Analistët serbë: Intensifikimi i takimeve, shpresë për marrëveshje të shpejtë për Kosovën

Presidenti serb, Aleksandar Vuçiq filloi sot vizitën zyrtare në Francë, gjatë së cilës ai të martën do të takohet me presidentin Emmanuel Macron. Pas Parisit, Vuçiq udhëton për në Bruksel ku do të mbahet të mërkurën raundi i ri i dialogut mes Beogradit dhe Prishtinës

Analistët serbë thonë se është e qartë se po intensifikohen takimet dhe se Brukseli shpreson për një zgjidhje të shpejtë të çështjes së Kosovës. Pas takimit dhjetorin e kaluar gjatë samitit për klimën në Paris, Vuçiq, siç njofton presidenca serbe, me ftesë të presidentit francez Emmanuel Macron, shkoi në një vizitë dyditore në Francë.

“Gjatë kësaj vizite pune, presidenti Vuçiq do të bisedojë me presidentin Macron për marrëdhëniet bilaterale, veçanërisht bashkëpunimin ekonomik mes dy vendeve, pastaj për gjendjen në rajon me theks të veçantë në dialogun ndërmjet Beogradit dhe Prishtinës dhe integrimin evropian të Serbisë”, thuhet në kumtesën e Presidencës, raporton televizioni “N1”.

Kryetarja e Qendrës për Politikë të Jashtme, Aleksandra Joksimoviq, thotë se kjo është një vizitë shumë e rëndësishme, sepse roli i Francës në Bashkimin Evropian po forcohet në mënyrë konstante, për shkak të Brexit -it dhe përpjekjeve të presidentit Macron në procesin e reformave të Bashkimit Evropian, përcjell Telegrafi.

“Pa dyshim se do të ketë bisedime edhe lidhur me normalizimin e marrëdhënieve mes Beogradit dhe Prishtinës. Në këtë moment, një rol kyç e luan BE-ja. Nga ana tjetër, Gjermania është përfshirë në kanale të ndryshme në këtë proces, por unë besoj se në këtë moment edhe Franca do të shpreh interesin e saj aktiv lidhur me nënshkrimin e një marrëveshjeje ligjërisht të detyrueshme midis Beogradit dhe Prishtinës”, tha Joksimoviq.

Në marrëdhëniet midis Prishtinës dhe Beogradit, Alekasndar Vuçiq të mërkurën në Bruksel do të bisedojë me presidentin e Kosovës, Hashim Thaçi. Vuçiq tha se është shumë e vështirë për të përballuar me “nyjën e Kosovës”, por se ky problem nuk duhet t’u lihet brezave të ardhshëm.

“A do të kemi sukses? Unë nuk jam i sigurt. Nuk iu besoj atyre në Prishtinë, dhe nuk kanë besim të mjaftueshëm në ata që deri tash iu ndihmuan në shkatërrimin e Serbisë. Por kjo nuk do të thotë se unë nuk do të luftoj. Dhe për çdo gjë që luftoj do t’ua them të vërtetën dhe nga ju do të kërkoj të nxirrni gjykimin përfundimtar – nëse Serbia mundet në të ardhmen, ose Serbia këtë nuk mund”, tha Vuçiq.

Joksimoviq theksoi se “pa asnjë dyshim po vjen deri te intensifikimi i takimeve në nivelin më të lartë politik, gjë që tregon se llogaritet që në një afat të shkurtër kohor do të vijë deri te një zgjidhje”.

“Mendoj se do të bëhen përpjekje të rëndësishme për të arritur një zgjidhje kompromisi brenda mandatit aktual të Komisionit Evropian. Pra, kjo është vitin e ardhshëm”, tha ajo.

Astrit Rexhaj: Jemi ba gjithçka veç njerëz hala s’kemi mbrri me u ba

Astrit Rexhaj si shumë kosovarë të tjerë, ka rrëfyer për ndihmën që ka marrë nga axha i tij mërgimtar, që të fillojë studimet në Prishtinë

Në një shkrim dedikuar mërgimtarëve, Rexhaj, ka kujtuar faktin se si diaspora shqiptare ka financuar sistemin paralel të arsimit gjatë viteve 90-ta, luftën e UÇK-së, dhe ka rikujtuar faktin se si mërgimtarët vazhdojnë që për çdo vit të dërgojnë miliarda euro në Kosovë. Kujtojmë se tashmë në Kosovë ka filluar sezona e kthimit të mërgimtarëve nga vende të ndryshme të botës.

Shkrimi i plotë:

T’dashtun mergimtare,

Pavaresisht se çka thojme na e qysh ju presim, ju jeni ne shpine e juej qe me shume djerse, pune dhe mund e keni ndertu.

Kosova kurre nuk ish ndertu pa juve, pa djersen e juej e pa punen e juej. Kafshaten e femijve te juej e keni dergu me e majt gjalle kete vend. Na keni jep, na keni ushqy, na keni shkollu.

Une fakultetin e kam fillu me 100 frangat e mixhes tem Xhek Rexhaj, edhe plot tjere e kane fillu edhe e kane perfundu shkollen me ndihmen e familjareve te tyne prej diaspore.

Shume familje keni ushqy, e po vazhdoni me ushqy. Pak apo shume, ato pare kane qene kursime nga racioni i familjes se juej.

Ju e mbajtet gjalle sistemin paralel te viteve te ’90-ta, ju e financuat luften dhe ju edhe tash po i dergoni mbi 2.5 miliarde remitenca çdo vit.

Aman mos na e nxini per te madhe se na qe kemi jetu ketu jemi ende ne shok dhe tranzicioni nga mesjeta ne kapitalizem na ka godite fort e na ka ç’orientur. Jemi ba snoba, t’dijshem, fillozofa, biznismena, doktorra, profesora e gjithçka tjeter pos njerez hala s’kemi mbrri me u ba.

Falnani per kete arrogance e mosmirenjohje se nuk e kemi kurgjo me t’keq, por nuk dijme ma mire.

Nxehet Ramushi: “As Kadria , as Hashimi sun më mësojnë çka me ba”

Kryeministri Haradinaj ka drejtuar kritika të ashpra ndaj ministrit të Financave, Bedri Hamza. Ai ka thënë se Hamza sa ka qenë drejtor i BQK-së ka marrë pagë 4 mijë euro.Por kësaj radhe Haradinaj është treguar i ashpër edhe ndaj Kadri Veselit e Hashim Thaçit. “As Kadria e as Hashimi sun më kallxojnë çka me bo nëpërmjet ministrave”, ka deklaruar Ramush Haradinaj

“Asnjë ministër sun më kallxon mu çka me bo. As Bedri Hamza as kërkush. 4 mijë euro e ka pas pagën në BQK, mos të shet mend”, tha Haradinaj në Tribuna Channel. Madje Haradinaj tha se as kryeparlamentari e presidenti i vendit, nuk mund t’i tregojnë çka të vendos nëpërmjet ministrave.

“As Kadria e as Hashim sun më kallxojnë çka me bo nëpërmjet ministrave”, deklaroi Ramush Haradinaj.
Ndryshe Bedri Hamza ka refuzuar marrjen e pagës me rritje. Më parë Haradinaj kishte thënë se Hamza me këtë vendim nuk është treguar burrë i mirë.

Haradinaj: Limaj nuk është kundër Thaçit, duhet të ketë unitet për dialogun

Kryeministri i Kosovës, Ramush Haradinaj beson se Fatmir Limaj nuk është kundër presidentit Thaçi që ta udhëheqë dialogun. Në një intervistë në Tribuna Channel, Haradinaj ka deklaruar se për temën e dialogut duhet të ketë unitet për dialogun me Serbinë.

“Dialogu është interes pasi njohja reciproke është interes i yni, menjëherë do të kishim njohjen e pesë vendeve të BE-së, anëtarësimin në OKB dhe perspektivë të re. Limaj nuk është kundër dialogut e as Thaçit. Të gjithë jemi të interesuar që të ketë një unitet të spektrit politik. Mund të kemi mospajtime mes vete, por këto llogari nuk duhet t’i lajmë sot”, deklaroi Haradinaj, transmeton lajmi.net.

Sipas kryeministrit të vendit qytetarët presin më shumë rezultate për dialogun. Ai është pajtuar me kërkesën e deputetëve të AAK-së që dialogu të mos vazhdojë pa ndodhur liberalizimi i vizave.

Qytetarët presin më shumë rezultate për dialogun. Është rritur presioni mbi Kosovën për me sjellë diçka në shtëpi. E ndërlidhin dialogun me lberalizim. Është legjitime kërkesa e deputetëve për liberalizim dhe dialogun”, deklaroi kryeministri Haradinaj.

Ai vlerëson se udhëheqja e dialogut nga Thaçi është legjitime

“Si dialog dhe si proces nuk e shoh se mund ta bëj, pasi duhet të punojë në qeverisjen e vendit. Kemi mbi 600 vendime, kemi punë këtu duhet të kryejë punët e shtëpisë. Përfaqësimi nga Thaçi është adekuat”, deklaroi Ramush Haradinaj.

Shefi i ekzekutivit tutje tha se nuk pret ndonjë zhvillim të madh nga takimi i të mërkurës me Mogherinin. “Nuk shoh ndonjë ndryshim të mërkurën. Është gatishmëri që me qenë serioze në temën e dialogut, ëm e mira do të ishte një armëpushim politik. S’ka kuptim të vazhdojë dialogu, e të njejtën kohë të vazhdojnë prapaskenat dhe goditjet prapa shpinës”, deklaroi kryeministri.

Takimi Trump-Putin, reagojnë ligjvënësit amerikanë

Një numër figurash politike në Shtetet e Bashkuara reaguan pas komenteve të Presidentit Donald Trump në Helsinki, i cili nuk mbajti anën e agjencive amerikane të zbulimit, që kanë arritur në përfundimin se Rusia ndërhyri në zgjedhjet presidenciale të vitit 2016

Në konferencën e përbashkët të shtypit me udhëheqësin rus Vladimir Putin pas samitit të tyre, Presidenti amerikan tha se udhëheqësi rus e kishte “mohuar me forcë” ndërhyrjen e Moskës. Ai e quajti “një fatkeqësi për vendin tonë” hetimin 14 mujor të prokurorit të posaçëm Robert Mueller mbi lidhjet e mundshme të fushatës së zotit Trump me rusët.

Komentet e Presidentit Trump shkaktuan reagime të menjëhershme në Shtetet e Bashkuara. Senatori republikan Lindsey Graham, në përgjithësi një përkrahës i Presidentit Trump, tha në Twitter: “Një mundësi e humbur nga Presidenti Trump për t’i kërkuar me ngulm llogari Rusisë për ndërhyrjen në vitin 2016, dhe për t’i bërë një paralajmërim të fortë atij kundër ndërhyrjes në zgjedhjet e ardhshme. Përgjigja e Presidentit Trump do të shihet nga Rusia si një shenjë e dobësisë dhe do të krijojë më shumë probleme.”

Një tjetër senator i njohur republikan, John McCain, tha: “Konferenca e sotme e shtypit në Helsinki ishte një nga paraqitjet më të turpshme të një presidenti amerikan. Është e vështirë të matet dëmi i shkaktuar nga naiviteti i Presidentit Trump, egoizmi, ekuivalenca e rreme dhe simpatia për autokratët.”

Paul Ryan, republikan i lartë në Dhomën e Përfaqësuesve të SHBA, tha: “Nuk ka dyshim se Rusia ka ndërhyrë në zgjedhjet tona dhe vazhdon përpjekjet për të minuar demokracinë këtu dhe në mbarë botën”. Ai shtoi se “Nuk ka ekuivalencë morale mes Shteteve të Bashkuara dhe Rusisë, e cila mbetet armiqësore ndaj vlerave dhe idealeve tona më themelore”.

Edhe ligjvënësit demokratë shprehën zemërimin e tyre ndaj komenteve të Presidentit Trump. Senatori Mark Warner nga Virxhinia, anëtar i Komisionit të Senatit për Zbulimin, që ka rënë dakord me vlerësimin e agjencive amerikane të zbulimit se Rusia ndërhyri në zgjedhjet të vitit 2016 dhe u përpoq të ndihmonte zotin Trump kundër rivales së tij demokrate Hillary Clinton, tha: “Është e turpshme që Presidenti mori anën e Putin-it për zyrtarët e tij të zbulimit dhe fajësoi Shtetet e Bashkuara për sulmin e Rusisë mbi demokracinë tonë”.

Udhëheqësi i demokratëve në Senatin amerikan, Chuck Schumer tha se zoti Trump i fajësoi të gjithë me përjashtim të fajtorit. Ai tha gjithashtu se Presidenti amerikan “i zuri besë fjalës së KGB-së dhe jo të CIA-s.” Edhe senatorët e tjerë demokratë Elizabeth Warren, Tim Kaine dhe Bill Nelson kritikuan ashpër komentet e Presidentit Trump në lidhje me ndërhyrjen ruse në zgjedhjet amerikane.

Zaev: Afaristët prorusë po financojnë protestat e dhunshme në Maqedoni

Kryeministri i Maqedonisë, Zoran Zaev, ka akuzuar afaristë të caktuar grekë, të cilët sipas tij financojnë grupe në Maqedoni për të shkaktuar trazira para referendumit, në të cilin qytetarët duhet të deklarohen se a e mbështesin marrëveshjen me Greqinë për zgjidhjen e kontestit shumëvjeçar të emrit

Kryeministri Zaev në një intervistë për ueb-faqen BuzzFeed ka thënë se “afaristët që bëjnë veprimtari të tilla mbështesin kauzën ruse”. Sipas tij, këta afaristë grekë kanë paguar shtetas maqedonas prej 13.000 deri 21.000 dollarë që të kryejnë akte të dhunshme para referendumit të paralajmëruar për në vjeshtë.

“Përfaqësuesit rusë që ishin këtu dhe të tjerë nga Moska, nuk fshihnin se janë kundër integrimit tonë në NATO… Disa prej tyre kanë lidhje me mediat, disa prej tyre i inkurajojnë të rinjtë që të protestojnë para Parlamentit, t’i sulmojnë policët… kjo është e qartë”, ka deklaruar Zaev duke mos publikuar detaje, por ka lënë për të kuptuar se disa nga informacionit i ka siguruar nga personat e ndaluar që protestuan para Kuvendit, më 17 qershor, ditën kur u nënshkruar marrëveshja e Greqinë për çështjen e emrit.

Prokuroria Publike e Maqedonisë ende nuk është prononcuar lidhur me këto pretendime të kryeministrit. Nga Ministria e Punëve të Brendshme gjithashtu nuk ka dhënë detaje për rastin, duke theksuar se për çështje të ndjeshme nuk do të prononcohet për mediat. Hetimet, tha ministri Oliver Spasovski, “nuk i zhvillojmë përmes mediave”.

“Gjithçka që ka të bëjë me informacione të ndjeshme, as që mundemi, as që guxojmë, e as që ka nevojë që diçka të tillë të udhëheqim përmes mediave…Duhet ta dini që çdo në moment kur kemi diçka të kumtojmë, ne këtë do të bëjmë”, u shpreh ministri i Brendshëm i Maqedonisë, Oliver Spasovski.

Kryeministri Zaev ka paralajmëruar se gjatë kësaj jave do të përcaktohen edhe modalitetet e referendumit, si data e mbajtjes, pyetja dhe forma e referendumit. Opozita që udhëhiqet nga VMRO-DPMNE-ja, e cila po ashtu etiketohet se është kundër Perëndimit, ka bërë të ditur se nuk do të përkrahë referendumin, por pa dhënë detaje se çfarë formash do të përdorë për dështimin e tij.

Maqedonia ka marrë ftesën për anëtarësim në NATO, por anëtarësimi varet nga zbatimi i marrëveshjes me Greqinë, ashtu sikur edhe nisja e bisedimeve për anëtarësim në Bashkimin Evropian.

Pse Evropa nuk po respektohet më në arenën ndërkombëtare

Pas takimit të fundit të G-7, disa kombe evropiane si Franca dhe Gjermania, u shprehën të zemëruara se pikëpamjet e tyre patën një përkrahje të pakët nga Donald Trump. Edhe në think-tanket e njohura mbi politikën e jashtme, një temë e vazhdueshme ka të bëjë me udhëheqësit europianë, që ankohen se përse Evropa nuk po respektohet më në në skenën botërore. Po pse vallë


Nga Victor Davis Hanson

Në fund të fundit, nëse “Europa” përcaktohet nga anëtarësia e 28 anëtarëve të Bashkimit Evropian, atëherë duhet të jetë lehtësisht superfuqia e botës. Projekti europian, ka aktualisht një popullsi të përgjithshme (512 milionë), që lë në hije atë të Shteteve të Bashkuara (326 milionë). Madje edhe PBB-ja e saj (20 trilionë dollarë), është më e madhe se e Amerikës (19 trilionë dollarë).

Historikisht, gjeografia europiane ka qenë me një ndikim strategjik – me dalje në Atlantik, Balltikun dhe Mesdhe, lidhja e lashtë detare e tre kontinenteve. Roma është qendra e krishtërimit, deri më tani feja më e madhe në botë. Disa nga kombet e mëdha në botë – Argjentina, Australia, Brazili, Kanadaja, Kili, Zelanda e Re dhe Shtetet e Bashkuara – lindën si koloni evropiane.

Rreth 2 miliardë njerëz flasin gjuhë europiane, duke përfshirë qindra milionë jashtë Europës, gjuha e parë e të cilave është anglishtja, spanjishtja, portugalishtja ose frëngjishtja. Prodhimet evropiane – Airbus, BP, Shell dhe Volksëagen – janë emra globalë. Franca pret çdo vit numrin më të madh të turistëve të botës.

Europa është në tërësi, më e vizituara se sa çdo komb tjetër ose zonë gjeografike – dhe kjo nuk është e habitshme, duke qenë se ajo ka qenë shtëpia e përparimeve më të rëndësishme të qytetërimit: indja e qytet-shteteve, shfaqja e republikanizmit romak dhe perandorisë së saj më vonë të globalizuar, Rilindjes, Reformimit, Iluminizmit dhe Revolucionit Industrial.

Shumë nga mendimtarët, shkrimtarët, shkencëtarët dhe politikanët më të mëdhenj në botë ishin europianë, nga Platoni, Sokrati Ciceroni, Oktaviani dhe Perikliu, deri tek Koperniku, Dante, Galileo, Da Vinçi, Njutoni, Shekspiri, Servantesi, Ajnshtajni dhe Çërçilli.

Po kështu, katastrofat më të mëdha në historinë botërore u zhvilluan në tokën evropiane:Vdekja e Zezë, gjenocidi i Stalinit në Rusi, Lufta e Parë dhe e Dytë Botërore, dhe Holokausti. Edhe tradita ushtarake perëndimore, lindi në Europë, dhe po ashtu ushtritë më vdekjeprurëse të botës në histori – romake, franceze, gjermane – ishin të gjithë europiane, siç ishin komandantët më të aftë, nga Aleksandri i Madh dhe Jul Çezari, deri tek Napoleoni dhe Uellingtoni.

Pse atëherë liderët europianë, po ndihen gjithnjë e më shumë të parëndësishëm, pa besim në të kaluarën e tyre, dhe shpesh të injoruar nga fuqitë e mëdha? Në pjesën më të madhe të diplomacisë së nivelit të lartë, Europa është kryesisht spektatore. Revolucioni i teknologjisë së lartë që kreu Amazon, Apple, Google, Facebook dhe Microsoft, e shmangu Europën.

Gjykuar nga përcaktuesit e mëdhenj historikë të fuqisë civilizuese – karburanti, energjia, arsimi, demografia, stabiliteti politik dhe fuqia ushtarake – në Europë po pakësohet. Ajo po shpenzon vetëm 1.4 për qind të PBB-së së saj kolektive në mbrojtje.

Shumica e analistëve, arrijnë në përfundimin se edhe ajo që Europa shpenzon për sigurinë, nuk përkthehet drejtpërdrejti në gatishmëri ushtarake, të paktën në krahasim me ushtrinë amerikane. Dhe me një shkallë të lindshmërisë prej më pak se 1.6 përqind, Europa po zvogëlohet demografikisht dhe po plaket – prandaj Angela Merkel e sheh me sa duket e sheh emigracionin edhe si një zgjidhje për krizën e demografisë, dhe një furnizim të krahut të punës me kosto të ulët.

Ndërkohë Europa mbetet e ndërvarur nga Rusia, Azia Qendrore dhe vendet e OPEC-ut për shumicën e nevojave të saj energjetike. Në renditjet botërore të 20 universiteteve më të mira, vetëm njëri ishte një kontinental evropian; ndërkohë, 15 ishin amerikanë dhe 4 britanikë.

Politikisht, Bashkimi Europian nuk ka ditur të akomodojë si duhet bashkimin e popujve, gjuhëve dhe kulturave të ndryshme në një komb paneuropian

Rezultati është frustrimi dhe polarizimi, pasi BE po fragmenterizohet. Europiano-lindorë, ngrenë krye kundër presioneve nga Berlini dhe Parisi, dhe po fillojnë të refuzojnë hyrjen e çdo lloj myslimani nga Lindja e Mesme. Ndërkohë, europianët e Mesdheut e shohin barrën e tyre në përballimin e emigracionin masiv të paligjshëm, jo vetëm si të nënvlerësuar, por edhe si një shfaqje tjetër të një diktati financiar më të hershëm të Europës Veriore.

Ndërkohë, Mbretëria e Bashkuar është në prag të largimit. Në qendër të këtyre tensioneve rajonale qëndron Gjermania, vendi më i madh i BE-së, dhe me historinë më problematike. Në teori, Gjermania pohon se nuk është më dhunuesja e viteve 1871, 1914 dhe 1939. Në fakt, Berlini tregon pak durim me ata që kundërshtojnë planet e tij për t’u marrë me Brexit, emigracionin mysliman.

Sondazhet e fundit, tregojnë një rënie të përgjithshme të besimit tek Bashkimi Europian nga anëtarët e tij. Në disa vende, BE-ja nuk fiton shumicën e mbështetjes. Një etikë kontinentale e agnosticizmit, varësisë së shtetit, mungesës së fëmijëve dhe multikulturalizmit, e lë Europën veçanërisht të prekshme ndaj sfidave të jashtme të një lagjeje të rrezikshme, dhe flukseve masive të emigrantëve kryesisht myslimanë, teksa popullata e saj e zvogëluar, rrezikon të bëhet e paaftë për të mbështetur mirëqenien shtetërore, dhe pagesat e pensioneve të një popullsie të plakur.

Një zgjidhje amerikane për krizën europiane – liberalizimi, ulja e taksave, më shumë referendume dhe plebishite, rritja e shpenzimeve të mbrojtjes, grumbullimi i gazit natyror dhe i naftës, siguria kufitare – do të ishte e pamendueshme. Një kthesë e tillë do të ishte e kundërt me perceptimin vetë-vlerësues dhe të pretendimeve humanitariste të elitës evropiane, dhe do të sjellë një pranim kolektiv të dështimit.

Bashkimi Europian, ka mbetur me mitologjinë se vetëm pan-europianizmi e ka ruajtur së paku paqen për gati 75 vjet, periudha më e gjatë të qetësisë kontinentale të pandërprerë, që nga bashkimi i Gjermanisë më 1871. Një naivitet i tillë merr pak në konsideratë rolin e një NATO-je të drejtuar nga SHBA, dhe një Gjermania anormale, vendi më i madh dhe më dinamik i Evropës, si dhe kombi historikisht më agresiv, nuk zhvilloi armë bërthamore, ndërsa armiqtë tradicionalë të vijës së parë në dy luftëra botërore, Franca dhe Mbretëria e Bashkuar po.

Duke konfirmuar se fuqia, dhe jo pretendimi për fuqi, e ruan paqen. Zemërata europiane mbi Donald Trump nuk është, siç pohohet, sepse ai dhe kombi që e zgjodhën atë janë të vrazhdë, por sepse ai dhe vendi i tij janë të nevojshëm më shumë se kurrë, për një kontinent që ka humbur rrugën e vet. / “Hoover Institute” – Bota.al

Kompleksi më i madh portual amerikan dhe lufta tregtare me Kinën

Ndërsa administrata Trump njoftoi vendosjen e tarifave shtesë prej 200 miliardë dollarësh ndaj importeve kineze, kompleksi më i madh portual në Shtetet e Bashkuara po përgatitet ndaj ndikimit të këtij vendimi

Për portet binjake Los Angelos dhe Long Beach, Kina është partnerja më e madhe tregtare dhe ajo që mund të ndodhë në këto porte, mund të shkaktojë një efekt domino në sektorë të tjerë të ekonomisë amerikane. Korrespondetja e Zërit të Amerikës Elizabeth Lee njofton.

Javët e fundit kanë qenë jashtëzakonisht stresues për Liang Liang, i cili ka në pronësi një biznes shitjes me shumicë mallrash importi në Los Anxhelos. “I kam parë lajmet çdo ditë. Kur do të vendosen tarifat, kur do të më vijnë mallrat që kam porositur….luftoj me kohën. Po përpiqem të porosis të gjitha mallrat që më duhen për pjesën tjetër të vitit”, thotë ai.

Shumica e mallrave, të tilla si lodra dhe bluza vijnë nga Kina, vendi i origjinës së Liang-ut. Ai pret një rritje prej 10 deri në 20 për qind në shpenzimet e transportit detar. Me rritjen e çmimeve për shkak të tarifave disa prodhues dhe shitës me pakicë pritet të porosisin më pak produkte, duke zvogëluar vëllimin tregtar ndërmjet dy vendeve.

“Pasi kjo të ndodhë, do të shihni një rritje në pagesat për transportin, sepse kur nuk keni volumin për të justifikuar mallrat që trasportohen, do të ketë një rritje të mëtejshme të kostos”, thotë Stephen Cheung i Qendrës Botërore të Tregtisë në Los Anxhelos.

….Dhe kostot e transportit do të ndikojnë tregtinë mes SHBA-së dhe Kinës, jo vetëm mallrat në listën e atyre që do t’u vendosen tarifa. Sektori i tregtisë dhe logjistikës, që përfshin portet dhe zinxhirin e furnizimit të kamionëve dhe magazinave, do të jenë viktimat e para të luftës tregtare.

Liang Linag thotë se ai do të përpiqet të amortizojë humbjet dhe kufijtë e tij të fitimit do të tkurret, por … “Nëse tarifat rriten me 10 apo 20 për qind, do më duhet të rris çmimet”, thotë ai.

“Konsumatorët do ta ndiejnë në kuletat e tyre shumë shpejt”, thotë Stephen Cheung i Qendrës Botërore të Tregtisë në Los Anxhelos. “Do të duhet të presim të shohim se si bizneset e ndryshme do të ristrukturojnë rrjetet e tyre të furnizimit dhe do të përshtaten me mjedisin e ri tarifor”, thotë Duan Kenagy, porti i Long Beach.

Sipas zotit Kenagy deri më tani këtë vit, porti i Long Beach-it, ka shënuar vëllime rekord. Por shqetësimet egzistojnë. “Ndikimet e një lufte tregtare të qëndrueshme dhe afatgjatë mund të jenë shkatërruese për të dyja ekonomitë”.

Por Liang Liang shpreson ende. Ai mendon se lufta tregtare është në fakt një teatër politik i të dyja palëve.

“Kina gjithashtu ka pozitën e saj në tregti. Qeverisë kineze i duhet të jetë përgjegjëse për 1.4 miliardë njerëz që jetojnë në vend. Ndaj mendoj se Kina dhe SHBA-ja nuk do të bien dakord mbi tregtinë vetëm në sipërfaqe. Për zotin Trump, kjo është një shfaqje për zgjedhjet afatmesme të nëntorit, përgjigje ndaj elektoratit”.

Ekspertët thonë se gjetja e zgjidhjeve për praktikat e padrejta tregtare dhe çështjet e pronësisë intelektuale amerikane janë të nevojshme, por sipas tyre duhet gjithashtu të ketë masa për të minimizuar dëmet e një lufte tregtare.

Opozita refuzon ofertën e Thaçit për dialogun me Serbinë

Partitë opozitare në Kosovës nuk do të kenë përfaqësuesit e tyre në delegacionin e udhëhequr nga presidenti Hashim Thaçi në bisedimet me Serbinë, konfirmojnë zyrtarët e partive opozitare

Më 18 korrik, në Bruksel, pritet të mbahet takimi ndërmjet dy delegacioneve, të Kosovës dhe Serbisë. Delegacionit të Kosovës, i prin presidenti Thaçi, i cili, siç është paralajmëruar, do të shoqërohet nga kryetari i Kuvendit, Kadri Veseli, kryeministri Ramush Haradinaj dhe zyrtarë tjerë, përfshirë edhe ministrin e Jashtëm, Behgjet Pacolli e zëvendëskryeministrin Fatmir Limaj.

Presidenti Thaçi u ka bërë thirrje edhe partive opozitare që të jenë pjesë e këtij delegacioni.Por, Lutfi Haziri, nënkryetar i Lidhjes Demokratike të Kosovës, parti kjo më e madhe opozitare, thotë për Radion Evropa e Lirë se partia, të cilës ai i takon, nuk do të jetë pjesë e delegacionit.

“Ne kemi pasur tri parime për ndërtimin e konsensusit në Kuvendin e Republikës. Kjo nuk është arritur. Tashmë kërkesa e LDK-së ka evoluuar në formulën ‘legjitimitet para dialogut’, e cila nënkupton zgjedhjet (e parakohshme parlamentare) para dialogut. Ne nuk jemi pjesë e këtij delegacioni dhe as e delegacioneve eventuale jashtë një marrëveshje dhe një konsensusi politik, i cili mund të arrihet vetëm në Kuvend të Republikës”, tha Haziri.

Ai ka shtuar se zgjedhjet e parakohshme parlamentare do t’i legjitimonin institucionet përfaqësuese të Kosovës. “Ne besojmë që kjo krizë, e cila është prodhuar politikisht në Kosovë, e ka degraduar legjitimitetin politik të përfaqësuesve dhe detyrimisht legjitimiteti për përfaqësim në format të tillë të dialogut është i domosdoshëm. Natyrisht që ky Kuvend nuk e ka formatin dhe autoritetin që të bartë kurrëfarë delegimi apo përgjegjësie më këtë angazhim. Kështu që, LDK-ja mbetet në rolin e saj opozitar brenda këtij Kuvendi, me kërkesa politike, të cilat do të vazhdojnë të afirmohen politikisht edhe me veprime konkrete opozitare brenda Kuvendit”, u shpreh Haziri.

Në delegacionin e Kosovës për bisedime në Bruksel, nuk do të jenë as përfaqësuesit e partisë tjetër opozitare, Lëvizja Vetëvendosje, konfirmon për Radion Evropa e Lirë, deputetja e kësaj partie, Albulena Haxhiu. Siç thotë ajo, figura e Hashim Thaçit, është e papranueshme për Lëvizjen e Vetëvendosje, që të jetë në krye të procesit të dialogut me Serbinë.

“Figura e Hashim Thaçit është një figurë përçarëse dhe një figurë që nuk përfaqëson unitet, si dhe një person i cili bartë përgjegjësinë e gjithë koncesioneve që janë nënshkruar deri më tani në raport me negociatat. Për neve është e papranueshme që ta përfaqësojë Republikën e Kosovës. Pra, ne si subjekt politik, e kundërshtojmë fuqishëm këtë figurë që ta përfaqësojë Republikën e Kosovës. Edhe në takimin e parë, por po ashtu edhe në takimin e të mërkurës, siç po pritet që do të ndodhë, ky person nuk përfaqëson Republikën e Kosovës, por përfaqëson vetëm interesat e veta”, tha Haxhiu.

Gjithashtu, sipas Haxhiut, personat që përbëjnë delegacionin e Kosovës në dialogun me Serbinë, nuk kanë legjitimitet për një gjë të tillë, ndërkohë që siç thotë ajo, ata kanë kërkuar konsensus të spektrit politik.

“Ata kanë kërkuar konsensus për Thaçin. Në asnjë rrethanë ne nuk pajtohemi që Thaçi të jetë as prijës e as pjesë e ekipit, përveç tjerash. Për të pasur një dialog të mirëfilltë dihet se çfarë janë ‘vijat e kuqe’. Pikërisht Hashim Thaçi ka thënë se nuk ka ‘vija të kuqe’. Pra, do të diskutohet gjithçka edhe për sa i përket decentralizimit, demarkacionit, por edhe sa i përket shkëmbimit të territoreve, si dhe për sa i përket çështjeve të brendshme të tjera të Republikës së Kosovës. Pra, me këtë qasje, nuk mund të pranojmë, në asnjë rrethane, që të diskutojmë”, thekson Haxhiu.

Sidoqoftë, njohësit e zhvillimeve politike, më herët kanë theksuar, se pa një konsensus të spektrit politik për dialogun, si dhe pa pjesëmarrjen e opozitës në ekipin dialogues të Kosovës, e sidomos të Lidhjes Demokratike të Kosovës, si partia më e madhe opozitare, pala e Kosovës do të jetë në pozicion më të dobët dialogues përballë Serbisë.

Dialogu mes Kosovës dhe Serbisë ka nisur që nga viti 2011. Sipas Bashkimit Evropian në fund të këtij procesi, të dyja vendet duhet të arrijnë një marrëveshje për normalizimin e raporteve, e cila, pos tjerash, i çon të dyja vendet drejt integrimeve evropiane.

Italia e Gjermania, përplasje për naftën shqiptare

Shqipëria, një mollë sherri mes Italisë, Gjermanisë dhe Jugosllavisë. Është pikërisht një nga figurat më të spikatura gjatë Luftës së Dytë Botërore, ministri i Jashtëm fashist, njëkohësisht dhëndri i Musolinit, konti Galeazzo Cianos, i cili dëshmon për këtë ping-pong me Shqipërinë

Kjo dëshmi vjen përmes ditarit të tij, i cili fatmirësisht i shpëtoi zjarrit të luftës, ndërsa ai vetë jo. Në këtë ditar, një vend të rëndësishëm zë Shqipëria, pasi siç edhe është folur tashmë, pushtimi i saj përbënte një nga ambiciet më të mëdha të Cianos.

Ditari i tij u botua së pari në gjuhën angleze nga Malcolm Muggeridge në “Ciano’s Diaries, 1939-1943″ (Londër 1947), pjesët e mëposhtme janë marrë pikërisht nga ky ditar, publikuar nga albanologu dhe përkthyesi Robert Elsie. Hap pas hapi ai tregon planin për pushtimin e Shqipërisë, bisedat me Duçen, marrëveshjet sekrete me Jugosllavinë, përplasjet me Gjermaninë për naftën shqiptare, si dhe qëndrimin e Mbretit Zog.

6 janar 1939

Takim me Sereqin, prurësin e një letre nga Mbreti Zog, i cili kërkon një ndërmjetësim me jugosllavët në lidhje me trajtimin e pakicave shqiptare që jetojnë në Kosovë; nëse gjithçka shkon mirë dhe nëse Stoyadinovich është në gjendje të vazhdojë me vendosmëri, unë sigurisht do t’i jap Zogut ndërmjetësimin që kërkon!

19 janar 1939

Arritja në Belje. Gjueti lepujsh. U ktheva me tren dhe Stoyadinovich dhe unë patëm një bisedë. Unë preka çështjen shqiptare. Në fillim Stoyadinovich dukej i trazuar. Pastaj ai theu akullin dhe foli për ndarjen e Shqipërisë si mënyrën më të mirë të zgjidhjes.

22 janar 1939

Asnjë lajm i qartë në lidhje me krizën jugosllave. Duçe tha se kjo është një tjetër provë që ne mund të bëjmë biznes vetëm me një vend, që është Gjermania, e cila, si ne, nuk është e ndryshueshme në direktivat e saj dhe në detyrimet që merr përsipër. Pozicioni Stoyadinovich duket të jetë i sigurt, ai pohoi vetë dy javë më parë se asgjë dhe askush nuk mund t’i marrë atij pushtetin. Tani gjërat janë ndryshe.

Tani kriza më intereson, jo aq shumë për shkak të marrëdhënieve tona me Beogradin, të cilat nuk do të ndryshojnë shumë në të ardhmen e afërt, por më tepër në lidhje me Shqipërinë, për të cilën kishim arritur pothuajse një marrëveshje.

Gjithsesi, formula e mëposhtme është rënë dakord me Duçen: nëse politika e Stoyadinovich do të mbajë ende, të shkohet përpara me ndarjen e Shqipërisë midis nesh dhe Jugosllavisë, e nëse jo, atëherë vjen pushtimi i Shqipërisë nga ne, pa Jugosllavinë, dhe, nëse është e nevojshme, edhe kundër Jugosllavisë.

6 shkurt 1939

E takova Duçen në Palazzo Venecia. Ai beson se shkarkimi i Stoyadinovich është një grusht shteti i vërtetë nga ana e Regent, i cili donte të parandalonte forcimin e diktaturës fashiste në Jugosllavi. Unë i dhashë Duçes këndvështrimin tim për Shqipërinë: ne duhet të punojmë më shpejt. Ai u pajtua me mua. Ne duhet të fillojmë menjëherë të mobilizojmë forcat tokësore dhe të përqendrojmë forcat ajrore. Ne do të intensifikojmë përgatitjet lokale revolucionare. Data e veprimit: java e Pashkëve.

7 shkurt 1939

Gjatë mbrëmjes takova Duçen dhe kemi folur gjerësisht në lidhje me situatën. I përsërita pikëpamjet e mia mbi nevojën për të vepruar më shpejt në Shqipëri për arsyet e mëposhtme: (1) Jugosllavët tani e dinë se ne jemi duke trajtuar çështjen, dhe thashetheme mund të përhapen; (2) me heqjen e Stoyadinovichit karta jugosllave ka humbur për ne 90 për qind të vlerës së saj, (3) pasi ndërmarrja nuk do të ndërmerret në bashkëpunim me Jugosllavinë, por pa të, dhe ndoshta edhe kundër saj, ne nuk duhet t’i japim kohë asaj për forcimin e politikës së saj diplomatike dhe ushtarake me Francën dhe me Britaninë e Madhe.

Me përjashtim të rrethanave të paparashikuara, Duçe ra dakord që data për sulmin të jetë midis 1 dhe 9 prillit. Ndërkohë, unë do të takoj Ribbentropin, dhe ndoshta do t’i jap atij një raport për këtë çështje.

10 shkurt 1939

Një mëri e madhe mbi qëllimin e Gjermanisë për të vënë duart mbi naftën shqiptare. Dëshmia vjen nga një komunikim zyrtar i dërguar nga Attoliko. I telefonova Mackensenit dhe e informova atë se ne e konsiderojmë Shqipërinë si çdo provincë tjetër italiane dhe çdo ndërhyrje gjermane do shkaktojë pakënaqësi të forta në opinionin publik italian.

Ky fakt provon gjithashtu se çështja shqiptare do të arrijë pikun në një kohë të shkurtër. Serbët kanë folur. Mbreti Zog është i alarmuar dhe shumë i shqetësuar. Disa lëvizje mund të bëhen për të kundërshtuar aksionet tona.

11 shkurt 1939

Prita von Mackensenin, i cili më dha shpjegimin vijues në lidhje me çështjen e naftës shqiptare. Ata kishin marrë një propozim, por asgjë nuk ishte bërë dhe asgjë nuk do të bëhet.
Nxitimi me të cilin është dhënë përgjigjja, ishte një provë e padurimit gjerman për të larguar çdo mosbesimin brenda Boshtit.

14 shkurt 1939

Duçe tha se në lidhje me Shqipërinë, ne duhet të presim dy ngjarje: zgjidhjen e çështjes spanjolle dhe aleancën me Gjermaninë. Ndërkohë, ne duhet të përhapim thashetheme të ndryshme, si oktapodë ne duhet të trazojmë ujërat. Për sa i përket Francës, ai përsëriti se është e dëshirueshme për momentin të presin zhvillimin e ndërmarrjes së Baudouin.

Nëse atje nuk ka zhvillime, ne mund të ngremë pyetjen: Do të bëni apo jo biznes? Nëse jo, ne do të përgatitemi për luftë pa vonesë. Ai përsëri më tha se ne jemi në posedim të një arme sekrete, e cila, “edhe pse jo e mrekullueshme, mund, as më pak e as më shumë, të ndikojë në rrjedhën e luftës”.

16 shkurt 1939

Shqipëria është e shqetësuar. Ne kemi marrë një telegram nga atasheu ynë ushtarak në Tiranë, i cili e ka shqetësuar disi Duçen; ai tha se Mbreti Zog donte të urdhëronte mobilizimin e pjesshëm, dhe se Jacomoni ishte larguar me avion për në Romë. Situata nuk është edhe aq dramatike. E kam parë Jacomonin, i cili, në fakt, duket mjaft i qetë. Dje ai takoi Mbretin, i cili, pasi dëgjoi për ankesat tona, tha se ai, gjithashtu, kishte diçka për të thënë.

Ai pohoi se në Beograd ishte diskutuar ndarja e Shqipërisë, por ai përmendi disa hollësira, të cilat tregojnë se ai ishte vetëm pjesërisht dhe gabimisht i informuar. Ai gjithashtu përmendi edhe përgatitjen për një revoltë të brendshme, i mbështetur veçanërisht nga refugjatët, një deklaratë e cila ishte plotësisht e rreme. Ai përmendi emrat e shumë njerëzve, të cilët ishin përfshirë, dhe me përjashtim të Koçit, këta emra ishin të pasaktë.

Ai konkludoi duke riafirmuar dëshirën e tij për të arritur një mirëkuptim me ne dhe ai dërgoi Jacomonin si përfaqësuesin e tij me kompetenca të plota për të bërë marrëveshjen. Kur ia raportova Duçes me telefon, ai u përgjigj: “Po të kishim nënshkruar tashmë paktin tonë me Berlinin, ne mund të sulmonim menjëherë.

Siç qëndrojnë gjërat, ne duhet ta shtyjmë për më vonë”. Pastaj ai konfirmoi udhëzimet që prej dy ditësh ia kisha dërguar Jacomonit, të cilat janë si vijon: Për të mbajtur gjallë shqetësimin popullor, por të mos dështojnë në qetësimin e Mbretit Zog, duke i dhënë atij çdo siguri që ai dëshiron. Për të mbajtur ujërat e trazuara, në mënyrë që synimet tona reale të mos bëhen të njohura.

21 shkurt 1939

Jacomoni referoi mbi situatën shqiptare: Mbreti dhe mbështetësit e tij kanë deklaruar zyrtarisht se ata dëshirojnë të rivendosin marrëdhëniet më të përzemërta me ne, por Jacomoni trembet se kjo mund të jetë një manovër për të fituar kohë që Mbreti të vazhdojë me përpjekjet e tij për të vendosur marrëdhëniet me Fuqitë e tjera.

Jacomoni mendon se situata duhet të zgjidhet një herë e mirë. Duçe dhe unë nuk pajtohemi me të. Unë e udhëzova me telegram të rrijë me kujdes edhe për disa kohë, ndërsa ne jemi duke pritur për disa ngjarje ndërkombëtare, që do të na e bëjnë më të lehtë goditjen tonë.

5 mars 1939

Jacomoni na siguroi se rendi është rivendosur në Shqipëri dhe se Mbreti, pasi kishte provuar frikën më të madhe të jetës së tij, shkon në ekstrem duke demonstruar miqësinë e tij për ne. Ai më dërgoi përshëndetjen e tij “vëllazërore”. Fakti është se asnjë nga aktorët nuk ka folur dhe se loja vetëm po shtyhet.

Trump: Marrëdhënjet e këqia SHBA-Rusi ndryshuan para 4 orëve

Vladimir Putin ka qenë i pari që ka folur në konferencën për shtyp në lidhje me takimin që pati me Presidentin Donald Trump. Por gjatë takimit, Presidenti Putin i dhuroi edhe topin e kampionatit botëror Presidentit Amerikan

Ai tha se “Moska kurrë nuk ka ndërhyrë dhe kurrë nuk do të ndërhyjë në procesin e brendshëm të zgjedhjeve të SHBA.” Kreu i Kremlinit tha se kishte bërë propozime të forta për kontrollin e armëve. “Për bombat bërthamore, ne kemi përgjegjësi të veçantë për sigurinë ndërkombëtare”, tha ai. Më pas shtoi se e konsideronte të nevojshme që të dy vendet të punonin së bashku për çarmatimin bërthamor dhe mospërhapjen e armëve dhe për të shmangur vendosjen e tyre në hapësirë.

Nga ana e tij, Presidenti rus tha se marrëdhëniet dypalëshe po kalojnë nëpër një fazë të komplikuar. Si fuqi bërthamore, tha ai, ne mbajmë përgjegjësi për stabilitetin në botë. Ai tha se “e ashtuquajtura ndërhyrje ruse” në zgjedhjet presidenciale të vitit 2016 u ngrit nga Presidenti Donald Trump gjatë samitit të tyre në Helsinki. Zoti Putin përsëriti se shteti rus nuk ka ndërhyrë kurrë dhe nuk ka ndërmend të ndërhyjë në procesin e brendshëm të zgjedhjeve amerikane.

Ai i karakterizoi bisedimet me zotin Trump si “të suksesshme dhe të dobishme”. Zoti Putin ofroi marrjen në pyetje të 12 personave ndaj të cilëve janë ngritur akuza në SHBA, por i quajti pa kuptim pretendimet për bashkëpunim të fshehtë me fushatën e zotit Trump.

Presidenti Donald Trump tha se Shtetet e Bashkuara dhe Rusia duhet të gjejnë mënyra për të “bashkëpunuar në ndjekje të interesave të përbashkëta”. Ai i bëri komentet gjatë një konference shtypi në Helsinki, pas bisedimeve që pati me Presidentin rus Vladimir Putin.

Presidenti Trump tha se një dialog produktiv mes SHBA dhe Rusisë është i mirë për të dy vendet dhe “është diçka e mirë për botën”.

Presidenti amerikan tha se ata diskutuan mbi mosmarrëveshjet midis vendeve të tyre “në hollësi.”
Ai shtoi se marrëdhëniet midis SHBA dhe Rusisë nuk kanë qenë kurrë më keq po kjo ka ndryshuar rreth katër orë më parë. Presidenti Trump tha se është i sigurt se ai dhe zoti Putin do të takohen përsëri shpesh në të ardhmen.

“Mosmarrëveshjet mes dy vendeve tona janë të njohura dhe presidenti Putin dhe unë i diskutuam gjerësisht sot,” thotë Trump.

Ai thotë se do t’i adresojë problemet e botës që të dy vendet do të duhet të punojnë së bashku.
“Edhe gjatë tensioneve të Luftës së Ftohtë, kur bota dukej shumë e ndryshme nga ajo që ndodhi sot, Rusia dhe SHBA ishin në gjendje të mbanin një dialog të fortë”.

“Marrëdhënia jonë nuk ka qenë kurrë më e keqe se sa është tani. Megjithatë, kjo ndryshoi. Rreth katër orë më parë.”, ka thënë Presidenti Trump.