Çavuşoğlu: Shqipëria, mik i vërtetë me të cilin kemi lidhje të lashta

Ministri i Jashtëm i Turqisë, Mevlüt Çavuşoğlu, tha se Shqipëria nuk është vetëm një shtet me të cilin Turqia ka bashkëpunim në rajon, por edhe shtet mik me lidhje historike, raporton Anadolu Agency

Ministri turk gjithashtu realizoi një takim edhe me anëtarët e Dhomës së Tregtisë dhe Industrisë Shqipëri – Turqi (ATTSO), ku i pranishëm ishte edhe ambasadori i Republikës së Turqisë në Tiranë, Murat Ahmet Yörük.

“Shqipëria nuk është vetëm një shtet me të cilin Turqia ka bashkëpunim në rajon, por edhe mik i vërtetë me lidhje të lashta dhe historike”, tha kryediplomati turk gjatë takimit.

Çavuşoğlu theksoi se bashkëpunimi midis dy vendeve ka një kontribut të madh për mbështetjen e bizneseve prestigjioze turke dhe shqiptare. Ai tha se investimet e firmave turke në Shqipëri janë në rritje të vazhdueshme dhe se ato aktualisht kapin vlerë prej rreth 2,5 miliardë dollarëve.

“Do të kemi mundësinë që të shprehim dëshirën tonë për të ndihmuar në fusha të ndryshme, sidomos në sektorin e edukimit. Me Shqipërinë si një shtet mik së bashku hedhim hapa përpara. Bashkëpunimi midis dy vendeve ka një kontribut të madh për mbështetjen e bizneseve prestigjioze turke dhe shqiptare. Shikojmë se ka një rritje të investimeve të kompanive prestigjioze. Kemi dhe një rritje të numrit të anëtarëve dhe kjo na bën krenarë”, deklaroi Çavuşoğlu.

“Është e rëndësishme të rrisim investimet edhe në anën kualitative, Aktivitetet që dhoma organizon janë shumë të rëndësishme për të ardhur në ndihme për projekteve që janë të nevojshme në Shqipëri, që janë të rëndësishme për rritjen ekonomike jo vetëm në Shqipëri, por edhe në trevat e Ballkanit”, shtoi ai.

Sipas ministrit të Jashtëm të Turqisë, të rëndësishme janë edhe projektet për t’i ardhur në ndihmë popullsisë.

“Për marrëdhëniet ekonomike do të punojmë vazhdimisht. Kemi marrëdhënie shumë të ngushta me kryeministrin e Shqipërisë dhe do të hedhim hapa të rëndësishëm për zhvillimin e projekteve të ndryshme. Kemi krijuar mekanizma të ndryshëm për ekonominë. Kemi besimin së marrëdhëniet ekonomike dypalëshe do të kenë një rritje”, tha ministri Çavuşoğlu.

Seyhan Pencablıgil, kryetar i Bordit Drejtues të ATTSO-së, theksoi gjatë takimit se kjo organziatë është krijuar për të mbështetur marrëdhëniet tregtare mes Shqipërisë dhe Turqisë dhe, sipas tij, anëtarë janë edhe kompani shqiptare.

Ministri Çavuşoğlu nesër do të realizojë takime me zyrtarë të lartë të Shqipërisë, si kryeministrin Edi Rama, kryetarin e Kuvendit Gramoz Ruçi, ministrin për Evropën dhe Punët e Jashtëm, Ditmir Bushati, me të cilin do të mbajë një konferencë të përbashkët për mediat.

Deklarata përfundimtare e Samitit të liderëve të BE-së

Liderët e Bashkimit Evropian publikuan deklaratën përfundimtare të Samitit të Liderëve të BE-së e cila përfshin çështjet si emigrimi, siguria dhe marrëdhëniet e jashtme

Në deklaratën ku imigracioni përbën një nga pikat kryesore të rendit të ditës të samitit, thuhet se çështja është ende në axhendën e BE-së, pavarësisht se është shënuar një ulje prej 95 për qind të fluksit të emigrantëve të parregullt.

Po ashtu në deklaratë vihet theksi në nevojën e bashkëpunimit me vendet e burimit dhe tranzitit në mënyrë që të luftohet migracioni i parregullt dhe se veçanërisht duhet të zgjerohet partneriteti me Afrikën Veriore.

Bëhet thirrje për rritjen e bashkëpunimit me vendet e treta për të rritur luftën kundër trafikantëve të qenieve njerëzore ndërsa theksohet se është vendosur formimi i një force të përbashkët pune në Qendrën Evropiane të trafikimit të Migracionit të Europolit.

Të gjitha vendet anëtare duhet të tregojnë solidaritet për të përmirësuar sistemin e rikthimit të emigrantëve të parregullt dhe duhet të bëhen përpjekje për zbatimin e plotë të marrëveshjes ndërmjet Turqisë dhe BE-së.

Siguria

Lidhur me luftën e BE-së kundër terrorizmit në deklaratë thuhet se është shënuar përparim i rëndësishëm. Duke iu referuar sulmit në Salisbury, theksohet se BE ka marrë vendimin për të parandaluar dhe rezistencën kundër kërcënimeve hibride, kibernetike, kimike, biologjike, radiologjike dhe bërthamore.

Më tej është njoftuar se është arritur dakordësimi në çështjen për përgatitjen përpara vitit të ri të rregulloreve kundër përpjekjeve për sulme ndaj rregullave kundër terrorizmit, sigurisë kibernetike dhe përpjekjet për të sulmuar sistemin demokratik.

Marrëdhëniet me jashtë

Në deklaratë ku nënvizohet rëndësia e bashkëpunimit mes Evropës dhe Afrikës në rendin aktual global, thuhet se marrëdhëniet mes palëve duhet të sillen në një nivel të ri.

Gjithashtu potencohet se është mirëpritur vendimi për samitin e parë që do të zhvillohet në Egjipt në muajin shkurt mes BE-së dhe vendeve të Ligës Arabe.

Është jetik reduktimi i emetimit të gazrave serrë në të gjithë sektorët sipas angazhimeve të Marrëveshjes për Klimën, thuhet në deklaratë.

Shqiptarët të formojnë Armatën e tyre

Avokati Spartak Ngjela në një status në “Facebook” shkruan se vetëm ushtria e Kosovës si armatë moderne dhe me 40 mijë ushtarë, i jep Kosovës njohjen nga Beogradi

“Kosova sot e vendosi ngritjen e ushtrisë me 101 vota në Parlamentin e saj.”, shkruan ai duke hedhur idenë se edhe Shqipëria duhet sa më shpejt të formojë armatën e saj. “E gjithë trazira në Ballkanin Perëndimor vjen nga fakti që të dy shtetet shqiptarë nuk kanë ushtritë e tyre.”, shkruan Ngjela.

Statusi i Spartak Ngjelës:

Vetëm ushtria e Kosovës si armatë moderne dhe me 40 mijë ushtarë, i jep Kosovës njohjen nga Beogradi. Kosova sot e vendosi ngritjen e ushtrisë me 101 vota në Parlamentin e saj.

Po Shqipëria? Duhet edhe Shqipëria të formojë sa më shpejt armatën e saj.

I.

E gjithë trazira në Ballkanin Perëndimor vjen nga fakti që të dy shtetet shqiptarë nuk kanë ushtritë e tyre. Pa ushtri nuk mund të ketë as pavarësi të sigurt dhe as politikë reale. Të dy shtetet shqiptarë janë pa ushtri. Si shpjegohet kjo?

Kosova është shtet i ri dhe sigurisht që ka qenë dhe është nën suzerenitet ndërkombëtar dhe i mbrojtur nga UNMIK-u. Por ka ardhur koha e sovranitetit. Sovranitet pa ushtri kombëtare nuk mund të ketë për Kosovën. Ajo duhet ngritur sa më shpejt që të jetë e mundur.

II.

Edhe Shqipëria është pa armatën e saj. Si ka mundësi? Aktualisht nuk duhet të merremi me analiza: shqipëria duhet të ngrejë menjëherë armatën e saj të kompletuar për mbrojtjen e territorit.
Kohët kanë ndryshuar. Gjendja dhe situata në Ballkanin Perëndimor është në një konflikt në rritje. Rritja e konfliktit vjen si pasojë e konkurencës ndërkombëtare Amerikë- Rusi në lidhje me Ballkanin Perëndimor.

Është politika amerikane që po kërkon ta ngrejë Shqipërinë dhe Kosovën si aks politik kryesor në Ballkanin Perëndimor dhe është politika ruse që këtë po kërkon ta bëjë me Serbinë. Prandaj pyetja që ngrihet tani është kjo: kush do të fitojë forcën në Ballkanin Perëndimor, Shqipëria e plotë etnike apo Serbia pushtuese e territireve shqiptarë?

Kjo do të varet shumë nga lidërshipët që do të drejtojnë në Shqipëri menjëherë pas Reformës në Drejtësi. Por edhe nga armata shqiptare e kompletuar me armë moderne dhe me një ekip ushtarak profesional.

STAS-i gjerman, një dosje “ekstra” për spiunët shqiptarë

Zbardhen sekretet e dosjeve të ish-shërbimi informativ gjermano-lindor. Ja çfarë përmbajnë arkivat për Shqipërinë. Deutsche Welle shtroi për herë të parë pyetjen “Çfarë përmbajnë arkivat e ish sigurimit gjermanolindor Shtazit (Staasi) për Shqipërinë? Me këtë pyetje kolegët e redaksisë shqipe ju drejtuan arkivit në Berlin. Nga dokumentet e mbledhura përgatitën materialet në vijim

Kanë kaluar shumë vite që kur qytetarët e RDGj-së u sulën drejt selisë qendrore të Sigurimit të Shtetit në Berlinin lindor. Aty ata themeluan një institucion të vetin, i cili mori emrin: “Emisari federal i ngarkuar me dokumentet e shërbimit të sigurimit të shtetit të ish-RDGJ-së”. Ky institucion përgatiti vendosjen e dosjeve në dispozicion të të prekurve. Me kalimin e viteve u demaskuan shumë prej ish-bashkëpunëtorëve të Shtazit. Shumë viktima mësuan se çfarë përmbanin arkivat për ta dhe se kush i kishte spiunuar. Në shumë vende të Evropës Lindore ka pasur shërbime sekrete të ngjashme, por puna me dosjet funksionon me siguri shumë ndryshëm. Edhe pas gati 30 vjet pas përmbysjes, shumë shoqëri merren me trashëgiminë e shërbimit sekret.

Spiunët

Çfarë shkruanin “spiunët” që vizitonin Shqipërinë në vitet tetëdhjetë? Në shumicën e rasteve raportet kanë qenë banale. Si jetojnë shqiptarët për shembull, ose çfarë mendojnë ata për kushtet sociale. Shqiptarët i kanë quajtur spiunë. Shtazi, i quante bashkëpunëtorë jozyrtarë. Një i tillë, me pseudonimin “Sarkazma” ka vizituar për disa ditë Shqipërinë në shkurt të vitit 1980, i bashkangjitur në një delegacion të fabrikës së cigareve Tabak- Kontores Drezden. Delegacioni vizitonte Shqipërinë për të biseduar për importimin e duhanit.

“Sarkazma”

Dy javë pasi është kthyer nga Shqipëria, “Sarkazma” është vizituar në shtëpinë e tij nga Kapiteni Müller, një punonjës i ministrisë së brendshme. Ai ka raportuar nga ora 8 deri në dhjetë të mbremjes dy orë rresht çfarë ka parë dhe dëgjuar në Shqipëri. Ja pjesë nga raporti:”Duhet thënë është se pala shqiptare prezantoi fillimisht një lloj tjetër duhani, me kualitet më të dobët dhe me çmim më të lartë. Bisedimet u rënduan dhe rrezikonin madje të ndërpriteshin. Por synimi ekonomik u arrit. Gjatë udhëtimit, u pa se qytetarët shqiptarë, partnerët e bisedimeve, personeli i hoteleve ose qytetarët e tjerë i largoheshin çdo lloj diskutimi për çështje politike, ose për gjendjen sociale në Shqipëri.

Varfëria

Gjendja sociale vlerësohet në varfëri të papërshkrueshme. Sarkazma ka pasur mundësinë të vizitojë disa shtëpi, ku ka parë kushte primitive jetese. Mundësitë për të blerë janë shumë të kufizuara, madje edhe në Tiranë. Në dyqane ka vetëm gjëra primitive. Rrugët gjatë ditës janë thuajse bosh, vetëm mbrëmjeve nga ora 18:00 deri në orën 20.00 qytetarët dalin në rrugë dhe sheshe, dhe pas kësaj ore qyteti zbrazet sërish.

Nën vëzhgim

Gjatë një udhëtimi me makinë delegacioni ka qenë nën vëzhgim të vazhdueshëm. Kur gjatë një pushimi të shkurtër “Sarkazma” ka bërë disa fotografi, kalimtarët i kanë thënë se fotografimi ndalohet. Tabela për të treguar këtë nuk ka. Kur ka qëndruar i mrekulluar për të parë përreth, Sarkazma ka parë disa pozicione artilerie. Pozicione të tilla ka parë edhe në zona të tjera. Në të gjitha qytetet e vizituara, pas gati çdo shtëpie është duke u ndërtuar një bunker, nëse nuk ekziston një i tillë. Bunkerët përbëhen nga pjesë gjysmë të rrumbullakta betoni, që sillen të gatshme dhe maskohen me dhe dhe bar. Bunkerët janë jashtëzakonisht primitivë. Shumë shumë, thotë “Sarkazma”, ato mund të të mbrojnë nga shiu dhe çdo familje i ngre ato vetë. “Sarkazma” ka kërkuar hyjë në një bunker, por kjo i është ndaluar kategorikisht. Në Tiranë ai ka parë se ambasada kineze ruhet shumë mirë dhe se kërkush nuk i afrohet asaj më shumë se 20 ose 30 metra.

Fundi i raportit

Këtu merr fund raporti për Shqipërinë. Sarkazma vazhdon me tregimet për anëtarët e tjerë të delegacionit që ka vizituar Shqipërinë. Njëri prej tyre ka dëshiruar të vizitojë Gjermaninë perëndimore, për të blerë një fustan dhe një magnetofon për vajzën. Për të mundësuar këtë ai ka kërkuar ndihmën e “Sarkazmës”.

Librat e Enverit në sirtarët e Stasit

Ambasada shqiptare në RDGJ, është marrë në vitet ’80 me shpërndarjen e materialeve propagandistike në Gjermani. Në shumë raste materialet propagandistike që vinin nga Shqipëria përfundonin në duart e Stasi-t. Ambasada shqiptare është marrë edhe me mbledhjen e informacioneve në rrugë jozyrtare. Këtë e tregon një dokument që gjendet sot në arkivat e Stasi-t. Dokumenti me nr. 22854 është shkruar nga Kapiteni Becker, i cili ka hedhur në letër ato çka i ka treguar IMB me pseudonimin “Runge” (bashkëpunëtor jozyrtar për përpunimin e personave të dyshuar si armiq). Dokumenti që mban datën 6 shkurt 1985 tregon se “Runge” ka raportuar se ambasadori i ambasadës së Republikës Popullore Socialiste të Shqipërisë në Republikën Demokratike Gjermane ka treguar interes të madh për marrjen e informacioneve mbi aktivitetet e anëtarëve të Byrosë Politike të SED (Unionit Socialist Gjerman- Partia në pushtet) të cilat nuk publikohen në shtyp.

Po ashtu ai ka kërkuar që për marrjen e informacioneve të tilla të përdoren edhe rrethet e miqve. Burimit i është kërkuar po ashtu të përpunojë informata për rolin dhe pozicionimin e kishës në RDGJ dhe për temën e “Kisha si mbulesë për grupe të ndryshme opozitare”. Këto informacione ai duhet t`ja dorëzojë ambasadorit shqiptar deri në shkurt të 1985-ës. Një dokument tjetër është shkruar po ashtu nga kapiteni Becker, por ai përmban informata të dhëna nga IMS me pseudonimin “Pit” (bashkëpunëtor jozyrtar për sigurimin e objekteve). Në të thuhet se “nga një burimi besueshëm u mësua se gjatë një bisede me një diplomat shqiptar në ambasadën e RPSSH në RDGJ (Gjermania lindore) është treguar interesim për këto informacione: si punon SED? çfarë detyrash kryejnë drejtuesit e rretheve dhe qarqeve të SED për përmirësimin e kushteve të punës dhe organizimit të saj, çfarë pengesash shfaqen në arritjen e rendimenteve në ndërmarrje dhe si ndikon partia për mënjanimin e tyre, çfarë roli luajnë partitë e bllokut, a kanë ata komitete nëpër ndërmarrje?

Më tej janë bërë pyetje për marrëdhëniet midis RDGJ dhe RFGJ. Diplomati shqiptar ka shprehur mendimin se për udhëheqjen shqiptare çështja gjermane është e mbyllur. Që ministria e sigurimit të shtetit, Stas-i ka mbajtur shumë mirë evidenca për aktivitetet jodiplomatike të diplomatëve shqiptarë në RDGj e tregon edhe një dokument tjetër i datës 30 tetor 1980. Ai bën fjalë për shpërndarjen e materialeve politike propogandistike.

Si shpërndahej literatura

Në datën 25 tetor punonjësi drejtues i ambasadës së RPS të Shqipërisë në RD Gjermane i shoqëruar nga shoferi dhe gruaja e tij kanë vizituar një nga bashkëpunëtorët tanë në shtëpinë e tij. Vizita nuk ka qenë e paralajmëruar dhe është zhvilluar në orët e para të mbrëmjes. Gjatë vizitës personi…i ambasadës i ka dhënë bashkëpunëtorit tonë veprën më të fundit të kryetarit të PPSH, Enver Hoxha drejtuar kundër Bashkimit Sovjetik dhe bashkimit të vendeve socialiste, “Hrushovianët”, Kujtime, botuar nga Instituti i Studimeve Marksiste Leniniste, në shtëpinë botuese “8 nëntori” Tiranë 1980, për ta studiuar vetë dhe për ta shpërndarë mes qytetarëve të RDGJ dhe Bashkimit Sovjetik si dhe pjesëtarëve të Ushtrisë sovjetike në zonën e Kotbusit.

Kështu ai ka marrë 17 ekzemplarë në gjuhën gjermane dhe 15 ekzemplarë në gjuhën ruse. Njëkohësisht ai ka marrë revistën “Shqipëria e re” numrin 3- të i vitit 80 në gjuhën ruse dhe gjermane (nga 10 ekzemplarë për secilin). Punonjësi i ambasadës ka paralajmëruar se do të sjellë ekzemplarë të tjerë të “Hrushovianë-ve” në gjuhën franceze dhe atë spanjolle për tja shpërndarë ato qytetarëve të huaj, për shembull atyre algjerianë. Nga biseda me bashkëpunëtorin tonë diplomati donte të merrte informacione se si kanë reflektuar qytetarët e RD Gjermane ndaj ngjarjeve të Polonisë. Thëniet e bashkëpunëtorit tonë se shumë punëtorë janë bërë agresivë dhe kritikë, u pranuan nga diplomati. Ai vetë përfaqëson mendimin zyrtar të PPSH sipas të cilës revoltat në Rep.Pop. Polonisë kanë shumë “përmbajtje pozitive” por ato keqpërdoren nga fuqitë imperialiste për qëllimet e tyre agresive. Diplomati u vu në dijeni nga punonjësi ynë se anëtarët e KPD- Partisë Komuniste Gjermane kanë nxjerrë një urdhëresë që të kufizojnë vizitat në ambasadën e RPSSH për të shmangur rënien në sy të organeve të sigurimit të DDR.

Dëbim nëse afroheshe me gratë shqiptare

Pas prishjes së marrëdhënieve me Bashkimin Sovjetik, Sigurimi shqiptar i shtetit vendosi nën vëzhgim të rreptë të gjithë të huajt që ndodheshin në Shqipëri. Afrimi me gratë shqiptare nuk i lejohej asnjërit prej tyre. Më 17 shkurt 1969 Kapiteni Kulka i shkruan Sektorit kryesor të Ministrisë së Sigurimit të Shtetit (Stasi). Nga një udhëtim në Shqipëri vihet re se: Që prej ndodhive në Bashkimin Sovjetik më 21.8.1968 ka filluar një kontroll jashtëzakonisht i madh i të huajve që shkojnë në Shqipëri. Kështu, nga organet shqiptare të sigurimit vëzhgohet me vëmendje kur dilet dhe kur hyhet në hotel, ku shkohet dhe sa gjatë qëndrohet diku. Edhe kur përdoren makinat ato ndiqen vazhdimisht nga një makinë shqiptare,në të cilën ndodhen tre persona.

Nga këto masa nuk preken vetëm udhëtarët nga RDGJ (DDR) por edhe udhëtarët që qëndrojnë në hotel dhe vijnë nga RP Hungarisë dhe RP Polonisë. Këto masa nuk duket të jenë marrë në të njëjtën mënyrë edhe për qytetarët nga Bashkimi Sovjetik. Një dokument tjetër ka lidhje me një raport, që një punonjës nga një Kombinat i Drezdenit ka dhënë pasi është kthyer nga Shqipëria, ku ka ndihmuar në ngritjen e një fabrike. Nga raporti nuk bëhet e qartë se për cilin projekt bëhet fjalë. Viti, po ashtu nuk bëhet i njohur. Raporti ka të bëjë me vëzhgime që nuk kanë lidhje me punën, për të cilën personi ka qenë i angazhuar në Shqipëri. Ai tregon se: Gjatë gjithë kohës së qëndrimit të tij kam qenë “i shoqëruar” nga një kujdestar, si në kohën e punës ashtu edhe gjatë kohës së lirë. Dhoma ngjitur më dhomën në hotel nuk ka qenë e zënënë asnjë nga ditët. Aty duhet të ketë pasur ndonjë aparat përgjimi. “Gjatë bisedës përfundimtare me partnerin shqiptar u konfrontova me fakte, të cilat i kam folur vetëm në dhomë, personalisht me shoqëruesin nga RDGJ (DDR).

Nga pala shqiptare janë marrë dokumenta të projektit të ekspertëve kinezë.” Bildunterschrift: Großansicht des Bildes mit der Bildunterschrift: Deti Jon i parë nga dritarja e një bunkeri Dhe më tej ai shkruan se gjatë qëndrimit të tij janë bërë vazhdimisht përpjekje për ta kompromentuar. Ndër të tjera, një grua i është afruar në kantjerin e ndërtimit, në një mënyrë që nuk mund të keqkuptohej. Pasi u refuzua me forcë, ajo nuk është shfaqur më në kantjer. Më tutje: “Nga montatorët rumunë mësova se njëri prej tyre duhej të largohej brenda 24 orëve nga Shqipëria për shkak të kontakteve me gratë shqiptare”. Si arsye e dëbimit nga Shqipëria u tha, se montatori kishte lënë të binte një copë dërrasë nga 2 metra lartësi, dhe kjo kishte lënduar ixhinjerin shqiptar. “Përfaqësia tregtare e RDGJ (DDR) nuk u informua më parë për këtë ngjarje prandaj nuk mund të ndihmonte në sqarimin e saj. Dokumenti tjetër është i datës 2 maj 1976. Ai përmban raportin mujor për ngarkim-shkarkimin e anijes “Elmela” si dhe mbajtjen e inventarit. Raporti thotë se nuk ka patur probleme shumë të mëdha. Në pjesën e raportit, që lidhet më situatën financiare ka një mospërputhje shifrash. “Unë kisha porositur 100 litra karburant për muajin prill dhe i morra ato në formë tallonash. Prej tyre mua lejua të marr 35 litra.

Por në llogarinë mujore janë shkruar 65 litra.” Pastaj raporti flet për bashkëpunimin me parnerët shqiptarë. “Dua të vë në dukje se javët e fundit kam qenë nën një vëzhgim shumë të madh të pikave të caktuara shqiptare. A kanë qenë ata punonjës të sigurimit, këtë vetëm mund ta marr me mend, sepse nuk kam dëshmi. Ky vëzhgim i madh fillon që nga shtëpia dhe përfshin të gjithë veprimtaritë e mia, shëtitjet, udhëtimet në Durrës, blerjet në qytet, vajtjen në kinema etj. Edhe veprimtaria ime në port vëzhgohet. Tek kolegët e tjerë nga Polonia nuk shihet kjo. Unë i kam raportuar drejtuesit tonë për këto. Të gjithë kolegëve shqioptarë u kanë rënë në sy vëzhgimet e tilla dhe bashkëpunimi ynë është vetëm zyrtar. Bisedat kanë vetëm karakter pune. Ndodh nganjëherë, që gjithë ditën nuk këmbejmë asnjë fjalë me punonjësit e portit, çka mund të argumentohet me frikën e madhe që kanë punëtorët.

STASI interes për albanologët

Ish sigurimi gjermano-lindor ka treguar interes për Kongresin e gjuhës shqipe të zhvilluar më 7 dhe 8 dhjetor 1984 në Tiranë. Sipas dokumenteve që ndodhen në arkiva, Stasit nuk i ka interesuar përmbajtja dhe qëllimi i kongresit, por vetëm pjesëmarrësit në të, një pjesë e të cilëve ishin albanologë të shquar që vinin nga Gjermania lindore ose ajo perëndimore. Sipas dokumentit 22854, të sektorit që merrej me kundërspiunazhin në ministrinë e sigurimit të RDGJ, major Ditrich ka marrë raportin mbi kongresin e gjuhës nga bashkëpunëtori me pseudonimin “doktor”. Bashkëpunëtori ka qenë një GMS, që do të thotë se ka qenë bashkëpunëtor shoqëror i sigurimit, një lloj i veçantë e bashkëpunëtori jozyrtar, të cilët kanë filluar të regjistrohen pas vitit 1968.

Dokumenti quhet –Kongresi për problemet e gjuhës shqipe, më 7 dhe 8 dhjetor 1984 në Tiranë. Në të shkruhet: Shërbimit tonë i është bërë jozyrtarisht e ditur se Kongresi zhvillohet nën kujdesin e gruas së Enver Hoxhës dhe duhet të gjejë pasqyrim të zgjeruar në shtypin shqiptar. Në Kongres, i cili kishte në rend të ditës çështje të transformimit të gjuhës, ortografisë dhe gramatikës, merrnin pjesë 300 shqiptarë. Ata ishin përveçse gjuhëtarë të Akademisë së shkencave dhe Universitetit të Tiranës edhe njerëz të kulturës dhe shkencës. Përveç tyre në Kongres merrnin pjesë edhe Dr. Köteritz (Dr. Këteric), gjuhëtar krahasues nga Gjermania perëndimore.

Nga Gjermania perëndimore ishte ftuar edhe një albanolog tjetër, i cili nuk erdhi në Kongres. Po ashtu pjesë merrte një albanolog nga Suedia, katër italianë (ndër të cilët një farë Dr. Alti Mari), një francez dhe një greke (me origjinë shqiptare). I ftuar po ashtu ishte një shkencëtar jugosllav, i cili për arsye që nuk dihen nuk morri pjesë në Kongres. Gjuhëtarë bullgarë nuk u ftuan. Një diplomat i ambasadës bullgare në Tiranë tregoi pakënaqësi të madhe sepse Republika Popullore e Bullgarisë është përpjekur kohët e fundi për përmirësimin e marrëdhënieve me Shqipërinë. Në Kongres morën fjalën katër shkencëtarë të huaj: Dr. Këteric, Dr. Alti Mari, një gjuhëtar nga RDGJ dhe një francez. Më pas raporti tregon për çfarë është folur nëpër korridore. Për shembull në një nga pasazhet lexohet: “Prof. Ryda nga Akademia shqiptare e shkencave, më tha se Prof. Irmscher (Irmsher) nga Akademia e Shkencave të Gjermanisë lindore (RDGJ) do të marrë së shpejti një ftesë për të marrë pjesë në një kolegjium gjuhe në Tiranë. Tema nuk është bërë e njohur.

Ryda më tha po ashtu se Akademia e Shkencave të Gjermanisë lindore është e gatshme të ndihmojë Akademinë Shqiptare të Shkencave (ASHSH) për përpunimin e një gramatike për mësimin e gjuhës shqipe. ASHSH është çdo kohë e gatshme të konsultohet. Më pas shkruhet: Në një diskutim me një farë Prof. Buda (mbase nga Akademia Shqiptare e Shkencave) u bë e njohur se Shqipëria ka bërë plane për të zgjeruar mësimin e gjuhës gjermane. Gjermanishtja do të futet si gjuhë e huaj në shkolla. Jozyrtarisht thuhet se Shqipëria do t`i drejtohet Gjermanisë perëndimore (RFGJ) nëse nuk merr ndihmën e duhur nga Gjermania lindore.

Posti i ambasadorit

Gjuhëtari nga Gjermania perëndimore, Dr. Këteric i ka thënë palës shqiptare se nëse marrëdhëniet diplomatike midis dy vendeve fqinje rifillojnë, atëherë do të kishte qenë mirë sikur postin e Ambasadorit ta merrte Albanologu Dr. Schmid, nga Universiteti i Freiburgut, meqenëse ai zotëron mirë gjuhën shqipe. Një rol të veçantë, shkruhet në raport, për parapërgatitjen e marrëdhënieve diplomatike midis RPSSH dhe RDGJ ka luajtur një farë Prof. Knoblauch (Knoblau), i cili është me prejardhje nga Gjermania lindore, por aktualisht ka dy nënshtetësi atë gjermano perëndimore dhe austriake. Ai duhet të ketë bërë punë të madhe për ngritjen e turizmit në Shqipëri. Dr. Köteric tha po ashtu se Kongresi tregon se Shqipëria në një farë mase është e gatshme të hapet ndaj vendeve të tjera. Jozyrtarisht u tha se mikpritja ishte shumë e madhe. Pjesëmarrësit e Kongresit mund të porosisnin në hotel çfarë të donin dhe pagesa i kalonte palës shqiptare. Përveç kësaj, ditën e fundit të Kongresit pjesëmarrësit, të paktën ata që vinin nga jashtë, morën 100 lekë. Raporti përfundon: “burimi duhet ruajtur patjetër”.

Deutsche Welle

Largimi i UNMIK-ut do ta gëzonte Prishtinën e hidhëronte Beogradin

Prishtina dhe Beogradi mbajnë pozicione të kundërta në lidhje me mundësinë që misioni i Kombeve të Bashkuara në Kosovë, i njohur me shkurtesën UNMIK, të mbyllet. Debatet rreth kësaj çështjeje, kanë pasuar një letër të publikuar nëpër rrjetet sociale të ambasadores amerikane në Kombet e Bashkuara, Nikki Haley, e cila i kërkoi Sekretarit të Përgjithshëm të OKB-së që t’i ndërpresë mandatin UNMIK-ut në Kosovë

Kjo kërkesë është mirëpritur nga Qeveria e Kosovës, ndërkaq është kundërshtuar nga Qeveria e Serbisë.
Në një përgjigje për Radion Evropa e Lirë të dërguar nga zëdhënësja e Qeverisë së Kosovës, Donjeta Gashi, thuhet se përmbyllja e këtij misioni dhe zëvendësimi i Rezolutës 1244 të Këshillit të Sigurimit do t’i kontribuonte paqes dhe stabilitetit në rajon.

“Ka kaluar koha e UNMIK-ut dhe Rezolutës 1244 dhe sa më shpejt që të hiqet kjo rezolutë dhe Kosova të anëtarësohet në OKB, do t’i kontribuonte paqes dhe stabilitetit në rajon”, thuhet në përgjigjen e Qeverisë së Kosovës.

​Ambasadorja e SHBA-së në OKB, Nikki Haley, në ditën e fundit si ambasadore i kërkoi sekretarit të Përgjithshëm të OKB-së, Antonio Guterres, të përmbyllet misioni i UNMIK-ut në Kosovë. Kjo kërkesë u kundërshtua nga presidenti i Serbisë, Aleksander Vuçiq i cili tha se “tërheqja e paqeruajtësve të OKB-së nga Kosova nuk do të linte zgjidhje tjetër për Serbinë përveç se të mbrojë popullatën etnike serbe në Kosovë”.

“Në mënyrë të qartë amerikanët dëshirojnë të tërheqin gjithë atë çfarë OKB-ja përfaqëson sot në Kosovë sepse për amerikanët Kosova është shtet i pavarur dhe sovran. Dëshirojnë të largojnë edhe gjurmët e fundit të rezolutës 1244 dhe të tregojnë se vendimi i tyre ka qenë i vetmi i mundur”, ka deklaruar Vuçiq.

Tërheqja e UNMIK-ut, sipas tij, dhe formimi i ushtrisë së Kosovë do ta sillte Serbinë në një pozitë tmerrësisht të keqe në të cilën, siç tha ai, “nuk do të kishte asnjë zgjidhje tjetër përveç se të mbrojmë vendin tonë dhe popullin tonë”.

Mirëpo, Vuçiq nuk specifikoi se çfarë aksione do të mund të ndërmerrte Serbia nëse misioni i OKB-së, i njohur si UNMIK, do të ndërpritet.

Për profesorin në Universitetin ‘John Hopkins’ në Uashington, Daniel Serwer, ky kundërshtim është i kuptueshëm përderisa Serbia e sheh këtë mision si dëshmi të sovranitetit të saj në Kosovë, që sipas tij, është e pakuptimtë. Server i tha shërbimit të Ballkanit të Radios Evropa e Lirë se tashmë SHBA-ja e ka një parim të përmbylljes së misioneve të OKB-së aty ku është e mundur.

“Nuk jam i habitur që për këtë kundërshtohet në Beograd pasi prania e OKB-së në njëfarë mënyre për Serbinë është dëshmi e sovranitetit të saj në Kosovë, që është e pakuptimtë pasi në realitet nuk ka sovranitet, përveç në veri të Kosovës dhe një lloj kontrolli në pjesë tjera ku jetojnë komuniteti serb, por që edhe Beogradi në vitin 2013, e ka pranuar në marrëveshjen e Brukselit që Kushtetuta e Kosovës të zbatohet në tërë territorin e Kosovës”, ka thënë Serwer.

Ndërkohë, misioni i UNMIK-ut në Kosovë nuk është përgjigjur në pyetjet e Radios Evropa e Lirë për misionin, angazhimet dhe aktivitetet që ka aktualisht në Kosovë. Për ish- ministrin e Jashtëm të Kosovës, Skender Hyseni, përmbyllja e misionit të UNMIK-ut do të mund të bëhej vetëm përmes një rezolute të re të Këshillit të Sigurimit e cila do të zëvendësonte rezolutën 1244, dhe për këtë sipas tij, institucionet e Kosovës do të duhej të ishin më aktive dhe të insistonin se në Kosovë nuk ka nevojë për misionin e OKB-së.

“Unë shpresoj shumë se një nga vendet me të drejtë vetoja, përkrahëse të Kosovës në këtë rast SHBA ose Britania e Madhe do të bëjnë kërkesë zyrtare që rezoluta 1244 të përmbyllet me një rezolutë të re e cila konstaton përmbylljen e misionit të UNMIK-ut”, tha Hyseni.

“Institucionet e Kosovës është dashur të insistonin në kërkesën që unë kam bërë si ministër i Jashtëm, pra të vazhdonin ta përsërisnin këtë kërkesë edhe me shkrim edhe në mbledhjen e Këshillit të Sigurimit,por fatkeqësisht kjo nuk ka ndodhur. Duhet vazhdimisht institucionet e Kosovës të insistojnë se nuk ka nevojë më për mision të OKB-së në Kosovë, se Kosova është shtet, se ka institucione funksionale, ka kushtetutë, ka rend, ka ligj dhe nuk ka më asnjë nevojë të na ofrohen shërbime të OKB-së përmes një misioni në Kosovë”, theksoi Hyseni.

Misioni i UNMIK-ut është neutral ndaj statusit të Kosovës dhe vepron sipas rezolutës 1244 të OKB-së e cila ka qenë kompromis midis vendeve perëndimore dhe Rusisë për t’i dhënë fund konfliktit në Kosovë.
Qëllimi i këtij misioni është të kujdeset për paqen, sigurinë, sundimin e ligjit në Kosovë. Ky mision dikur ka numëruar 15 mijë të punësuar dhe sot janë rreth 380. Buxheti i këtij misioni prej qershorit të vitit 2017 deri qershor të 2018 ka qenë rreth 38 milion euro.

Pas shpalljes së pavarësisë më 17 shkurt, 2008, institucionet e Kosovës zyrtarisht disa herë kanë thënë se rezoluta 1244 është e tejkaluar dhe nuk e përfaqëson realitetin e ri dhe se misioni i UNMIK-ut nuk ka më funksion në Kosovë. Prishtina zyrtare ka kërkuar që misioni I UNMIK-ut të reformohet dhe të mbetet vetëm si zyrë përfaqësuese e OKB-së në Kosovë.

Rushiti tregon se ende ka rrëfime tronditëse nga të mbijetuarat e dhunës seksuale gjatë luftës

Feride Rushiti nga Qendra Kosovare për Rehabilitimin e të Mbijetuarve të Torturës (QKRMT), ka folur për fushatën “Bëhu Zëri Im”, dhe të gjitha punët që bëhen aty me të mbijetuarat nga dhuna seksuale nga forcat serbe të vitit 1999

Rushiti në Express Intervistën në KTV, tha se rrëfimi i Vasfije Krasniqit-Goodman, është pjesë e kampanjës “Bëhu zëri im” që shpejt u kthye në “Heshtja bëhet zë”.

Ajo ka folur për rrëfimin e Vasfijes, e ka quajtur heroinë e ka thënë se e ka thyer heshtjen. “Nganjëherë krijohet përshtypja se kjo kategori nuk vlerësohet fare nga shoqëria, në organizatën tonë, po them se kemi rrëfime edhe më tronditëse se kjo që u dëgjua. Megjithatë, mirë që të gjithë i dhanë epitetin Heroinë, përmes saj të gjitha gratë tjera të mbijetuara morën këtë epitet. Njëra e mbijetuar tha se rrëfimin e Vasfijes “’mund ta quaj “Liberalizim të shpirtit tim’”, tha ajo.

Rushiti, tha se pas këtij rrëfimi, që konsiderohet i pari të jetë publik, kanë pasur kontakte të shumta me persona që kanë dashur të takohen me Vasfijen të cilën tani e quajnë forcë të tyre.

Ajo tha se presin që si Vasfija të marrin guximin edhe gratë tjera. “Për të ndryshuar qëndrimin në shoqëri duhet kohë, por është mirë që u thye heshtja. Duhet të krijojmë solidaritet ndaj tyre, t’i pranojmë me të kaluarën e tyre. Kemi raste si Vasfija që ishte 16 vjeçare, por ato kanë qenë fëmijë, ka pasur fëmijë që atë kohë ishin 9 vjeçare”, tha ajo.

Rushiti tha se të mbijetuarat e dhunës seksuale nga lufta, kanë ndihma mjekësore, sociale, e të tjera, pasi ka prej tyre që kanë mbetur edhe pa familje. “Që nga 99-ta, me programe të ndryshme jemi munduar t’i trajtojmë plagët e tyre. Shuma apo kompensimi që filloi këtë vit, nuk është aspak se një mirënjohje. Janë vetëm 230 euro. Është më shumë mirënjohje shpirtërore, që të tregohet se edhe ato kanë vuajtur si kategoritë tjera të dala nga lufta”, tha ajo.

Rushiti, gjithashtu tha se tentojnë t’i adresojnë kërkesat e grave të mbijetuara nga dhuna seksuale.
Për deputetët që kanë votuar kundër ligjit që këtyre kategorive t’i njihet e drejta, tha s’e s’ka qenë vendim i duhur. “Moment i dhimbshëm momenti kur është dashur të votohet për këtë ligj. Ka qenë dëshira e tyre që t’u njihet e drejta, ato janë produkt i luftës”, tha ajo. Rushiti, në fund tha se sfida e pika më e dobët tek ato është që nuk po punohet në drejtësi e të zbardhen këto raste. Tha se është keq që nuk u gjykua ende asnjë kriminel.

“S’kemi asnjë kriminel që u ndëshkua për krime gjatë luftës. Vasfija, përveç që i shfaqi dhimbjet e saj, foli edhe për kriminelët dhe për drejtësinë në Kosovë. Ne në bazë të dhënave e dimë që ka shumë nga gratë që janë intervistuar në UNMIK dhe ende s’është zbardhur drejtësia. Janë me të vërtetë shumë të zhgënjyera, kemi një rast që është intervistuar 28 herë. Përmes Vasfijes jemi munduar të zbardhim rastet që janë tek ne”, tha ajo. Në fund tha se po punojnë shumë që këto gra të kenë qasje në drejtësi.

Thaçi: Nuk isha rastësisht në Ujman

Presidenti Hashim Thaçi ripërsëriti sot se është për bashkimin e Luginës me Kosovën dhe se korrigjimi i kufirit me Serbinë shpëton ndarjen e Kosovës. Ai gjatë një takimi me afarist të diasporës në Prishtinë tha se nuk do të lejojë me asnjë kusht ndarjen e vendit

Thaçi: Korrigjimi i kufijve e shpëton Kosovën nga ndarja

“Korrigjimi i kufijve dhe arritja e marrëveshjes paqësore Kosovë-Serbi, Kosovën e shpëton nga idetë e rrezikshme, të këqija dhe të pa drejta të Qosiqit, Stamboliqit dhe ‘viçave’ të tjerë për ndarjen e Kosovës dhe themelimin e asociacionit me elemente ekzekutive, që nënkupton Republika Serbe. Prandaj, unë nuk flas, nuk lejoj ndarje të Kosovës as shkëmbim të territoreve e as krijimin e një republike Serbe në territorin e Kosovës. Dikush edhe mund të ketë premtuar asociacion serb me elemente ekzekutive me padronë të krimit të organizuar në veri. Pra përfshirja e luginës së Preshevës, Medvegjës, Bujanocit me territorin e Kosovës, Kosovën e shpëton nga ndarja, nga shkëmbimi dhe krijimi i asociacionit me elemente ekzekutive që nënkupton, Republika Serbe”, tha Thaçi.

Ai ka shtuar se vizita e tij në Liqenin e Ujmanit nuk ka qenë e rastësishme, dhe se Ujmani dhe të gjitha astetet në veri do të mbeten në Kosovë.

Thaçi: Nuk isha rastësisht në Ujman

“Mos mendoni se në Ujman isha rastësisht, por për me tregua se ai vend ka qenë, ende do të mbetet i Kosovës përjetësisht, edhe qyteti i bashkuar i Mitrovicës, kot flasin, kushdo që flet. Edhe për Trepçën cohën propaganda, dezinformata, lajme të rrejshme pa asnjë argument. Po kush është ai që guxon me menduar për Trepçën. Por e theksoi se edhe me bashkëngjitjen e Preshevës me Kosovën nuk do të ketë kufi në baza etnike”, tha ai.

Duke ftuar spektrin politik për një unitet lidhur me platformën për dialogun Kosovë-Serbi, Thaçi ka thënë se përfundimi i dialogut do të jetë edhe në favor të bizneseve nga diaspora dhe rritjen e investimeve të huaja.

Thaçi: Dialogu zgjidh edhe çështjen e investimeve të huaja

“Duke qenë Kosova në NATO dhe në Bashkimin Evropian, edhe mundësitë tuaja për investime janë më të mëdha. Edhe investimet ndërkombëtare janë shumë më të mëdha. Nuk mund të krenohemi me investimet ndërkombëtare që kanë ndodhur në pesë gjashtë vitet e fundit në Kosovë. As me reforma. Nuk mund të qojmë Kosovën në NATO dhe në Bashkimin Evropian me logjikën dhe mentalitet të politikës të mashallave. As të kanunit as të provincializmave”, ka thënë Thaçi.

Ai me tej ka thënë para afaristëve nga diaspora se Kosova është në një rrethanë të mundësive të mëdha që asnjë herë nuk e ka qenë më parë. Sipas tij, Kosova sot ka 116 njohje nga shtetet e botës. Ai shpreson se Kosova shumë shpejt pritet të bëhet pjesë e Interpolit.

Nuk ka lojë me Amerikën: Ja 4 armët e reja që po zhvillojnë

Ushtria amerikane po kërkon armë më të fuqishme e më të mëdha, për të ruajtur epërsi jo vetëm në ajër e në det, por edhe në artileri e sisteme predhash nga toka. Rusia, ashtu si Kina, kanë investuar bollshëm në ushtri dhe kanë fuqizuar me sukses artilieritë dhe sistemet e mbrojtjes tokë-ajër

Për të mbajtur epërsinë, ushtria amerikane po zhvillon katër teknologji të reja. Përparësia është zhvillimi i artilerive që të shkatërrojnë pozicione të fortifikuara armike që nga 1500 kilometra largësi. Ushtria amerikane po modernizon sistemet LRPF, të cilat kanë si qëllim të asgjësojnë sistemet armike Anti-Akses dhe Anti-Denial.

Armët Hiper-Sonike me Rreze të Gjatë dhe Predha Strategjike me Rreze të Gjatë veprimi. Të parën, ushtria do ta përdorë kundër bazave armike të fortifikuara, duke shkatërruar sistemin e tyre mbrojtës që nga 1500 kilometra largësi.

Pas asgjësimit hyn në veprim Predha Strategjike me Rreze të Gjatë veprimi, e cila është më pak e kushtueshme dhe mund të shkatërrojë më në masë, pasi të jetë asgjësuar sistemi mbrojtës.

Predha Sulmi me Precizion të Lartë, është një përditësim masiv i sistemit aktual. Praktikisht, e njëjta armë, por shumë më e madhe, dhe shumë më e saktë.

Kjo predhë ka aftësinë të përdorë sensorë për të ndjekur me saktësi shënjestra si municione të cilat mund të shpërthejnë e të bëjnë më shumë dëme. Këto armë godasin që nag 500 kilometra largësi.

Artilieria me rreze të zgjeruar është një modernizim i sistemit Paladin. Sistemi i ri i artilierisë për fushëbeteja pritet të godasë që nga 120-130 kilometra largësi.

Diplomatja gjermane leksion Gjuriqit: Nuk është viti 1999 as 2007, Kosova është shtet

Diplomatja gjermane leksion Gjuriqit: Nuk është viti 1999 as 2007, pranojeni se Kosova është shtet
Shefi i të ashtuquajturës Zyrës për Kosovë në Qeverinë e Serbisë, Marko Gjuriq, nuk e ka pasur aspak lehtë në një panel që është organiuar pikërisht në kryeqytetin e Serbisë, në Beograd

Në kuadër të Forumit për Siguri që po mbahet në Beograd, Gjuriq ka qenë në një panel ku ka mbizotëruar ideja se Kosova është një shtet i pavarur nga Serbia. E kjo nuk i ka pëlqyer aspak Gjuriqit, i cili në panel, përkundër faktit se aty ishte edhe nënkryetarja e Kuvendit të Serbisë, është ndjerë i vetëm në qëndrimet e shtetit serb karshi Kosovës.

Vet nënkryetarja e Kuvendit, Gordana Comic ka qenë kritikuese e politikës serbe karshi Kosovës duke e akuzuar këtë kastë politikanësh që e kanë ushqyer popullin serb ne klishen se “Kosova është zemra e Serbisë”.

Por më e qartë karshi Gjuriqit ka qenë diplomatja gjermane, Sabine Stöhr, Shefe e Divizionit për Ballkanin Perëndimor në Ministrinë e Jashtme në Gjermani, kur ka folur për qëndrimin e Serbisë ndaj Kosovës.

“Eshtë i kuptueshëm qëndrimi juaj karshi Kosovës por nuk mund të shkoni në mohim të gjithçkaje që ka ndodhur në Kosovë. Nuk jemi në vitin 1999 ose para vitit 2008 kur Kosova ishte pak a shumë pjesë e Serbisë në anën zyrtare. Kohërat dhe gjërat kanë ndryshuar qysh atëherë, ka pasur zhvilime të atilla që nuk mund ta mohosh se në Kosovë ka shtet. Këtë duhet ta pranojmë si fakt bazik e më pas të vazhdohet tutje”, ka thënë Sabine Stöhr.

Reagimi i Gjuriqit pas kësaj deklarate ka qenë paksa qesharak, duke e kthyer në arritje të Serbisë, faktin se midis Beogradi egziston liria që të thirret për Pavarësinë e Kosovës madje në një panel që organiziohet në bashkëpunim me shtetin e Serbisë./Insajderi.com

Deda dhe Gjuriq përplasen për dialogun në Beograd

Deputeti i Kuvendit të Kosovës, Ilir Deda dhe drejtori i të ashtuquajturës Zyrës për Kosovë në Serbi, Marko Gjuriq janë në një panel së bashku për të folur për të ardhmen e dialogut mes dy vendeve, në kaudër të Forumit të Sigurisë në Beograd

Të dytë janë përplasur qysh në fillim të panelit kur është folur për qëndrimet diametralisht të kundërta për Kosovën, por kur Marko Gjuriq ka marrë fjalën për të folur për atë sesi Serbia nuk do ta pranojë asnjëherë shtetin e Kosovës pa marrë diçka nga Kosova, ka reaguar deputeti Deda.

Sipas Dedës, është e pashpjegueshme sesi politika serbe karshi Kosovës vazhdon të mbijetojë me deklarime kontradiktore, teks është ndalur tek dialogu 7 vjeçar në Bruksel.

“Për 7 vite kemi dialoguar si tentim për të arritur një pajtim dhe nuk është arritur. Marrëveshjet as nuk janë përmbushur. Për çka kemi dialoguar?” ka thënë Deda në Forumin e Sigurisë në Beograd.

E Gjuriq i ka reaguar menjëherë Dedës duke e quajtur atë një politikan që po flet atë çfarë vetëm Prishtina po dëshiron ta dëgjojë.

“Më vjen keq nëse Iliri dëshiron të dëgjojë nga unë atë çfarë ai dëshiron të dëgjojë për Kosovën, por dua ti them se ai duhet të dëgjojë edhe atë se çfarë ndjejmë ne dhe argumentet tona”, ka thënë Gjuriq, raporton Insajderi.

Gjuriq në anën tjetër e ka mbrojtur dialogun mes Kosovës dhe Serbisë, duke e quajtur si të shëndeteshëm sepse ka mbajtur gjallë paqen në rajon.
“Për këto 7 vite kemi tentuar që të mbajmë paqen mes vete. Kemi qenë duke e bërë për hir të së ardhmes, të njerësve tanë dhe të ardhmes së regjionit”, ka thënë Gjuriq./Insajderi.com