Sulmohen me gurë, vezë e shishe Ismajl Kurteshi dhe Ruzhdi Jashari

Lëvizja Vetëvendosje, përmes një komunikate për media, ka thënë se “sonte, rreth orës 20.00, persona të panjohur kanë sulmuar me gurë, vezë dhe shishe deputetin e Kuvendit të Republikës së Kosovës dhe Drejtuesin e Shtabit Qendror të Lëvizjes Vetëvendosje, Ismajl Kurteshin, kandidatin për kryetar të Shtimes, Ruzhdi Jashari dhe disa aktivistë dhe simpatizues”

“Ata u sulmuan pas përfundimit të tubimit të Lëvizjes vetëvendosje në fshatin Caralevë të Komunën e Shtimes, që qëllon të jetë dhe fshati i kryetarit aktual të Komunës së Shtimes”, thotë VV në këtë reagim.

Sipas VV-së, aktivisti Arbër Krasniqi ka marrë lëndime nga sulmi që është kryer para pranisë së zyrtarëve të policisë, “jo më larg se 5 metra prej tyre”.

Lëvizja Vetëvendosje ka ftuar organet ligjzbatuese që të ndërmarrin urgjentisht veprime për zbulimin dhe dënimin e sulmuesve.

“Këto sulme që shpërfaqin panikun e pushtetit lidhur me fuqizimin e Lëvizjes Vetëvendosje në Komunën e Shtimes dhe kudo në Republikën e Kosovës nuk do të mund ta ndalin vullnetin popullor për ndryshimin e madh politik, të filluar më 11 qershor dhe që do të masivizohet edhe më shumë në rezultatin e zgjedhjeve të 22 tetorit”, përfundon VV reagimin e saj.

Operacioni “Trëndafili i erës”/ Si Habilajt mbushën Italinë me armë dhe drogë (video)

Mediat italiane e kanë konsideruar “një organizatë të vërtetë kriminale dhe mafioze të trafikut të drogës dhe armëve”

Nga një kërkim në mediat kryesore të vendit fqinj që të gjitha i kanë dhënë hapësirë operacionit të “Guardia di Finanza” që vuri në pranga 3 shqiptarët Moisi Habilaj (39 vjeç), Maridian Sulaj (29 vjeç) dhe Fatmir Minaj (55 vjeç). Në fakt urdhër-arrestet kanë qenë 11, citon lapsi.al. Përveç 3 shqiptarëve, në pranga janë vënë edhe 4 italianë ndërsa persona të tjerë, identiteti i të cilëve nuk dihet për të cilët është lëshuar një mandat kërkimi ndërkombëtar.

“Trëndafili i erës”

Pikënisja e arrestimeve ka qenë një operacion i koduar “Trëndafili i erës” ku u sekuestruan 20 mijë euro të thata. Nga hetimet doli në dritë se kjo bandë në vitet e fundit kishte arritur të trafikonte në Itali armë dhe drogë në sasi të mëdha. Llogariten deri në 3.5 ton marijuanë e sekuestruar në disa operacione ku janë vënë në pranga të pakton 20 korrierë. Policia italiane sekuestroi edhe shumë armë kallashnikov dhe qindra municione. Agjentët italianë zbuluan se droga do të shpërndahej në rrugët dhe sheshet e Katanias. Vlera e saj në treg ishte rreth 20 milonë euro.

Në maj 2015 mjetet detare të trupës së Mesinës dhe Komandës Operative Aeronavale interceptuan në afërsi të Riposto, një peshkarexhë që ishte nisur nga brigjet shqiptare në bordin e së cilës u zbuluan 900 kg marijuanë, 2 armë kallashnikov me karikatorë dhe qindra municione.

Si funksiononte banda

Për të zbardhur se si funksiononte kjo bandë janë përdorur metodat speciale të hetimit me përgjime telefonike dhe ambientale. Nga hetimet ka rezultuar se nga anëtarët shqiptarë të kësaj organizate, fitimet kryesore i merrte Moisi Habilaj dhe dy bashkëpunëtorët e tij, Maridian Sula dhe Fatmir Minaj. Ndërkohë, për anëtarët italianë të organizatës, kryesor është cilësuar. Antonio Riela, i cili ka pasur edhe precedentë të mëparshëm penalë me klane mafioze të trafikut të ilaçeve. Mediat italiane shkruajnë se 4 personat e shpallur në kërkim besohet se janë shqiptarë për të cilët i është kërkuar policisë shqiptare arrestimi dhe ekstradimi. Sipas të njëjtave burime në hetime është përfshirë edhe antiterrorizmi për shkak se ky rrjet i trafikut kishte në fokus të tij edhe armët.

Haradinaj: Jemi të gatshëm të marrim përgjegjësitë në luftimin e korrupsionit

Kryeministri i Kosovës, Ramush Haradinaj, ka mbajtur sot një koktej, për të kremtuar Marrëveshjen për programin e Korporatës së Sfidave të Mijëvjeçarit (MCC), program ky prej të cilit Kosova ka përfituar 49 milionë dollarë

Haradinaj ka falënderuar Shtetet e Bashkuara të Amerikës për mbështetjen e vazhdueshme për Kosovën. “Personalisht, jam i kënaqur që pjesë e detyrave të mia është edhe zbatimi i projektit nga populli amerikan për popullin kosovar. Dua të falënderoj të gjithë ata që ishin pjesë e këtij projekti dhe bënë punën e tyre që ne të festojmë sonte”, ka thënë kryeministri.

Haradinaj ka theksuar se do të punohet çdo ditë, për të dëshmuar përkushtimin e Qeverisë në përmirësimin e jetës së qytetarëve, bën të ditur një njoftim nga Qeveria.

“Kosova është duke bërë përpjekje për të forcuar sundimin e ligjit, duke zgjeruar reformat në gjitha sferat e jetës sonë. Kosova është e gatshme të marr përgjegjësitë e veta, jo vetëm me forcimin e sundimit të ligjit, por edhe në luftimin e korrupsionit. Jemi të gjithë si ekip, dhe besoj se do ta dëshmojmë këtë përkushtim çdo ditë pune”, ka shtuar ai.

SHBA prezanton raketën që kap predhat balistike me shpejtësi ekstreme

Shtetet e Bashkuara kanë testuar një nga raketat më të përparuara, “Standard Missile-6”, e cila u testua jashtë brigjeve skoceze. Raketa synon mbrojtjen ndaj kërcënimeve balistike nga shtete të caktuara

“Detarët e marinës amerikane në bordin e USS McFaul (DDG 74) testuan me sukses një raketë Standard 6 (SM-6),” tha Flota e Gjashtë në një deklaratë, duke theksuar se testi nuk ishte pjesë e stërvitjeve “Formidable Shield”.

Raketa SM-6 e Raytheon është projektuar për të kapur predha balistike që zbresin drejt objektivave nga atmosfera e sipërme me shpejtësi ekstreme.

Ajo mund të vendoset në instalimet e lëshimit të tokës “Aegis Ashore” ose në anijet luftarake të pajisura me “Aegis”. Sipas prodhuesit, ajo është “raketa e vetme” e cila mund të përdoret në luftën anti-ajrore dhe anti-sipërfaqësore, duke ruajtur përdorimin e saj për “mbrojtje raketore balistike terminale me bazë detare”.

Kjo do të thotë se raketa mund të përdoret për të kundërshtuar kërcënimin në rritje nga programet bërthamore dhe raketore të Koresë së Veriut, pasi Pheniani vazhdon të përparojë me shpejtësi teknologjinë e raketave balistike, transmeton oranews.

Testi i së dielës u krye pas fazës së fundit të stërvitjeve të Formidable Shield, ku SHBA dhe aleatët e saj praktikuan skenarin e integruar të ajrit dhe të mbrojtjes nga raketat (IAMD) që u përqendrua në mbrojtjen kundër një “objektivi balistik të raketave si dhe tre anti – raketat e lundrimit”.

Përafërsisht 3,300 ushtarakë nga Belgjika, Kanadaja, Danimarka, Franca, Gjermania, Italia, Holanda, Spanja dhe Britania e Madhe po marrin pjesë në stërvitjet e drejtuara nga SHBA në Ishujt Perëndimor të Skocisë.

Haradinaj për Reuters: SHBA’ja të përfshihet në dialogun Kosovë-Serbi

Kryeministri i Kosovës, Ramush Haradinaj, të hënën ka kërkuar nga Shtetet e Bashkuara të Amerikës, aleatit më të madh të vendit të tij, që të përfshihet në bisedimet e ndërmjetësuara të BE-së mes Kosovës dhe Serbisë që kanë për qëllim zgjidhjen e dallimeve

Haradinaj ka thënë se pjesëmarrja e SHBA-së është qenësore për t’i çuar bisedimet përpara. “Roli amerikan është i nevojshëm për paqen”, ka thënë Haradinaj në një intervistë për Reuters. “Rolin e Amerikës në tavolinë e shohim si nevojë thelbësore”.

Bisedimet do duhet përfunduar me njohje reciproke të shtetësisë “mes Kosovës dhe Serbisë”, tha ai.

Haradinaj tha se deri në fund të vitit, qeveria e tij do të nënshkruajë një marrëveshje me kompaninë amerikane të energjisë elektrike “ContourGlobal” për një termocentral 1 miliard eurosh me thëngjill.

Kompania me seli në Nju-Jork ishte e vetmja ofertuese për termocentralin 660 MW që do të zëvendësojë Kosovën A, 40 vjet të vjetër.

Projekti është kritikuar nga ambientalistët, që thonë se Kosova duhet të mbështetet më shumë në burime me energji të ripërtërishme sesa në thëngjill.

“Do të ketë teknologji të pastër të avancuar dhe do të garantojë energji të mjaftueshme për 20 vjetët e ardhshme”, tha Haradinaj në këtë intervistë.

Bushati i përgjigjet Athinës: Ne jemi gati të ndjekim modelin grek për pakicat, nëse ka

Pas “sulmit” diplomatik të Athinës zyrtare një ditë më parë, lidhur me miratimin e ligjit të pakicave kombëtare, ministri për Europën dhe Punët e Jashtme, Ditmir Bushati është përgjigjur duke i kujtuar homologut të tij Kotzias se është kërkuar një model prej tij

“Të gjithë kolegëve, qofshin këta fqinj apo jo, përfshirë edhe Greqinë, gjatë këtyre dy viteve e gjysmë punë që është bërë për hartimin e këtij ligji, i kam kërkuar që të na parashtrojnë gjithashtu eksperiencën e vendeve të tyre. Ne kemi qenë dhe mbetemi të hapur për të studiuar çdo lloj modeli për pakicat, duke përfshirë edhe modelin grek, nëse një i tillë ekziston”, ka deklaruar Bushati.

Kreu i diplomacisë shqiptare i është përgjigjur dhe presidentit grek, i cili e cilësoi “amatorizëm ndërkombëtar” lëvizjen e Shqipërisë. “Amatorizimi kam frikë se duhet kërkuar nëpër kryeqytetet e vendeve të tjera, por kurrësesi në Shqipëri”, ka thënë Bushati.

Por a i druhet Bushati një vetoje greke?

“Nuk kam asnjë arsye as të mendoj, për asnjë çast, e as të besoi që një shtet, qofte ky edhe fqinji ynë Greqia, do të ishte i intersuar për të vendosur veton ndaj Shqipërisë, sepse e kam thënë dhe do ta them, nuk është as në interesin e Greqisë dhe as të Shqipërisë që të kemi të tilla ngjarje, por politika e megafonit ditën e diel duhet t’ia lërë vendin ditës së punës në marrëdhëniet mes dy vendeve tona”, ka shtuar Bushati.

Forcat irakiane hyjnë në Kirkuk

Forcat irakiane kanë hyrë në qytetin e Kirkukut dhe kanë marrë kontrollin e selisë së këshillit provincial, thanë dëshmitarët

Banorët i thanë agjencisë së lajmeve Reuters se forcat irakiane kanë hequr flamurin kurd që është ngritur në ndërtesën e guvernatorit në muajin prill, pranë një flamuri irakian.

Ata thanë se tani valëvit vetëm flamuri i Irakut.

Përleshjet midis forcave irakiane dhe kurde kanë nisur mëngjesin e së hënës.

Ushtria irakiane ia ka mësyrë Kirkukut tri javë pasi rajoni i Kurdistanit ka mbajtur një referendum për pavarësi.

Ushtria synon të rimarrë zonat që i kanë nën kontroll kurdët prejse i kanë dëbuar militantët e Shtetit Islamik nga rajoni.

Banorët e zonave të kontrolluara nga kurdët, përfshirë Kirkukun, e kanë mbështetur fuqishëm ndarjen nga Iraku në referendumin e 25 shtatorit.

Kryeministri i Irakut, Haider al-Abadi, e ka shpallur referendumin jokushtetues, por qeveria rajonale e Kurdistanit ka këmbëngulur se ai është i ligjshëm.

Zyrtarët amerikanë kanë thënë se “janë të angazhuar me të gjitha palët në Irak për uljen e tensioneve”.

Abadi tha të hënën se operacioni në Kirkuk ka qenë i nevojshëm “për të mbrojtur unitetin e vendit, i cili është në rrezik nga ndarja për shkak të referendumit”.

Veseli në Vushtrri: PDK do të fitojë fuqishëm në nivel nacional

Me anë të një dokumentari që pasqyron punën 10 vjeçare të kryetarit të Vushtrrisë nga radhët e PDK-së, Bajram Mulaku, ka filluar tubimi elektoral i kësaj partie në këtë qytet, ku kryetari i PDK-së, Kadri Veseli tha se janë krenar që për 10 vite kanë bashkërrugëtuar, ku PDK ka qeverisur një nga qytetet më të vjetra të Kosovës dhe një nga qytetet më të civilizuara

“PDK do të fitojë fuqishëm në nivelin nacional dhe do të marrë shumicën e komunave, dhe do të fitojë fuqishëm në Vushtrri. Vushtrria është shembull i fuqishëm i qeverisjes së mirë të PDK-së. Qeverisjen e mirë të Vushtrrisë nga Bajram Mulaku, do ta vazhdojmë me Ferit Idrizin”, tha Vesli.

Kurse, kandidati për kryetar të Vushtrrisë nga PDK, Ferit Idrizi, në fjalimin e tij tha se ka përkrah qytetarët e Vushtrrisë, veteranët dhe invalidët e luftës, mësuesit e Vushtrrisë, intelektualët, shoqërinë civile me të cilët u konsultua për programin e tij qeverisës. Ndërsa pohoi se “Kam përkrah bujqit dhe e di se cilat janë problemet e qytetarëve të Vushtrrisë”.

Ai ka falënderuar kryetarin aktual të Vushtrrisë Bajram Mulaku, për të cilin tha se ka qeverisur së bashku me qytetarët.

“Është momenti për ndryshim dhe se ai është forca e ndryshimit. Ne kemi një plan shumë të mirë për katër vitet e ardhshme, plan i cili hap rrugën për investime, siç është parku i biznesit. Objektiv tjetër është ndërmarrësia, do t’i lidhim shkollat drejtpërdrejt me bizneset. Kjo qasje shumë pozitive do t’i hap perspektiven rinisë së Vushtrrisë”, tha Idirzi, raporton KosovaPress.

Fitorja e LDK-së dhe Muhaxherit në Pejë do të jetë e pathyeshme

Kryetari i Lidhjes Demokratike të Kosovës (LDK), Isa Mustafa, ka thënë të hënën gjatë një tubimi madhështor parazgjedhor në zgjidhja e vetme dhe më e mira për qeverisjen e Pejës platforma e LDK-së për zhvillimin ekonomik lokal dhe kryetari Gazmend Muhaxheri

“Jo vetëm anëtarët e simpatizantët e LDK-së, por të gjithë qytetarët e komunës së Pejës, janë dëshmitarë të qeverisjes së mirë e transparente. Pushteti i ardhshëm lokal në Pejë do të qeveriset nga Lidhja Demokratike e Kosovës, do të jetë qeveri lokale e të gjithë qytetarëve, të cilëve do t’u shërbejë, pa asnjë dallim”, ka thënë Mustafa.

Mustafa ka theksuar se Muhaxheri dhe LDK-ja e kanë kthyer Pejën në rrugën e zhvillimit. “Prandaj, ballëhapur u kërkojmë votën pejanëve. Sepse Gazmend Muhaxheri dhe LDK-ja i kanë mbajtur premtimet. Sepse ne i mbajmë premtimet”, ka thënë Mustafa.

Mustafa është shprehur i bindur se qytetarët e Pejës nuk do të lejojnë kthimin e e qeverisjes së para 4 vjetëve, dëmin e së cilës, qeverisja aktuale e Pejës mezi e ka sanuar për katër vjet.

“Qytetarët e Pejës dhe krejt Kosovës, do t’i japin fitoren LDK-së, për t’i çuar në shtëpi ata që premtojnë vendime të mëdha dhe vetëm e izolojnë Kosovën dhe për ata që i dhunojnë e i gjuajnë institucionet e Republikës së Kosovës”, ka thënë Mustafa, duke u shprehur i bindur se LDK-ja, do të dalë subjekti më i madh politik më 22 tetor dhe do të fitojë shumicën e komunave të Kosovës.

Mustafa u ka bërë thirrje pejanëve që më 22 tetor të dalin masivisht në zgjedhje dhe përmes kulturës demokratike të vendosin për qeverisjen e drejtë e transparente që ofron LDK-ja dhe Gazmend Muhaxheri.

Kryetari aktual i Pejës dhe kandidati i LDK-së për kryetar të ardhshëm të kësaj komune, Gazmend Muhaxheri, ka thënë se falë fitores së LDK-së në zgjedhjet e kaluara, sot në Pejë, të gjithë punojnë të lirë, pa frikën se do t’i zhvasin dhe pa barrën e papërballueshme të haraçit.

“Në këto 4 vjet, qyteti është modernizuar çdo ditë e më shumë, ndërsa fshatrat, nga investimet dhe punët që kemi bërë bashkë me të gjithë qytetarët, tani duken krejt ndryshe”, ka thënë Muhaxheri, sipas të cilit, do të vazhdojnë investimet në qytet dhe fshatra.

“Do të ndriçohen të gjithë fshatrat. Rugova do të jetë qendra më e madhe e turizmit në Kosovë, sepse ne, brenda 2-3 viteve të ardhshme, do të finalizojmë gjithë infrastrukturën e fashtarve të Rugovës. Radaci, burimi i Drinit të Bardhë, e krejt Podguri do të jenë destinacion i zgjedhur për turistët. Brenda javësh, do ta fillojmë “Borean”, projektin jetik për Pejën dhe për krejt Dukagjinin, në të cilin do të punësohen menjëherë 500 persona dhe numri do të rritet deri në 8 mijë të punësuar”, ka thënë Muhaxheri.

Ai ka thënë se “Borea”, do të jetë resursi që do ta zhvillojë Pejën në dekadat e ardhshme. “Prandaj po na sulmojnë për “Borean, sepse kundërshtarët tanë janë kundërshtarë të Pejës së zhvilluar”, ka thënë Muhaxheri, duke shtuar se kundërshtarët e Borea-s duan që Peja të mos zhvillohet, në mënyrë që ata të mund t’i sundojnë më lehtë qytetarët e saj.

Ai ka kërkuar mbështetjen e qytetarëve të Pejës më 22 tetor, duke theksuar se fitorja e LDK-së e para 4 vjetëve, është e pathyeshme dhe e pakthyeshme.

Ai është zotuar të punojë edhe më shumë në mandatin tjerët, për t’u shpërblyer edhe më mirë qytetarëve të Pejës, pa asnjë dallim përkatësie politike, etnike apo të tjera.

Haradinaj AKP-së: Pallatin e Rinisë kthejani Komunës së Prishtinës

Kryeministri i Republikës së Kosovës, Ramush Haradinaj, priti në takim përfaqësues të Bordit Menaxhues dhe Ekzekutiv të Agjencisë Kosovare të Pronave (AKP) të udhëhequr nga Petrit Gashi, kryesues i Bordit, me të cilët bisedoi për sfidat e menaxhimit të kompanive që janë interes strategjik i vendit

Në këtë kontekst, kryeministri Haradinaj ka kërkuar nga udhëheqja e AKP-së që të nisin procedurat adekuate konform ligjeve në fuqi, që fati i Pallatit të Rinisë në Prishtinë të marrë epilog, përkatësisht që t’u kthehet qytetarëve të Prishtinës, të cilët gjatë viteve ‘70 të shekullit të kaluar kanë paguar vetkontribut për ndërtimin e tij.

Kryeministri Haradinaj kërkoi nga Bordi i AKP-së që të fillojë procedurat ligjore të cilat mundësojnë që për një kohë optimale me Pallatin e Rinisë të menaxhojë Komuna e Prishtinës.

Përveç kësaj, në takim janë shtjelluar dhe janë diskutuar edhe tema shumë të rëndësishme, siç është çështja e Fabrikës së Gypave në Ferizaj, ku palët u dakorduan që gjetja e zgjidhjeve të kënaqshme për të gjithë është jetike për Kosovën.

Përfaqësuesit e AKP-së kanë bërë të ditur se sot ia kanë dorëzuar kryeministrit Studimin e Fizibilitetit (versionin në gjuhën shqipe) për konsolidimin e Trepçës, si kompani ligjore afariste e mëvetësishme.