Pagesat e majme për shefat e AKP-së

As presidenti, as kryeministri, e as kryeparlamentari, nuk marrin paga nga buxheti i shteti, sa marrin kryesuesi dhe anëtarët e bordit të AKP-së. Ata punojnë vetëm një ditë në javë, dhe paga e tyre mujore, kap shifrën e mijëra eurove. 624 euro është shuma e meditjes, që buxhetit të vendit, ia merr kryesuesi i Agjencionit të Privatizimit të Kosovës, për një mbledhje të vetme. Zëvendësi i tij për një mbledhje paguhen në shumë prej 552 euro, kurse gjashtë anëtarët tjerë të AKP-së, paguhen me nga 480 euro për secilën mbledhje. Rrjedhimisht një anëtar i AKP-së, me vetëm gjashtë ditë punë në muaj, merr nga shteti rreth 39 mijë euro në vit

Një grup prej tetë njerëzish, të cilët nuk kanë më shumë se sa gjashtë ditë punë në muaj, llogariten si përfituesit më të mëdhenj të buxhetit shtetëror. Ata ia kalojnë me paga edhe presidentit, kryeministrit dhe kryeparlamentarit të vendit. Madje, me vetëm një ditë pune në javë, anëtarët e Agjencisë Kosovare të Privatizimit (AKP), marrin para më shumë se Guvernatori i Bankës Qendrore të Kosovës, dhe shumë zyrtarë tjerë të shtetit.

624 euro është shuma e meditjes, që buxhetit të vendit, ia merr kryesuesi i Agjencisë Kosovare të Privatizimit, për një mbledhje të vetme. Zëvendësi i tij për një mbledhje paguhen në shumë prej 552 euro, kurse gjashtë anëtarët tjerë të AKP-së, paguhen me nga 480 euro për secilën mbledhje, shkruan Insajderi.

Ata mblidhen vetëm 12 herë brenda vitit, pa llogaritur mbledhjet e pa përfunduara dhe ato urgjente, dhe për këto mbledhje i kushtojnë buxhetit të shtetit të paktën 292 mijë euro të taksapaguesve kosovarë brenda vitit, vetëm për gjashtë anëtarët e bordit, duke mos e llogaritur kryesuesin dhe zëvendëskryesuesin, shkruan Insajderi. Shuma më e madhe vjetore për një anëtar të bordit të AKP-së, sillet rreth 39 mijë euro.

Sipas raportimit të “Kohës Ditore” anëtaret e bordit të AKP-së, nuk kishin qenë të kënaque me meditjet e tyre, dhe kështu që kishin votuar në mbledhjen e muajit prill për dyfishimin e shumës që përfitojnë nga pjesëmarrja në mbledhjet e këtij bordi.

Sipas zyrës për Informim të AKP-së, Drejtorët e bordit marrin kompensim sipas Rregullores për Kompensimin e anëtarëve të Bordit.

“Kompensimi, sipas kësaj rregullore, merr parasysh krahasimet me Bordet e ngjashme dhe të përafërta të organeve të pavarura të Kosovës si dhe të fushëveprimit dhe shtrirjes së përgjegjësive të tyre në krahasim me Bordin e AKP-së”, thuhet në përgjigjen e AKP-së për Insajderin.

“Sipas Rregullores në fuqi, drejtorët kompensohen për 6 ditë angazhim për një mbledhje të rregullt. Për mbledhje të rregullta dhe të jashtëzakonshme, kompensimi për një anëtar Bordi është 480€ bruto për një ditë angazhimi”, thuhet më tej në përgjigjen e AKP-së.

Për dallim nga gjashtë anëtarët e bordit kryesuesi dhe zëvendës kryesuesi marrin një mëditje më të lartë, raporton Insajderi.

Sipas AKP-së zëvendës Kryesuesi kompensohet me 15% më shumë se një anëtar i Bordit, ndërsa Kryesuesi kompensohet me 30 % më shumë se një anëtar i Bordit.

Nëse mëditja e një anëtari të bordit është 480 euro, llogaritur me 15% i bie se zëvendës kryesuesi merr kompensim prej 552 euro, apo në total 3 mijë e 312 euro.

Ndërsa sipas llogaritjes prej 30% nga mëditja prej 480 euro i bie se Kryesuesi i AKP-së ka mëditje prej 624 euro për një ditë pune në AKP.

Zyra për Informim e AKP-së, njofton se bordi mblidhet së paku një herë në muaj në mbledhje të rregullt, që do të thotë se kompensimi mujor nuk tejkalon zakonisht 6 ditë pune për një muaj.

“Në rastin e mbledhjeve të jashtëzakonshme, e cila mund të ndodhë vetëm në raste urgjente, kompensimi do të bëhet për ditët e angazhimit në shumën siç u përmend më sipër. Ditët e angazhimit përcaktohen nga Kryesuesi sipas rregullores dhe zakonisht nuk kalon më shumë se dy ditë pune”, thuhet në përgjigjen e AKP-së.

Gazeta Koha Ditore pati raportuar vitin e kaluar se si anëtarët e Bordit kishin votuar për dyfishimin e shumës që përfitojnë nga pjesëmarrja në bordin e AKP-së.

Angazhimi shtesë në komisionet e themeluar nga Bordi

Bordi i Agjencisë Kosovare të Privatizimit po ashtu themelon edhe komisione brenda këtij institucioni. Angazhimi i anëtarëve nëpër komisionet është punë shtesë dhe rrjedhimisht kompensim shtesë për ta.

Pra angazhimi nëpër komisionet ua shton atyre edhe 482 euro, nëse ata takohen, të paktën një herë në muaj. Pra, një anëtar i bordit mund të përfitojë 3 mijë e 362 euro për punën e tij 8-ditore në AKP.

APK sqaron se kush mund të jetë pjesë e komisioneve dhe se si është paraparë kompensimi.

“Një anëtar i Komitetit/Komisionit kompensohet me 241€ për një ditë mbledhje dhe kompensimi për një mbledhje të tillë nuk tejkalon dy ditë. Kryesuesi dhe Zëvendës-Kryesuesi nuk janë anëtar të Komiteteve/Komisioneve”, thuhet në përgjigjen e AKP-së.

Për më tepër AKP njofton se deri tani Bordi ka themeluar vetëm dy komisione, Komitetin e Auditimit, si komitet i përhershëm, dhe një komision ad hoc, për shqyrtimin dhe aprovimin e raporteve të Ofruesit të Shërbimeve Profesionale të Likuidimit, i cili Komision nuk është funksional që nga 10 korriku 2016.

Deklarimi i kompensimit të anëtarëve në AKK

Kryesues i bordit të Agjencisë Kosovare të Privatizimit është Petrit Gashi. Ai në Agjencinë Kundër Korrupsion ka deklaruar si të hyra vjetore kompensimin nga AKP-ja në shumën prej 38 mijë euro e 412 euro.

Kurse Zëvendës kryesuesi, Bajram Zejnullahu ka deklaruar në AKK se ka marrë 2 mijë e 176 euro më shumë sesa Gashi kompensim nga Agjencia e Privatizimit.

Në total Zejnullahu ka deklaruar shumë prej 40 mijë e 588 euro kompensim vjetor, raporton Insajderi.

Sa i përket dallimit të kompensimit që këta dy zyrtare e kanë deklaruar në Agjencinë Kundër Korrupsion, AKP ka pasur këtë sqarim.

“Dallimet e përmendura janë si pasojë e pjesëmarrjes apo jo në mbledhje të rregullta të Bordit (psh, prej 6 ditëve, mund të jetë kompensuar për 5 ditë apo 3 dite, etj.) dhe në mbledhje të jashtëzakonshme, pjesëmarrjes apo jo në mbledhje të Komisionit/Komitetit”.

“Po ashtu, dy anëtar të Bordit gjatë mandatit 2016-2017 kanë arritur moshën e pensionit dhe për rrjedhojë tatimet e kontributit pensional nuk janë ndalur. Po ashtu, nuk përjashtohet mundësia që ndonjë anëtar i Bordit të ketë deklaruar të ardhurat bruto e ndokush neto dhe të jenë paraqitur dallimet”, thuhet më tej në përgjigjen e AKP-së.

Gjashtë anëtarë të rinj të AKP-së ishin emëruar me 31 maj të këtij viti, Avni Ajdini, Hasime Mazreku, Skender Komoni, Ranko Gjokiq, Qemaj Behrami, Bekim Selimaj.

Disa nga ta nuk kanë deklaruar kompensimin nga AKP-ja në formularin e këtij viti që e kanë dorëzuar në AKK gjatë muajit qershor për shkak se ata ende nuk mbushur as muajin për të marrë kompenzimin.

Anëtarja Hasime Mazreku ka deklaruar kompensimin mujor prej 2,460, Bekim Selimaj ka deklaruar shumën prej 2,461 gjatë muajit qershor sipas formularëve në AKP.

Kurse anëtarët e mandatit të kaluar kishin deklaruar këto shifra si kompensim nga AKP-ja.

Hamdi Jaha kishte deklaruar shumën prej 35,294 si kompenzim, Hasime Mazreku-Krasniqi, Haxhi Arifi shumën prej 38,642 euro, Ismaili Januzi shumën prej 36,947 euro, Ranko Gjokiq shumën prej 37,152 euro dhe Skënder Komoni shumën prej 35,294 euro. /Insajderi.com

Kriza ekonomike e Turqisë ndjehet në tregjet globale

Një luftë tregtare mes Shteteve të Bashkuara dhe Turqisë rreth një pastori amerikan të ndaluar, tashmë po shkakton pasoja në ekonominë globale. Një rënie e ndjeshme e vlerës së lirës turke, së bashku me inflacionin dhe rrezikun e falimentimit të kredive, po kërcënojnë të tërheqin në vorbull edhe ekonomitë e tjera, veçanërisht tregjet në zhvillim

Siç njofton korrespondetja e Zërit të Amerikës për çështjet diplomatike, Cindy Saine, problemet e Turqisë po shkakojnë efekte zinxhir deri në vende si Argjentina dhe Indonezia, duke ndikuar në vlerën e monedhave aziatike dhe shkaktuar luhatje të vlerave të monedhave në mbarë botën.

Ishte një javë e trazuar për tregjet globale, me rënien e aksioneve të premten në Evropë dhe pamje të përzjerë në Azi, ku tregjet në zhvillim si India dhe Indonezia, janë veçanërisht të prirura të ndikohen nga efektet e ekonomisë së trazuar turke.

Shtetet e Bashkuara e kanë kërcënuar Turqinë me sanksione të tjera, nëse nuk lirohet pastori Andrew Brunson. Megjithatë, zëdhënësja e Departamentit të Shtetit Heather Nauert e ka bërë të qartë se Shtetet e Bashkuara nuk duhet të fajësohen për problemet ekonomike të Turqisë.

“Situata financiare e Turqisë është krijuar prej shumë kohësh. Daton që para vendosjes së sanksioneve të vendosura me 1 gusht.”

Analistët pajtohen se problemet ekonomike të Turqisë janë më të thella, dhe e kanë fillesën para kundërshtisë së tanishme mes Presidentit Recep Tayyip Erdogan dhe Presidentit Donald Trump. Amanda Sloat është analiste në Institutin Brookings.

“Struktura e ekonomisë së Turqisë është e paqëndrueshme, në kuptimin që bazohet kryesisht në rritjen e shpejtë, tek kreditë e lira, mbështetja tek projektet në sektorin e ndërtimit dhe pjesa më e rrezikshme, është se ajo varet tek borxhi i jashtëm, kryesisht në dollarë. Me rënien e vlerës së lirës përballë dollarit, me 40 përqind vetëm këtë vit, kjo e bën më të komplikuar dhe më të kushtueshme për Turqinë që t’i paguajë borxhet.”

Investitorët po vërejnë me kujdes lidhjet mes Tuqisë dhe vendeve të Azi-Paqësorit, që janë mes 20 burimeve kryesore të importeve të Tuqisë, të udhëhequara nga Kina. James Bevan është specialist investimesh me firmën CCLA.

“Nuk do të kemi një krizë si e viteve 90-të, sepse nuk rrezikojmë nga efekti zinxhir i Turqisë që kishte mes vendeve kryesore aziatike në vitet 90-të. Por mendoj se forcimi i kritereve të huamarrjes globale dhe kushtet e likuiditetit do të kenë pasoja negative për tregjet në zhvillim, sepse ato kanë qënë përfituesit kryesorë nga kreditë globale dhe nga lëvizja e fondeve gjatë viteve të fundit.”

Megjithatë, shumica e analistëve mbeten thellësisht të shqetësuar rreth ekonomisë së Turqisë, veçanërisht nëse firmat turke do të jenë në gjendje të paguajnë huatë.

Mbi 500 hektarë me vreshta janë dëmtuar nga reshjet në Rahovec

Reshjet e shiut dhe të breshrit, përveç kulturave të tjera bujqësore dëmtuan edhe qindra hektarë me vreshta në Komunën e Rahovecit

Sipas vreshtarëve, dëmet janë të mëdha dhe për to akoma nuk janë kompensuar, përderisa gjendja e sipërfaqeve me vreshta që nuk u dëmtuan është e mirë dhe këtë vit ato presin të japin më shumë rendimente.

Kushtet klimatike që mbretëruan këtë vit, ndikuan edhe në vreshta. Si pasojë e reshjeve të shumta të shiut dhe të breshrit në rajonin e Rahovecit janë dëmtuar mbi 500 hektarë me vreshta, duke u shkaktuar dëme të mëdha.

një sipërfaqe rreth 100 hektarë e cila është shkatërruar 100%. Prej atyre vreshtave ne nuk presim prodhim këtë vit, pasi që është dëmtuar komplet vegjetacioni i hardhisë së rrushit”, tha Ylber Bajraktari, nga Stone Castle.

Sipas Bajraktarit, këtij plantacioni iu dëmtuan pjesërisht edhe 100 hektarë të tjerë rrush, duke iu shkaktuar dëme mbi 1.5 milion euro, transmeton televizioni publik.

Vreshtarët për dëmet e shkaktuara akoma nuk janë kompensuar, edhe pse qeveria ka vendosur atyre t’u dalë në ndihmë. Ndërkohë, sipas kryetarit të Shoqatës së Vreshtarëve, Habib Dina, bujqit akoma nuk kanë marrë as subvencionet.

“Gjendja e rrushit për momentin është e mirë, pasi që ditëve të fundit ka mbajtur mot i mirë, i nxehtë e me diell. Nëse moti do të jetë kështu, atëherë rendimenti pritet të jetë i volitshëm”, tha Dina.

Se rendimentet në vreshtat e padëmtuara është më i lartë e thotë edhe Bajraktari.

“Është rendimenti më i lartë se sa vitin e kaluar, mund të them ndoshta deri në masën 30%. Këtë vit e kemi të garantuar edhe cilësinë më të madhe, sepse presim që muaji gusht të jetë më i ngrohtë dhe ta rritë kualitetin”, theksoi Bajraktari.

Bajraktari, ashtu si edhe kryetari i Shoqatës së Vreshtarëve, Habib Dina, mendojnë se dëmet duhet kompensuar e edhe subvencionet duhet ndarë sa më herët që është e mundur, pasi që bujqit i presin ato.

Komuna e Rahovecit tradicionalisht merret me kultivimin e rrushit dhe llogaritet që me rrush të jenë të mbjella mbi 3 mijë e 200 hektarë.

Për 2 vjet Telekomi i Kosovës humbi plot 66 milionë euro

Gjatë vitit 2016, si dhe gjatë vitit 2017 Telekomi i Kosovës ka humbur më shumë se 65 milionë euro. Në bazë të draftraportit vjetor të siguruar nga gazeta “Zëri” shihet se humbjet gjatë vitit 2016 kanë qenë 50.1 milionë euro, derisa gjatë vitit 2017 kanë qenë 15.1 milionë euro.Hiç më pak se 66 milionë euro janë humbjet që Telekomi i Kosovës ka pasur gjatë dy vjetëve të fundit

Duke u bazuar në draftraportin financiar të cilin ka arritur ta sigurojë gazeta “Zëri” shihet se gjatë vitit 2016 Telekomi i Kosovës (TK) ka mbyllur vitin me 50.9 milionë euro humbje, derisa viti 2017 është mbyllur me 15.1 milionë euro humbje.

Në raportin e siguruar thuhet se gjatë vitit 2017 Telekomi i Kosovës ka pasur gjithsej të hyra prej 70 milionë e 593 euro, ku nga shumë 18 milionë euro janë harxhuar për shpenzime operacionale, 26 milionë euro për shërbime të stafit, 12 milionë euro është zhvlerësimi i kompanisë, 9.5 milionë euro është amortizimi, derisa humbja në fund të vitit ka arritur në 15 milionë e 149 mijë euro.

Kompania e Blerim Devollit: Rexhë Gjonbalaj deshi të na shkatërrojë

Padia e Z-Mobile, e cila kërkon mbi 44 milionë euro nga Telekomi i Kosovës, përfshin edhe tri takime të pretenduara me drejtuesit e ndërmarrjes publike. Padia pretendon se Rexhë Gjonbalaj, kryetar i bordit të Telekomit, kishte fyer dhe kërcënuar Milot Gjikollin, drejtorin e Z-Mobile. Po ashtu, pretendohet se Gjikolli ishte fyer nga ish-kryeshefi i Telekomit, Ejup Qerimi. Rexhë Gjonbalaj mohon se ka takuar ndonjëherë Gjikollin dhe se ka biseduar me Blerim Devollin lidhur me pretendimet e Z-Mobile

Blerim Devolli, në qytetin e Pejës, rastësisht e kishte takuar Rexhë Gjonbalajn, kryetarin e bordit të ndërmarrjes publike “Telekomi e Vala”. Ishte duke u shëtitur përreth lumit në qytetin e Pejës, bashkë me Xhelal Radoniqin drejtorin e “Devolli Group”, kur kishte hasur në kreun e ndërmarrjes më të madhe në vend.

Gjonbalaj, që mban post të rëndësishëm në këtë ndërmarrje është nga i njëjti qytet me biznesmenin e fuqishëm, Blerim Devolli. Takimi i tyre i rastësishëm është pjesë e padisë së dorëzuar në Gjykatën Ndërkombëtare të Arbitrazhe nga Dardafone.net, e cila operon me emrin tregtar Z-Mobile. Nëpërmjet kësaj padie, kompania Dardafone.net kërkon dhjetëra miliona euro kompensim nga ndërmarrja publike “Vala e Telekomi”.

Rexhë Gjonbalaj mohon se është zhvilluar ndonjëherë ky takim. Por, kompania Dardafone.net pretendon se takimi është zhvilluar e madje Gjonbalaj edhe e ka fyer pronarin e kompanisë. Gjithçka, sipas kësaj padie, ishte zhvilluar në pak minuta.

Devolli i kishte bërë një pyetje Gjonbalajt, e cila e kishte nervozuar atë.

“Devolli iu afrua Gjonbalaj dhe e pyeti se pse VALA po e dëmtonte me qëllim biznesin e Z-Mobile, duke penguar operacionet e saj dhe duke refuzuar shërbimin 3G/4G. Devolli e alarmoi Gjonbalajn për faktin se Z-Mobile kishte humbur të ardhura dhe pa 3G/4G do të mbetej e qëndrueshme vetëm edhe për pak kohë”, thuhet në padi.

Por, sipas padisë, Gjonbalaj e kishte injoruar Blerim Devollin. “z. Gjonbalaj në mënyrë krejtësisht indiferente dhe duke buzëqeshur tha: “Nuk po më kërset. Edhe nëse e doni 3G/4G, më paditni mua ”, thuhet në padi.

Ashtu edhe ndodhi. Z-Mobile tashmë e ka paditur ndërmarrjen publike.

Pretendimet e kësaj kompanie peshojnë mbi 44 milionë euro. Bazuar në padinë e dorëzuar në Gjykatën Ndërkombëtare të Arbitrazhit në janar të këtij viti, Z-Mobile është dëmtuar nga refuzimi i PTK-së për të ofruar Sim Kartela të reja, numra të rinj, shërbimin 3G dhe 4G dhe si dhe për të ofruar shërbime cilësore edhe për konsumatorët e kësaj kompanie. Dëmet, sipas padisë, janë shkaktuar përgjatë periudhës 2011-2014. Z-Mobile kërkon dëmshpërblim prej 44 milionë e 408 mijë eurosh, plus interesin.

Gjonbalaj mohon takimet e pretenduara me Devollin dhe Gjikollin

Rexhë Gjonbalaj, i kontaktuar nga Insajderi, pohoi se ky pretendim nuk është i vërtetë. Thotë se Blerim Devollin e ka takuar vetëm njëherë, por jo në qytetin e Pejës siç pretendohet në këtë padi.

“z.Devollin e kam takuar në një proces gjyqësor qe e kemi pasur vite më parë”, deklaroi Gjonbalaj për Insajderin.

Gjonbalaj, po ashtu, mohoi edhe pretendimin tjetër që përmendet në padi. Në padinë e Z-Mobile thuhet se kreu i VALA-s, kishte takuar dhe fyer edhe Milot Gjikollin, që mban postin e drejtorit ekzekutiv në Z-Mobile. Gjikolli kishte dashur të bisedonte me të lidhur me mos ofrimin e shërbimeve 3G dhe 4G.

“Nuk kam biseduar për çështjen në fjalë me përfaqësues të Z-Mobile. z. Gjikollin as qe e kam takuar ndonjëherë në asnjë rast”, ka thënë Gjonbalaj për Insajderin.

Por, Z-Mobile insiston se takimi mes Gjikollit dhe Gjonbalajt ka ndodhur. Në padi është shënuar edhe data e këtij takimi të pretenduar. Shënohet se ka ndodhur më 25 prill 2015, në një sallë pritjesh në një hotel. Në padi nuk përmendet emri i hotelit.

Gjikolli, sipas padisë, kishte kërkuar që të flasë me Gjonbalajn për dy çështje: për arsyen se pse nuk po i ofrohen kompanisë Z-Mobile shërbimet 3G/4G dhe të kërkoi rritjen e cilësisë së shërbimeve për klientët e Z-Mobile.

“z.Gjonbalaj nuk la asnjë mundësi për të biseduar dhe vetëm bërtiti në drejtim të Gjikollit duke i thënë: Ti po pyet për 3G a? Ti po vepron sikurse ju na keni bërë neve. Por, ne ju kemi bërë juve. Por mos ta ndinë, do të ju tregoj unë juve ”, theksohet në padi.

Në padi thuhet se kërcënimi “do të ju tregoj unë juve”, e ka kuptimin e “do të ju shkatërrojë”. Bazuar në këtë, kompania pretendon se Gjonbalaj kishte kërcënuar Gjikollin se do të shkatërronte kompaninë Z-Mobile.

Por, sipas Gjonbalajt, ndërmarrja publike nuk kishte interes për të shkatërruar kompaninë Z-Mobile. Ai i ka thënë Insajderit se ishin vetë drejtuesit e kësaj kompanie private që kishin refuzuar ftesat e ndërmarrjës publike për të negociuar për ofrimin e shërbimit 3G/4G.

Sipas tij, marrëveshja e lidhur më 2009 për krijimin e operatorit virtual nuk parashihte edhe ofrimin e këtij shërbimi për kompaninë Z-Mobile.

“Nuk iu takojnë ato shërbime në bazë të kontratës. Por kjo duhet negociuar për shkak të investimeve të mëdha që ka bërë Telekomi i Kosovës në shërbimin 3G/4G”, thotë Gjonbalaj.

Ai shton se drejtuesit e Z-Mobile kanë refuzuar ftesat e menaxhmentit të PTK-së për të diskutuar lidhur me këtë shërbim.

“Zotërinjtë nga Z-Mobile kanë pasur ftesë disa here nga menaxhmenti për të diskutuar këtë çështje. Por, nga informatat qe ka Bordi i Drejtorëve, ata (Z-Mobile) asnjëherë nuk janë përgjigjur me gatishmëri për marrjen e shërbimeve. Sipas ekspertëve tanë dhe menaxhmentit, atyre nuk iu takojnë ato shërbime në bazë të kontratës”, thotë Gjonbalaj.

Z-Mobile: Drejtori Milot Gjikolli u kërcënua nga Ejup Qerimi, ish-kryeshef i PTK-së

Përveç, Gjonbalajt në padi përmendet edhe emri i Ejup Qerimit, ish-kryeshef ekzekutiv i Postë-Telekomit të Kosovës. Z-Mobile pretendon se ngjashëm si Gjonbalaj ishte sjellë edhe Qerimi,duke fyer drejtorin e kësaj kompanie private. Në padi përshkruhet takimi mes drejtorit Milot Gjikolli dhe Ejup Qerimit, kryeshef i atëhershëm i PTK-së. Pretendohet se takimi ka ndodhur në shkurt të vitit 2012, në zyrën e Gjikollit. Qerimi ishte ftuar nga Gjikolli në takim.

“Qerimi erdhi në takim në zyrën e Gjikollit, me tetë punonjës të tij. Ai filloi të kërkonte nga Z-Mobile që të paguante për kodin telefonik (kodi i Monaco Telecom) Drejtori i Z Mobile, Gjikolli, ia kujtoi me edukatë Qerimit se ART-ja tashmë kishte vendosur mbi këtë çështje, në favor të Z Mobile”, thuhet në padi.

Sipas padisë, kjo përgjigje e Gjikollit e kishte nervozuar Qerimin. Qerimi ishte ngritur në këmbë dhe kishte filluar të bërtiste, pretendon kompania Z-Mobile. Po ashtu, e kishte fyer Gjikollin.

“Kush leshin po mendoni që jeni? Ju duhet të bëni çfarëdo që na ju themi për ta bërë. Nuk mërzitna për kontratën”, kishte thënë Qerimi, bazuar në padinë e Z-Mobile kundër VALA-s. Ejup Qerimi është pyetur nga Insajderi lidhur me pretendimet e kësaj kompanie. Ai ende nuk ka dhënë ndonjë koment lidhur me akuzat që i bëhen.

Kriza e ekonomisë turke kërcënon edhe sistemin financiar në Evropë

Çfarë po ndodh me Turqinë? Më saktë, çfarë shkoi keq me vendin që mburrej me hovin e ekonomisë së tij, që sot gjendet në syrin e “stuhisë perfekte”

Turqia listohej vitet e fundit si njëra prej ekonomive me rritjen më të shpejtë në botë, por shifrat e saj mbresëlënëse u ushqyen nga borxhi në valutë të huaj. Huamarrja e vendit rezultoi në deficit në llogaritë e saj fiskale dhe ato tregtare, e sipas ekspertëve, Ankaraja nuk ka mjaftueshëm rezerva për ta shpëtuar ekonominë atëherë kur gjërat shkojnë keq.

Situatën duket se e ka rënduar edhe më shumë preferenca e Recep Tayyip Erdoganit për t’i mbajtur të ulëta normat e interesit, megjithëse inflacioni është tri herë më i lartë sesa objektivi i Bankës Qendrore.

Rënia e lirë e monedhës turke ka ngjallur frikë edhe përtej kufijve. Nuk janë të paktë ata që i druhen cënimit të sistemeve bankare europiane nga kjo situatë.

Erdogani i hedh poshtë pretendimet se ekonomia turke po përballet me telashe serioze, por flet për komplote të thurura kundër vendit të tij, duke përmendur një operacion të mirorganizuar kundër Turqisë.

Por, strategët e “J.P. Morgan Asset Management” janë të bindur se anëtari i NATO-s do të përballet me përkeqësim të kushteve financiare, me një luhatje të bindjeve të investitorëve, me një menaxhim të pamjaftueshëm të ekonomisë, e të gjitha këtyre i shtohen edhe tarifat amerikane.

Uashingtoni kërcënoi t’i shtrëngojë masat ekonomike mbi Ankaranë, nëse nuk lirohet prifti protestant amerikan, Andreë Brunson, i burgosur atje prej dy vitesh nën pretendimet e lidhjeve me grupe të paligjshme politike.

Përplasjet mes dy aleatëve të NATO-s i kanë parë secilin prej tyre të vendosin tarifa mbi palën tjetër, gjë që e përkeqësoi krizën e lirës turke, e cila që prej janarit ka humbur gati një të tretën e vlerës përkundrejt dollarit amerikan.

Kjo krizë po shihet me shqetësim edhe në vendin tonë. Aktualisht, Turqia është vendi i dytë më i madh importues në Shqipëri, pas Italisë, me 500 milionë dollarë importe në vit. Ndërkohë që eksportet shqiptare drejt Turqisë janë dukshëm më të ulëta, vetëm 20 milionë dollarë.

Në Prishtinë dështojnë projektet kapitale brenda gjysmës së parë të vitit

Gjatë gjithë gjysmës së parë të këtij viti nga 16 projekte kapitale të parapara nga Komuna e Prishtinës, vetëm për një prej tyre janë shpenzuar afro 50 mijë euro

Drejtoria e Zhvillimit Ekonomik e kryeqytetit ka pasur në buxhet gati 2 milionë euro, dedikuar për këto investime gjatë vitit 2018, por ka shpenzuar vetëm 4 për qind të këtij buxheti.

Nga 16 projekte të rëndësishme, që kanë të bëjnë me zhvillimin ekonomik të kryeqytetit, 48.8 mijë euro janë shpenzuar për incizime gjeodezike, ndërsa për projektet e tjera të parapara që të realizohen gjatë këtij viti, siç janë: projektet për partneritet publik-privat, ai për promovimin e punësimit të të rinjve, për plotësimin dhe ndryshimin e Planit Zhvillior Komunal, për projektimin(si: salla koncertale. Pishina olimpike dhe Teatri i qytetit), pastaj ai për identifikimin e hartave strategjike të zhurmës, ai për hartimin e Hartës zonalet të Komunës së Prishtinës, ai për hartimin e projektit për realizimin e Parkut botanik, apo planet rregulluese, deri tashti nuk është shpenzuar asnjë cent i buxhetit të ndarë për to, përjashtuar shënimin e ditëve mjedisore për të cilin figuron të jenë zotuar për shpenzim afro 4 mijë euro.

Nga 15 projekte kapitale që kishte planifikuar t’i realizonte gjatë këtij viti, vetë Drejtoria e Invsetimeve Kapitale, rezulton se investime janë bërë në vetëm pesë prej tyre dhe atë në vlerë të përgjithshme prej afro 2 milionë eurosh, nga buxheti prej 1.3 milionë eurosh që ka pasur në arkë

Miliardat nga Katari ringjallin lirën turke

Lira turke është duke iu kthyer normalitetit pas humbjeve rekorde, vetëm një ditë pasi Katari ka premtuar 15 miliardë dollarë investime për të ndihmuar ekonominë e Turqisë

Valuta turke është fuqizuar 3 përqind kundrejt dollarit amerikan të enjten, përkatësisht është shkëmbyer 5.75 për një dollar.

Kjo rritje është njoftuar vetëm disa orë pasi ministri përgjegjës për financa dhe thesar në Turqi, ishte planifikuar që t’i siguronte investitorët ndërkombëtarë për ekonomi.

Vlera e valutës ka rënë ndjeshëm javët e fundit, duke shënuar rekord prej 7.24 kundër dollarit amerikan, edhe si pasojë e mosmarrëveshjeve diplomatike me Shtetet e Bashkuara.

Uashingtoni ka dyfishuar tarifat në importet e çelikut dhe aluminit të Turqisë, pas ndalimit të një pastori amerikan në Ankara.

Si përgjigje ndaj sanksioneve amerikane, Turqia ka vënë tarifa në vlerë të 500 milionë dollarëve, si dhe ka thënë se do të bojkotojë disa mallra eletronike amerikane.(REL)

Lufta ekonomike: Po planifikohet braktisja e dollarit

Anatoly Aksakov, kreu i Komitetit të Tregut Financiar të Dumës, krahu i ulët i Parlamentit të Rusisë, tha se përdorimi i dollarit amerikan si një mjet presioni e shtypjeje do të çonte në formimin e një valute të re globale

Në një deklaratë për agjensinë turke Anadolu Agency, Aksakov, është shprehur se presioni për përdorimin e dollarit amerikan do të rezultojë me refuzimin e dollarit në pagesat ndërkombëtare.

Dollari statusin si “njësi monetare botërore” e ka fituar në vitin 1944 dhe në atë periudhë njësitë monetare kombëtare të shumë vendeve u zhvlerësuan teksa dollari mbeti i qëndrueshëm, tha Aksakov duke shtuar se kjo shkaktoi që të bëheshin më shumë pagesa me dollarë, ku dhe në këtë mënyrë dollari filloi të ishte aktiv në proceset ndërkombëtare.

Aksakov ka theksuar se vendet e BRICS (Brazili, Rusia, India, Kina dhe Afrika e Jugut) kanë diskutuar për mundësinë e valutës së re për pagesat mes tyre. Duke vënë theksin se është një mundësi e mirë formimi i një valute të re për BRICS, Aksakov ka tërhequr vëmendjen se vendet e BRICS përbëjnë gjysmën e popullsisë së botës dhe 30 për qind të industrisë botërore.

“Procesi i krijimit të një valute alternative botërore mund të përfundojë brenda 5 viteve. Kjo është e lidhur me Washingtonin. Nëse SHBA ushtron më shumë presion mbi përdorimin e dollarit, vendet e tjera kanë më shumë gjasa të kundërshtojnë duke bërë pagesat në dollarë”, tha Aksakov.

Që nga tani shumë vende kanë nisur të refuzojnë dollarin, ka thekuar Aksakov, duke shtuar se Kina në shit-blerjet e naftës ka nisur të përdorë valutën Juan në vend të dollarit, Turqia ka tërhequr rezervat e floririt nga SHBA-ja dhe Rusia ka pakësuar investimet në asetet amerikane.

“Dollari do të humbasë rëndësinë e tij kur të shfaqet një valutë e re botërore si një alternativë ndaj dollarit. Pra, në këtë mënyrë ndikimi i Shteteve të Bashkuara në botë do të zhduket”, tha Aksakov.

Top Channel

Bizneset humbin miliona si pasojë e ndaljes së rrymës

Bizneset prodhuese në Kosovë vazhdojnë të përballen me furnizim jo të rregullt me energji elektrike. Në vit, sipas hulumtimeve të bëra, humbjet ekonomike për shkak të furnizimit të pasigurt me energji elektrike thuhet se shkojnë deri në 300 milionë euro në vit

Disa nga bizneset prodhuese kanë bërë investime vetanake, kryesisht kanë blerë gjeneratorë si dhe kanë bërë investime në ndërtimin e lartëpërçuesve për të pasur furnizim të rregullt me energji elektrike.

Sipas një hulumtimi të Odës Ekonomike të Kosovës për një vit kostot shtesë nga investimet që bizneset bëjnë për të pasur furnizim të rregullt me energji elektrike, shkojnë deri në 300 milionë euro.

Kompania Pestova, e cila merret me përpunimin dhe prodhimin e patates, për t’iu ikur problemeve të mungesës së energjisë elektrike, kohë më parë kishte ndërtuar një lartëpërçues.

Pronari i kësaj kompanie, Bedri Kosumi tregon për Radion Evropë e Lirë se të gjitha këto investime për të hyrë në kategorinë A plus, që nënkupton furnizim pa ndërprerje me energji elektrike, ka shpenzuar deri në 243 mijë euro.

“Me këto investime të bëra tani kemi furnizim të rregullt me energji elektrike. Ne jemi në kategorinë A plus dhe parapaguajmë 25 për qind të energjisë së harxhuar në vit, pra 25 për qind e parave janë të bllokuara. Nëse nuk do të ishim në këtë kategori do të ishte e pamundur të mendohet të punohet me furnizim jostabil me energji elektrike. Një ndërprerje e paparalajmëruar e energjisë shkakton dëme të mëdha të makinerisë me të cilën punohet”, thotë Kosumi.

Kosova përgjatë viteve është duke u ballafaquar me furnizim jostabil me energji energjike. Ndërprerjet e kohëpaskohshme të energjisë elektrike paralajmërohen përmes njoftimeve zyrtare nga Distribucioni i Furnizimit me Energji Elektrike (KEDS). Aty tregohet për kohën dhe regjionet se kur do të ndërpritet energjia elektrike.

Si arsye kryesore e mungesës se këtij produkti në Kosovë vazhdimisht theksohet vjetërsia e termocentraleve në Kosovës. Termocentrali A daton që nga vitet e 60-ta, ndërsa termocentrali Kosova B nga vitet 80-ta.

Kjo mungesë e energjisë elektrike është një problem mjaft shqetësues për bizneset prodhuese, thotë për Radion Evropa e Lirë drejtori ekzekutiv i Klubit të Prodhuesve të Kosovës, Astrit Panxha.

“Furnizimi jo i rregullt me energji elektrike dhe jokonsistenca në kualitetin e energjisë, po shkakton probleme të mëdha te prodhuesit. Një raport që është publikuar nga USAID tregon që humbjet nga energjia elektrike për prodhuesit në Kosovë, që sillen rreth 300 milionë euro në vit, që nënkupton nëse marrim parasysh eksportet tona janë diku rreth 300 milionë euro, atëherë çdo euro që e ftojnë prodhuesit nga eksportet duhet ta shpenzojnë për të mbuluar koston e humbjes nga energjia elektrike”, thotë Panxha.

Pasiguria me furnizim me energji elektrike, shton Panxha, është një nga kufizimet kyçe për zhvillimin e sektorit prodhuese në Kosovë.

“Mungesa e energjisë elektrike po shkakton probleme të mëdha edhe në konkurueshmërinë e produkteve të Kosovës sepse me një kosto të lartë të energjisë elektrike nuk mund të jesh konkurrent në treg me produktet që vinë nga rajoni apo Bashkimi Evropian”, thotë Panxha.

Ndryshe, pas më shumë se një dekadë përgatitjesh në fund të vitit të kaluar Qeveria e Kosovës kishte arritur të nënshkruajë marrëveshjen komerciale më kompaninë amerikane “Contour Global”, për ndërtimin e Termocentralit “Kosova e Re”.

Ky termocentral thuhet se garanton pavarësi energjetike dhe siguri të vazhdueshme me energji elektrike. Termocentralit “Kosova e Re”, parashikohet të vihet në punë në vitin 2023.