Gjukanoviq: Kisha serbe në sherbim të imperializmit rus dhe nacionalizmin serbomadh

Presidenti i Malit të Zi Millo Gjukanoviq, ka deklaruar se Kishës serbe i pengojnë të gjithë ata që nuk kanë mendime të ngjajshme për imperializmin rus dhe nacionalizmin serbomadh

Kjo deklaratë e tij erdhi pasi kryepshkopi i kishës serbe në Mal të Zi, Amfillohije Radoviq, kishte thënë më herët se Gjukanoviq është vegël e imperializmit perendimor kundër Rusisë.

Sipas Gjukanoviq, deklarata të tilla janë marrëzira që kanë synim të pengojnë Malin e Zi në rrugën e emancipimit dhe inkuadrimin e standardeve që do ta bënin pjesë të shoqërive moderne.

Gjukanoviq tha po unë jam tradhëtar sepse nuk bashkëpunoj me Rusinë dhe Serbinë, sepse këto janë kundër shtetit të Malit të Zi.

Në Serbi kërkohet që Kosova të detyrohet: Ose negociatat, ose ushtrinë

Serbia duhet të kërkojë nga sponsorët perëndimorë të Kosovës që të mbrojturit e tyre t’i detyrojnë të shfuqizojnë vendimet me të cilat kanë nisur procesin e formimit të ushtrisë, e nëse nuk e bëjnë këtë gjë duhet të ndërpresim të gjitha negociatat e mëtejshme me separatistët kosovarë. Kështu deklaroi ministri pa portofol, i ngarkuar për invocione e zhvillim teknologjik, Nenad Popoviq, raportojnë mediat e Beogradit

Siç është shprehur ai, vendimi i Kuvendit të Kosovës është gozhda e fundit në sëndukun e marrëveshjeve të Brukselit, nën patronin e Bashkimit Europian.

Pas hapave të tillë të Prishtinës, Serbia duhet të rishqyrtojë zbatimin e mëtejshëm të marrëveshjeve të arritura në kuadër të dialogut të Brukselit, meqë tani është e qartë se ato janë të pavlera, ka thënë Popoviq.

Në këtë moment është e qartë se Serbia duhet të bashkëpunojë edhe më ngusht[ me aleatin tonë, Rusinë, në lidhje me Kosovën, në mënyrë që të pengojmë largimin e UNMIK-ut dhe formimin e Ushtrisë së Kosovës, të sigurojmë respektimin e Rezolutës 1244 dhe të mbrojmë serbët në “krahinën jugore serbe”, siç e ka quajtur ai Republikën e Kosovës.

Dalin emrat, kush janë mediat shqiptare që janë financuar nga shteti grek

Pas skandalit të publikuar ditën e djeshme që mjaft media në vendin tonë janë financuar nga Greqia, Fax News ka siguruar edhe emrat

Bëhet fjalë për portalet dhe institucionet: Albanian Free Press, Noa.al, Himara.Gr, Epirus (gazetë në veri të Greqisë), Instituti i Studimeve Mediatike.

Por kjo nuk është lista e plotë, dyshohet se ka edhe mjaft media të tjera që ende nuk janë bërë publike.

Dyshohet se mediat dhe gazetarët shqiptarë kanë përfituar ndër vite miliona euro nga shteti fqinj, por së fundmi vëmendja e shtetit fqinj ishte përqendruar tek marrëveshja per delimitimin detar mes 2 vendeve. Dyshohet se financimi është bërë për mos trajtimin apo lënie në heshtje të çeshtjes çame dhe ndarjes së kufijve ujorë.

Greqia ka nisur hetimet pas publikimit të skandalit se janë shpenzuar miliona euro nga ministria e Jashtme greke për të finacnuar me fonde sekrete portale, media dhe gazetarë në Shqipëri dhe vende të tjera të rajonit.

Janë qindra mijera euro që jepen në aktivitete në Shqipëri, ndërsa ajo çka thuhet jo zyrtarisht nëpër korridoret e ministrisë së Jashtme greke, është fakti që për të bërë marrëveshjen e detit mes dy vendeve, duhet të paguash mirë portalet shqiptare.

Prokuroria e Athinës ka ndërhyrë për të hetuar për fondet “sekrete” të Ministrisë së Jashtme dhënë mediave shqiptare

Ish-ministri i Jashtëm grek, Nikos Kotzias në ceremoninë e sotme të dorëzimit të detyrës i pyetur në lidhje me këtë çështje i acaruar përdori fjalët ‘idiotësi’ dhe ‘mungesë serioziteti’.

‘Nëse është e vërtetë, gjithçka që thuhet është sikur t’u tregojmë të huajve, se nuk jemi seriozë. Ne bëmë një ligj të posaçëm për fondet sekrete të cilat kontrollohen dhe miratohen nga një këshill dhe shkojnë drejtpërdrejt në parlament’, tha ai.

Policia demanton prokurorinë: Djalit të Shpend Maxhunit nuk i janë gjetur drogë dhe armë

Policia e Kosovës ka dalë me një komunikatë, pas raportimit në media, duke iu referuar prokurorisë, se ndaj djalit të Shpend Maxhunit, ish-drejtorit të Përgjithshëm të Policisë dhe shefit aktual të Agjencisë Kosovare të Inteligjencës, është ngritur kallëzim penal për shkak të posedimit të lëndëve narkotike dhe armës

Në sqarimin e Policisë së Kosovës (PK), thuhet se Policia është institucion i zbatimit të ligjit dhe në të gjitha rastet vepron konform autorizimeve ligjore që ka, duke përfshirë konsultimin dhe koordinimin me organet e drejtësisë, njësoj siç ka vepruar edhe në rastin konkret të datës 12.10.2018 të cilësuar “Mbajtje në pronësi, kontroll, posedim i paautorizuar i armës (municionit)”.

“Siç u potencua me datë 12.10.2018, njësia policore gjatë patrullimit rutinor në fshatin Zllatar, kishte ndaluar veturën Golf IV me targa vendore, ku gjatë kontrollimit të tre personave që gjendeshin në veturë, duke përfshirë të apostrofuarin në media (Sh. M), ishte gjetur një revole e llojit “Zastava”, me një karikator dhe katër fishek të kalibrit 6. 35 mm”, thuhet në sqarimin e Policisë, njofton Telegrafi.

“Gjatë vazhdimit të kontrollit të automjetit, në një pjesë të veturës është gjetur një thikë, si dhe një cigare e mbështjellë e cila dyshohej të jetë substancë narkotike, një mulli i bluarjes grinder ndaj të cilave janë duke u kryer hetime”.

Më tej Policia thotë se “personi i dyshuar ( A. K. ), i cili ka qenë në veturë ka deklaruar se cigarja e mbështjellë e gjetur brenda në veturë, si dhe mulliri i bluarjes grinder i përkasin atij”.

“Si rezultat i vazhdimit të hetimeve, nga njësitet policore është intervistuar edhe personi i katërt i dyshuari ( R. M ), i cili ka deklaruar se arma është e tij dhe se i njëjti e ka harruar në veturën e apostrofuar dhe se nuk i përket të dyshuarit (Sh. M)”.

“Lidhur me të gjitha veprimet policore është njoftuar prokurori kompetent, me rekomandim të të cilit rasti është proceduar në procedurë të rregullt”.

“Andaj ritheksojmë se PK-ja është institucion i zbatimit të ligjit dhe mbetet e përkushtuar në realizimin e detyrave dhe përgjegjësive të saja ligjore, duke përfshirë angazhimet e saja profesionale edhe në rastin konkret, për të cilin ka ngrit kallëzim penal”, thuhet në sqarim.

Ballkani, vija e re e frontit ndërmjet SHBA-ve dhe Rusisë

Lamtumirë Dayton. 23 vjet pas marrëveshjeve që iu dhanë fund masakrave në Bosnjë, fantazmat e konflikteve etnike e fetare dhe frika e një lufte të re të tmerrshme kthehet të trazojë Ballkanin

Nga Gian Micalessin

Nga Bosnja në Kosovë e deri në Maqedoni, tre ish-republika jugosllave teatër i luftërave civile dhe ndërhyrjeve të huaja midis 1992 e 2002, ndonëse në shkallë të ndryshme, urrejtjet dhe rivaliteti po kthehen në pikën e vlimit. Por me një diferencë thelbësore.

Në qershor 1991, Sekretarit i Shtetit i SHBA, James Baker, përsëriste “nuk kemi një qen në atë luftë”, duke lënë të kuptohej indiferencën thelbësore të Shteteve të Bashkuara përballë përplasjes midis serbëve, kroatëve e myslimanëve.

27 vjet më pas, Washingtoni ka pozicione shumë më të qarta. Armiqtë që duhen bllokuar nga strategjitë e Departamentit të Shtetit e të Pentagonit janë Rusia e Vladimir Putinit dhe miqtë e saj të supozuar serbë, ndërsa aleatët për t’u mbrojtur janë myslimanët e Bosnjës, pakicat shqiptare në Maqedoni dhe qeveria e Kosovës.

Gjithçka me mbështetjen jokritike të euroburokratëve të Brukselit, të paaftë për të pasur një vizion autonom e të pavarur edhe për çështje që kanë të bëjnë me kontinentin e vjetër. Por problemi i vërtetë, siç u pranua më 2015 nga John Kerry, Sekretari i Shtetit në administratën Obama, është që Ballkani sot është “vija e kuqe” në përballjen midis NATO-s e Rusisë.

Kjo është më tepër se kurrë e dukshme në Maqedoni. Në këtë republikë të vogël, Aleanca Atlantike dhe Bashkimi Evropian, të përkrahura nga Shtetet e Bashkuara, kanë bërë gjithçka për të bindur zgjedhësit të votonin “PO” në referendumin e 30 shtatorit për ndryshimin e emrit në Maqedonia e Veriut, sipas programit të kryeministrit Zoran Zaev, aleat besnik i Brukselit e Washingtonit.

Referendumi do t’i jepte fund edhe mosmarrëveshjes me Athinën, kundërshtare që më 1991 e hyrjes së Shkupit në BE dhe në NATO, me frikën se emri Maqedoni do të justifikonte në të ardhmen pretendime mbi rajonin grek me të njëjtin emër. Por referendumi, vendimtar për ta hequr Maqedoninë nga zona e influencës ruse që përkrah opozitën nacionaliste, rezultoi një vrimë në ujë.

Megjithatë ftesat dhe presionet për “PO”, shoqëruar nga vizitat në Shkup të kancelares gjermane Angela Merkel, të Sekretarit të Përgjithshëm të NATO-s Jens Stoltenberg dhe, “e ëmbla në fund” të Sekretarit të Mbrojtjes të SHBA, Jim Mattis, i cili shkoi në kryeqytetin maqedonas në vigjilje të votimit, vetëm 37% e zgjedhësve shkuan drejt qendrave të votimit.

Kështu, pavarësisht votimit 91% për PO, referendumi është i pavlefshëm për mosarritjen e shifrës 50% në pjesëmarrje. Megjithë suksesin e dukshëm të opozitës nacionaliste, që favorizoi bojkotin, BE, NATO e SHBA i kanë kërkuar kryeministrit Zaev të mos dorëzohet, duke mbështetur vendimin për ta kaluar adoptimin e emrit të ri përmes votimit në parlament me shumicë absolute.

Një vendim i dyshimtë konstitucionalisht që megjithatë përgjegjësja për politikën e jashmte në BE, Federica Mogherini, e ka përcaktuar si “një mundësi unike për pajtimin në Ballkan”. Por edhe këtu fitorja është gjithçka përveçse e sigurt. Pas debatit të nisur të hënën e shkuar, qeveria e drejtuar nga socialdemokrati Zaev dhe e mbështetur nga pakica myslimane, ka dhjetë ditë kohë për të siguruar 80 vota nga 120 gjithsej që i japin dy të tretat e nevojshme.

Një objektiv në dukje i pamundur, pasi nacionalistët kanë të paktën 49 vende. Por për të bërë ndryshimin mund të mendojë magjistratura. Pikërisht më 16 tetor nisi edhe procedimi për heqjen e imunitetit dhe garantuar arrestimin e një duzine parlamentarësh nacionalistë të akuzuar për përgjim të kundërshtarëve politikë. Kjo lojë do t’i garantonte kuorumin Zaevit, ndërsa NATO, BE dhe SHBA do të fitonin një copëz të re rebusit kompleks ballkanik. Por do të ishte një copëz eksplozive që mund të thyhet nën presionin e brendshëm dhe të shkaktojë konfrontime të ngjashme në rajonet fqinjë.

Në Kosovë, për rikthmin e frikës dhe mosbesimit kontribuojnë deklaratat jo shumë të kujdesshme të John Bolton, këshilltar i sigurisë kombëtare në Shtëpinë e Bardhë, të shprehura në fund të gushtit për shkëmbimin e territoreve mbi bazat etnike. Projekti i Boltonit do të garantonte rikthimin e zonave veriore me shumicë serbe nën kontrollin e Beogradit, ndërsa Lugina e Preshevës, banuar nga shumicë shqiptare, por zyrtarisht serbe, do t’i kalonte Prishtinës.

Kthimi i konceptit të ndarjes etnike, pavarësisht zemërimit anti-rus që karakterizon Boltonin, premton të çojë ujë në mullirin e serbëve të Bosnjës, ose te miqtë më të mirë të Moskës që favorizojnë idenë e shkëputjes nga ajo lloj minifederate e tipit jugosllav vendosur në kohët e Daytonit.

Gjatë atyre bisedimeve, pikërisht vullneti për të kthyer në bashkëjetesë komunitetet e ndara nga lufta çoi në vendimin për t’i dhënë jetë një Bosnje të ndarë midis kroatëve, boshnjakëve dhe muslimanëve, por të qeverisur nga një presidencë me rotacion, njësoj si ajo e shpikur për Jugosllavinë e Mareshalit Tito.

Suksesi në votimet e 8 tetorit i Milorad Dodik, lideri nacionalist i serbëve të Bosnjës, kërcënon shkatërrimin e mekanizmit të vënë në punë në Dayton 23 vjet më parë. I përkrahur nga rusët, të rikthyer me Putin si mbrojtës të mëdhenj të kombit serb, Dodik kërcënon të prishet me presidencën me rotacion e të shtyjë serbët e Bosnjës drejt vetëvendosjes dhe pavarësisë.

Një hap që kërcënon të prishë të gjithë mekanizmat e paqtimit dhe që do të garantonte, pikërisht falë pozicionit të këshilltarit të Sigurisë Kombëtare në Shtëpinë e Bardhë, një sukses të ri të Moskës në zemër të atij Ballkani të transformuar në një tjetër “vijë fronti” në konfrontimin midis SHBA e Rusisë.

Marrë nga ilGiornale-Përgatiti: SYRI.net

Financimet sekrete greke, 1 milion euro portaleve shqiptare

Sherri mes ministrave grekë ka nxjerrë në skenë se qeveria greke ka financuar, në mënyrë sekrete, disa media dhe portale shqiptare, sikurse edhe politikanë që merren me Marrëveshjen e Detit, me mbi 1 milionë euro vetëm për muajin tetor të këtij viti. Synimi grek: Të propogandonin Marrëveshjen si të favorshme për shqiptarët dhe të sulmonin kush ishte kundër kësaj Marrëveshje diskriminuese për Shqipërinë

Sherri drastik mes ministrave në qeverinë greke, ku çoi në dorëheqjen e ministrit të jashtëm Kotzias, ka nxjerrë në dritë fakte skandaloze për cenimin e interesave kombëtare të Shqipërisë.

Mediat greke kanë raportuar dje se Ministria e Jashtme Greke ka financuar media, portale dhe gazetarë në Shqipëri, në mënyrë sekrete. Edhe negociatorë në Marrëveshjen për Detin kanë kode sekrete financimi.

Bile media greke ka botuar një listë me kode dhe shifra, të cilat duhet të zbardhen nga prokuroria shqiptare se cilat portale dhe emra nga Shqipëria kanë përfituar këtë shumë prej 1 milion euro. Sipas të dhënave të publikuara në vendin fqinj, flitet për 1 milionë euro që janë dhënë për mediat në Shqipëri vetëm gjatë muajit tetor të këtij viti.

E gjithë kjo shumë duket se është dhënë në kulmin e diskutimit mes Greqisë dhe Shqipërisë për Marrëveshjen e Detit, ku siç dyshohet se qeveria shqiptare ka rënë dakort me variantin grek, por është kundër Presidenti Ilir Meta. Kreu i shtetit shqiptar ka thënë se pa një gjykatë kushtetuese funksionale nuk mund të miratohet kjo marrëveshje mes dy qeverive.

Dhe për këtë qëndrim kushtetues e kombëtar disa media dhe portale filluan dhe vazhdojnë një fushatë denigruese ndaj Presidentit të Shqipërisë, e ku po del publikisht, se janë media të financuara nga Athina me fondin prej 1 milionë euro në mënyrë sekrete. Ky është një skandal kombëtar e ku prokuroria duhet të fillojë hetimet urgjente për shitje të interesave kombëtare.

Edhe media bën tradhti e jo vetëm qeveritarët apo politika!

Ndërkohë paratë që janë hedhur në vitet e fundit në Shqipëri mendohet se janë disa herë më shumë. Këto para kanë kaluar me anë të një fondi sekret nga Ministria e Jashtme e Greqisë, gjë që do të thotë se që në nisje përdorimi i këtyre parave ka patur karakter të veçantë politik, në mbrojtje të interesave greke në Shqipëri.

Qëllimi i këtyre parave është blerja e mediave dhe gazetarëve për të ndikuar në favor të interesave të Greqisë. Me anë të parave të dhëna në mënyrë jo zyrtare, Ministria e Jashtme greke ka kërkuar të ndikojnë në opinionin shqiptar, duke i paraqitur tezat e saj në mënyrë gati të ‘paanshme’, por që ti bëhej lavazh trurit shqiptar sikur marrëveshja e Detit favorizon Shqipërinë, duke hequr Ligjin e Luftës.

Televizioni ‘Top Channel’, që hapi i pari skandalin, citonte dje burime që deklarojnë se ‘45 milionë euro është shuma të cilën ministri grek i Mbrojtjes, Kamenos, ia faturon Kotziasit si shumë e shpenzuar në mënyrë abuzive nga fondi që konsiderohet buxhet sekret i ministrisë së Jashtme greke.

Burime pranë ministrisë së Jashtme në Athinë bëjnë me dije se një pjesë e madhe e buxhetit sekret të kësaj ministrie jepet në formë grantesh e ndihmash në media dhe organizata të ndryshme në rajon për të paguar gazetarë, portale, por edhe media e politikanë në Shqipëri dhe Maqedoni.

Gjithashtu mësohet se miliona euro janë dhënë për biznese në Shqipëri, kryesisht në ndërtimin e hoteleve në jug të vendit, apo për financimin e ndërmarrjeve, pronë e të afërmve të politikanëve të ndryshëm të minoritetit grek që jeton në Shqipëri. Veç medias, pjesë e financimit është dhënë edhe për zyrtarë të ndryshëm të minoritetit, por burimet tregojnë se dyshohet se fonde kanë marrë politikanë shqiptarë apo edhe negociatorë të Marrëveshjes së Detit me Greqinë.

Gjithashtu, janë financuar edhe programe të ndryshme për studime Master të zyrtarëve shqiptarë në Greqi, por edhe për pritje, përcjellje dhe udhëtime turistike të disa prej gazetarëve shqiptarë. Sipas Top Channel ekziston dhe një listë e detajuar me emra dhe kodet e personave që kanë përfituar, kode të cilat kanë emra mediash, gazetarësh, analistësh dhe politikanë e zyrtarë shqiptarë, kryesisht të angazhuar në krijimin e një klime pozitive për Marrëveshjen e Detit.

Ndërsa lista e atyre që kanë sulmuar Presidentin e Shqipërisë se ‘pse vonon firmosjen e Komisionit Negociator’ apo kur Ilir Meta deklaroi se pa gjykatë kushtetuese nuk mund ta firmos Marrëveshjen, pra kjo kategori mediash rezulton se kanë marrë shuma të mëdha në euro nga ministria e jashtme greke. Prokuroria e Athinës po heton se nga doli sekreti shtetëror, por edhe si janë dhënë këto 1 milionë euro për mediat dhe portalet shqiptare; pra me bankë apo cash.

Po hetohet edhe një agjenci reklamash në Tiranë e cila ndan fondet për disa portale apo media, sipas interesit grek, pra kush mbështet Marrëveshjen e Detit merr me shumë fonde reklamash. Edhe këtu prokuroria shqiptare duhet të hetojë, se dyshohet se ka një kanal grek financimi të portalëve me fondet greke, të fshehta.

Greqia është një vend fqinj që ka ndihmuar në jo pak raste Shqipërinë. Qeveria greke ka dhënë miliona euro ndihma në sektorë të ndryshëm të ekonomisë. Por skandali për të cilin po flasim nuk ka të bëjë me ndihmë, por me synime të tjera. Po flasim për fonde sekrete të Ministrisë së Jashtme.

Objekti i këtyre fondeve është të ndihmojë politikën e jashtme greke të arrijë qëllimet e saj duke blerë faktorë mediatik apo edhe politikanë shqiptarë. Praktikisht diplomacia greke ka arritur të gjejë në Tiranë njerëzit që duke i paguar do të bënin punën e tyre. Është një proces që këto ditë do të dëgjojmë të quhet në shumë mënyra, por në shqip ka vetëm një fjalë:

Tradhëti kombëtare. Ndaj prokuroria duhet urgjent të fillojë hetimet për këto financime të paligjshme dhe të fshehta. Nëse janë dhënë në forma bankare si projekte apo gjithfarë sajesash, prokuroria shqiptare heton llogarinë e çdo media apo portali, sepse ia lejon ligji. Nëse janë dhënë cash nga burimet sekrete greke, do jetë pak i vështirë hetimi, por përsëri kontrolli do gjejë se si mbahen këto portale apo media.

Detajet e këtij skandali për përdorimin e fondit sekret të ministrisë u publikuan nga kundërshtarët e ministrit Kotsias në qeverinë greke. Por indirekt sherri në Athinë duhet të shërbejë për të ‘hapur sytë’ në Tiranë. Këto vite mes dy vendeve po negociohen çështjet më të rëndësishme, si ajo e Paktit Detar.

Nëse flasim për interesa të diplomacisë greke këto kohë në Shqipëri është pikërisht arritja e këtij pakti në favor të tyre. Sot jemi para faktit se një pjesë e parave mund të jenë hedhur për të shpërqendruar opinionin dhe për të goditur figura që realisht janë në mbrojtje të interesave kombëtare. Është skemë jo vetëm e pistë, por edhe anti-kombëtare, përderisa nga media në Tiranë praktikisht punohet për interesa të diplomacisë greke.

Skandali për milionat e fondit sekret në Athinë është një nga arsyet që sollën largimin e ministrit të Jashtëm të Greqisë, Niko Kotias. Në Greqi politikanët e opozitës janë të shqetësuar për abuzimet që mund të kenë ndodhur me këto para, pra, nëse janë përdorur siç duhet për interesat e Greqisë. Deputetë të mazhorancës qeverisëse greke thonë se me publikimin e listës opozita greke po dëmton interesat kombëtare të Greqisë.

Prokuroria e Athinës ka nisur dje hetimet mbi bazën e shkrimeve që janë botuar në mediat greke. Ndërkohë dje në Tiranë, përveç shkrimeve në media nuk pati asnjë reagim zyrtar nga institucionet tona. Po flitet për një nga skandalet më të mëdha në kurriz të interesave kombëtare dhe nga Prokuroria nuk ka asnjë hetim.

Këtu nuk po flitet për fonde që janë marrë nga marrëveshje zyrtare, por për pagesa sekrete për interesa të diplomacisë së fshehtë greke. Shqiptarët duhet të dijnë se kush janë mediat, gazetarët apo bizneset që kanë përfituar para për shërbime që i interesojnë Greqisë.

Natyrisht Greqia është në të drejtën e saj të bëjë politikë për interesat e saj, por Shqipëria dhe mediat shqiptare nuk duhet kurrsesi të shesin interesat kombëtare për eurot e derdhura nga kanalet e ministrisë së jashtme greke.

Në fund të fundit prokuroria shqiptare duhet të hetojë për t’i thënë, por edhe për t’i dhënë, publikut shqiptar se kush janë mediat dhe portalet e blera nga fondi sekret grek.

Botuar në Koha Jonë

Urime! Reagimet pas votës pro të parlamentit të Maqedonisë

Me entuziazëm reagojnë Bashkimi Europian dhe Greqia pasi Parlamenti i Maqedonisë hapi rrugën për ndryshimin e emrit të vendit. Me një shumicë të ngushtë prej dy të tretash u vendos në Shkup për ndryshimet kushtetuese

Athina e përdori për gati tre dekada me radhë si mjet presioni çështjen e emrit duke bllokuar integrimin e Maqedonisë në BE dhe anëtarësimin e saj në NATO. Ujdia e arritur për ndryshimin e emrit, e njohur si Marrëveshja e Prespës, kishte rëndësi të veçantë për Maqedoninë për të parë drejt së ardhmes, por edhe për Greqinë që has po ashtu me rezistencë në vend. Tani me votën e parlamentit maqedonas për ndryshimin e kushtetutës, vendi fqinj reagon duke e përshëndetur atë. “Hapi i parë i madh për hyrjen në fuqi të marrëveshjes është bërë”, shkroi në twitter zëdhënësi i qeverisë greke, Dimitris Tzanakopoulos.

Aleksis Tsipras, kryeministri grek u tregua entuziast pas votës pro në Shkup. “Urime miku im Zaev!” shkroi në twitter Aleksis Tsipras. “Ky është një hap i rëndësishëm për të ardhmen në paqe dhe prosperitet të vendeve tona”.

Reagime pozitive nga BE

Edhe nga BE vijnë përgëzime për hapin e rëndësishëm të parlamentit të Maqedonisë. Kreu i Këshillit të BE, Donald Tusk e uroi Shkupin për këtë vendim. “Një zë, një hap i rëndësishëm në drejtim të vendit që ju takon në bashkësinë tonë transatlantike”, shkroi Tusk në gjuhën maqedonase në twitter.

Edhe e ngarkuara e BE-së për Politikën e Jashtme, Federica Mogherini e cilësoi votën e parlamentit si “hap shumë të rëndësishëm” për zbatimin e marrëveshjes mes Greqisë dhe Maqedonisë- Në një deklaratë të publikuar në Bruksel, thuhet, se tani pritet të punohet shpejt, që të bëhen ndryshimet kushtetuese. “Ky është vërtet një rast unik,për ta çuar përpara vendin në rrugën europiane si edhe për pajtimin rajonal.”

Zgjidhja e një konflikti të vjetër ka kërkuar “guxim politik” thuhet nga Brukseli. Ndërsa eurokomisioneri i BE për Zgjerimin dhe Fqinjësinë, Johannes Hahn e cilësoi hapin e marrë nga parlamenti maqedonas si “një ditë të jashtëzakonshme për demokracinë”.

Vazhdon mungesa e barnave, synohet krijimi i një liste të re esenciale

Që nga viti 2012, në Kosovë nuk është bërë revidimi i listës esenciale të barnave. Ndonëse në treg kanë ndryshuar llojet e ilaçeve për trajtimin e sëmundjeve, në institucionet publike shëndetësore furnizimi me barna ndër vite ka mbetur pothuajse i njëjtë

Për këtë listë tashmë është formuar një komision i përbërë prej 43 anëtarësh, si dhe me ndihmën e Organizatës Botërore të Shëndetësisë, po synohet që lista e re që formohet t’i ketë si prioritet ato barna që i përmbushin nevojat parësore të kujdesit shëndetësor të popullatës.

Ato janë përzgjedhur sipas prevalencës së sëmundjes dhe rëndësisë së shëndetit publik, e që kanë evidencë për sigurinë dhe efikasitetin klinik. Sipas të dhënave aktuale, institucionet publike shëndetësore, furnizimin me barna esenciale aktualisht e kanë rreth 70 për qind.

Materiali shpenzues arrin deri në 50 për qind në të gjitha institucionet publike të kujdesit dytësor dhe tretësor. Kjo listë variron me furnizim, por që asnjëherë nuk është arritur të përmbushet në tërësi ndonëse është listë esenciale.

Edhe përkundër asaj se këtë vit është rritur buxheti dhe tani totali për një vit llogaritet të jetë një buxhet prej 30 milionë euro, institucionet publike shëndetësore vazhdojnë të vuajnë në mungesë të barnave.

Si rrjedhojë, pacientët të gjitha barnat që mungojnë i blejnë vetë. Labinot Demi vuan nga skleroza multiple. Ai thotë se janë katër lloje të sklerozës multiple, dhe barnat që i siguron Ministria e Shëndetësisë është vetëm një lloj ilaçi, derisa ekzistojnë 14 lloje të terapive që përdoren në vendet e zhvilluara.

Në Kosovë janë mbi 1500 pacientë me sklerozë multiple, derisa vetëm 100 prej tyre trajtohen prej Ministrisë së Shëndetësisë, kurse 1400 të tjerë detyrohen ta blejnë terapinë vetë. Kjo terapi, sipas pacientëve është shumë e shtrenjtë dhe pothuajse e papërballueshme.

“Terapia mujore për një person kushton prej 600 deri në 2.000 euro varësisht nga ilaçi që përdor, pasi çdo herë dalin prodhime të reja. Nëse nuk merret terapia me rregull për personat me sklerozë multiple, at mund të përfundojnë në karrocë, pra mbesin të palëvizshëm”, thotë Labinit Demi.

Skleroza multiple është sëmundje e sistemit nervor qendror, e cila shkakton problem të madh në organizëm, si probleme me shikimin, dobësimin muskulor.

Faik Hoti, drejtor i departamentit për informim në Ministrinë e Shëndetësisë. i tha Radios Evropa e Lirë se janë duke e bërë revidimin e listës esenciale, e që në këtë proces janë duke iu ndihmuar edhe zyra e Organizatës Botërore të Shëndetësisë në Kosovë.

“Në gusht të këtij viti është themeluar komiteti teknik për revidimin e listës së barnave esenciale i cili ka për qëllim që pacientët të trajtohen me barna të reja, me terapi cilësore dhe të sigurta. Në Kosovë nuk ka pasur revidim të listës esenciale me barna që nga viti 2012”.

“Ajo listë esenciale që do të përcaktohet nga komiteti i ekspertëve, e që janë mbi 43 anëtarë, duhet të reflektojë nevojat reale varësisht me buxhetin që ka Ministria e Shëndetësisë që pacientët ti mbulojë me terapi adekuate”, tha Hoti.

Sektori i shëndetësisë, duke veçuar sidomos atë të barnave, ka rezultuar të jetë ndër më të korruptuarit, është thënë disa herë në debate publike. Edhe në javën kundër korrupsionit, e cila është mbështetur nga ambasada amerikane në Prishtinë dhe ambasadat e vendeve të Quint-it, ishte potencuar kritika e njëjtë.

Aty thuhej se barnat esenciale të blera nga Ministria e Shëndetësisë, për shkak të urdhëresave administrative dhe ligjeve në fuqi, kanë ndikuar që buxheti i Kosovës të shpenzojnë nga 10 deri në 2000 për qind më shumë mjete për një ilaç, i cili në treg është dukshëm më i lirë.

Në Ministrinë e Shëndetësisë së fundmi kanë ndërprerë disa kontrata që shquhen si abuzive, për shkak se janë blerë më çmime shumë të larta.

Problemin me furnizim e pranojnë edhe vetë udhëheqës shëndetësorë, sipas të cilëve, ky problem është kronik, pasi që shumë vjet përpos buxhetit të ulët për barna ato edhe janë blerë më shtrenjtë se çmimi real i tyre.

Albatrit Matoshi, këshilltar për media i ministrit të Shëndetësisë, ka thënë se duke parë parregullsitë që kanë ndodhur me blerjen e barnave , Ministria e Shëndetësisë ka ndërmarrë veprime konkrete duke krijuar edhe një udhëzim administrativ, i cili rregullon çmimin e barnave në vend. Ky udhëzim është në përfundim e sipër dhe së shpejti do të funksionalizohet.

“Ministria e Shëndetësisë shumë shpejtë do ta ketë një udhëzim që rregullon në mënyrë ligjore blerjen e barnave në vendin tonë. Të gjitha kontratat që janë ndërruar, janë nënshkruar me çmime më të ulëta dhe kursimi i parave është diku rreth 6 milionë euro, ndonëse ende nuk është bërë raporti i plotë i detajuar”, bëri të ditur Matoshi.

Ndonëse gjatë këtij viti janë bërë disa lëvizje pozitive në përmirësimin e kushteve brenda institucioneve publike shëndetësore, përfshirë edhe rritjen e buxhetit për barna, besimi në këto institucione në Kosovë mbetet jashtëzakonisht i vogël.

Jo vetëm qytetarët, por edhe vetë përfaqësuesit politikë, përfshi edhe ata që kanë mbajtur postet më të larta qeveritare, nuk preferojnë që të kërkojnë trajtim mjekësor në këto institucione, për shkak të shërbimeve jocilësore, që besohet se janë pasojë e mungesës së investimeve nga ana e institucioneve qeverisëse.

Rifat Bajrami, kirurg, tha për Radion Evropa e Lirë në janar të këtij viti brenda Qendrës Klinike Universitare të Kosovës nuk operojnë pothuajse asnjëherë deputetë e funksionarë aktual. Ai thotë se ata këto shërbime i marrin në klinika private ose jashtë vendit.

Ndryshe, institucionet publike shëndetësore janë mjaft të frekuentuara nga qytetarët. Por, sipas mjekëve, ky frekuentim vjen si rrjedhojë e gjendjes së rëndë sociale në vend, dhe njerëzit detyrohen të kërkojnë mjekim më të lirë, krahasuar me institucionet private shëndetësore.

Java e ardhshme vendimtare për rrëzimin e qeverisë Haradinaj?

“Mendoj se që edhe vet kryeministri Ramush Haradinaj duhet me u bind që nuk e ka legjitimitetin dhe nuk ka kurrfarë mundësie me stabilizu Kuvendin e Kosovës, kur dihet se shumica shqiptare është në opozitë. Ne si Lidhje Demokratike e Kosovës sa më shpejtë që mundemi me i siguru votat për mocion do ta procedojmë. Zgjidhja më e mirë për qytetarët janë zgjedhjet e reja”, është shprehur deputetja e LDK-së, Valenditna Bunjaku-Rexhepi

Zyrtarë të AAK-së, por edhe vet kryeministri Ramush Haradinaj në vazhdimësi shprehet se Qeveria e Kosovës në krye me të, do të jetë Qeveria e parë e cila do t’i shkojë deri në fund të mandatit.

Kryeministri i Kosovës, Ramush Haradinaj, ditë më parë për në një konferencë për media kishte deklaruar se është duke punuar dhe se do ta çojë mandatin e tij deri në fund. Kjo deklaratë e shefit të ekzekutivit vjen pas debateve të fundit më një pjesë të pozitës, ku këta të fundit i ishin drejtuar Haradinajt që nëse dëshirojnë edhe mund t’i bëjnë numrat për rrëzimin e Qeverisë.

Se fundi i qeverisë është afër, ketë mendim e ka opozita. Subjekti më i madh opozitar, Lidhja Demokratike e Kosovës konsideron se kryeministri Ramush Haradinaj, duhet të bindet se nuk e ka legjitimitetin, dhe se nuk ka kurrfarë mundësie që ta stabilizojë Kuvendin. Në një linjë me opozitën qëndron edhe shoqëria civile. Sipas njohësve të zhvillimeve aktuale e politike në vend, shanset janë minimale që Qeveria Hartadinaj ta dërgoj deri në fund mandatin e saj.

Deputetja e LDK-së: Zgjidhje janë vetëm zgjedhjet

Derisa kryeministri i Kosovës, Ramush Haradinaj deklaron se është duke punuar dhe se do ta çojë mandatin e tij deri në fund, kështu nuk mendon edhe opozita. Nga krahu i kundërt deklarojnë se ajo i ka ditët e numëruara.

Deputetja e Lidhjes Demokratike të Kosovës, Valentina Bunjaku-Rexhepi, në një prononcim për gazetën “Bota sot”, ka thënë se kryeministri Haradinaj duhet të bindet se nuk e ka legjitimitetin, dhe se nuk ka kurrfarë mundësie që ta stabilizojë Kuvendin.

“Mendoj se që edhe vet kryeministri Ramush Haradinaj duhet me u bind që nuk e ka legjitimitetin dhe nuk ka kurrfarë mundësie me stabilizu Kuvendin e Kosovës, kur dihet se shumica shqiptare është në opozitë. Ne si Lidhje Demokratike e Kosovës sa më shpejtë që mundemi me i siguru votat për mocion do ta procedojmë. Zgjidhja më e mirë për qytetarët janë zgjedhjet e reja”, është shprehur deputetja Bunjaku-Rexhepi.

E pyetur se a do të jetë vendimtare java e ardhshme për Qeverinë Haradinaj, Bunjaku-Rexhepi është përgjigjur se kjo varet nëse do mund t’i sigurojnë votat e nevojshme.

“Varet se a do mundemi mi siguru votat e mjaftueshme për mocion”, është përgjigjur deputetja e LDK-së, Valentina Bunjaku-Rexhepi për gazetën “Bota sot”. Ndryshe, nga Lidhja Demokratike e Kosovës paralajmërojnë se java e ardhshme do të jetë vendimtare për rrëzimin e qeverisë së udhëhequr nga lideri i AAK-së, Ramush Haradinaj.

Mehmeti: Kjo qeveri do të bie shumë shpejt

Analisti politik, Faton Mehmeti, duke i komentuar deklaratat e kryeministrit Ramush Haradinaj, në një prononcim për gazetën “Bota sot”, ka thënë se shanset janë minimale që kreu i qeverisë aktuale ta dërgoj deri në fund mandatin e tij.

Siç ka thënë ai, nëse ndodh një gjë e tillë, do të jetë një tragjedi për Kosovën. “Veç nëse ndodh ndonjë mrekulli, përndryshe nuk shanse që Haradinaj të dërgoj deri në fund mandatin e tij. Nëse ndodh kjo faktikisht për Kosovën do të jetë tragjike, një qeveri e korruptuar dhe e udhëhequr nga bandat do e dërgonte vendin në humnerë nga e cila nuk do të mund të dilte asnjëherë”.

“Faktikisht kryeministri Haradinaj është i papjekur politikisht, dhe në vend që të merret me substancën dhe produktivitetin e qeverisë së tij merret me shifra se deri kur do të mund ta shtynte mandatin e tij. Për më tepër, Haradinaj e di se më asnjëherë nuk do të mund të bëhet kryeministër, andaj po e shfrytëzon në maksimum”, ka thënë analisti politik.

Mehmeti me tej ka theksuar se, Qeveria Haradinaj i ka ditët e numëruara, dhe sipas tij, fundi i saj do të vije shumë shpejt. “Kosova nuk ka qenë më keq as në kohën e okupimit, tani aq keq është gjendja sa me askush nuk dëshiron të jeton këtu. Në gjykimin tim kjo qeveri do të bie shumë shpejt, dhe Hashimi do të jetë personi që do e bëjë një gjë të tillë, me synimin për t’u kthyer vet në pozitën e kryeministrit. Thaçi është Putini i Kosovës, pasi ka kapur të gjitha segmentet e shtetit, dhe sipas interesave po i ndërron pozitat e tija. Ndërsa, Haradinaj është një figure shahu që Thaçi e shfrytëzon kurdo që të ketë nevojë”, ka përfunduar analisti politik, Faton Mehmeti për gazetën “Bota sot”.

Haziri: Sa më shpejtë të shkoj kryeministri Haradinaj

Edhe analisti tjetër politik, Nexhat Haziri shprehet se të gjithë parametrat politike dhe të zhvillimeve të tjera në skenën politike dhe rreth sajë nuk janë në favorin e kryeministrit Haradinaj.

“Nëse nisemi nga e drejta individuale njerëzore është legjitime ambicia e kryeministrit Haradinaj kur deklaron se mandatin si kryeministër do ta qoj deri në fund. Mirëpo të gjitha parametrat politike dhe të zhvillimeve të tjera në skenën politike dhe rreth sajë nuk janë në favorin Haradinajt dhe të ambicies së tij”, është shprehur Haziri.

Analisti politik në një prononcim për gazetën “Bota sot”, ka shtuar me tej se Qeveria Haradinaj e ka degraduar shtetin në çdo aspekt, dhe, siç potencon ai, po ashtu kjo e fundit i ka dhënë një imazh negativë në rrafshin ndërkombëtar.

“Pra për mendimin tim nuk është reale që të pritet që ky kryeministër ta qeverisë Kosovën për një mandat të tërë, kur dihet brishtësia e këtij koalicioni qeveritare për shkak të mungesës së numrave, pastaj skandaleve të shumta nga një keqqeverisje e cila e ka degraduar shtetin në çdo aspekt dhe po ashtu i ka dhënë një imazh negativ në rrafshin ndërkombëtar”, ka shtuar analisti politik.

Krejt në fund, Haziri ka nënvizuar se sa më shpejtë të shkoj kryeministri Haradinaj dhe qeverisja e tij, do të rriten shpresat në vend për ditë më të mira.

“Nuk mund të vazhdoj qeverisja nga zyrtar e institucione që tashmë kanë humbur çdo legjitimitet qoftë atë qytetar, politik e moral. Andaj sa më shpejtë të shkoj kryeministri Haradinaj dhe qeverisja e tij, do të rritet shpresa në këtë vend për ditë më të mira dhe për një shoqëri me dinjitet”, ka thënë në fund Haziri.

Deputeti i Kuvendit të Kosovës nga radhët e Lidhjes Demokratike të Kosovës, Arben Gashi, ka folur rreth përpjekjes së opozitës së vendit për rrëzimin e Qeverisë, e cila udhëhiqet nga Ramush Haradinaj. Gashi është pyetur në emisionin “DPT Te Fidani”, në televizionin T7, nëse javën e ardhshme do të mund të paraqitet një mocion mosbesimi ndaj Qeverisë Haradinaj. “Teorikisht mund të ketë (mocion, v.j.)”, është përgjigjur Gashi. Deputeti i LDK-së ka thënë se partia e tij dhe partitë e tjera në opozitë po punojnë për t’i siguruar votat e mjaftueshme për rrëzimin e Qeverisë.

Ende s’ka raport ndërkombëtar për vdekjen e Deharit, babai i tij i bindur se e njëjta dorë ia ka vrarë dy djemtë

Janë bërë pothuajse dy vite që kur ndërroi jetë aktivisti i Vetëvendosjes, Astrit Dehari. Në ditën tragjike ai ishte në Qendrën e Paraburgimit në Prizren, ku po mbahej nën dyshimin për sulm ndaj ndërtesës së Kuvendit të Kosovës

Ndonëse raporti i Institutit të Mjekësisë Ligjore në Kosovë e ka vlerësuar si vetëvrasje, familjarët me këtë konstatim nuk u pajtuan dhe prandaj kërkuan hetim të pavarur ndërkombëtar, i cili tani po zhvillohet në Qendrën Universitare të Mjekësisë Ligjore në Lozanë të Zvicrës.

Hetimet për rastin janë duke u zhvilluar ende dhe deri më tani ky institut nuk ka dal me ndonjë rezultat konkret për shkaqet e vdekjes së Astrit Deharit. Babai i të ndjerit Astritit, Avni Dehari për KosovaPress bën të ditur se hetimet po vazhdojnë dhe se hetuesit ndërkombëtar i kanë pranuar të gjithë materialin e nevojshëm për hetim nga organet hetimore në Kosovë.

Ai thotë se deklaratat kontradiktore të prokurorëve dhe gjykatësve për vdekjen e djalit të tyre, i kanë shtyrë ata që të dyshojnë edhe në raportin e Institutit të Mjekësisë Ligjore në Kosovë.

Deklaron se do e pranojnë juridikisht çfarëdo rezultati që vjen nga hetuesit ndërkombëtar, por shprehet i bindur se e njëjta dorë i ka vrarë të dy djemtë e tyre, Arbnor dhe Astrit Deharin.

“Rezultat, afat nuk kemi për arsye se ata i kanë marrë materialet, materiali është mjaftë voluminoz janë mijëra faqe, na kanë thënë se punojnë me gjithë mundësitë që kanë, me zell me vrull, mirëpo afat të caktuar nuk ka besoj se posa ta kryejnë punën do u hyjnë hetimeve të pavarura. Natyrisht që ne nuk jemi më të fortë se pushteti që të bëjmë hetime që t’i nxjerrim në shesh dyshimet tona dhe të shohim se çfarë ka ndodhur, por e dimë se e njëjta dorë e ka vrarë edhe Arbnorin edhe Astritin, tash kemi kërkuar hetues ndërkombëtar varësisht prej rezultatit juridikisht ne e pranojmë, por ne e dimë se që të dy janë të vrarë“, thotë Dehari.

Rezultate konkrete për hetimet në Zvicër nuk ka pranuar as avokati i rastit të Astrit Deharit, Tomë Gashi i cili thotë se janë duke pritur një përgjigje hetimore nga Instituti i Mjekësisë Ligjore në Lozanë.

Duke u shprehur i bindur se Astrit Dehari është vrarë, Gashi në një prononcim për Kosovapress thotë se rasti nuk ka marrë epilog ende, ngase sipas tij, ishte i inskenuar.

“Deri më tani nuk ka rezultate konkrete dhe nuk kemi një përfundim të hetimeve të pavarura apo të ekspertizave të cilat sigurisht që familja Dehari do t’u besoj, në aspektin juridik. Pas vrasjes së Astrit Deharit kemi pasur një situatë jashtëzakonisht katastrofale në aspektin juridik, kemi pasur deklarime kundërthënëse në mes të Policisë, Prokurorisë dhe zyrtarëve të tjerë shtetëror apo ligjor që janë në Kosovë dhe kemi pasur edhe ekspertiza me dy kuptimësi. Vetë në Institutin e Mjekësisë Ligjore janë bërë dy ekspertiza të cilat faktikisht njëra tjetrën e eliminojnë nëse lexohen në mënyrën e duhur dhe deri më tani ne nuk kemi njohuri të tillë, kështu që për të eliminuar këto paqartësi juridike më në fund është aprovuar kërkesa e familjes Dehari që rasti të dërgohet në Zvicër.

Ky rast që është pretenduar se do përfundoj shpejt në aspektin juridik e shihni se sa vështirësi ka pasur për shkak të ndjeshmërisë së këtij rasti, sepse Astrit Dehari është vrarë në vendin ku është dashur të jetë krejtësisht i sigurt e që ka qenë Qendra e Paraburgimit në Prizren për një rast të inskenuar kundër tij”, shprehet Gashi.

Për dinamikën e hetimeve që po zhvillohen në Qendrën Universitare të Mjekësisë Ligjore për rastin e Astrit Deharit organet e drejtësisë në Kosovë pranojnë se nuk kanë asnjë informacion të ri për ecurinë hetimore, por thonë që këto hetime i kanë ndihmuar.

“Ministria e Drejtësisë ka dhënë gjithë ndihmën e nevojshme institucionale dhe financiare për realizimin e ekspertizës në institutin zviceran, që ka qenë kërkesë e vetë familjes Dehari. Rasti është përcjell nga Prokuroria Themelore e Prizrenit tek ky Institut, dhe institucionet vendore kanë siguruar çdo provë që është kërkuar nga ta. Presim rezultatet e ekspertizës”, deklaron Ministria e Drejtësisë.

Ndërsa, Prokuroria Themelore e Prizrenit për KosovaPress ka konfirmuar se rasti i aktivistit të Vetëvendosjes është duke u trajtuar në Zvicër.

“Prokuroria Themelore në Prizren, konfirmon se rasti i A.D., është duke u trajtuar ende në Qendrën Universitare të Mjekësisë Ligjore në Lozanë të Zvicrës. Për nevoja të ekspertizës, përkatësisht hetimit, ne u kemi dërguar në vazhdimësi dokumente shtesë sipas kërkesës së tyre, e që lidhen me rastin në fjalë. Andaj, ju njoftojmë se akoma nuk kemi pranuar rezultatet e ekspertizës nga ana e Institutit në fjalë”, thuhet në shkresën e këtij institucioni.

E në Lëvizjen Vetëvendosje thonë se vdekjen e dyshimtë të Astrit Deharit nuk do e lënë të heshtet, ndonëse sipas tyre, PDK-në se po tenton të hesht jo vetëm vdekjen e Deharit, por edhe rastin e gjykimit të aktivistëve të Vetëvendosjes për terrorizëm.

Deputeti i Lëvizjes Vetëvendosje, Sami Kurteshi thotë se nuk kanë asnjë informacion për ecurinë e hetimeve në Institutin e Mjekësisë Ligjore në Lozanë.

“Sa i përket rastit të Astrit Deharit ne nuk kemi ndonjë informacion më të afërt vetëm e dimë se familja është e informuar se Instituti i Mjekësisë Ligjore të cilin e ka përzgjedhur familja është duke punuar siç duket i ka marr materialet e përkthyera. PDK-ja ka gisht në këtë drejtim dhe Qeveria e atëhershme sepse tani e 10 vite i kanë nën kontroll të plotë AKI-në, i kanë nën kontroll të plotë Policinë përmes Shpend Maxhunit të cilin këtu e kanë pasur drejtor tash e quan drejtor të AKI-së, edhe ministrinë e Drejtësisë. Natyrisht që më së tepërmi janë të interesuar këta pjesëtarët e PDK-së krytë e PDK-së, kreu i PDK-së që ky rast të heshtet , domethënë të heshtet rasti i gjykimit edhe i arrestimit të aktivistëve të Vetëvendosjes për terrorizëm, por edhe rasti i Astrit Deharit, mirëpo sigurisht ne nuk do ta lëmë këtë në heshtje”, thotë ai.

Astrit Dehari ishte aktivist i Lëvizjes Vetëvendosje, u arrestua më 30 gusht të vitit 2016, i dyshuar se bashkë me aktivistë të tjerë sulmuan Kuvendin e Kosovës. Ai vdiq më 5 nëntor të po të njëjtit vit, në Qendrën e Paraburgimit në Prizren, ku raporti i Institutit të Mjekësisë Ligjore rreth shkaqeve të vdekjes së Astrit Deharit më 18 nëntor 2016 doli në përfundim se Dehari ka bërë vetëvrasje, por rezultatet e këtij raporti nuk u pranuan nga prindërit e të ndjerit.

Në tetorin e vitit të kaluar Qeveria e Kosovës me kërkesë të ministrit të Drejtësisë, Abelard Tahiri ka ndarë mjetet financiare në shumën prej 50 mijë eurove për ekspertizë shtesë jashtë vendit në lidhje me vdekjen e Astrit Deharit.