Abazi, kërkon nga kryeprokurori që ta arrestojë Presidentin, Hashim Thaçi

Analisti dhe njohësi i zhvillimeve politike në Kosovë, Haki Abazi, kërkon nga kryeprokurori që ta arrestojë Presidentin, Hashim Thaçi

Kuvendi i Kosovës, gjatë ditës së djeshme me votat e deputetëve miratoi rezolutën e propozuar nga Lidhja Demokratike të Kosovës, në të cilën parashihet që të themelohet një komision parlamentar hetimor lidhur me arrestimin e dhe dëportimin e 6 shtetasëve turq nga Kosova, të konsideruar nga shteti turk si “Gylenistë”.

Ky komision hetimor, do të merret edhe më hetimin e presidentit të vendit, dhe në rast se ka tejkaluar kompetencat e parapara me kushtetutë, atëherë deputetët nga subjektet opozitare do të dërgojnë Thaçin në Gjykatë Kushtetuese me qëllimin që ta shkarkojnë nga posti i të parit të vendit.

Por, sa mund të ndodhë një gjë e tillë? A mund të shkarkohet Thaçi nga posti i presidentit? Lidhur me këtë, analisti dhe njohësi i zhvillimeve politike në Kosovë, Haki Abazi, thotë se kryeprokurori duhet ta arrestojë Thaçin.

Abazi ka treguar se çfarë sinjali do t’i dërgohej botës me këtë. “Ajo që duhet bërë mendoj është që parlamenti të kërkojë nga kryeprokurori që të arrestojë Thaçin për këtë shkelje kushtetuese sepse në këtë formë do të ruhen përcaktohet njëherë e mirë standardi i respektimit të ligjeve dhe kushtetues, do te përmirësohej në masën që lejon situata e krediblitetit të shteti ndaj respektimit e konventave ndërkombëtare, do te dërgohej sinjali në Bruksel dhe Uashington por edhe shtetet tjera se Kosova është e përkushtuar në respektimin e proceseve integruese dhe nuk lejon qe askush te luaj me perspektiven e saj euroatlantike”, ka thënë Abazi për gaztën “Bota sot”.

Sipas tij, në kuvend duhet të unifikohen qëndrimet dhe që Kuvendi mos të lejojë tejkalimin e kompetencave nga askush. “Përkundër faktit që është e qartë tanimë që Thaçi ka qenë planifikuesi dhe urdhërdhënësi për kapjen e qytetarëve Turq, mendoj është e mire që të formalizohet procesi, të unifikohen qëndrimet në parlament dhe te bëhet e qartë që parlamenti nuk do të lejojë abortimin e institucioneve dhe kalimin e kompetencave të askujt. Kosovës dhe zbatuesve të ligjit nuk duhet të ju interesojë se si janë marrëdhëniet ndërmjet partive politike dhe fraksioneve të ndryshme nëpër botë përfshirë këtu edhe Turqinë”, shprehet Abazi.

“Njerëzit e zgjedhur dhe ata që paguhen nga taksat qytetare janë të obliguar me ligj të zbatojnë ligjin. Unë mendoj që hetimet duhet të zgjerohen në drejtim të: Thaçit, Lekaj, Ministrit të Punëve të Brendshme, Drejtorit të policisë ne veçanti dhe drejtorit të AKI”, përfundon Abazi.

Rashiti tregon skenarët për marrëveshjen përfundimtare Kosovë-Serbi

Drejtori i Grupit Ballkanik për Politika, Naim Rashiti, ka folur për skenarët për marrëveshjen përfundimtare Kosovë-Serbi

Rashiti, në Express Intervistën në KTV ka thënë se është duke punuar që dialogu të jetë funksional dhe si përfundim të nxirret një konsensus.

“Janë procese të ndara, 1 është e vitit 2013 që ish dashtë të implementohet deri tani, por kjo marrëveshje ka ngecë dhe është e vështirë të shkohet pjesë pas pjese, copëza copëza me Serbinë. Edhe BE-ja thotë se marrëveshje të tilla nuk përmirësojnë marrëdhëniet Kosovë-Serbi”, tha ai.

Rashiti ka shtuar se janë tri grupe skenarësh në të cilat po punojnë, është pasqyrim i percepsionit që përfshinë intervista me politikanë, shoqërinë civile, etj.

“Qytetarët nuk janë të interesuar që ky dialog të vazhdojë në këtë formë si deri tani”, tha ai.

Në kuadër të këtij skenari, Rashiti thotë se me një traktat paqe me Serbinë do siguronte anëtarësimin e Kosovës në OKB, natyrisht edhe në BE e në NATO.

“Të intervistuarit tanë shprehen të brengosur se nëse s’ka marrëveshje me Serbinë, mund të ketë edhe hapje të opsioneve tjera, si psh, shkëmbimi i territoreve, apo ndarja”, tha ai.

Rashiti ka thënë se edhe Kosova duhet të mos heqë dorë shpejt në lidhje me dialogimin me Serbinë.

“Është proces i komplikuar, e ndoshta më i komplikuar se pavarësia e Kosovës”, tha ai.

“Marrëveshja përfundimtare duhet të jetë shumë e hapur. Perëndimi nuk po vendos njohje. Serbisë me automatizëm po i bëhet favor i madh. I mbetet Prishtinës se çka duhet të vendosë në tavolinë”, tha tutje ai.

Rashiti shtoi se do të ketë presion mbi institucionet që këto tema për dialog të vendosen sa më parë në tavolinë.

Rashiti ka thënë se dialogu ka kaluar në nivel presidentësh vetëm për shkak të emrit të Vuçiqit, dhe ka thënë se presidenti Thaçi se ka fuqinë e njëjtë si ai.

“Në Kosovë është më pak i rëndësishëm formati. Ekipet duhet të jenë të pranueshme sikur që janë në parlament. Ky dialog i ardhshëm do jetë më intensiv dhe do përfshijë shumë fusha, struktura e njerëz dhe jam i bindur se liderët do të mendojnë për një formë konsensusi”, tha ai.

Rashiti ka thënë se ka parë gatishmëri nga liderët, dhe beson se do të ketë përparim në marrëveshjen përfundimtare Kosovë-Serbi. “Modeli i Vjenës nuk funksionon më. Tani do ndahen përgjegjësitë, do ketë ekspert të involvuar”, tha ai.

Rashiti ka thënë se nuk e di nëse ky dialog do të udhëhiqet nga Thaçi, por ai nuk do të jetë vendimmarrës pasi do jetë strukturë më e gjerë, dhe se tani pritet të formohet një konsensus, çka nuk është bërë deri tani. “Të gjitha subjektet politike duan të kenë dorë në këtë skenar”, tha për fund Rashiti.

Brukseli ia jep 4 muaj afat Kosovës për hartimin e statutit të Asociacionit

Presioni i Brukselit ndaj institucioneve të Kosovës vazhdimisht po rritet sa i përket Asociacionit të Komunave me Shumicë Serbe. Kësaj radhe, Burkesli i ka caktuar afat palës kosovare se kur duhen ta hartojnë statutin e këtij Asociacioni

Në faqen zyrtare të saj, Bashkimi Evropian vlerëson se njoftimi i Kryeministrit Ramush Haradinaj për dhënien e mandatit ekipit menaxhues për hartimin e Statutit të Asociacionit -Komunitetit të komunave me shumicë serbe në Kosovë është shumë i mirëpritur.

“Procesi i hartimit të Statutit ka filluar dhe do të bëhet brenda një afati kohor prej katër muajsh.

Ky hap i shumëpritur lejon zbatimin e Marrëveshjes së Dialogut mbi Shoqatën / Komunitetin e komunave me shumicë serbe, e cila është një detyrim që Kosova ndërmori në dialogun e lehtësuar të BE-së, marrëveshjet e Brukselit të Prillit 2013 dhe Gusht 2015”, thuhet në njoftimin e tyre.

BE thekson se do të ftojë Kryenegociatorët nga Beogradi dhe Prishtina, ekipet e tyre, Ekipin Drejtues dhe ekspertët teknikë për diskutime në Bruksel, për t’u angazhuar në mënyrë konstruktive dhe me mirëbesim në procesin e hartimit.

Serbia pjesë e hartimit të statutit të Asociacionit, negociatat zhvillohen në Bruksel

Pala kosovare është mbështetur për muri nga presioni i Brukselit dhe Beogradit për formimin e Asociacionit të Komunave me shumicë Serbe. Brukseli ka bërë me dije se negociatorët nga Prishtina dhe Beogradi do të ulen në Bruksel për ta hartuar statutin e Asociacionit të Komunave me Shumicë serbe për të cilin Serbia dhe Beogradi ishin marrë vesh 5 vjet më parë

Pala kosovare e ka zvarritur gjatë krijimin e Asociacionit të Komunave me shumicë serbe, statuti i të cilit mendohej se do të hartohej nga institucionet në Kosovë.

Por, tani që Serbia e ka bërë të madhe këtë punë, duke e kushtëzuar edhe pjesëmarrjen e saj në samitin e Sofjes me themelimin e Asociacionit dhe duke pasur parasysh ultimatumin e Listës Srpska se do ta themelojnë vetë nëse institucionet nuk bëjnë lëvizje deri më 20 prill, në Prishtinë të gjithë po nguten.

Në Kosovë ka qëndruar zyrtarja e lartë e BE-së, Angelina Eichhorst, e cila përfundimisht e ka bindur palën kosovare që ta shtyjë përpara këtë çështje. Ajo po ashtu ka njoftuar se Beogradi do të jetë pjesë e hartimit të statutit.

“Ne tash do të ftojmë kryenegociatorët nga Beogradi dhe Prishtina, ekipet e tyre, si dhe Ekipin Menaxhues dhe ekspertët teknikë për diskutime në Bruksel dhe të angazhohen në mënyrë konstruktive dhe me mirëbesim në procesin e hartimit”, ka thënë Eichhorst.

E presidenti Hashim Thaçi i cili është aktori kryesor i këtyre negociatave nga pala kosovare, e ka involvuar edhe Ramush Haradinajn, kryeministrin aktual, në këtë proces.

Mbrëmë Zyra e Kryeministrit ka njoftuar se e ka aktivizuar “ekipin menaxherial që do ta draftojë statutin për Asociacionin e Komunave Serbe”, por aty nuk thuhet se gjithçka do të ndodhë në Bruksel dhe me involimin e Beogradit.

“Draftimi i statutit do të jetë një proces transparent dhe gjithëpërfshirës, i cili do të përbëhet nga 3 mekanizma punues: Ekipi menaxhues, Komiteti zbatues si dhe Grupi nacional konsultativ, të cilët do të garantojnë përfshirje të gjithë spektrit politik, shoqërisë civile dhe mekanizmave të tjerë relevant të shoqërisë”, thuhet në njoftim.

Aty, po ashtu, theksohet se në këtë proces do të jenë të përfshirë edhe mekanizma ndërkombëtarë, “të cilët e kanë ndihmuar Kosovën në të gjitha fazat dhe ky do të jetë një hap i rëndësishëm i Kosovës në rrugën e saj të integrimeve euro-atlantike”.

E Haradinaj si njëri nga kundërshtuesit e “Zajednicës”, është kujdesur që në njoftimin për media të theksojë se drafti i statutit të Asociacionit do të dërgohet në Gjykatën Kushtetuese.

Kurti ia ndanë kafshatën e tij Haradinajt! (foto)

Pavarësisht se janë kundërshtar politik, si duket kur bëhet fjalë për ushqim kjo nuk e pengon aspak kreun e lëvizjes “Vetëvendosje”, Albin Kurti, raporton “Zeri.info”

Kurti është njëri prej opozitarëve më të zëshëm e më kritikues karshi kreut të ekzekutivit, Ramush Haradinaj, por sot ky gjest i tij është mjaft befasues.

Madje vetë Haradinaj është befasuar nga ky gjest, pasi që fillimisht ai kishte ngrënë krosanët e tij, Haradinaj ishte aq i uritur sa që e pyeti Kurtin nëse mund të hante edhe krosanët që ishin të servuar për të.

E tërë kjo ngjarje ndodhi sot në konferencën “Skenarët e ‘Finales së Madhe’ ndërmjet Kosovës dhe Serbisë”, të organizuar nga RIDEA dhe mbështetur nga Ambasada e Norvegjisë.

Për më shumë shikoni fotografitë e mëposhtme:

LDK kërkon nga degët të përgatiten për zgjedhje të parakohshme

Lidhja Demokratike e Kosovës ka kërkuar nga strukturat e degëve t’i intensifikojnë përgatitjet për zgjedhjet e parakohshme

LDK përmes një njoftimi për media thekson se sot gjatë një takimi me kryetarët e degëve të LDK-së, u vlerësua edhe një herë se vendi ka hyrë në krizë të thellë institucionale dhe politike.

“Është e qartë se qeveria e pakicës nuk mund të udhëheqë me vendin dhe se temat e rëndësishme për vendin nuk mund të adresohen nga një qeveri e rënë. Kryetarët e Degëve kanë intensifikuar përgatitjet për zgjedhjet e parakohshme”, thuhet në njoftim.

Më tej thuhet se në ditët në vijim, Kryesia e LDK-së do të jenë në secilën degë të LDK-së për të komunikuar me strukturat e degëve dhe për të intensifikuar përgatitjet për zgjedhje.

“Degët e LDK-së janë të gatshme t’i nënshtrohen procesit zgjedhor dhe janë të bindur në mbështetjen e qytetarëve”, thuhet në njoftim.

Rama pezullon taksën rrugore

Mijëra qytetarë nga e gjithë Shqipëria kanë dalë të enjten në protestat e thirrura nga opozita shqiptare për mosbindje civile, duke bllokuar katër akse rrugore nacionale

Protestuesit, bashkë me krerët opozitarë, Lulzim Basha nga Partia Demokratike e Shqipërisë dhe Monika Kryemadhi nga Lëvizja Socialiste për Integrim kanë bllokuar rrugët kryesore në Vorë, Milot, Çermë të Lushnjës dhe në Bradashesh të Elbasanit, nyjet kryesore që lidhin të gjitha anët e vendit me kryeqytetin e Tiranës.

Policia e Shqipërisë përmes një njoftimi për media ka bërë të ditur se nuk ka marrë njoftim ligjor për protestën e së enjtes dhe nuk do të “lejojë protesta të askujt, që në emër të lirisë së tubimit, cenojnë lirinë e sigurinë e të tjerëve”.

Qindra person në Elbasan përveç bllokimit të rrugës kanë djegur edhe goma.

Megjithatë, protesta përfundoi e qetë dhe protestuesit u shpërndan pasi në përpjekje për ta qetësuar situatën e tendosur në vend, kryeministri Edi Rama, gjatë seancës plenare në Kuvendin e Shqipërise e cila po mbahej në kohën e njejtë me protestën, ka bërë të ditur se pagesa e tarifës nuk do të aplikohet deri sa të gjendet një zgjidhje për banorët e asaj zone.

“Nuk do të fillojmë sistemin e pagesës pa pasur zgjidhjen më të mirë të mundshme për atë zonë”, tha Rama.

Kryeministri pranoi se qytetarët e zonës veriore të Shqipërisë kanë nevojë për lehtësim sa i përket pagesës në Rrugën e Kombit.

“Është një punë e vështirë të parashikohet gjithçka përpara, pa pasur shifrat e gjashtëmujorit të parë, por ne ia detyrojmë këtë të gjithë njerëzve të asaj zone dhe duke bërë më të mirën e mundshme do të arrijmë të lehtësojmë barrën e tyre dhe ta bëjmë të funksionojë sistemi”, u shpreh Rama.

Mirëpo kreu opozitar, Lulzim Basha tha se kryministri shqiptar duhet ta heqë taksën tërësisht dhe kërkoi lirimin e të arrestuarve.

“Po përpiqet të fitojë kohë, se është në presion, dhe pastaj t’i godasë nga prapa. Jemi për të kërkuar lirimin e të gjithë të arrestuarve, jemi për t’i dhënë fund një regjimi që ka rrënuar shtetin. Reagimet e Ramës përveçse janë të pabesueshme nuk zgjidhin thelbin e problemit. Taksa të anulohet tërësisht”, tha Basha.

Edhe Monika Kryemadhi, nga LSI, tha se me pezullimin e pagesës së tarifës, Edi Rama kërkon të fitojë kohë dhe ajo që ai duhet të bëjë tani “është të lirojë kuksianët që mbahen në burg për protestën”.

“Ai kërkon të fitojë kohë, si frikacak që është dhe për të krijuar apologjinë për t’u takuar me kuksianët dhe me popullin. Kur ai është në hall thotë të tilla gjëra. Ajo që duhet të bëjë është të lirojë kuksianët”, u shpreh Kryemadhi.

Protesta e së enjtes vjen pas protestës të së shtunës në Rrugën e Kombit, ku qindra qytetarë, duke kundërshtuar tarifën rrugore prej 5 eurosh, i vunë flakën sporteleve ku bëhet pagesa.

Njëzetetre nga protestuesit u arrestuan, 11 prej te cilëve vazhdojnë të mbahen në burg.

Protesta e së enjtes në këto katër akse rrugore fillimisht u organizua si kërkesë për heqjen e taksës, por u përcoll më pas me kërkesën për lirimin e të arrestuarve dhe rënien e Qeverisë Rama.

Prishtina kërkon epilogun e dialogut me Beogradin këtë vit

Vazhdimi i dialogut ndërmjet Kosovës dhe Serbisë është i domosdoshëm për arritjen e normalizimit të marrëdhënieve, kanë vlerësuar udhëheqësit më të lartë të shtetit të Kosovës. Por, njëkohësisht është theksuar se nuk ka shumë vullnet te pala serbe për një marrëveshje ndër shtetërore, kurse janë ngritur edhe dyshime tek lehtësuesi i procesit të dialogut, përkatësisht tek Bashkimi Evropian, i cili është kritikuar për zvarritje të skajshme të procesit

Presidenti Hashim Thaçi tha se Kosova mbetet e vendosur për vazhdimin e dialogut, i cili sipas tij, duhet të përmbyllet me një marrëveshje dhe njohje reciproke. Këto komente, Thaçi i bëri në konferencën “Skenarët e ‘Finales së Madhe’ ndërmjet Kosovës dhe Serbisë”, të organizuar nga Instituti Kërkimor për Çështje Evropiane dhe të Zhvillimit dhe Grupi për Hulumtim të Politikave në Ballkan.

“Në aspektin kohor, edhe në bazë të terminologjisë së përdorur në ‘Strategjinë për zgjerimin e BE-së’, flasim për një urgjencë në arritjen e marrëveshjes ligjërisht obliguese në mes të Kosovës dhe Serbisë”, theksoi presidenti i Kosovës, i cili kërkoi edhe unitetin e palës kosovare në bisedimet me Serbinë.

“Urgjenca për ne dhe për Brukselin, e le të shpresojmë edhe për Beogradin, nënkupton që ky vit të jetë kornizë kohore për nënshkrimin e kësaj marrëveshjeje. Sa i përket përmbajtjes së vetë marrëveshjes, ajo tashmë njeh një ‘kod’ të vetin politik dhe diplomatik, me titullin e një ‘marrëveshjeje ligjërisht obliguese’. Për ne në Kosovë, kjo marrëveshje ka peshën e njohjes reciproke në mes të Kosovës dhe Serbisë dhe normalizimin e plotë të marrëdhënieve në mes të dy shteteve”, tha Thaçi.

“Kjo marrëveshje, pastaj me terminologjinë e saj precize dhe të qartë do të duhej të mundësonte që Kosova të bëhej shtet anëtar i OKB-së, i OSBE-së dhe i të gjitha organizatave ndërkombëtare”, tha presidenti i Kosovës.

Marrëveshja ligjërisht obliguese në mes të Kosovës dhe Serbisë, sipastij, do të duhej t’i sillte Kosovës edhe njohjen nga pesë shtetet e BE-së, si dhe një dinamikë të përshpejtuar të anëtarësimit të Kosovës në BE dhe në NATO.

Sipas presidentit të Kosovës, kohët e fundit është dëshmuar se ka gjithnjë e më pak durim për të vazhduar dialogun në Bruksel pa një vizion të qartë për finalen e tij.

“Kur flasim për dialogun e pakryer të Kosovës dhe Serbisë, është gjithashtu e vërtetë që ka gjithnjë e më pak durim për të zhvilluar tutje bisedime në Bruksel, pa një afat të qartë kohor për rrumbullakimin e tyre, pa një synim të qartë se çfarë përmbajtje duhet të ketë marrëveshja në mes të dy shteteve, pa mekanizmat e qartë ndërkombëtarë që do të garantojnë zbatimin e kësaj marrëveshjeje”, nënvizoi Thaçi.

“Korrektimi i kufijve bart rreziqe që të gjithë i dimë, prandaj nuk do të futem të detaje”, tha presidenti Thaçi.

Kurse kryeministri Ramush Haradinaj tha se BE-ja si lehtësuese e bisedimeve po e udhëheqë këtë proces shumë ngadalë. Ai kërkoi nga Brukseli që të kërkojë ndihmë, duke aluduar në Shtetet e Bashkuara të Amerikës, nëse nuk ka kapacitet për ta përmbyllur çështjen e dialogut Kosovë-Serbi.

“Energjia e madhe e Uashingtonit që ka ekzistuar për ta ndaluar luftën, tani është deleguar te evropianët, e këta të fundit, siç janë të ngadalshëm e të ndarë, po e ngadalësojnë këtë proces”, tha Haradinaj.

Me këtë rast, kryeministri i Kosovës shprehu shqetësimin pse edhe pas dy dekadash çështja e dialogut ndërmjet Kosovës dhe Serbisë vazhdon të mbetet e hapur. Ai tha se “nuk duhet të na vijë turp për t’ju thënë hapur se nëse nuk kanë kapacitet të kërkojnë ndihmë”.

“Nëse Brukseli zyrtar nuk ka kapacitet për ta mbyllur këtë temë le të kërkojë ndihmë, ose nëse nuk dëshiron ndihmë, të na tregojë se çka të bëjmë ne dhe ne shkojmë në drejtimin tonë ashtu sikur kemi ditur ta bëjmë në të kaluarën”, theksoi kryeministri Haradinaj.

Ndërkohë, njëri nga liderët opozitar, Albin Kurti, kryetar i Lëvizjes Vetëvendosje tha se Beogradi synon ndarjen e Kosovës. Sipas tij, Kosova nuk duhet të lëshojë pe në marrëveshjet me Serbinë, për të siguruar që në të ardhmen të ketë një ulëse në OKB, apo në ndonjë organizatë tjetër.

“Prioritet për Kosovën duhet te jetë bashkimi i Mitrovicës. Nuk po them që ulësja në OKB është e parëndësishme, por më e rëndësishmja është bashkimi i Mitrovicës. Nuk duhet që në kurriz të normalizimit të marrëdhënieve me Serbinë, ta braktisim normalizimin e Kosovës”, theksoi Kurti.

Në konferencë kanë marrë pjesë edhe përfaqësues ndërkombëtar, ndër ta edhe ambasadori amerikan në Prishtinë Greg Delawie.

Ky i fundit tha se falë dialogut ka ndodhur integrimi i sistemit të drejtësisë në veri të Kosovës siç ka ndodhur edhe integrimi i policisë. Por, ka nënvizuar ai, kohët e fundit vërehet një lloj lodhje nga dialogu.

“Dialogu nuk ka alternativë. SHBA mbështet aspiratat e Kosovës dhe Serbisë për t’iu bashkuar BE-së. Këtë vit duhet të bëhet përparim në dialog”, theksoi Delawie.

Po ashtu, në debat rreth çështjes së dialogut janë përfshi edhe përfaqësues të subjekteve politike, publicistë dhe njohës të zhvillimeve politike në Kosovë.

Dialogu ndërmjet Kosovës dhe Serbisë zhvillohet në dy nivele, atë politik, ku delegacionet përfaqësohen nga presidentët e shteteve apo kryeministrat, dhe niveli teknik, që zhvillohet përmes ekipeve të ekspertëve, ministrave dhe përfaqësuesve të institucioneve nga të dyja shtetet.

Fillimisht, bisedimet nisën me takimet në nivelin teknik në mars të vitit 2011. Por, ndërkohë, po me lehtësimin e Brukselit, u iniciuan edhe takimet në nivelet më të larta politike.

Ndër marrëveshjet e para ka qenë ajo për Menaxhimin e integruar të kufirit apo për lëvizjen e lirë.

Kosova dhe Serbia, ndërkaq kishin arritur marrëveshjen e parë për normalizimin e marrëdhënieve në prill të vitit 2013, e cila, ndër tjera, parasheh edhe formimin e Asociacionit të komunave me shumicë serbe. Krahas asaj marrëveshje, Kosova dhe Serbia kanë nënshkruar edhe marrëveshje tjera, si atë për energjinë, lëvizjen e lirë, njohjen e diplomave universitare, atë për tabelat e automjeteve, marrëveshjen për menaxhim të integruar të kufirit e të tjera.

Akuza e fortë nga SHBA, si e kapi Rama me ndihmën e Sorosit Reformën në Drejtësi. Cili ishte roli i ambasadorit Lu?

Judical Watch publikon materiale nga DASH të cilat tregojnë se administrata e Obamës ka ndihmuar me fonde aktivistët politikë të George Soros në Shqipëri. Kjo dosje ka të dhënë të shumta në lidhjet me financimet e SHBA nëpërmjet Soros, për të mbështetur të majtën Shqiptare, duke përfshirë punën me qeverinë socialiste të vendit për të nxitur shumë reforma gjyqësore

Të dhënat gjithashtu tregojnë se si operacioni Soros ndihmoi Departamentin e Shtetit të rishikojë aplikimet për grant nga grupe të tjera për financimin e taksapaguesve. Të dhënat u gjetën në një padi të 26 majit 2017, për Lirinë e Informacionit kundër Departamentit Amerikan të Shtetit dhe Agjencisë Amerikane për Zhvillim Ndërkombëtar (USAID) pasi të dy Departamenti i Shtetit dhe USAID nuk arritën të përgjigjen më 31 mars 2017.

Dokumentet e reja tregojnë se fondet e USAID-it u kaluan përmes projektit të Shoqërisë Civile të Agjencisë për të mbështetur fondacionet e krahut të majtë të Soros në Shqipëri, veçanërisht përpjekjet e operacionit Soros për t’i dhënë qeverisë socialiste kontroll më të madh të gjyqësorit.

USAID thuhet se ka dhënë 9 milionë dollarë në vitin 2016 në fushatën “Drejtësia për të gjithë”, e cila mbikëqyret nga një institut i Sorosit.

Në mars të vitit 2017, një grup prej gjashtë senatorësh amerikanë të udhëhequr nga senatori Mike Lee i dërgoi një letër sekretarit të shtetit të atëhershëm Rex Tillerson duke kërkuar që të hetojë akuzat se qeveria amerikane po përdorte fonde të taksapaguesve për të ndihmuar Sorosin në Shqipëri

Sipas letrës së dërguar shkruhej: “Fondacioni Open Society-Albania dhe ekspertët e saj, me financim nga USAID, kanë krijuar Dokumentin e diskutueshëm Strategjik për Reformën Gjyqësore Shqiptare. Disa liderë besojnë se këto ‘reforma’ kanë për qëllim t’i japin Kryeministrit dhe qeverisë së qendrës së majtë kontroll të plotë mbi gjyqësorin. Në parlamentin shqiptar, liderët e opozitës e kanë quajtur Strategjinë” një reformë e sponsorizuar nga Soros”.

Të dhënat e reja të nxjerra nga Judicial Watch përfshijnë një memo të Prillit 2016 nga Ambasada e SHBA në Tiranë që tregon se ambasada ka “sponsorizuar” një anketë bashkë me Fondacionin e Shoqërisë së Hapur të Soros për të matur “njohjen, suportin dhe pritshmëritë” e qytetarëve shqiptarë për “reformën në drejtësi”. Grupi Soros ka raportuar se “91% e pjesëmarrësve në anketë ose e “mbështesin plotësisht” apo “e mbështesin deri diku” nevojën për një reformë në drejtësi.” Anketa nuk specifikon llojin e reformës që grupi Soros kish pyetur të intervistuarit e anketës.

Gjithashtu, të dhënat që datojnë në Shkurt 2017 kanë treguar se Departamenti Shtetit ka përdorur paratë e taksapaguesve për të bashkë sponsorizuar një anketë të dytë me Fondacionin Shoqëria e Hapur mbi Reformën në Drejtësi që do të ngurtësonte esencialisht kontrollin e të qeverisë të majtë mbi këtë reformë. Raporti nënvizon se Drejtoria e Marrëdhënieve me Publikun në Ambasadën e SHBA dhe Fondacioni Shoqëria e Hapur “kanë siguruar fonde për një organizatë lokale që të udhëheqë një anketim të opinionit publik në lidhje me përpjekjet për Reformën në Drejtësi.”

Të dhënat gjithashtu dëshmojnë se Departamenti Shtetit i ka dhënë organizatës Soros një input të drejtë për drejtë në raport me programin e saj në Shqipëri. Raporti i 10 Shkurtit 2017 në lidhje me “Engagement With the Open Society FoundationforAlbania” nënvizon se “Si një prej asistentëve më të mëdhenj në Shqipëri, përfaqësuesit e Fondacionit për Shoqëri të Hapur u është kërkuar shpesh që të marrin pjesë në rishikimet teknike të aplikimit për fonde që ne kemi marrë.”

Ambasadori i SHBA në Shqipëri, Donald Lu, një diplomat i periudhës së administratës Obama, ka qenë i lidhur ngushtësisht me Soros dhe me qeverinë Shqiptare. Në maj 2017, Lu ka ndihmuar minimin e iniciativës së opozitës shqiptare për të bojkotuar zgjedhjet parlamentare duke deklaruar se SHBA do t’i njohë zgjedhjet dhe rezultatin e tyre edhe nëse opozita refuzon të marrë pjesë. Lu është përshkruar në shtypin e SHBA si “një forcë që po drejton reformën në Shqipëri.”

“Adminsitrata e Obamas ka shpenzuar më së paku 9 milion USD nga taksat e amerikanëve për të paguar në mënyrë të kundraligjshme në mbështetje të qeverisë së majtë në Shqipëri që gëzon mbështetjen e bilionerit GeorgeSoros. Kjo sjellje e DASH që ka sponsorizuar me paratë e taksapaguesve dëshirat e Soros është e patolerueshme,” u shpreh presidenti JudicialWatch, Tom Fitton. “George Soros është një bilioner dhe nuk ka përse të marrë paratë e taksapaguesve si ndihmë për të vazhduar agjendën e tij të radikalizmit të majtë dhe kështu të minojë lirinë në SHBA apo në botë.”

Në një çështje të ngjashme, Judicial Watch po kërkon informacion në lidhje me aktivitetin e Soros në Maqedoni, Rumani dhe Kolumbi.

BURIMI: https://www.judicialwatch.org/press-room/press-releases/judicial-watch-doj-records-show-obama-administration-helped-fund-george-soros-left-wing-political-activities-albania/

Judicial Watch: Obama ndihmoi aktivistët e majtë të Soros në Shqipëri

Judicial Watch, një grup aktivist konservator, që mbikëqyr dhe investigon sjelljen e qeverisë amerikane, ka arritur në përfundimin se administrata e ish-presidentit Obama ka ndihmuar aktivistët e majtë në Shqipëri

Judicial Watch ka marrë të dhënat nga 32 faqe që dëshmojnë se administrata Obama i ka dërguar paratë e taksapaguesve amerikanë një grupi që mbështetet nga bilioneri George Soros, i cili përdori paratë për të mbështetur aktivistët politikë të krahut të majtë në Shqipëri, të cilët kanë punuar edhe për qeverinë socialiste në vend për të shtyrë përpara “reformën” në drejtësi aq shumë të debatuar. Të dhënat tregojnë saktësisht se si Soros ka operuar për të ndikuar te Departamenti i Shtetit që ky i fundit të rishikojë grantet e aplikimit nga grupet e tjera sa i takon financimit të taksapaguesve amerikanë.

Të dhënat e zotëruara në 26 maj 2017, pas padisë së ngritur nga Freedom of Information Act (FOIA) kundër Departamentit Amerikan të Shtetit dhe Agjencisë Ndërkombëtare për Zhvillim të Amerikës (USAID) pasi të dyja këto institucione dështuar së kthyeri përgjigje në 31 mars 2017, ku FOIA i mori ato (Judicial Watch v. U.S. Department of State and the U.S. Agency for International Development (No. 1:17-cv-01012)). Judicial Watch ra dakord të hiqte dorë nga padia pasi mori dokumentet e kërkuara dhe pagesa e avokatit të saj u krye nga të paditurit.

Dokumentet tregojnë se si fondet e USAID qenë kanalizuar përmes agjencive të Projekteve të Shoqërisë Civile për të mbështetur Fondacionin për Shoqërinë e Hapur, një organizatë e majtë e mbështetur nga Soros në Shqipëri, veçanërisht përpjekjen e Soros për të mbështetur qeverinë socialistë që kjo e fundit të ketë kontrollin mbi gjyqësorin. USAID na ka vënë në dispozicion 9 milion USD në 2016 sa i takon fushatës “Drejtësi për të gjithë”, që mbikëqyret nga “Instituti i Manaxhimit Lindje-Perëndim” i financuar nga Soros.

Në mars 2017, një grup prej gjashtë senatorësh, drejtuar nga senatori Mike Lee (R-UT) i dërguan një letër ish sekretarit të shtetit Rex Tillerson duke i kërkuar atij të investigonte akuzat kundrejt qeverisë së SHBA që ka përdorur paratë e taksapaguesve për të mbështetur Soros në Shqipëri.

Në letër shkruhej: “Fondacioni Shoqëria e hapur në Shqipëri dhe ekspertët e saj, me financime nga USAID, kanë krijuar një dokumentet strategjik kontraversial sa i takon Reformës në Gjyqësor të Shqipërisë. Disa prej liderëve besojnë se kjo “reformë” është përpjekja e fundit për t’i dhënë Kryeministrit dhe qendrës së majtë në qeveri kontrollin përfundimtar mbi gjyqësorin.”

Në parlamentin e Shqipërisë, lideri i opozitës ka artikuluar kundër kësaj strategjie duke e quajtur “një reformë të sponsorizuar nga Soros.”

Të dhënat e reja të nxjerra nga Judicial Watch përfshijnë një memo të prillit 2016 nga Ambasada e SHBA në Tiranë që tregon se ambasada ka “sponsorizuar” një anketë bashkë me Fondacionin e Shoqërisë së Hapur të Soros për të matur “njohjen, suportin dhe pritshmëritë” e qytetarëve shqiptarë për “reformën në drejtësi”. Grupi Soros ka raportuar se “91% e pjesmarrësve në anketë ose e “mbështesin plotësisht” apo “e mbështesin deri diku” nevojën për një reformë në drejtësi.” Anketa nuk specifikon llojin e reformës që grupi Soros kish pyetur të intervistuarit e anketës.

Gjithashtu, të dhënat që datojnë në shkurt 2017 kanë treguar se Departamenti Shtetit ka përdorur paratë e taksapaguesve për të bashkë sponsorizuar një anketë të dytë me Fondacionin Shoqëria e Hapur mbi Reformën në Drejtësi që do të ngurtësonte esencialisht kontrollin e të qeverisë të majtë mbi këtë reformë. Raporti nënvizon se Drejtoria e Marrëdhëneve me Publikun në Ambasadën e SHBA dhe Fondacioni Shoqëria e Hapur “kanë siguruar fonde për një organizatë lokale që të udhëheqë një anketim të opinionit publik në lidhje me përpjekjet për Reformën në Drejtësi.”

Të dhënat gjithashtu dëshmojnë se Departamenti Shtetit i ka dhënë organizatës Soros një input të drejtpërdrejtë në raport me programin e saj në Shqipëri. Raporti i 10 Shkurtit 2017 në lidhje me “Engagement with the Open Society Foundation for Albania” nënvizon se “Si një prej asistentëve më të mëdhenj në Shqipëri, përfaqësuesit e Fondacionit për Shoqëri të Hapur u është kërkuar shpesh që të marrin pjesë në rishikimet teknike të aplikimit për fonde që ne kemi marrë.”

Ambasadori i SHBA në Shqipëri, Donald Lu, një diplomat i periudhës së administratës Obama, ka qenë i lidhur ngushtësisht me Soros dhe me qeverinë Shqiptare. Në maj 2017, Lu ka ndihmuar minimin e iniciativës së opozitës shqiptare për të bojkotuar zgjedhjet parlamentare duke deklaruar se SHBA do t’i njohë zgjedhjet dhe rezultatin e tyre edhe nëse opozita refuzon të marrë pjesë. Lu është përshshkruar në shtypin e SHBA si “një forcë që po drejton reformën në Shqipëri”.

“Administrata e Obamas ka shpenzuar më së paku 9 milion USD nga taksat e amerikanëve për të paguar në mënyrë të kundraligjshme në mbështetje të qeverisë së majtë në Shqipëri që gëzon mbështetjen e bilionerit George Soros. Kjo sjellje e DASH që ka sponsorizuar me paratë e taksapaguesve dëshirat e Soros është e patolerueshme,” u shpreh presidenti Judicial Watch, Tom Fitton. “George Soros është një bilioner dhe nuk ka përse të marrë paratë e taksapaguesve si ndihmë për të vazhduar agjendën e tij të radikalizmit të majtë dhe kështu të minojë lirinë në SHBA apo në botë.”

Në një çështje të ngjashme, Judicial Watch po kërkon informacion në lidhje me aktivitetin e Soros në Maqedoni, Rumani dhe Kolumbi.