Nasim Haradinaj: Në listat e veteranëve ka njerëz të cilët kanë qenë pjesë e UDB-së

Nënkryetari i Organizatës së Veteranëve të Luftës të Ushtrisë Çlirimtare të Kosovës (OVL – UÇK), Nasim Haradinaj ka theksuar se në listat e veteranëve të UÇK-së ka edhe njerëz të cilët kanë qenë pjesë e Sigurimit Shtetëror të Jugosllavisë (UDB)

Ai në emisionin “Debat Plus”, me gazetarin Ermal Panduri, ka thënë se dihet shumë mirë kush janë ata që deri dje, sipas tij, i kanë shërbyer ish – sistemit jugosllav dhe kanë maltretuar shqiptar%, ndërsa sot janë veteranë të UÇK-së.

Haradinaj ka folur edhe për deklaratat e deputetit të Lidhjes Demokratike të Kosovës (LDK), Anton Quni, i cili kishte thënë se nënkryetari aktual i Kuvendit të Kosovës, Xhavit Haliti, i ka pranuar 8 milionë euro për ta ndihmuar luftën çlirimtare, duke thënë se Quni nuk ka dijeni mbi këto gjëra.

“Anton Quni nuk ka qenë nivel i diskutimit, por ka folur vetëm hajt ashtu”, ka shtuar ai.

Më tutje Haradinaj ka treguar se si, sipas tij, komandanti Sali Çekaj i ishte bashkuar Shtabit të Përgjithshëm të UÇK-së. Madje, sipas tij, ky i fundit kishte kërkuar nga kryetari aktual i LDK-së – gjatë kohës së luftës – para për të blerë radiolidhje, e që Mustafa – ministër i Financave asokohe, ia kishte refuzuar këtë kërkesë.

Haradinaj: Anton Quni nuk është plagosur kurrë në luftë

Nasim Haradinaj ka thënë se nuk brengoset kur reagon ndaj Anton Qunit, pasi ka thënë se ai nuk është plagosur kurrë në luftë.

Në emisionin Debat +, Haradinaj deklaroi se Anton Quni nuk është plagosur në luftë, teksa reagoi ndaj njerëzve që ai tregon se kanë thënë që Quni është i plagosur në luftë.

“Anton Quni ka qenë një komandant batalioni. Mu më ka shkru njëri në Facebook, më ka thënë: ‘A të vjen marre me fol për Anton Qunin. Ai sa herë del para pasqyrës i sheh plagët e tij’. Kurrë Anton Quni nuk është plagosur në luftë. Kurrë!”, ka thënë Haradinaj.

Haradinaj tha se Anton Quni ka qenë vetëm komandant i një batalioni në UÇK.

Luftë bërthamore e pashmangshme brenda vitit 2040? E pashmangshme

Zhvillimi i Inteligjencës Artificiale do të shkaktojë një luftë bërthamore brenda 2040-ës që mund të shkatërrojë njerëzimin dhe mund të mos ketë mundësi për ta evituar këtë. Ky është paralajmërimi që jep një grup ekspertësh për sigurinë në teknologji

Ata pretendojnë se makineritë e avancuara të Inteligjencës Artificiale mund të inkurajojnë shtetet e fuqishme që të ndërmarrin hapin ekstrem e të përdorin arsenalin nuklear.

Gjatë Luftës së Ftohtë, frika për shkatërrim reciprok krijoi një paqe të paqëndrueshme midis superfuqive. Të dyja palët kishin një nxitje të madhe për të nisur një sulm bërthamor, por asnjëra nuk guxonte të sulmonte për shkak të pasojave nga kundërpërgjigjja.

Gjithsesi, avancimi në Inteligjencën Artificiale do të thotë që kjo paqe nuk është më e garantuar, pasi nëse një prej superfuqive do t’i shkatërronte mundësinë për t’u kundërpërgjigjur palës tjetër, atëherë do të ekzistonte edhe mundësia që ata të përdornin arsenalin nuklear, e kjo vështirë se mund të parandalohet në të ardhmen.

Pretendimet vijnë nga “Rand Corporation”, një organizatë jofitimprurëse në Santa Monica të Kalifornisë, e cila ofron hulumtime dhe analiza për forcat e armatosura të Shteteve të Bashkuara të Amerikës mbi çështjet e politikave globale.

Shqipëria Izraeli i Evropës, kryeqendër për bazat e SHBA-ve dhe NATO-s

Pas arritjes së marrëveshjes ndërmjet Republikës së Shqipërisë dhe Shteteve të Bashkuara të Amerikës,Shqipëria do të jetë kryeqendra e Ballkanit për bazat e SHBA-ve dhe NATO-së, ku tani më kanë filluar të zbarkojnë arsenalin

Ministrja e Mbrojtjes Olta Xhaçka gjatë vizitës në SHBA zhvilloi një takim me sekretarin e Mbrojtjes James Mattis. Gjatë takimit Xhaçka kërkoi nga SHBA që NATO të ndërtojë një bazë ushtarake në Shqipëri për të demonstruar se kjo zonë nuk harrohet nga aleatët.

Ministrja shqiptare u sugjeroi amerikanëve të shikojnë mundësinë që Shqipëria të shërbejë si vend kontakti në rajonin e Ballkanit Perëndimor. Shqipëria paraqiti disa ide për të vënë në dispozicion baza tokësore, ajrore dhe detare në mënyrë dypalëshe me SHBA ose NATO-n. Aktualisht SHBA ka një bazë ushtarake në Kosovë, ndërsa krijimi i bazave tjera në Shqipëri do të thotë më shumë të ardhura.

Konjufca thotë se Haradinaj e Veseli me platforma po e fuqizojnë Thaçin

Të dy platformat e ditëve të fundit, një e miratuar në Qeveri dhe e dyta, ajo e kryetarit të Kuvendit dhe PDK-së, Kadri Veseli nuk janë asgjë tjetër veçse mjet për të fuqizuar rolin e presidentit Hashim Thaçi për të drejtuar bisedimet me Serbinë. Ky është qëndrimi i Glauk Konjufcës i shprehur në Rubikon të KTV-së

“Të dy këto dokumente, edhe Kadri Veseli edhe Ramush Haradinja janë bërë njëfarë asistence e Hashim Thaçit. Bile, kjo e Haradinajt ishte edhe më qesharake pasi mendoj se atë nuk e kanë shkuar ata, por Presidenca. Haradinaj këtu e bën një akt shumë të papranueshëm politik pasi i ka të gjitha mekanizmat, duke qenë edhe rezoluta e Kuvendit, të cilën Ramush Haradinaj e shkel për Hashim Thaçin”, ka thënë Konjufca.

Kujtojmë se vetëm pak ditë pas miratimit në qeveri të “Platformës Shtetërore për Finalizimin e Dialogut të Kosovës me Serbinë”, edhe kryetari i Kuvendit ka dalë me “dokumentin” e quajtur “Platforma konsensuale dhe gjithëpërfshirëse e agjendës shtetërore në Republikën e Kosovës”, ku ka ngritur pesë çështje të rëndësishme.

Konjufca theksoi se presidenti Thaçi asnjëherë nuk hoqi dorë nga drejtimi i PDK-së përveç asaj me letra.
“Vetëm shikoni këtë çka ndodhi me Driton Gashin dhe e kuptoni çfarë po them”, ka thënë Konjufca. Sipas tij, ai vetëm i ndërroi dy njerëz të tij, Driton Gashin me Shpend Maxhunin.

“Kur bën marrëveshje me Hashim Thaçi duhet ta lësh të sillesh si mbret”, ka thënë Konjufca duke ju drejtuar koalicionit qeverisës, i cili sipas tij varet tërësisht nga fuqia e Thaçit. Madje sipas tij, LDK duhet të mbaj përgjegjësi për bërjen e Thaçit president dhe Veselit kryeparlamentar, siç iu drejtua Konjufca, “dhurata” nga LDK.

“Isa Mustafa atëherë fort donte të bëhej kryeministër por nuk mund të bëhej pa e bërë Thaçin president. Pastaj Thaçi ia tërhoqi tepihun nën këmbë”, tha ai.

Konjufca: Të larguarit e Vetëvendosjes u tallën me votuesit e tyre

Glauk Konjufca, foli për ndarjen e Lëvizjes Vetëvendosje dhe grupin e deputetëve tashmë të ndarë nga kjo parti. Ai tha se ndonëse është i pikëlluar nga kjo që ndodhi, nuk vazhdon t’i konsideroj të gjithë miq. Me këtë iu drejtua Dardan Molliqajt.

“Me disa prej tyre sepse kemi pas një dallim në qasje. Kam vërejtur dy qasje brenda atij grupi. Një grup i njerëzve që kanë bërë çmos që ta godasin Lëvizjen Vetëvendosje, e këtu hyn Dardan Molliqaj, pasi këtu kemi pasur edhe një debat i cili nuk ka qenë fare i lehtë”, ka thënë ai.

“Nga Vetëvendosje ka dalë edhe Ilir Deda mirëpo kurrë nuk e kam parë të organizojë pa fund emisione duke u marrë me Albin Kurtin dhe Vetëvendosjen”, shtoi tutje Konjufca. “Duke qenë i tillë Dardani, pasi ka pas shumë ma shumë kontribut se Ilir Deda, është dashtë ta ruajë shumë më shumë”.

“Nuk kam menduar se këto figura kryesore të Vetëvendosjes janë irracionale”. I pyetur se çka mendon për deklaratat se edhe vetë Konjufca mund të dalë shumë shpejt nga partia, ai mohoi diçka të tillë.

“Ky është një hamendësim për të cilin ata duhet të japin argumente. Jam njëri nga bashkëthemeluesit, si shumë nga këta që janë larguar dhe ndjehem shumë mirë”.

“Nuk është turp, kurrgjë nuk është turp. Mendoj që është shkatërrim i shpresës së popullit”, bëri të ditur Konjufca duke folur për largimin e figurave të Vetëvendosjes.

Vetëvendosje me propozim për mocionin e rrëzimit të qeverisë

Ky është propozimi i Vetëvendosjes që do ta shtrojnë nesër në tryezën e thirrur nga LDK-ja. Konjufca ka deklaruar se hapi i parë mund të ishte mbledhja e nënshkrimeve e të gjithë deputetëve opozitarë të cilët e shprehin vullnetin e tyre për mocion të votëbesimit. Atëherë kjo do të na bënte më të lehtë që t’i kërkonim vetëm edhe tre deputetë nga pushteti të cilët do të duhej të bindeshin, bëri të ditur Konjufca qëndrimin e LVV-së.

“Pa i pasë emrat e tre deputetëve ne nuk mund të shkojmë e ta eksperimentojmë mocionin e votëbesimit”, shtoi tutje ai. Konjufca tha se nuk do t’i kërkojnë Listës Serbe nënshkrimin për mocion. Mirëpo nëse një gjë e tillë do bëhet vullnetarisht nga deputetët serb atëherë nuk do ta refuzojnë atë.

“Ne jemi kundër asaj që t’ia kërkojmë Listës Serbe nënshkrimet sepse mendojmë që është e dëmshme që përmes Listës Serbe të rrëzohet Qeveria”.

Konjufca: Gjykata Speciale e mban në jetë koalicionin e PAN-it

Gjykata Speciale mbanë bashkë Partinë Demokratike të Kosovës me kryeministrin Ramush Haradinaj. Sipas nënkryetarit të Lëvizjes Vetëvendosje, Glauk Konjufca kjo çështje vazhdon ta mbajë të bashkuar koalicionin qeverisës.

“Qeveria rrëzohet atëherë kur i ki numrat dhe kur deputetë nga koalicioni binden se kësaj qeverie i ka ardhur fundi. PDK besoj që shumë shpejt do të bindet. Njëra pistë e argumenteve e cila të çon në drejtim të idesë që ky koalicion do të qëndrojë për shkak të Gjykatës Speciale”, ka thënë ai.

Ai përmendi një bisedë që kishte me kryeministrin Haradinaj në vitin 2016. “Patëm bërë një takim bashkë me Nismën dhe AAK-në. Në takim ishte Limaj, Albini e Ramush Haradinaj. Nëse opozita e bashkuar do të shkonte bashkë në zgjedhje dhe do ta fitonte shumicën, cilën ta zgjedhim mes LDK-së e PDK-së, sipas Ramush Haradinajt ishte PDK. Ai tha që ‘e preferoj këtë për shkak të asaj se çfarë do të ndodh vitin e ardhshëm, dhe ajo është Gjykata Speciale, sfidat që e presin Kosovën’”, ka shpjeguar ai. “Alternativa mes LDK dhe PDK ishte e padiskutueshme për të”, shtoi tutje Konjufca.

Vetëvendosje dyshon në mocionin e LDK-së për rrëzimin e qeverisë

Lëvizja Vetëvendosje nuk është për mocion votëbesimi në rast se nuk i ka 61 nënshkrime të deputetëve. Konjufca, ka theksuar nuk janë për një mocion “vetëm sa për ta provuar” E pikërisht kjo, sipas Konjufcës, e bën të dallojë nga Lidhja Demokratike e Kosovës.

“Lëvizja Vetëvendosje, e këtu do të dallojmë nga LDK, mendon që fillimisht duhet të pajtohemi që do të ishte i dëmshëm një mocion votëbesimi i cili nuk do të kalonte. Pa qenë 61 firma në një listë të deputetëve të cilët e konfirmojnë vullnetin e tyre për rrëzimin e Qeverisë atëherë na duket shumë eksperimentale shkuarja në një mocion i cili nuk kalon”, ka deklaruar ai.

“E para ka të bëj me faktin se nëse kjo Qeveri e kalon mocionin, mendoj që kjo qeveri forcohet e aktualisht është shumë e brishtë, edhe për shkak të numrave por edhe skandaleve. Nëse e kemi veç sa për ta provuar, atëherë është ide e gabueshme”, shtoi tutje Konjufca.

Rexhaj publikon sondazhin e fundit: LDK prin me 38%, PDK 18%, VV 17%….

Publicisti nga Kosova, që jeton dhe vepron në Zvicër, Xhevat Rexhaj, përmes një postimi në facebook, ka prezantuar një sondazh, që sipas tij tregon përqindjet e votave që mund t’i marrin partitë politike në rast të mbajtjes së zgjedhjeve në periudhën mars-prill 2018

Sipas këtij sondazhi të prezantuar nga Rexhaj, Lidhja Demokratike e Kosovës prin bindshëm me 38% të votave, pastaj vjen PDK me 18%, VV me 17%, AAK me 7% dhe NISMA me 6-7%.

Ky është postimi i plotë:

Muaji mars-prill 2018, votuesit dhe partitë politike!

LDK- 38% , 43-44 deputetë
PDK- 18%, 19-20 deputetë
VV- 17%, 18-19 deputetë
AAK- 7-%, 7-8 deputetë
Nisma- 6-7%, 7 deputetë

Qytetarët e Republikës së Kosovës ka vite që kishin stagnue si të ishin të mpirë nga mashtrimet, dhe rrenat e partive të caktuara. Viti 2017, dhe filimi i vitit 2018 te shumica shqiptare, votues në Kosovë bëri që të ketë kthjellje truri rreth shumë ngjarjeve gati shtet shkatërruese nga nji klikë ; partish e partizash politike, të kapura nga krimi, dhe nga nëntoka kriminale…

Sipas matjeve të ndryshme, sipas disa shënimeve që ende mbahen të papublikuara ….votuesit shqiptarë në Kosovë duket se kanë tashma një parti preferuese, për dhe rreth të ardhmës evropiane të Kosovës, pra jo zyrtare këto shënime të publikuara, por aty afër janë të sakta!

Tahiri: Iniciativat për konsensus kombëtar nuk do të kenë sukses

Politologu Ramush Tahiri nuk beson në suksesin e iniciativave të subjekteve politike për arritjen e konsensusit kombëtar rreth çështjeve të mëdha. Në këtë intervistë dhënë për gazetën “Epoka e re”, ai ka thënë se iniciativa e Partisë Demokratike të Kosovës (PDK) dhe ajo e Lidhjes Demokratike të Kosovës (LDK) janë të pasinqerta dhe do të dështojnë

Sipas tij, subjektet politike nuk do t’u përgjigjen pozitivisht këtyre iniciative, duke i vënë kushte njëra-tjetrës. Tahiri ka bërë me dije se iniciativat e tilla janë të shtyra nga pat pozicioni që gjenden pozita dhe opozita. Ai ka deklaruar se opozita nuk i ka 61 vota për ta rrëzuar Qeverinë, kurse kjo e fundit nuk e ka shumicën e nevojshme për t’i shtyrë proceset përpara.

“Epoka e re”: Z. Tahiri, lideri i Partisë Demokratike të Kosovës (PDK), Kadri Veseli, ka propozuar një platformë politike për bashkimin e spektrit politik në pesë tema. Po ashtu, Lidhja Demokratike e Kosovës (LDK) ka thirrur një tryezë të partive për ta kërkuar konsensusin kombëtar për temat që e presin vendin. Si i keni parë këto iniciativa?

Tahiri: I ka shtyrë pat pozicioni i mbetur. Partitë opozitare nuk i kanë votat e mjaftueshme për ta rrëzuar Qeverinë, kurse Qeveria nuk i ka votat e mjaftueshme për t’i shtyrë programet e saj përpara. Asnjëra palë nuk mund t’i sigurojë 61 vota që janë të nevojshme në Kuvend. Gjithashtu, asnjë parti deri më tani nuk është deklaruar se dëshiron zgjedhje të parakohshme parlamentare. Si duket tani për tani nuk do të ketë zgjedhje të reja parlamentare dhe në këtë drejtim të gjitha partitë po e shfrytëzojnë për një lloj animimi të opinionit të brendshëm dhe ndërkombëtar. Tani atyre po u duket argumenti më i mirë për t’u thirrur në konsensus kombëtar se duhet të ketë një marrëveshje të përgjithshme për çështjet madhore, dhe këtë po e bënë secila parti veçmas.

Pas iniciativës për ta rrëzuar Qeverinë që nuk e çoi deri në fund, LDK-ja tash ka dalë me një propozim për ta realizuar një tryezë në të cilën do të diskutohet dhe do të arrihen parime për një konsensus kombëtar. Tash edhe Kadri Veseli në emër të PDK-së, gjithë liderëve të partive politike u ka dërguar një propozim për një platformë gjithëkombëtare, në të cilën i ka numëruar çështjet kryesore për të cilat duhet të arrihet konsensus. Ky konsensus po kërkohet në një tryezë të partive politike, që zakonisht atë duhet ta bëjë presidenti i Kosovës dhe kjo nuk po bëhet në parlament.

“Epoka e re”: Sipas jush, cili është qëllimi i këtyre iniciativa?

Tahiri: Qëllimi i këtyre iniciativave është për të blerë kohë dhe për të mos e humbur elektoratin. Pra, për ta mbajtur gjendjen e tensionuar në sensin pozitiv, duke thënë se kemi një agjendë dhe se jemi duke u munduar ta gjejmë një konsensus kombëtar për çështje të mëdha.

“Epoka e re”: Pra, mendoni se partitë politike janë të detyruara nga rrethanat për të ndërmarrë iniciativa të tilla?

Tahiri: Mendoj se situata aktuale i ka shtyrë këto subjekte të ndërmarrin veprime të tilla. Me këtë dëshirojnë të tregojnë se nuk janë duke qëndruar kot, por po marrin iniciativa politike.

“Epoka e re”: Besoni se do të kenë sukses këto iniciativa?

Tahiri: Këto iniciativa janë shumë të dëshirueshme dhe të nevojshme për faktin se Kosova ka humbur shumë kohë, dhe tani duhet për të ecur më shpejt se të gjitha vendet e tjera të rajonit për ta zënë hapin. Këto çështje nuk lidhen me programe veç e veç të subjekteve politike, por janë interes i të gjitha partive, para së gjithash, i popullit të Kosovës. Unë nuk pres rezultate, sepse synimet e asnjërit nuk janë të sinqerta. Secila parti dëshiron të bëhet prijëse e iniciativave të tilla. Në këtë mënyrë besoj se këto iniciativa do të jenë të dështuara, sepse subjektet politike nuk do t’u përgjigjen pozitivisht këtyre iniciativave, por do t’i vënë kushte njëra-tjetrës.

“Epoka e re”: Nëse nuk do të ketë konsensus nacional, si e shihmi zgjidhjen e këtyre çështjeve që për kërkohet konsensus

Tahiri: Nëse nuk ka konsensus kombëtar për këto çështje, atëherë ato duhet të diskutohen dhe votohen në Kuvend, pasi është institucioni më i lartë ku merren vendimet e rëndësishme. Do të ishte më e ndershme që këto çështje të hapen në Kuvend, të diskutohen aty dhe të shohë opinioni se kush çfarë po diskuton. Këta mund të mbajnë një seancë të jashtëzakonshme për secilën prej këtyre pikave që po i propozon Kadri Veseli apo LDK-ja. Nëse konsiderojnë se kjo është ndonjë strategji e caktuar, këto çështje mund të diskutohen në Kuvend në ndonjë seancë të mbyllur dhe të shihet se cili është propozimi më i mirë. Konsensusi nuk bëhet pse dikush po thotë, por konsensusi arrihet pse një propozim është më i mirë, më gjithëpërfshirës apo më i zbatueshëm se të tjerët.

“Epoka e re”: Në një seancë të jashtëzakonshme në Kuvend pritet të diskutohet platforma e Qeverisë për finalizimin e dialogut me Serbinë. Çfarë mendimi keni për këtë platformë?

Tahiri: Më herët, kur janë nisur bisedimet, kemi pasur një rezolutë të Kuvendit, e cila prej miratimit asnjëherë nuk është shqyrtuar. Pra, asnjëherë nuk kemi pasur një raport të mirëfilltë të atyre që diskutojnë në Bruksel para Kuvendit. Tani është propozuar një platformë nga Qeveria, e cila do ta marrë formën përfundimtare në Kuvend. Besoj se ajo do të plotësohet, sepse secila parti do t’i japë propozimet e veta në Kuvend. Platforma që është propozuar i ka dy nivele: nivelin teknik, të cilin e udhëheq Avni Arifi dhe nivelin politik, të cilin do ta udhëheqë presidenti Thaçi. Përmes kësaj platforme synohet të arrihet një marrëveshje historike në mes të Kosovës dhe Serbisë. Kjo platformë është e mirë dhe e nevojshme. Një platformë e tillë do të ishte mirë t’i merrte qind për qind votat e deputetëve në Kuvend, duke përfshirë edhe votat e Listës Serbe.

“Epoka e re”: Si njohës i rrethanave politike në vend, çfarë do të duhej të përmbante tjetër kjo platformë?

Tahiri: Mendoj se platforma që ka propozuar Qeveria është e mirë. Ajo vetëm duhet të plotësohet me ndonjë propozim të opozitës. Unë nuk dëshiroj që në Kuvend të diskutohet se këto bisedime a duhet t’i udhëheqë presidenti Thaçi apo nëse z. Thaçi është figurë unifikuese. Mendoj se këto bisedime duhet t’i udhëheqë presidenti i vendit pa marrë parasysh se kush është në atë pozitë. Pra, Kuvendi për këtë çështje duhet të diskutojë profesionalisht. Platforma i ka përfshirë të gjitha çështjet që duhet të bisedohen dhe i jep drejtim dialogut. Mendoj se platforma duhet të parashohë që një herë në muaj të bisedohet në Kuvend për rezultatin e dialogut, nëse brenda muajit ndodhin tre ose katër takime në Bruksel.

Muhamet KOCI

Daçiq: Vuçiqi thotë se kjo që po bëjmë rreth zvogëlimit të njohjeve të Kosovës është irrituese për fuqitë e mëdha

Ministri i Punëve të Jashtme të Serbisë, Ivica Daçiq, thotë se zgjidhja për çështjen e Kosovës mund të arrihet vetëm me kompromis, “por bindja se Serbia me forcë do të mund të detyrohet ta pranojë Kosovën, këtë zgjidhje e bën më të largët”

Shefi i diplomacisë serbe i ka thënë “Tanjugut” se ministria që ai drejton i ofron mbështetje logjistike presidentit Vuçiq në të gjitha përpjekjet e tij për të gjetur zgjidhje dhe se për herë të parë në historinë e Serbisë po udhëhiqet betejë e organizuar diplomatike për ruajtjen e interesave serbe, dhe se aktualisht është duke u zhvilluar betejë për të zvogëluar numrin e vendeve që kanë njohur Kosovën.

Në vërejtjen se në muajt e fundit ka bërë deklarata në formë ultimatumi lidhur me çështjen e Kosovës, si kur thotë, se do të tërheq nënshkrimin nga Marrëveshja e Brukselit, Daçiq tha se “sipas të drejtës ndërkombëtare nuk ka asnjë rast që të respektohet vetëm një pjesë e marrëveshjes së nënshkruar, siç është rasti me Marrëveshjen e Brukselit”.

“Kjo është arsyeja pse unë thashë: ‘ose vlen gjithçka, ose nuk vlen asgjë’! Dhe unë qëndroj prapa kësaj”, tha Daçiq. Ai shton se, nuk është i sigurt se deri ku është arritur në rrugën deri te një zgjidhje. “Mendoj se nuk janë të sigurtë as ata që po i udhëheqin këto negociata. Por, është e rëndësishme të bisedohet”, tha Daçiq.

Qëllimin që numri i vendeve që e kanë njohur Kosovën të reduktohet “nën 100 ”, Daçiq e shpjegon si shifër figurative, por sqaron se qëllimi i ofensivës diplomatike të Serbisë nuk është që të arrihet te një numër i caktuar, por, siç thotë ai, të tregojë se procesi i pavarësisë së Kosovës nuk është i përfunduar dhe se mund të shkojë në drejtimin tjetër.

“Në Kombet e Bashkuara janë 193 anëtarë, dhe numri duhet të arrihet nën gjysmën e atij numri. Presidenti Vuçiq vazhdimisht më thotë se kjo që po bëjmë është tmerrësisht e bezdisshme dhe irrituese për fuqitë e mëdha, sepse për ata kjo është punë e kryer. Mirëpo, për ne nuk është e përfunduar, prandaj po punojmë në atë drejtim”, shpjegon Daçiq.

“Nuk do të jetë një betejë e lehtë, sepse ne punojmë vetëm, kurse Prishtina ka mbështetjen e fuqive të mëdha. Megjithatë, është e habitshme që në të kaluarën askush nuk është marrë me këtë. Po mendoj se shumë prej tyre mezi kanë pritur që kjo çështje sa me parë të zgjidhet, në mënyrë që Kosovën ta heqin nga rendi i ditës”, tha shefi i diplomacisë serbe.

I pyetur nëse Serbia, pas mbrojtjes në UNESCO, ka diplomaci të përgatitur që të përballet edhe me procesin e normalizimit të marrëdhënieve mes Beogradit dhe Prishtinës, i cili po zhvillohet në rrethana gjithnjë e më vështira, Daçiq tha se, ministria e drejtuar nga ai i ofron mbështetje logjistike presidentit Vuçiq, duke shtuar se “për herë të parë në historinë e Serbisë po zhvillohet një betejë e organizuar diplomatike”.

“Shumë gjëra nuk i bëj publikisht për shkak të presionit të madh të vendeve të huaja. Kur një fuqi e madhe i dërgon protestë çdo vendi që tërheq njohjen e Kosovës, atëherë pyesni, çfarë partnerësh strategjikë dhe miq jemi, nëse na bëjnë këtë. Po zhvillohen beteja të vështira, por nuk mund të bëhet beteja nëse nuk jeni i vendosur ta fitoni”, tha Daçiq.

Shefi i diplomacisë serbe thotë se ka arsye për të luftuar, “sepse Serbia ka hyrë në bisedimet e statusit neutral në Bruksel, dhe se qëllimi i mirë dhe konstruktiviteti i Beogradit në negociatat me Prishtinë është keqinterpretuar, nëse mendohet se zgjidhja e problemit është njohja e pavarësisë së Kosovës”. /Telegrafi/

Kur Pellazgo-ilirët faleshin në kultin e Zeusit, Grekët dhe Greqia as që ekzistonte kund fare

Atje në Dodonën e vërtetë poshtë malit Tomorr, Priftëreshat e Zeusit, këndonin në shqipen e vjetër; Zeusi ishte, Zeusi është, Zeusi do të jetë, O Zeus i madh! Toka i prodhon të gjitha frutat, nderojeni Tokën si Nënën”!

Këto priftëresha (Orakles) të bukura si Zana, ishin të lidhura ngushtë me tokën mëmë dhe me natyrën e begatë.. Ata qëndronin zbathur gjatë gjithë vitit, që të preknin dhe te ndienin lidhjen shpirtërore me tokën e madhnushme.. Ata interpretonin fuqishëm ëndrrat vizionare. Dhe flisnin gjuhën flladit, erës, interpretonin mesazhet, nga shushurimës e gjetheve nëpër pemët e lisit..

Kulti i Zeusit, te shqiptarët e vjetër edhe ata të sotëm dihet që ka dhe zën një vend qendror në trashëgiminë e tij kulturore dhe atë shpirtërore! Megjithëse në literaturën botërore përgjithësisht neve po na e servirin Zeusin, si “Perëndi greke” më e rëndësishme e Olimpit.. Por ne (shqiptarët) e dim fare mirë dhe sot mund të themi me një siguri të madhe botës , – Ju mendoni dhe thoni çfarë të doni, por Zeusi vetë, në të gjitha kohërat ka folur vetëm shqip!

Shqiptarët prej shekujsh kanë qenë këtu,se kanë doket dhe zakonet e tyre dhe se,në se Perënditë e grekëve”flenë në Olimp”,perënditë e pellazgo-ilirëve “flenë” në Tomor. Dodona pelllazgjike e ka “selinë” në Tomor dhe ka qenë rrënja dhe burim i qytetërimit pellazgo-ilir dhe greko-romak. Ajo ka qenë faltorja e famshme e pellazgëve, ashtu siç u bë më vonë (tempulli i “Delfit) për grekët.

Herodoti në librin 4/ 33 pretendon se fatthënësit e Dodonës i ka parë vet, kur ka vizituar Dodonën.. Ai thotë se ky qe tempulli i vetëm nga gjithë të tjerët dhe se në Tomor, vinin popuj e të gjithë Ilirisë dhe faleshin aty. Kjo e thënë vëretohet dhe nga historianshkruesit grek Aravitonoi në vitin 1859. Sipas Hesiodit *shih librin 7/16 dhe Straboni në librin 7/10- thuhet se në afërsi të tempullit të Dodonës,ka dhera pjellore,me drithëra,me livadhe për kullota.Ka tufa dhënësh me shumicë, ka pronarë të mëdhenj bagëtish,të imëta dhe të “trasha” dhe ka kullota (mushara ) . Po Straboni në librin e gjeografisë 8/7 thotë që mali i Dodonës është Tomori, rrëzë të cilit gjëndet faltorja e Zeusit.

Straboni vazhdon,se Talaria janë fis Mollosie; janë ata që banojnë rreth këtij mali ku ka dhera moçalishte dhe mali i Tomorit,r rëzë tij ka dhe shumë burime uji..PO – Talarët – Talaria = Lalarët – Lalëria se ka përngjasim në rrokje dhe Talarët nuk janë tjetër veç stërgjyshët e myzeqarëve të sotëm (Lalërisë ). Dodona dimërake (dhisqimeros-siç ) , malësore gjindet në jugun e Molosisë, pranë malit Tomor ku ka një burim që bën çudira: zbrazeshin ujërat në mesditë dhe mbusheshin prapë në mesnatë dhe, veç këtyre, ka një pyll me lisa e me “vgjejë”(nënkupto:pisha! ) . Është vëndi ku se dhe sot në gojën e popullit,haset fjala “vgjer” për pishën. Edhe Plutarku tek “Jeta e Piros” Verteton se faltorja e “dodonës” gjendet në Molosi. Dodonën e ngritën pellazgët dhe jo grekët, ndaj ( Zeusi quhet zot i Pellazgëve)

Ç’do ndodhë në Jugosllavi pas Titos?! Pyetja e Enverit që mobilizoi policinë dhe ushtrinë

“Ç’do ndodhsë në Jugosllavi pas Titos?!” Një pyetje e tillë që hodh publikisht nga ish-diktatori Enver Hoxha ne fushën e ngjarjeve politike të viteve ’70, duket se zgjoi një angazhim të ethshëm për të forcuar mbrojtjen e vendit. Madje, sikur të mos mjaftonte kjo, u fuqizuan edhe shërbimet e Policisë Popullore, e konsideruar si një forcë me vete, që do mbronte atdheun në rast sulmi. Kështu e shpjegon ç’po ndodhte në ato vite me ushtrinë shqiptare, eksperti i trupave speciale, Hil Lushaku, gjatë një interviste të posaçme për “Albanian Free Press”

Shoqëruar edhe me detaje rreth forcave reale që ajo kishte, apo edhe incidentin e ambasadës jugosllave, pas vdekjes së Titos që do të minonte njëherë e mirë marrëdhëniet mes dy vendeve tona. “Sipas përfundimeve të grupit hetimor, u konkludua se ngjarja ishte politike, e realizuar nga personeli i ambasadës jugosllave në Tiranë, me mjete e municione xheniere të prodhimit jugosllav”, shpjegon ai…

Z. Lushaku, sa qendra zjarri u ndërtuan në të gjithë Shqipërinë gjatë kohës së komunizmit?

U ndërtuan mbi 36.000 qendra zjarri të fortifikuara dhe mbi 3.264 pozicione zjarri të artilerisë së rëndë. Pa përmendur këtu mijëra kilometra transhe dhe hendeklidhje të fortifikuara, ku u shpenzua hekur dhe beton sa për të ndërtuar qytete të tëra moderne. Në qershor 1978, pas tre vjetësh punë “skllevërit ushtarë” dhe “inxhinierët pa gjuhë” përfunduan ndërtimin e objektit “qyteza e nëndheshme”, në afërsi të Linzës, Tiranë, një kryevepër fortifikuese kjo që do e kishin zili edhe komandat e pakteve më të fuqishme ushtarake. Ajo do të zëvendësonte vendkomandën e Shtabit të Përgjithshëm që funksiononte për kohë lufte në Bërzhitë, Tiranë.

Çfarë trupash kishte të mobilizuar ushtria në fund të viteve 1980?

Në vitin 1990, ushtria shqiptare kishte mbi 20 divizione këmbësorie, ku përfshiheshin mbi 70 brigada këmbësorie, rreth 10 brigada tankesh, 13 brigada artilerie tokësore, disa regjimente të artilerisë bregdetare, disa njësi të mbrojtjes kundër tanke, rreth 19 brigada sulmuese, disa brigada të rinisë shkollore të armatosur e studentore; divizioni i xhenios me tre brigada xheniere; Komanda e Mbrojtjes Kundërajrore me disa njësi të instaluar në pika kyçe strategjike të mbrojtjes së hapësirës ajrore, përfshirë edhe një regjiment të raketave kundërajrore tokë- ajër; Komanda e Aviacionit dhe aerodromet në vartësi të saj ku ishin avionë modernë; Komanda e Flotës Ushtarake Detare me disa baza të fuqishme të mbrojtjes detare dhe një brigadë nëndetësesh; brigada ndërlidhjeje, regjimenti i mbrojtjes kundër kimike, regjimenti i zbulimit teknik të artilerisë, regjimenti i radio-zbulimit si dhe disa baza furnizimi e institucione të ndryshme ushtarake.

Po Policia Popullore, si u ngrit?

Policia u vlerësua se duhej të kishte forcën e saj të aftë, të organizuar e të gatshme në shërbim të rendit shoqëror e juridik socialist, sikurse u krijua edhe “batalioni i gatishmërisë i Policisë Popullore”.

Kjo kohë përket me dënimin e Kadri Hazbiut?

Referuar pohimeve të dëshmitarëve e të pandehurve në gjyqin ndaj Kadri Hazbiut dhe Feçor Shehut, evidentohet se nga viti 1973 deri në vitin 1981, në luftën kundër elementit kriminal, vëmendja e organeve të Punëve të Brendshme ishte e përqendruar kryesisht te agjitacioni e propaganda, ku 52% e të dënuarve i përfshinte kjo kategori. Në analizë edhe të kësaj gjendjeje të kriminalitetit u konkludua se kishte qenë i drejtë vendimi për fuqizimin e shërbimeve të Policisë, jo vetëm numerikisht, por edhe me struktura të kompletuara dhe të afta për veprime të shpejta efikase.

Në këtë kohë Enver Hoxha, shtroi pyetjen: Ç’do të ngjasë në Jugosllavi pas Titos?!…

Vetë Enver Hoxha, i frikësuar nga zhvillimet, shtroi i alarmuar pyetjen, duke dhënë po vetë edhe përgjigjen: “Ç’do të ngjasë në Jugosllavi pas Titos?!…Popujt e Jugosllavisë do të luftojnë me heroizëm kundër të gjithë atyre që do të tentojnë t’u cenojnë lirinë dhe pavarësinë”. Ka pasur komente të shumta në vitin 1980 se gjendja shëndetësore e Josif Broz Titos ishte përkeqësuar, ndaj Jugosllavia ishte në epiqendër të analistëve diplomatikë e politikë, ku nuk mungonte edhe vëmendja e shtuar e udhëheqjes politike shqiptare, si shtet fqinj, por dhe ku kishte popullsi e territore shqiptare.

Po pas vdekjes së Titos, çfarë ndodhi?

Më 4 maj 1980 vdiq Tito, ndërsa udhëheqja shqiptare përforcoi masat e brendshme të sigurisë e të vigjilencës, nga kufiri e në çdo qelizë të veprimtarisë së brendshme. Shtypi shqiptar ndër të tjera citoi shënimin e Enver Hoxhës: “Popujve të Jugosllavisë, vdekja e tij do t’u lërë pas mjerimin ekonomik dhe politik, përçarjen dhe grindjet në mes të mozaikut të popujve që formojnë atë që quhet Federata Jugosllave”. Kjo periudhë është karakterizuar nga një tension i brendshëm në udhëheqjen shqiptare për frikën e shpërthimit të ndonjë lëvizjeje në Shqipëri. Duket se më herët ka pasur shumë dezinformacione alarmuese nga agjenturat e huaja, ku nuk bënin përjashtim edhe ata për kryeministrin Mehmet Shehu. Nuk mund të fshihet fakti se tërthorazi ndjehej një frikë e mosbesim nga udhëheqja e lartë, prandaj trysnia ndaj kuadrove për shkundje, për luftë ndaj shfaqjeve të huaja, për luftë kundër liberalizmit, konservatorizmit, dogmatizmit e shabllonizmit, ishte sirenë alarmi për të mbajtur “në këmbë e në gatishmëri të lartë” ushtrinë e policinë. Se “ku flinte lepuri” këtë e dinin vetëm ata që ishin në krye, por që ndjehej një farë pasigurie, dyshimi e frike, kjo kuptohet nga “silurimet” që Enver Hoxha bënte ndaj drejtuesve në të gjitha fushat. Duket se në këtë periudhë, ndonëse nuk ka pasur asnjë sinjal në forumet e brendshme të PPSH, është ndjerë një plasaritje në marrëdhëniet e Enver Hoxhës me kryeministrin Shehu.

Por situata brenda Shqipërisë po ndryshonte. Mehmeti i lë postin Kadri Hazbiut?

Është fakt se Mehmet Shehu, në dhjetor 1979, “i dorëzoi” postin e ministrit të Mbrojtjes, Kadri Hazbiut, me justifikimin se atij do t’i besohej posti që kishte mbajtur Hysni Kapo, në Sekretariatin e Komitetit Qendror të PPSH-së, por që nuk e mori kurrë. Enver Hoxha kishte grumbulluar informacione nga Kadri Hazbiu, ministër i Mbrojtjes në atë kohë, për shfaqje ekstreme liberalizmi në radhët e Forcave të Armatosura dhe ndër të tjera, në një mbledhje me drejtues të lartë të Partisë e të Strukturave të Sigurisë, u është drejtuar të gjithë ushtarakëve: “Shokë oficerë, ku po e çoni ushtrinë me liberalizmin tuaj”?! Ky fjalim, në vijim, u kthye në program pune e material bazë për format e edukimit në strukturat e Forcave të Armatosura.

Në këtë kohë rritet edhe roli i Ramiz Alisë?

Analizë më e hollësishme për gjendjen në Poloni është bërë në shkurt të vitit 1981, në një publikim të shkruar nga Ramiz Alia, mbi bazën e tezave të dhëna nga Enver Hoxha. Në fillim të marsit 1981 Hoxha, ndodhej me pushime në Vlorë dhe prej andej ndiqte me shqetësim zhvillimet në Jugosllavi, ku evidentohej ndjeshmëria e lartë e tij kundër politikës shkombëtarizuese të jugosllavëve ndaj kosovarëve, duke i regjistruar ata si popullsi myslimane, me synim të fshihnin numrin e shqiptarëve, ndaj porositi Ramiz Alinë të shpallë publikisht qëndrimin e politikës shqiptare, madje edhe e orientoi si e çfarë të shkruajë. Referuar shënimeve të tij, evidentohet se më 1 prill 1981 ai ka analizuar zhvillimin e demonstratave të fuqishme në Kosovë (zanafilla në universitetin e Prishtinës), ku pati të vrarë e të plagosur dhe dhjetëra studentë .

Po më 2 prill, çfarë ndodhi?

Më 2 prill është shpallur gjendja e shtetrrethimit atje dhe më 3 prill Enver Hoxha detyrohet të ndërpresë pushimet e të kthehet në Tiranë, ngaqë situata e krijuar në Prishtinë e Podujevë, ku demonstruan studentë e punëtorë, në mbështetje të tyre, ishte tensionuar dhe qe shpallur gjendja e shtetrrethimit, duke shpërthyer një valë e madhe akuzash ndaj shqiptarëve, duke i etiketuar “nacionalistë”, “irredentistë”, “agjentë të imperializmit”, “ballistë”, “imformbyroistë” etj. Më 4 prill ai ka shkruar në ditar: “Ngjarjet në Kosovë më kanë preokupuar e më kanë shqetësuar shumë, pse titistët e poshtër jugosllavë, sipas lajmeve të agjencive, kanë sulmuar me mjetet më të egra popullin dhe studentët që në mënyrë paqësore kërkonin përmirësimin e konditave të tyre të jetesës dhe statusin e republikës për Kosovën në kuadrin e Federatës Jugosllave”. Ndërsa më 5 prill 1981 ai ka shënuar “…mblidhet Byroja Politike ku “diskutuam për ngjarjet e ditëve të fundit në Kosovë dhe masat që duhet të marrim ne”. Ka gjasa që aty të jetë ngjizur ideja e krijimi të batalionit të Policisë Popullore, si rezervë e Ministrisë së Punëve të Brendshme “për të zgjidhur detyra urgjente” që mund të krijoheshin nga zhvillimet e pritshme. Më 7 prill, Hoxha hodhi në “Ditar” shënimin analitik dhe polemizues, me titull “Çfarë pohon e çfarë mohon zoti Dragosavac”, si përgjigje ndaj fjalimit të Dushan Dragosavacit, mbajtur më 3 prill.

Në shënimin e Hoxhës refuzohet pikëpamja e liderit jugosllav se ish-federata jugosllave kishte gjetur zgjidhjen më të mirë të mundshme për çështjen e kombeve dhe kombësive; argumentohet pse shqiptarët në Kosovë meritojnë statusin e republikës brenda federatës; theksohet se shqiptarëve atje nuk u është dhënë asnjëherë e drejta e vetëvendosjes; demaskohet fabrikimi i së quajturës “kombësi myslimane”, për të konkluduar se as “Traktati i Londrës” dhe as “Traktati i Versajës” nuk janë të përjetshëm dhe nuk mund të dënojnë pa fund fatin e shqiptarëve. Në përgjigje të asaj situate kaotike dhune, më 8 prill 1981, u shkrua edhe një artikull në gazetën “Zëri i Popullit”, titulluar “Pse u përdor dhuna policore dhe tanket kundër shqiptarëve në Kosovë”. Në “Ditar”, më 11 prill, Hoxha ka shënuar se: “…shqiptari nuk e ka duruar kurrë robërinë”, në të cilin polemizohet ashpër me pohimin e Stane Dolanc-it se: “Kosova nuk do të bëhet kurrë republikë” (cituar prej shtypit perëndimor). Referuar shënimeve të ditarit të Enver Hoxhës për çështje ndërkombëtare, janë regjistruar 150-200 të vrarë në Prishtinë,13 në Ferizaj, 3 në Prizren, shumë të vrarë në Lipjan, Obiliq (madje këtu janë vrarë nxënës të shkollës së mesme), Podujevë, ndërsa me të plagosur janë mbushur spitalet, burgjet janë mbushur e aty po torturohen shqiptarët nga policia e ushtria serbe dhe për herë të parë përmenden dëshmorët e lirisë të demonstratave të para.

Veprimi serb në Kosovë cilësohet masakër dhe Hoxha shënoi deklarativisht se: “…ne do t’i mbrojmë vëllezërit tanë kosovarë deri në fund”. Lufta politike është ashpërsuar dhe kulmon si kurrë më herët që nga viti 1948. Më të frikshme për Shqipërinë e bënë këtë gjendje edhe reagimet antishqiptare të politikanëve serbë. Udhëheqës jugosllavë si Millosh Miniç, Vidiç, Petër Stamboliç etj. shpërthyen në fjalime akuzuese të karakterizuara nga një egërsi e shfrenuar, nga një dell shovinist serbomadh i paparë ndonjëherë kundër popullit shqiptar që jeton në Jugosllavi dhe kundër Shqipërisë. Kurse ministri i Brendshëm i RSF të Jugosllavisë, Franjo Hërljeviç, në ditët e para të majit 1981 lëshoi akuza se përfaqësitë diplomatike shqiptare në botë kanë organizuar e nxitur ngjarjet në Kosovë. Më 13 maj 1981 mblidhet përsëri Byroja Politike për të analizuar ngjarjet në Kosovë dhe masat që duhet të merren, ndër të tjera aty u miratua botimi në shtyp i artikullit “Kërkesa për t’i njohur Kosovës statusin e republikës është e drejtë”41.

Po incidenti në ambasadën jugosllave, ç’mund të na thoni rreth tij?

Pa kaluar dhjetë ditë nga kjo, më 23 maj 1981, ora 21.17, ambasada jugosllave provokoi me dy plasje eksplozivi në tarracën e kuzhinës. Lidhur me këtë, të nesërmen, më 24 maj, ambasadori jugosllav paraqiti protestë në MPJ të Shqipërisë.

Kush ishte drejtor i Policisë Popullore në atë kohë?

Ish-kryehetuesi i asaj kohe në Tiranë, e më vonë drejtor i Policisë Popullore, Dilaver Bengasi, është shprehur se akti u quajt nga agjencitë e huaja si “autogol në ambasadën jugosllave”. Pas kësaj marrëdhëniet me Jugosllavinë u acaruan në të gjitha fushat, tregtare, shkencore, kulturore, diplomatike etj. Sipas përfundimeve të grupit hetimor të këtij akti, cilësuar atentat terrorist nga pala jugosllave, që u arrit pas këqyrjes së vendit të ngjarjes, ekspertimeve shkencore të shumta e analizave të të dhënave të siguruara nga shumë burime, u konkludua se ngjarja ishte politike, e realizuar nga personeli i ambasadës jugosllave në Tiranë, me mjete e municione xheniere të prodhimit jugosllav. Më 3 qershor 1981, gazeta “Zëri i Popullit” botoi artikullin “Mbi ngjarjet e ambasadës jugosllave në Tiranë”, si kundërpërgjigje gazetës “Politika” të Beogradit. Ndërkohë, makineria shpifëse e policisë së fshehtë jugosllave, ajo e UDB-së, filloi intrigat për “zjarrvënie” të Ballkanit, me shpifje të padëgjuara kurrë më parë kundër Shqipërisë, madje deri në Uashington. Edhe kjo gjendje e krijuar kërkonte domosdoshmërisht fuqizimin e shërbimeve të policisë në kontrollin e mbajtjen e normalitetit të rendit shoqëror brenda vendit. “Albanian Free Press”: Albert Zholi

Siria, marrëveshja me Iranin dhe tregëtia janë çështjet më të mprehta të takimit në Uashington mes dy presidentëve, atij amerikan Donald Trump dhe atij francez Emmanuel Macron. Kjo është vizita e parë shtetërore e një udhëheqësi të huaj gjatë administratës Trump dhe siç tha presidenti amerikan plotësisht e përshtatshme për shkak të lidhjes së fortë me një aleat të vjetër siç është Franca

Një ceremoni ushtarake në Shtëpinë e Bardhë i parapriu takimit mes dy udhëheqësve. Në ditën e dytë të vizitës së tij shtetërore në Uashington, presidenti francez u prit në Shtëpinë e Bardhë me një ceremoni ushtarake, që angazhoi 500 trupa të forcave të armatosura amerikane. Dy udhëheqësit shoqëroheshin nga bashkëshortet e tyre, zonja e parë amerikane Melania Trump dhe bashkëshortja e presidentit francez Brigitte Macron.

Gjatë një fjalimi që pasoi ceremoninë pritjes, presidenti amerikan tha se vizita e presidentit Macron është dëmshi e marrëdhënies së qendrueshme me një vend aleat të vjetër të SHBA-së siç është Franca.

Është mëse e përshtatshme që ne po zhvillojmë vizitën e parë shtetërore me udhëheqësin e një aleati të vjetër të Amerikës, kombin krenar të Francës. Vizita juaj zoti president vjen në një moment vendimtar për aleancën tonë. Së bashku me miqtë tanë britanikë, Shtetet e Bashkuara dhe Franca ndërmorrën një akt vendimtar si përgjigje ndaj përdorimit të armëve kimike nga ana e regjimit sirian. Dua t’ju falenderoj personalisht ju, popullin francez dhe ushtrinë e vendit tuaj për partneritetin”, tha presidenti amerikan.

Presidenti Macron tha populli francez ka patur gjithnjë ndjenja te sinqerta ndaj popullit amerikan. Sipas tij për Francën, Amerika përfaqëson mundësi pa fund dhe dy popujt ndajnë së bashku idealet e paqes dhe lirisë.

Së bashku Franca dhe Shtetet e Bashkuara do të mposhtin terrorizmin. Dy vendet po përballen me të në forma të ndryshme. Ne së bashku do të përballemi me përhapjen e shpejtë të armëve të shkatërrimit në masë, tha presidenti Macron.

Pas ceremonisë së pritjes Presidenti amerikan Donald Trump dhe ai francez Emmanuel Macron zhvilluan bisedime zyrtare. Takimi dypalësh trajtoi çështje me rëndësi globale me të cilat ballafaqohen qeveritë e dy vendeve, përfshirë luftën në Siri, programin bërthamor të Iranit dhe planin e presidentit Trump për të imponuar tarifa për importet e aluminit dhe çelikut.

Gjasat janë që zoti Macron të shfrytëzojë bisedimet në Shtëpinë e Bardhë për të bindur zotin Trump që të mos heqë dorë nga marrëveshja bërthamore me Iranin. Presidenti amerikan e ka quajtur vazhdimisht atë një marrëveshje të keqe. Ai ka afat deri në 12 maj për të hequr dorë nga sanksionet ekonomike kundër Iranit si pjesë e marrëveshjes. Nga ana tjetër zoti Macron ka thënë se marrëveshja me Iranin nuk është e përsosur, por sipas tij mbi këtë çështje, nuk ka një “plan B.”

Ka të ngjarë gjithashtu që presidenti francez të bisedojë me zotin Trump mbi rëndësinë e qëndrimit të forcave amerikane në Siri. Zoti Trump ka folur për tërheqjen e amerikanëve nga Siria veriore. Por sipas zotit Macron kjo do të rriste rrezikun e braktisjes së Sirisë në duar e regjimit të Asadit dhe Iranit.

Në mbrëmje për nder të zotit Macron do të shtrohet një darkë shtetërore, ndërsa të mërkurën ai pritet të mbajë një fjalim përpara kongresit amerikan.