Rashiti: Procesi i liberalizimit varet nga vullneti politik i vendeve të BE-së (video)

Naim Rashiti, drejtor i Grupit Ballkanik të Politikave, ka thënë se nëse Komisioni Evropian del me opinion për vizat, ai do të jetë pozitiv, përndryshe, ai raport shtyhet dhe nuk del fare

Ai në emisionin “Përballje” me gazetarin Muhamet Hajrullahu, tha se rekomandimi i Komisionit Evropian del në formë opinioni me shkrim apo pa shkrim. “Nëse del një opinion i Komisionit Evropian për liberalizimin e vizave, ai patjetër që do të jetë pozitiv, por nëse opinioni vonohet, ky nuk është lajm i mirë për Kosovën”, ka thënë Rashiti.

Rashiti shton se procesi i liberalizimit varet nga vullneti politik i vendeve të Bashkimit Evropian.
“Pas opinionit të KE-së, fillon procedura reale e ndryshimit të rregullores së Parlamentit Evropian. Procesi i liberalizimit varet nga vullneti politik i vendeve të Bashkimit Evropian, për të siguruar votën e kualifikuar prej 65% të totalit të këtyre vendeve”, është shprehur më tej ai, përcjell Telegrafi.

Duke folur për nevojën e lobimit në vendet e BE-së, Rashiti thotë se duhet të ketë lobim por edhe fushatë informuese për qytetarët në mënyrë që BE-ja të bindet se institucionet janë serioze.

“Vendimet politike shpesh janë racionale, por shumë shpesh janë joracionale. Prandaj veprimet politike duhet të orientohen drejt lobimit te vendet anëtare të BE-së dhe të ketë një fushatë informuese për qytetarët”, tha Drejtori i Grupit Ballkanik të Politikave.

Ai për fund ka bërë edhe një paralele me proceset që kanë kaluar vendet e rajonit. “Shqipëria, Bosna, Maqedonia etj., kanë lobuar shumë me të gjitha institucionet e mundshme që kanë pasur. Për ne është më rëndësi, që duhet lobuar këta gjashtë muaj, dhe të evitojmë ndonjë skandal të mundshëm”, ka deklaruar Naim Rashiti./Telegrafi/

E vrasin në vend të punës 26 vjeçarin, pronari i lokalit rrëfen ngjarjen

Një 26 vjeçar u mbyt me thikë në vendin e tij të punës në një lokal në Ferizaj mbrëmjen e së shtunës. I ndjeri Elvedin Ibrahimi kishte pasur edhe më parë zënka me dy sulmuesit. T7 ka siguruar pamje të momentit kur dy sulmuesit mbysin ferizajasin

I ndjeri kishte pasur mosmarrëveshje me dy sulmuesit që janë arrestuar. Në këtë vend të premten rreth orës 22:30, u plagos dhe pastaj vdiq një 26 vjeçar në vendin e punës. Elvedin Ibrahimi, i cili punonte si sigurim në këtë lokal në Ferizaj, u plagos për vdekje nga të dyshuarit D.SH, 29 vjecar dhe nga M.M, 22 vjecar.

E gjatë së shtunës familja e tij po prisnin njerëz të cilit vinin për ngushëllime. Ata nuk ishin në gjendje të flasin për motivet e kësaj ngjarjeje. Mirëpo disa qytetarë prapa kamerave, thanë se dy palët e përfshira, kanë qenë në konflikt prej vitesh. Ata treguan se mbrëmja e së premtes ishte shumë trishtuese.
Madje sipas tyre edhe Elvedini e kishte plagosur vrasësin e tij, kohë më parë.

Këtë e konfirmon edhe pronari i lokalit ku Elvedini u vra. Fahri Bega thotë se kjo nuk është hera e parë që punëtori i tyre ishte sulmuar nga po të njëjtit persona. “Ai ka qene sigurim eshte punëtor i joni i kontaktuar ka kontrate, ne orar te punës, eshte rasti i dyte qe te njëjtit persona qe vijnë e sulmojnë .. eshte gjykata e prokuroria ne rastin e pare cka ka ndodhe qysh ka vepru ata nuk kane marre masa ata kane qene te lire prape kane ardhe e kane sulmu”.

Pronari i lokalit tha se nuk po punonin për shkak që kishin ditë zie. Sipas tij Elvedini ishte një djalë shumë i sjellshëm me të gjithë. Bega tha se ishte ankuar në prokurori edhe para një viti kur Elvedini ishte sulmuar në vend të punës. Krahas kësaj ai u shpreh se nuk ishte ndërmarrë asgjë.

Se këta dy persona kanë pasur probleme edhe më parë, e konfirmon edhe zëdhënësi i policisë për rajonin e Ferizajt, Agim Gashi. Agim Gashi, zëdhënës i policisë për rajonin e Ferizajit Nuk i kemi te dhënat pasi qe deklaratat personat janë ende te lënduar por edhe prej deshmitareve dyshohet se te njëjtin kane pasur mosmarrëveshje edhe para nje kohe te shkurtër janë takuar mbrëmë dhe ka filluar prape përleshja..

Ibrahimi u varros në orën 16:00 gjatë ditës së shtunë, ndërsa Hetuesit policorë në bashkëpunim me prokurorin e shtetit janë duke u marrë me rast.

“Luftë” ndërmjet Thaçit dhe Veselit, se kush do t’i shpëtojë Gjykatës Speciale

Libri i publikuar me biografi të Presidentit të Kosovës Hashim Thaçi, ka zgjuar jo pak reagime. Ky libër, nga media prestigjioze botërore është vlerësuar më shumë si ide, për të ndrequr imazhin e Thaçit

Artikulli i NZZ

Gazeta Neue Zürcher Zeitung, ka bërë një shkrim goditës për librin biografik të Presidentit Hashim Thaçi, të cilën shefi i shtetit po e promovon nëpër qendra botërore. NZZ shkruan se Thaçi këtë libër e ka porositur nga frika e Gjykatës Speciale dhe në përpjekje për të përmirësuar imazhin e tij të dëmtuar.

Në një biografi të autorëve britanikë, presidenti i Kosovës dhe ish- kreu i gueriles Hashim Thaçi duket si një superyll. Në Prishtinë besohet se fushata e imazhit ka të bëjë me akuzat e frikshme të krimeve të luftës. Një politikan që dëshiron të përjetësojë veten në një biografi zakonisht ka tri opsione: Së pari, ai është duke kërkuar një ‘shkrimtar-fantazmë’ për kujtimet e tij.

Së dyti, ai u përgjigjet pyetjeve nga gazetarë të pavarur, të cilët mbledhin të dhëna për të shkruar një libër jo fiktiv. Së treti, ai punëson autorë që shkruajnë pikërisht atë që ai dëshiron të lexojë rreth vetes për një tarifë të përshtatshme. Kjo e fundit është varkë shpëtimi ideale për politikanët me një imazh të dëmtuar, përfshirë edhe për Presidentin e Kosovës Hashim Thaçi. Ish shefi i gueriles është i përfshirë në shumë çështje deri në fyt.

Ai mund të akuzohet për krime lufte nga një gjykatë ndërkombëtare speciale në Hagë. Thaçi, i cili gjithmonë ka mohuar akuzat, thuhet se ka nënshkruar miliona euro gjatë viteve të fundit me firma lobuese dhe firma ligjore në SHBA dhe Angli. Tani 50-vjeçari shkëlqen me flokët e thinjura me buzëqeshje të filmave vizatimorë në kopertinën e librit të sapo botuar.

Njëlloj lavdërues është edhe titulli: “Shtet i ri, burrështetasi modern”. Autorët janë dy gazetarë britanikë që nuk kanë raportuar më parë nga Kosova apo rajoni. Në Prishtinë, libri, në të cilin Thaçi është krahasuar me Churchill, Mandela dhe George Uashington, ka nxitur debate. Gazetarët akuzojnë autorët për shtrembërimin e fakteve dhe thurjen e legjendave. Anëtarët e opozitës kërkojnë një hetim parlamentar. Mbi të gjitha, duhet të qartësohet një pyetje: a pagoi presidenti biografinë me paratë e taksapaguesve.

Në Vjenë, ku Thaçi prezantoi librin e tij në Akademinë Diplomatike prestigjioze, askush nuk duket ta ketë bërë këtë pyetje. Diplomatët në pension i dolën në mbështetje mikut të tyre. Në vend të një diskutimi kritik pati lavdërime në podium – edhe nga nikoqiri, drejtor i Akademisë. Kosovarët që jetojnë jashtë shtetit nënshkruan autografe dhe bënë ‘selfie’ me presidentin, i cili buzëqeshte me kopertinën e librit. Katër televizione i transmetuan fotot dhe pamjet në Kosovë. Rastësisht, libri atje nuk mund të gjendet.

Millaku: Këtu bëhet luftë ndërmjet Thaçit dhe Veselit

Deputetja e Vetëvendosjes në Kuvendin e Kosovës Drita Millaku, ka thënë për “Bota sot”, se Hashim Thaçi më veprimin e fundit i ka shkaktuar buxhetit të shtetit qindra mijëra euro dëme dhe atë në mënyrën më të ulët.

“E keqja qëndron se promovimin e tij po e bënë nga pozita e presidentit dhe blofet e tij do të reklamohen nga bashkësia ndërkombëtare, pasi ata kanë informacione të mjaftueshme për të njohur secilin funksionar të Kosovës. Këtu bëhet luftë mes Thaçit dhe Veselit, se kush do t’i shpëtojë Gjykatës Speciale”, ka thënë Millaku për “Bota sot”.

Libri është dashur të demaskohet

Lidhur me këtë, njohësi i çështjeve politike, Faton Abdullahu, ka thënë për “Bota sot”, se ajo çfarë po bënë Hashim Thaçi me librin e tij është krejt e kuptueshme për një pushtetar, i cili tash dy dekada është në pushtet me tendencën që mos të largohet edhe për shumë vite.

“Vetë kjo jetëgjatësi e një njeriu në pushtet flet se më shumë se institucione të cilat punojnë dhe kontrollohen nga sistemi demokratik, në Kosovë po rrëshqasim në autokraci. Një gazetë zvicerane e vetme nuk mund ta eklipsojë atë që dëshiron të arrijë Thaçi me librin e tij. Ai në këtë po ka sukses. Mua më çuditë mos reagimi opozitar. Duket se ata, por edhe intelektualët edhe shoqëria civile, kanë përtuar edhe ta lexojnë. Janë ata që është dashur të demaskojnë këtë libër që është maskë e Thaçit për t’u paraqitur engjëll në arenën ndërkombëtare”, ka thënë Abdullahu.

“Një libër për të përmirësuar imazhin e tij”

Ndërkaq, opinionisti Faton Mehmeti, ka thënë se shkrimi i fundit i gazetës prestigjioze Neue Zurcher Zeitung, zbërthen edhe më tepër figurën e Hashim Thaçit.

“Njeriu i shërbimeve sekrete arriti të bëhet President i vendit në përpjekje që t’i ikë drejtësi ndërkombëtare për të bëmat e tij gjatë dhe pas lufte. Kur e kuptoi se as posti i presidentit nuk po arrinë do ta shpëtojë, Hashimi ndërroi strategji duke financuar një libër për të përmirësuar imazhin e tij”, ka thënë Mehmeti.

Sipas tij, shkrimi i fundit i NZZ ka për qellim që të shpalos edhe një herë imazhin e vërtetë të presidentit aktual të vendit tonë.

“Kosova nuk duhet të krenohet që në krye të saj ka njeriun e që do të akuzohet , pasi kjo dëmton shumë figurën e Kosovës në sytë e botës. Andaj, qytetarët duhet të vetëdijesohen që njerëz të tillë mos t’i mbështesin, por t’i izolojnë duke mos iu dhënë poste të rëndësishme. Hashim Thaçi, Kosovës i ka bërë dëme të mëdha aq sa i ka bërë Milloshevici, secili në mënyrën e tij”, ka thënë Mehmeti për “Bota sot”.

Kurse analisti politik Leon Duhanaj, ka thënë se, Presidenti Thaçi si çdoherë edhe me rastin e botimit të këtij libri të porositur, është përkujdesur personalisht për imazhin e tij. “Ai asnjëherë, nuk i ka lënë rastit, të përkujdeset personalisht për përmirësimin e imazhit të tij. Për mendimin tim, nga këndvështrimi logjik dhe objektiv ky, me shumë po tregohet hipokrit se sa po ndreq imazh. Së pari, besoj që bota ka shumë me shumë mundësi të lexojë ndonjë margaritarë, se sa të merren me biografinë e Thaçit”, ka thënë ai.

Duhanaj: Thaçi është politikan pa parime

Sipas Duhanajt, vetë mënyra e promovimit dhe njëkohësisht edhe mohimit të ketë qenë pjesëmarrës aktiv në të e bënë edhe më hipoktit. “Ai në njërën anë në mënyrë të shfrenuar shpërfaq zilinë dhe urrejtjen e tij ndaj Rugovës dhe në anën tjetër shkon i përulet para varrit dhe mundohet që përmes manipulimeve me familjarëve të tij, t’i shfrytëzojë për ndreqje imazhi”, ka nënvizuar Duhanaj.

Sipas tij, kjo mund të ketë një ndikim minimal, por, jo edhe ta ndryshojë bindjen e cila mbretëron për Thaçin, të në qarqet ndërkombëtare.

“Thaçi ka problem me të kaluarën e tij, me deklaratat e tij të mëhershme, me qëndrimet, bindjet dhe veprat e tij. Ai prapë mundohet ta rregullojë këtë imazh e keq, duke u munduar ta kontrabandojë bindjen e mëhershme. Vetë mënyra hipokrite e sjelljes ndaj figurës së Rugovës, nuk i bënë aspak nder dhe i mohon mundësinë që dikush ta besojë përrallën e tij. Kjo nuk e zbehë bindjen time për të, që është një ndër politikanët me të urryer ndër shqiptarë, por që është politikanë pa parime”, ka thënë Duhanaj.

Haradinaj: Kosova nuk pranon zgjidhje të keqe me Serbinë

Kosova jeton pa zgjidhje me Serbinë por nuk do të jetojë me zgjidhje të keqe, thotë kryeministri i Kosovës Ramush Haradinaj. Këto komente kreu i Qeverisë i bëri gjatë shënimit të 19 vjetorit të çlirimit të Komunës së Deçanit nga shteti serb

Nga vendlindja e tij, Haradinaj ka siguruar qytetarët e Kosovës se nuk do të ndalet së punuari në të mirë të vendit. “Gjatë gjithë kohës sa do të punojë do të prijë me vendime, do të prijë për njerëzit tanë do t’ju prijë njerëzve pikërisht në këto vendime. Por, ka me ardh dita që secili ka me pa vlerën e vet, veprën e vet, punën e vet. Unë nuk i druhem drejtimit që kam, nuk i druhem obligimeve që i kam marrë, nuk ndalem. Unë nuk ndalem as nga frika se do të tradhtojnë shqiptarët për të drejtën e Kosovës, e mos me e përfaqësua Kosovën. Ju siguroj që Kosova nuk pranon zgjidhje të keqe, Kosova jeton pa zgjidhje me fqiun po nuk do të jetojë me zgjidhje të keqe”, tha ai.

Haradinaj ka folur edhe problemet në Ballkan– të kthehen të drejtat e shqiptare që u janë marrë me shekujt. Sipas tij, shqiptarët nuk kanë pasur lakmi asgjë që nuk është e tyre, nuk kanë synuar toka e territore të askujt.

“Shqiptarët nuk munden me u pajtua me kurrkënd që mendon se ende mundet me marrë prej shqiptarëve. Besoj që kjo porosi vërtetohet sot, vërtetohet nesër, breza do të ndryshojnë, breza e breza do të vijnë, por e vërteta, e drejta dhe porosia që mos synoni paqe në Ballkan duke marrë prej shqiptarëve nuk e qet më kush në pikëpyetje. As për të gjallë tonin, të atyre që kemi qenë në UÇK, por asnjëherë më, për aq sa jetojnë shqiptarët në Ballkan. E them këtë sepse janë bërë përpjekje me qëllim, mijëra herë me u ndal tragjeditë në Ballkan, pikërisht për ata që i kanë këto përpjekje qëllimmira nëse dëshironi vërtet me u ndal tragjeditë në Ballkan atëherë balanci vendoset duke iu kthyer e drejta shqiptarëve, një e drejt padrejtësisht e marrë. Duke i respektuar ata në Kosovën e pavarur, duke i afruar në familjen euroatlantike”, tha ai.

Sipas tij, ky do të ishte fundi i tragjedive në Ballkan. Për ditën e Çlirimit të Komunës së Deçanit ka folur kreu i kësaj komune Bashkim Ramosaj. Ai tha se ngjarja kulmore e një populli është dita kur vjen liria, prandaj sipas tij, qytetarët e Deçanit me vite e pritën këtë ditë.

“Data 16 qershor sot e 19 vite me parë u fut në analet e historisë për të ngelur gjithmonë data më e veçantë. Data kur trupat e UÇK-së të udhëhequr nga legjendari, komandanti emblematik i Dukagjinit Ramush Haradinaj, hynë në Deçanin e nderit dhe të burrërisë. Ngritën flamurin e fitores së madhe, flamurin e gjakut të lirisë, flamurin e çlirimit përfundimtar. Shumë gjenerata nëpër shekuj bënë përpjekje titanike për të arritur deri tek kjo ditë që ne po e shënojmë sot”, tha ai.

Kreu i Deçanit tha se nderi, lavdia dhe përjetësia ju takon dëshmorëve të atdheut, që janë edhe bazamenti i shtetit të Kosovës. Deçani e filloi shënimin e kësaj dite me ceremoni solemne ën kuvendin komunal. Ndërkohë, ditën e Çlirimit sot e ka shënuar edhe qyteti i Pejës.

E “masakruan” në Kosovë si tifoz me Serbinë, Kosta Grillo: Nuk jam hipokrit si Buzhala

Një deklaratë e komentatorit sportiv dhe njëkohësisht menaxherit të njohur të futbollistëve, Kostandin Grillo, ka shkaktuar reagime të shumta në Kosovë. Në mbrëmjen e së enjtes, i ftuar në televizionin “Ora News”, Grillo theksoi se bënte tifo për Serbinë. Kjo nuk është pritur mirë në Kosovë, teksa mbrojtësi Amir Rrahmani, si dhe anëtari i bordit të gazetës “Express”, Berat Buzhala, kanë reaguar ashpër

Gjithsesi, dje në një rrëfim ekskluziv për “Panorama Sport”, Grillo sqaroi gjithçka, duke iu kundërpërgjigjur edhe Rrahmanit e Buzhalës.

Kosta, pas asaj deklarate në TV, prisnit që të shkaktohej gjithë ky reagim?

Sinqerisht që nuk e prisja. Si për ironi të fatit, pas emisionit më është prishur telefoni dhe e kam zhbllokuar vetëm në drekën e sotme (të premten). Sapo e hapa, më kishin ardhur me qindra mesazhe dhe telefonata. U habita!

Kishte mesazhe mbështetëse për ato që keni thënë apo fyerje ndaj jush?

Të gjithë më shkruanin: “Bravo të qoftë që ke thënë një gjë të vërtetë”

Na sqaroni edhe një herë atë që thatë gjatë emisionit?

Është shumë e thjeshtë. Brezi im është rritur duke ndjekur futbollin e ish-Jugosllavisë dhe gjithashtu ka dëgjuar në masë këngët serbe. Edhe pse këtu te ne nuk e shprehin dot hapur këtë, e them me bindje të plotë, se e pëlqejnë jashtë mase futbollin e ish-Jugosllavisë. Sa i përket asaj që kam thënë, ndryshimi është që unë nuk kam asnjë kompleks për ta shprehur atë që mendoj. Nuk më duket ndonjë problem të them se bëj tifo për Serbinë.

Unë jam tifoz me Holandën, por përderisa kjo kombëtare nuk merr pjesë në Botëror, atëherë do të bëja tifo për një vend ballkanik, në rastin konkret Serbinë. Jam 55 vjeç dhe bashkëmoshatarët e mi kanë qenë të gjithë simpatizantë të skuadrave serbe, qoftë Partizan i Beogradit apo Cervena Zvezdën. Gjithashtu ka pasur në atë kohë fansa të Dinamo Zagrebit dhe Hajduk Splitit.

E keni parë çfarë ka thënë Amir Rrahmani, lojtar i Kombëtares së Kosovës…?

Nuk jam aktiv në “Facebook”, por më kanë thënë se çfarë ka shkruar në rrjetet sociale. Rrahmanit i them që të gjithë kosovarët flasin gjuhën serbe dhe qëndrojnë me ata, pasi kanë miqësi. Të gjithë kosovarët kanë qenë tifozë me skuadra serbe, qoftë Partizan Beograd apo Cervena Zvezda. Ju e dini që jam menaxher futbolli prej 25 vitesh dhe ju them me bindje se në çdo vend të botës ku luajnë lojtarë kosovarë dhe serbë në një klub, qëndrojnë bashkë.

Flasin të njëjtën gjuhë. Edhe Rrahmani këtë bën. A flet serbisht Rrahmani në Zagreb…? Kudo që të shkoj të luajë dhe do të ketë serbë në ekip, në gjuhën serbe do flasë me ata. Nuk ka ndonjë gjë të keqe, po më bën përshtypje këtu se çfarë lidhje ka ajo që kam thënë unë me atë që ka shkruar Rrahmani. Nuk është aspak logjike, për më tepër që unë kurrë nuk i kam thënë një lojtari tradhtar. Edhe ai analisti që paska folur, tifoz i Partizan Beogradit ka qenë.

E keni fjalën për Berat Buzhalën, që përfaqëson gazetën “Ekspres” në Kosovë…?

Po, për atë. Berat Buzhala është ngjirur për Partizanin e Beogradit në kohën kur luante Fadil Vokrri. Kjo është krejt normale që kosovarët të bënin tifo për atë skuadër. Tani çfarë duhet të themi ne për të ndjerin Fadil, që ka veshur fanellën e një prej skuadrave më anti-shqiptare në histori si Partizani i Beogradit. Vokrrit iu bënë nderimet që i takonin si një legjendë që ishte, por ne nuk duhet të ngatërrojmë tani politikën me sportin. Pse duhet ta fsheh unë çfarë simpatizoj? Nuk është turp të them që jam rritur me zërin e Marko Markoviçit dhe Miljko Pantiçit, dy nga komentatorët më të mirë të asaj periudhe, që i ka dëgjuar gjithë Shqipëria.

Ndeshjet i shikonim në TV serbe, të njëjtën gjë bënin edhe kosovarët. Kjo është diçka që dihet botërisht, jo sepse e them unë. Këto reagime të tipit Rrahmani apo Buzhala janë komplet hipokrizi dhe s’kanë lidhje fare me atë që kam thënë unë. Ju them me sinqeritet, kam marrë me dhjetëra mesazhe nga mosha të ndryshme dhe nivele të ndryshme njerëzisht, të cilët më kanë komplimentuar për diçka të sinqertë që kam thënë. Unë ndjek edhe ekipet turke, çfarë lidhje ka kjo tani, që duhet të imponohemi se cila skuadër na pëlqen ose jo. Kur unë isha tifoz i Cervena Zvezdës, ashtu si shumë shqiptarë në Tiranë dhe vende të tjera, Buzhala dhe moshatarët e tij bënin tifo për Partizanin e Beogradit. Sipas idesë së Buzhalës, meqë Fadili ka veshur fanellën e Partizanit, ne duhet ta bënim armik!

Ju keni sjellë shumë lojtarë serbë në Shqipëri, ata shpesh janë shprehur se janë ndier shumë të respektuar…

Sigurisht, e thashë edhe më lart. Serbët bëhen menjëherë miq me lojtarët tanë.

Qytetarët do të kenë fjalën e fundit për “Maqedoninë e Veriut”

Marrëveshja mes Maqedonisë dhe Greqisë për çështjen e emrit, bazuar në deklaratat e deritanishme të kryeministrit, Zoran Zaev dhe të liderëve të tjerë politik, do të jetë në duart e qytetarëve të Maqedonisë

Pas kalimit të saj në Kuvend dhe miratimit të ndryshimeve kushtetuese, marrëveshja e arritur nga dy kryeministrat, Zoran Zaev dhe Aleksis Tsipras për emrin “Maqedonia e Veriut”, duhet të aprovohet edhe në referendum nga qytetarët, i cili sipas marrëveshjes duhet të mbahet deri në fund të vitit.

Kryeministri Zaev ka bërë të ditur se nëse të gjitha procedurat realizohen sipas dinamikës së paraparë, atëherë referendumi do të mbahej nga fundi i shtatorit apo fillimi i tetorit.

“Vota e qytetarëve është përfundimtare. Ashtu siç kemi premtuar, me marrëveshje garantohet se në vjeshtë do të ketë referendum. Qytetarët janë ata të cilët do të vendosin për të ardhmen e tyre. Në referendum do të shënohet një faqe e re në historinë e Maqedonisë”, ka deklaruar kryeministri Zoran Zaev.

Për dallim nga ai, lideri i opozitës, Hristijan Mickovski, ka thënë se marrëveshja është antikushtetuese dhe se në referendum do të votonte kundër dokumentit të cilin e ka quajtur, “Kapitullim të Maqedonisë”.

Njohësit e çështjeve juridike thonë se që referendumi të ketë sukses duhet që të dalin mbi gjysma e trupit të përgjithshëm votues. Bazuar në zgjedhjet parlamentare të 11 dhjetorit të vitit 2016, të drejtën e votës e kanë rreth 1 milion e 770 mijë votues, e që referendum të jetë valid, në votime duhet të dalin gjysma e atyre, apo rreth 800 mijë votues.

“Dalja në referendum duhet të jetë mbi 50 për qind e trupit votues dhe nga ata mbi 50 për qind duhet t’i japin mbështetje që të ketë sukses. Por, e them referendumi mund të dështoj nëse nuk arrihet pragu për dalje në votime prej 50 për qind plus një votë. Sa i përket referendumit, ai mund të jetë vendimtar dhe këshillues. Vendimtar do të thotë se rezultati i tij do të vendos për çështjen që ngritët, por edhe këshillues ka rëndësi të madhe pasi nëse mbi 50 për qind e votuesve këshillojnë se çështja e ngritur në referendum duhet të miratohet ose jo, kjo megjithatë vlerësoj se duhet të merret në konsideratë. Maqedonia është shtet qytetar, sovraniteti buron nga qytetarët dhe atyre i takon”, thotë Temelko Ristevski, profesor i së drejtës kushtetuese në Universitetin Font të Shkupit.

Dilemat mbeten nëse opozita maqedonase do të ftoj apo jo anëtarësinë që të dal në referendum. Nëse thirrja është negative kjo sipas ekspertëve do ndërlikonte gjendjen. Nga ana tjetër, numri i votuesve shqiptar bazuar në disponimin momental pritet të jetë i lartë. Por, disa nga aktivistët për avancimin e të drejtave të shqiptarëve kërkojnë që ky referendum të shpërbëj për ngritjen e pozitës së tyre në shtet.

“Unë mendoj se sikur shqiptarët pak të jenë më kreativ apo të imponohen, do të lëvizin gjërat pasi në këtë moment, në këtë situatë politike, vota e shqiptarëve është vendimtare qoftë për vendimet e qeverisë apo referendumin e ardhshëm”.

“Unë mendoj se deri tek referendum shqiptarët duhet të përgatiten mirë dhe të dalin me kërkesa që të mos votojnë më kundër vetes së tyre, sikur që kanë vepruar deri më tani, por të kenë një qëndrim të vetëm, të jenë unik. Unë do të bëja thirrje klasës intelektuale, akademike, profesorëve që të tregohen të gjallë dhe secili të jep kontributin e vet dhe të mos mbyllen në gëzhojat e veta prej mëndafshi”, thotë Shpëtim Pollozhani, nga forumi i intelektualëve shqiptar dhe drejtues i shoqatës së ish të burgosurve politik shqiptar.

Nga ana tjetër, profesori Temelko Ristevski, thotë se qytetarët kërkojnë perspektivë, andaj edhe beson se referendumi mund të kalojë.

“Pjesa më e madhe të qytetarëve, në veçanti të rinjtë qëllim kryesor kanë që t’i hapen rrugët e mundësisë për në Bashkimin Evropian, të kenë perspektivë. Të rinjtë duan të kenë një shtet të hapur, që qytetarët të mund të komunikojmë me botën, të mund të punësohet të shkollohen e kështu me radhë. Pjesa më konservatore është më e përmbajtur sa i përket debateve për emrin, por mbetet të shihet, besoj se vendimi do të jetë në favor të një ardhme më të mirë”, thotë Ristevski.

Deri tani në Maqedoni janë mbajtur dy referendume, njëri në vitin 1991 për pavarësinë e Maqedonisë që ka rezultuar me sukses dhe një tjetër në vitin 2004 kundër organizimit të brendshëm territorial, por që kishte dështuar për shkak të daljes së vogël të qytetarëve.

Arifi: As këtë muaj s’ka dialog teknik Kosovë – Serbi

Të hënën, më 18 qershor, delegacioni i Kosovës për dialogun me Serbinë do të dalë para vendeve anëtare të Bashkimit Evropian për të prezantuar të arriturat dhe punën e institucioneve të Kosovës në implementimin e marrëveshjeve të deritanishme

Por, nuk ka ende një datë të takimit të ardhshëm për dialogun, prej kur përfaqësuesi i Qeverisë së Kosovës për dialogun me Serbinë, Avni Arifi ka refuzuar të jetë pjesë e një takimi, pasi ka kërkuar fillimisht zbatimin e marrëveshjeve të deritashme. Në një intervistë për KosovaPress, Arifi ka sqaruar se nuk e kanë kushtëzuar BE-në dhe askënd tjetër, por thotë se nuk do lejojnë diçka që nuk e parasheh Kushtetuta e Kosovës.

“Ne kemi marrë një kërkesë që të shkojmë dhe të bisedojmë për procesin e gjeri tanishëm të draftimit të Asociacionit, mirëpo ne kemi refuzuar sepse fillimisht duhet të përgjigjen në pyetjet apo në kërkesat që i kemi bërë në dy festat e mëparshme”, thotë ai.

Shpjegon se për çfarë i kanë ftuar që të jenë të hënën në Bruksel. “Ne kemi ftesë tjetër në fakt ne, më 18, delegacioni i Kosovës, ekspertët e saj para vendeve anëtare në Bruksel do të shkojnë dhe do të prezantojnë të arriturat dhe punën e institucioneve të Kosovës në implementimin e marrëveshjeve të ndryshme ku të gjithë ne do të prezantojmë para tyre se çfarë procesi i marrëveshjes, se cilat kanë qenë veprimet tona. Besoj që me këtë prezantim Kosova do të konfirmojë edhe njëherë seriozitetin e saj që ka pasur dhe vazhdon ta ketë në procesin e dialogut dhe njëkohësisht konfirmon përkushtimin e saj në implementimin e obligimeve të marra, por njëkohësisht do ta përdorim edhe si një shans përpara vendeve anëtare të kërkojmë implementimin e marrëveshjeve të cilat pa ndonjë vështirësi të caktuar teknike nuk po implementohet, por thjesht nuk po implementohen për shkak të vullnetit politik”, deklaroi Arifi.

Arifi thotë se Kosova ka zbatuar të gjitha marrëveshjet ose është në fazën përfundimtare të implementimit të tyre. Ai shpjegoi se pala serbe e konsideron se Kosova është vonuar shumë me Asociacionit e Komunave Serbe, e sipas Arifit, në një mënyrë ka të vërtetë sepse është një marrëveshje e vjetër por, siç thotë ai, është një marrëveshje e cila ka qenë në kundërshtim me Kushtetutën e Republikës së Kosovës.

Arifi ka shpjeguar se çfarë ka kërkuar Kosova nga BE-ja. Sipas tij Kosova nuk e ka kushtëzuar askënd.
“Ne kemi kërkuar pak më ndryshe. Ne kemi kërkuar që të bisedohet për energji, sepse është çështje pak më akute dhe do të insistojmë prapë edhe në takimet e ardhshme. Ne do të insistojmë që çdo debat në Bruksel që do të bëjmë me palën të fillojmë me energji. Insistojmë në implementimin e marrëveshjes për energji. Është marrëveshje e nënshkruar, nuk kemi se çfarë të bisedojmë ajo duhet të implementohet… Unë nuk jam në garë me askënd. Ne nuk duam të krahasohemi me askënd, por çka dua të them është se ne dëshirojmë të jemi transparent që në çdo veprim tonin, të gjithë të jemi pjesë e atij veprimi… Ne nuk kemi shkuar në atë drejtim që të kushtëzojmë proceset, ne po i mbrojmë interesat tona. Ne po i mbrojmë interesat e Republikës dhe ne po konsiderojmë se do të mbrojmë dhe avancojmë interesat tona në formën dhe mënyrën që ne konsiderojmë që është më e mira. Ne nuk e kushtëzojmë bashkësinë ndërkombëtare se do të bllokojmë këtë proces apo atë proces. Ne kemi kërkuar me ngulm implementimin e marrëveshjes për energji dhe marrëveshjeve tjera dhe prapë insistojmë në këtë, dhe njëkohësisht ne e kemi vënë pah dhe do të insistojmë prapë dhe kështu do të mbetet se të gjitha marrëveshjet duhet të implementohen. Nuk do të lejojmë që vetëm për një marrëveshje specifike të marrim qasje selektive”, deklaroi Arifi.

Përfaqësuesi i Kosovës për dialog me Serbinë, Avni Arifi, që është edhe shef i stafit të kryeministrit, Ramush Haradinaj, është këmbëngulës se nuk do të lejojnë që Asociacioni të jetë vendimmarrës. “Kushtetuta e Republikës së Kosovës nuk lejon që asociacioni të ketë kompetenca ekzekutive, unë nuk kam asnjë kompetencë dhe nuk do kem as tash dhe as në të ardhmen që të pranoj një dokument i cili është në Kushtetutën e Republikës së Kosovës”, thotë ai. I pyetur nëse presidentët e të dyja vendeve do të takohen brenda këtij muaji, Arifi ka thënë se nuk flet për këtë çështje. Ndërsa, ka rikonfirmuar se në nivelin teknik nuk është paraparë ndonjë takim.

Zbulohet shtatorja e Beg Rizajt, vëllai i tij sqaron çfarë ndodhi në Deçan

Në Deçan është zbuluar shtatorja e heroit kombëtar Beg Rizaj. Kjo u bë në ditën e çlirimit të kësaj komune, që është vendlindja e Rizajt e edhe e kryeministrit të Kosovës, Ramush Haradinaj. Ky i fundit, tha se Rizaj luftoi dhe ra për liri

“Beg Rizaj është njëri prej neve, djemve shqiptarë, luftojë në UÇK që në ditët e para. Nuk ka betejë në Dukagjin që nuk e ka emrin e tij, luftoi për liri kudo që shqiptarët luftuan për liri edhe ra në kërkim të lirisë. Jeta jonë është e gjatë të vërtetat nuk mund t’i ngulfat askush dhe e vërteta gjithmonë ka me dal. Ne kemi pas dhe kemi që edhe nga brenda mundohen me na ndal hapin, me na e ndal fuqinë. Ne kemi pas, kemi e do të kemi që edhe prej brenda kanë me u mundua me i zbeh punët tona, por ka diçka le ta dinë të gjithë, edhe ata që kujtojnë se e donë atdheun shumë, por edhe të tjerë drejtimi ynë nuk ndërron, drejtimi ynë për të drejtën tonë nuk ndërron. Ne do të mbesim në të drejtën tonë, do të mbesim sepse nuk ka gjë më të shenjtë se sa me rrugëtuar me të drejtën për liri, me qenë i lirë”, tha Haradinaj.

Një incident ndodhi teksa po zbulohej shtatorj

Ishte vëllai i Beg Rizajt, Aliu, ai që nuk dëshironte të lejonte askënd për të zbuluar shtatoren e të vëllait, por dëshironte ta bënte ai vet. Teksa mediat ishin në një anë, panë vetëm pjesën kur ai po diskutonte me të kryeministrin Ramush Haradinaj.

Vëllai tjetër i Beg Rizajt, Hakiu, deklaroi se Aliu ishte i mërzitur për të vëllain dhe se nuk kanë asnjë problem me kryeministrin e vendit. “Nuk ka pasur kurrfarë incidenti, ndoshta e ka pasur nga mërzia, ka qenë edhe Aliu në luftë mundet prej mërzie. Jo more, kryeministri është vëlla i joni, familja Haradinaj, Ramushi dhe Dauti janë vëllezër tonë”, tha ai.

Edhe kryetari i Deçanit, Bashkim Ramosja ka sqaruar incidentin

Ai tha se ishte një konflikt në mes vëllezërve Rizaj dhe që kryeministri ka ndërhyrë për të qetësuar situatën. “Refuzoi për vëllezër të vet që të marrin pjesë në zbulim të shtatores, se ata janë tre vëllezër që kanë mbetur dhe njëri prej këtyre vëllezërve nuk i ka lënë këta dy vëllezërit tjerë se janë keq mes vete. U desh me ndërhy kryeministri që me i pajtua në mes veti që me ju thënë se ti ke me zbulua këta dy nuk kanë me zbulua se këta dy pak më të kthjelltë. Ai i thoshte kryeministrit që ti nuk ki faj, por këta të dy nuk kanë qenë mbas Begut kurrë, nuk janë kanë në luftë kurrënjani dhe nuk dëshironte ti lejonte vëllezërit tjerë për me marrë pjesë”, ka thënë ai.

Më vonë sqaroi edhe vet kryeministri

Thotë se ndërhyrja e tij ka qenë në funksion të qetësimit të situatës, për të ruajtur figurën e luftëtarit të lirisë. “Sot, në 19-vjetorin e çlirimit të Deçanit përkujtuam flijimin për liri të luftëtarëve nga e gjithë shqiptaria. Më këtë rast, disa media kanë spekuluar, se ka pasur reagime të vëllait të Beg Rizajt drejtuar ndaj meje. I siguroj qytetarët e Deçanit dhe publikun e gjerë, se mosmarrëveshja nuk kishte të bënte asgjë me mua. Ndërhyrja ime ishte në funksion të qetësimit të situatës, për të ruajtur figurën e luftëtarit tonë të lirisë”, ka shkruar ai.

Shtatorja e heroit kombëtar do të qëndrojë në qendër të Deçanit, është financuar nga bashkëluftëtarët dhe bashkatdhetarët e tij. Ndërsa, komuna e Deçanit e ka ndarë hapësirën ku është vendosur.

Ushtari i “Shqiponjave të Zeza” të UÇK-së, Beg Rizaj, bashkë me tetë shqiptarë tjerë janë vrarë në Kumanovë gjatë një beteje me policinë dhe ushtrinë maqedonase, ku ende nuk është sqaruar se pse ndodhi kjo betejë dhe kush qëndron prapa tyre. Ai është i varrosur në Kompleksin Memorial të Dëshmorëve në Gllogjan.

Haradinaj: Incidenti në Deçan s’kishte të bënte me mua

Sot në Deçan është zbuluar shtatorja e Beg Rizaj. Gjatë zbulimit të shtatores, pati përplasje mes vëllait të të ndjerit Beg Rizaj, Ali Rizaj dhe kryeministrit Ramush Haradinaj, por të cilën Haradinaj e demanton dhe thotë se nuk kishte të bënte me të por mes vëllezërve Rizaj

Përplasje e Haradinajt me vëllanë e Beg Rizajt, se lë ta zbulojë shtatoren e vendosur në qendër të Deçanit. Haradinaj, gjithashtu thotë se vetëm e ka qetësuar situatën për ta ruajtur figurën e luftëtarit Rizaj.

Postimi i Haradinajt:

Sot, në 19-vjetorin e çlirimit të Deçanit përkujtuam flijimin për liri të luftëtarëve nga e gjithë shqiptaria.

Më këtë rast, disa media kanë spekuluar, se ka pasur reagime të vëllaut të Beg Rizajt drejtuar ndaj meje.

I siguroj qytetarët e Deçanit dhe publikun e gjërë, se mosmarrëveshja nuk kishte të bënte asgjë me mua.

Ndërhyrja ime ishte në funksion të qetësimit të situatës, për të ruajtur figurën e luftëtarit tonë të lirisë.

Ramush Haradinaj pasi u tregua i ashpër me një grua para një jave, sot ra në hunlesh

​Kryeministri Ramush Haradinaj, që zgjohet në 5 të mëngjesit për të bërë ushtrime fizike, është paluar të shtunën, në Deçan, nga vëllai i të ndjerit, Beg Rizaj, Aliu

Haradinaj nuk ia ka thënë asnjë fjalë kur Ali Rizaj e ka ndalur Kryetarin e AAK’së të zbulojë shtatoren e Beg Rizajt në qendër të Deçanit.

Mirëpo, Shefi i Qeverisë ishte treguar i fortë përballë një gruaje, në një aktivitet për Lidhjen e Prizrenit, po në Prizren. Atje, Haradinaj ia kishte ndalur mikrofonin një gruaje nga Shqipëria derisa më vonë kishte thënë se po të mos ishte grua do të sillen ndryshe me të.

Ramush Haradinaj, një ish-luftëtar dhe Komandant i UÇK’së, është bërë për herë të dytë Kryeministër në një koalicion me PDK’në dhe Kadri Veselin, të cilët i kishte akuzuar për dhjetë vjet.

Për gati një vit qeverisje, Haradinaj ka bërë disa skandale, në mesin e të cilave edhe rritjen e pagës për Kabinetin Qeveritar, faljen e borxheve kundërligjshëm ndaj kompanive të ujit dhe së fundmi edhe i dha një kompanie ndërkombetare që po ndërton rrugët e Kosovës 53 milionë euro.

Ende nuk dihet edhe sa kohë Haradinaj do të mbetet Shef i Qeverisë. Pasi as partitë në pushtet, si PDK, dhe as ato në opozitë nuk kanë shprehur gatishmëri për të pasur proces të ri elektoral.