Shtetet islame shpallin Jerusalemin kryeqytet të Palestinës

“Ne e shpallim Jerusalemin si kryeqytet të shtetit të Palestinës dhe i ftojmë të gjitha shtetet ta njohin shtetin palestinez dhe Jerusalemin si kryeqytet të tij nën okupim”, thuhet në deklaratë

Shtetet anëtare të Organizatës për Bashkëpunim Islam (OBI), përmes deklaratës së Samitit të jashtëzakonshëm të organizuar në Stamboll pas njohjes së Jerusalemin si kryeqytet të Izraelit nga ana e qeverisë amerikane, shpallënJerusalemin si kryeqytet të Palestinës, duke i ftuar të gjitha shtetet që ta njohin shtetin e Palestinës dhe Kudsin Lindor si kryeqytet të tij të okupuar, raporton Anadolu Agency (AA).

Mbretërit dhe krerët e shteteve dhe qeverive të OBI-t u mblodhën sot në Stamboll me ftesë të presidentit të Turqisë, Recep Tayyip Erdoğan, pas vendimit të presidentit amerikan Donald Trump për ta njohur Kudsin si kryeqytet të forcës okupatore Izraelit, për t’i vlerësuar zhvillimet pas këtij vendimi dhe efektet e tij te umeti islam.

Abbas: Nuk do të lejojmë që SHBA të marrë pjesë në procesin e paqes
Kudsi, çështje e pazgjidhur prej një shekulli
Ruhani: Jemi të gatshëm të bashkëpunojmë për të mbrojtur Kudsin, “OBI të gjejë rrugën për t’i dhënë fund pushtimit izraelit”

Deklarata e Samitit vendimin e njëanshëm të presidentit amerikan e cilëson si të paligjshme, duke e kundërshtuar dhe dënuar atë.

“Ne e konsiderojmë atë si një sulm ndaj vlerave historike, ligjore, natyrore dhe kombëtare të popullit palestinez, sabotim i qëllimshëm i të gjitha përpjekjeve për paqe, shtytës i ekstremizmit dhe terrorizmit dhe kërcënim ndaj paqes dhe sigurisë ndërkombëtare”, thuhet në deklaratë.

Deklarata i bën thirrje të gjitha shteteve anëtare t’i japin prioritet çështjes palestineze në takimet e tyre ditore dhe axhendën e politikës së jashtme.

Shtetet anëtare kanë theksuar rëndësinë e Kudsit për muslimanët dhe të krishterët, duke konfirmuar përkushtimin për paqe të drejtë dhe gjithëpërfshirëse, e cila bazohet në krijimin e një shteti palestinez me kryeqytetJerusalemin.

Sipas deklaratës, vendimi i SHBA-ve paraqet shkelje të rëndë ndaj të drejtës ndërkombëtare, veçanërisht Marrëveshjes së Katërt të Gjenevës, të gjitha rezolutave legjitime, rezolutave 478 (1980) dhe 2334 (2016) të Këshillit të Sigurimit të OKB-së dhe themeleve të procesit të paqes të cilat përcaktojnë statusin përfundimtar të Jerusalemit. “Këto marrëveshje dhe zotime të nënshkruara nga SHBA-të e detyrojnë atë të tërhiqet menjëherë nga deklarata e saj”, thuhet në deklaratën e OBI-t.

“Të gjitha pasojat që do të lindin nëse SHBA-të nuk tërhiqen nga deklarata e saj e paligjshme i bëjnë përgjegjëse SHBA-të”, theksojnë shtetet e OBI-t, duke shtuar se vendimin e qeverisë amerikane e konsiderojnë si largim të SHBA-ve nga roli i mbështetësve të paqes dhe nxitje së politikave të kolonializmit, aparteidit dhe spastrimit etnik të shtetit izraelit.

Shtetet e OBI-t në deklaratë e shpallin Kudsin Lindor si kryeqytet të Palestinës.

“Ne e shpallim Kudsin Lindor si kryeqytet të shtetit të Palestinës dhe i ftojmë të gjitha shtetet ta njohin shtetin palestinez dhe Jerusalemin si kryeqytet të tij nën okupim”, thuhet në deklaratë.

Deklarata po ashtu u bën thirrje të gjitha shteteve ta zbatojnë në tërësi rezolutën 478 të KS-OKB-së të vitit 1980, e cila shfuqizon njohjen e Kudsit si kryeqytet të Izraelit, të mos mbështesin vendimin e SHBA-ve dhe të mos zhvendosin misionet e tyre diplomatike në Kuds.

Ajo poashtu fton KS-OKB-në t’i zbatojë përgjegjësite dhe të konfirmojë statusin ligjor të Kudsit, duke i dhënë fund okupimit izraelit dhe duke siguruar mbrojtje ndërkombëtare të popillit palestinez.

“Në rast se KS-OKB nuk mund të veprojë, jemi të gatshëm ta dërgojmë këtë shkelje në të rëndë në Asamblenë e Përgjithshme (AP) të OKB-së, në kuadër të rezolutës 377A për ‘unifikim për paqe’”, theksohet në deklaratë.

Deklarata ka dënuar sulmet izraelite në protestat paqësore, ndërsa po ashtu është shprehur përkushtim për të siguruar burime financiare të nevojshme për mbështetjen e popullit palestinez.

Mbështetje është theksuar edhe për aktivitetet e Agjencisë së OKB-së për refugjatët palestinezë (UNRWA). Deklarata fton vendet e OBI-t dhe organet e saj të sigurojnë çdo mbështetje ekonomike, sociale, teknike dhe financiare për popullin dhe shtetin palestinez./e.e

Si qeverisin elitat e Ballkanit duke prodhuar skandale

Ka dy lloje skandalesh politike në Ballkanin Perëndimor. Të parat ekspozohen nga gazetarë inteligjentë, të cilët, duke rrezikuar jetën e tyre, hedhin dritë mbi vjedhjen dhe elitat që kanë dominuar postet më të larta të rajonit për dekada të tëra. Skandalet e dyta prodhohen nga këto regjime të njëjta dhe nga daljet e tyre në shtypin tabloid dhe përdoren për ta shpërqendruar publikun nga e para

Nga Jasmin Mujanovic, BIRN

Le të marrim si shembull një rast të fundit. Më 8 nëntor, rrjeti i gazetarisë investigative të Serbisë, KRIK, zbuloi se Nenad Popoviç, një zyrtar i lartë në Partinë Progresive Serbe, SNS, drejtoi qeverinë dhe ministrin pa portofol përgjegjës për “inovacionin”, kishte fshehur miliona të tëra në llogari offshore në Bahamas. Pasuria e Popoviçit u zbulua të jetë e tillë saqë ai mund të jetë politikani më i pasur në të gjithë ish-Jugosllavinë.

Ky ishte skandali i dytë i tillë që nga shtatori që tronditi qeverinë serbe. Javë më parë, KRIK raportoi se ministri i Mbrojtjes, Aleksandar Vulin, me sa duket, kishte marrë më shumë 240,000 euro nga “tetoja e gruas së tij në Kanada” që nga viti 2011. Përpjekjet e mëvonshme të Vulinit për të shpjeguar origjinën e parave janë bërë thjesht më qesharake çdo orë që kalon.

Duke lënë mënjanë absurditetin, të dyja historitë përgënjeshtrojnë pretendimin e presidentit Aleksandër Vuçiç se Serbia ka një qeveri kombëtare të rinovuar, në frymën e pastrimit të establishmentit politik dhe administrativ nga mollët e kalbura dhe duke e përcaktuar vendin si një pretendent të padiskutueshëm rajonal për anëtarësimin në BE. Në të vërtetë, siç tregojnë këto raporte dhe të tjera, qeveria e Beogradit është e mbushur me korrupsion dhe nepotizëm, tepër autoritare dhe ende e zhytur në ekstremizmin e viteve 1990. Pas javësh të tëra me tituj gazetash që sa vinin e përkeqësoheshin, Vuçiç dhe aparatçikët e tij me sa duket vendosën se ishte koha për ta zhvendosur vëmendjen e publikut larg fakteve të tyre në rritje të sundimit të tyre hajdut.

Në vend që ta deklaronte qeverinë e tij përgjegjëse në lidhje me kriminalitetin e dukshëm brenda radhëve të saj, shtypi pro-qeveritar u kap me një intervistë të Bakir Izetbegoviçit, anëtari boshnjak i presidencës trepalëshe të Bosnjës, në të cilën ai deklaroi dëshirën e tij personale që Bosnja të njohë zyrtarisht pavarësinë e Kosovës. Brenda pak orësh, intervista e Izetbegoviçit me Deutsche Welle ishte lajmi kryesor në çdo tabloid të madh në Serbi, ndërsa një valë gjysmë të vërtetash, keqinterpretimesh dhe lajmesh të fabrikuara vetë e larguan të gjithë vëmendjen nga Popoviçi, Vulini dhe milionat e tyre të zhdukura. I vetmi lajm i rëndësishëm ishte shovinizmi i Izetbegoviçit, i turmave të myslimanëve në portat e Novi Pazarit, i turqve që thurin komplote, i amerikanëve komplotues, i britanikëve mashtrues dhe i të gjithë atyre që konspiruan për “të vjedhur” Kosovën e shenjtë nga gjiri i popullit serb.

Ekzagjerimi këtu është i qëllimshëm, por çuditërisht i ngjashëm me atë që në fakt zuri faqet e Informer, Kuriri dhe Telegraf, disa nga gazetat më të lexuara të vendit.

Brenda një dite, vetë Vuçiç ishte në pozitë për t’u shpjeguar. Ai shpjegoi se komentet e Izetbegoviçit ishin jo vetëm një skandal diplomatik, por edhe një tradhti e bujarisë së Serbisë ndaj Bosnjës, për Marrëveshjen e Paqes së Dejtonit të vitit 1995, ajo ishte dhe mbetej një “garantuese”.

Dhe këtu u plotësua e gjithë performanca. Vuçiç dhe bashkëpunëtorët e tij e kishin ridrejtuar stuhinë e polemikave publike nga keqtrajtimi i tyre drejt një skandali të sajuar që kombinonte shumë mirë ankesat politike me trillimin e pastër politik.

Cirku i medias në Beograd, natyrisht, injoroi faktin që vërejtjet e Izetbegoviçit i bënin jehonë atyre të anëtarit kroat të presidencës së Bosnjës, Dragan Coviç, thuajse fjalë për fjalë.

Vetëm pak ditë më vonë, Coviç kishte thënë se për atë, njohja e Kosovës nga Bosnja “as që bëhej fjalë. Ishte thjesht çështje e një arritjeje konsensusi në lidhje me këtë”. Megjithatë, ajo intervistë nuk u transmetua në Serbi, edhe pse qëndrimet e të dy burrave në lidhje me këtë çështje janë përcaktuar prej vitesh – njësoj si ka qenë kundërshtimi i palëkundur ndaj njohjes së Kosovës nga palët serbe etnike të Bosnjës. Prandaj, siç sugjeroi Coviç, e gjithë çështja ishte e diskutueshme: pa marrëveshje trepalëshe, nuk mund të ndodhte asnjë njohje. Për sa i takon idesë së Serbisë si “garantore” e Marrëveshjes së Dejtonit: siç Vuçiç e di mirë, Serbia nuk është një garantore, por një nënshkruese e Marrëveshjes së Paqes së Dejtonit.

Në vend që të jetë një arbitër neutral dhe e jashtme, nënshkrimi i Serbisë në marrëveshje është provë i rolit të Beogradit si një nga tre palët luftuese në luftën e Bosnjës së viteve 1992-1995. Si rezultat, teksti i Dejtonit përcakton qartë se Serbia e ka për detyrim të respektojë integritetin territorial dhe sovranitetin e Bosnjës. Ajo s’ka të drejtë të ndërhyjë, siç e bën shpesh qeveria e Vuçiçit, në çështjet e brendshme të Bosnjës. Megjithatë, në shtatori dhe tetor, Vuçiç qëndroi krah për krah me Milorad Dodik, presidentin separatist të entitetit serb të Bosnjës, Republika Srpska, pasi kjo e fundit shprehu dëshirën e qeverisë së saj “të jetë një” me Serbinë, duke konspiruar në mënyrë aktive edhe me qeverinë në Beograd për të shkelur kontrollin e Bosnjës mbi kufirin e saj lindor.

Në të vërtetë, nëse dikush do të rishikonte të gjithë indeksin e mbështetjes së nënkuptuar dhe të qartë të Vuçiçit për sulmet dhe retorikën e Dodikut, ose akoma më keq, të sponsorizimit të Beogradit për qeverinë e Dodikut që shkon deri në kohën e administratës së Boris Tadiçit, do të humbej shumë kohë e çmuar për të kujtuar një kronikë hipokrizie. Nëse një hipokrizi dhe dezinformim i tillë s’do të ishin rutinë, mund të ishte e neveritshme. Duke qenë se janë, familjariteti dhe transparenca cinike duhet të na bëjnë konfuz. Sigurisht që Izetbegoviç s’është i pafajshëm në këtë gjë.

Anëtari i presidencës boshnjake jo vetëm duhet të dijë më mirë sesa të ushqejë trollet politike të Serbisë, ai vetë nuk është i huaj për një manipulim të tillë. Si kreu i Partisë për Veprim Demokratik, SDA, padyshim sipërmarrja më e korruptuar dhe kriminale politike në vend, Izetbegoviç ka debatuar shpesh publikisht me Dodikun, Coviçin dhe me Vuçiçin që të shpërqendrojë publikun në Bosnjë nga skandalet e panumërta të partisë së tij: qoftë ky arrestimi i zyrtarëve të rangut të lartë të SDA-së për shpërdorim detyre apo keqmenaxhimi i spitalit të përgjithshëm të Sarajevës nga gruaja e tij.

Pra, cili është skandali i vërtetë këtu? Vuçiç dhe Izetbegoviç me qëllim ose jo kanë nisur një debat gjysmë artificial në lidhje me zgjidhjen post-Jugosllave – nga Kosova te Marrëveshja e Dejtonit – dhe konsumuan të gjithë oksigjenin në dhomë gjatë këtij procesi.

Ndërkohë, Popoviç dhe Vulin po numërojnë milionat e tyre, drita e zbehtë dhe pulsuese e demokracisë e Serbisë zbehet nga dita në ditë, ndërkohë që në të gjithë Drinën në Sarajevën e udhëhequr nga SDA-ja, rrjeti i ujësjellësit është ende në gjendje të keqe, shërbimi shëndetësor i hairit është privilegj i pak njerëzve dhe punësimi mbetet një çështje ku duhet të paguash për të filluar punë.

Megjithatë, vetëm një grup i këtyre çështjeve do të ketë pasoja reale për qytetarët e Serbisë dhe Bosnjës. Vetëm në rast se këto do të arrinin të ishin në titujt kryesorë të gazetave.

Kosova ende pa Kardiokirurgji për fëmijë

Qendra Klinike Universitare e Kosovës, nuk ka kushte e as kuadro që të bëjë diagnostikimin e fëmijëve me sëmundje në zemër. Këtë e thotë Ramush Beiqi, kardiolog dhe pediatër i cili për Radion Evropa e Lirë shpjegoi se po të kishte Kosova kuadro dhe mjete adekuate që do të diagnostikonte sëmundjen e zemrës qysh në barkun e nënës, lindja do të ndodhte në një vend ku intervenimet në zemër tek foshnjat do të mund të kryheshin menjëherë pas lindjes

Ai thotë se prej vitesh nuk ka përparim në këtë fushë. Në Kosovë janë rreth 400 fëmijë në vit që lindin me anomali në zemër. Prej tyre rreth 200 kanë nevojë për intervenim kirurgjik, shërbim të cilin u duhet ta marrin jashtë vendit.

Beiqi tha se vetëm gjatë muajit nëntor, në Qendrën Klinike Universitare kanë lindur 8 fëmijë me anomali në zemër. “Gjendja është kaotike. Disa profesionistë kanë njohuri, e të tjerët jo. Ne nuk kemi as kardiokirurgji. Diagnostikimi i hershëm nuk do të thotë të bëhen aborte, por të bëjmë përgatitje që fëmija të lind aty ku ka mundësi për intervenim të duhur”.

“Në Kosovë vdesin shumë fëmijë. Kjo është sëmundje moderne, ku në gjithë botën vdesin fëmijë, pra ata që lindin me anomali. Por nëse do të bënim një skrening më të mirë perinatal, ne do ta zvogëlonim shumë vdekshmërinë e foshnjave”, tha Beiqi.

Prindërit që kanë fëmijë me anomali në zemër, për shkak të pamundësisë për t’i operuar jashtë vendit, presin me vite duke kryer kontrolle të rregullta brenda QKUK-së.

Bekim Berisha, nga fshati Llaushë i Skenderajt, ka një djalë 10-vjeçar me probleme në zemër. Ai jep hollësi të tjera rreth vështirësive që ka në trajtim të fëmijës së tij.

“Qe një kohë të gjatë ne presim. Këtu po thonë se nuk mund të kryhet operimi, unë nuk kam mundësi ta operojë jashtë. Mjekët këtu po thonë vetëm të presim. Dhe ne po presim në ankth. Qe 10 vjet jemi kështu. Djali tash i ka 10 vjet dhe ka anomali në zemër, kështu ka lindur,” tha Berisha.

Por, në anën tjetër Shefqet Lulaj, gjinekolog, thotë se Kosova ka kuadro edhe për diagnostikim, por edhe për trajtim, por që kërkohet një bashkëpunim më i mirë mes profesionistëve shëndetësorë, duke përfshirë gjinekolog neonatolog, obstetër, pediatër, kardiolog dhe nga gjitha fushat tjera që kërkohet ndihmë për trajtim, varësisht nga rasti.

“Në Kosovë bëhen skriningje që pos tjerash kanë për qëllim diagnostikimin e hershëm të frytit brenda në mitër. Janë tre ultrazëra që bëhen, e që do duhej t’i detektojë keq formimet e frytit. Për këtë arsye po mundohemi përmes konferencave, edukimit të vazhdueshëm profesional, që duhet bëhet edhe ekzaminimi i zemrës së frytit në ultrazërin e dytë në javë të caktuar”,tha Lulaj.

Ministria e Shëndetësisë nuk ka fond të veçantë për trajtimin e fëmijëve që kanë anomali në zemër.

Por, disa prej këtyre sëmundjeve mbulohen nga fondi 6 milionë eurosh, i ndarë për trajtim të pacientëve që iu ndihmon atyre të marrin shërbime jashtë vendit nëse ato sëmundje nuk mund të shërohen brenda Kosovës.

Që nga mbarimi luftës në vitin 1999, Kosova ka përfituar shumë donacione në sektorin e shëndetësisë. Emiratet e Bashkuara Arabe tashmë kanë zyrtarizuar fillimin e planeve për ndërtimin e një spitali pediatrik në Prishtinë.

Për ndërtimin e kësaj qendre, do të dhurohen 22 milionë euro, ku sipas zyrtarëve kompetentë, ky spital do të jetë i pajisur me teknikë moderne.

Vulin në Sarajevë: Kosova është Serbi

Ministri serb i Mbrojtjes Aleksandar Vulin ka qëndruar në Sarajevë dhe atje është takuar me kolegen e vet nga Bosnja e Hercegovina, Marina Pendesh, njoftojnë mediet e Beogradit

Vulin në kryeqytetin boshnjak është përgjigjur në interesimin e gazetarëve për Kosovën. “Kosova është pjesë e Serbisë. Nuk e kuptoj kur dikush kërkon që një vend të jetë i ruajtur në kufijtë e njohur, ndërsa në anën tjetër duan që Serbia të jetë më e vogël ose të jetë më ndryshe e organizuar”, ka thënë ai, transmeton Koha.net.

Ai, siç njofton tanjug, ka theksuar se në Sarajevë ka arritur dy vjet pas përpjekjes për të Aleksandar Vuçiqit në Srebrenicë dhe se për këtë akt, ka fajësuar ai, askush nuk është dënuar.

“Po të kishte ndodhur diçka e tillë në Serbi, ne do të kishim bërë çdo gjë për të arritur tek e drejta dhe fajtorët do të ishin dënuar”, ka akuzuar ai.

Ramush Haradinaj flet për heqjen e Kartonit të Gjelbër, thotë se po punohet në këtë drejtim

Kryeministri i Kosovës, Ramush Haradinaj, i është përgjigjur pyetjes së deputetit Faton Topalli për çështjen e Kartonit të Gjelbër dhe heqjen e tij

Kryeministri tha se ende nuk kanë arritur ndonjë rezultat në heqjen e Kartonit, derisa shtoi se janë në kërkim të listës së veprimeve që mund t’i marrë Qeveria për heqjen e këtij Kartoni.

“Kemi fillu me identifiku përmes cilave veprime mundësohet që të gjithë që vinë në Kosovë, është fjala për bashkatdhetarët, e që kanë sigurime prej vendeve nga vijnë të vlejnë edhe për Kosovën por rezultatin ende s’e kemi”, u shpreh Haradinaj në fjalën e tij në Kuvend, gjatë pyetjeve parlamentare.

Por deputeti i VV-së, Faton Topalli, i kërkoi afat kohor se kur mund deputetët të marrin një përgjigje dhe a ka ndonjë ekip që merret me këtë.

Haradinaj shtoi se ka pasur shumë tema të tjera që e kanë marrë fokusin dhe kjo edhe ka rezultuar që çështja e Kartonit të lihet pak anash, por tha se sot, nuk është në gjendje që të japë ndonjë afat.

“Kemi qenë me plot tema të menjëhershme dhe kjo temë ka qenë mungesë e fokusimit të mjaftueshëm në këtë temë, megjithatë është e iniciuar. Sot s’jam në dispozicion me dhanë afat.

Por janë dy-tri resorë që duhet me punu në të njëjtën kohë, me ardh te një formulë që do të rezultonte me heqjen e pagesës në kufi, apo Kartonit të Gjelbër”, shtoi ai.

Të dyshuarit për atentatin ndaj Vllasit edhe dy muaj paraburgim

Gjykata Themelore e Prishtinës ua ka vazhduar edhe për dy muaj masën e paraburgimit Murat Jashari dhe Avni Llumnica, të dyshuarve për rastin e sulmit ndaj avokatit Azem Vllasi

Lajmin për KALLXO.com e konfirmoi avokati Naim Rudari, i cili e cilësoi të paligjshëm vazhdimin e paraburgimit.

“Gjykata ka vazhduar masën e paraburgimit në kundërshtim me kodin e procedurës penale e konkretisht edhe pse nuk ka dhënë asnjë argument të vetëm për çështjen materiale ka bërë edhe shumë shkelje procedurale”, ka thënë avokati Rudari.

“Shkelje procedurale ka bërë në kundërshtim me nenin 190 të KPPK-se, ku specifikohet se paraburgimi nuk mund të zgjasë më shumë se tetë (8) muaj kur procedura zbatohet për vepër penale të dënueshme më shumë se pesë (5) vjet”, ka thënë ai.

Sipas avokatit Rudari, vazhdimi i paraburgimit nuk mund të bëhet për rastet kur kemi të bëjmë jo me figura të larta shtetërore.

“Edhe vepra penale – vrasje e përfaqësuesve të lartë të Republikës së Kosovës nga neni 126 e specifikon se për t`u kryer kjo vepër kur dikush privon nga jeta kryetarin e Kosovës, kryeparlamentarin, kryeministrin, kryetarin e Gjykatës Kushtetuese, kryetarin e Gjykatës Supreme, kryeprokurorin e shtetit. A këtu në arsyetim flitet vetëm për avokatin Azem Vllasi i cili asnjëherë nuk ka qenë përfaqësues i lartë i Republikës së Kosovës”, ka deklaruar avokati i të dyshuarit Avni Llumnica, Naim Rudari.

Kroacia hyn në zonën Schengen

Parlamenti Europian, në mbledhjen e vet plenare në Strasbourg, gjatë debatit tematik, ka përkrahur hyrjen e Kroacisë në zonën Schengen

Hyrja, sipas asaj që presin europarlamentarët kroatë, mund të ndodhë në vitin 2019, përcjell ”jutarnji list”, transmeton Koha.net.

Baza kryesore e propozimit të këtui ndryshimi të madh në sistemin e hyrjes e daljes nga BE është se në Union nuk duhet të ketë shtete të rendit të dytë dhe se për këtë arsye propozohet që zona Schengen të zgjerohet edhe në Bullgari, Rumani e Kroaci.

Nga Kroacia tani pritet që deri në fund të vitit të ardhshëm të plotësojë të gjitha kriteret për t’u bërë anëtare e zonës Schengen.

Betejë e përgjakshme e serbëve në Beograd (video)

Derbi i Beogradit ndërmjet Partizanit dhe Crvena Zvezdes (Ylli i Kuq), ka përfunduar dhunshëm mbrëmjen e djeshme

Qindra tifozë janë përfshirë në një zënkë masive, që ka përfunduar me dhjetra të plagosur dhe të arrestuar nga policia. Derbi i Beogradit është një nga më të egrit në botë, që shoqërohet gjithmonë me skena dhune.

Olsi Rama dhe Gaz Demi kanë qenë të ftuar nga presidenti i Partizanit të Beogradit për të parë derbin e kryeqytetit serb Partizani Beograd-Cervena Zvezda. Por ndeshja nuk ka shkuar ashtu siç pritej sepse brenda sektorit të tifozëve të Partizanit ndodhi një përplasje dhe dhjetëra tifozë u plagosën.

Fillimisht u tha se sherrin e filluan disa tifozë të Zvezdës, të cilët ndodheshin në sektorin e atyre të Partizan-it, por kjo teori u hodh poshtë më vonë.

Ende nuk dihet se kush ishin tifozët që u rrahën nga tifozët e Partizanit dhe u dogjën më mjete piroteknike. Policia arriti të vendosë qetësi pas ngjarjes, por vetëm pasi disa tifozë dhe polica u plagosën dhe u dërguan për spital.

Ndeshja u ndërpre dhe vazhdoi pas disa minutash, ndërsa në fund përfundoi me barazimin 1-1.

Visar Ymeri në emër të konsensusit po e linçon Albin Kurtin

Brenda një viti (2017) Lëvizja “Vetëvendosje” ka arritur ta përjetojë përforcimin më të madh që nga themelimi, por në të njëjtën kohë ka marrë edhe goditjen më të fuqishme qysh prejse ka dalë në skenën politike

Gjatë zgjedhjeve të fundit nacionale, që u mbajtën këtë vit, ky subjekt arriti të sigurojë më së shumti ulëse në Parlament, duke u bërë partia më e votuar në vend (me mbi 200 mijë vota). Mirëpo ditëve të fundit kjo parti shënoi përplasjen më të thellë deri më tash. E këtë ndarje mbrëm u pa se po e ushqen edhe vetë kryetari aktual i VV-së Visar Ymeri. Daklarimet dhe qëndrimet e tij që shfaqi mbrëmë në “Rubikon” të KTV-së, vetëm sa e thelluan edhe më shumë ndarjen.

Ndaj deklaratave të Visar Ymerit ka reaguar edhe Elvis Hoxha

Ja postimi i plotë Elvis Hoxhës në facebook:

Këshilli i Përgjithshëm nuk është procedurë, por vetë demokracia. Aty kemi patur debatet më të thella politike. Ai është organi më i lartë vendimmarrës, pas anëtarësisë. Kush na thotë se demokracia është e mirë kur vendoset më së pari qetësia nëpër grupe të vogla, është duke na thënë se demokracia projektohet nga pak njerëz.

Kjo është e kundërta e emancipimit.

Kush na thotë se aktivistja Tinka Kurti duhet të ketë përgjegjësinë e duhur sepse ka një detyrë brenda Lëvizjes, i bie të thotë se Aida Dërguti si deputete dhe anëtare kryesie nuk ka pse të jetë po kaq e përgjegjshme dhe mund të vazhdojë të drejtojë Kuvendin. Për Tinka Kurtin, aktivisten, ka “Komision Disiplinor”. Nërkohë, Aida Dërguti mund ta përdor FB për çdo komunikim me Lëvizjen pa ardhur kurrë në mbledhje. Po përmes FB ajo mund të japë dorëheqjen, “natyrisht” jo nga karrigia e Nënkryetares së Kuvendit. Po përmes FB ajo mund të akuzojë bindjet dhe metodat e Lëvizjes VETËVENDOSJE. Ndërsa aktivisti i thjeshtë, kur përdor FB, është “linçues”.
Kjo është e kundërta e demokracisë.

Albin Kurti është i rëndësishëm si kontribut, si potencial i fuqishëm intelektual dhe politik, si vetëmohim, por vetëm si kryetar JO – ishte konkluza e njeriut të konsesusit. Por ndërkohë që organizata ka kërkuar e kërkon me ngulm Albinin të kandidojë si kryetar, njeriu i konsensusit shtoi: le ta presim Albinin sepse ai mund të na vendosë në pajtim, ai e vë veten para organizatës. Kështu njeriu i konsensusit prodhoi kult. Por dhe kusht. Pra, kushti për Albinin është: ose organizata ose kandidatura.
Kjo është e kundërta e organizatës.

Njeriu i konsensusit pranoi se nën udhëheqjen e tij, Lëvizja VETËVENDOSJE! është dyfishuar. Njeriu i konsensusit sapo shpiku kultin e “njeriut konsensual”.
Kjo është e kundërta e thjeshtësisë së aktivizmit.

Njeriu i konsensusit gjithashtu tha se nëse ndodh që të mos respektohemi, “ne” dalim dhe dobësohet forca e Lëvizjes para projekteve të rënda si “Zajednica” dhe Demarkacioni.
Kjo është e kundërta e sovranitetit.

E tashmë kur pozicionimet pro dhe kundër kandidimit të ish-liderit të Lëvizjes Vetëvendosje Albin Kurti dolën në pah, duke vënë në spikamë kundërshtimin e Dardan Molliqajt dhe tek mbrëm edhe të kryetarit aktual të Lëvizijes, Visar Ymeri. Kjo tregon se kemi të bëjmë me një lidhje të ngushtë ndërmjet Molliqajt dhe Ymerit.

Insajderi ka gjetur një postim të 4 qershorit nga Dardan Molliqaj që shpjegonte raportin e ngushtë mes tij dhe Ymerit.

Molliqaj aty tregon se me Ymerin kanë një lidhje 11 vjeçare dhe se kjo kohë ka bërë që ata të kirjojnë një shoqëri të ngushtë.

“Me Visarin u takova për herë të parë para më shumë se 11 vitesh. Nuk ka ndjenjë më të mirë se sa ta kesh pranë për 11 vite – pa asnjë ndërprerje – një shok si Visar Ymeri”, shkruante Molliqaj.

Vazhdonte edhe më tej.

“Edhe sot, sikurse edhe atëherë, Visari nuk ndalet së angazhuari. Përgjatë mandatit të tij si kryetar, Lëvizja jonë pësoi rritjen më të madhe ndonjëherë duke mbledhur rreth vetës njerëzit më të mirë të vendit”, shkruante Molliqaj duke përfunduar këtë vlerësim për shokun e tij.

Mimoza Shala: Visar Ymeri më hoqi nga lista e kandidimit

Në një postim në rrjetin social Facebook, aktivistja e VV-së nga Gjakova Mimoza Shala, tregon se si Visar Ymeri e hoqi nga lista e kandidimit për deputete duke i thënë sakrifikohu kesaj radhe për Lëvizjen

Shkrimi i plotë:

“Mimozë tërhiqu” ma kërkoi kryetari Lëvizjes në Qershor se më thirri në takim!
Për çfarë arsye i thash? S’kishte arsye, fliste kot derisa më tha sakrifikohu për Lëvizjen!
E për çfarë po sakrifikohem?!
S’kishte përgjigje.
E pyeta pastaj,
Visar, a i kam shkel parimet e VVsë? Jo më tha! Visar, a e kam keqpërdor punën time si përfaqësuese e VVsë? Jo më tha.

Ok i thash, nëse bash ke vendos me m’hjek prej kandidaturës bëje, mundesh me m’hjek unë me vullnet nuk tërhiqem, edhe nëse e bënë unë kam me hesht, sepse nuk e shkeli drejsen e aktivistëve, nuk e shkeli gjakun! Ah, edhe diçka i thash, nëse Albini ma kërkon një gjë të tillë do e bëja. (Këtë ia thash me ironi, duke qenë e bindur që Albini nuk e shkel aktivisten, përkundrazi)
Ai e bëri, duke shkelur gjithë Këshillin e përgjithshëm të VVsë, e unë heshta se Lëvizja është shpresa e jetës sime dhe e ruaj me mish e me shpirt, nuk ka post që mund të më ofroj dikush, as s’ka miliona që m’shtyjnë më i bë dëm Lëvizjes!

Ia thash edhe disa fjalë të mira, le t’i mbaj në mend se në çka i thash po më ngjason, edhe ato ia thash me ballin lart e kurrizin drejt!
Ja ku jemi, unë vërtikalisht, e ti? Ty sonte “pak” po të njohin edhe shumë të tjerë!
Albini në popull e në Lëvizje nuk është Mimoza, Albini është NE, ti sonte kërkove t’ia bësh Albinit të njëjten që ma bëra mua, unë heshta sepse ishin zgjedhjet, dhe u angazhova me vullnetin e njejtë për kandidatët tjerë, e bindur që një ditë do del fytyra jote në shesh!

P.S

Më pyeti një mik i imi njëherë; Mimozë çka je ti në VETËVENDOSJE! se ja ke kushtu krejt qenien? I thash jam një pikë, ama pikën nuk e lëshoj kurrë!
Kush mundet me ma mohu të qenurit aktiviste? Askush!”