Shala: Thaçi synon precedent të rrezikshëm me pyetjen bërë Kushtetueses, do defunksionalizimin e Speciales

Gëzim Shala nga Instituti i Kosovës për Drejtësi në “Express Intervistën” ka komentuar kërkesën e presidentit Hashim Thaçi drejtuar Gjykatës Kushtetuese. Thaçi ka nisur një iniciativë me synimin për të anashkaluar Kuvendin e Kosovës rreth një marrëveshjeje të mundshme me Serbinë

Sipas Shalës në rrethana normale kjo s’do të duhej të përbënte diçka skandalozë, mirëpo ai thotë se nëse shohim se si është duke funksionuar Gjykata Kushtetuese atëherë kjo është skandal në vete.

“Të gjitha kushtetutat e botës demokratike e kanë rregulluar këtë çështje që këto lloj marrëveshjes nuk mund të nënshkruhen nga një person por nga Kuvendi. Neni 19 përcakton se marrëveshjet ndërkombëtare janë mbi ligjin por jo edhe mbi Kushtetutën. Përmes kësaj presidenti dëshiron të luajë një lojë të re që ta shfuqizojë Gjykatën Speciale, ai nuk mund ta bëjë këtë por mund ta defunksionalizojë atë”, shprehet Shala.

Thaçi i drejtohet Kushtetueses, në përpjekje për të bishtnuar Kuvendin Ai shton se, “nëse i jep të drejtë presidentit, e jo Kuvendit atëherë ai mund ta shuajë edhe EULEX-in. E kjo mund të defunksionalizojë Gjykatën Speciale.

Shala thekson se në rrethana normale kjo pyetje s’do të ishte problem, pasi do të ishte vetëm humbje kohe, por duke ditur se çfarë gjykate kushtetuese kemi, që është skajshmërisht e politizuar.

“Vet kërkesa paraqet rrezik të madh. Përveç që është skandal paraqet edhe cenim të Kushtetueses. Neni 113 përcakton se çdo amendament duhet të shikohet nëse cenon ndonjë nen, e nëse cenon atëherë s’mund të miratohet. Kosova është në prag të hetimeve shumë të mëdha, dhe kjo kërkesë është shumë e rrezikshme”, thotë Shala.

Katër skenarët e përfundimit të dialogut Kosovës – Serbi, sipas Naim Rashitit

Drejtori i Grupit Ballkanik për Politika në Kosovë, Naim Rashiti, duke folur për dialogun, ka theksuar se janë katër opsione se si do të arrihet marrëveshja në mes Kosovës dhe Serbisë

Ai në një intervistë për Telegrafin ka thënë se të gjitha opsionet janë të hapura, duke e bërë të vështirë kështu të dihet përfundimi i dialogut.

“Dialogu ka shumë gjasë që të dështoj, sepse palët nuk janë të gatshme për të arritur pajtim. Ky është opsioni i parë i shtruar. Veçanërisht të vështirë e bën zgjidhjen mungesa e kurajës së njohjes së Kosovës nga Serbia”, ka shtuar Rashiti.

Sipas tij, prioritet mbi prioritete nga bashkësia ndërkombëtare është vendosur njohja. Një opsion tjetër është një zgjidhje e modelit të dy Gjermanive, me një status special për veriun dhe me një normalizim të marrëdhënieve pa njohje eksplicite.

“Opsioni i tretë, ridefinimi i kufijve pa shkëmbim. Dhënia e një pjese të komunave të pjesës veriore në shkëmbim të njohjes. Nëse flet për kufijtë, në marrëdhëniet ndërkombëtare, nuk mund të flasësh pa e njohur shtetin e Kosovës në këtë rast”, ka shtuar Rashiti.

Derisa opsioni i fundit që është i papranueshëm në Kosovë, është sipas tij, dhënia e territorit për të marrë territor, duke shtuar se “Serbia do të tentojë të vijë deri në lumin Ibër, sepse Serbia flet për ndarje në urën e Ibrit”.

Gani Geci: Do të dëshmoj në Gjykatën Speciale për krimet që ka bërë Hashim Thaçi

Ish-deputeti i Lidhjes Demokratike të Dardanisë, Gani Geci ka thënë se do të dëshmojë në Gjykatën Speciale, për siç tha ai, krimet politike që i ka bërë Hashim Thaçi. Geci tha se Shtabi i Përgjithshëm i Ushtrisë Çlirimtare të Kosovës, në krye me Hashim Thaçin, kishin dhënë urdhrin e vrasjes së kolonel, Ahmet Kraniqit

Gani Geci tha se Hashim Thaçi, sot president i Kosovës, është përgjegjës për krimet politike në Kosovë. Sipas tij, Thaçi qëndron pas vrasjes së ish ministrit të Mbrojtjes, Ahmet Krasniqit, ish gazetarit të “Bota sot”, Bekim Kastratit, Besim Dajakut e Smajl Hajdarajt.

Këto deklarata, Gani Geci i bëri pas përfundimit të ceremonisë së varrimit të Ahmet Krasniqit dhe Qazim Jakupit, në varrezat e dëshmorëve në Velani të Prishtinës.

Geci: Hashim Thaçi ka qenë urdhër-dhënësi i vrasjes së Ahmet Krasniqit

“Hashim Thaçi ka qenë urdhër-dhënësi i vrasjes së Ahmet Krasniqit, nuk është me rëndësi kush e ka bërë veprën, urdhrin e ka dhënë Shtabi i Përgjithshëm, në krye me Hashim Thaçin dhe kompaninë e tij. Hashim Thaçi ka dhënë urdhër me vra Gani Gecin, dhe u vra Bekim Kastrati dhe Besim Dajaku. Hashim Thaçi ka dhënë urdhër me vra Haki Imerin, dhe u vra Haki Imeri, Hashim Thaçi ka dhënë urdhër me e vra Smajl Hajdaraj dhe u vra Smajl Hajdaraj, e tash Hashim Thaçi na organizon ceremoni varrimi. Duke u munduar t’i ikë Gjykatës Speciale, po mundohet që secilin nga viktimat ta bëjë hero, ne kemi qenë hero, nuk ka pas nevojë të na bëjë fare, sepse ne kemi luftuar për Kosovën”, tha ai.

Tutje, Geci tha se paratë për vrasjen e Besim Dajakut dhe ish gazetarit të “Bota sot”, Bekim Kastratit i kishte dhënë vëllai i presidentit Thaçi, Gani Thaçi. E për këtë, Gani Geci pretendon se ka edhe dëshmi, disa mesazhe telefonike që i nxori para kamerave, e pastaj i publikoi në llogarinë e tij në facebook.
Geci tha se me Thaçin do të ballafaqohet drejtpërdrejt në Gjykatën Speciale.

Geci: Do të dëshmoj në Gjykatën Speciale

“Kërkoj prej Hashim Thaçit që të dorëzohet para Tribunalit të Hagës, të lë shkëmbimin e territoreve, këto përralla të vizatuara me Tadiqin, sepse çka është boll është boll, dhe një ditë kur të bëhet më shumë boll, nuk po kemi dëshirë me e kallë këtë vend…Do të jem dëshmitarë në Gjykatën Speciale, unë personalisht do të jem dëshmitar, prej të parëve ndoshta, unë dëshmoj për krimet politike që ika bërë Hashim Thaçi në Kosovën e pasluftës, Hashim Thaçi nuk ka luftuar me serbë, nuk ka parë askund serbë, serbët kur kanë gjuajtur granata, Hashimi ka ikë. Ia pati dhënë në 1992-ën, Sami Lushtaku një allti me gjuajt përpjetë, as përjetë nuk ka gjuajtur, ka luftuar vetëm me shqiptarë, i ka vrarë familjet më të mëdha shqiptare, si e Ahmet Krasniqit”, tha ai.

Ai tha se disa herë kanë tentuar ta vrasin, por që i falënderohet Zotit që sot është gjallë. Geci e lartësoi figurën e kolonelit Ahmet Kransiqi, dhe tha se 20 vjet më parë askush nuk kishte marrë pjesë në varrim, e sot po i organizojnë ceremoni politike varrimi.

Geci e ka akuzuar Thaçin se ka dhënë urdhër për vrasjen e ish gazetari të “Bota sot”, Bekim Kastrati dhe truprojës së Ibrahim Rugovës, Besim Dajakun. “Unë po i kërkoj Thaçit, sepse fal Zotit sjam vrarë, e dy shokët e mi janë vrarë. Hashim Thaçi po din si e ka shpall Haki Imerin, le t’i shpall Besim Dajakun e Bekim Kastratin, që i ka vrarë me urdhër të tij, sepse parat i ka dhënë Gani Thaçi, vëllai i tij, e i kanë ndarë paratë me disa kriminelë”, ka thënë Geci.

Sipas tij, Thaçi është duke u munduar që të ikë nga Gjykata Speciale. “Hashim Thaçi duke u munduar t’i ik Gjykatës Speciale , po mundohet që secilin nga viktimat ta bëj hero dhe me të vërtetë kemi qenë heronj e ai s’ka pasur nevojë të na bëj fare sepse kemi luftuar për Kosovën. Ne ia kemi lëshuar Thaçit krejt Kosovën në dorë. Nuk munden më me i hedh hi syve këtij populli, me i vra e me ardh me i kajt ndërsa kur u vra Ahmet Krasniqi, cili prej tyre ishte aty, asnjëri. Cili prej tyre edhe ministrave kanë marr pjesë në varrim, asnjë. Kjo është ceremoni politike, për ministrin e parë të mbrojtjes së Kosovës që e deshi shumë Kosovën dhe ishte nip i Zhilivodës, nip i familjes më patriotike në Kosovë”, ka deklaruar Geci.

Më tej, Gani Geci ka thënë se më Hashim Thaçin do të takohet në Gjykatën Speciale, duke i bërë kërkesë që të dorëzohet në Hagë, “Thaçi me mua do të takohet në gjykatën speciale, do të ballafaqohem drejtpërdrejt me të në lidhje me komunikatën e 59 sepse aty ai e ka shkruar sikur për mua edhe shumë anëtarë të tjerë të LDK-së vrasje politike që gjithë bashkësia ndërkombëtare i ka hetuar si vrasje të tilla. Kërkoj prej Thaçit të dorëzohet para Tribunalit të Hagës, ti lë shkëmbimet e territoreve, këto përralla sepse një ditë do të bëhet boll dhe nuk duam ta kallim këtë vend, ne duam ta ruajmë këtë vend. Ata me argatë e tyre, me dhjetëra herë tentuan të më vrasin mua, un jam gjallë falë zotit. Unë po tutem që kam me vdek, por po tutem që kam me vdek para se me u përball me Thaçin. Do të jem dëshmitar në Specialen, do të dëshmoj për krimet politike që i ka bërë Thaçi në Kosovë edhe pas luftës. Ai nuk i ka parë asnjëherë serbët, ai ka luftuar vetëm me shqiptarë, ka vrarë vetëm familjet më të mëdha në Kosovë. Të gjithaq familjet patriotike i ka vrarë, unë jam gjallë pahiri, vetëm për t’iu treguar juve sot këtu”, ka deklarua ish deputeti i LDK-së dhe ushtari i UÇK-së, Gani Geci.

A do të rrëzohet Qeveria?

Njohësit e rrethanave politike në Kosovë, kanë analizuar për ‘Gazeta Blic’, deklaratat e Jakup Krasniqit, për pakënaqësinë ndaj punës së Qeverisë Haradinaj, dhe paralajmërimit të tij për daljen e Nismës nga koalicioni

Ramush Tahiri tha për ‘Gazeta Blic’, se Jakup Krasniqi është zyrtar i lartë partiak dhe politik i Kosovës, dhe që fjalët e tij kanë peshë. Po ashtu, Tahiri shtoi se nëse Nisma braktisë koalicionin qeverisës do të ketë disa pasoja.“Jakup Krasniqi ishte dhe është zyrtar i lartë partiak dhe politik i Kosovës dhe fjala e tij ka peshë, por gjithashtu partia e tij Nisma si parti e re por e dalur prej PDK i ka interesat e saja pragmatike të qenurit në pushtet dhe sigurisht organet e forumet partiake do të marrin vendim të përgjegjshëm duke qenë të vëmendshëm për pasojat sepse dalja e kësaj partie nga koalicioni qeverisës do t’i bënte votat e nevojshme për rrëzimin e Qeverisë por edhe do të bllokonte punën e Parlamentit të Kosovës i cili tash i ka votat për kuorum me pjesëmarrjen e deputetëve të PSD dhe të Alternatives”, ka thënë Tahiri për ‘Gazeta Blic’.

Edhe analisti tjetër, Haki Abazi bëri me dijë se deklaratat e Jakup Krasniqit dëshmojnë se Nisma është në anën e shpëtimit të Kosovës. Dhe që kjo parti nuk mundët me qenë pjese e një egërsie që është duke cenuar shtetësinë edhe ekzistencën e tij.“Pesha historike e së keqes që është duke ardhur si rezultat i qeverisës dhe udhëheqjes me metoda kapje e shantazhimi dhe negociata pa mandat nga presidenti i vendit është një alarm i përgjegjësisë që z.Krasniqi e ka kuptuar mirë. Nuk mundet Nisma me qenë pjesë e një egërsie që është duke cenuar shtetësinë dhe ekzistencën e tij. Sa më shpejtë që bie kjo qeveri aq më e shpejtë do të jetë mundësia që të dobësohet dhe të largohet nga skena kjo e keqe e madhe që po e armiqëson Kosovën çdo ditë e më shumë edhe me botën demokratike dhe miqtë që e kanë përkrahur”, tha Abazi për “Gazeta Blic”.

Abazi tha që tash është momenti që duhet vendosur se në cilën anë duhet të pozicionohen, në anën e shpëtimit apo rrënimit të shtetit.

“Ky moment është shumë i rëndësishëm për të vendosur se a jemi në anën e shpëtimit të shtetit apo në rrënimin e shtetit. Z. Krasniqi dhe shumë pjesëtarë të Nismës kanë ditur që të jenë në anën e shpëtimit dhe ai moment është tani”, tha aiTheksojmë që Jakup Krasniqi gjatë ditës së djeshme ka kritikuar qeverinë, sipas tij kjo qeveri nuk është duke punuar si duhet. Ai ka pohuar se NISMA shumë shpejtë do të dalë me një qëndrim nëse do të vazhdojë të jetë pjesë e koalicionit qeverisës.

Cilat do të jenë mesazhet ruse në Bosnje-Hercegovinë?

Vizita e shefit të diplomacisë ruse Sergej Lavrov në Bosnje-Hercegovinë vjen në kohën e fushatës elektorale. Të rëndësishme do të jenë mesazhet që dërgohen në Sarajevë dhe Banjalukë

Ministri i Jashtëm rus Serbej Lavrov viziton këtë të premte (21.09) Bosnje-Hercegovinën, ku pritet të theksojë përkushtimin e Rusisë ndaj Marrëveshjes së Dejtonit. Lavrov ka planifkuar që në Sarajevë të takojë anëtarët e Presidencës, e më pas edhe ministrin e Jashtëm Igor Crnadak. Pastaj do të vizitojë edhe Banjalukën kur do të pritet nga presidenti i Republikës Serpska, Milorad Dodik, por edhe shefi i diplomacisë serbe, Ivica Daçiq.

Ndonëse respetkohet korrektësia e Moskës – sepse Lavrovi fillimisht viziton Sarajevën e më pas Banjalukën – vizita e Lavrovit në këtë vend konsdierohet më shumë si mbështetje e Republikës Serpska. Analisti Xhevad Kuçukaliq thotë se vizitat në prag të zgjedhjeve nuk janë me vend, sepse mund të intepretohen si mbështetje për ndonjë politikan të caktuar.

„Dodiku më së shumti do të donte që Lavrovi të vizitojë vetëm Banjalukën dhe të mos shkojë fare në Sarajevë. Por Lavrov është një diplomat me përvojë dhe nuk do të bënte gabime të tilla. Dodiku do të përpiqet ta shfrytëzojë këtë vizitë për forcimin e pozitës së tij. Por vizitën e Lavrovit do të përpiqen ta shfrytëzojnë edhe rivalët e Dodikut, Mladen Ivaniq dhe Igor Crnadak”, thotë ai për DW. Sipas tij, bisedimet për raprotet bilaterale duhet të zhvillohen në Sarajevë dhe jo në qendrat e entiteteve administrative.

Analistët thotë se influenca ruse në këto rajone nuk ka qenë e madhe sa kohë që Perëndimi ka pasur rol aktiv në Bosnje-Hercegovinë. Kjo sepse atje kanë qenë edhe trupat e NATO-s dhe Euforit.

Shtimi i influencës ruse

Profesori i mërrëdhënieve ndërkombëtare Adnan Huskiq mendon se me zvogëlimin e pranisë perëndimore në Bosnje-Hercegovinë është shtuar influenca ruse. Ndërkohë që mendimet mes forcave perëndimore dhe ruse për gjendjen në këtë vend nuk janë të njëjta.

„Forcimi i ndikimit rus në Bosnje-Hercegovinë shihet edhe nga procesi i privatizimeve në Republikën Serpska, ku Gazpromi rus është bërë pronar i një pjese të madhe të industrisë së naftës. Me marrjen e kësaj industrie, Rusia ka forcuar edhe ndikimin e saj politik në rajon – në veçanti në Serbi dhe Republika Serpska”, thekson Huskiq për DW.

Ai thotë se Rusia kurrë nuk e ka fshehur se kundërshton anëtarësimin e vendeve të Ballkanit Perëndimor në BE dhe NATO. Ndërsa me mbështetjen e “neutralitetit” të Bosnje-Hercegovinës, Rusia po përpiqet të pengojë rrugën e këtij vendi drejt BE. Moska angazhohet që status quoja e tanishme të vazhdojë në këtë rajon.

Raportet ruso-turke në Bosnje-Hercegovinë

Në veçanti interesante duken raportet ruso-turke në Bosnje-Hercegovinë dhe rajon. Influenca e tyre në këto vende është evidente. Ndërkohë që roli i Turqisë ka fituar peshë në veçanti pas prishjes së raporteve të Turqisë me administratën e presidentit Trump.

„Turqia ka mundur të konsiderohet partner i sigurt para këtyre mosmarrëveshjeve. Por me rritjen e tensioneve me presidentin Trump, Turqia po largohet nga vlerat perëndimore. Ndaj do të jetë interesante të shihen raportet ruso-turke në Bosnje-Hercegovinë dhe në rajon. Në veçanti kur dihet se Rusia ka influencë të fuqishme në RS ndërsa Erdgoani në Sarajevë”, thotë Huskiq. Ndërkohë që Bosnje-Hercegovinë duhet të mbrojë interesat e veta dhe të vazhdojë rrugën drejt integrimeve evropiane.

Vuçiq: Nuk dua të më thonë se është mirë ta njoh Kosovën

Presidenti i Serbisë, Aleksandar Vuçiq, tha se është gjithmonë për vazhdimin e dialogut me Kosovën, porse është e nevojshme të dihet se cila është tema e tij

“Unë të shkoj atje dhe të më thonë se do të ishte mirë ta njoh Kosovën dhe se do të isha udhëheqës botëror nëse e bëj një gjë të tillë – nuk dua. Nuk më intereson. Nuk dua të jem udhëheqës botëror. Çka tani? Do të më zëvendësoni si disa? Unë prej këtij vendi nuk ik. As unë, as fëmijët e mi, tre i kam”, tha Vuçiq për gazetarët në Beograd, transmeton Shërbimi i Ballkanit i Radios Evropa e Lirë.

Ai tha se nuk mendon se është zgjidhje që Serbia të mos fitojë asgjë në dialog dhe të poshtërohet.
“Unë nuk do ta pranoj një gjë të tillë. Pikë”, tha Vuçiq. Prishtina dhe Beogradi, qysh në vitin 2011, po bisedojnë me ndërmjetësimin e Bashkimit Evropian për normalizimin e marrëdhënieve.

Së voni, përfaqësuesit e dy vendeve kanë shpalosur idenë e ndryshimit të kuijve si zgjidhje e mundshme.
Presidenti i Kosovës, Hashim Thaçi, ka thënë se një gjë e tillë mund të sjellë njohjen nga Serbia.

Rusia i cilëson sanksionet e SHBA-ve “lojë me zjarr”

Moska ka thënë se vala e re e sanksioneve të Uashingtonit kundër Rusisë, e të cilat kanë prekur edhe Kinën, janë duke rrezikuar stabilitetin global, duke paralajmëruar Shtetet e Bashkuara kundër “lojës me zjarr”, transmeton AFP

“Do të ishte mirë për ata që të kujtojnë se ekziston një koncept i stabilitetit global, të cilin ata po e rrezikojnë duke rritur tensionet ruso-amerikane”, ka thënë zëvendës-ministri i Jashtëm rus, Sergei Ryabkov përmes një deklarate. “Të luajturit me zjarr është budallallëk, mund të bëhet lojë e rrezikshme”, ka shtuar ai.

Shtetet e Bashkuara kanë njoftuar të enjten për zgjerim të luftës së sanksioneve kundër Rusisë dhe Kinës, duke vënë kështu për herë të parë masa ndëshkuese kundër organizatës ushtarake të Kinës, për shkak të blerjes së aeroplanëve dhe raketave ruse. Departamenti amerikan i Shtetit po ashtu ka njoftuar për vënie të 33 zyrtarëve ushtarakë dhe atyre të inteligjencës ruse në listë të zezë.

Zyrtarë të mbrojtjes ruse, të agjencisë ushtarake të inteligjencës dhe persona të lidhur me grupin për dezinformata me seli në Shën Petersburg, Agjencia për Kërkime në Internet, kanë qenë edhe më parë subjekt i sanksioneve të SHBA-së dhe 28 prej tyre tashmë janë paditur nga këshilltari special, Robert Mueller, i cili është duke hetuar ndërhyrjen ruse në zgjedhjet presidenciale në SHBA më 2016.

Mirëpo Ryabkov ka përsëritur se asnjë nga pakot e sanksioneve nuk ka arritur të ndryshojë sjelljen e Rusisë deri më tani. “Të ashtuquajtuarat ‘lista të zeza’ amerikane vazhdimisht përsërisin njëra-tjetrën. Është shumë, po shumë qesharake”, ka thënë ndër të tjera ai.

Zëdhënësi i Kremlinit, Dmitry Peskov ka thënë të premten se Uashingtoni është duke tentuar të shtypë konkurentët në tregun global të armëve, përmes sanksioneve të vëna kundër blerësve të armëve nga Rusia.
Peskov i ka cilësuar sanksionet e reja armiqësore dhe të paparashikueshme, mirëpo nuk ka treguar si do të përgjigjet Rusia.

Problemet në Telekom sfidojnë zbatimin e kodit telefonik +383

Afati i fundit për zbatimin në tërësi të kodit telefonik të Kosovës +383 që është 31 tetori i këtij viti, po konsiderohet të jetë mjaft sfidues të arrihet nga operatorët e telefonisë mobile që veprojnë në tregun e Kosovës

Kodi shtetëror i Kosovës i cili ishte ndarë në dhjetor të vitit 2016 nga Unioni Ndërkombëtar i Telekomunikimeve (ITU), ishte paraparë që të nisë më 30 qershor, por ky afat ishte shtyrë për 31 tetor, pas kërkesave të operatorëve të telefonisë mobile dhe fikse Vala dhe Ipko.

Arsim Bilalli, zëdhënës në Telekomin e Kosovës, thotë për Radion Evropa e Lirë se janë të angazhuar me të gjitha resurset për të gjetur një zgjidhje, qoftë edhe të improvizuar, për të përmbushur afatin e paraparë nga Autoriteti Rregullativ i Komunikimeve Elektronike dhe Postare (ARKEP).

Por, sipas tij, është tejet sfiduese arritja e afateve sipas planit të migrimit të ARKEP. “Situata aktuale në Telekomin e Kosovës dhe kompleksiteti operativ dhe teknik në relacionet me partnerët tanë ndërkombëtar si faktorë kyç në implementimin e tërësishëm të kodit shtetëror, e kanë bërë tejet sfiduese arritshmërinë e afateve sipas planit të migrimit të ARKEP. Kjo do të thotë se ky proces është i varur nga specifikacionet operative, të cilat nuk mund të përfundohen vetëm duke u bazuar në resurset teknike të Telekomit të Kosovës”, thotë Bilalli.

Bilalli shton se Telekomi i Kosovës vazhdon të jetë në konsultime për asistencë teknike me partnerët ndërkombëtarë dhe së shpejti do të gjejë një zgjidhje të duhur për zbatimin e kodit të ri +383.

“Më së voni deri me datë 31 Tetor 2018 duhet të përfundojë në tërësi implementimi i kodit E.164 +383 në rrjetin e telefonisë mobile dhe të ndërpriten kodet tjera. Nga kjo datë, kodi +383 duhet të jetë kodi i vetëm për origjinim dhe terminim të trafikut ndërkombëtar në Republikën e Kosovës”, shton Bilalli.

Telekomi i Kosovës tani e sa kohë gjendet në krizë të thellë financiare. Borxhi i akumuluar ka arritur shifrën e 60 milionë eurove. Autoritetet në Kosovë kanë filluar që të ndërmarrin masa për të shmangur falimentimin e kompanisë.

Kreshnik Gashi, kryetar i Bordit të Autoritetit Rregullativ të Komunikimeve Elektronike dhe Postare, thotë për Radion Evropa e Lirë së më nuk do të ketë shtyrje dhe se operatorët duhet të respektojnë afatin.

“Kodi +383 me vendimin e nxjerr nga ARKEP është paraparë të zbatohet prej datës 31 tetor dhe me këtë janë njoftuar të gjithë operatorët. Presim që kodi + 383 edhe në telefonin mobile të zbatohet plotësisht deri më datën 31 tetor edhe nga operatorët. Deri më tani nuk kemi ndonjë kërkesë për shtyrje apo informata se ky afat nuk mund të arrihet, megjithatë ARKEP bënë të qartë se data 31 tetor është afati i fundit dhe nëse nuk zbatohet kodi deri në atë datë atëherë do të zbatohen masat sipas Ligjit”, thotë Gashi.

Ndërkohë, në bazë të ligjit për komunikime elektronike, në raste të tilla, Autoriteti ka të drejtë ta dënojë ndërmarrësin deri në 10 për qind nga të hyrat vjetore nga aktivitetet që kanë të bëjnë me komunikimet elektronike, por nëse kalkulimi i një shume të tillë është i vështirë apo i pamundur Autoriteti e dënon ndërmarrësin me një shumë prej jo më shumë se 150 mijë euro.

Aktualisht, në Kosovë ekzistojnë dy operatorë të telefonisë mobile të cilët shfrytëzojnë kode të huaja ndërkombëtare. Telefonia mobile “Vala” shfrytëzon kodin e Monakos (+377), ajo e IPKO-s kodin e Sllovenisë (+386) për të cilat Kosova duhet të paguajë kosto të lartë të shpenzimeve.

Të dhënat e Qeverisë së Kosovës kanë treguar se kostoja e përgjithshme e shkaktuar deri më tani nga mungesa e kodit telefonik ka arritur shifrën në mbi 200 milionë euro. Ndërkohë, sa i përket telefonisë fikse, thirrjet hyrëse dhe dalëse tanimë vetëm se realizohen me kodin +383.

Shqiptarët e Shqipërisë shuplakë Edi Ramës, 80 për qind e tyre deklarohen kundër korrigjimit të kufijve

Një sondazh në Shqipëri këtë herë është bërë për propozimin e presidentit të Kosovës Hashim Thaçi dhe atij serb Aleksandar Vuçiq, për shkëmbim territoresh. E, pikërisht në një intervistë për një televizion në Shqipëri, presidenti Hashim Thaçi, tha se 80 për qind e qytetarëve dëshirojnë të ndryshohen kufijtë e Kosovës, pra përkrahin idenë e tij. Ky e kishte për qytetarët e Kosovës, megjithatë një matje e tillë nuk është bërë asnjëherë, e shifrat që tha presidenti ishin të shpikura

Sipas sondazhit të CSES-së në Shqipëri, që u realizua online në datat 13 – 20 shtator 2018, 77 për qind del të jenë kundër kësaj ideje, transmeton Koha.net.

Nga 5.619 nënshtetasit madhorë të Republikës së Shqipërisë që kanë dhënë përgjigje, banorë të fshatrave dhe qytetet nga të gjitha bashkitë (Tiranë 39%, Durrës 7%, Elbasan 5.5%, Shkodër 5.4%, Vlorë 4.2%, Fier 3.9%, Korçë 3.3%, etj), 92.3% shprehen se kohët e fundit kanë dëgjuar për propozimet e Thaçit dhe Vuçiqit, për korrigjimin e kufijve/shkëmbimin e territoreve mes Kosovës dhe Serbisë, ndërkohë që 7.7% shprehen se nuk kanë dëgjuar rreth këtyre propozimeve.

Mes qytetarëve të Shqipërisë që kanë dëgjuar për propozimet e Presidentit të Kosovës dhe Serbisë, të cilët kanë formësuar një qëndrim për këtë çështje dhe pranojnë të përgjigjen, 77% pozicionohen kundër këtyre propozimeve ndërkohë që 23% i mbështesin ato.

“Vihet re që të rinjtë shfaqin prirje më të lartë për të kundërshtuar këto propozime (18 – 35 vjeç, 80% kundër) krahasuar me më të moshuarit (56+ vjeç, 72% kundër). Gjithashtu vihet re se femrat shfaqin prirje më të lartë kundërshtuese ndaj këtyre propozimeve (80% kundër) krahasuar me meshkujt (76% kundër)”, thuhet në sondazhin e CSES-së.

CSES është një program bashkëpunues i hulumtimit midis ekipeve të studimit zgjedhor nga e gjithë bota. Vendet pjesëmarrëse përfshijnë një modul të përbashkët të pyetjeve.

Kohët e fundit, në Kosovë, ideja e Thaçit për korrigjim kufijsh po cilësohet si antikushtetuese. E ky i fundit, ka nisur një iniciativë me synimin për të anashkaluar Kuvendin e Kosovës rreth një marrëveshjeje të mundshme me Serbinë.

Statistika shqetësuese: Për dy vjet, mbi 100 persona të zhdukur

Përveç vrasjeve të shumta, aksidenteve në trafik dhe lëndimeve në punë që po ndodhin në vend, shqetësues është edhe numri i rasteve të personave të zhdukur. Vetëm në javën e tretë të shtatorit në vend janë zhdukur katër persona, për fatin e të cilëve ende nuk dihet asgjë. Sipas statistikave të Policisë në dy vitet e fundit janë raportuar si të zhdukur më shumë se 100 persona. Prizreni, Istogu e Mitrovica janë qytetet në të cilat ndodhin më së shpeshti raste të tilla

Avdyl Kçiku nga Ferizaj, kishte vite që punonte e jetonte në Zvicër bashkë me familjen e tij. Por, viteve të fundit i kishte shpeshtuar vizitat për në Kosovë.

Përveç që vinte në vendlindje për pushime, ai shfrytëzonte vizitën edhe për punë biznesi. Deri në mbrëmjen e 31 gushtit, biznesi i kishte shkuar shumë mirë. Po, atë natë Avdyli kishte dalë për t’u takuar me disa persona që t’ua shiste një veturë.

Mirëpo, duket se biznesi nuk i shkoi mirë. Që nga ajo ditë ai për familjen nuk u bë më i gjallë, të cilët edhe e raportuan në polici si të zhdukur.

Ata nuk morën asnjë informacion rreth djalit të tyre, deri ditën kur morën lajmin e hidhur për vdekjen e tij. Ai u gjet i vdekur në veturën e tij nga një bashkëfshatar. E ndonëse kanë kaluar më shumë se një muaj prej këtij ndodhie, policia ende nuk ka mundur që ta zbardhë këtë rast misterioz.

Por, ky nuk është i vetmi person i zhdukur gjatë këtij muaji. Pothuajse çdo ditë në raportin 24 orësh të policisë raportohet për persona të zhdukur.

Vetëm gjatë kësaj jave, në vend kanë ndodhur katër raste të tilla, numër ky që për tërë shtatorin arrin në 10 raste të tilla. Në shumicën e këtyre rasteve, personat e zhdukur kanë qenë të gjinisë femërore.

Deri më tani, një prej këtyre personave është gjetur, derisa për fatin e personave të tjerë ende nuk dihet asgjë. Familjet e tyre vazhdojnë të jetojnë me ankth, e nuk kanë as edhe një informacion nëse familjarët e tyre po frymojnë.

Edhe gjatë vitit të kaluar, numri i këtyre rasteve ka qenë shumë i lartë.

Në Policinë e Kosovës i kanë thënë Gazetës Express se vetëm për periudhën janar-prill të këtij viti, janë raportuar 56 persona të zhdukur.

Për secilin muaj gjatë kësaj periudhe nga familjarët janë raportuar 15 të zhdukur.

Numër të lartë të personave të zhdukur po del të ketë pasur edhe në periudhën e njëjtë gjatë vitit të kaluar. Madje, krahasuar me vitin e kaluar, këtë vit numri i rasteve të zhdukjeve është ulur për rreth 20 raste.

Sipas statistikave që ka siguruar Gazeta Express nga Policia e Kosovës, gjatë vitit 2017, në vend janë raportuar 76 persona të zhdukur, disa prej të cilëve pas disa ditësh janë gjetur të vdekur.

E në polici thonë se në shumicën e rasteve personat që raportohet si të zhdukur janë të moshave të reja, ndërsa për nga gjinia e të zhdukurve thonë se dominojnë vajzat.

Madje, deklarojnë se në shumë prej rasteve vajzat ikin për të shkuar tek të dashurit e tyre, e për ditë me radhë nuk u lajmërohen familjeve dhe për këtë arsye raportohen si të zhdukura.

Derisa thonë se pas disa ditësh vetë familjarët raportojnë në polici se të njëjtat janë gjetur. Ndërkohë, qytetet në të cilat ndodhin më së shumti raste, sipas raportit 24 orësh të Policisë së Kosovës, mbeten Prizreni, Istogu, Mitrovica, Peja dhe Shtimja. /Gazeta Express.