Java e ardhshme vendimtare për rrëzimin e qeverisë Haradinaj?

“Mendoj se që edhe vet kryeministri Ramush Haradinaj duhet me u bind që nuk e ka legjitimitetin dhe nuk ka kurrfarë mundësie me stabilizu Kuvendin e Kosovës, kur dihet se shumica shqiptare është në opozitë. Ne si Lidhje Demokratike e Kosovës sa më shpejtë që mundemi me i siguru votat për mocion do ta procedojmë. Zgjidhja më e mirë për qytetarët janë zgjedhjet e reja”, është shprehur deputetja e LDK-së, Valenditna Bunjaku-Rexhepi

Zyrtarë të AAK-së, por edhe vet kryeministri Ramush Haradinaj në vazhdimësi shprehet se Qeveria e Kosovës në krye me të, do të jetë Qeveria e parë e cila do t’i shkojë deri në fund të mandatit.

Kryeministri i Kosovës, Ramush Haradinaj, ditë më parë për në një konferencë për media kishte deklaruar se është duke punuar dhe se do ta çojë mandatin e tij deri në fund. Kjo deklaratë e shefit të ekzekutivit vjen pas debateve të fundit më një pjesë të pozitës, ku këta të fundit i ishin drejtuar Haradinajt që nëse dëshirojnë edhe mund t’i bëjnë numrat për rrëzimin e Qeverisë.

Se fundi i qeverisë është afër, ketë mendim e ka opozita. Subjekti më i madh opozitar, Lidhja Demokratike e Kosovës konsideron se kryeministri Ramush Haradinaj, duhet të bindet se nuk e ka legjitimitetin, dhe se nuk ka kurrfarë mundësie që ta stabilizojë Kuvendin. Në një linjë me opozitën qëndron edhe shoqëria civile. Sipas njohësve të zhvillimeve aktuale e politike në vend, shanset janë minimale që Qeveria Hartadinaj ta dërgoj deri në fund mandatin e saj.

Deputetja e LDK-së: Zgjidhje janë vetëm zgjedhjet

Derisa kryeministri i Kosovës, Ramush Haradinaj deklaron se është duke punuar dhe se do ta çojë mandatin e tij deri në fund, kështu nuk mendon edhe opozita. Nga krahu i kundërt deklarojnë se ajo i ka ditët e numëruara.

Deputetja e Lidhjes Demokratike të Kosovës, Valentina Bunjaku-Rexhepi, në një prononcim për gazetën “Bota sot”, ka thënë se kryeministri Haradinaj duhet të bindet se nuk e ka legjitimitetin, dhe se nuk ka kurrfarë mundësie që ta stabilizojë Kuvendin.

“Mendoj se që edhe vet kryeministri Ramush Haradinaj duhet me u bind që nuk e ka legjitimitetin dhe nuk ka kurrfarë mundësie me stabilizu Kuvendin e Kosovës, kur dihet se shumica shqiptare është në opozitë. Ne si Lidhje Demokratike e Kosovës sa më shpejtë që mundemi me i siguru votat për mocion do ta procedojmë. Zgjidhja më e mirë për qytetarët janë zgjedhjet e reja”, është shprehur deputetja Bunjaku-Rexhepi.

E pyetur se a do të jetë vendimtare java e ardhshme për Qeverinë Haradinaj, Bunjaku-Rexhepi është përgjigjur se kjo varet nëse do mund t’i sigurojnë votat e nevojshme.

“Varet se a do mundemi mi siguru votat e mjaftueshme për mocion”, është përgjigjur deputetja e LDK-së, Valentina Bunjaku-Rexhepi për gazetën “Bota sot”. Ndryshe, nga Lidhja Demokratike e Kosovës paralajmërojnë se java e ardhshme do të jetë vendimtare për rrëzimin e qeverisë së udhëhequr nga lideri i AAK-së, Ramush Haradinaj.

Mehmeti: Kjo qeveri do të bie shumë shpejt

Analisti politik, Faton Mehmeti, duke i komentuar deklaratat e kryeministrit Ramush Haradinaj, në një prononcim për gazetën “Bota sot”, ka thënë se shanset janë minimale që kreu i qeverisë aktuale ta dërgoj deri në fund mandatin e tij.

Siç ka thënë ai, nëse ndodh një gjë e tillë, do të jetë një tragjedi për Kosovën. “Veç nëse ndodh ndonjë mrekulli, përndryshe nuk shanse që Haradinaj të dërgoj deri në fund mandatin e tij. Nëse ndodh kjo faktikisht për Kosovën do të jetë tragjike, një qeveri e korruptuar dhe e udhëhequr nga bandat do e dërgonte vendin në humnerë nga e cila nuk do të mund të dilte asnjëherë”.

“Faktikisht kryeministri Haradinaj është i papjekur politikisht, dhe në vend që të merret me substancën dhe produktivitetin e qeverisë së tij merret me shifra se deri kur do të mund ta shtynte mandatin e tij. Për më tepër, Haradinaj e di se më asnjëherë nuk do të mund të bëhet kryeministër, andaj po e shfrytëzon në maksimum”, ka thënë analisti politik.

Mehmeti me tej ka theksuar se, Qeveria Haradinaj i ka ditët e numëruara, dhe sipas tij, fundi i saj do të vije shumë shpejt. “Kosova nuk ka qenë më keq as në kohën e okupimit, tani aq keq është gjendja sa me askush nuk dëshiron të jeton këtu. Në gjykimin tim kjo qeveri do të bie shumë shpejt, dhe Hashimi do të jetë personi që do e bëjë një gjë të tillë, me synimin për t’u kthyer vet në pozitën e kryeministrit. Thaçi është Putini i Kosovës, pasi ka kapur të gjitha segmentet e shtetit, dhe sipas interesave po i ndërron pozitat e tija. Ndërsa, Haradinaj është një figure shahu që Thaçi e shfrytëzon kurdo që të ketë nevojë”, ka përfunduar analisti politik, Faton Mehmeti për gazetën “Bota sot”.

Haziri: Sa më shpejtë të shkoj kryeministri Haradinaj

Edhe analisti tjetër politik, Nexhat Haziri shprehet se të gjithë parametrat politike dhe të zhvillimeve të tjera në skenën politike dhe rreth sajë nuk janë në favorin e kryeministrit Haradinaj.

“Nëse nisemi nga e drejta individuale njerëzore është legjitime ambicia e kryeministrit Haradinaj kur deklaron se mandatin si kryeministër do ta qoj deri në fund. Mirëpo të gjitha parametrat politike dhe të zhvillimeve të tjera në skenën politike dhe rreth sajë nuk janë në favorin Haradinajt dhe të ambicies së tij”, është shprehur Haziri.

Analisti politik në një prononcim për gazetën “Bota sot”, ka shtuar me tej se Qeveria Haradinaj e ka degraduar shtetin në çdo aspekt, dhe, siç potencon ai, po ashtu kjo e fundit i ka dhënë një imazh negativë në rrafshin ndërkombëtar.

“Pra për mendimin tim nuk është reale që të pritet që ky kryeministër ta qeverisë Kosovën për një mandat të tërë, kur dihet brishtësia e këtij koalicioni qeveritare për shkak të mungesës së numrave, pastaj skandaleve të shumta nga një keqqeverisje e cila e ka degraduar shtetin në çdo aspekt dhe po ashtu i ka dhënë një imazh negativ në rrafshin ndërkombëtar”, ka shtuar analisti politik.

Krejt në fund, Haziri ka nënvizuar se sa më shpejtë të shkoj kryeministri Haradinaj dhe qeverisja e tij, do të rriten shpresat në vend për ditë më të mira.

“Nuk mund të vazhdoj qeverisja nga zyrtar e institucione që tashmë kanë humbur çdo legjitimitet qoftë atë qytetar, politik e moral. Andaj sa më shpejtë të shkoj kryeministri Haradinaj dhe qeverisja e tij, do të rritet shpresa në këtë vend për ditë më të mira dhe për një shoqëri me dinjitet”, ka thënë në fund Haziri.

Deputeti i Kuvendit të Kosovës nga radhët e Lidhjes Demokratike të Kosovës, Arben Gashi, ka folur rreth përpjekjes së opozitës së vendit për rrëzimin e Qeverisë, e cila udhëhiqet nga Ramush Haradinaj. Gashi është pyetur në emisionin “DPT Te Fidani”, në televizionin T7, nëse javën e ardhshme do të mund të paraqitet një mocion mosbesimi ndaj Qeverisë Haradinaj. “Teorikisht mund të ketë (mocion, v.j.)”, është përgjigjur Gashi. Deputeti i LDK-së ka thënë se partia e tij dhe partitë e tjera në opozitë po punojnë për t’i siguruar votat e mjaftueshme për rrëzimin e Qeverisë.

Ende s’ka raport ndërkombëtar për vdekjen e Deharit, babai i tij i bindur se e njëjta dorë ia ka vrarë dy djemtë

Janë bërë pothuajse dy vite që kur ndërroi jetë aktivisti i Vetëvendosjes, Astrit Dehari. Në ditën tragjike ai ishte në Qendrën e Paraburgimit në Prizren, ku po mbahej nën dyshimin për sulm ndaj ndërtesës së Kuvendit të Kosovës

Ndonëse raporti i Institutit të Mjekësisë Ligjore në Kosovë e ka vlerësuar si vetëvrasje, familjarët me këtë konstatim nuk u pajtuan dhe prandaj kërkuan hetim të pavarur ndërkombëtar, i cili tani po zhvillohet në Qendrën Universitare të Mjekësisë Ligjore në Lozanë të Zvicrës.

Hetimet për rastin janë duke u zhvilluar ende dhe deri më tani ky institut nuk ka dal me ndonjë rezultat konkret për shkaqet e vdekjes së Astrit Deharit. Babai i të ndjerit Astritit, Avni Dehari për KosovaPress bën të ditur se hetimet po vazhdojnë dhe se hetuesit ndërkombëtar i kanë pranuar të gjithë materialin e nevojshëm për hetim nga organet hetimore në Kosovë.

Ai thotë se deklaratat kontradiktore të prokurorëve dhe gjykatësve për vdekjen e djalit të tyre, i kanë shtyrë ata që të dyshojnë edhe në raportin e Institutit të Mjekësisë Ligjore në Kosovë.

Deklaron se do e pranojnë juridikisht çfarëdo rezultati që vjen nga hetuesit ndërkombëtar, por shprehet i bindur se e njëjta dorë i ka vrarë të dy djemtë e tyre, Arbnor dhe Astrit Deharin.

“Rezultat, afat nuk kemi për arsye se ata i kanë marrë materialet, materiali është mjaftë voluminoz janë mijëra faqe, na kanë thënë se punojnë me gjithë mundësitë që kanë, me zell me vrull, mirëpo afat të caktuar nuk ka besoj se posa ta kryejnë punën do u hyjnë hetimeve të pavarura. Natyrisht që ne nuk jemi më të fortë se pushteti që të bëjmë hetime që t’i nxjerrim në shesh dyshimet tona dhe të shohim se çfarë ka ndodhur, por e dimë se e njëjta dorë e ka vrarë edhe Arbnorin edhe Astritin, tash kemi kërkuar hetues ndërkombëtar varësisht prej rezultatit juridikisht ne e pranojmë, por ne e dimë se që të dy janë të vrarë“, thotë Dehari.

Rezultate konkrete për hetimet në Zvicër nuk ka pranuar as avokati i rastit të Astrit Deharit, Tomë Gashi i cili thotë se janë duke pritur një përgjigje hetimore nga Instituti i Mjekësisë Ligjore në Lozanë.

Duke u shprehur i bindur se Astrit Dehari është vrarë, Gashi në një prononcim për Kosovapress thotë se rasti nuk ka marrë epilog ende, ngase sipas tij, ishte i inskenuar.

“Deri më tani nuk ka rezultate konkrete dhe nuk kemi një përfundim të hetimeve të pavarura apo të ekspertizave të cilat sigurisht që familja Dehari do t’u besoj, në aspektin juridik. Pas vrasjes së Astrit Deharit kemi pasur një situatë jashtëzakonisht katastrofale në aspektin juridik, kemi pasur deklarime kundërthënëse në mes të Policisë, Prokurorisë dhe zyrtarëve të tjerë shtetëror apo ligjor që janë në Kosovë dhe kemi pasur edhe ekspertiza me dy kuptimësi. Vetë në Institutin e Mjekësisë Ligjore janë bërë dy ekspertiza të cilat faktikisht njëra tjetrën e eliminojnë nëse lexohen në mënyrën e duhur dhe deri më tani ne nuk kemi njohuri të tillë, kështu që për të eliminuar këto paqartësi juridike më në fund është aprovuar kërkesa e familjes Dehari që rasti të dërgohet në Zvicër.

Ky rast që është pretenduar se do përfundoj shpejt në aspektin juridik e shihni se sa vështirësi ka pasur për shkak të ndjeshmërisë së këtij rasti, sepse Astrit Dehari është vrarë në vendin ku është dashur të jetë krejtësisht i sigurt e që ka qenë Qendra e Paraburgimit në Prizren për një rast të inskenuar kundër tij”, shprehet Gashi.

Për dinamikën e hetimeve që po zhvillohen në Qendrën Universitare të Mjekësisë Ligjore për rastin e Astrit Deharit organet e drejtësisë në Kosovë pranojnë se nuk kanë asnjë informacion të ri për ecurinë hetimore, por thonë që këto hetime i kanë ndihmuar.

“Ministria e Drejtësisë ka dhënë gjithë ndihmën e nevojshme institucionale dhe financiare për realizimin e ekspertizës në institutin zviceran, që ka qenë kërkesë e vetë familjes Dehari. Rasti është përcjell nga Prokuroria Themelore e Prizrenit tek ky Institut, dhe institucionet vendore kanë siguruar çdo provë që është kërkuar nga ta. Presim rezultatet e ekspertizës”, deklaron Ministria e Drejtësisë.

Ndërsa, Prokuroria Themelore e Prizrenit për KosovaPress ka konfirmuar se rasti i aktivistit të Vetëvendosjes është duke u trajtuar në Zvicër.

“Prokuroria Themelore në Prizren, konfirmon se rasti i A.D., është duke u trajtuar ende në Qendrën Universitare të Mjekësisë Ligjore në Lozanë të Zvicrës. Për nevoja të ekspertizës, përkatësisht hetimit, ne u kemi dërguar në vazhdimësi dokumente shtesë sipas kërkesës së tyre, e që lidhen me rastin në fjalë. Andaj, ju njoftojmë se akoma nuk kemi pranuar rezultatet e ekspertizës nga ana e Institutit në fjalë”, thuhet në shkresën e këtij institucioni.

E në Lëvizjen Vetëvendosje thonë se vdekjen e dyshimtë të Astrit Deharit nuk do e lënë të heshtet, ndonëse sipas tyre, PDK-në se po tenton të hesht jo vetëm vdekjen e Deharit, por edhe rastin e gjykimit të aktivistëve të Vetëvendosjes për terrorizëm.

Deputeti i Lëvizjes Vetëvendosje, Sami Kurteshi thotë se nuk kanë asnjë informacion për ecurinë e hetimeve në Institutin e Mjekësisë Ligjore në Lozanë.

“Sa i përket rastit të Astrit Deharit ne nuk kemi ndonjë informacion më të afërt vetëm e dimë se familja është e informuar se Instituti i Mjekësisë Ligjore të cilin e ka përzgjedhur familja është duke punuar siç duket i ka marr materialet e përkthyera. PDK-ja ka gisht në këtë drejtim dhe Qeveria e atëhershme sepse tani e 10 vite i kanë nën kontroll të plotë AKI-në, i kanë nën kontroll të plotë Policinë përmes Shpend Maxhunit të cilin këtu e kanë pasur drejtor tash e quan drejtor të AKI-së, edhe ministrinë e Drejtësisë. Natyrisht që më së tepërmi janë të interesuar këta pjesëtarët e PDK-së krytë e PDK-së, kreu i PDK-së që ky rast të heshtet , domethënë të heshtet rasti i gjykimit edhe i arrestimit të aktivistëve të Vetëvendosjes për terrorizëm, por edhe rasti i Astrit Deharit, mirëpo sigurisht ne nuk do ta lëmë këtë në heshtje”, thotë ai.

Astrit Dehari ishte aktivist i Lëvizjes Vetëvendosje, u arrestua më 30 gusht të vitit 2016, i dyshuar se bashkë me aktivistë të tjerë sulmuan Kuvendin e Kosovës. Ai vdiq më 5 nëntor të po të njëjtit vit, në Qendrën e Paraburgimit në Prizren, ku raporti i Institutit të Mjekësisë Ligjore rreth shkaqeve të vdekjes së Astrit Deharit më 18 nëntor 2016 doli në përfundim se Dehari ka bërë vetëvrasje, por rezultatet e këtij raporti nuk u pranuan nga prindërit e të ndjerit.

Në tetorin e vitit të kaluar Qeveria e Kosovës me kërkesë të ministrit të Drejtësisë, Abelard Tahiri ka ndarë mjetet financiare në shumën prej 50 mijë eurove për ekspertizë shtesë jashtë vendit në lidhje me vdekjen e Astrit Deharit.

Haradinaj: Turqia mbetet partner strategjik i Kosovës

“Marrëdhëniet bilaterale ndërmjet Kosovës dhe Republikës së Turqisë janë të mira dhe këtë frymë mirëkuptimi të ndërsjellë do ta vazhdojmë edhe në të ardhmen. Republika e Turqisë do të ketë një rol të veçantë në përkrahje të Kosovës për anëtarësimin në INTERPOL dhe organizata tjera ndërkombëtare si dhe në shtimin e njohjeve të reja për Kosovën”, kështu tha kryeministri i Republikës së Kosovës, Ramush Haradinaj, gjatë takimit me ministrin e Punëve të Jashtme të Turqisë, Mevlut Çavusoglu

Duke vlerësuar bashkëpunimin e mirë që ka Kosova me Republikën e Turqisë, kryeministri Haradinaj tha se Turqia është dhe vazhdon të mbetet partner strategjik në fushën e bashkëpunimit politik, ekonomik dhe të sigurisë.

Sipas kumtesës nga ky takim, Haradinaj e ka njoftuar ministrin Çavusoglu për zhvillimet e fundit në Kosovë, për progresin e Kosovës në rrugën euroatlantike, rëndësinë e anëtarësimit të Kosovës në organizata të rëndësishme ndërkombëtare si dhe për angazhimin e Qeverisë në zhvillimin ekonomik, forcimin e sundimit të rendit dhe ligjit, liberalizimin e vizave si dhe për procesin e njohjeve.

Haradinaj e ka falënderuar ministrin Çavusoglu për mbështetjen që ka dhënë dhe po vazhdon të jep Turqia në forcimin e shtetësisë së Kosovës dhe subjektivitetit ndërkombëtar.

Ndërsa, përmes një postimi në Facebook, Haradinaj ka thënë se “nga ministri turk Çavusoglu u sigurova për mbështetjen e plotë të shtetit turk për anëtarësimin e Kosovës në Interpol dhe lobimin për shtimin e njohjeve të reja”.

Ministri i Punëve të Jashtme të Turqisë, Mevlut Çavusoglu, falënderoi kryeministrin Haradinaj për pritje, duke konfirmuar angazhimin e shtetit të tij për proceset zhvillimore në Kosovë, për mbështetjen e Kosovës në rrugën euroatlantike dhe për anëtarësimin e saj në organizata ndërkombëtare.

Në takim, po ashtu është biseduar edhe për rolin e komunitetit turk në institucionet e vendit dhe shtendërtimin e Kosovës, për të cilën kryeministri Haradinaj tha se të gjitha komunitetet që jetojnë në Kosovë kanë të drejta të afirmuara, poashtu edhe komuniteti turk është i përfaqësuar në të gjitha institucionet e Kosovës.

Në takim ishin të pranishëm edhe zëvendëskryeministri dhe ministër i Punëve të Jashtëm, Behgjet Pacolli, ministri i Administratës Publike, Mahir Jagxhillar, ministri i Zhvillimit Rajonal, Rasim Demir dhe ambasadorja e Turqisë në Kosovë, Kivilcim Kiliç./

Edi Rama, njeriu antimedia apo antishpifje

Në tri vitet e fundit, për herë të dytë kryeministri propozon ashpërsimin e një ligji të ri, për të frenuar atë që e konsideron shpifje nga “kazani politik dhe mediatik”. Reagimet e ndërkombëtarëve zbusin qëndrimet e kreut të qeverisë


Nga Sebi Alla

Raporti i kryeministrit me median gjithnjë ka qenë një marrëdhënie “dashuri & urrejtje”. E provoi vetë të ishte gazetar, analist, goditës e shpotitës i një pushteti, por edhe i goditur fizikisht nga pushteti, për aq kohë sa sulmohej fjala e lirë, në vigjilje të viteve 90’. Tashmë në rolin e kryeqeveritarit, Rama po hedh për herë të dytë brenda tri viteve në tregun publik idenë e paketës “antishpifje”, që parashikon dënimin e të zgjedhurve, politikanëve dhe gazetarëve që shpifin ndaj qeverisë, zyrtarëve të lartë dhe deputetëve të tij. Faza e parë ka nisur me urdhrin e AKP për regjistrimin e të gjithë mediave online. Në këtë pikë pak reagime ka patur, pasi formalizimi mediatik, qoftë edhe i mediave online, konsiderohet nevojë në “histerizmin” masiv të hapjes së portaleve pa kriter.

Nëse do ishte qëllimi për “rregullin mediatik”, kjo do kish kaluar më në heshtje, por projekti i qeverisë në atë që e quan “paketa antishpifje”, parashikon specifikisht dënimin me gjobë të çdo shpifjeje, nga politika ose media. “Çdo shpifje të hedhur në drejtimin tonë nga kazani politik e mediatik, a qoftë edhe nga kazani i profileve zyrtare digjitale, ne do ta padisim në gjykatë. Boll me përgënjeshtrime, boll me kundërpërgjigje, boll me debate televizive të sajuara për t’u bërë jehonë shpifjeve apo për të fituar audiencë e me zhurmën e fabrikës së baltës. Boll me këtë neveri që po helmon Shqipërinë dhe po rrënon çdo gur të themelit të edukatës e mirësjelljes qytetare, të cilin çdo familje e ndërton përditë me aq mund e durim për fëmijët e vet. Çdo shpifje në gjyq”, deklaroi kryeministri. Opozita dhe një pjesë e mediave në vend reaguan, por kryeministri po venit me vendosmëri çdo zë klithës se po “preket liria e fjalës”, por këtë “guxim” nuk e ka me organizmat ndërkombëtarë, që duket se është i detyruar t’i dëgjojë.

“Shtetet nuk duhet të imponojnë regjistrimin e detyrueshëm për mediat online si parakusht për punën e tyre, gjë që mund të ketë efekt shumë negativ në lirinë e medias. Kjo praktikë, kur vihet në zbatim, mund të kufizojë ndjeshëm aksesin e publikut në burime të larmishme informacioni dhe pluralizmin e zërave, si edhe gërryen të drejtën e lirisë së shprehjes dhe të informimit online”, -u shpreh përfaqësuesi i OSBE-së për Lirinë e Medias, Harlem Désir. Nuk kaloi shumë orë nga kjo deklaratë dhe Rama u shpreh i gatshëm për ta diskutuar këtë ide. “Bisedë e frytshme me Harlem Desir mbi përpjekjet për rend ligjor në median online. Së shpejti #PaketaAntishpifje #AntiFakeneës në diskutim publik. Gati për të dëgjuar sugjerimet e kujtdo që do një media të çliruar nga shpifjet.

OSCE_RFoM partner i çmuar në këtë betejë emancipuese”, shkroi Rama mesditën e së premtes. Po pse kjo nismë e Ramës që në tre vjet tenton dy herë për të imponuar ligjin antishpifje? Në vitin 2015 kryeministri Edi Rama parashtroi thuajse të njëjtën nismë, por në atë kohë e shtoi dozën e dënimit, që përveç gjobës parashikonte edhe burgun. “Shpifja e kryer botërisht ndaj një funksionari të lartë shtetëror apo të zgjedhur, me qëllim atribuimin atij të një fakti që parashikohet nga ligji si vepër penale, dënohet me gjobë ose me burgim deri në tre vjet”- thuhej mes tjerash në propozimin e qeverisë shqiptare. Reagimet e brendshme, e veçanërisht nga ndërkombëtarët, që argumentuan se kjo prekte lirinë e shprehjes e veçanërisht cenonte punën e medias dhe ajo e para do ishte e prekur nga kjo nismë detyruan kreun e qeverisë të zmbrapsej, edhe për një tjetër fakt; -aleatja e saj bashkëqeverisëse LSI ishte kundër. Koha ka ndryshuar, por situata në të cilën ndodhet qeveria është thuajse e njëjtë.

Ndërsa shpërthyen akuzat për masivitetin e drogës e mbi të gjitha të dyshimit mbi lidhjen e “ministrit më të suksesshëm” Saimir Tahiri me grupin Habilaj në vitin 2015, Rama u kundërpërgjigj duke i konsideruar shpifje dhe lajme të rreme çka thuheshin për qeverinë e ministrat e tij dhe kërcënoi se do miratonte ligjin “antishpifje”. Në fund u tërhoq, madje pas kritikave nga OSBE kërkoi “ndjesë që propozimi ka hapur shteg për një keqkuptim të madh”. Situata po përsëritet tre vjet më pas. Në foltoret e partive opozitare dhe më pas edhe në media, “lajmi i ditës” lidhet me përgjime, akuza dhe dyshime për implikimin e drejtuesve të lartë të qeverisë dhe Partisë Socialiste në trafikun e narkotikëve dhe për lidhje me eksponentë të botës së krimit. Në tre javë prokuroria ka marrë dosje të shumta me politikanë që hyjnë e dalin me dosje në duar që kallëzojnë penalisht kundërshtarët. Të gjithë të akuzuar dhe të gjithë akuzues… Në kakofoninë e krijuar, analisti Mustafa Nano shprehet pro nismës për rregull në tregun mediatik.

“Duhet vënë rregull në gazetarinë online. Sepse kështu si është, është e gabuar, është e padobishme, është edhe e rrezikshme”, shprehet Nano për gazetën Mapo. Për analistin Nano për të diskredituar qeverinë Rama nuk ka nevojë të kërkosh ndihmën e shpifjeve, pasi sipas tij kjo qeveri prodhon vazhdimisht skandale dhe nëse dikush i vë vetes si qëllim të merret me këto skandale, nuk do të ketë nevojë e kohë për shpifje. Prof. as. dr. Belina Budini, drejtuese e Departamentit të Shkencave Humane dhe Komunikimit në UET, e konsideron jo vetëm antidemokratike nismën qeveritare, por edhe një formë cinike. “Kërcënimi përmes dënimeve për shpifje do të prodhojë jo thjesht vetëpërmbajtje apo autocensurë nga ana e gazetarëve, por më pak hapësira, dritare, apo porta prej nga mund të dalin ca të vërteta dhe perspektiva të ndryshme”-gjykon Budini. Për pedagogen e komunikimit kryeministri Rama njihet për një formë dashuri dhe urrejtje me median, pasi edhe vetë ai në politikë u katapultua si një “produkt” i medias.

Çavuşoğlu: Kosova të dëbojë pjesëtarët e “Organizatës FETO”

Ministri i Punëve të Jashtme të Turqisë, Mevlüt Çavuşoğlu, gjatë një vizite të shkurtër në Prishtinë u kërkoi autoriteteve kosovare të dëbojnë në Turqi pjesëtarët e organizatës “Feto”, organizatë terroriste për Turqinë

Ministri i Punëve të Jashtme të Turqisë, Mevlüt Çavuşoğlu u ka kërkuar autoriteteve kosovare kthimin në Turqi të pjesëtarëve të organizatës “Feto”, që Turqia e cilëson si organizatë terroriste. Të premten në orët e vona, ministri i Jashtëm i Turqisë u prit në Prishtinë fillimisht nga ministri i Jashtëm i Kosovës, Behxhet Pacolli dhe më pas edhe nga Presidenti Hashim Thaçi. Dy zyrtarët e lartë të Kosovës nuk folën për kërkesën e Turqisë, por ishte vetë Çavuşoğlu, i cili ka thënë se Kosova nuk duhet të lejojë shtrirjen e veprimtarisë së organizatës “Feto”, në Kosovë.

“Ne presim që t’i ekstradojnë ata”

“Ne nuk duam që Kosova t’i lejojë terroristët, të cilët kanë bërë puç në Turqi të jetojnë këtu. Ne presim që t’i ekstradojnë ata. Ne ata i konsiderojmë të rrezikshëm për Turqinë dhe sigurinë e Kosovës. Ne nuk do të lejonim që dikush në Turqi të bënte ndonjë veprimtari ilegale për Kosovën e lëre më ndonjë puç. Ne do t’i dorëzonim në Kosovë të gjithë ata që do të tentonin diçka të tillë”, është shprehur ministri i jashtëm turk Mevlüt Çavuşoğlu.

Të njëjtën kërkesë shefi i diplomacisë turke e bëri edhe për qeverinë e Shqipërisë gjatë vizitës që zhvilloi të njejtën ditë atje.

“Në Shqipëri ka një strukturë fetoiste tepër serioze të shtrirë në të gjitha fushat. Si dhe në vendet e tjera. Ata kanë përdorur sistemin arsimor dhe kanë depërtuar në sistemin shtetëror. Turqia pret që të mbyllen institucionet që zhvillojnë veprimtari antiturke në Shqipëri”, citojnë mediet në Shqipëri Cavusoglun.

Arrestimi i 6 qytetarëve turq

Në 29 mars të këtij viti, ndërkaq, Policia e Kosovës pati arrestuar dhe dëbuar për në Turqi gjashtë qytetarë turq. Pesë prej tyre ishin punonjës në rrjetin e shkollave “Mehmet Akif”. Lëvizja e Gylenit ka gjithsej katër shkolla në gjithë Kosovën. Shkollat “Mehmet Akif” ku punonin gjashtë shtetasit e Turqisë, janë të shtrira në disa qytete të Kosovës dhe i përkasin Institucionit Arsimor turk “Gylistan”. Zyrtarë të ministrisë së Arsimit të Kosovës disa herë kanë deklaruar se këto institucione shkollore, veprojnë në përputhje me ligjet e Kosovës. Gylistan, në Kosovë ka edhe kopshte fëmijësh, institucione parashkollore e shkolla fillore dhe të mesme pothuaj në të gjithë Kosovën.

Arrestimi dhe dëbimi i gjashtë turqëve për në Turqi, pati ngritur debat të ashpër në skenën politike kosovare. Kryeministri dhe kryetari i Kuvendit të Kosovës ishin kundër këtij dëbimi dhe kjo ndodhi siç thanë ata “pa dijeninë e tyre”. “Arrestimi i sotëm i gjashtë shtetasve turq, banorë me leje të vlefshme qëndrimi në Kosovë dhe punonjës në Kolegjin Mehmet Akif të akredituar sipas standardeve përkatëse të Kosovës, nuk përfaqëson as formën e duhur të zhvillimit të sundimit të ligjit, as konsolidimit të nevojshëm të demokracisë. Ndërmarrja e veprimeve të tilla pa respektim të procedurave përkatëse dhe mungesë transparence lë hapësirë të theksuar për mëdyshje për veprimet arbitrare të autoriteteve në fjalë”, pati deklaruar Kadri Veseli. E rasti i arrestimit dhe dëbimit brenda ditës i gjashtë shtetasve turq, bëri që të japin dorëheqje ministri i Punëve të Brendshme dhe shefi i Agjencisë Kosovare të Inteligjencës.

Turqia mbështet dialogun Kosovë-Serbi

Ministri i Punëve të Jashtme i Turqisë Mevlüt Çavuşoğlu, gjatë qëndrimit në shkurtër të premten në Prishtinë, ndër të tjera u shpreh edhe rreth dialogut Kosovë-Serbi. Ai tha se Turqia e mbështet këtë dialog duke potencuar faktin që Turqia i kushton një rëndësi të madhe stabilitetit dhe paqes në rajon. “Ne me popullin e Kosovës kemi lidhje historike dhe integriteti territorial i Kosovës është bazë për ne. Ne do të bisedojmë edhe me vendet që nuk e kanë njohur Kosovën. Për integrimin e Kosovës në organizatat ndërkombëtarë jemi duke u angazhuar. Kemi arritje të mëdha, ne e mbështesim edhe dialogun mes Prishtinës dhe Beogradit dhe paqen e konsiderojmë të rëndësishme”, u shpreh Çavuşoğlu.

Nga ana e tij, Presidenti i Kosovës, Hashim Thaçi, tha se “Kosova po kërkon të arrijë marrëveshje paqësore me Serbinë, që do të hapë perspektivë evropiane për të dy vendet. Marrëveshja është në interes të të dyja vendeve”, ka thënë Presidenti Thaçi pas takimit me ministrin e Jashtëm të Turqisë.

Armë e drogë në veturën e babajt të shefit të AKI-së, Maloku tri gjenerata argat të Serbisë

Në orët e vona të datës 13 tetor të këtij viti, Policia e Kosovës e ka ndalur një veturë të tipit “Golf”. Në veturë kanë qenë tre persona. Armë pa leje e substanca narkotike dyshohet se janë gjetur në veturë, pronë e Enver Maxhunit, por që është vozitur nga nipi i tij, që është djali i një prej njerëzve kryesorë të sigurisë në Kosovë, Shpend Maxhuni

Sikurse shefi i Agjencisë së Kosovës për Inteligjencë (AKI), Shpend Maxhuni, edhe babai i tij, Enveri, ka qenë polic i Kosovës për një kohë të gjatë, shkruan sot koha. Djali i dytë i shefit të AKI-së, me inicialet Sh.M., është zënë me narkotikë e armë pa leje javën e kaluar, në Matiqan të Prishtinës.

Ndonëse Policia e Kosovës kishte bërë kallëzim penal për dy të rinjtë, përkatësisht për Sh.M. dhe kushëririn e tij R.M., kallëzimi penal nuk është proceduar në Prokurorinë Themelore të Prishtinës.

Maloku: Argat të Serbisë tri gjeneratat e kësaj familje

Ish deputeti dhe ushtaraku Naim Maloku e ka komentuar rastin e djalit të Shpend Maxhunit, i cili është zënë me narkotikë dhe armë pa leje javën e kaluar në Matiqan të Prishtinës.

Maloku thotë se nuk është asgjë e re. Ai i quan argat të Serbisë tri gjeneratat e kësaj familje.

“Asgje e re apo e paditur edhe me pare!

Argat të Serbisë, kontrabandist me armë e drogë e antishqiptarizëm në tri gjenerata!”, shkruan Maloku në facebook.

Prokuroria Themelore e Prishtinës, ka konfirmuar nisjen e hetimeve, ndaj djalit të Maxhunit. Ibrahim Berisha, zëvendës kryeprokurori i Prishtinës, tha se të premten pasdite është kanë pranuar një kallëzim penal lidhur me këtë çështje.

Berisha ka treguar se në veturën ku janë kapur arma pa leje dhe substanca e dyshuar narkotike, kanë qenë tre persona. Berisha tha se tre personat që kanë qenë në veturë janë identifikuar por për shkak të hetimeve nuk munden me i publiku.

“Një kallëzim penal dje ka ardhur pasdite, por unë më kryeprokurorin kemi qenë në një takim, dhe nuk kemi pasur mundësi ta shohim atë. Hetimet janë duke vazhduar”, tha Berisha.

Shpend Maxhuni, tash e disa muaj është emëruar Shef i Agjencisë së Inteligjencës së Kosovës, para kësaj ka qenë Drejtor i Përgjithshëm i Policisë së Kosovës.

Pokeri i mbetur në gjysmë

Ndarja e Kosovës mund të fillojë me Aleksandar Vuçiqin, por nuk përfundon pa popullin e Kosovës. Na falni, propagandistë të paskrupull

Nga Enver ROBELLI

«Serbët dhe shqiptarët janë dy popujt më të mëdhenj të Ballkanit». «Kosova duhet të ndahet mes Serbisë dhe Shqipërisë». «Ne nuk jemi djem problematikë». «Nga Alpbachu në Gazimestan». «Nga Gazivoda në Shterpcë». «Razgraničenje», «korrigjim», «lëvizje kufijsh», «ndryshim kufijsh», «shkëmbim territoresh», «bashkim me Kosovë, bashkim me Serbi».

Përdorimi i këtyre fjalëve filloi me intensitet të shtuar gjatë kësaj vere. Në koordinim të plotë presidenti i Serbisë dhe ai i Kosovës i vunë në dyzen planet, njëri thumbit, tjetri patkoit, por me një dëshirë, me një qëllim: «razgraničenje», «korrigjim». Qe gati katër muaj flitet për këtë temë, por askush nuk e di ende se çfarë domethënë ajo konkretisht. Sepse nuk ka plan, ka vetëm synime mashtruese. Në të vërtetë, plani është i Serbisë, Rusisë dhe i disa lobistëve që për honorar shesin lëkurën në çdo pazar. Në Prishtinë vrapuesi pas këtij plani mban postin e presidentit të Kosovës.

Tani për tani pokeri mbeti në gjysmë.
Tani për tani ideja për ndarjen e Kosovës mbetet vetëm tentativë.

Pas luftës ai që sot është kryetar i Kosovës doli me idenë që të shpallet një moratorium për pavarësinë e Kosovës. Pastaj u bë përpjekje që të arrihet ndarja sipas agjendës së Zoran Gjingjiqit, politikanit të rryer serb. Plani dështoi, sepse nëntoka parapolitike e Serbisë vrau Gjingjiqit – jo për shkak të planeve të tij për ndarjen e Kosovës, por për shkak se filloi t’i ekstradojë në Hagë të dyshuarit për krime të luftës. Përpjekja e radhës për ndarje ishte më 2004 – në të ashtuquajturat trazirat të marsit, një rrëmujë e përgjakshme e inskenuar nga parapolitika e Prishtinës dhe agjenturat serbe. Tani po shihet përpjekja e tretë, por me më shumë akterë. Sepse ndërkohë është investuar shumë në lobistë dhe agjentura.

Para dy vitesh politikanët e Beogradit zbritën në Nish dhe ia përkëdhelën egon kryeministrit të Shqipërisë. Ky citonte Ivo Andriqin dhe mbronte Goran Bregoviqin dhe Emir Kusturicën, ata entuziazmoheshin pa fund. Përse të mos ndahet Kosova në këtë atmosferë, me muzikë të «Rokeri s Moravu», me gjellën «Leskovačka mućkalica», me «čutura» me shlivovicë. «Pranojeni Kosovën», kështu tingëllonte dikur në Beograd zëri i Skënderbeut socialist nga Tirana – dhe kjo ngjalli një eufori te populli naiv i Kosovës. Andaj, andej nga Anamorava dolën me daulle në rrugë për të përshëndetur veprën heroike të Skënderbeut socialist. Karvani i tij kishte kaluar triumfalisht nëpër Serbi nga Lugina e Preshevës dhe ishte ndalur për drekë në Prizrenin e Lidhjes së Prizrenit.

Kjo tashmë është e shkuar, e harruar.
Tani në rend të ditës është ndarja.

Sa propaganda për ndarjen e Kosovës është bërë në Twitter qe disa muaj. 140 shkronja. 240 shkronja. Llafe. Marrëzi. Poshtërsi. Postime. Kërkesa. Britma. Alarm. Pastaj: propagandë, propagandë, propagandë. Mobilizim pensionistësh austriakë, të cilët kanë për të paguar ndonjë hipotekë në Vjenë dhe shpresojnë se do të marrin miliona nga pushtetarët e Kosovës. Mobilizim të ashtuquajturish ekspertë. Mobilizim të zuzarëve të shoqërisë civile nëntokësore.

Nga ngjarjet e deritanishme lidhur me copëtimin e Kosovës mësuam kaq: ndarja mund të fillojë me Aleksandar Vuçiqin, por nuk përfundon pa popullin e Kosovës. Na falni, propagandistë të paskrupull! Pokeri tani për tani mbeti në gjysmë. Por, tavolina është ende e shtruar, gotat janë ende të mbushura, në «čutura» ka ende pije, «srpski roštilj radi». Edhe Twitteri punon ende. Por, shkronjat u ngrinë. A do t’i shkrijë presidenti serb deri në pranverë? Apo populli i Kosovës do të çlirojë veten deri atëherë?

Kalojnë ndryshimet kushtetuese në Maqedoni për marrëveshjen me Greqinë

Deputetët e Kuvendit të Maqedonisë sot në rend dite e kanë pasur pikën për të vendosur rreth marrëveshjes me Greqinë, të nënshkruar më 17 qershor të këtij viti, marrëveshje kjo që duhet të ndryshojë emrin e vendit në Maqedonia e veriut

Pas disa ditëve diskutim në Kuvend, dhe një referendumit të dështuar, sot deputetët vendosën që kjo marrëveshje të kalojë me vota 80 vota”për”, 39 “kundër” dhe asnjë i përmbajtur, njofton Telegrafi Maqedoni.

Përndryshe, diskutimet në ditët e kaluara për ndryshimet kushtetuese ishin të zjarrta për të mbrojtur qëndrimet e tyre.

Votimi sot u bë për ndryshime kushtetuese të katër neneve të Kushtetutës së vendit ku do të shtohen “Maqedonia e veriut” dhe ndryshime tjera, të bazuara në marrëveshjen me Greqinë fqinje, që ndryshe njihet si Marrëveshja e Prespës.

Në Kuvend pasi votuan deputetët në mënyrë elektronike, kërkesa e deputetëve të OBRM-PDUKM-së që të votohet me thirrje të emrave dhe mbiemrave të deputetëve. Edhe pas këtij votimi, u aprovuan ndryshimet kushtetuese.

Greqia miliona për mediat, historiania: Të publikohen emrat

Lajmi se një pjesë e portaleve dhe e gazetarëve janë mbështetur financiarisht nga Greqia përmes pagesave të dyshimta, ka ngjallur reagimin e fortë edhe të shoqërisë civile

Përmes një postimi në facebook, historiania shqiptare Elena Kocaqi shkruan se shteti jonë duhet të kërkojë sqarime nga Greqia se ku kanë shkuar ato miliona dollarë të hedhura nëpër portale, gazetarë, bursa studimi dhe investime në Shqipëri.

Sipas saj duhet të bëhen publike emrat e te gjithë këtyre njërëzve qe janë shitur për interesat e shtetit grek.

“Shteti jonë të kërkoj sqarim nga Greqia, se ku kanë shkruar ato miliona dollar te hedhura neper portale, gazetar, bursa studimi, investime ne Shqiperi për llogari të një helenizmi fallco, nga me qesharaket dhe nga me te rrezikshmit qe ka njohur historia. Te bëhen publike emrat e te gjithë këtyre njërëzve qe janë shitur për interesat e shtetit Grek. Për të hedhur miliona dollar, për të bërë Shqiptarët Grek fallco, nuk qënka fare ne krizë Greqia. Shteti Grek duhet te dijë një herë e mirë, se te vetmit pasardhës të Helenëve antik janë pikerisht Shqiptarët me gjuhën dhe kulturën e tyre dhe te pushoj së shtrëmbëruari të vertetën, ne emër të një marrëzie me Grek fallco, pasi me këtë i kanë bërë një dëm të madh vetes në radhë të parë, duke u shëndrruar nga helen origjinal, siç jane Arvanito-Shqiptarët ne Grek fals”, shkruan Kocaqi.

Dodona është krenaria e të gjithë shqiptarëve

Në përgjigje të shkrimit të z. Rasim Bebo për Dodonën Pellazgjike
‘’Shqiptarët i luteshin hijes së Tomorrit dhe kishin shqipen për shenjën e Zotit’’

Nga Altin KOCAQI dhe Besim DERVISHI

Zoti Rasim Bebo ka postuar këto ditë një shkrim të tijin me të cilin ai rizbulon “armiqtë e popullit” në Dituri dhe jep vendime për ekzekutimin e tyre. Mjafton vetëm kaq për të mos u marrë seriozishtë, por meqënse zoti Bebo mendon se ka bërë nje punë “patriotike” dhe sjell referenca amatorësh për të mbushur mendjen e vetë, dhe për të mashtruar opinionin publik. Menduam se duhet ti kthejmë një përgjigje zotit Rasim.

Të dhënat e antikitetit janë të dhëna dhe si rrjedhojë ato nuk përbëjnë shkencë, por janë të domosdoshme që ne të plotësojmë kuadrin e të gjitha njohurive. Ndaj ne po e fillojmë nga këto të dhëna, dhe pikërisht nga Homeri, Iliada II, 748-750 me referencë a utorët Antikë në botimin e Akademisë së Shkencave. Këtu Homeri thotë se: ‘’Guneu nga Kyfi solli 22 anije/ E ndiqnin atë Enienët dhe Prrebejtë luftarakë, të cilët banojnë në Dodonën Dimër Keqe”. Homeri i shkruajti këto në shekullin e VIII p.e.s. Ndërsa qyteti që Straboni, Gjeografia Z, e quanë Kihyra është një qytet i ndërtuar nga Pirrua dhe gërmimet arkeologjike kanë treguar se atje në rastin me të mirë të dhënat arkeologjike shkojnë deri në shekullin e VI p.e.s. dhe me zor në shekullin e VII p.e.s. Tani lind pyetja: Si ka mundësi zoti Rasim, që Homeri ti këtë kënduar një qyteti që nuk kishte lindur akoma? Straboni, Gjeografia Z, tregon se aty ku rrjedhë Thiami, gjendet qyteti Kihyra, dhe Dodona e Kastricës që është në rrjedhën e Thiamit.

A thua nuk do e dinte Straboni këtë? Malin e quan Pteleon dhe as i shkonte ndërmend që Mali i shenjtë i Dodonës Pellazgjike i cili kishte marre emrin nga fatëdhënsit “Të Mirët” dhe si festen më të mëdhe të zones, ai vendos festën e Apollonit te Aktiu. Të dhënat e Strabonit dhe të dhënat Arkeologjike e përjashtojnë mundësinë që Dodona Pellazgjike (dimër keqe) të jetë në Shqipërinë e Poshtme të pushtuar nga Grekët. Nga referencat që sjell zoti Bebo vetëm një emër mundet të merret për seriozisht dhe ai është emëri i Dhimitër Pilikës. Por libri i tij u gjysmua dhe u botua dy vjet pas vdekjes së tij. Në faqen 153 ai fletë për Dodonën Pellazgjike në Tomorr, përballë Shpiragut ose Polianit (shumëbrinjëshi) të përmendur nga Straboni. Printimi i faqes 153 fshihet në vazhdim dhe kjo ja zbeh vlerat e besueshmerisë botuesit, por jo autorit. Të tjerët janë amatore.

Nga studimet e historianit Perikli Ikonomi dhe filologut Sulejman Mato, mbetet i hapur opsioni që Dodona Pellazgjike është në Malin e Tomorrit pranë Beratit, dhe këtë po e tregojnë faktet arkeologjike të cilat po zbulohen çdo ditë në këtë mal të shenjtë. Sa për termat “agjent” që përmendni ju zoti Rasim, është epitet qesharak, dhe ne e hedhim poshtë me përbuzje. Këtu po diskutojmë për fakte historike në të mirë të kombit shqipetar dhe gjatë këtij debati do këtë kundershti, por kjo nuk do të thotë që kundërshtarët e tu në mendime janë armiq. Ju midis të tjerave në shkrimin tuaj me titull: ” KOMPLOT NË HESHTJE” botuar në datën 19 Korrik 2015 keni thënë se: ” Me fjalët shёnjtёruese tё Rilindasve tanё pёr malin e Tomorit si: “Mali i Perёndisё”, “Baba Tomori”, “Froni i Perёnisё”, “Kryefroni ynё i vjetё”, “Misteri i frikshёm” etj., nuk ka tё bёjё me Tempullin e Dodonёs, pёr tia pёrshtatur Malit tё Tomorit”.

Atëherë të citojmë disa nga rilindasit tanë të mëdhenj: Jani Vreto botoi në vitin 1887 librin e tij me titull “Apologjia”si përgjigje ndaj një shkrimi që dy nacionalistë grekë kishin bërë në një gazetë greke në Stamboll . Shkrimi i tyre akuzonte Abdyl Frashërin, asokohe deputet i Janinës, duke e quajtur “shqiptaromadh”… Abdyli ia la hartimin e përgjigjes Jani Vretos, si studiues me i thellë i historisë dhe linguistikës që ishte.. Në këtë shkrim të gjatë, Jani Vreto analizon emrat e hyjnive të Mitologjisë, duke i nxjerrë me rrënjë shqipe… dhe arrin deri tek Revolucioni “grek” i bërë prej shqiptarëve. e deri në veprat e tyre në Greqi në vitet ’80… Siç pritej, sado që gazeta greke premtoi se do botonte çfarëdo përgjigje, ajo e refuzoi botimin e këtij shkrimi… Më vonë, Jani Vreto e botoi me titullin “Apologjia”.. Kjo vepër çoi në shkisherimin e tij prej Mitropolisë së Gjirokastrës, si njeri që po shpik një “çeshtje shqiptare të paqënë”. Citojmë midis të tjerave librin faqa 82 : Nga ana e banorve të atij rrethi besohet se në majën e Tomorrit ndodhet një vend i shenjtë, ku banon një shenjë e padukshme që e quajnë shqip i Mirë.

Prandaj më kot po kërkojnë gjetkë Dodonën e Madhe, sepse nga të dhënat e autorve të lashtë rezulton se kanë qenë shumë Dodona.Dodona që ndodhet në Tomorr është ajo që përputhet me Psikra Dodonën (Dodonën e Ftohtë) e cila është përshkruar prej Homerit fortë të shenjtë. ( Shih Jani Vreto, libri “Apologjia” fq 82, 1878 ose Vepra të Zgjedhura , Tiranë 1980) Kostandin Kristoforidhi përsëri një rilindas ynë i madh, pasi kreu gjimnazin Zosimea punoi si përkthyes i albanologut gjerman Han, më vonë vazhdoi studimet në Londër. Boton librin “Gjahu i Malesorëve (Hieja e Tomorrit)” në 1884 ribotuar në Laipcing në 1948 nga albanologu gjerman Maximilian Lambertz si dhe ribotuar në Tiranë më 1950. Në këtë libër midis të tjerave autori thotë në fq. 15 se: “Shqiptarët i luteshin Hijes së Tomorrit dhe kishin shqipen për shenjën e zotit. Të gjithë shqiptarët thonë sipas fjalëve që kanë lënë pleqtë e parë, se Orakulli i Dodonës ka qënë në Malin e Tomorrit, prandaj dhe priftërinjtë e Dodonës kanë pasë qënë quajtur Tomorët. të mirët….”

Naim Frashri një tjetër rilindas i yni në poezin e tij me titull ” Pellazget Shqiptarë” midis të tjerave thotë se : “Thot’ Herodoti, Në Tomor zoti Shtëpi qëmoti Kishte Dhodhonë Eshtë m’e vjetër Ngaha çdo tjetër, Shumë më tepër, Kjo gjuha jonë.” Por veprën më të madhe e ka shkruar një tjetër rilindasi i yni Perikli Ikonomi. Ikonomi një nxënës i gjimnazit Zosimea dhe me vonë përkthyes i misionit Arkeologjik franciz në Apolloni. Në vitin 1936 botoj librin e tij me titull “Dodona pellazgjike dhe Tomor’i Zotit të pellazgjëvet”, shtypshkronja “Atdheu”, Vlorë 1936. Me pakë fjalë Ikonomi në këtë libër e vendos Dodonën në Tomorr dhe thotë se : ‘’Dodona pelazgjike e Toskërisë ka qenë rrënja e burim’i qytetërimit pelazgo – ilirianë dhe greko – romak”. Po të vazhdojmë janë shumë si: Sami Frasheri, Hil Mosi, Çajupi, Ali Asllani e të tjerë. Po këta zoti Rasim kujt agjenture i kanë shërbyer? Në përfundim ju këshillojmë të lexoni Faik Konicën./voal.ch/