Rohan: Kujdes si po silleni me diplomatët e huaj, sepse vareni nga vullneti i mirë i BE-së dhe SHBA-ve

Parlamenti i Kosovës edhe mund ta zhbëjë Gjykatën Speciale. Por, para këtij veprimi duhet gjetur alternativa për t’i zbardhur pretendimet për krime lufte. Për këtë duhet marrëveshje me komunitetin ndërkombëtar përfshirë BE’në dhe SHBA’në. Kosova është shtet i pafuqishëm, s’është anëtar i BE’së dhe as i OKB’së. Vendimmarrje e tillë e pakoordinuar e dobëson edhe më shumë shtetin e ti

Për Express flet Albert Rohan, ish-ndërmjetësues i dialogut Kosovë-Serbi në Vjenë. Ish-Zëvendësi i Ahtisarit në dialogun Kosovë-Serbi, Albert Rohan, ka thënë se liderët e Kosovës para se të tentonin të shfuqizonin Gjykatën Speciale në Parlament do të duhej të mendonin se në cilën gjykatë do të gjykoheshin pretendimet e Senatorit zviceran lidhur me akuzat për krime të kryera në kohën e luftës dhe pasluftës nga pjesëtarë të UÇK’së.

Në një bisedë ekskluzive për Express, Rohan ka thënë se udhëheqja e Kosovës nuk ka prezantuar asnjë alternativë se kush do të merret me pretendimet për akuzat e kryera gjatë luftës.

“Pyetja ime e parë do të ishte me çka e zëvendësoni”, ka thënë Rohan, për Express, kur është pyetur se si e sheh shfuqizimin e Speciales nga Parlamenti i Kosovës.

“Ata duhet të gjejnë një marrëveshje me komunitetin ndërkombëtar”, ka shtuar ai.

Këto komente Rohan i ka bërë një ditë pasi dështoi nisma e deputetëve të pushtetit për të rrëzuar Gjykatën Speciale përmes anulimit të Ligjit për Dhomat e Specializuara. Prapa kësaj nisme kanë qëndruar Presidenti Hashim Thaçi, Kryeministri Ramush Haradinaj, Kryetari i Parlamentit Kadri Veseli e Kryetari i NISMA’s Fatmir LImaj.

Sidoqoftë, Rohan thotë se edhe liderët e Kosovës por edhe diplomatët e BE’së duhet të ulen për të folur dhe për të gjetur zgjidhje pas situatës së mbrëmshme.

“Nëse do të isha unë diplomacia e Bashkimit Europian do të flisja me lidershipin e Kosovës për ta gjetur një zgjidhje për këtë. Nuk mund thjesht të themeloni diçka e pastaj ta zhbëni atë dhe mos ta zëvendësoni me diçka tjetër, sepse nëse ekzistojnë këto akuza të cilat janë shumë serioze dhe të cilat duhet të adresohen, nëse jo nga një Gjykatë Speciale atëherë nga një Gjykatë normale penale në Kosovë”, ka shtuar ai.

Albert Rohan ka qenë Zëvendës i të Dërguarit të Posaçëm të Sekretarit të Përgjithshëm të Kombeve të Bashkuara për Procesin e negociatave Kosovë-Serbi që janë zhvilluar në Vjenë, gjatë viteve 2005-2007.

Diplomati austriak ka thënë se është obligim edhe i Shtetit të Kosovës të qartësojë të gjitha pretendimet që janë ngritur për krime lufte dhe të dihen nëse të dyshuarit do të jenë të pafajshëm ose fajtorë.

“Këtu po mungon alternativa, nuk mund thjesht ta shfuqizoni [ligjin] dhe ta lëni më kaq. Sikur të isha udhëheqësit tuaj, nëse Parlamenti dëshiron ta shfuqizojë, atëherë në rregull por çka më pas? Si t’i adresoni këto akuza, të cilat janë shumë serioze? Si dëshironi t’i adresoni sepse ato duhet të qartësohen në çfarëdo mënyre, nëse njerëzit janë ta pafajshëm apo fajtorë, por nuk mund ta lëni të varur këtë çështje”, ka shtuar ai.

Ndërkohë, pas nismës së deputetëve të pozitës, kanë reaguar edhe ambasadorët e SHBA’së, Britanisë dhe vendeve të BE’së. Njëri prej tyre tha se e premtja ishte dita më e rëndë prej luftës në Kosovë.

Ndërkohë, Albert Rohan, thotë se me Kosova duhet të ketë kujdes ndaj zyrtarëve të BE’së dhe të SHBA’së për shkak se është shtet që nuk është njohur, s’është anëtar i BE’së dhe as në OKB.

“Nuk do të thosha se do të shkatërrohet, por në përgjithësi, Kosova është në pozitë shumë të vështirë për shkak të mungesës së njohjeve universale, mungesa e anëtarësisë në OKB, dhe për shkak të ligësisë së saj ekonomike. Pra, është një vend që varët shume nga ndihma dhe vullneti i mirë i Bashkimit Europian në veçanti dhe të SHBA-së, do të doja që të gjithë të mos bëjnë diçka kundër vullnetit të komunitetit ndërkombëtar nëse kjo është ajon çka përfaqëson ky akt”, ka shtuar ai.

Ai ka këshilluar liderët e Kosovës që sa herë të marrin vendime për Kosovë duhet të mendojnë që mos të lëndojnë procesin integrues në BE.

“Duhet të jenë të vetëdijshëm se e ardhmja e Kosovës është në BE dhe kjo duhet të merret parasysh nga Kosova kur merr vendime politike”, ka deklaruar Rohan.

Gjykata Speciale ishte themeluar në vitin 2015 me një vendim të Kuvendit të Kosovës, i cili kishte ndryshuar edhe Kushtetutën. Pastaj, ishte miratuar edhe Ligjin për Dhomat e Specializuara. Pothuajse gjithçka është gati për fillimin e punës në Gjykatë derisa janë paralajmëruar edhe hapat e parë të kësaj Gjykate.

Shumëkush, reagimin e deputetëve të PDK-së, AAK-së e NISMA-s e ka ndërlidhur me idenë se në listën e të akuzuarve mund të jenë Hashim Thaçi, Kadri Veseli, Ramush Haradinaj, Fatmir LImaj apo Daut Haradinaj.

Në kohën kur ishte votuar Gjykata, NISMA, AAK e Vetëvendosje kishin dalë kundër. Ndërsa, pro kishin votuar deputetët e PDK’së, të LDK’së dhe të komuniteteve.

Të rinjtë kosovarë synojnë Evropën Perëndimore

Mundësia e migrimit legal për në vendet e Evropës perëndimore, po shtyn shumë të rinj kosovarë që të largohen nga vendi. Kosova ka moshën mesatare më të re në Evropë dhe shkallën më të lartë të papunësisë

Largimi i të rinjve nga Kosova nuk ka të ndalur. Kosova një vend i vogël Ballkanik me 1.8 milion banorë dhe me moshën mesatare të popullsisë më të re në Evropë, përballet edhe me shkallë të lartë të papunësisë, por edhe me mungesën e perspektivës për të rinjtë. Valiant Ramosaj, është një i ri kosovar, i sapodiplomuar në Universitetin e Prishtinës, drejtimi “sistemi bankar”. Ai punon në një bankë, por synimet e tij për të ardhmen janë të tjera. “Unë kam aplikuar në Universitetin e Vjenës, drejtimi informatikë ekonomike dhe jam pranuar dhe jam në pritje të marrjes së vizës që të largohem nga këtu. Nuk e kam gjetur perspektivën në Kosovë, thjesht jam një person që vazhdimisht kërkoj dhe mendoj se në Evropën perëndimore mund ta gjej vetën. Kam provuar ta gjej vetën edhe në Kosovë, por jo”.

Me studime dhe i papunë

Valianti thotë se gjatë studimeve në Prishtinë, në Universitet mësohet vetëm teori, nuk ka asnjë lloj praktike. “Shembull, unë jam ekonomist, llojet e kredive që i mësojmë në Universitet nuk kanë të bëjnë asgjë me kohën e sotme, tash është ndryshe me zhvillimet teknologjike”. “Unë punoj në një Bankë në Prishtinë, por pavarësisht se kam qenë student i dalluar, mendoj se vetëm kam pasur fat që pas studimeve jam punësuar në një Bankë, sepse kam shumë kolegë të mi që kanë qenë studentë të dalluar, por sot janë të papunë. Synimet e mia janë që në Austri të vazhdojë studimet për master dhe të mbetem atje edhe në të ardhmen. Nuk mendoj të kthehem në Kosovë. E flas gjuhën gjermane, jam pranuar në Universitetin e Vjenës, mendoj se mund të integrohem lehtë dhe nuk kam asnjë arsye që mos të qëndrojë në Austri”.

Problem për studentët kosovar vazhdon të jetë marrja e një vize studimi. Pavarësisht që shumë të tillë janë pranuar nëpër Universitete të ndryshme evropiane, vonesa e vizës u ka vështirësuar planet. Me një problem të tillë përballet edhe Valianti 24 vjeç. “Në fakt një semestër në Vjenë më ka humbur për shkak që akoma nuk kam vizë, sepse kërkesa për termin është shumë e madhe, por, Universiteti austriak e ka mirëkuptuar pozitën time dhe më kanë dhënë edhe një mundësi, sapo të vendosem në Vjenë”.

Si mund ta fitojë përvojën një i ri kur nuk punësohet?

Kosova është i vetmi vend në Evropë që nuk gëzon lirinë e lëvizjes së lirë. Besfort Ahmeti, është një tjetër i ri kosovar i sapodiplomuar, inxhinier i informatikës, por është i papunë. Ai thotë se ka një vit që kërkon punë në Kosovë, por nuk gjen. “Deri më tash po besoj që kam aplikuar për punë në 30 ndërmarrje të ndryshme, por, pothuaj në të gjitha kushti kryesor ishte përvoja e punës. Unë natyrisht që nuk kam përvojë, sepse jam i sapodiplomuar dhe kam nevojë për punë. Dhe askund nuk pranohesha. Thjesht në Kosovë duhet ta kesh një lidhje të fortë diku, që të pranohesh në punë”.

Besforti i ndodhur në këtë situatë zhgënjyese për të, ka gjetur një bursë studimi, ka vendosur që të aplikojë për vazhdimin e studimeve master jashtë Kosovës, me synimin që t’i përfundojë ato, ta gjejë një punë dhe të mos kthehet në Kosovë. Ai është pranuar për vazhdimin e studimeve postdiplomike në një Universitet të Vjenës. “Po ti përfundoj studimet master në Universitetin e Vjenës, atëherë mendojë që kam më shumë mundësi që të gjej një punë të mirë në profesionin tim. Nëse gjej një punë të mirë, nuk do të kthehem në Kosovë. Kam jetuar si fëmijë dy vjet e gjysmë në Gjermani gjatë periudhës së luftës, kam lidhje emocionale për botën gjermanofolëse, mendoj se integrohem shumë lehtë dhe thjesht vetëm nëse nuk mundem, sepse në të kundërtën nuk do të kthehem në Kosovë”, shprehet me plotë shpresë Besforti.

Besforti së bashku me prindërit dhe vëllain e vogël gjatë periudhës së luftës së Kosovës ka jetuar dy vjet në Gjermani. “Gjatë vitit 1998-99 së bashku me familjen kemi qëndruar në Gjermani dhe pas përfundimit të luftës, babi në mënyrë vullnetare është kthyer në Kosovë. Por, po ta pyesësh tash, babi është penduar që është kthyer. Atëherë kam qenë shumë i ri, babi nuk me ka pyetur kur ka vendosur që të kthehet në Kosovë, por, tash që vendimet për të ardhmen time i marr vet, unë kam vendosur që ta provojë fatin në Austri, ose pse jo edhe në Gjermani”.

Potencial i pashfrytëzuar

Por si e shpjegojnë sociologët fenomenin e largimit të rinjve kosovar nga vendi, sidomos të kuadrove të shkolluar? Artan Muhaxheri është sociolog, profesor në një nga Universitetet kosovare. “Të gjitha vendet e Ballkanit, gjithmonë janë përballur me trendin e migrimit, qoftë legal qoftë ilegal, por Kosova në këtë mes është rast me specifik, për faktin që ka popullsinë më të re në Evropë dhe institucionet e Kosovës nuk kanë ide dhe nuk kanë kapacitete të përballen me këtë potencial të fuqisë së re punëtore. Pra, nuk ka vende të punës, nuk ka investime të huaja, dhe rrjedhimisht nuk ka përgjigje institucionale të aspektit demografik të Kosovës”, shprehet Artan Muhaxheri.

Në Kosovë çdo vit rreth 30 mijë të rinj hyjnë në tregun e punës, ndërsa në anën tjetër as për së afërmi nuk hapen 30 mije vende të reja pune. Për këtë arsye në Kosovë niveli i papunësisë rritet, cdo vit. “Për këtë arsye mundësia për të punuar legalisht në vendet evropiane tash është e madhe dhe kjo është një joshje shumë e madhe për rininë kosovare. Institucionet e Kosovës për fat të keq mbesin vetëm në nivelin retorik, nuk ka strategji që do të ishte premtuese për rininë se do të përmirësohet niveli i punësimit, prandaj edhe migrimi legal është jashtëzakonisht joshës për rininë”, shprehet Artan Muhaxheri.

Papunësia në Kosovë kohët e fundit ka shënuar rritje. Vetëm gjatë nëntë muajve të këtij viti papunësia është rritur me 2.9%, bëë të ditur agjencia e statistikave të Kosovës. Shkalla e papunësisë në Kosovë llogaritet të jetë mbi 35 për qind./dw

Përgjigje Sali Berishës për akuzat që unë jam agjent i UDB-së

Sali Berisha akuzoi dy ditë më parë si agjentë të UDB-së Fred Abrahams, shtetas amerikan i cili punoi 15 vjet për të shkruar librin “Shqipëria Moderne: Nga Diktatura në Demokraci në Evropë”, si dhe Fron Nahzi, edhe ky qytetar amerikan dhe drejtori i parë i Fondacionit Soros në Shqipëri

Në një reagim për gazetaren Entela Resuli në “DITA”, Fred Abrahams i cilëson të pabaza deklaratat e bëra nga Berisha, teksa shton se nëse ai ka fakte, duhet t’i paraqesë ato para autoriteteve amerikane, pasi kjo do të përbënte edhe shkelje të ligjit amerikan.

Sa i përket Fron Nahzi, Abrahams thotë se ai ka pasur një marrëdhënie të ngushtë me Berishën në 1991 dhe 1992, por ishte ndër njerëzit e parë që pranoi se Berisha përdorte taktika të kohës komuniste për të ushqyer frikën.

“Nëse Sali Berisha ka dëshmi se kam punuar për një shtet të huaj, atëherë i bëj thirrje t’ia paraqesë ato autoriteteve të SHBA-së, pasi kjo do të përbënte një shkelje të ligjit amerikan.

E njëjta gjë vlen për akuzat ndaj Fron Nahzi, edhe ky një qytetar amerikan dhe drejtori i parë i Fondacionit Soros në Shqipëri.

Nahzi ka pasur një marrëdhënie të ngushtë me Berishën në 1991 dhe 1992, gjatë tranzicionit kritik, por ishte ndër njerëzit e parë që pranoi se Berisha përdorte taktika të kohës komuniste për të ushqyer frikën, shkatërruar kritikët dhe për të promovuar veten. 25 vjet më vonë, pak ka ndryshuar”, thekson Abrahams.

Ish-kreu i qeverisë ka sulmuar hapur organizatën Soros si dhe dy prej kritikëve të tij të hapur, duke i cilësuar si agjentë të Beogradit.

I ftuar në Ora News, Berisha deklaroi se dy njerëzit e parë të Soros në Shqipëri, Fron Nahzi dhe Fred Abrahams u përgjuan nga SHISH si agjentë të Beogradit që në vitin 1992, ndërsa e cilësoi Soros si mafian më të rrezikshme antishqiptare.

“Dy njerëzit e parë të Soros në Shqipëri, Fron Njazi dhe Fred Abrahams u përgjuan nga SHISH si agjentë të Beogradit që në vitin 1992”, tha Berisha.

Në këtë linjë ai ka sulmuar edhe ambasadoren e BE në Tiranë.

“Cili është pasioni i zonjës Vlahutin për qeverinë, a është majtizmi, sorosizmi, a ka faktorë të tjerë nuk i di unë, nuk më interesojnë.

Mua më intereson kjo, shqiptarëve u është thënë në mënyrë të përsëritur ajo që nuk ka ndodhur. Më intereson që personalitete të shquara kanë shprehur keqardhje të madhe për kanabisin që nuk kanë qëndruar kundër tij se nuk kanë qenë të informuar në shkallën e duhur”, do të shprehej Berisha./DITA

Thaçi në kurthin që e ndërtoi vet për Gjykatën Speciale

Mbrëmë Kuvendi i Kosovës, ka dështuar në shfuqizimin e Gjykatës Speciale, ashtu siç ishte kërkuar nga 43 deputetët të Kuvendit të Kosovës. Këta deputetë me një kërkesë ndaj Kuvendit, deshën që ta shpërbëjnë ligjin për Gjykatë Speciale, por meqë nuk kishte kourum të mjaftueshëm, dështoi kjo kërkesë, e cila ngjalli reagime të shumta nga ndërkombtarët

Ndonëse u pa si i papranushëm ky vendim, megjithatë nga njohës të fushës së drejtësisë kanë thënë se Specialja edhe mund të shfuqizohet, veq se kjo, mund të ndikojë negativisht në të ardhmen e Kosovës.
Gjoshi: Specialja mund të shfuqizohet, por pasoja të rënda e presin Kosovën

Kështu, avokati Adrian Gjoshi në një përgjigje për “Bota sot”, ka thënë se ligji për Specialen edhe mund të shfuqizohet, mirëpo kjo do të ishte një lojë shumë e rrezikshme për Kosovën.

“Ligji për Gjykatën Speciale mund të shfuqizohet, megjithatë, një nismë e tillë legjislative është e papranueshme. Gjykata Speciale ka ardhur si rezultat i një amandamentimi kushtetues dhe votimit parlamentar (me shumicë të kualifikuar) të ligjit për Gjykatën Speciale. Një zmbrapsje nga gjithë ajo çka ka ndodhur dhe nga gjithë ajo çka është votuar, do të ishte papjekuri dhe lojë e rrezikshme e Kosovës për Kosovën”, ka thënë avokati Gjoshi për “Bota sot”.

Ai ka thënë më tutje se nëse do të kishte rezultat pozitiv kjo kërkesë për Specialen, atëherë Kosova do të humbte marrëdhëniet me përkrahësit e saj dhe do të betononte izolimin e saj.

“Nëse do të kishte sukses kjo iniciativë legjislative, Kosova do të kishte pasoja të rënda, duke humbur përkrahësit e saj strategjik; duke betonuar izolimin e saj; dhe përfundismisht duke minuar të ardhmen e vendit tonë”, ka thënë Gjoshi.

Xhemajlaj: Thaçi ushtronte presion mbi deputetët

Nga ana tjetër, zëvendësministri i Punëve të Brendshme të Kosovës, Isa Xhemajlaj ka thënë se Specialja edhe do të mund të evitohej dhe jo kryeministri i asokohe Hashim Thaçi të merrte vendime të dëmshme për vendin.

“Mendoj që po t’i kishim kryer detyrat tona, kjo gjykatë ka mundur të evitohej apo të paktën të mos ishte gjykatë selektive. Nuk jam i sigurt se si do të zhvillohen gjërat në parlament rreth shfuqizimit të këtij ligjit, por është dashur me koh? t’i bëhet anailzë kësaj çështje, e jo ish kryeministri të merrte vendime që kanë pasoja për vendin”, ka theksuar Xhemajlaj.

Ai ka thënë më tutje se ende nuk e ka të qartë pse ish kryeministri Thaçi ushtronte presion mbi deputetët për këtë gjykatë. “As sot se kam të qartë pse ish kryeministri atëherë ushtronte presion mbi deputetët pro kësaj Gjykate? Sido që të vendoset rreth këtij ligji pro apo kontra, kjo çështje nuk do të kalojë pa pasoja për Kosovën”, ka thënë Xhemajlaj për “Bota sot”.

Kelmendi: Thaçi ka frikë nga Specialja

Ndërkaq njohësi i çështjeve kushtetuese Muhamet Kelmendi, ka thënë se Kuvendi mund të shfuqizojë Specialen dhe kjo gjendje e rëndë erdhi nga rrjedhoja e ish kryeministrit, Hashim Thaçi.

“Natyrisht se po. Kuvendi ka votuar për dhe Kuvendi mund të shpallë vendimin e vetë. Është tjetër se pse dhe ku dërgon kjo? Mendoj se e tërë gjendja e rëndë është rrjedhojë e Hashim Thaçit. Ky ishte ai që e detyroi Kuvendin të votonte për dhe ky është ai që po bën çmos që të anulohet ligjiandi i tillë. Duket se ka frikë nga Gjykata. Atëherë kishte premtime tjera e tash ka rënë në kurth”, ka theksuar Kelmendi.

Ai ka shpjeguar edhe arsyen pse ishte dhe është edhe tash kundër kësaj gjykate. “Po dua të them isha dhe jam kundër Gjykatës së tillë Speciale. Është gjykatë një nacionale e karakterit racist. Këtu është shkaku pse”, ka thënë juristi Kelmendi për “Bota Sot”.

Daniel Serwer i tërheq vërejtjen BE-së: Kujdes si po veproni me Kosovën!

Lidhur me deklaratën e presidentit serb Aleksandër Vuçiq në Moskë se ai dëshiron pjesëmarrjen e Rusisë në negociatat me Kosovën nëse Shtetet e Bashkuara e bëjnë një gjë të tille, ka zgjuar reagimin e ekspertit për Ballkanin Daniel Serwer, duke thënë se nëse Serbia arrin në fazën përfundimtare të bisedimeve me BE pa normalizuar marrëdhëniet me Kosovën, nuk do të marrë asgjë në këmbim

Serwer pohon se normalizimi përfshin dy hapa të rëndësishëm – pranimin e Kosovës në OKB dhe shkëmbimin e diplomatëve në nivel ambasadorësh. “Kur Serbia duhet të normalizojë marrëdhëniet me Kosovën? Qasja që Beogradi ka është se ai planifikon që ky normalizim të shtyhet deri para hyrjes në BE. Ky është një gabim serioz”, ka thënë Serwer, transmeton Indeksonline.

Ai gjithashtu beson se Moska nuk do të ndihmojë në bisedimet midis Prishtinës dhe Beogradit. “Në fund të fundit, Rusia ka njohur pavarësinë e krahinës së shkëputur të Gjeorgjisë dhe Moldavisë, ndërsa aneksoi Krimenë dhe siguron mbështetje për separatistët në Ukrainë. Pyetja mbetet nëse ajo është e mençur që Serbia të mbështetet në Rusi për të konfirmuar sovranitetin e Beogradit mbi Kosovën?”, tha Serwer.

Ai shton se në fazën përfundimtare të negociatave, të gjitha levat janë në duart e BE-së. “Pyetni vetëm Slloveninë dhe Kroacinë, të cilët kanë qenë të detyruar për të bërë lëshime në çështje të rëndësishme në fazën përfundimtare të bisedimeve të saj të pranimit, shtoi ai server.

“Le të jetë e qartë: Serbia është e lirë të zgjedhë aleatët e saj ose jo-shtrirjes, ashtu si çdo shtet tjetër sovran Por, unë me të vërtetë nuk mund të ulen në dy karrige Harmonizimi i politikës së jashtme me BE-në është pjesë e kualifikimeve për bashkimin Ndërsa Brukseli mund të jetë… ambivalent lidhje me atë në të ardhmen e afërt, zërat për hyrjen thjesht nuk do të jenë aty kur të vijë koha, nëse Serbia i plotëson të gjitha kriteret për anëtarësim “, tha ai.

Sipas Serwer, kjo do të thotë se do të ishte më e mençur që Serbia të vendosë sa më shpejt të jetë e mundur për kryesuesin e BE.

Shfuqizimi i Gjykatës Speciale, procedurë me pengesa

Kryeministri i Kosovës, Ramush Haradinaj, e ka vlerësuar Gjykatën Speciale si “të padrejtë për Kosovën”. Ky vlerësim i kryeministrit Haradinaj, vjen pas dy dështimeve të Kryesisë së Kuvendit të Kosovës, ditën e premte, që të sigurojë kuorumin për shqyrtimin e kërkesës së 43 deputetëve nënshkrues, me të cilën kërkohej seancë e jashtëzakonshme për shfuqizimin e Ligjit për Dhomat e Specializuara dhe Zyrën e prokurorit të specializuar, që njihet si Gjykata Speciale

Në një adresim për zyrtarët e Aleancës për Ardhmërinë e Kosovës, lider i së cilës është Haradinaj, ai ka thënë se Gjykata Speciale ia rëndon imazhin Kosovës. “Ideja e deputetëve, kërkesa e deputetëve, për ta shfuqizuar ligjin… unë nuk kam koment. Kjo është e deputetëve. Deputetët janë të zgjedhurit e popullit. Nëse do ta votonin dje, me 61 vota, për mua do të ishte ligj. Edhe çdo herë do të jetë, sepse kur voton Parlamenti, për Qeverinë është ligj”, ka thënë Haradinaj.

Kryetari i Kuvendit të Kosovës, Kadri Veseli, përmes një shkrimi në rrjetin social Facebook, ka thënë se “në vazhdimësi ka pasur qëndrime të ndryshme rreth Gjykatës Speciale”, duke theksuar se e premtja nuk ka qenë ditë e lehtë për Kosovën.

“Në respektim të Rregullores së Kuvendit, iniciativa e 43 deputetëve për të sjellë një projektligj që shfuqizon Ligjin për Dhomat e Specializuara është shqyrtuar dhe është proceduar për vendimmarrje, bazuar në Rregulloren e Kuvendit. I gjithë procesi është zhvilluar konform ligjeve të vendit dhe qëndrimeve politike të secilit subjekt. Kosova qëndron e palëkundur në përkushtimin e vet perëndimor, për integrim në Bashkimin Evropian dhe për raporte të veçanta me Shtetet e Bashkuara të Amerikës”, ka thënë Veseli.

Ai, gjithashtu, ka bërë të ditur se “Kuvendi i Kosovës, në bazë të Rregullores dhe Kushtetutës, nga e shtuna, futet në pushimin dimëror, deri në javën e tretë të muajit janar”. Ndryshe, më herët, të shtunën, presidenti i Kosovës, Hashim Thaçi, përmes rrjetit social Twitter, ka shkruar se drejtuesit e Kosovës mbeten të angazhuar për demokraci dhe sundim të ligjit.

“Mes spekulimeve, është e rëndësishme që të gjithë të vazhdojnë të jenë të sigurt për të ardhmen e Kosovës dhe për proceset e saj demokratike. Shoqëria dhe udhëheqësia e Kosovës mbeten plotësisht të angazhuara për demokraci, sundim të ligjit, pajtim, dialog dhe marrëdhënie në baza të barabarta dhe të drejta”, ka shkruar Thaçi në Twitter.

Por, i menjëhershëm ka qenë reagimi i Ambasadorit të Shteteve të Bashkuara të Amerikës në Kosovë, Greg Delawie, lidhur me nismën për shfuqizimin e Gjykatës Speciale. “Një vendim për revokimin e Gjykatës Speciale do të shënonte një pikë kthese larg sundimit të ligjit, Evropës dhe Shteteve të Bashkuara. Kosovë, mos e zgjidhni atë të ardhme për fëmijët tuaj!”, ka shkruar Delawie në Twitter.

Analistët: Propozimi për shfuqizim, nuk ishte “befasi”

Njohësit e çështjeve juridike kushtetuese, thonë se pas dështimit, në ditën e premte, që Kryesia e Kuvendit ta procedojë propozimin për shfuqizimin e Gjykatës Speciale, procedimin e një projektligji për shfuqizimin e kësaj gjykate, mund ta bëjë Qeveria e Kosovës.

Megjithatë, sipas tyre, një tentim i tillë, përsëri do të përballej me procedura, të cilat mund ta stopojnë procedimin e këtij projektligji deri te deputetët e Kuvendit të Kosovës.

Mazllum Baraliu, profesor i të Drejtës Kushtetuese, duke folur për Radion Evropa e Lirë, shpjegon se në parim, Qeveria e Kosovës mund ta bëjë projektligjin për shfuqizimin e Gjykatës Speciale dhe ta dërgojë atë në Kuvend.

Sipas tij, Kuvendi më pas, do të duhej sërish ta thërriste Kryesinë, për të caktuar rendin e ditës së seancës dhe më pas, me shumicë votash ta dërgojë këtë projektligj në seancë parlamentare.

Por, sipas profesor Baraliut, pengesa e parë për t’u proceduar më tutje një projektligj i tillë eventual, do të mund të hasej në Kryesi të Kuvendit.

“Pikërisht që mund të ndodhë një situatë çfarë ishte të premten. Pa kuorum të caktuar në Kryesi të Kuvendit, nuk mund të caktohet rendi i ditës, rendi i punës së asnjë seance, çfarëdo qoftë ajo, parlamentare e rregullt apo e jashtëzakonshme, siç ishte tentuar të mbahej dje”, thotë ai.

Profesor Baraliu shton se edhe në rast se projektligji eventual për shfuqizimin e Gjykatës Speciale, në cilëndo mënyrë do të arrinte në rend dite në Kuvend, vështirë se do të mund të kalonte, për shkak të procedurave të mëtejme. Sipas tij, një projektligj i tillë nuk do të mund të votohej për të kaluar me shumicë të thjeshtë.

“Meqë kemi të bëjmë tashmë me nivelin kushtetues – sepse nuk ka pasur bazë kushtetuese që të bëhej Ligji për Gjykatën Speciale dhe është dashur të ndryshohet Kushtetuta e pastaj të miratohet ligji – tash është procedura e njëjtë, me miratim dhe shfuqizim të ligjeve. Do të duhej edhe në këtë rast që të ndryshohet fillimisht Kushtetuta, e pastaj të votohej ligji, eventualisht me shumicë të thjeshtë, mirëpo, kështu siç është situata. Ky ligj, duhet domosdo t’i ketë dy të tretat e Kuvendit, përndryshe nuk mund të procedohet më tutje edhe po të shkonte eventualisht nga Kryesia në seancën përkatëse plenare të Kuvendit”, shpjegon Baraliu.

Imer Mushkolaj, njohës i zhvillimeve politike në vend, thotë për Radion Evropa e Lirë se marrë parasysh disponimin me të cilin krerët e institucioneve të larta të Kosovës i janë qasur muajve të fundit Gjykatës Speciale, nuk është i befasishëm veprimi i tyre në ditën e premte.

“Unë besoj që e gjithë kjo nuk ka të bëjë me asgjë tjetër, por vetëm me interesa personale, në radhë të parë, të presidentit të vendit, i cili dëshiron që në këtë formë të provojë që të bëjë presion, për të shpëtuar nga ndonjë aktakuzë e mundshme që mund të jetë e drejtuar kundër tij”, vlerëson Mushkolaj.

Sipas tij, një vendim eventual i Kuvendit të Kosovës për shfuqizimin e Gjykatës Speciale, do të bartte pasoja të rënda për vendin.

“Unë besoj që pasojat do të jenë shumë të mëdha dhe nuk do të befasohesha fare që absolutisht të hiqet dorë nga ne dhe pastaj situata, në fakt, të kthehet prapa. Për shkak se unë plotësisht pajtohem me deklaratën e ambasadorit amerikan (Delawie), se kjo është ‘një ngulje e thikës prapa shpinës’ jo vetëm për miqtë ndërkombëtarë, por në radhë të parë është ngulje e thikës pas shpinës për vetë shtetin e Kosovës”,shprehet Mushkolaj.

Kuvendi i Kosovës më 3 gusht të vitit 2015 pati miratuar me procedurë të përshpejtuar Ligjin për Gjykatën Speciale. Miratimi ishte bërë me shumicë votash, por pa pjesëmarrjen e partive të opozitës, të cilat atë kohë i bojkotuan punimet e Kuvendit.

Projektet që presin stabilitet politik

Viti 2017 nuk ka sjell ndonjë rezultat të theksuar në terren në zhvillimin e përgjithshëm ekonomik. Kjo për faktin se edhe gjatë këtij viti, sipas ekspertëve të ekonomisë, ka dominuar agjenda politike, sidomos angazhimet për zgjedhjet e përgjithshme parlamentare dhe atyre lokale

Ata thonë se shumë projekte kanë mbetur peng i stabilitetit politik. Profesori i ekonomisë, Muhamet Sadiku, për Radion Evropa e Lirë vlerëson se situata ekonomike në Kosovë nuk është e lakmueshme, porse, sipas tij, zhvillimi ekonomik nuk është peng i rrethanave politike vetëm të këtij viti.

Megjithatë, Sadiku thekson se edhe gjatë 2017-s, për shkak të dominimit të agjendës politike, autoritetet kompetente nuk kanë arritur që t’i zgjidhin problemet për disa projekte që konsiderohen të leverdishme për një zhvillim të mundshëm ekonomik.

“Është e vërtetë se kërkesat janë të mëdha që Kosova të bëjë një mjedis miqësor për investime dhe në fund të fundit, Kosovën ta bëjnë atraktive. Madje, as përmes disa projekteve të mëdha, siç është projekti i Trepçës, Brezovicës, Postës, nuk është arritur tërheqja e investitorëve të jashtëm. Dhe, sigurisht që kemi nevojë ta fuqizojmë stabilitetin politik”, thotë Sadiku.

Edhe Naim Gashi, ekspert për çështje ekonomike, thotë se gjatë këtij viti ka ngecur zbatimi i disa ligjeve të rëndësishme, të cilat mund të kenë ndikim në zhvillimin e përgjithshëm ekonomik. Gashi përmend problemet në kombinatin “Trepça” kompleksin “Brezovica”.

“Në 18 vitet e fundit, agjendat politike janë jashtëzakonisht të ngjeshura dhe zhvillimi ekonomik, krijimi i vendeve të punës dhe përmirësimi i standardit jetësor të qytetarëve,nuk është në agjendën e institucioneve të Kosovës.

Fatkeqësisht, përplasjet e subjekteve politike kanë shkaktuar polarizim të skajshëm të skenës politike dhe për pasojë kemi pasur një anashkalim të projekteve të mëdha kapitale dhe riaktivizim të resurseve që posedon vendi ynë”, thotë Gashi.

Për shkak të mungesës se zbatimit të Ligjit për Trepçën, nuk është arritur që të zgjidhet bordi i këtij kompleksi, bord ky që sipas ligjit është dashur fillojë procedurat për t’u regjistruar Trepça si ndërmarrje publike në Ministrinë e Tregtisë dhe Industrisë.

Edhe koncesionimi i kompleksit turistik “Brezovica”, është kthyer në pikën zero. Autoritetet në Kosovë kanë thënë se për të rinisur procesi i këtij projekti, duhet të finalizohet dhe zbatohet Ligji për investime strategjike, i miratuar në fillim të këtij viti.

Përveç këtyre kompanive, situata politike ka ndikuar në moszbatimin në nivel të duhur të Marrëveshjes së Stabilizim-Asocimit (MSA), e cila ka hyrë në fuqi që nga prilli i vitit 2016. Këtë e kanë pranuar edhe zyrtarë të Qeverisë së Kosovës.

Por, një nga projektet që konsiderohet me vlerën më të madhe financiare është ndërtimi i Termocentralit “Kosova e Re”.

Qeveria e Kosovës, të mërkurën ka nënshkruar marrëveshjen komerciale me kompaninë amerikane “Contour Global”, për ndërtimin e këtij projekti me një vlerë prej 1.3 miliard euro. Ky projekt në vitin 2023 pritet t’u japë fund problemeve të vazhdueshme me energji elektrike.

Në anën tjetër, Gashi konsideron se politika në disa raste ka ndikime negative edhe në sektorin në privat. Në tregun e Kosovës janë krijuar monopole, siç thotë ai, biznese të lidhura me politikën dhe për pasojë po vuan ekonomia e Kosovës.

“Kosova ende po përballet me një pabarazi të theksuar në treg, për shkak të disa monopoleve të krijuara nga politika kosovare. Dhe, fatkeqësisht, këto monopole janë duke e dëmtuar jashtëzakonisht shumë edhe buxhetin e shtetit, edhe konkurrencën e lirë, mirëpo, edhe futjen e bizneseve të reja në treg, më konkurrente, me çmime më të lira dhe me produkte më të lira për konsumatorët”, konsideron Gashi.

Edhe Muhamet Sadiku thekson se autoritetet kompetente nuk po arrijnë ta luftojnë korrupsionin dhe devijimet e shumta në ekonomi dhe të fuqizojnë një qeverisje moderne të zhvillimit ekonomik.

“Po, duhet pranuar se Kosova nuk e ka gjetur ‘passwordin’ e vet të reformave strukturore që duhen në ekonomi . Të gjitha raportet ndërkombëtare e kanë ngritur problematikën e korrupsionit në Kosovë. Kemi debate lidhur me pasojat negative që sjell korrupsioni, por që nuk ka rezultate në luftimin e kësaj dukurie”, thekson Sadiku.

Sipas zyrtarëve të Qeverisë së Kosovës, bizneset prodhuese vendore nga 1 janari i viti 2018, do të lirohen nga tatimi doganor për lëndën e parë, gjysmë produktin, linjat e prodhimit, si dhe nga pajisjet e teknologjisë informative.

Mustafa: Ata që i gëzohen vrasjes së veprimtarëve tanë, pak e kanë Hagën

I pari i Lidhjes Demokratike të Kosovës, Isa Mustafa në 28 vjetorin e partisë, foli edhe për ndodhitë e mbrëmshme në Kuvendin e Kosovës, ku për qëllim ishte shfuqizimi i Ligjit për Dhomat e Specializuara dhe Zyrën e Prokurorit Special, iniciativë kjo e nisur nga Hashim Thaçi, Kadri Veseli e Ramush Haradinaj

Mustafa tha se LDK dhe Grupi Parlamentar i kësaj partie vlerësojnë se drejtësia duhet të zbatohet në të gjitha rastet dhe për të gjithë pa dallim, kështu duke thënë se vendi dje u ballafaqua me hapa të nxituar për shfuqizimin e Ligjit mbi Dhomat e Specializuara dhe Zyrën e Prokurorit të Specializuar, transmeton Express.

“Vendi ynë dje u ballafaqua me hapa të nxituar për shfuqizimin e Ligjit mbi Dhomat e Specializuara dhe Zyrën e Prokurorit të Specializuar. LDK dhe Grupi ynë parlamentar vlerësoi se çështjet jetike për ekzistencën e vendit duhet të trajtohen me maturi dhe pa nxitim”, tha ish-kryeministri i vendit.

Ai ka shtuar se themelimin e kësaj gjykatë e kanë kërkuar dhe e kanë shkaktuar të njëjtit që sot organizojnë shfuqizimin e saj.

“E kanë kërkuar dhe e meritojnë ata dhe të sojit të atyre që deklarohen se punë e madhe nëse janë vrarë veprimtarët e LDK-së’. Krimi i bërë ndaj çdo njeriu dhe ndaj çdo qytetari pa marrë parasysh përkatësinë etnike, politike, fetare, është krim që duhet të gjykohet dhe dënohet.”, ka thënë Mustafa, derisa ka shtuar se “të tillët e kanë pak të shkojnë në Hagë”.

Mustafa në festimin e 28 vjetorit të LDK’së, tha se nuk shohin asnjë arsye për shfuqizimin e këtij ligji dhe tha se LDK do të kundërshtojë çdo veprim i cili rrezikon Kosovën dhe e kthen atë në kornizat e Rezolutës 1244.

“Kjo nuk do të thotë se LDK ka qenë e ngazëllyer me këtë gjykatë. LDK nuk ka kërkuar themelimin e kësaj gjykate. LDK ka kërkuar drejtësi”, ka shtuar Isa Mustafa.

Shokohën serbët, Amerika po e përdor territorin e Kosovës për të udhëtuar në galaktikat hapësinore

Kosova ka nevojë për amerikanët që të ndërtojnë një bazë të madhe për shkak të fushës më të fortë magnetike – “Porta e Yllit”, e vendosur në atë zonë

Sipas të gjitha gjasave, shpërbërja e Jugosllavisë ishte për shkak të Kosovës. Është më e lehtë ta çosh Kosovën në një Serbi të vogël sesa në një Jugosllavi të madhe, e cila ishte forca më e madhe ushtarake në Ballkan.

Me qëllim të shpjegimit të pretendimit në titull, unë do t’ju duhet t’ju drejtoj nëpër degë të ndryshme të shkencës. Unë kurrë nuk kam bërë politikanë. Fusha ime e interesit është Bibla. Kërkon njohuri për kulturat e lashta, astronomi, fizikë, filozofi etj, thotë Slavica Setina.

Duke ditur të gjitha këto, unë thjesht shqiptoja një përgjigje për problemin e Kosovës. Pse Amerika dëshiron Kosovën? Pse Kosova do të jetë baza më e madhe e SHBA’së në botë? Kuptova se politika dhe sjellja imperialiste e fuqisë së madhe nuk është më në diskutim, raporton “Vestinet”, transmeton Periskopi.

Duke studiuar historinë e perandorive të ndryshme të mëdha nga Sumera dhe Egjipti, përmes Hiks, Asirisë, Haldeja, Persisë, Aleksandrit të Maqedonisë, Romës, Genghis Khan, Turqisë, Napoleonit, Rusisë, Hitlerit etj. Këtë herë ky territor është vetëm një pikë në hartën e botës.

Ajo më preku thelbin e interesit amerikan në Kosovë, i cili hyri në fushën time të interesit dhe jo në politikë – planetin Tokë.

Çfarë ka rëndësi jetike për Kosovën në Kosovë? Kam biseduar me intelektualët tanë dhe kam marrë përgjigjet e mëposhtme: Kosova është një mjedis ekologjik!

Kosova ka një rrafshinë dhe kodra, që favorizon ndërtimin e një baze të madhe ushtarake!

Në Amerikë ekziston një lobi i madh shqiptar, i cili ka investuar një kapital të madh në mënyrë që të marrë minoritetin kombëtar shqiptar në shtetin e tyre! Kosova është një pikë strategjike ideale nga e cila amerikanët mund të kontrollojnë të gjithë Evropën! Ka shumë miniera në Kosovë!

Përgjigjet nuk ishin bindëse. Ta themi thjesht, ata janë të pakuptimtë. Për shkak të ekologjisë, lufta e tretë botërore nuk është shkaktuar. Amerika ka kaq shumë kodra, fusha dhe shkretëtira për një bazë.

Cila është pasuria rudimentare në këtë hapësirë ​​të vogël, për të cilën të gjitha fuqitë e botës po nxiten? Duhet të ketë një interes shumë më të madh.

Është e qartë për të gjithë se Kosova nuk është shtet shqiptar por një territor amerikan në territorin e Serbisë. Mos harroni se në epokën e Nikola Teslas, telefonia celulare ishte një trillim shkencor. Për ne, sot është e përditshme.

Në vitin e kaluar, shpesh në programe televizive të ndryshme, ne mund të shikojmë ngrohjen globale të planetit tonë dhe pasojat e tij.

U organizua një grumbullim i madh i të gjitha vendeve në mbarë botën për mbrojtjen e Tokës sonë dhe reduktimin e dioksidit të karbonit në atmosferë. Amerikanët refuzuan të nënshkruajnë këtë kartë./Periskopi/

Vota anti Trump nuk cënon marrëdhëniet SHBA – Shqipëri

Vota e Shqipërisë në OKB kundër rezolutës amerikane ka trazuar politikën shqiptare. Presidenti i Shqipërisë, Ilir Meta theksoi se vota e qeverisë nuk pasqyron qëndrim shtetëror

Shqipëria iu bashkua 128 vendeve anëtare të Organizatës së Kombeve të Bashkuara, (OKB) që të enjten (20.12.2017) votuan në Asamblenë e Përgjithshme të OKB pro një Rezolute jo detyruese, që i bën thirrje presidentit Trump të tërheqë vendimin e tij për të njohur Jeruzalemin si kryeqytet të Izraelit dhe transferojë atje ambasadën e SHBA. Por vota pro e Shqipërisë është kundërshtuar nga Presidenti i Republikës, Ilir Meta dhe opozita. Kreu i shtetit i ka dërguar të premten, (22.12.2017) një letër presidentit amerikan Trump, ku shpreh keqardhjen për votën e Shqipërisë në favor të rezolutës.

”Kjo votë nuk pasqyron qëndrimin dhe vullnetin e popullit dhe kombit shqiptar dhe është dhënë pa asnjë konsultim paraprak me institucionin e Presidentit dhe Parlamentit. Ky qëndrim i qeverisë bie ndesh me marrëdhëniet e partneritetit tonë strategjik dhe interesat tona kombëtare”, vë në dukje Presidenti Meta në letrën drejtuar Presidentit Trump.

Zëdhënësi i Presidentit Meta, Tedi Blushi, e komentoi si “votë tërësisht të panevojshme, që nuk pasqyron një qëndrim shtetëror dhe aq më tepër një qëndrim dhe konsensus ndërkombëtar.”

Edhe opozita kundërshton votën pro rezolutës të qeverisë Rama. Kryetari i saj, Lulzim Basha e cilëson një vote ”kundër interesit kombëtar të shqiptarëve dhe të ndryshme nga qëndrimi që Shqipëria ka konsoliduar në 27 vite për ҫështjet e Lindjes së Mesme. Për herë të parë Shqipëria rreshtohet me qëndrimin e shumicës së vendeve të BE, që është një qëndrim i gabuar,” bëjnë me dije burime zyrtare nga PD opinionin e Bashës. Domosdoshmërinë e një qëndrimi jo anti Trump Basha e argumenton citoj ”SHBA janë aleat strategjik për Shqipërinë. Pa SHBA, Kosova nuk do të ishte sot as e lirë, as e pavarur. Pa SHBA, Shqipëria nuk do të ishte anëtare e NATOs”.

Vota pro Rezolutës – qëndrim koherent, në linjë me BE

Por Ministria për Europën dhe Politikën e Jashtme e quan votën pro Rezolutës një qëndrim të drejtë. “Vota e Shqipërisë në Asamblenë e Përgjithshme të OKB reflekton pozicionin e saj të pandryshuar për këtë ҫështje. Qëndrimi i Shqipërisë për çështjen Izrael-Palestinë mbetet i pandryshuar prej vitit 1990. Shqipëria i është përmbajtutr konsensusit mbi Jeruzalemin, bazuar në një numër të konsiderueshëm dokumentash të OKB, përfshirë edhe një numër të Rezolutave të Këshillit të Sigurimit. Ajo i është bashkuar pozicionit të përbashkët të shumicës dërrmuese të vendeve anëtare të BE, duke i qëndruar koherente qëndrimit të saj në të njëjtën linjë me atë të BE”, theksohet në një njoftim për shtyp të kësaj ministrie.

A do të cënojë vota marrëdhëniet SHBA-Shqipëri?

Edhe pse rezoluta anti Trump mori votën pro të 128 vendeve, që përbëjnë një shumicë dërrmuese në OKB, SHBA e bllokuan rezoluten me anë të së drejtës së vetos. Kjo në Shqipëri ka përforcuar shqetësimin ndaj paralajmërimit të SHBA, “se do t’iu ndërpresë mbështetjen financiare vendeve që i dolën kundër””. Ekspertë vendas dhe të huaj të politikës së jashtme dhe të marrdhënieve mes dy vendeve mendojnë që këto marrëdhënie nuk do të cënohen. Për Ferit Hoxhën, ish-ambasador i Shqipërisë pranë Kombeve të Bashkuara marrëdhëniet Shqipëri-SHBA mbeten solide dhe vota pro rikonfirmon votën e mëparshme lidhur me një “konsensus ndërkombëtar që përcakton konturet e konsensusit të paqes”.

Janosz Bugajski, ekspert në CEPA (Center for European Policy Analysis) në Washington DC, i njohur në Shqipëri për emisionin e tij “Bugajski Hour”në kanalin televiziv local ”Albanian Screen”, është skeptik ndaj pasojave të mundshme negative që mund të kenë vendet që votuan pro rezolutës anti Trump. Sipas tij deklaratat amerikane janë “më shumë një paralajmërim sesa një kërcënim, SHBA mund të shkurtojnë kontributin e tyre financiar ndaj OKB në tërësi por jo në marrëdhëniet dypalëshe. Këto marrdhënie shqyrtohen në bazë të meritës dhe jo të një vote në OKB”.

Opozita mendon se pikërisht kjo votë do të ketë pasoja negative për Shqipërinë në marrëdhëniet e saj me aleatin strategjik, duke e cilësuar votën anti Trump si shprehje të qëndrimit anti-amerikan të qeverisë Rama. Besnik Mustafaj, ish deputet i PD, ish ministër i Jashtëm e quan “naiv” qëndrimin e deputetëve të sotëm demokratë, pasi vetë PD kur erdhi në pushtet vendosi që votimi i Shqipërisë në OKB të jetë në përputhje dhe konsensual me qëndrimin e BE.

Izraeli e konsideron Jeruzalemin si kryeqytetin e tij të përjetshëm. Palestinezët kërkojnë që Jerusalemi Lindor, të jetë kryeqyteti i shtetit të tyre të ardhshëm. Vendimi i Trump që Jeruzalemi të jetë kryeqytet i Izraelit u publikua në fillim të këtij muaji, më 6 dhjetor. Të gjitha ambasadat e huaja i kanë selitë e tyre në Tel Aviv. SHBA deklaruan se po marrin masa që Ambasada e SHBA në Izrael ta ketë selinë e saj në Jeruzalem. Rezoluta anti Trump, në Asamblenë e Përgjithshme të OKB, kërkon t’u presë hovin shteteve që të transferojnë misionet e tyre diplomatike nga Tel Aviv ne Jeruzalem.”Çdo vendim që ndryshon karakterin, statusin ose përbërjen demografike të Jeruzalemit nuk duhet të ketë asnjë efekt ligjor, është i pavlefshëm, dhe duhet të shfuqizohet në përputhje me rezolutat përkatëse të Këshillit të Sigurimit”, thekson kjo rezolutë e Asamblesë së Përgjithshme të OKB