Sapo është zbuluar informacioni i shekullit!

Misteri i piramidave të Egjiptit po vazhdon të tundojë mendjet e shumë shkencëtarëve. Së fundi, hulumtuesit kanë dalluar një hapësirë të madhe të zbrazët brenda trupit të njërës prej piramidave të Gizës në Kajro të Egjiptit, që mund të ndikojë në zgjidhjen e misterit të piramidave

Hapësira 30 metërshe është në zemër të piramidës dhe bashkon varret e mbretit dhe mbretëreshës, dhe qartazi hapësira ose dhoma e pazbuluar deri më tash nuk është e qasshme dhe nuk dihet çfarë ka brenda saj.

Zbulimi i kësaj hapësire brenda piramidës është bërë përmes një teknologjie që depërton me imazhe brenda piramidës ngjashëm me rrezet X, por në mënyrë shumë më efikase.

Ky zbulim është cilësuar si më i madhi i bërë lidhur me piramidat që prej shekullit 19. Edhe pse nuk dihet me siguri se për çfarë është përdorur, dhoma mund të sqarojë mënyrën e ndërtimit të piramidës, gjë që edhe më tutje ka mbetur mister.

Dhoma e zbuluar është 30 metra e gjatë, 8 e lartë dhe ka vëllim prej 600 kubikësh, gjë që sugjeron se mund të jetë përdorur për lëvizjen brenda piramidës të blloqeve të mëdha të gurit.

Metoda e ndërtimit të piramidës vazhdon të jetë mister edhe pas 4500 vitesh, prej kur datojnë piramidat sipas të dhënave të gjetura nga egjiptianët e lashtë.

Apostolova kritikon ashpër qeveritarët: Të tërhiqet vendimi për paga dhe të pritet miratimi i ligjit

Shefja e zyrës së BE-së në Prishtinë, Natalia Apostolova, e ka kritikuar ashpër vendimin për rritje të pagave për zyrtarët qeveritarë, të cilin e mbështeti Gjykata Kushtetuese, duke pretenduar se nuk janë gjetur shkelje. Kjo situatë, për Apostolovën, është në kundërshtim me qëllimet e tyre ndaj administratës publike të Kosovës. Qeveritarëve u janë rritur pagat deri në 100 për qind

Kryeministrit të Kosovës, Ramush Haradinajt, i ka shkuar në favor Kushtetuesja, kur vendosi që pagat të cilat vendosën të rriten muaj më parë por që u pezulluan, të procedohen tutje dhe të dalin në rritje.
Por, ky vendim, i cili mori kritika të shumta nga opozita por edhe shoqëria civile, ka indinjuar edhe Bashkimin Evropian.

Shefja e zyrës së BE-së në Kosovë, Natalia Apostolova, ka thënë për Gazetën Express se vendimi i rikthyer “ad hoc” për pagat është në kundërshtim me qëllimet e tyre të përbashkëta për ta bërë administratën publike të Kosovës më të barabartë, meritore, koherente dhe llogaridhënëse.

“…andaj dhe duhet të tërhiqet dhe të pritet miratimi i ligjit të ri për pagat”, është shprehur ajo.

Apostolova ka shprehur keqardhjen që më 12 qershor, Qeveria riktheu vendimin e saj për rritje ad hoc të pagave për anëtarët e kabinetit, këshilltarë të caktuar, disa nëpunës të lartë civilë dhe stafin mbështetës të kabinetit qeveritar.

“Shpreh keqardhjen time për këtë vendim, pasi që përgatitja e Projektligj për Pagat është në proces e sipër. Ky ligj do të rregullojë një herë e përgjithmonë pagat që paguhen nga buxheti i Kosovës me kritere objektive dhe të drejta. Ky ligj është pjesë e procesit të reformave në administratën publike e të cilin BE-ja e mbështet”, ka sqaruar ajo.

Gjykata Kushtetuese ka konstatuar se në vendimin e Kryeministrit nuk janë gjetur shkelje për rritjen e pagave. Kësisoj, ky vendim nuk i ka dalë të jetë i favorshëm vetëm për qeveritarët. Po aq i favorshëm është edhe për kryetarin e Kushtetueses, sikurse edhe për zyrtarët e këtij institucioni.

Vuçiq: Nëse duan biseda për kufij, nuk kam pse të shkoj në Bruksel

Kryetari i Serbisë Aleksandar Vuçiq nuk i ka pritur mirë deklarata e zyrtarëve të Kosovë e sidomos ato të presidenti Hashim Thaçi se në Bruksel do të bisedohet edhe për kufijtë Kosovë – Serbi, transmeton Koha.net

Pas këtyre deklaratave, Vuqiq thotë të ketë ftuar njerëz në Bruksel dhe se atyre u ka thënë se nëse këto janë qëndrime të politikanëve kosovarë, atëherë të mos humbasim kohë dhe unë të mos vij, ndërsa ata më thanë të lutëm eja dhe të bisedojmë”.

“Nëse mendoni se ka grushte që më detyrojnë t’i dëgjoj deklarata e Thaçit dhe të tjerëve, mos më thërrisni. Nuk jam i fascinuar me këto ide dhe nuk frikohem. E keni gjetur njeriun e gabuar për presione, prandaj të mos humbasim kohë. Nëse jeni të gatshëm për kompromis, këtu jam. Serbia nuk do të flasë, por nëse mendoni se mund të bisedoni me ne në mënyrë të tillë, do të shkojmë dhe do t’ju falënderojmë shumë mirë, e së pari t’i përmbushni marrëveshjen e Brukselit”, ka citon Beta të ketë thënë Vuçiq.

Hashim Thaçi dje ka theksuar se në takimin më të ri me kryetarin serb Aleksandar Vuçiq, do të bisedojë për kufijtë ndërmjet Kosovës e Serbisë.

E djathta ekstreme nuk do ta zhbëjë BE-në, por…

Evropa bëhet gati për betejën më të fundit: zgjedhjet për parlamentin europian të Majit 2019. Partitë populiste do të përpiqen të marrin më shumë pushtet në BE pas përparimit që panë në vitin 2014. Ngjarjet dramatike që kemi dëshmuar dy javët e fundit në Gjermani e Itali janë si parashikim i asaj që pritet në vazhdim

Thuhet shpesh se partitë nacionaliste, të vëna kundër sistemit aktual, kanë si qëllim të shpërbëjnë projektin e BE-së. Por rreziku më i madh tani është përpjekja e tyre për ta tërhequr drejt qëllimeve të veta. Çështja e emigrimit është pikënisja e një lufte kontinentale për pushtet, që vë përballë njëra-tjetrës dy kahe të ndryshme parimore që duhet të mbajnë Europën të bashkuar. Njëri kah ka parime liberale demokratike, bazuar në idenë e një shoqërie të hapur; tjetri është jo-liberal dhe jo-tolerant, bazuar në mendësinë e vetë-fortifikimit. Kjo ka pasoja ndërkombëtare. Drejtuesit në Uashington e Moskë, të cilët janë kundër BE-së, duan të përfitojnë nga rrëmuja, ndaj luajnë rolin e tyre nxitës.

Qershori i vitit 2018 e ka tronditur rendin liberal të Europës si kurrë më parë. Së pari, shfaqja e forcës në Itali nga e djathta ekstreme ( i pari vend themelues i BE-së që drejtohet nga një qeveri ku mbizotëron e djathta ekstreme), me refuzimin e anijes “Aquarius”, me emigrantë. Më pas, kancelari 31-vjeçar i Austrisë, Sebastian Kurz, i cili qeveris me Partinë e Lirisë, një institucion i krijuar në vitet 1950 nga ish nazistët. Ai njoftoi krijimin e një “aksi vullnetmirë” në Europë, që do të përbëhet nga mendjet e ngjashme populiste në Itali dhe Hungari.

Më pas erdhi sulmi ndaj pushtetit të Angela Merkelit në Berlin. Kancelarja ka tani në ultimatum, dy javë kohë të dhëna nga ministri i saj i brendshëm, Horst Seehofer, udhëheqës i Unionit Social Kristian të Bavarisë, një parti që ka përvetësuar gjithë retorikën e AFD-s për emigrantët. Samiti i BE-së që do të mbahet në fund të këtij muaji, ku pritet të mbizotërojë tema e emigrimit, ka gjasa të kthehet në një kaos të hidhur.

Sikur të mos mjaftonin këto, që përtej Atlantikut, Doald Trump vendosi se kësaj situate i mungonte edhe një nga postimet e tij më provokuese në Twitter. Siç nuk ka ndodhur asnjëherë me presidentët amerikanë, Trump mbështeti rënien e mundshme të Merkelit duke shkruar: “Gjermanët po i kundërvihen udhëheqësve teksa emigrimi trazon koalicionin e brishtë të Berlinit.” Pak më parë Trump kishte mbështetur irredentizmin në Europë duke deklaruar: “Krimea është pjesë e Rusisë sepse njerëzit atje flasin rusisht.” Kush tjetër e ka dëgjuar me shumë qartësi këtë mesazh: ndoshta irredentistët e të djathtës ekstreme hungareze, të cilët ende ëndërrojnë Hungarinë e Madhe, që shkon përtej kufijve të tanishëm? Këtu lejohet një citim nga Yeats: “Gjërat shthuren, qendra nuk mban më. Anarkia përhapet nëpër botë.”

“Aksi”, një term që sjell ndërmend ngjarjet e Luftës së Dytë Botërore, mund të jetë një zgjedhje e pafajshme fjalësh nga Kurz, por ndoshta dhe nuk është. Ekziston një lidhje ideologjike që e bën të ngjashëm me Viktor Orbanin në Hungari, Seehoferin në Bavari dhe me Salvinin në Itali. Po të shihni hartën, duket trajta e një Europe transalpine e danubiane e konservatorizmit dhe nacionalizmit të së djathtës ekstreme. Me afrimin e zgjedhjeve në Bavari, shtetin e fuqishëm gjerman të Seehoferit; me marrjen e presidencës së Këshillit Europian nga Austria më 1 korrik, zonat gjerman-folëse e katolike të Europës duken të vendosura të përcaktojnë debatin për të ardhmen e Europës.

Trump mund të mos jetë në dijeni të simbolizmave të errëta, por jeni të sigurt që Vladimir Putini nuk është i tillë. Disa nga këto forca politike kanë shenja të qarta afrimiteti me drejtuesin e Rusisë. “Partia e Lirisë” në Austri, për shembull, ka pasur partneritet zyrtar me partinë “Rusia e Bashkuar” të Putinit, dhe ka bërë vazhdimisht thirrje që të hiqen sanksionet e vëna nga BE, njësoj siç ka bërë dhe Seehoferi. Ndërkohë, në mes të ekstravagancës së botërorit të futbollit, thuhet se Putini po pret një telefonatë nga Uashingtoni për të organizuar një takim me presidentin amerikan Trump, takim që Kurz do të donte ta organizonte në Vjenë.

Ajo që Seehofer, Orbani dhe të tjerët duan të bëjnë bashkërisht, është rrëzimi i vlerave të rendit liberal brenda BE-së. Duan ta riformojnë sipas besimeve të tyre kristiano-konservatore, të bazuara në idenë e nacionalizmit. Duan ta bëjnë Perëndimin të duket sikur është duke u sulmuar nga njerëz jo të bardhë e myslimanë, sikur po kërcënohet nga migrimi. Ky është vizioni që përdori dhe Trump në fjalimin e vitit 2017, në Varshavë.

Ata nuk duan ta ndajnë Europën, por ta marrin nën kontroll. “Aksi” do të zgjerojë degët në qeverinë e Polonisë, të drejtuar nga populistët, si dhe në disa pjesë të Ballkanit. Këta njerëz mund të mos bien dakord për gjithçka (për shembull Salvini kërkon plane për zhvendosjen e refugjatëve në BE, gjë që Orbani e refuzon) por interesat e tyre janë të rreshtuara aq mirë sa ta përdorin këtë çast për të nisur një sulm të përbashkët kundër institucioneve të BE-së.

“Aksi” ka si synim të heqë qafe Merkelin dhe të vërë nën kontroll “Partinë Popullore Europiane” (PPE), e cila ka mbizotëruar parlamentin europian për shumë vite, dhe që përbëhet nga forcat e djathta. PPE ka qenë si një mjet ndihmës për hegjemoninë e Merkelit në BE gjatë këtyre viteve, dhe është një prej arsyeve që Merkel ka refuzuar të marrë masa kundër Orbanit dhe partisë së tij, Fidesz.

Këta drejtues po bashkohen, po përpiqen të marrin BE-në që njohim e ta fusin në dorën e nacionalistëve populistë. Merkeli është shënjestra e parë e një përpjekjeje me synime shumë më të mëdha. Dhe mos u gënjeni nga fjalët e një Parlamenti Europian të pafuqishëm: nuk ka rëndësi nëse populistët marrin kontrollin, sepse vendimet ligjore në parlament merren në mënyrë të përbashkët, përkrah Këshillit të Ministrave.

Orbani, që flet më hapur nga të gjithë, e bëri shumë të qartë strategjinë në një fjalim të javës së shkuar. Ai sugjeroi se PPE duhej të ndryshonte, nëse donte të mbijetonte. Ai madje kërcënoi se do të ngrihej një formacion politik anti-emigrim, me shumë vende të BE-së në përbërje, nëse PPE nuk është gati të rinovohet me këto kushte. Çfarë mbetet për t’u bërë? Presidenti francez, Manuel Makron, e ka joshur që tani Kurzin në pallatin Elize, edhe pse është me të djathtën ekstreme. Makroni u takua me Merkelin të martën në një kështjellë në veri të Berlinit, ku diskutuan një plan për konsolidimin e Eurozonës. Nga Europa nuk vijnë vetëm lajme të këqija. Spanja ka një qeveri të re të qendrës së majtë. Ekonomia e BE-së është duke u përmirësuar dhe sondazhet kanë treguar se mbështetja mes qytetarëve është rritur.

Por për mendjet demokratike nëpër Europë, kjo është koha për të bërë një zgjedhje të qartë. Nuk është e thënë të jesh i fiksuar me historinë që të dish se kur “bisha e ashpër kërruset, më në fund i ka ardhur ora” (prapë Yeats), ndaj forcat kundër së djathtës ekstreme duhet të bashkohen.

Përplasjet e të majtës ekstreme me ata të qendrës janë kthyer në diçka që duket si formë hutimi. Kritikat për deficitet demokratike të institucioneve të BE-së, tani për tani janë ekzagjerime për zhurmë. Le të mbrojmë atë që kemi. Më 14 Qershor, në Parlamentin Europian, e majta ekstreme dhe e djathta ekstreme votuan bashkërisht kundër rezolutës që kërkonte lirimin e të burgosurve politikë në Rusi. A do të kishin votuar të dyja palët kundër lirimit të fëmijëve emigrantë që mbahen në kafaze nga Amerika e Trumpit? Disa njerëz duhet t’i qartësojnë përparësitë e tyre para se të jetë shumë vonë.

/Natalie Nougayrède, the Guardian,

Top Channel

Dredhitë e popit Sava Janjić

Nga Daut Dauti

Sava Janjić është kroat i lindur në Dubrovnik i cili në rininë e tij u konvertua në budist. Por, më vonë atij i pëlqeu më shumë ortodoksizmi serb në të cilin religjion u konvertua duke marrë rolin e popit.

Që nga mesi i viteve të 90-ta ai e kuptoi rëndësinë e internetit dhe filloi me propagandën e tij nacionaliste serbe nga pozita e religjionit ortodoks serb. Depërtoi lehtë në mediat e Perëndimit të cilat e quajtën ‘Cyber Monk’.

Para disa ditësh popi Sava Janjić i nxorri disa fotografi të vjetra të Manastirit të Deçanit. Mediat tona joprofesionale dhe disa individë u fascinuan duke i kuptuar këto fotografi si ‘fakt’ se Janjić po e vërteton origjinën shqiptare të Manastirit të Deçanit.

Qëllimi i popit Janjić është tërësisht ndryshe. Këto fotografi dhe disa informata të cilat ai i huazon nga libri i Edith Durhamit ‘Through the Land of the Serbs’ tenton që t’i keqpërdorë qëllimisht.

Qëllimi i popit është që t’i tregoj botës së shqiptarët në atë kohë kanë qenë në pushtetin politik otoman por shpirtërisht, një pjesë e konsiderueshme e tyre, kanë qenë nën pushtetin religjioz të Kishës Ortodokse Serbe. Kjo është një situatë e vdekur të cilin popi dëshiron ta ringjallë në sytë e Evropës. Megjithatë, këtë karrem po e hanë disa nga mediat tona.

Mbi 7 mijë maturantë nuk e kaluan testin e maturës

Provimin e maturës shtetërore këtë vit e kanë kaluar 73.3 për qind e maturantëve që i janë nënshtruar testit, raporton Koha Ditore

Burime të gazetës brenda Ministrisë së Arsimit, Shkencës dhe Teknologjisë (MASHT) kanë thënë për “Kohën Ditore”se testin e maturës nuk e kane kaluar mbi 7 mijë maturant.

Vitin e kaluar kalueshmëria në këtë provim shtetëror ka qenë 83.5 për qind. Provimi i maturës shtetërore këtë vit është përcjellë me parregullësi që nga dita e parë e testit i cili sikurse në vitet e kaluara është shpërndarë në rrjete sociale. Rezultatet zyrtare MASHT-i pritet t’i shpallë sot në një konferencë për media.

Serbia “çuditet” përse BE është e hidhëruar me të

Muajin e fundit Serbia merr kritika të ashpra nga Bashkimi Evropian, sepse për një vit i kanë hequr vizat qytetarëve të një numri të madh të vendeve të treta. Edhe pse Brukseli pretendon se me këtë po vështirësohet lufta kundër migrimit ilegal, problemi i vërtetë është se Serbia me heqje të regjimit të vizave po i shpërblen shtetet të cilat nuk e kanë njohur Kosovën si dhe ato të cilat e kanë tërhequr njohjen, shkruan gazeta serbe “Blic”

Se ekziston problemi i madh i politikës serbe ndaj liberalizimit të vizave me vendet e treta ka theksuar sekretari i parë në MPB-në sllovene Boshtjan Shefic, i cili ka thënë se posaçërisht problematike është heqja e vizave për Iranin dhe disa vende afrikane.

Më pas kritikat e ashpra erdhën nga Këshilli i Evropës i cili në raportin e tij ka theksuar se Serbia duhet të përmbahet nga devijimi nga politika e përbashkët e vizave, dhe se praktika e re e pazareve të saj me vendet e treta po shkakton brengosje serioze në Evropë.

Sipas burimeve të “Jutarnji list-it” kroat, për këtë arsye Serbisë mund t’i hiqet regjimi i liberalizimit të vizave nga ana e BE, transmeton Insajderi.com

Gazeta serbe pretendon se kritikat më të ashpra vijnë për shkak të liberalizimit të vizave për shtetasit iranian. Me këtë shtet autoritetet serbe kanë lidhur marrëveshje për liberalizim të vizave në gusht 2017. Prej shtatorit të vitit të kaluar deri sot në Beograd kanë arritur 16.268 shtetas iranian si “turistë”. Mirëpo ata “turistë” më nuk po kthehen në vendin e tyre porse po vazhdojnë nëpër Republika Serpska e tutje për BE.

Për Brukselin, si duket, nuk është i vetmi problem se Serbia me heqjen e vizave po mundëson hyrjen ilegale të imigrantëve në BE por se edhe po i shpërblen vendet të cilat nuk e kanë njohur pavarësinë e Kosovës dhe ato të cilat po e tërheqin njohjen për shkëmbim të liberalizimit të vizave të Serbisë.

Serbia në gusht të 2017 i ka hequr vizat për qytetarët e Indisë dhe Iranit, të cilat e përkrahin Serbinë rreth Kosovës. Me regjimin pa viza është shpërblyer Surinami i cili në tetor të vitit të kaluar ka tërhequr njohjen e pavarësisë së Kosovës dhe dy muaj më vonë fitoi liberalizimin e vizave. Edhe Burundi në shkurt të këtij viti e tërhoqi njohjen dhe në maj fitoi regjimin pa viza nga ana e Serbisë.

Ministri i jashtëm serb Ivica Daçiq ka thënë për këtë gazetë se do të bisedojë me përfaqësuesit e BE.

“Jemi të gatshëm ta rishqyrtojmë vendimin, nëse vërtetë ka probleme. Mirëpo, problemi është diku tjetër. Ata mendojnë se ne po ndikojmë në vendimet e këtyre shteteve për Kosovën. Këtu bëhet fjalë për presion politik dhe deri te anulimi i liberalizimit me siguri nuk do të vjen”, është i bindur Daçiq.

Kosova rrezikon liberalizimin e vizave për shkak të këtyre dy rasteve

Gjykata Themelore në Prishtinë ka lënë 2 vjet të bllokuar një lëndë, që ka të bëjë me krim të organizuar e që përfshin blerjen e 36 hektarëve të Komunës së Prishtinës dhe të Graçanicës, të privatizuar me çmime shumë më të ulëta sesa çmimi real i tregut

Nga viti 2017, kur ishte mbajtur seanca e shqyrtimit fillestar, nuk është mbajtur më asnjë seancë në këtë çështje penale. Në këtë rast janë të akuzuar zyrtarë të lartë, duke përfshirë ish-gjyqtarë, zyrtarë të AKP-së, avokatë, noterë e biznesmenë.

Janë bërë rreth dy vjet qëkur është mbajtur seanca e shqyrtimit fillestar të dytë në rastin ndaj stërnipit të Hasan Prishtinës, biznesmenit Mehmet Prishtina dhe 23 të akuzuarve të tjerë për “Krim të organizuar”, “Shpëlarje parash”, “Nxjerrje të vendimeve të paligjshme gjyqësore”, “Shpërdorim të pozitës zyrtare”, “Falsifikim të dokumenteve” dhe “Grabitje”.

Edhe pse në seancën e mbajtur në tetor të vitit 2017 në Gjykatën Themelore në Prishtinë mbrojtja e 24 të akuzuarve kishte paraqitur kundërshtimet e veta dhe kishte kërkuar që aktakuza të hidhet, që nga ajo ditë palët nuk kanë pranuar asnjë vendim rreth kërkesës së tyre nga gjyqtari i rastit, Beqir Kalludra.

Ky rast fillimisht ishte në duar të gjyqtarëve ndërkombëtarë, mirëpo në vitin 2017 ishte dorëzuar te vendorët dhe ashtu si te ndërkombëtarët edhe te vendorët mbrojtja e të akuzuarve kishte bërë të njëjtën kërkesë, hedhjen e aktakuzës.

Mirëpo, as nga ndërkombëtarët e deri tash as nga vendorët mbrojtja nuk ka marrë asnjë përgjigje, duke bërë që ky rast të mbetet pezull tash e dy vjet.

Zyrtarë të Gjykatës Themelore në Prishtinë nuk japin asnjë arsyetim rreth zvarritjes gati dyvjeçare të këtij procesi gjyqësor.

Edhe pse rasti në fjalë ka të bëjë me “Krim të organizuar”, që është njëra nga veprat e shënjestruara nga gjykatat për liberalizimin e vizave, kjo Gjykatë nuk ka dhënë asnjë detaj për neglizhencën e këtij rasti kaq të madh.

Zëdhënësja e Gjykatës Themelore në Prishtinë, Mirlinda Gashi, nuk ka dhënë ndonjë arsye konkrete rreth zvarritjes së këtij rasti, përveç asaj që shumë shpejt do të vendoset për këtë çështje penale.

Të bindur se Kosova do të bëhet anëtare e Interpolit

Autoritetet në Prishtinë besojnë se Kosova këtë vit do të bëhet anëtare e organizatës policore ndërkombëtare, INTERPOL

Zëvendësministri i Punëve të Brendshme, Izmi Zeka, tha për Radion Evropa e Lirë se institucionet e Kosovës, janë duke punuar dhe duke bërë të gjitha përpjekjet për anëtarësimin e vendit në INTERPOL.
“Është bërë një lobim i mjaftueshëm. Besojmë fuqishme se institucionet e Kosovës do të kyçen në institucionin më të rëndësishme të sigurisë në Evropa, në INTERPOL. Do të thotë se nuk kemi dilema se ketë vit kjo çështje po përmbyllet”, tha Zeka.

“Ne edhe vitin e kaluar kemi pasur mundësi të mira, por duke parë se një numër i shteteve kanë lëvizur në qëndrime, andaj e kemi shtyrë për një vit dhe kështu pra, besojmë që çështja e INTERPOL-it do të përmbyllet”, tha Zeka.

Ndërkohë, zyrtarët e Ministrisë së Jashtme të Kosovës kanë njoftuar se Këshilli Ekzekutiv i Interpolit në Lion të Francës, tashmë e ka vendosur Kosovën në agjendë për t’u anëtarësuar këtë vit në këtë organizatë.
Zëvendësministri, Zeka tha se pas aplikimit për të qenë pjesë e agjendës, procedurat e tjera janë të thjeshta dhe teknike. Megjithatë, shtoi ai, deri në ditën kur pritet të votohet për anëtarësim, institucionet dhe mekanizmat e ndryshme bashkë me aleatët do të lobojnë që Kosova të ketë vota e mjaftueshëm për anëtarësim.

“Kemi biseduar me akterët kryesor, dhe ata janë të gatshme që ta përkrahin Kosovën. Ne jemi fuqishëm afër me mekanizmat ndërkombëtar, me fuqitë që janë të vendosura duke u nisur nga SHBA, Franca, Britania e Madhe dhe shtetet tjera që kanë ndikim, por ne nuk kemi ndalur lobimin”, tha Zeka.

Sipas tij, Serbia e cila është munduar ta ndal inkuadrimin e Kosovës në mekanizma e institucione të ndryshme ndërkombëtare, tashmë nuk e ka ndikimin që mund ta ketë pasur, pasi që shumë shtete janë në anën e Kosovës për ketë çështje..

Edhe kryetari i Komisionit Parlamentar për Punë të Brendshme në Kuvendin e Kosovës, Haxhi Shala beson se Kosova këtë vit do të bëhet anëtare e Policisë Ndërkombëtare apo INTERPOL-it. Ai tha për Radion Evropa e Lirë, se institucionet e Kosovës janë duke punuar në ketë drejtim, por deri në kohën kur do të votohet për anëtarësim, duhet të punohet fuqishëm.

“Është një ekip i cili është duke punuar. Në atë ekip kemi edhe një përfaqësues nga komisioni ynë parlamentar për punë të brendshme. Deri sot, në bazë të punës që po bëhet për lobim në të gjitha institucionet e botës që janë anëtare të INTERPOL-it, unë besoj se Kosova deri në fund të vitit do të anëtarësohet në INTERPOL”, theksoi Shala.

Asambleja e Përgjithshme e Interpolit do të mbahet në nëntor të këtij viti në Emiratet e Bashkuara Arabe. Kosova kishte aplikuar edhe vitin e kaluar për anëtarësim në mekanizmin ndërkombëtar policor, INTERPOL. Ajo ishte futur në agjendën e Komitetit Ekzekutiv të kësaj organizate, në mënyrë që të votohej për pranimin e saj në Asamblenë e Përgjithshme vjetore të kësaj organizate, e cila u mbajt më 17 shtator të vitit 2017, në Pekin. Por, nga pasiguria se do të siguronte votat e mjaftueshme për pranim, kishte tërhequr kandidaturën. Ndërkohë, Palestina dhe Ishujt Solomon ishin pranuar në këtë organizatë.

Zhvillime në prapaskenë për platformën e bisedimeve me Serbinë?

“Ne kemi qëndrimin zyrtar të lidershipit të partisë se platforma aktuale është me mjaft mangësi dhe bie ndesh me parimet kushtetuese. Ne do e vlerësojmë përmbajtjen e platformës, interesin nacional, arritjen e konsensusit politik dhe nuk merremi me emra individësh”, ka nënvizuar Deputeti i LDK-së Naser Rugova

Ka disa ditë që Qeveria ka tërhequr nga Kuvendi i Kosovës, platformën për bisedimet me Serbinë.
Partitë opozitare e kanë vlerësuar si të mangët këtë platformë dhe nuk kanë pranuar që udhëheqës i fazës finale të bisedimeve të jetë Presidenti Hashim Thaçi. Tryezat politike të mbajtura kohëve të fundit kanë pasur për qëllim edhe gjetjen e një marrëveshje lidhur me dialogun, mirëpo ende nuk është gjetur një zgjidhje adekuate. Në anën tjetër, është vlerësuar se Qeveria aktuale është e varur nga Presidenti Thaçi.

Zhvillime në prapaskenë?

Në një prononcim për gazetën “Bota sot”, analisti politik Lirim Zorra, ka vlerësuar se mënyra e qasjes së pozitës dhe Presidentit ndaj opozitës në rast ka qenë jo e mirë. “Kjo besoj se ka qenë më shumë qasje jo korrekte që presidenti në këtë fazë ta marrë udhëheqjen e bisedimeve kur në vitet paraprake gjithmonë qeveria dhe kryeministri e kanë udhëhequr. Unë po ashtu nuk besoj se qeveria do të bjerë për këtë platformë pasi kemi disa zhvillime në prapaskenë nga ana e ambasadorit amerikan i cili synon ta bind Isa Mustafën për votën pro të LDK-së. Kjo po ashtu është duke ndodhur me vizita private në shtëpinë e kryetarit të LDK-së, mirëpo besoj që një kompromis midis LDK-së dhe qeverisë mund të gjendet në atë që LDK-ja pajtohet ta jap votën për të mirën e “shtetit të Kosovës” , ndërsa në anën tjetër qeveria dhe partnerët e saj pajtohen me një datë për zgjedhje të parakohshme të cilat i synon LDK-ja. Andaj në këtë formë besoj se mund të zhvillohen ngjarjet rreth platformës dhe zgjedhjeve të parakohshme”, ka thënë analisti Lirim Zorra.

Platforma aktuale është me mjaft mangësi

Mirëpo, këtë e ka demantuar Naser Rugova, Deputet i Lidhjes Demokratike të Kosovës, duke thënë se në parti nuk e kanë diskutuar mundësinë që LDK t`i thotë po platformës në këmbim të datës së zgjedhjeve.
“Mund të them me përgjegjësi se kjo çështje në GP të LDK nuk është diskutuar. Ne kemi qëndrimin zyrtar të lider shipit të partisë se platforma aktuale është me mjaft mangësi dhe bie ndesh me parimet kushtetuese. Ne do e vlerësojmë përmbajtjen e platformës, interesin nacional, arritjen e konsensusit politik dhe nuk merremi me emra individësh”, ka nënvizuar Rugova.

Kurse, opinionisti Nexhat Haziri, ka thënë për “Bota sot” se refuzimi i të ashtuquajturës platformë e qeverisë për bisedimet me Serbinë që është kundërshtuar nga opozita dhe e cilësuar si gjithçka tjetër, përveç platformë jo, në rast të refuzimit të saj në Kuvendin e Kosovës, do të krijoj një ngërç politik dhe institucional.

“Vazhdimi i punës së Qeverisë i konvenon vetëm Thaçit”

Sipas tij, pikërisht kjo përbën një arsye të fortë për rrëzimin e qeverisë Haradinaj. “Kurse, sa i përket rolit të presidentit Thaçi në funksionimin e kësaj qeverie, mendoj se vazhdimi i saj i konvenon vetëm Thaçit, pasi ai duke parë një kryeministër të dobët dhe të papërgatitur e të pa dije në qeverisje dhe politik-bërjen për postin që e mbanë. Pra, këto mangësi të Haradinajt përbejnë avantazhe për Thaçin që ti forcoj pozitat e tij të vendimmarrjes edhe përtej kompetencave që i parasheh kushtetuta e vendit si president. Andaj, Thaçi do mundohet më të gjitha mjetet që ta mbajë në pushtet Haradinajn, dhe koalicionin qeverisës”, ka thënë opinionisti Haziri.

Ndërsa, politologu Faik Krasniqi ka thënë se dialogu me Serbinë është një çështje që i takon gjithë spektrit politik dhe popullit të Kosovës, dhe çdo kompromis me Serbinë do të thotë rrezikim i sovranitetit të Kosovës.

Kjo qeveri është me bazë kriminale

Deputetja e Kuvendit të Kosovës nga radhët e VV-së, Drita Millaku, ka thënë për gazetën “Bota sot”, se arsyet për rënien e qeverisë tashmë janë të shumta. “Mendoj se kjo qeveri është me bazë kriminale dhe me parime mafioze gjë që do të jetë vështirë rrëzimi i qeverisë, për shkak të rënies së logjikës demokratike dhe atë në baza reale. Nuk ka asnjë arsye të qëndrojë kjo qeveri dhe thënë realisht rënia e qeverisë do të shkonte në dobi jo vetëm të shtetit të Kosovës por edhe të vet partive të koalicionit për të mos vazhduar me gabime”, ka thënë deputetja Millaku.

Njohësi i çështjeve juridike e politike Blerim Burjani, ka thënë se ka shumë arsye për të shkarkuar këtë qeveri të dëmshme me përplot skandale. Sipas tij, për të rrëzuar këtë qeveri megjithatë kërkohet mocion, dhe duhet pas numrat për të ndal këtë qeveri zhvatëse, dhe duhet të plotësohen kriteret ligjore e sidomos ato kushtetuese për të ndal edhe më tutje skandale të pakuptimta.

“Pra duhet ndaluar një varg vendimesh amatoreske në mungesë të profesionalizmit dhe një kabineti të mirëfilltë ka bërë që të ketë vendime të kësaj natyre të pa pranueshme, pasi kjo qeveri dhe ky mandatar është i shlyer nga ndjenja morale dhe ligjore”, ka thënë njohësi i çështjeve politike dhe juridike Burjani.