhelozitë, për ta lënë çështjen të përfundonte vetëm me vdekjen e Filotasit.

Hefesti, miku më i ngushtë i Aleksandrit, propozoi që ta torturonin të dënuarin përpara se ta ekzekutonin, me qëllim që të zbulonin se kush tjetër ishte i përfshirë në komplot. Pasi u torturua gjithë natën, Filotasi u dorëzua dhe u rrëfye, dhe të nesërmen u qëllua me gurë për vdekje.

Nga ai moment, radhët e ushtrisë thjesht u spastruan, duke mos lënë askënd të dyshuar për mungesë besnikërie. Por pas ekzekutimit të Filotasit, Aleksandri filloi atë që disa studiues besojnë se është vepra e tij më e errët.

Aleksandri, ndoshta paranojak, besonte se nuk kishte asnjë mënyrë që Filotasi të mund të kishte komplotuar kundër tij, pa dijeninë e babait të tij, Parmenidit. Ai gjithashtu e dinte se ky i fundit mund të vepronte kundër tij, për t’u hakmarrë me vdekjen e djalit të tij. Parmenidi, ishte ngarkuar me detyrën e administrimit të shumicës së pasurisë së perandorisë, dhe linjave strategjike të furnizimit.

Disa historian, madje kanë sugjeruar se komploti kundër Filotasit, ishte gatuar si një justifikim për të hequr babain e tij nga pushteti. Parmenidi ndodhej në Ekbatana, një ish-rezidencë verore e mbretërve persianë. Burimet raportojnë se para vrasjes së tij, ai nuk dinte asgjë për fatin e tmerrshëm që kishte pasur djali i tij. Ai u vra nga një korrier i dërguar nga Aleksandri.

Mbreti dërgoi ndërkohë një kontigjent të vogël ushtarësh në Ekbatana, për të shtypur çdo rebelim që mund të pasojë midis trupave të Parmenidit. Por vdekja e 2 prej këshilltarëve më të besuar të tij nuk e qetësoi Aleksandrin, karakteri i të cilit vazhdoi të degradojë në vitet e ardhshme.

Ai vazhdoi të përvetësonte, ato që maqedonasit i panë si sjellje persiane. Festat e Aleksandrit, u karakterizuan nga shthurja e madhe morale. Banketi më famëkeq u zhvillua në Marakand, ku plasi nje debat mes tij dhe Klitit, një nga gjeneralët e tij më besnikë, mbi pushtimin apo jo të Indisë.

I inatosur nga akuzat e Klitit, Aleksandri e vrau para të gjithëve me një shtizë. Pas kësaj, ai u shpesh shumë i keqardhur. Veprimet e Aleksandrit, bënë shumë pak për të shuar kundërshtitë e brendshme midis pasuesve të tij, ndaj u organizuan komplote të tjera.

Në vitin 326 P.E.S, pasi kishin arritur pranë Indisë në lumin Hifasis (Beas), njerëzit e Aleksandrit u rebeluan. Mbreti u detyrua të tërhiqej në perëndim, dhe nga ai moment mbretërimi i tij nisi një rënie të pandalshme. Tre vjet më vonë, Aleksandri vdiq nga ethet në Babiloni në moshën 32 vjeçare.

Marrë me shkurtime nga National Geographic

Palmer: SHBA ende s’ka parë ndonjë plan për marrëveshjen Kosovë-Serbi

Zëvendës sekretari i shtetit, Mattheë Palmer, po qëndron për një vizitë në Beograd. Ai në një konferencë për media ka folur rreth dialogut ndërmjet Republikës së Kosovës dhe Serbisë në Bruksel

Ai u ka bërë thirrje të dy palëve që të shfrytëzojnë mundësinë historike për arritjen e një marrëveshje e cila do të jetë e pranueshme për të dy palët. “Marrëveshja duhet të jetë ‘win-win’ për të dy palët”, ka thënë Palmer në Forumin e Sigurisë i cili po mbahet në Beograd, transmeton Gazeta Express.

Ai ka thënë se nëse njëra palë humb dhe nëse tjetra fiton, atëherë nuk mund të ketë marrëveshje. Sipas tij vazhdimi i konfliktit të ngrirë ndërmjet dy vendeve mund të sjellë pasoja të tjera në Ballkan.

I pyetur rreth kundërshtimit që Gjermania po i bënë idesë së korrigjimit të kufijve dhe shkëmbimit të territoreve, Palmer ka thënë se SHBA-ja nuk dëshiron që të pozicionohet fare në këtë çështje.

‘Është e rëndësishme që SHBA të mos i jep përparësi asnjë ideje. Ne nuk jemi përcaktuar për asnjë zgjidhje të veçantë. Ne nuk jemi pjesë e bisedimeve dhe nuk shtyjmë përpara idetë. Megjithatë ne po bëjmë përpjekje që të inkurajojmë të dy palët për të ecur përpara me dialogun dhe për të gjetur një zgjidhje të qëndrueshme që do të jetë e pranueshme për të dy palët”, është shprehur ai.

Palmer thotë se nuk mund të flasin për çështje specifike rreth kësaj çështje përderisa ende nuk e kanë parë planin konkret. “Përderisa nuk ka ndonjë marrëveshje konkrete është e vështirë të flitet në mënyrë abstrakte”, ka vazhduar Palmer. .

Palmer ka thënë se i kupton gjithashtu edhe shqetësimet e komunitetit ndërkombëtar sa i përket idesë për shkëmbim të territoreve si pjesë të marrëveshjes ndërmjet Kosovës dhe Serbisë në Bruksel, megjithatë Palmer shtron pyetjen se çfarë nëse nuk ndodh një marrëveshje fare?

“Ne duam të shohim se si duket marrëveshja, dhe pastaj mund të diskutojmë për të gjitha specifikat dhe rreziqet që mund të paraqesë marrëveshja”, ka përfunduar Palmer.

Dje ambasadori amerikan në Beograd, Kyle Scott, ka thënë se është kundër idesë së shkëmbimit të territoreve dhe krijimit të shteteve etnikisht të pastër. Kundër idesë për prekje të territoreve është edhe i gjithë faktori politik në Kosovë.

KDI: Kuvendi t’i kërkoj Qeverisë të gjitha dokumentet për marrëveshjet e arritura në dialogun shtatëvjeçar me Serbinë

Instituti Demokratik i Kosovës (KDI), ka mbajtur sot konferencë për media lidhur me funksionimin e punës së Kuvendit të Republikës së Kosovës, ku u tha se më shumë se një vit nga konstituimi i legjislaturës së gjashtë, Kuvendi nuk ka arritur të funksionoj në mënyrë adekuate dhe vazhdimisht është përballur me kriza të ndryshme, kryesisht të natyrës politike

Artan Murati nga KDI tha se me fillimin e sesionit vjeshtor të punës së Kuvendit është intensifikuar edhe bllokada e punës në Kuvend, duke paralizuar kështu jetën parlamentare. “Nga të gjitha seancat e mbajtura këtë sesion, vetëm një ka arritur të përfundoj në ditën kur ka filluar. Ndonëse shpeshherë mosfunksionimi i punës në Kuvend është duke u atribuuar bojkotit opozitar të punës së Kuvendit, megjithatë faktorët e mosfunksionimit të Kuvendit janë të shumëllojtë”, ka thënë ai.

Mungesat e deputetëve nga shumica parlamentare është një nga problemet kryesore të kësaj legjislature, trend ky i cili është duke vazhduar edhe në sesionin vjeshtor. KDI konsideron që Grupet Parlamentare në mazhorancë duhet të jenë mirë të koordinuara për të mundësuar zhvillimin e seancave plenare.

“Nëse subjektet opozitare janë duke ushtruar të drejtën e tyre për bojkoti të Kuvendit, koalicioni qeverisës duhet të mobilizohet për të siguruar numrat e mjaftueshëm mbarëvajtjen e seancave plenare dhe komisioneve parlamentare”, ka shtuar ai.

Murati ka potencuar se KDI fton Kryesinë e Kuvendit të mbajë takime të rregullta dhe të thërras seanca në intervale më të shpeshta kohore, duke mos lejuar grumbullimin e shumë pikave të rendit të ditës pasi që kjo është duke ndikuar direkt në mos-përmbushjen e agjendës legjislative.

Sa i përket rolit të opozitës, ai ka nënvizuar se deri më tani, grupet parlamentare opozitare nuk kanë pasur një strategji të përbashkët, qoftë për bojkotim të punës së Kuvendit apo për zgjedhje të reja.

“Kjo qasje e pa-koordinuar ka qenë jo-produktive dhe nuk ka arritur të sjellë rezultatet e pritshme për opozitën. Ndonëse subjektet opozitare nuk e kanë obligim t’ua bëjnë numrat subjekteve në pushtet, megjithatë konstruktiviteti për të mirën e përgjithshme është mase i nevojshëm”, shtoi Murati.

Ai ndër të tjera ka thënë se konsensusi mes subjekteve politike është vendimtar në këtë periudhë, dhe se debati assesi nuk duhet të zhvendoset në forume tjera jashtë Kuvendit të Kosovës.

Ndërsa, Jeta Krasniqi nga KDI ka folur lidhur me dialogun Kosovë-Serbi si një ndër çështjet që po ndikon në bllokimin e punës së Kuvendit dhe bojkotimin e punimeve të seancave plenare nga ana e opozitës.

Ajo ka vlerësuar se fillimi i fazës së re të dialogut Kosovë – Serbi ka shkaktuar polarizim mes partive politike në Kosovë rreth pritshmërive nga ky proces, temave që duhet të diskutohet dhe kush duhet të udhëheq me procesin e dialogut.

“Mungesa e konsensusit për këtë çështje ka ndikuar dhe në mbarëvajtjen e punës së Kuvendit. Shumica parlamentare nuk ka arritur të siguroj numrin e deputetëve për të shtyrë përpara iniciativat e saj, ndërsa ka bojkotuar seancën e thirrur nga opozita. Bojkoti i dyanshëm i seancave rezultoi që asnjëra nga iniciativat të mos votohen. Seanca e thirrur nga opozita ka mbetur ende e patrajtuar, për të cilën opozita kishte deklaruar se nuk do të marrin pjesë në seanca të rregullta pa u kryer seanca e thirrur nga opozita”, ka thënë ajo.

Duke konsideruar rëndësinë e kësaj teme shtetërore, Krasniqi ka potencuar se KDI vlerëson se debati rreth dialogut Kosovë-Serbi duhet të zhvillohet në Kuvendin e Republikës së Kosovës ku duhet të përpilohet platforma shtetërore rreth këtij procesi.

“Kuvendi duhet të jetë pro aktiv në këtë proces duhet të përcaktoj edhe vijat e kuqe të dialogut si institucioni më i lartë vendimmarrës, ky institucion nuk duhet të anashkalohet”.

Po ashtu u tha se partitë politike duhet të arrijnë konsensus politik mbi procesin e dialogut para arritjes së një marrëveshjeje eventuale me Serbinë për të evituar skenarët e së kaluarës si atë të marrëveshjes me Malin e Zi, e cila në mungesë të një konsensusi politik dëmtoi shtetin e Kosovës si në sferën e brendshme ashtu edhe të jashtme.

“Kuvendi i Republikës së Kosovës duhet të kërkoj sqarim nga Qeveria e Kosovës se çfarë është duke ndodhur me procesin e dialogut teknik, kush e udhëheq këtë proces duke konsideruar që shefi i negociatave i emëruar nga Kryeministri është duke pritur emërimin për ambasador në Emirate të Bashkuara Arabe (EBA)”, u tha në këtë konferencë.

Krasniqi nënvizoi se Kuvendi duhet të kërkoj që Qeveria e Kosovës të dorëzoj të gjitha dokumentet lidhur me marrëveshjet e arritura në kuadër të dialogut përgjatë 7 viteve si dhe të kërkoj në mënyrë urgjente raportim nga ana e Kryeministrit të Kosovës rreth marrëveshjeve të arritura deri më tani, cilat janë marrëveshjet, sa janë zbatuar këto marrëveshje, çfarë efekte kanë sjellë, ku janë ngecjet e procesit dhe cilat janë propozimet e Qeverisë lidhur me statusin e këtyre marrëveshjeve.

Ambasadori i SHBA-ve dhe i Gjermanisë flasin për korrigjimin e kufijve

Edhe gjatë ditës së djeshme është mbajtur Forumi i Sigurisë në Beograd, ku temë ishte edhe Kosova. Në Forumin e Sigurisë i cili po mbahet në Beograd, gjatë ditës së djeshme është diskutuar edhe për Kosovën e në veçanti për korrigjimin e kufijve dhe dialogun në mes të Prishtinës e Beogradit

Panelist ishin ambasadori amerikan në Serbi, Kyle Scott dhe ambasadori i Gjermanisë, Thomas Schieb.
Siç shkruajnë mediat serbe, ambasadori Schieb ka folur për korrigjimin e kufijve në mes të Kosovës dhe Serbisë përgjatë vijave etnike do të ishte në kundërshtim me atë që duhet të bëhet në Ballkanin Perëndimor.

“Pasojat do të ishin përtej këtij rajoni në rast të një shkëmbimi”, citohet të ketë thënë ambasadori gjerman, Thomas Schieb, i cili shtoi se, perspektiva evropiane e rajonit është shumë e qartë dhe se reformat duhet të vazhdojnë

Sipas tij, Gjermania beson se ideja e shkëmbimit të territorit nuk është e mirë, sepse një zgjidhje e tillë mund të prodhojë shumë më tepër probleme sesa do t’i zgjidhnin ato.

Ai përsëriti se bashkimi me vendet e Ballkanit Perëndimor është një nga prioritetet e Gjermanisë.

Në anën tjetër edhe ambasadori i Amerikës në Serbi, Kyle Scott, ka folur për korrigjimin e kufijve por, edhe për dialogun në mes të Serbisë dhe Kosovës.

Sipas ambasadorit Scott, SHBA-të nuk vendosin asnjë parakusht për këtë dialog.“Ekziston rreziku i ruajtjes së status-quos, dhe jo vetëm shkëmbimit të mundshëm të territorit”, ka thënë Scott në Forumin e Sigurisë, përcjell lajmi.net.

Ai në fjalimin e tij theksoi se, situata aktuale nuk është si në vitin 1999 dhe se amerikanët presin që Serbia dhe Kosova të arrijnë një marrëveshje si dy shtete sovrane.

Ai tha se Shtetet e Bashkuara të Amerikës mbështesin integrimin evropian dhe është i vetëdijshëm se procesi është i gjatë dhe i komplikuar, por në të njëjtën kohë është i bindur se vendet e Ballkanit Perëndimor do të bëhen shoqëritë më të mira dhe më të qëndrueshme duke zbatuar reformat.

Ndryshe, Forumi i Sigurisë që po mbahet në Beograd do të vazhdojë edhe sot.