Erdogan: Operacioni në Afrin nuk ka synime pushtuese

Presidenti turk, Recep Tayyip Erdogan, i ka thënë presidentit francez, Emmanuel Macron, se operacioni i ushtrisë turke brenda Sirisë me qëllim të pastrimit të “elementeve terroriste”, nuk është konceptuar për të marrë përjetësisht territorin sirian

Agjencia shtetërore e lajmeve Anadolu, ka raportuar më 3 shkurt se Erdogani i ka thënë Macronit në një bisedë telefonike, se Turqia “nuk e ka syrin në territor të ndonjë shteti tjetër”.

Më 20 janar, Turqia ka nisur një operacion tokësor dhe ajror kundër anëtarëve të Njësiteve për Mbrojtjen e Popullit (YPG) në rajonin Afrin të Sirisë që kontrollohet nga kurdët.

Ankaraja ka thënë se forcat e saj janë përkrahur nga Ushtria e Lirë Siriane (FSA), e cila synon ta rrëzojë nga pushteti, presidentin sirian, Bashar al-Assad.

Turqia e akuzon YPG-në, se ka lidhje me Partinë e Punëtorëve të Kurdistanit (PPK), e cila ka zhvilluar kryengritje në juglindje të Turqisë për më shumë se 30 vjet.

Po ashtu, PPK-ja njihet edhe si grup terrorist nga Turqia, Shtetet e Bashkuara dhe Bashkimi Evropian.

Mirëpo, aleatët perëndimorë të Turqisë kanë punuar ngushtë me luftëtarët e YPG-së në betejën kundër ekstremistëve të grupit militant, Shteti Islamik, dhe nuk e konsiderojnë atë grup terrorist.

Macron ka thënë javën e kaluar në një intervistë, se Franca do të përballej me “problem real” nëse fushata turke do të rikthehej në “operacion pushtues”.

Pas deklaratave të liderit francez, ministri i Jashtëm turk, Mevlut Cavusoglu, ka thënë se Franca nuk ka të drejtë “të na jap mësime” në operacionin jashtë kufijve, duke cituar historinë koloniale të Francës.

Këto komente kanë ardhur në mesin e raportimeve se shtatë ushtarë turq janë vrarë më 3 shkurt në përplasjet kundër luftëtarëve kurdë në Siri.

Portali kurd i lajmeve, Rudaw, ka cituar ushtrinë turke të ketë thënë se pesë ushtarë janë vrarë gjatë një sulmi në një tanke turke. Dy të tjerë janë vrarë më herët gjatë ditës në përleshje të ndara.

Nëse konfirmohet, vdekjet do të dërgonin në 14 numrin e ushtarëve turq të vrarë gjatë operacionit në rajonin Afrin.

Në anën tjetër, Qeveria turke ka kundërshtuar një raport nga organizata “Human Rights Watch” më 3 shkurt, se rojet kufitare turke janë duke shtënë në mënyrë indirekte dhe janë duke kthyer me forcë azilkërkuesit që po tentojnë të kalojnë në Turqi.

Zëdhënësi i Erdoganit, Ibrahim Kalin, u ka thënë gazetarëve se ushtarët turq janë aty për të mbrojtur këta persona dhe se Ankaraja ka pasur “politikën e dyerve të hapura”, që nga fillimi i luftës civile në Siri më 2011.

10 profiterë të shtetit shoqërojnë një garues të vetëm në Lojërat Olimpike në Korenë e Jugut

​Suksesin e një sportisti të Kosovës e kanë shfrytëzuar së paku dhjetë zyrtarë të shtetit. Ata do të shkojnë në Korenë e Jugut bashkë me skitarin Albin Tahiri, si pjësëmarrës në Lojërat Olimpike Dimërore. Pyetja është: pse duhet kaq shumë zyrtarë të Shtetit të shkojnë në një ngjarje kur merr pjesë vetëm një sportist

Zëdhënësi i Komitetit Olimpik të Kosovës Kushtrim Krasniqi ka konfirmuar për Gazetën Express se në Lojërat Olimpike Dimërore që do të mbahen nga data 9 shkurt në Korenë e Jugut, do të udhëtojnë 10 zyrtarë me skitaristin e vetëm që do ta përfaqësojë Kosovën, Albin Tahirin. Shtatë prej tyre janë nga Komiteti Olimpik i Kosovës, ndërsa tre mysafirët tjerë janë zyrtarë shtetërorë.

Sipas Krasniqit, tre anëtarë të delegacionit 11-anëtarësh kosovar që shoqëron të vetmin garues në Lojëra, do të qëndrojnë në Fshatin Olimpik (së bashku me skitarin). Këta janë zyrtari për media, shefi i misionit dhe trajneri Agim Pupovci.

Ndërkaq, presidenti i KOK-ut, Besim Hasani, së bashku me sekretarin e përgjithshëm të Komitetit, Shasivar Haxhijajn, si dhe dy anëtarë tjerë të bordit, do të shkojnë në Korenë e Jugut me ftesën e Komitetit Olimpik Ndërkombëtar.

“Lajmi se do të shkojnë 16 zyrtarë nuk është aspak i vërtetë. Në Korenë e Jugut do të udhëtojnë shtatë persona bashkë me Albin Tahirin, ndërsa vetëm katër do të vendosen në Fshatin Olimpik: zyrtari për media, shefi i misionit, Bujar Turjaka dhe trajneri, Agim Pupovci. Kurse kryetari, Besim Hasani, sekretari i përgjithshëm i Komitetit, Shasivar Haxhiaj dhe dy anëtar tjerë të bordit të Komitetit Olimpik, kanë ftesë nga Komiteti Olimpik Ndërkombëtar. Hasani do të qëndrojë vetëm nëceremoninë hapëse, kurse dy anëtarët do të qëndrojnë për një kohë të shkurtër. Do të marrë pjesë edhe një sponsor, prej katër të tillëve”, ka deklaruar Krasniqi për Express.

Ai ka treguar se do të shkojnë në Lojërat edhe Presidenti Hashim Thaçi, me një këshilltar, si dhe Veton Firzin, si zyrtar i Ministrisë së Sportit.

“Si përfaqësues i shtetit të Kosovës, pritet të vijë Presidenti me një anëtar apo këshilltar, dhe zyrtari i Ministrisë së Kulturës, Rinisë dhe Sportit, Veton Firzi”, shtoi Krasniqi, i cili tregoi se ftesë kishte edhe Kryeministri Ramush Haradinaj, porse ai nuk do të marrë pjesë.

Thaçi do të qëndrojë vetëm për ceremoninë hapëse të Lojërave Olimpike Dimërore.

Sipas Krasniqit, bazuar edhe në pjesëmarrjen e komiteteve të shteteve tjera që kanë nga një apo dy sportistë, “ne jemi Komiteti Olimpik me më së paku sportistë dhe zyrtarë që udhëtojnë në PyeongChang”.

Kosova do të debutojë në Lojërat Olimpike Dimërore “PyeongChang 2018”, të cilat do të mbahen prej 9 deri më 25 shkurt 2018 në Korenë e Jugut.

Ekipin olimpik të Kosovës do ta përfaqësojë skitari Albin Tahiri, i cili ka fituar normën olimpike në pesë disiplina të skijimit alpik: sllallom, sllallom i madh, super sllallom i madh, lëshim i shpejtë dhe kombinim alpik. /Gazeta Express/

AAK e Nisma i’a lënë Pacollit hapur derën e largimit nga koalicioni qeverisës

Ministri i jashtëm njëherësh presidenti i AKR-së, Behgjet Pacolli ditë më parë në një emision televiziv “kërcënoi” kryeministrin Ramush Haradinaj me dalje nga koalicioni qeveritar

Këto komente ai i kishte bërë derisa po fliste për mundësinë e zgjidhjes së demarkacionit dhe liberalizimin e vizave, që janë dy çështje që ndërlidhen mes vete. “Nëse nuk ratifikohet demarkacioni dëmet do të jenë të pariparueshme. Do t’i humb kuptimi kësaj qeverie”, kishte deklaruar Pacolli.

E kërcënimeve të partnerit qeverisës nuk po u frikësohen Aleanca për Ardhmërinë e Kosovës dhe Nisma Social Demokrate. Madje shefi i grupit parlamentar të Nismës, Bilall Sherifi ia ka lënë dyert e largimit hapur AKR-së.

Sherifi ka thënë për lajmi.net se secili partner “hynë kur donë, dhe del kur donë”. “Hyrja në koalicion ka qenë vullnetare, edhe dalja eventuale e cilit do partner qeverises duhet te jete vullnetare. Kjo është demokracia. Secili hyne kur donë dhe del kur donë”, ka thënë Sherifi.

Për paralajmërimet e Behgjet Pacollit ka komentuar edhe nënkryetari i AAK-së, që po ashtu mban pozitëm e ministrit të Infrastrukturës, Pal Lekaj. Ai ka thënë se në qeveri partnerët nuk janë për tu shtyrë me deklarata, por siç thotë ai, për t’i zgjidhur problemet e qytetarëve. “Pra jemi në qeveri jo për tu shtyrë me deklarata, por për të zgjidhur problemet me të cilat përballen qytetarët tanë”, ka thënë Lekaj për lajmi.net

Lekaj ka theksuar se qeveria është në “vlugun e punëve”, duke përmendur këtu edhe krijimin e Ushtrisë.
“Ne jemi në vlugun e punëve si Ministri e infrastrukturës dhe nuk jemi në kohën me të mirë ti komentojmë deklaratat politike të askujt në qeveri. Ajo çka mund të thuhet është se të tërë jemi në angazhime që të përmbushim synimet që ia kemi dhënë vetës, e që është, kompletimi i Kosovës në të gjitha segmentet që i posedon një shtet normal. Kosova do ta ketë ushtrinë, do të ndodhë liberalizimi, do të ndodhin investime, siç e kemi rastin më “Kosovën e Re” dhe kështu”, thotë Pal Lekaj.

Lajmi.net ka provuar të kontaktojë edhe me zyrtarët e lartë të PDK-së si Enver Hoxhajn apo Memli Krasniqin, por asnjëri nga ta nuk e kanë hapur telefonin. Ndryshe, partia e fundit që iu bashkua koalicionit PAN për ta formuar qeverinë ishte pikërisht AKR-ja e Behgjet Pacollit, e cila njëherësh zgjidhi krizën politike disa javore në vend.

Aleanca Kosova e Re ia “pa hairin” këtij koalicioni duke marrë katër ministri dhe pozitën e zëvendëskryeministrit. Ndërsa në Kuvend AKR-ja i ka vetëm dy deputetë. /lajmi.net

Ahmetit i vihen afate: Të përcaktohet se me cilin krah do të shkojë

Kryetari i Prishtinës Shpend Ahmeti, po vazhdon të mos tregojë guxim dhe të përcaktohet nëse do të qëndrojë në Vetëvendosje, apo do t’i bashkohet krahut që tashmë po bëhet gati të formojë gurp të ri parlamentar në Kuvendin e Kosovës, e më pas edhe një subjekt të ri politik

Prej se kanë filluar të dalin në publik përçarjet brenda Lëvizjes Vetëvendosje, Shpend Ahmeti në ato pak raste që është deklaruar për këtë çështje, edhe pse i rezervuar dhe i papërcaktuar qartë, ka lënë të nënkuptohet se më shumë ndihet i përfaqësuar me grupin që janë pozicionuar kundër liderit të kësaj partie Albin Kurti.

Tani kur krahu i përbërë prej më shumë se 10 deputetë dhe një kryetar komune ka vendosur që të braktisë përfundimisht Vetëvendosjen, dhe të organizohet ndaras politikisht, siç mëson Gazeta Metro, i ka vënë afate Shpend Ahmetit, që të përcaktohet sa më shpejt, nëse është i gatshëm të u bashkangjitet apo jo, ngase nuk do ta presin edhe gjatë.

Mos guximi i Ahmetit për t’u përcaktuar ka bërë që krahu i ish-kryetarit dhe ish-sekretarit të VV’së të vonohen në organizimin e tyre të ri politik, jashtë subjektit ku kanë vepruar prej vitesh.

Gazeta Metro mëson se Ahmetit i është thënë që nëse nuk vendos gjatë kësaj jave, apo më së largu në fillim të javës së ardhshme se kah do të shkojë, krahu i Ymerit, Molliqajt dhe të tjerëve, do të fillojnë organizimin e tyre të ri politik, dhe kryetarin e Prishtinës nëse më vonë do t’i mbushej mendja që t’i bashkohej këtij grupimi, nuk do të ishte e lehtë t’i gjendej pozicion në parti, sikurse po ta bënte këtë në fazën e tashme kur të gjithë do të pozicionoheshin si grup.

Ahmeti si kalkulues i madh në politik dhe si natyrë e paguximshme, edhe pse më shumë po ndihet i përfaqësuar me krahun politik që po e braktisin Vetëvendosjen, po i frikohet sulmeve dhe linçimeve që do të merrte pas daljes nga partia e Albin Kurtit.

Megjithatë, edhe pse Ahmeti si natyrë më shumë preferon të zgjedhë rehatinë se sa të ndërmarrë rreziqe në politikë, nuk po ndihet i përmbushur të qëndrojë as në Vetëvendosjen që do të ngelet pas ndarjes.

Ahmeti si profil politik liberal, i shkolluar në Harward dhe i futur në politikë nga shoqëria civile, nuk është se po ndihet i përmbushur që të veprojë politikisht në një subjekt i cili do të drejtohet nga figura politike si Ismail e Sami Kurteshi, Hydajet Hyseni, Xhelal Sveçla e Hysen Durmishi.

Në anën tjetër në grupin që po dalin nga Vetëvendose, tashmë janë të pozicionuar edhe bashkëpunëtorët e tij të ditëve të para të aktivizmit politik, si Dardan Sejdiu e Fisnik Ismaili.

Ahmeti deri tani ka provuar të paraqitet si një figurë e cila po punon për ta mbajtur të bashkuar Vetëvendosjen. Por, kur kjo më është bërë e qartë se nuk do të mund të ndodhë, atij po i kërkohet që ta lë këtë paraqitje, dhe të vendos sa më shpejt nëse do të i bashkohet krahut të Ymerit e Molliqajt apo jo.

Siç mëson Gazeta Metro, nëse Ahmeti i bashkohet këtij krahu, atëherë atij do t’i jepet një rol udhëheqës në këtë grupim politik, me shumë gjasë pozicioni i kandidimit për poste udhëheqëse ekzekutive, si ai i kryeministrit. /Gazetametro.net

Dëme të shumta në Viti, pas reshjeve të shiut

Komuna e Vitisë po përballet me pasojat e vërshimeve që erdhën pas reshjeve të shumta. Shiu i pandërprera që kanë rënë mbrëmë, ka sjellë për pasojë dëmtimin e shtratit të lumit ‘Morava’ i cili ka dëmtuar pothuajse tërësisht shëtitoren Viti – Kabash – Binçë

Jakup Haxhiu shef i kabinetit të kryetarit Sokol Haliti ka konfirmuar për rajonipress se tashmë nga shirat e mbrëmshme dhe nga dëmtimet e shtratit të lumit “Morava” është shkatërruar pothuajse tërësisht shëtitorja.

Ai ka thënë gjithashtu se dëme janë përcjellur edhe mbi varrezat ortodokse serbe dhe se komuna vazhdon verifikimin e dëmeve edhe në fshatra dhe në lagje e pjesë tjera të qytetit.

Haxhiu tha se komuna e Vitisë ka futur në veprim tërë mekanizmin e saj dhe ka angazhuar të gjitha ekipet emergjente ku deri vonë mbrëmë në shoqëri me ta ishte edhe vet kreu i komunës Sokol Haliti.

Pavarësisht kushteve të favorshme të tokës që ka komuna e Vitisë për kultivimin e kulturave të ndryshme bujqësore, ky territor vazhdimisht po dëmtohet nga reshjet, duke u përmbytur kështu fushat më pjellore të Budrikës, Remnikut, Skifterajt, Mogillës, Pozheranit dhe Kllokotit.

Raportohet se përmbytje ka pasur edhe në Istog, Malishevë, Deçan e Kaçanik.

Reagimet kundër Ligjit për shqipen, dëshmojnë ndarjet e thella etnike

Partitë politike në pushtet ende pa zgjidhje lidhur me 35 mijë amendamentet e VMRO-së opozitare kundër propozim – ligjit për përdorimin e gjuhëve të bashkësive etnike, me të cilin pritet avancimi i përdorimit zyrtar të gjuhës shqipe. Përgjigja e vetme që vjen nga institucioni ligjvënës është se shërbimet ende janë duke përkthyer amendamentet, që u parashtruan pas refuzimit të presidentit të shtetit, Gjorge Ivanov, për dekretimin e ligjit që ishte miratuar muajin e kaluar

Nga VMRO-ja kanë thënë se amendamentet e tyre bazohen në vërejtjet e presidentit, por në opinionin e gjerë veprimi i tillë i partisë opozitare, që drejtohet nga Hristijan Mickovski, interpretohet si vazhdimësi e politikës së ish -kreut të kësaj partie, Nikolla Gruevski.

Përveç nga partia opozitare, reagime kundër Ligjit për gjuhët ka pasur në vazhdimësi edhe nga qarqe të ndryshme, si intelektual maqedonas, shoqata joqeveritare, si dhe në rrjetet sociale nga qytetarë të shumtë.

Vllado Dimovski nga Qendra për Tolerancë Ndëretnike, thotë se propozimi nuk cenon Kushtetutën, siç pretendon opozita, ndërsa për gjendjen e krijuar fajëson edhe partitë në pushtet, që, sipas tij, nuk kanë bërë sa duhet për ta bindur opinionin se ligji nuk rrezikon bashkësitë e tjera etnike, para së gjithash maqedonasit.

“Propozim – ligjin për gjuhën po e interpretojnë secili në mënyrën e vet, pavarësisht se partnerët qeveritarë janë pajtuar për zgjidhjen që është në procedurë, por ata nuk po munden t’ia prezantojnë qytetarëve në atë mënyrë që edhe ata ta pranojnë. Unë thellë jam i bindur se ligji nuk prek Kushtetutën apo nuk është kundërkushtues, por këtë nuk po e kuptojnë të gjithë, andaj edhe kjo ka shkaktuar reagime të ndryshme”, thotë Dimovski.

Reagimet, shton ai, po dëshmojnë se shoqëria në vend ende është e ndarë në baza etnike. Mirëpo, siç thotë Dimovski, Maqedonia është shtet shumetnik dhe se këtë duhet ta kuptojnë të gjithë.

“Te ne ende nuk ka pjekuri te qytetarët, e para se gjithash nuk ka pjekuri te politikanët, të cilët ende nuk e kanë të qartë se ne jemi shtet shumetnik dhe vetëm si e tillë, mund të kemi prosperitet. Po ndihet një ndasi e madhe, duke filluar nga arsimi, kemi paralele të ndarë, fëmijë të ndarë në baza etnike, njohja e njëri-tjetrit apo mësimi i gjuhëve të njëri-tjetrit nuk është ende në nivelin e kënaqshëm. Duhet shumë punë për të bërë që të mos thellohen ndasitë. Mendoj se ka ardhur koha që të gjithë ne ta kemi të qartë se bashkësitë etnike në Maqedoni nuk duhet të jetojnë pranë njëri-tjetrit, por njëri me tjetrin”, thotë Dimovski.

Ndërkaq, Arsim Sinani, njohës i çështjeve politike dhe drejtues i Qendrës për Studime Ndërkombëtare dhe Hulumtime Ballkanike, thotë se kjo që po ndodh në Maqedoni lidhur me gjuhën shqipe, është e papranueshme dhe se LSDM-ja duhet të bëjë shumë më tepër për të dëshmuar se nuk është e koordinuar me VMRO-në. Në të kundërtën, sipas tij, do të jetë e pashmangshme kërkesa për një marrëveshje maqedonase-shqiptare për ta përcaktuar të ardhmen e vendit.

“Pala maqedonase dëshiron t’ua kufizojë shqiptarëve të drejtën natyrore të përdorimit të gjuhës shqipe. Mendoj se këtu ka një marrëveshje mes dy partive politike maqedonase, VMRO-së dhe LSDM-së, andaj edhe inkurajoj kryeministrin Zoran Zaev të vazhdojë me reformat, por jo me njerëz të inkriminuar”.

“Nëse ne dëshirojmë që Maqedonia t’i afrohet Bashkimit Evropian, NATO-s dhe të jetë një shoqëri pa probleme, do të duhet të ketë një marrëveshje mes maqedonasve dhe shqiptarëve që njëherë e përgjithmonë të zgjidhen problemet”, vlerëson Sinani.

Sipas tij, nga mbyllja e çështjes së përdorimit të gjuhës shqipe, maqedonasit nuk humbin asgjë, përkundrazi kjo do t’i forconte raportet ndërmjet dy komuniteteve.

“Gjuha shqipe e stabilizon Maqedoninë, gjuha shqipe i përmirëson marrëdhëniet mes shqiptarëve dhe maqedonasve. Nëse maqedonasit nuk dëshirojnë që gjuha shqipe të jetë zyrtare, atëherë le të shkojmë drejt federalizmit për shkak se ne nuk mund t’i presim ata që vazhdimisht të na i përcaktojnë të drejtat tona”, thekson Sinani.

Propozim – ligji për gjuhët e bashkësive etnike parasheh avancim të theksuar të përdorimit të gjuhës shqipe në të gjitha institucionet e nivelit lokal dhe shtetëror, si në Qeveri, Kuvend, gjyqësor dhe organe tjera.

SHBA i rikthehet programit të armëve bërthamore, alarmohen Kina dhe Rusia

Në emër të sigurisë amerikane dhe botërore administrata Trump rikthen përdorimin e armatimeve bërthamore

Politika e prezantuar nga Pentagoni parashikon futjen e bombave bërthamore me intensitet të ulët dhe riarmatimin e nëndetëseve me arsenal të raketave balistike bërthamore.

Kështu hidhet poshtë urdhri i ish-presidentit Bush, i cili i dha fund përdorimit të këtyre të fundit, por edhe plani i Barack Obama për çarmatimin e plotë bërthamor.

Ndërkohë që Sekretari i Mbrojtjes, Mattis ka theksuar se strategjia e re ushtarake është kundërpërgjigje ndaj natyrës, doktrinës, strategjisë dhe potencialit bërthamor të Rusisë.

I menjëhershëm ka qenë reagim i Moskës, e cila e dënoi një nismë të tillë, duke e akuzuar Amerikën për veprime luftënxitëse dhe paralajmëroi se do të merren masat e nevojshme në kuadër të sigurisë ruse.

Rusisë iu bashkua dhe Kina duke dënuar planet e porsa shpallura amerikane.

Pekini i kërkoi Uashingtonit që të heqë dorë nga mentaliteti i Luftës së Ftohtë.

“Vendi që zotëron arsenalin më të madh nuklear të botës duhet të ndërmarrë iniciativën e ndjekjes së trendit në fuqi e jo të shkojë kundër tij”, ishte deklarata e Ministrisë së Brendshme kineze.

Kina argumenton nga ana tjetër se politikat e veta janë defensive dhe se Uashingtoni e ka hiperbolizuar natyrën e kërcënimit të saj nuklear.

Ushtria amerikane beson se armët e saj atomike janë shumë të mëdha për t’u përdorur, ndaj kërkon që të zhvillojë bomba të një force shpërthyese më të vogël.

Amerikën e shqetëson fakti që arsenali i saj po vjetërohet, ndaj nuk do të jetë më frikësues kundrejt atyre që i konsideron kërcënime potenciale: Kinë, Rusi, Kore e Veriut dhe Iran.

Nga ana tjetër, dokumenti i Pentagonit argumentonte se armët e vogla me një forcë nën 20 kiloton janë më pak të fuqishme, por mbeten sërish shkatërruese.

Majko takime me shqiptarët e Detroit: Diaspora duhet të ketë përfaqësimin e vet politik

Në takimin e zhvilluar me përfaqësues të komunitetit shqiptar në ‘Troy Community Center’ në Detroit, Ministri i Shtetit për Diasporën z. Pandeli Majko foli për hapat e ndërmarrë deri më tani dhe gjithashtu për projektet që synojnë mbështetjen dhe krijimin e lehtësirave për shqiptarët e diasporës

Z.Majko informoi komunitetin shqiptar në Miçigan lidhur me Nënkomisionin për Diasporën dhe Migracionin, Komitetin Shtetëror për Diasporën i cili drejtohet nga Kryeministri, Agjencinë Kombtare te Diasporës dhe qëllimin e saj, e gjithashtu Projektligjin për Diasporën, që siç tha do të rregullojë shtyllat kryesore të organizimit të marrëdhënies së shtetit shqiptar me diasporën e tij.

Ndërsa përmendi përpjekjet për ti garantuar shqiptarëve jashtë vendit të drejtën e votës, Minstri theksoi se diaspora duhet të ketë edhe përfaqësimin e vet politik. Të pranishmit i drejtuan pyetje Ministrit lidhur me prioritetet afatshkurtra dhe afatgjata, mbi mënyrat e bashkëpunimit me diasporën , strategjinë dhe mundësinë e organizimit të ndonjë samiti të diasporës në të ardhmen e afërt.

Më pas, z. Majko u takua me studentë shqiptarë, me të cilët bisedoi lidhur me iniciativat që do të përfshijnë këtë pjesë të komunitetit. Ministri përmendi platformën online për diasporën ‘Germin’ dhe synimet për integrimin brenda saj të një platforme për studentët shqiptarë jashtë vendit.

U fol gjithashtu për iniciativat në fushën e investimeve, me z. Majko që përmendi synimet për krijimin e një dhome tregtie për diasporën e gjithashtu projekte të tjera që do shërbejnë si guidë për ata që duan të investojnë në Shqipëri. Nje çeshje për të cilën pati shumë interes, ishte e drejta e votës.

Ministri Majko informoi të rinjtë lidhur me draftin e paraqitur në komisionin e kuvendit, duke bërë me dije përmbajtjen e tij.

Në fund të takimeve, Ministri i Shtetit për Diasporën dha një intervistë për televizionin ‘Albanian Tv of America’ ku foli për çështjet e diskutuara me komunitetin shqiptar atje, për strategjine për diasporën dhe tema të tjera që prekin shtetasit tanë jashtë vendit./e.e

Rrezikohen 1 mijë pacientë në Gjakovë, nuk ka insulinë

Mijëra pacientë nga qyteti i Gjakovës që janë diagnostikuar me sëmundjen e diabetit dhe që janë të varur nga insulina, tash e disa muaj po ballafaqohen me mungesë të këtij medikamenti mjekësor. Ministria e Shëndetësisë nuk po e bënë furnizimin e rregullt me këtë ilaç për këtë komunë, ndonëse është e obliguar që të furnizojë institucionet me barna esenciale. E me dhjetëra pacientë për çdo ditë qëndrojnë para dyerve të QKMF’ve të komunës së Gjakovës duke e kërkuar këtë shiringë

Nga MSh zotohen se furnizimi me insulinë do të fillojë shumë shpejtë. Tenderi për furnizim është hapur të premten. Nga e hëna e deri në të enjten e kësaj jave që po e lemë pas, Feriz Ademi 70 vjeçar, nga Gjakova e ka vizituar Qendrën Kryesore të mjekësisë Familjare në këtë komunë. Ai vuan nga diabeti dhe tash e dhjetë vite e bartë këtë sëmundje në trupin e tij. Por, muajve të fundit ai nuk po furnizohet në mënyrë të rregullt me insulinë. Kjo ngase që nga muaji nëntor i vitit të kaluar në komunë e Gjakovës ka mungesë të insulinës në institucionet publike shëndetësore. Ndërkohë që në muajin shkurt në QKMF’në kryesore në Gjakovë, nuk është dërguar as edhe një shiringë me insulinë nga ana e Ministrisë së Shëndetësisë.

70 vjeçari thotë se muajin e kaluar e ka marrë vetëm një frakon (shirit me insulinë), ndërkohë që për të kaluar një muaj të plotë, atij i duhen pesë të tilla.

“Nuk e di pse është ndërprerë furnizimi. Unë e di që neve si pacientë po na shkakton shumë probleme shëndetësore. Që një javë rresht çdo ditë vij në Qendrën e Mjekësisë Familjare për ta marrë insulinën, e kërkoj atë, por nuk ka”, thotë ai.

Hall të njëjte si të 70 vjecarit ka edhe zonja S.Grezda nga kjo komunë. Ajo thotë se edhe në barnatoret private gjatë këtyre ditëve vështirë se po gjendet insulinë.
“Shumë keq, sepse ne na varet jeta nga insulina. E ilaçet që janë në listë esenciale nuk shiten në barnatore, do të thotë, ne as me e ble atë ilaç nuk kemi mundësi, sepse nuk gjendet”, thotë Grazda.

Fat të njëjte si të pacientëve Ademi dhe Grezda kanë dhe 1 mijë e 10 pacientë të tjerë të kësaj komune. Të gjithë këta, për muajin shkurt nuk e kanë marrë as edhe një faron me insulinë në këtë QKMF. Vetëm gjatë orëve të para të mesditës të së enjtes mbi 200 pacientë kishin vizituar këtë komunë duke kërkuar ilaç i cili gjendet në listën esenciale të barnave.

Zyrtarë të kësaj Qendre i kanë thënë të enjten Expressit se për muajin shkurt nuk janë furnizuar me Insulinë nga ane Ministrisë së Shëndetësisë. Teknikja e Farmacisë së QKMF’së, Diana Mullatahiri, tha se kërkesa për këtë medikament është jashtëzakonisht e madhe.

“Gjithë ditën pacientët po vijnë e po pyesin për insulinë. Ne po iu tregojmë që nuk ka. Nuk po varet nga ne furnizimi”, ka thënë ajo. Ajo tregon se lloji më i përdorur i Insulinës është ‘Novomix”. Thotë se shumica prej pacientëve e përdorin këtë ilaç.

Teknikja Mullatahiri, tregon se për muajin janar me këtë lloj të insulinës janë furnizuar vetëm me 900 frakone(shirita) insulinë, shifër kjo e cila rrjedhimisht nuk mjafton as për gjysmën e pacientëve, ngase një pacient me diabet i përdor zakonisht deri në 5 frakone të tilla në muaj.

“… për muajin janar i keni pas 900 frakona me insulinë ‘Novomix”, ndërkohë që për muajin nëntor jemi furnizuar me 2 mijë e 775 frakna me Insulinë për 1 mijë e 10 pacientë sa i kemi të regjistruar këtu në qendrën tonë”, tregon tutje zyrtarja e farmacisë në QKMF’në e Gjakovës.

Sipas saj, mosha mesatare e personave që përdorin Insulinë është 50 deri në 60 vjeç.

Ndërkohë që në listën e pritjes për insululina janë edhe 15 të mitur nga kjo komunë. Insulinë nuk po ka as në barnatoret private në këtë komunë. Lloji ‘Novomix’ vështirë se po gjendet, derisa insulina e tipit ‘Rapid’ në barnatoret private po kushton 14 euro, dhe këtë pacientët, shumica nga ta pensionist po detyrohen që ta blejnë vet.

Zyrtarë nga Ministria e Shëndetësisë deklarojnë për Express se furnizimi me insulinë do të fillojë shumë shpejtë. Për këtë punë MSh, me anë të procedurave të përshpejtuara ka hapur ofertat për furnizim tre mujor të institucioneve shëndetësore.

“Pasi ka konsultuar paraprakisht autoritetet e prokurimit publik dhe ka zhvilluar procedura të shpejtuara të Prokurimit, të premten, MSh ka bërë hapjen e ofertave për furnizim tre mujor të institucioneve shëndetësore me Insulinë”, thuhet në përgjigjen e Divizionit për komunikim me Publikun në MSH.

Sipas zyrtarëve të MSH’së procedurat e tenderit për furznizim me insulinë po kryhen në pajtueshmëri më Ligjin e Prokurimit Publik. “Në ndërkohë, do ta zhvillohen në pajtim me LPP procedura të reja për furnizim afatgjate”, thonë nga MSH. E derisa MSH ta bëjë furnizimin, kjo kategori e prekur me diabet e që janë të varur nga Insulina do të detyrohen që ta blejnë atë vet në barnatoret private./GazetaExpress/

VV nuk ndryshon qëndrim për demarkacionin: Nisni bisedimet me Malin e Zi, korrigjoni gabimin

Lëvizja Vetëvendosje ka bërë të ditur edhe njëherë qëndrimin e saj lidhur me demarkacionin me Malin e Zi. Ata shprehen se kjo marrëveshje nuk do të duhej të sillej në Kuvend, por raporti të dërgohet në prokurori

Në një konferencë për media, deputetja e këtij subjekti politik, Arbërie Nagavci tha se janë për të shënuar kufirin me Malin e Zi, por nuk janë për të cenuar as një centimetër të territorit të Kosovës.

“E përsërisim se jemi për shënjimin e vijës kufitare por nuk jemi për të cenuar asnjë centimetër të territorit tonë. Qeveria duhet të nisë bisedimet me Malin e Zi për të korrigjuar atë çfarë ka ndodhur”, është shprehur ajo.

“Komisioni i ri qeveritar ka dhënë material të mjaftueshëm për të vërtetuar shqetësimet e shumë qytetarëve dhe deputetëve. Nga gjetjet zyrtare, marrëveshja nuk do të duhej të vinte fare në Kuvend. Është e pakuptueshme se si një kryeministër e dërgon këtë marrëveshje në Kuvend në vend që ta dërgojë në Prokurori. I bëjmë thirrje Kryeprokurorit që të nis hetime lidhur me këtë rast”, ka thënë Nagavci.

Ndërsa deputeti tjetër i VV-së, Ali Lajçi, ka deklaruar se është dëshmuar që territorit i Kosovës është rrudhur. “Vetëvendosje e mban qëndrimin e saj, çdo tentim për ta ratifikuar këtë marrëveshje është i dështuar”, ka thënë ai.