“Thaçi po paguan 3 milionë euro një kompani, për të lobuar për ndarjen e Kosovës”

Ish-deputeti i Kuvendit të Kosovës, Driton Tali ka deklaruar se sipas një informate që e ka ai nga një diplomat i huaj, Presidenti i Kosovës, Hashim Thaçi do të paguaj 3 milionë euro për të lobuar për ndarjen e Kosovës, ose sic e quan ai korrigjimin e kufirit me SerbinëSipas tij, Presidenti i Kosovës, për idenë e tij për shkëmbim territoresh ka kontaktuar me firmën lobuese “Tony Blair Associates”. E i gjithë pazari për këtë çështje, Tali po thotë se sillet rreth 3 milionë euro

Ky është postimi i tij i plotë:

Miq, shihni sa i pa ftyrë është Thaçi.Sipas një informate të sigurtë, që e kam nga një diplomat i huaj, Thaçi ka kontaktuar me firmën lobuese “Tony Blair Associates” për të lobuar për ndarjen e Kosovës.

Pazari i këtij muhabeti është 3 mil euro.Po e publikojë me qëllim që të digjet paraprakisht kjo iniciativë e ultë e Thaçit.

Thaçi dhe Van der Bellen flasin për marrëveshjen Kosovë Serbi

Presidenti i Kosovës, Hashim Thaçi ka takuar presidentin e Austrisë, Alexander Van der Bellen, në Vjenë, me të cilin kanë diskuatuar me theks të veçantë për arritjen e marrëveshjes përfundimtare ndërmjet Kosovës dhe Serbisë

“Me presidentin Van der Bellen diskutuam për bashkëpunimin ndërmjet Kosovës dhe Austrisë, për liberalizimin e vizave për qytetarët tanë dhe për zhvillimet në Ballkanit Perëndimor, me theks të veçantë për arritjen e marrëveshjes përfundimtare ndërmjet Kosovës dhe Serbisë”, ka shkruar ai në Facebook

Sulm terrorist gjatë një parade ushtarake në Iran

Gjatë sulmit 10 minutësh kanë mbetur 8 të vdekur dhe 20 të plagosur

Bëhet e ditur se një sulm terrorist ka ndodhur gjatë një parade ushtarake në qytetin Ahvaz në jugperëndim të Iranit, transmeton Anadolu Agency (AA).

Së paku tetë ushtarë kanë humbur jetën, ndërsa 20 të tjerë janë plagosur. Sipas të dhënave të para, sulmin e kryen sulmues të veshur me uniforma ushtarake.

Mediat lokale theksojnë se sulmuesit hapën zjarr ndaj forcave të sigurisë. Gjatë sulmit 10 minutësh janë vrarë edhe katër sulmues.

Sulmi është kryer gjatë paradës të organizuar me rastin e Javës së Mbrojtjes në këtë vend. Ende nuk ka njoftim zyrtar lidhur me këtë sulm.

Lavrov: Rusia nuk ndërhyn në punët e brendshme të Maqedonisë

Ministri i Punëve të Jashtme i Rusisë, Sergey Lavrov, i cili qëndron për vizitë zyrtare në Bosnjë e Hercegovinë (BeH), duke komentuar çështjet në lidhje me Maqedoninë, theksoi se “Rusia nuk thotë asgjë që mund të interpretohet si ndërhyrje në punët e brendshme, përderisa udhëheqësit perëndimor atë janë duke e bërë drejtpërdrejtë, qëndrojnë për një zgjidhje në referendumin e ardhshëm”

Ai tha se Federata Ruse është e përkushtuar në respektimin e Marrëveshjes së Dejtonit dhe kundërshton përpjekjet për ta rishikuar atë. Sipas tij, çfarëdo reforme është e mundshme vetëm në bazë të një marrëveshje mes dy etniteteve të barabarta dhe tre popujve.

“Çështja që ka qenë prej kohësh e anashkaluar është çlirimi i BeH-së nga administrata e jashtme dhe se BeH mund të jetë një shtet normal i pavarur dhe sovran që vet zgjedh çështjet për të ardhmen dhe vet merr vendimet. Absolutisht përputhen pikëpamjet tona për Ballkanin. Mendoj për Kosovën, Maqedoninë, Malin e Zi. Ne jemi të bindur se të gjitha ato çështje duhet të zgjidhen për përfitim reciprok dhe në përputhje të të gjithë pjesëmarrësve me pëlqimin e popujve të interesuar. Absolutisht janë të papranueshme që veprimet e lojtarëve të jashtëm, që përpiqen të imponojnë tek popujt e Ballkanit zgjidhjen artificiale ‘ose jeni me ne ose me Federatën Ruse’. Rusia, edhe me Evropën, edhe me SHBA-të, ishte një bashkë-autor i Rezolutës 1244 të Dejtonit dhe nuk shohim pse Rusia duhet të dalë nga ato gjëra dhe Ballkani përsëri të kthehet në një arenë konflikti”, deklaroi Lavrov.

Deklaratën e përfaqësueses së lartë të BE-së, Federica Mogherini, se Ballkani është territor i BE-së, Lavrov e quajti “arrogante dhe në kundërshtim me të drejtën e vendeve të Ballkanit”.

Duke iu përgjigjur pyetjeve të gazetarëve rreth ndikimit rus në Ballkan, presidenti i Republika Srpska, Dodik, tha se mbi të gjitha ai është një njeri që i përket popullit serb, ndërsa e respekton dhe e do Rusinë, por kërkon bashkëpunim me të gjitha fetë dhe kombet e tjera në rajon.

“Ne kemi një qëndrim të përbashkët, përfaqësuesi i lartë duhet të largohet, gjyqtarët e huaj nga Gjykata Kushtetuese e BeH-së që i zgjedh dhe i vendos Perëndimi, si dhe të ndalohet ndërhyrja në punët e brendshme në BeH, nëse dëshiron në të ardhmen të funksionojë si një shtet sovran”, tha Dodik.

Lavrov tha se ishte dakord me atë që tha Dodik.“Ne gjithmonë punojmë hapur edhe në politikën e jashtme, nëse për diçka biem dakord gjithmonë respektojmë detyrimet tona dhe ashtu është edhe me pikëpamjet tona për Dejtonin. Nuk jemi ne ata të cilët janë duke u përpjekur për të ndryshuar dhe nuk jemi ne ata të cilët janë duke u përpjekur për të ruajtur elementet e një protektorati mbi BeH. Ne, në të gjitha nivelet me të gjitha formatet po luftojmë për të ruajtur parimet themelore të Dejtonit. BeH njihet si shtet i pavarur, sovran dhe autonom, ndërsa BeH para 15 viteve ishte anëtare e Këshillit të Sigurimit, ajo që deri më tani Perëndimi e emëron një përfaqësues të lartë këtu, i cili mund të shfuqizojë çdo vendim të arritur në një marrëveshje midis tre popujve, unë mendoj se është e papranueshme”, tha Lavrov.

Pas takimit që kishte në Banja Lukë, ai tha se janë të përkushtuar në zhvillimin e marrëdhënieve në të gjitha fushat. I pyetur nëse Rusia mund të dalë nga Këshilli i Evropës, Lavrov tha se Rusia dëshiron të qëndrojë në këtë Këshill në të cilën ndonjëherë është anëtarësuar.

“Mendoj Këshillin e Evropës, në kushtetutën e të cilës qartë është e shkruar se çdo shtet anëtarë ka të drejtë dhe askush nuk mund të diskriminohet. Në një Këshill të tillë ne jemi të gatshëm të punojmë edhe më tej, gjithçka tjetër varet nga anëtarët e Këshillit të Evropës”, tha Lavrov.

Pas takimit në Qendrën Administrative të Qeverisë së Republika Srpska, Dodik e nderoi ministrin Lavrov me Medaljen Republika Srpska, për punën dhe kontributin e shquar në zhvillimin dhe ngritjen e vetëdijes së popullit serb në luftën për liri dhe pavarësi, si dhe për kontributin në forcimin e marrëdhënieve politike dhe miqësore midis Republika Srpska dhe Federatës Ruse.

Dodik tha se është një nder i madh për atë që Lavrov qëndron për vizitë në Republika Srpska, që është rezultat i një bashkëpunimi të mirë. Ai falënderoi qëndrimin parimor të Federatës Ruse për afirmimin dhe respektimin e Marrëveshjes së Paqes së Dejtonit.

Ai po ashtu hodhi poshtë pretendimet dhe spekulimet rreth ndikimit të keq të Federatës Ruse në rajon dhe përsëriti se Rusia është mik me të cilin Republika Srpska dëshiron t’i zhvillojë të gjitha llojet e marrëdhënieve, nga ekonomia deri në politikë.

“Ne diskutuam arritjet dhe planet. Republika Srpska në të kaluarën nuk ka lejuar që BeH të vendosë sanksione ndaj Federatës Ruse, sepse mendojmë se ajo është e padrejtë dhe ofendon interesat tona themelore”, tha Dodik, duke shtuar se ata diskutuan se si të bashkëpunojnë më tej në çështjen e eksplorimit të naftës së papërpunuar në Republika Srpska dhe ndërtimin e një impianti të gazit në Zvornik.

Sherri me Ngjelën në emision, Panajot Barka ankohet në Athinë: Më rrezikohet jeta

“Grekët janë shqiptarë!” Kjo ishte deklarata e historianes Elena Kocaqi, e cila shkaktoi mjaft bujë. Mediat greke i kanë kushtuar mjaft vëmendje debatit ku u përfshi edhe Spartak Ngjela, dhe Panajot Barka , i cili më pas u largua nga studioja televizive

“Protothema” shkruan duke iu referuar Barkës se shqiptarët janë të rrjedhur dhe ushqejnë ndjenja nacionaliste, ndërsa e quan Spartak Ngjelën si shqiptar me origjinë greke.

“Duke mashtruar, historiania shqiptare Elena Kocaqi thotë: Po çfarë grekësh? Ata nuk janë grekë, por arvanitas që kanë turp të thonë që jemi shqiptarë. Më thoni sa grekë kanë luftuar kundër osmanëve në Greqi?”, shkruan gazeta greke duke akuzuar gjithashtu edhe Spartak Ngjelën.

Siç shpjegoi profesor Barkas, panelistët, të udhëhequr nga moderatori gjetën mundësinë që ta devijonin diskutimin, i cili supozohej të ishte për zhvillimet dhe përsëri ta kufizonte çështjen ndaj marrëdhënieve shqiptaro-greke dhe të shtonte pikëpamjet ekstreme nacionaliste.

“Pastaj u përpoqa të thoja disa të vërteta mbi grekët. Pas kësaj kam marrë shumë kërcënime me jetë dhe fyerje”, shprehet Barka për Protothema.

“Duke përdorur një përzierje të miteve të rreme dhe të folklorit, ata u përpoqën të justifikonin pikëpamjet ekspansioniste. Arvanitët janë grekë që flasin gjithashtu gjuhën arvaneze (jo shqiptarët) dhe nuk kanë lidhje me shqiptarët. Ju nuk do të gjeni një arvanit në Greqi që do të thotë se ai është shqiptar. Unë shpjegova se termi” Shqiptar “është një term i ri i paraqitur në shekullin 18-19 dhe se shqiptarët, jo arvanitasit, u shfaqën në Epir në shekullin e 14 me Stefan Dushanin serb. Territoret që nacionalizmi shqiptar pretendon sot janë territore të ish Perandorisë Osmane, i përkisnin popujve të tjerë. “, citon media greke Barkën.

Gjatë atij emisioni, Barka u largua nga studioja duke marrë pas edhe thënien e Spartak Ngjelës: Ik thyej qafën!

Haradinaj: Nuk di me ju kallxu sa njerëz janë kanë në kafiqa, se në luftë po!

Kryeministri i Republikës së Kosovës, Ramush Haradinaj ishte i ftuar në emisionin Argument Plus Çështja e listave të veteranëve të rremë ishte temë diskutimi për të gjithë, e këtë e diskutoi edhe kryeministri i Kosovës, Ramush Haradinaj duke dhënë mendimin e tij për këtë veprim të vendosjes së veteranëve nëpër lista. Sipas tij të gjithë kanë krijuar përshtypjen se ka pasur shumë më pak ushtarë në luftën për çlirim të Kosovës, sesa ka pasur në të vërtetë

Ai foli për zonën e Dukagjinit ku ishte komandant vetë, duke thënë se shumë nuk e kanë marrë statusin e veteranit edhe pse iu takon, e shumë të tjerë kanë vdekur gjatë këtyre 20 viteve sa nuk është arritur të bëhet klasifikimi i tyre.

Kryeministri krahasoi çështjen e veteranëve me Kroacinë, duke deklaruar se ata paguajnë 500 mijë persona për çmimin e lirisë, e nëse këto pagesa iu duken të larta institucioneve kosovare, atëherë sipas tij të mos i marrin askush, ose të mos lihen jashtë ata që vërtetë kanë luftuar.

Vetëm në zonën e Dukagjinit sipas Haradinajt kanë qenë mbi 50-60 mijë njerëz pjesëmarrës në luftën çlirimtare, duke deklaruar se Dukagjini “kanë luftuar i madh e i vogël”, e këtë e di më së miri ai, pasi se ka lëshuar as edhe një orë Kosovën gjatë kohës së luftës.

“Unë s’di me i kallxu dikujt sa njerëz jon konë në Stankovec, se s’jom konë aty. S’di me t’kallxu sa njerëz jon konë nëpër kafiqa qetu, po unë di me t’kallxu çka ka ndodhë n’Dukagjin”, deklaroi Haradinaj.

Ai përfundoi mendimin e tij duke theksuar se nuk ka arsye të gënjejë për vota, pasi që 20 vite është me 10%.

“Na e kem bo se kem besu në liri, kemi dhonë njerëz. Shkelzeni e Luani s’marrin vota hiç. Nuk e flliqim atë rrugë të lirisë“, ka përfunduar kryeministri Haradinaj.

Thirrje rugovistëve që t`i bashkohen protestës për ta ndalur Thaçin

“Partitë tjera opozitare është dashur t’i bashkangjiten protestës dhe t’i tregojmë pakënaqësitë. Me këtë rast dua t’i bëj thirrje anëtarësisë së LDK-së, sidomos Rugovistëve që të jenë pjesë e protestave dhe ta ndalim një të keqe që po na vjen nga njeriu i shantazhuar siç është Hashim Thaçi. Secili qytetar që ja do të mirën këtij vendi, me datën 29 shtator do të jetë në shesh, është koha e fundit që të ndalet kasapi i Kosovës, përndryshe do të jetë shumë vonë”, ka theksuar deputetja e VV-së, Drita Millaku

Gjendja politike në Kosovë, kapja e institucioneve dhe ideja e korrigjimit të kufijve e presidentit të Kosovës Hashim Thaçi, janë arsyet që Lëvizja Vetëvendosje do të protestojë me 29 shtator në Prishtinë.
Kryetari i kësaj Lëvizje ka bërë thirrje për pjesëmarrje masive në këtë protestë, si qytetarët ashtu edhe anëtarë të partive politike. Sipas tij, skandalet e kryeministrit Ramush Haradinaj dhe të kabinetit të tij, po e dërgojnë vendin në zgjedhje të reja.

“Nga skandalet e shpeshta dhe të shumta të kryeministrit dhe kabinetit enorm të tij na nxjerrin veç se zgjedhjet e reja parlamentare. Qeveria po e bojkoton Kuvendin sepse ajo po e lufton opozitën, krejt kjo nën mbikëqyrjen e kryetarit të Kuvendit. Pushteti në Kosovë e ka braktisur shtet-ndërtimin, ai nuk e do sundimin e ligjit dhe nuk di për zhvillim ekonomik. Prandaj Lëvizja Vetëvendosje me 29 shtator të këtij viti, thërret protestë paqësore e qytetare në Prishtinë në ora 14:00”, tha Kurti.

Ai përmendi idenë e korrigjimit të kufijve në dialogun Kosovë-Serbi, ku sipas tij Thaçi është pa mandat dhe po e zëvendëson Gjermaninë me Rusinë në këtë proces. Lidhur me këtë protestë, për të cilën VV-ja i kishte bërë ftesë Lidhjes Demokratike të Kosovës, kjo parti është shprehur se nuk është koha për protesta tani, derisa kryetari i LDK-së, Isa Mustafa tha se nuk i shohin protestat si mjet kundër korrigjimit të kufijve. E për këtë refuzim të LDK-së, Kurti tha se LDK-ja ka më shumë interesim se sa gatishmëri për protestë, dhe se me kalimin e ditëve do të kuptohet se këto protesta janë të domosdoshme.

Millaku: LDK duhet të na bashkohet në protesta

Në lidhje me atë se çka presin Lëvizja Vetëvendosje nga kjo protestë, deputetja nga radhët e kësaj partie, Drita Millaku, në një bisedë për gazetën “Bota sot”, ka thënë se VV po punon në terren për një protestë masive dhe të qetë, derisa shton se kushdo që do ta prishë protestën, nuk është pjesë e kësaj Lëvizje. “Disponimi i qytetarëve për të marrë pjesë në protestën e 29 shtatorit është i madh. Ne jemi duke punuar në terren dhe besoj shumë për një protestë masive dhe shumë të qetë. Ne jemi duke u angazhuar për një protestë të qetë, shprehem me bindje se secili person që do të tentojë që ta prishë protestën e qetë, nuk i përket LVV-së. Është e mirë se LVV po lufton në dy drejtime në parlament dhe në protesta, dhe besoj shumë që do të kemi sukses”, është shprehur ajo.

Millaku i ka bërë thirrje LDK-së që tu bashkohen në protestë, që ta ndalin presidentin Thaçi dhe të keqen që po vjen nga ai, duke shtuar se është koha e fundit që ai të ndalet. “Partitë tjera opozitare është dashur t’i bashkangjiten protestës dhe t’i tregojmë pakënaqësitë. Me këtë rast dua t’i bëj thirrje anëtarësisë së LDK-së, sidomos Rugovistëve që të jenë pjesë e protestave dhe ta ndalim një të keqe që po na vjen nga njeriu i shantazhuar siç është Hashim Thaçi. Secili qytetar që ja do të mirën këtij vendi, me datën 29 shtator do të jetë në shesh, është koha e fundit që të ndalet kasapi i Kosovës, përndryshe do të jetë shumë vonë”, ka theksuar deputetja e VV-së.

Ajo ka treguar po ashtu se kanë informata që për protestë janë duke u bërë organizime edhe nga diaspora. “Gjithashtu ne kemi informata që është duke u bërë edhe një organizim i diasporës për të jenë pjesëmarrës me 29 shtator”, ka deklaruar deputetja Drita Millaku për gazetën “Bota sot”.

Tahiri: Nuk mund të ketë zgjedhje me protesta

Ndërsa, politologu Ramush Tahiri, duke folur në lidhje me protestën e VV-së, ka thënë se me protesta nuk mund të mbahen zgjedhjet e reja e as të bie qeveria. “Me protesta të organizuara nga partitë politike ne këtë rast nga Vetëvendosje nuk mund të organizohen zgjedhjet e reja parlamentare dhe nuk mund të bie Qeveria. Para se gjithash nga fakti se Republika e Kosovës është shtet demokratik dhe pushteti në të gjitha nivelet dhe qeverisja ndërtohet në bazë të procesit të zgjedhjeve të lira dhe të ndershme”, është shprehur ai.

Sipas tij, Kosova është dhe nën një lloj mbikëqyrje ndërkombëtare dhe pa pëlqimin e tyre nuk mbahen zgjedhjet e nuk rrëzohet qeveria. “Gjithashtu Kosova është në një lloj mbikëqyrjeje ndërkombëtare ku edhe ambasadat e vendeve të jashtme kanë një ndikim të rëndësishëm dhe asnjë palë zgjedhje deri më tash e po ashtu edhe asnjë Qeveri nuk është rrëzuar pa marrë më parë pëlqimin edhe të tyre”, ka vlerësuar Tahiri për gazetën “Bota sot”.

Më pas, politologu thekson se opozita asnjëherë nuk mund të bëjë ndryshime, pa bashkëpunim dhe me partitë në pushtet, siç ka ndodhur deri më tani. “E treta zakonisht partitë opozitare në Kosovë asnjëherë nuk e kanë fuqinë për të bërë ndryshime, për të rrëzuar Qeverinë ose për të provokuar zgjedhjet e parakohshme. Kjo gjithmonë deri tash ishte bërë në bashkëpunim me partitë në pushtet”, ka theksuar Tahiri.

Madje, sipas tij, pushteti asnjëherë nuk i ka marrë parasysh kërkesat politike nga protestat, por i ka trajtuar me masa policore. “Vetëvendosje me protestat e saja përveç dhunës e tollovisë edhe me pasoja tragjike nuk ka arritur ndonjë rezultat as ndonjë plotësim të kërkesave. Zakonisht e kanë lëshuar qytetarët e policët por asnjëherë pushteti. Në Kosovë nuk ka vetëdije për protesta të organizuara masovike dhe gjithashtu as pushteti asnjëherë nuk i ka marrë parasysh kërkesat politike nga protestat por i ka trajtuar ato me masa policore dhe mospërfillje totale institucionale”, ka deklaruar Ramush Tahiri për gazetën “Bota sot”.

Abazi: Kapja e shteti tanit është duke u transformuar në zhbërje të shtetit

Në anën tjetër, njohësi i çështjeve politike në vend, Haki Abazi, ka thënë për gazetën “Bota sot”, se të gjithë aktorët e sidomos Thaçi po thirret në emër të popullit, andaj protesta e VV-së duhet të tregojë se ai nuk ka mandat as nga qytetarët as nga institucionet.

“Kapja e shteti tanit është duke u transformuar në zhbërje të shtetit. Çdo gjë që ka ndodhur deri tani që nga shpallja e pavarësisë ka qenë degradim i vizionit dhe shthurje institucionale. Të gjithë aktorët e sidomos Thaçi po thirret në emër të qytetarëve dhe popullit e kjo protestë duhet të tregojë se ai nuk ka mandat as nga institucionet dhe as nga qytetarët. Ai nuk lejohet të shkelë Kushtetutën dhe nuk është mbi ligjin”, është shprehur ai.

Sipas Abazit, zgjidhjet janë të nevojshme pasi qeveria po varet nga Lista Serbe dhe Thaçi duhet ndalur me të gjitha mënyrat. “Zgjedhjet janë të domosdoshme sepse kjo qeveri është qeveri që është peng i listës Srpska dhe shumica shqiptare është në anën tjetër. Nuk ka legjitimitet edhe për formën se si është formuar dhe se si është duke funksionuar. Thaçi duhet ndalur në të gjitha mënyrat ai është duke punuar kundër interesave të Kosovës dhe kundër interesit të gjithmbarshëm të shqiptarëve”, ka deklaruar Haki Abazi për gazetën “Bota sot”.

Thaçi e Haradinaj në SHBA, njëri për kufijtë tjetri për vizat

Presidenti i Kosovës Hashim Thaçi dhe kryeministri Ramush Haradinaj pritet që së shpejti të udhëtojnë për në New York të Shteteve të Bashkuara të Amerikës (SHBA), pasi që në fillim të javës që vjen do të mbahen punimet e Asamblesë së Përgjithshme të Kombeve të Bashkuara

Përderisa Thaçi, siç mësohet, pritet të flasë rreth dialogut dhe për çështjen e kufijve me Serbinë në takimet që do t’i zhvillojë me krerët e shteteve të ndryshme, Haradinaj në SHBA pritet të lobojë për çështjen e vizave.

Kreu i shtetit, Hashim Thaçi, ka thënë se në kuadër të këtij udhëtimi ka gjasa që të takohet edhe me presidentin e SHBA-së, Donald Trump, shkruan Zëri.

Ndërkohë, pos këtyre dy liderëve kosovarë në kuadër të delegacionit do të jetë edhe ministri i Punëve të Jashtme Behgjet Pacolli, i cili tanimë veçse gjendet në SHBA. Po ashtu pjesë e delegacionit kosovar do të jenë edhe zyrtarë të tjerë shtetërorë, të cilët janë pjesë e Presidencës, Qeverisë dhe MPJ-së.

Njohës të marrëdhënieve ndërkombëtare vlerësojnë se pjesëmarrja në këto ngjarje është mjaft e rëndësishme, porse sipas tyre ato asnjëherë nuk shfrytëzohen sa duhet nga liderët institucionalë të Kosovës.

Pavarësia dhe kasha(g)ia

Në vitin 2011, 2012 krejt debatet ndërkombëtare zhvilloheshin drejt rritjes së presionit kundër Serbisë për njohjen e pavarësisë së Kosovës

Çfarë bën bashibozukët e Kosovës: pezulluan rezolutën e Kuvendit për reciprocitet ndaj Serbisë (dmth. vendosën që Serbia të mbulojë Kosovën me prodhimet e veta dhe t’i arkëtojë deri në gjysmë miliardë euro në vit), po ashtu pa asnjë kusht u pranua hyrja në bisedime me Serbinë (pa këmbëngulur në vendimin e Gjykatës Ndërkombëtare të Drejtësisë mbi legalitetin dhe legjitimitetin e shpalljes së pavarësisë), kthimi i kopjeve të certifikatave të lindjes etj. u quajt marrëveshje historike, ngjitja e disa letrave dhe heqja e targave të Republikës së Kosovës nga vetura u quajt e arritur e madhe.

Ku na solli kjo politikë? Na solli deri aty ku Aleksandar Vuçiqi po thotë: jam për dialog, vetëm të mos flitet për njohjen e pavarësisë. Vuçiqi nuk duhet të bëhet merak fare, sepse këtë barrë atij ia kanë hequr sundimtarët e Kosovës. Edhe vetë ata po thonë: Serbia nuk e pranon Kosovën!

Kush e mbron sot me shkarravina këtë politikë? Ata që marrin rroga nga regjimi. Shkrimet që shkruhen për të kashaisur shefin, flasin vetëm për servilizmin e autorëve, pra «konsulentëve» me kashai (kashagi, në dialektin kosovar).
E.R.

Momenti i arrestimit për ryshfet të zyrtarit komunal të Gjilanit (video)

Emisioni ‘Drejtësia në Kosovë’ sonte shfaqi pamje nga prangosja e një zyrtari të Komunës së Gjilanit, i cili po kërkonte dy mijë euro mito

Emisioni ka siguruar filmime ekskluzive nga momentet kur zyrtari komunal i kishte kërkuar një biznesmeni dy mijë euro për t’i përshpejtuar procedurën e pagesës për një kompensim të një shpronësimi.

Negociatat dhe momentet e transaksioneve të parave janë filmuar nga kamerat e autorizuara nga Prokuroria e Gjilanit. Në filmimet që shfaqen për herë të parë zyrtari komunal shihet duke marrë 2 mijë euro e po ashtu momenti kur Policia ndërhyn dhe arreston të dyshuarin:

Zyrtari komunal: U takova me nifar…
Zyrtari Policor: Për çka?
Zyrtari Komunal: Për me mi dhanë do pare.
Zyrtari Policor: Sa pare ka pas me t’i dhanë?
Zyrtari Komunal: 2,000 euro.
Zyrtari Policor: Ku i ki paret?