Frika nga lufta bërthamore, burri nga SHBA-ja ndërton strehimoren për 500 persona (Video)

Mospajtimet politike dhe kërcënimet për luftëra, fatkeqësisht nuk janë asgjë e pazakontë. Dikur Lufta e Ftohtë midis SHBA-ve dhe Bashkimit Sovjetik kishte krijuar panik tek njerëzit anembanë botës që i frikësoheshin shpërthimit të një lufte bërthamore, por kjo frikë është edhe sot prezente për shkak të acarimit të raporteve midis SHBA-ve dhe Koresë së Veriut

Bruce Beach nga Chicago, gjatë viteve të ’70-ta ishte shpërngulur në Horning Mills në Kanada, për ta ndërtuar një strehimore bërthamore, dhe atë një strehimore që askund tjetër në botë nuk ishte ndërtuar më parë.

Ai kishte siguruar 42 autobusë të vjetër të shkollës, dhe pasi hapi një gropë shumë të madhe i renditi një mbi një. Në këtë mënyrë ndërtoi një strehimore që mund të akomodonte deri në 500 persona. Ai këta autobusë i përforcoi me beton.

Përveç hapësirës për të fjetur, ai kishte menduar edhe për një hapësirë të veçantë që do të shërbente si shkollë për fëmijët, por aty nuk mungonin as kuzhinat industriale, hapësirat për argëtim etj.

Kjo strehimore ka ujë të pijshëm si dhe dy gjeneratorë që mund të furnizojnë atë për një muaj më rrymë. Se për çfarë bëhet më saktësisht fjalë shikoni strehimoren e njohur si “Ark Two”.

Thaçi rikthehet në gazetat kanadeze si njeri i dyshuar për krime

Disa javë pasi vizitoi Kanadanë, mediat atje janë aktivizuar me lajme për Hashim Thaçin. Arsyeja është: historia e dyshimtë e tij, e lidhur me krimin

Në një editorial të shkruar nga redaktori i revistës “Esprit De Corps“, Scott Taylor, të publikuar në gazetën kanadeze “The Hill Times“, theksohej se “Hashim Thaçi është i akuzuar për kriminel dhe bandit”, teksa autori reagonte ndaj komenteve të Thaçit ku akuzonte Rusinë për “lajme të rrejshme dhe sulm” ndaj Kanadasë.

Thaçi, gjatë vizitës së tij në Kanada në fund të muajit nëntor, pas një raportimi në Dhomën e Përfaqësuesve të Komitetit për Punë të Jashtme në kuadër të Qeverisë së Kanadasë, kishte thënë për media se “me sulmin e Rusisë ndaj vlerave tona [të përbashkëta], po sulmojnë edhe Kanadanë”.

E gazetari Scott Taylor ka theksuar se mediet kanadeze nuk kanë ofruar informacion për njeriun që i tha këto fjalë. Për Taylor, i cili ka pasur përvojë si gazetar raportues nga luftërat në Ballkan, Hashim Thaçi është një i akuzuar për “trafikim droge”.

“E thënë thjesht, Hashim Thaçi është i akuzuar si kriminel dhe bandit. Në vitin 1993, kur ishte në mesin e të 20-ave, Thaçi ishte bërë anëtar i Ushtrisë Çlirimtare të Kosovës (UÇK), e cila në mesin e viteve 1990 u cilësua nga Shtetet e Bashkuara si një organizatë terroriste”, shkruan Taylor në editorialin e tij, të publikuar në “The Hill Times” më 6 dhjetor – rreth dy javë pas përfundimit të vizitës së Thaçit në Kanada.

Teksa shkruan për aktivitetin e dyshimtë të Hashim Thaçin, Taylor drejton të tjera akuza të rënda ndaj Presidentit të Kosovës. E përmend nofkën “Gjarpër”, me të cilën njihej Thaçi në luftë.

“Nofka e Thaçit ishte ‘Gjarpër’ dhe ai ishte akuzuar për drejtimin e një rrjeti të trafikimit të drogës dhe armëve”, shkruan publicisti dhe gazetari Scott Taylor. “Në vitin 1997, një gjykatë serbe e dënoi atë me 10 vjet burg”.

Në shkrimin e tij, Scott Taylor citon edhe një hetim që ai pretendon të jetë realizuar nga Agjencia Gjermane e Inteligjencës BND, në të cilin Thaçi akuzohet për krim të organizuar brenda Kosovës, në kohën kur shërbente si kryeministër.

“Agjencia Gjermane e Inteligjencës BND kreu një hetim mbi Thaçin dhe regjimin e tij qeverisës dhe konkludoi se ‘akterët kryesorë (duke përfshirë Thaçin) janë të përfshirë thellë në ndërlidhjet mes politikës, biznesit dhe strukturave të krimit të organizuar në Kosovë.’ Me fjalë të tjera, ai u akuzua për drejtimin e një rrjeti narko-kriminal”, shkruan publicisti kanadez.

Redaktori i revistës kanadeze “Esprit De Corps” përmend po ashtu edhe raportin e Dick Martyt, i cili e akuzon Hashim Thaçin për trafikim të organeve njerëzore. Në këtë raport, Thaçi akuzohej edhe për trafikimin e drogës.

“Një raport tjetër i përgatitur për Këshillin e Evropës implikoi ish-komandantët e UÇK-së në abuzime serioze të të drejtave të njeriut. Pretendimet më serioze kundër Thaçit përfshinin trafikimin e drogës dhe trafikimin e organeve njerëzore”, shkruan Taylor në editorialin e tij.

Në këtë editorial të Taylor theksohet se “papunësia e përgjithshme në Kosovë është mbi 33 për qind, me papunësinë e të rinjve që ka arritur shifrën e afër 60 për qind.”

“Këto numra nuk vijnë nga burimet e medias ruse, por më tepër nga CIA”, shkruan publicisti kanadez, teksa kritikon Thaçin për deklaratën e tij, për “vlerat e përbashkëta” mes Kanadasë dhe Kosovës.

Taylor e cilëson fyerje ndaj qytetarëve kanadezë, faktin se Presidenti i Kosovës krahasoi vlerat e Kanadasë me ato të “regjimit të korruptuar të tij në Kosovë”.

“Të lejojmë ardhjen e Thaçit në Otava, që t’i falen atij mëkatet e së kaluarës dhe të tashmes dhe pastaj të trumbetojë retorikën e tij kundër Rusisë si këshillë e mençur, është marrëzi ekstreme. Për Thaçin, të tregojë se vlerat e tij dhe ato të regjimit të korruptuar të tij në Kosovë janë të njëjta me vlerat kanadeze është një fyerje ndaj Kanadasë”, shkroi Taylor.

Këto lajme vijnë në kohën kur Gjykata Speciale ka paralajmëruar ngritjen e aktakuzave për mbi 60 ish-pjesëtarë të Ushtrisë Çlirimtare të Kosovës, organizatë në të cilën Hashim Thaçi ka shërbyer si udhëheqës politik. /Insajderi.com/

Grupi për Ballkan: Haradinaj ra në kurthin e premtimeve të fushatës

Fillimi i mandatit të dytë të Ramush Haradinajt si kryeministër është karakterizuar me një mobilizim të lartë të institucioneve si dhe me një dinamikë të shtuar të aktiviteteve dhe vendimeve të shpejta, por shefi i Qeverisë ka rënë në kurthin e premtimeve të fushatës zgjedhore se lëvizja e lirë për në Bashkimin Evropian (BE) do të ndodhë në tremujorin e parë të qeverisjes së tij

Kështu thuhet në analizën për 100-ditëshin e qeverisë “Haradinaj” të Grupit për Ballkan, të cilën e ka siguruar gazeta “Zëri”, ku mes të tjerash thuhet se ekzekutivi po qëndron larg temave të komplikuara si: Asociacioni i Komunave me Shumicë Serbe apo transformimi i FSK-së në ushtri të Kosovës.

“Për dallim nga qeverisja e Isa Mustafës, e orientuar në politika planifikuese më afatgjate, por më e ngadaltë në vendimmarrje, fillimi i mandatit të dytë të Haradinajt është karakterizuar me një mobilizim të lartë të institucioneve dhe të zyrtarëve si dhe me një dinamikë të shtuar të aktiviteteve dhe vendimeve të shpejta.

Ashtu sikur paraardhësi i tij, Haradinaj u përball me fenomene të ngjashme pas formimit të Qeverisë, provokim të eksodit të qytetarëve drejt Evropës dhe me kërkesa për shkarkimin e ministrit serb Nenad Rikalo, i cili u akuzua për përfshirje në krime ndaj shqiptarëve në vitin 1999”, thuhet në këtë raport. ..

Rreziku nga bllofi i shfaqjes histerike dhe të rreme të “dashurisë” ndaj SHBA-ve

Aktiviteti i “vogël” diplomatik i një shteti gjeografikisht të vogël dhe me kapacitete të vogla të influencës si Shqipëria, gjatë orëve të fundit ka marrë një jehonë mbarëkombëtare me vendimin e Tiranës zyrtare për të votuar në linjë me 128 shtete në favor të procesit të paqes në Lindjen e Mesme dhe duke vazhduar njohjen prej disa dekadash të status quo-s për një zgjidhje përfundimtare vetëm pas marrëveshjes reciproke për të ardhmen e Jurezalemit dhe të territoreve palestineze në tërësi

Në mës të kësaj zhurme mediatike keqdashëse dhe alarmante për nga mos serioziteti i trajtimit të çështjes bazuar në fakte historike të vazhdimësisë diplomatike, ky lajm është fryrë edhe më shumë nga opozitarë të verbuar nga përfitimi i momentit duke dëmtuar kështu imazhin e vendit por më se shumti të vetës së tyre.

Midis personazhëve të prekur nga vendimi “normal i Shqipërisë” ishte dhe Presidenti Ilir Meta i cili menjeherë nxitoi për të justifikuar këtë veprim duke dashur të lajë duart e tij dhe të vërtetojë “amerikanizmin e tij” pasionant.

Por ka një problem. Ky problem është vet historia e z. Meta dhe qendrimi i partisë së tij në këtë çështje gjatë qeverisjes së Berishës por edhe kur ai ishte pjesë e Koalicionit Rama. Më konkretisht, gjatë vitit 2012 moment kur LSI kishte drejtimin e Ministrisë së Jasthme Shqiptare dhe pavarësisht paraljmërimit të fortë të SHBA-ve për shtetet që votonin pro ose abstenonin për vendosjen e Palestinës si shtet vezhgues në OKB, Shqipëria në atë kohë abstenoi duke lënë të pakënaqur SHBA-të, BE-në, Turqinë e cila e konsideroi këtë vendim si prerje në besë (dhe vendet mike arabe).

Më tej, në vitin 2015 dhe pjesë e Koalicionit Rama, Shqipëria ka votuar pro një rezolutë të parqitur nga disa vende të BE-së dhe Ligës Arabe që në selinë e Kombeve të Bashkuara të valëviten edhe flamujt e shteteve të Palestinës dhe Vatikanit, shtete këto që nuk janë anëtare të OKB-së. Kundër edhe kësaj herë ishin SHBA-të por kjo nuk paraqiti ndonje pengesë për Metën ateherë që të reagonte si kësaj here.

Gjithashtu, gjatë vizitës të Metës në Uashington në 2016, në Forumin Global të Komunitetit Hebraik ai theksonte “se Shqipëria mbështet një zgjidhje paqësore dhe të qëndrueshme për konfliktin në këtë rajon si dhe politikën e dy shteteve Izrael-Palestinë, që jetojnë në paqe dhe në harmoni me njëri-tjetrin”.

Ndryshe nga atëherë, ai tani “rrëzon” vetën e tij dhe argumentin sa më lartë duke pretenduar “harmonizimin e tij” me politikat amerikane ndaj Lindjes së Mesme dhe Jeruzalemit në veçanti e cila është dhe pika kyçe për një zgjidhje përfundimtare që do të sjellë paqe dhe të cilën Tirana zyrtare ende rruan si motivin e saj primare të politikës së jashtme.

Në fakt, bllofi i tij nuk u vonua të dali në shesh nga fjalët e Zëdhënëses së Departamentit Amerikan të Shtetit, Heather Nauert, duke përsëritur deklaratën e Trump se vota në OKB nuk do të jetë i vetmi faktor që qeveria amerikane do të marrë parasysh në marrëdhënie me shtetet e tjera.

Dhe në fakt histeria dhe frika e ndëshkimit për një rezolutë jo detyruese është absolutisht në disnivel me pasionin romantik të personazhe të rëndësishëm të skenës publike në vendit tonë si z. Meta, i cili në vend të simbolit unifikues të kombit, po sillet si “vjehrra dyftyrëshe” e cila kërkon të ndajë “çiftin e dashuruar prej vitësh” (Shqipëri-SHBA) në vitet e saj të fundit të jetës (politike)./Lexo.al/e.e

Mustafa: Demarkacioni lojë e Haradinajt, Qeveria do të bie

Kryetari i Lidhjes Demokratike të Kosovës, Isa Mustafa ka kritikuar ashpër kryeministrin Ramush Haradinaj, rreth demarkacionit të kufirit me Malin e Zi. Ai tha se qeverisja Haradinaj nuk do ta zgjidhë çështjen e demarkacionit dhe liberalizimin e vizave, derisa theksoi se viti i ardhshëm do të jetë vit i zgjedhjeve, meqenëse siç tha ai, kjo qeveri do të bie

“Është sjellje jo serioze e kryeministrit Ramush Haradinaj. Është një loj shumë jo serioze e kryeministrit Haradinaj. Është jo serioze ta votojë në Qeveri dhe të thotë se tash i mbetet Kuvendit që ta rrëzoj. Ligjet dërgohen në Kuvend për t’u miratuar dhe jo për t’u rrëzuar. Prandaj është sjellje jo serioze e një kryeministri. Nuk është kufiri aty ku thotë kryeministri dhe kjo është një tentivë jo serioze”, tha Isa Mustafa në një intervistë për RTK.

Sipas tij, askush deri më tash, as Komisioni i Bulliqit dhe as Komisioni paraprak nuk ka arritur të dëshmojë se një metër katror ka humbur Kosova.

Qeverisja e Haradinaj, sipas tij, po i numëron muajt e qeverisjes, pasi siç tha ai, kjo qeverie do të bie vet, nëse jo atëherë, LDK shtoi Mustafa, sigurisht se do të ngre mocionin për rrëzimin e saj.

Kryetari i LDK-së, Isa Mustafa ka kritikuar qeverinë e udhëhequr nga Ramush Haradinaj. Në 100 ditshin e kësaj qeverie, Mustafa thotë se propaganda është e vetmi sukses. Mustafa e ka krahasuar qeverinë e Ramush Haradinajt me Vetëvendosjen.

“Kemi folë shumë për Vetevendosjen edhe kemi thënë se ata e kanë arrit kulminacionin në propagandës edhe kerkush me këta s’mund të garojë me propagandë. Unë mendoj se edhe Qeveria e Haradinajt në qoftë se në diçka e ka mbërri suksesin më të madh e ka mbërri në propagandë”, tha ai për RTK.

Muistafa deklaroi se opinioni po manipulohet me informata të pa rëndësishme. “Kur po çohet kryeministri, kur po ja nis punës, kur po hanë, kur po ecë këmbë e kur po ecë me makinë. Do të thotë janë çështje të cilat unë mendoj se asnjëri prej nesh nuk kemi nevojë të merremi me to e s’kemi nevojë as t’i promovojmë”, tha Mustafa.

Ai e ka cilësuar të gabuar vendimin e qeverisë së Ramush Haradinajt për faljen e borxheve për shfrytëzuesit e ujit për qëllime biznesi, duke thënë sefalja e borxheve te ujit nga Qeveria është joligjore.

“Dëshiroj që ta kemi një qeveri që zbaton dhe respekton ligjin”, tha Mustafa. “Kemi disa vendime të kësaj qeverie, që janë vendime joligjore… si vendimi për falje të borxheve të ambalazhuesve të ujit”, ka deklaruar paraardhësi i Haradinajt.

“S’ka të drejtë Qeveria me asnjë ligj që vetë t’i çojë gishtat dhe të thotë se i fala 60 milionë euro borxhe të ambalazhuesve të ujit”, ka thënë Mustafa. Ai ka cilësuar joligjor edhe “vendimin për shkarkimin e bordeve që janë në kompetencë të Kuvendit”.

Thaçi: Ambasadorët më erdhën në zyrë, ja çfarë u thashë

Presidenti i Kosovës Hashim Thaçi tha se ambasadorët i kishin shkuar në zyrë për t’i kërkuar sqarime për nismën e OVL të UÇK-së për ta shfuqizuar Gjykatën Speciale, pas tentimit për ta kaluar me shpejtësi ligjin që do të shfuqizonte këtë gjykatë të premten e kaluar në Kuvendin e Kosovës

Presidenti, Hashim Thaçi, ka dhënë qëndrimin e tij në lidhje me iniciativën e disa deputetëve për të shfuqizuar Gjykatën Speciale. Thaçi ka thënë se çdo iniciativë, sikur ajo e 43 deputetëve të kalonte të gjitha procedurat dhe të votohej në parlament, ai nuk do ta bllokonte.

“Roli i presidentit është respektimi i Kushtetutës. Jo vetëm iniciativa të tilla, por secila që kalon procedurat në Kuvend dhe vjen në zyrën time, atëherë natyrisht, vendimi i Kuvendit është obligativ”, ka thënë Thaçi, njofton Klan Kosova.

“Nuk mendoj që vjen deri te dorëheqja pasi aty nuk jam për të bllokuar por për të kryer punë. Nuk dalë kundër vullnetit të shumicës së Kuvendit”, është shprehur ai në Zona B.

“Presidenti mban pozicionin e vet kushtetues dhe ligjor. Iniciativa e deputetëve duhet konsideruar si ligjore. Duhet shikuar gjërat me urtësi dhe mençuri. Asnjë nga ata njerëz që e kanë nënshkruar ose jo nuk mund të etiketohen”, ka thënë ai më tej.

“Proceset që zhvillojnë dhe kultivojnë demokraci nuk duhet frikësuar. Nuk ka iniciativë që nuk menaxhohet”. “Unë jam president, por sikur të isha deputet dhe pjesë e ndonjë grupi parlamentar, çfarëdo vendimi që do të merrej do të isha pjesë e saj”, ka pohuar ai.

Thaçi më tej, për iniciativën e deputetëve ditë më parë, ka thënë se është keqinterpretuar pak.

“Iniciativa e deputetëve, nuk kërkon shfuqizimin, por afrimin e një alternative, jo minim të procesit”, ka shtuar ai.

“Pasi që kam dëgjuar për iniciativën e deputetëve kam qëndruar në zyrë, jam takuar edhe me ambasadorët të cilët kanë kërkuar sqarime”.

“Atyre ua kam bërë të ditur që sa i përket iniciativave kushtetuese dhe ligjore presidenti nuk mund të dalë kundër tyre. Kam treguar shumë qartë që unë nuk mund të frenoj vullnetin e deputetëve”.

“Pushtetet janë të ndara, nuk mund të interferojmë as një drejtësi, në parlament apo në ekzekutiv. Çdo opinion i imi do të jetë kushtetues dhe ligjor e jo i ndikuar”, ka thënë Thaçi ndër të tjera.

Thaçi ka thënë se atë kohë nuk kishte menduar nëse do të ishte njëri nga të akuzuarit.

“Nuk kam menduar se mund të akuzohem sepse interesi nacional është mbi vetveten mbi të gjitha.
Presidenti e merr pozicionin e vetë në bazë të Kushtetutës dhe iniciativa e qytetarëve duhet shikuar si gjë normale. Duhen shikuar gjërat në qetësi, urtësi dhe me përgjegjësi shtetërore dhe qytetare. Ndërsa etiketimet që vijnë prej njerëzve që nuk janë në rrjedha e nuk e dinë se çfarë po ndodh nuk duhet shikuar. Proceset që zhvillojnë demokracinë, rendin dhe ligjin kurrë nuk duhet t’iu frikësohemi”, ka thënë Presidenti.

Çmimi i energjisë do të rritet – importi deri në mars i kushton vendit mbi 40 milionë euro

Rritja e çmimit të energjisë është e pamundur të ndalet. Kjo për faktin se vlera e dëmeve që po parashihet t’i shkaktohen sektorit të energjisë nga mungesa e thëngjillit, importi i saj dhe ndalimi i pagesës për energjinë e shpenzuar në veri do të arrijë dhjetëra miliona euro

Në bazë të këtij raporti të komitetit teknik emergjent të formuar nga Ministria e Zhvillimit Ekonomik dhe të cilin e ka siguruar KTV-ja, parashikohen humbjet nga këto probleme.

Operatori i Sistemit Transmisionit dhe Tregut KOSTT, ka parashikuar humbje të rreth 9.2 milionë eurove për shkak të vendimit të gjykatës që të pezullohet pagesa e energjisë së shpenzuar në veri.

Ky operator ka parashikuar që nëse arrihet të bëhet ndonjë kombinim, pa dhënë ndonjë detaj për të, atëherë kjo shumë mund të ulet në 5.2 milionë euro.

Humbësja më e madhe nga këto probleme do të jetë Korporata Energjetike e Kosovës.

Kjo ndërmarrje ka paralajmëruar që në mungesë të thëngjillit shkaku i shpronësimit në Hade dhe Shipitullë, vlera e humbjeve do të arrijë në 41.3 milionë, ndërsa nëse bazohen në skenarin optimist vlera e humbjeve mund të ulet në 30 milionë euro.

Por, KEK-u ka paralajmëruar se nëse nuk realizohet plani me përpikëri, atëherë kostoja që do të rrjedhë nga mosrealizimi i tij, do të jetë shumë më e madhe se në skenarin bazë prej 41.3 milionë eurosh.

Aktualisht ka vetëm 1.1 milion tonelata me thëngjill në dispozicion dhe që do të shpenzohen gjatë muajve në vijim.

Për shkak të mungesës së thëngjillit, KEK-u nga tetori ka nisur të operojë me vetëm dy blloqe, të cilat prodhojnë vetëm 390 megavat energji, përderisa kërkesa për këtë produkt në vendin tonë arrin në afër 1.000 megavat.

Dhe, për shkak të mungesës së kësaj lënde, në tre muajt e parë të vitit të ardhshëm do të prodhohen 577 mijë e 240 megavat energji më pak se sa ishte planifikuar.

KEK-u në sqarimet e dhëna në këtë raport ka thënë se kostoja e shpronësimeve në Hade dhe Shipitullë ka arritur në 27 milionë euro nga 4.5 milionë sa ishte paraparë në vitin 2012.

Mirëpo, nuk janë vetëm këto humbjet e kësaj ndërmarrjeje.

Ndikimi financiar për shkak të mosprodhimit të energjisë brenda muajve nëntor 2017-mars 2018 do të arrijë në mbi 28.6 milionë euro.

Kurse, kostoja e humbjeve në rrjet dhe ato në veri arrin në 6.7 milionë euro.

KEDS-i dhe KESCO, kanë paraparë një humbje prej 42.2 milionë euro nga importi i energjisë dhe që e njëjta sillet mes 60 deri në 78 euro megavati.

Dy kompanitë kanë thënë se pas ndërprerjes së pagesës së energjisë e shpenzuar në veri dhe pas përgjysmimit të prodhimit të energjisë në KEK, vlera e dëmit të krijuar ka arritur në 13 milionë euro.

Komiteti teknik emergjent në takimin e mbajtur më 21 dhjetor ka dhënë 4 rekomandime, ku përfshihet subvencionimi i kostove të importit të energjisë që do të duhet t’i realizojë KEK-u, të bëhet licencimi i furnizuesit për operim në veri të Kosovës, sigurimi i fondit për mbulimin e humbjeve nga furnizimi me energji në komunat e veriut, si dhe funksionalizimi i Bordit të ZRRE-së.

Haradinaj zëvendëson Halitin, tani kjo është treshja e “rrezikshme”

Naim Miftari, ish agjent i SHIK-ut, përmes një postimi në facebook, kishte drejtuar akuza të rënda në drejtim të Hashim Thaçit, Kadri Veselit, e Xhavit Halitit. Sipas Miftarit, të lartpërmendurit i përgatitnin urdhrat për vrasje, dhe me pas këto urdhra ua jepnin Azem Syles, e ky i fundit tek disa komandantë të tjerë

“Urdhrat për vrasje i përgatitnin dhe i jepnin Hashim Thaçi, Kadri Veseli dhe Xhavit Haliti. Kjo treshe pastaj këto urdhra ja jepnin Azem Syles, kurse Azem Syla jav përcillte pastaj këto urdhra si Sabit Gecit …..dhe disa komandantëve tjerë nga regjioni i Drenicës të cilët dihen me emër dhe mbiemër dhe kujt i shërbejnë edhe sot”, kishte shkruar Miftari.

Përderisa kohë më parë në media thuhej se Haliti, Veseli e Thaçi përmbanin treshen e “tmerrshme”, të premten u dëshmua se tashmë treshen e “tmerrshme” në Kosovë e përbejnë tjerë persona. Tashmë Xhavit Haliti është zëvendësuar me Ramush Haradinajn, kryeministër të Kosovë.

Të premten, Ramush Haradinaj, Hashim Thaçi, së bashku me ish kreun e shërbimit famëkeq, SHIK, Kadri Veselin, tentuan që ta izolojnë Kosovën. Ata duke e ndjerë frikën që iu kanoset nga Gjykata Speciale, tentuan që ta shfuqizojnë atë.

Duke parë këtë nismë të të tre ish komandantëve të UÇK-së, për Kosovën u paralajmëruan ditë të errët e aspak të mira. Ishte pikërisht, ambasadori i shtetit më të fuqishëm në botë, aleatit kryesor të Kosovës, dhe më meritorit për çlirimin nga okupimi serb, SHBA-së ai që paralajmëroi Kosovën nëse këta tre komandantë do të arrinin të realizonin skenarin e tyre.

“Ideja për të ndryshuar Ligjin për Gjykatën Speciale mund të çojë në një izolim global të Kosovës. Mos e ktheni kohën prapa”, kishte shkruar ambasadori i SHBA-së, Greg Delawi në Twitterin e tij.

Po ashtu, edhe ambasadori Britanisë në Kosovë, Ruairi O’Connell, të premten paralajmëroi që nëse do të realizohej skenari i Thaçit, Haradinajt e Veselit, e premtja do të ishte nata më e rrezikshme për Kosovën dhe të ardhmen e saj.

“Kjo mund të jetë nata më e rrezikshme për Kosovën që prej luftës”, deklaroi ambasadori Ruairi O’Connell në Kuvendin e Kosovës. Por, kjo nuk i kishte ndalur treshen “shkatërruese” që të vazhdojnë drejt realizimit të planit të tyre. Madje, Thaçi i quante edhe spekulime paralajmërimet e ambasadorit amerikan dhe atij britanik.

Por, ambasadori amerikan nuk u ndal. Ai reagoi përsëri ndaj Thaçit. “Ne nuk kemi investuar aq shumë në përpjekjen e suksesit të Kosovës për ta parë atë të shkatërrojë të ardhmen duke e shfuqizuar ligjin e Gjykatës Speciale”, kishte shkruar ambasadori amerikan në Twitter për herë të dytë brenda pak orësh.

Por, treshja e “frikshme”, të premten u dorëzuan. Në mungesë të kuorumit, kryeparlamentari, ish udhëheqësi i SHIK-ut, Kadri Veseli, dështoi që thirr seancë të jashtëzakonshme, dhe kështu Kuvendi shkoi në pushim dimëror.

Kjo nismë e tre ish komandantëve nxiti reagime të shumta në mbarë opinionin publik në Kosovë, madje ata u quajtën edhe si treshja vetëshkatërruese e cila rrezikoi raportet me miqtë ndërkombëtar të Kosovës.

“Edhe një herë dje u kuptua se treshja (Thaçi, Veseli, Haradinaj) kur bëhen bashkë fuqia e tyre merr karakter shkatërues. U dëshmua se bashkë ata janë trillues deri në mashtrime, interesxhi deri në të paskrrupullt, të papërgjegjshëm deri në shtetshkatrim. Të tillë ishin dhe të tillë e dëshmuan se kanë mbetur. Të rrezikshëm më shumë se kurrë. Misioni i LDK-së mbetet i njëjtë, ta mbrojë Kosovën dhe qytetarin e saj nga këta njërëz dhe kjo mendësi”, kishte shkruar ish zëvendësministri nga LDK, Bajram Gecaj.

E veprimi i kësaj treshe, sipas ish ambasadorit të Kosovës, Lulzim Peci mund t’i jepte fund pavarësisë së Kosovës.

“Po më duket se tani politika kosovare nga joserioziteti është duke kaluar në cmendi. Nëse sillet në votim shfuqizimi i ligjit për Gjykatën Speciale, Kosova do të konsiderohet nga bashkësia ndërkombëtare si “rogue state” – shtet mashtrues dhe do të hyj në rang me Korenë e Veriut, Iranit dhe Serbisë se Millosheviqit të fillim 90-va të shekullit të kaluar. Nëse kjo bëhet, Gjykatën Speciale do ta rikthej Këshilli i Sigurimit i OKB-së, do të rikthehet në veprim fuqishëm rezoluta 1244 e OKB-së, dhe do të përfundoj tregimi i pavarësisë dhe sovranitetit të Kosovës për vitet në vijim. Sot, dëm më të madh vendit tonë është duke i bërë liderët politik të saj se sa vet Serbia e Rusia”, kishte shkruar Peci.

E kur kanë kaluar dy ditë që nga tentimi i Thaçit, Haradinajt e Veselit, sot në media u publikuan disa emra të cilët mund të jenë të akuzuarit e parë të Speciales.

“Mbi 60 ish-drejtues dhe ish-ushtarë të Ushtrisë Çlirimtare të Kosovës, do të akuzohen nga Zyra e Prokurorit të specializuar në Hagë, ka mësuar. Aktakuza e parë pritet të shpallet menjëherë pas shënimit të dhjetë-vjetorit të shpalljes së pavarësisë së Kosovës. Ish-komandanti i UÇK-së, Azem Syla është njëri nga të parët që pritet të akuzohet dhe ekstradohet në Hagë. Mes drejtuesve të lartë të UÇK-së, të akuzuar do të jenë edhe Shukri Buja, Sokol Dobruna dhe Daut Haradinaj. Nën hetime për krime të rënda janë edhe presidenti, Hashim Thaçi dhe kryeparlamentari, Kadri Veseli. Thaçi, për rolin e tij si kryeministër i Qeverisë së Përkohshme dhe anëtar i Shtabit të Përgjithshëm, derisa Veseli për rolin e tij si shef i Shërbimit Informativ të Kosovës (SHIK). Thaçi e Veseli nuk pritet të akuzohen në valën e parë”, shkruante sot insajderi.

Por, a është kjo arsyeja e nismës se Thaçit me shokë për shfuqizimin e Speciales?

Duke e ditur se Thaçi së bashku me shokë është ndër të përmendurit kryesor të raportit të senatorit zviceran, Dick Marty, atëherë është e kuptueshme frika e tyre, kur dihet se pikërisht mbi këtë raport është themeluar kjo gjykatë.

Po ashtu, Specialja do të merret edhe me vrasjet politike të zyrtareve të Lidhjes Demokratike të Kosovës. E në shumë raporte ndërkombëtare, Thaçi, akuzohet se urdhra për vrasjen e politikanëve të LDK-së.

Revista zvicerane “Weltëoche” në një numër të vitit 2015 ia kishe kushtuar zhvillimeve në Kosovë me një vështrim të veçantë për Qeverinë e krijuar nga koalicioni PDK – LDK.

“Perëndimi, ka qenë indiferent ndaj vullnetit të zgjedhësve kosovarë (për ndryshime politike). Ata bën presion që Lidhja Demokratike e Kosovës të formojë qeverinë me Thaçin. Këtë aleancë mes zjarrit dhe ujit shqiptarët e Kosovës e quajnë me cinizëm ‘Guns and Roses’. Është sekret publik që UÇK-ja e Thaçit dikur ka dhënë urdhra për vrasjen e politikanëve të LDK-së”, shkruan revista.

“Fakt është se Thaçi – i cili në vitet 90-të si azilant me banim në Dietikon ka punuar si argat në hekurudha – prej se ka ardhur në pushtet është pasuruar. Ai preferon të vishet me kostume të qepura vetëm për të. Thuhet se çdo veshje e tij është e qëndisur me monogram (iniciale të tij). Ekspertët e huaj të ekonomisë e akuzojnë se gjatë mandatit të tij si kryeministër i ka bërë rrush e kumbulla ish-ndërmarrjet shtetërore duke ua shitur nën vlerë njerëzve të besueshëm dhe miqve”, vazhdon WWewoche.

Po ashtu, pas paralajmërimit të Speciales, në media u ishte publikuar kohë më parë edhe një raport shokues i prokurorit të EULEX-it, për trazirat e Marsit të 2004-ës në Kosovë.

Sipas këtij raporti, prokurori Italian Danilo Cecareli ka fakte se udhëheqësit ishin ish eprorë të UÇK-së dhe njerëz me poste politike në atëkohë kishin nxitur këto trazira.

“Në fundin e vitit 2000 disa ish luftëtarë të UÇK-së krijuan një grup me qëllimin për të luftuar një luftë të fshehtë me qëllim të marrjes së kontrollit në të gjithë territorin e banuar me shqiptarë në Kosovë”, thuhet në dokumentin e siguruar nga kallxo.

Sipas raportit të EULEX, ky grup merrte urdhra nga krerë të lartë të UÇK-së, ku ata ishin të përfshirë në disa vrasje sulme terroriste, prita, rrëmbime dhe krime të tjera të renda.

“Grupi prej shtatë apo tetë personash besohet të jenë përgjegjës për sulmin ndaj një makine të policisë së UNMIK-ut ku po udhëtonin tre shtetas të Kosovës dhe një ndërkombëtar. Më 23 mars 2014 pjesëtarët e grupit ishin në fshatin Shtedime të Podujevës ku Agron Sylejmani (tani i ndjerë) bëri planin për të zënë në pritë një veturë të UNMIK-ut”, thuhet në dosjen e prokurorisë.

Sipas, këtij raporti shokues ky grup kishte armë dhe municione dhjetëra kallashnikovë pushkë të tjera martallozë 12.7mm, dhjetëra granata.

Duke marrë parasysh të gjitha këto, atëherë padyshim që mësohet edhe arsyeja e frikës së tre liderëve të Kosovës dhe arsyeja e tyre për shfuqizimin e këtij ligji, të cilin ata e shohin si rrezik për vetën e tyre.

Por, tashmë është e qartë që qëndrimi i kësaj treshe në krye të institucioneve shtetërore në Kosovë, padyshim që do të vazhdojë të rrezikojë raportet mes Kosovës dhe miqve ndërkombëtarë. Të premten, u pa qartë që Thaçi, Haradinaj e Veseli, para interesit shtetëror e kanë së pari atë personal.

E qëndrimi i kësaj treshe në pushtet, sipas ish ambasadorit Peci, tashmë nuk ka kuptim.

“Loja per kontrabandimin e zhberjes se ligjit per Gjykaten Speciale nuk ka perfunduar. Populli i Kosoves nuk bene te lejoj qe “truimvirati Hashim – Kadri – Ramush” te luaj bixhoz me te ardhmen tone. Nese deshirojne te luajne bixhoz, le ta bejne me veten e tyre, por jo me ne. Kjo treshe nuk ka kredibilitet qe te qendroj metutje ne krye te institucioneve te vendit. Jepni doreheqje dhe lejeni kete vend te marre fryme dhe te ece përpara”, ka shkruar Peci, përcjellë “Bota sot”.

Tashmë mbetet të shihet cilët janë hapat e radhës që do të ndjekin kjo treshe, pasi e kanë humbur betejën, por jo luftën! Ata do të tentojnë sërish të realizojnë skenarin e tyre./Bota sot

Shfuqizimi i Ligjit për Specialen do ta konfrontonte Kosovën me shtete mike

Të premten që lamë pas Kosova gati sa nuk rrezikoi marrëdhëniet me shtetet evropiane. E, krejt kjo për shkak të përpjekjes për shfuqizimin e ligjit për Gjykatën Speciale

Kryesia e Kuvendit të premten dështoi dy herë radhazi që të sigurojë kuorumin për shqyrtimin e kërkesës së 43 deputetëve nënshkrues, me të cilën kërkohej seancë e jashtëzakonshme për shfuqizimin e Ligjit për Dhomat e Specializuara dhe Zyrën e Prokurorit të Specializuar, që njihet si Gjykata Speciale.

Lidhur me këtë, njohës të çështjeve juridike thonë se për shfuqizimin e këtij ligji nuk mjafton vetëm një shumicë e thjeshtë, por nevojiten 2/3 e votave të deputetëve të Kuvendit të Kosovës.

Mazllum Baraliu, profesor i të Drejtës Kushtetuese, duke folur për Telegrafin, ka thënë se iniciativa për shfuqizimin e Ligjit për Gjykatën Speciale ishte befasuese, dhe se ky ligj nuk do të mund të votohej për të kaluar me shumicë të thjeshtë.

“Është mjaftë indikativ dhe befasuese se si dhe pse tani pas kaq vitesh vjen një iniciativë e tillë. Megjithatë kjo është iniciativë legjitime si nga ana e veteranëve përmes peticionit po ashtu edhe iniciativa e deputetëve, sepse është e drejtë e tyre është iniciativë legjitime e bazuar në rregullore. Mirëpo procedura për shfuqizimin është e njëjtë sikurse kur miratohen ligjet. Ky ligj, duhet domosdo t’i ketë dy të tretat e votave të Kuvendit, përndryshe nuk mund të procedohet më tutje “, ka thënë Baraliu.

Ai ka shtuar se fillimisht ka qenë dashur që një iniciativë e tillë të mendohej mirë, e pastaj të procedohej të analizohet e të diskutohet.

Profesor Baraliu ka theksuar se kjo gjë do të duhej dhe duhet të përfundojë në frymën kushtetuese dhe të ligjeve në fuqi.

Edhe profesor Smaka vlerëson se procedimi i këtij Ligji për shfuqizim do të shkaktonte konfrontimin e Kosovës me shtet të cilat janë mbështetëse të çështjes shqiptare.

“Aktet ligjore janë akte juridike të përgjithshme kudo dhe kurdo të cilat ju referohen të gjithë entiteteve natyrale apo qytetarëve pavarësisht dallimeve racore, etnike, gjinore etj. Me këtë rast Ligji aktual i problematizuar, juridikisht përmban jo pak defekte serioze. Mirëpo nga oportuniteti politik konsideroj se së paku në këtë etapë nuk do të duhej të procedohej propozimi për amendantime aq më pak për abrogimin e atij akti juridik ngase ndër të tjera do të konfrontoheshim me shtetet relevante të cilat ishin, janë dhe do të duhej të mbeteshin mbështetëse të çështjes shqiptare”, ka thënë Smaka për Telegrafi.

Ai tutje ka theksuar se pa mbështetjen e këtyre shteteve relevante jo që nuk do të mund të bënim progres, por do të vinte në pyetje statusi politik e juridik i vendit tonë, i cili, sipas tij, do të kontestohej heshtazi, por edhe shprehimisht në forma të ndryshme.

Kujtojmë se pas tentimit të së premtes nga ana e presidentit Hashim Thaçi, kryeministrit Ramush Haradinaj dhe kryeparlamentarit Kadri Veseli, që të arrijnë që këtë Ligj ta dërgojnë në Kuvendin e Kosovës për ta shfuqizuar, ka pasur reagime të shumta nga ana e zyrtarëve të lartë të shteteve të BE-së.

Ambasadori amerikan, Greg Delawie këtë tentim e ka quajtur ‘thikë pas shpine për SHBA-të’, duke thënë se revokimi i Gjykatës Speciale do të shënonte një pikë kthese për Kosovën.

Edhe ambasadori britanik, Ruairi O’Connell kishte deklaruar të premten që lamë pas se në rast se ky Ligj shfuqizohet do të jetë shumë keq për Kosovën.

Po ashtu edhe shefja e zyrës së Bashkimit Evropian në Kosovë, Nataliya Apostolova, kishte thënë se iniciativa e Kuvendit të Kosovës për ta shfuqizuar Ligjin për Dhomat e Specializuara dhe Zyrën e Prokurorit të Specializuar është tmerruese dhe jashtëzakonisht e dëmshme.

Kuvendi i Kosovës më 3 gusht të vitit 2015 pati miratuar me procedurë të përshpejtuar Ligjin për Gjykatën Speciale. Miratimi ishte bërë me shumicë votash, por pa pjesëmarrjen e partive të opozitës, të cilat atë kohë i bojkotuan punimet e Kuvendit. /Telegrafi/

Rrëfimi nga prapaskenat: Si nisi plani i rrënimit në një restorant në Prishtinë dhe kush e shkatërroi në fund atë

‘Plani’ që ishte dakorduar disa muaj më herët në njërën nga tavolinat e një restoranti të Prishtinës, ku të pranishëm ishin edhe politikanë të fuqishëm shqiptarë nga Prishtina e Tirana, persona me ndikim të huaj, që njihen si lobist amerikan, po ‘udhëtonte’ drejt realizimit krejt papritur të premten mbrëma

Nga darka e shoqëruar me verë e ushqim, kishte rrjedhur edhe plani i saktë dhe data kur ai do të implementohej, shkruan Gazeta Blic. Nëse gjithçka do të shkonte deri në detajin e fundit ashtu siç u planifikua, vikendi do ta gjente Kosovën në një fazë krejt të re dhe përplot të panjohura: pa Gjykatën Speciale, por me një ndarje të thellë, për herë të parë në historinë e shkurtër të shtetit tonë, me miqtë tanë ndërkombëtarë dhe më shumë pikëpyetje emergjente mbi të ardhmen e shtetit.

Lëvizja nuk ishte tërësisht e fshehur dhe aq konspirative sa ndokujt mund t’i dukej. Ishte e paralajmëruar, por njëkohësisht aq e madhe se edhe tërësisht e pabesueshme, shkruan Gazeta Blic.
‘Retë’ e besueshmërisë filluan të hapën pakëz vetëm 2 javë më parë, atëherë edhe kur depërtoi në media dhe u shpërnda gjithandej lajmi se Shoqatat e Veteranëve të Luftës së Ushtrisë Çlirimtare të Kosovës po mblidhnin nënshkrimet për shfuqizimin e Gjykatës Speciale.

Ligji ishte bërë gati dhe po mbahej brenda sirtarëve për t’u nxjerrë në momentin që do të siguroheshin votat për ta votuar në Kuvend. Kishte saktësisht aq rreshta sa duheshin- 2 dhe i pari anulonte Ligjin për Dhomat e Posaçme. Ndonëse heshturazi, përgatitjet për zbatimin e planit nuk ishin ndalur në asnjë moment. Derisa qytetarët, mediat e politikanët e papeshë, po numëronin votat nëpër lagje e skuta të Kosovës, në muajt që patëm në mes, gjithçka ishte bërë gati për të siguruar votat dhe të njoftuar ishin të gjithë ata që duhej të dinin.

Partnerët në Qeveri e dinin dhe ishin pro

LDK dhe lideri i saj, Isa Mustafa ishte i informuar dhe nga ai pritej që të mos ishte pengesë, VV po dobësohej nga brenda, ndërsa edhe nga ajo kishte pritje që të mos kundërshtonte shkatërrimin e Speciales, madje nëse për asgjë, për arsye krejt parimore. Image

Ambasadorët kryesor të Quintit, poashtu ishin në dijeni për këtë synim. Edhe ata e kundërshtonin, por nuk e besonin. Shpresonin se votat nuk ishin. Kryeministri dhe Presidenti disa herë u kanë thënë se Gjykata Speciale mund të suspendohet. Atëbotë, ata kishin të drejtë- jo të gjithë brenda koalicionit ishin për zhvlerësimin e Speciales- në këtë mes edhe disa nga figurat kryesore të PDK-së dhe AAK-së.

“Lobistët” nuk e kishin ndalur punën e tyre rreth dhe me Shtëpinë e Bardhë, nëse për asgjë tjetër, atëherë të paktën për ta shpjeguar veprimin dhe menaxhuar dëmin.

Deri këtu gjithçka shkonte në mënyrë të përsosur sipas planit të ideuar.

Kosova po ballafaqohej me anulimin e një të keqeje të ditur, përmes shkaktimit të një të reje, pasojat e së cilës nuk i dimë ende. Për herë të parë vendi po merrte një veprim që ishte në kundërshtim me Bashkësinë Ndërkombëtare. Kosova po e sfidonte kështu, hera e parë nga brenda, pavarësinë e saj.
Po e testonte nëse e kishte apo nuk e kishte dhe nëse do ta mbante.

Liderët e vendit, kush më shumë e kush më pak, ishin gati për këtë hap. Ishin gati për bastin e madh e me shumë të panjohura. Në tjetrën anë të tyre qëndronte vetëm një opsion- mbetja potenciale e vendit pa lidershipin aktual- me ndonje përjashtim. Sot lexojme gjithçka, por askush nuk i din emrat e saktë, asnjë aktakuzë nuk është gati, por gjithashtu askush nuk e ka helmetën e sigurise mbi kokë, shkruan Gazeta Blic.

Ajo çka dihet që në një formë apo tjetër do të trajtohen të gjithë udhëheqësit e luftës si dhe pushtetit të pasluftës. Disa të akuzuar, e të tjerët dëshmitarë- por askush nuk e di se kush në cilin grup bën pjesë. Të përjashtuarit nga akuza madje do të ishin edhe të dënuarit e parë- pa gjyq real, por me gjykimin e secilit, edhe të opinionit. Këta do të ishin të dënuarit e ndërgjegjës- tradhtarët e të pabesët e luftës dhe paqes. Ata që shokët i dorëzuan, për rehatinë e tyre.

Andaj, nuk kishin zgjidhje tjetër në mendjen e ture. Ruleti duhet të luhej. Vendi ishin ata, e ata ishin vendi- në sytë e tyre. Duhej vetëm kuorumi dhe pak vota- e ato besohej se tashmë ishin aty. Duhej edhe që Ambasadorët e Quintit, së paku ata më të rëndësishmit, t’i kenë paketuar valigjet dhe të ktheheshin në vendlindje për të festuar Krishtlindjen. Duhej zënë gafil ambasadorët kryesorë të Quintit- Ambasadori Amerikan, ai Britanik, Gjerman dhe Francez.

Të gjithë këta përfaqësues të shteteve që kanë jo vetëm fuqinë më të madhe globalisht, por edhe ndikimin më të madh kudo në Kosovë- edhe në Kuvend dhe jashtë tij. Veçanërisht duhej kurthuar Ambasadori i SHBA-ve, dhe atë për disa arsye. E para, sepse SHBA ishin dhe janë bartësit jo vetëm të shtetësisë së Kosovës, por edhe të themelimit të Gjykatës Speciale. Po të mos ishin ata, ajo nuk do ishte themeluar as së pari.

Nëse ktheni shiritin prapa, do të kujtoni se pasi dështoi herën e parë Ligji, ishte kthyer në Kuvend për rivotim brenda javës. Opozita po protestonte në rrugë, por nuk pati guximin ta përdorte Gazin Lotsjellës në atë seancë. shkruan Gazeta Blic.

Deputetët kishin marrë paralajmërime serioze se nuk guxojnë ta dështojnë miratimin e ligjit. “Mund t’i sjellim edhe Marinsat në Kuvend”, u kishte thënë disa deputetëve një mysafir anglishtfolës.

Arsyeja e dytë, ishte se me ndërrimet e fundit në Shtëpinë e Bardhë si dhe për shkak të krizave që kanë kapluar tërë botën, i vetmi përfaqësues i SHBA-ve në Kosovë është Ambasadori i saj. Nuk ekziston një vijë paralele, sikur janë mësuar shpesh liderët e Kosovës, dhe as autoritet tjetër perveç tij. Fjala e Ambasadorit Greg Delavie ishte fjala e SHBA në Kosovë, dhe e Kosovës në Amerikë.

Delaëie dhe të tjerët ishte parakusht që të mos ishin këtu, që të mos mund të parandalojnë gjë, por të reagojne pas aktit.

Ambasadorët nuk ikën, ndërsa premtuesit e tjerë, dhe këtu thyhet gjithçka. Mediat kryesore liberale u alarmuan e me këtë edhe opinioni publik dhe shoqëria Civile. Gjithçka ishte bërë aq në nguti e pa sens politik, sa që dukej si një “klandistenim” i institucioneve. Delawie ishte mbyllur në Kuvend dhe shumë aktiv në komunikim edhe me lidershipin, opozitën por edhe shoqërinë civile. Ai edhe fjalinë e ashpër “Thikë shpine ndaj Amerikës”.

E shoqëroi edhe më fuqishëm Ambasadori i Britanisë së Madhe, Ruairi O’Connelly, kur alarmoi: Kjo është nata më e rrezikshme për Kosovën që nga koha e luftës. Nga jashtë gjithçka dukej sikur fati i të gjithëve po vendosej në rrezik. Deputetët që nënshkruan marrëveshjen dhe shefat që po tentonin të organizonin votimin e shkatërrimin e Speciales, ngjanin me disa Zombie që kishin mësyer shkatërrimin e vendit. Filluan edhe peticionet nga oponionistët, udhëheqës mediash e të Shoqërisë Civile, që ftonin të mos luhej me fatin e vendit.

Atmosfera ishte kundër, armiku i vendit ishte brenda dhe i identifikuar. Kjo filloi jo vetëm ta zhdukë kuorumin që duhej ndërtuar përmes opozitës por edhe votën e partnerëve.

U bë refuzues Isa, u fut në konfuzion VV-ja, si dhe filluan të tërhiqen edhe partnerët

Ndërroi veprim Limaj, ndërsa Pacolli pas bisedave të tërthorta me Ambasadorët kishe përmendur edhe daljen nga Qeveria. Të gjithë përveç Ramushit, qe mbeti edhe kësaj radhe peng i fjalës së dhënë. Dhe Presidentit të Kosovës- atij që opinioni e sheh njejtë si kur është për ashtu edhe kundër Gjykatës Speciale. Atij që opinioni i sheh gjithçka si përpjekje personale.

Beteja e Presidentit megjithatë nuk ka mbaruar

Funksionimi i Gjykatës Speciale, nuk do të jetë i njëjti më asnjëherë, edhe nëse Kuvendi nuk e nguc asnjëherë. Tërheqja nga ajo e partnerëve themelues, do të ketë pasoja në potencën e saj. Pushtetet dhe të pushtetshmit, zor që mund të konsiderohen ata që mbajnë në këmbë atë. Kjo paraqet një ndryshim edhe për faktorët kryesorë ndërkombëtarë. Partnerët e tyre sot janë opozita, mediet, shoqëria civile- pra qytetari i Kosovës.

Deri këtu, i kishin të pushtetshmit, tash i kanë të izoluarit edhe të tyre. Të burgosurit e pafajshëm, qytetarët e Kosovës – që duhet liruar nëse për asgjë tjetër- sepse ishin ata që shpëtuan Kosovën që kurrë nuk ishte më e rrezikuar, sikur e thanë ata vetë.