Bankers mund Shqipërinë; fiton betejën në Arbitrazh, fatura 57 mln dollarë

Shqipëria ka marrë një tjetër goditje të rëndë nga gjykatat ndërkombëtare. Këtë herë është gjykata e arbitrazhit në Paris, e cila ka dënuar qeverinë shqiptare ti kthejë 57 milionë dollarë kompanisë Bankers Petroleum

Top Channel e lexoi vendimin e tribunalit, një kopje e të cilit i ka mbërritur zyrtarisht edhe avokaturës së shtetit dhe Ministrisë së Energjisë. Sipas vendimit këto para qeveria shqiptare ia ka marrë pa të drejtë kompanisë Bankers përmes tatimeve dhe tani duhet t’ia kthejë menjëherë mbrapsht.

Vendimi i tribunalit të parisit mbyll përfundimisht, por me kosto të rëndë për buxhetin e shtetit, një konflikt i cili ka nisur dy vjet e gjysmë më parë.

Në atë kohë agjencia kombëtare e burimeve natyrore auditoi bilancet e viteve të mëparshme të Bankers dhe doli në konkluzionin se kompania kishte rritur artificialisht shpenzimet me 300 milionë dollarë për të paguar më pak taksa në shtet.

Në fund të vitit 2015 duke u bazuar tek raporti i Agjencisë së burimeve natyrore, drejtoria e përgjithshme e tatimeve bllokoi llogaritë e bankers duke i kërkuar të paguajë 75 milionë dollarë së bashku me gjobat. Kompania e refuzoi faturën duke e paditur menjëherë Shqipërinë në arbitrazh.

Pas presioneve të dyanshme, në shkurt të vitit 2016 qeveria dhe bankers arritën një kompromis. Kompania do të paguante paratë sipas vlerësimit të tatimeve, ndërkohë që qeveria pranoi që konflikti të auditohej nga një ekspert i pavarur ndërkombëtar.

Palët përzgjodhën gjigantin Priceuaterhouse Coppers, i cili pasi shqyrtoi pretendimet e dyanshme, i dha të drejtë Bankersit. Qeveria nuk e pranoi këtë gjykim dhe vendosi të vazhdojë betejën në arbitrazh. Por siç Top Channel mësoi ekskluzivisht, arbitrazhi ka vendosur pro kompanisë duke, e detyruar qeverinë shqiptare t’i kthejë kompanisë kanadeze 57 milionë dollarë amerikanë plus interesat dhe shpenzimet e gjyqit, që në total shkonë në 60 milionë dollarë, një goditje e rëndë për buxhetin e shtetit.

Kjo është hera e dytë brenda një kohe fare të shkurtër që buxheti merr goditje nga gjykatat ndërkombëtare. Një muaj më parë gjykata e arbitrazhit në strasburgu dënoi qeverinë të paguajë 13 milionë dollarë për të dëmshpërblyer pronarët e pallatit të ndërtuar nga vjehrri i lulzim bashës në Vlorë. Në total 73 milionë dollarë për vetëm një muaj, që do të paguhet nga taksapaguesit.

Top Channel

FMN: Rritja e pagave mund të rrezikojë hapjen e vendeve të reja të punës

Fondi Monetar Ndërkombëtar (FMN) vlerëson se rritja e pagave apo çdo punësim i ri, duhet të bëhet brenda limitit të rregullës së re për fondin e pagave

Në një përgjigjeje për Radion Evropa e Lirë, Ruud Vermeulen, përfaqësues rezident i Fondit Monetar Ndërkombëtar në Kosovë, tha se “punësimet e reja, duke përfshirë ato në sektorin e drejtësisë dhe shëndetësisë si dhe një rritje modeste e rrogave e paraparë për vitin 2018, mund të bëhet në pajtim me rregulloren për fondin e pagave”.

Më tutje, ai tha se rritja e madhe e rrogave në disa sektorë publikë do të krijojë pakënaqësi dhe presion për rritje të rrogave në sektorët e tjerë, që mund të rrezikojnë rregulloren e pagave.

“Po ashtu, do të rrezikojë mundësinë e punësimeve të reja që janë me prioritet”, ka thënë Vermeulen.

Ndryshe, në fund të vitit të kaluar kryeministri i Kosovës Ramush Haradinaj, kishte marrë vendim për rritjen e pagave për kabinetin qeveritar, ndërkaq më pas edhe për punonjësit e sistemit të drejtësisë.

Ky vendim më pas ishte pezulluar nga vetë kryeministri Haradinaj, pas një vërejtjeje që kishte parashtruar Agjencia Kosovare Kundër Korrupsionit, e cila e kishte cilësuar vendimin e kryeministrit si të paligjshëm.

Ndërkohë, partitë opozitare vendimin e Haradinajt për rritjen e pagave e kanë dërguar edhe në Gjykatën Kushtetuese për interpretim.

Vendimi i Qeverisë kishte ndikuar që edhe punonjësit e sektorit të shëndetësisë dhe ata të arsimit të kërkojnë rritjen e pagave. Edhe pse që nga fillimi i këtij viti, punonjësit e sektorit publik kanë marrë pagat me rritje prej 4 për qind, Sindikata e Bashkuar për Arsim Shkencë dhe Kulturë është shprehur e pakënaqur me rritjen aktuale, duke kërkuar që rritja të realizohet nga 15 deri në 25 për qind.

Edhe mjekët specialistë në institucione publike shëndetësore, kanë kërkuar kategorizim, që do t’u mundësonte atyre rritjen e pagave.

Në Kosovë ende nuk është miratuar Ligji për pagat, i cili rregullon nivelizimin e pagave për të gjithë punonjësit në sektorin publik.

Në vitin 2010 është miratuar Ligji për pagat e nëpunësve civilë, ligj ky që nuk është zbatuar për shkak të mungesës së mjeteve financiare. Kurse, mënyra e sistemit të pagave për sektorë të tjerë është realizuar me ligje dhe rregullore të tjera.

Zeqir Bekolli, zëdhënës në Ministrinë e Administratës Publike thotë se për të rregulluar këtë çështje, kjo ministri tashmë ka përgatitur koncept-dokumentin e ligjit për pagat që tashmë gjendet në Ministrinë e Financave.

“Ky dokument i paraprin hartimit të ligjit të ri për pagat, në të cilin do të përfshihen të gjitha kategoritë dhe institucionet që marrin paga nga buxheti i Kosovës. Ky do të jetë ligj unik në të cilin do të përfshihen të gjitha kategoritë dhe institucionet që marrin paga nga buxheti i Kosovës”, thotë Bekolli për Radion Evropa e Lirë.

Sidoqoftë, me një zë më kritik ndaj vendimit të kryeministrit për rritjen të pagave është paraqitur Bashkimi i Sindikatave të Pavarura të Kosovës (BSPK). Ata janë kërcënuar se nëse Qeveria vendos për rritjen e pagave për zyrtarë të saj, nuk do të mungojnë protestat apo grevat. Kurse rritja e pagave për 4 për qind, sipas BSPK-së, është e pamjaftueshme.

Lajmi i mirë nga mediat azere: TAP rrit përfitimet për Shqipërinë

Besimi i rritur tek ekonomia shqiptare ka shtyrë konsorciumin që po ndërton gazsjellësin TAP që të miratojnë një numër investimesh të reja shtesë në vendin tonë. Lajmin e mirë e jep portali më i madh i lajmeve azere në anglisht, “AzerNews”

Sipas kësaj faqeje, “TAP” ka vendosur që të ndërtojë edhe një numër qendrash kompresimi, të cilat do të shërbejnë si qendra të mëdha magazinimi të gazit të Detit Kaspik në vendin tonë.

Këto qendra do të rrisin ndjeshëm potencialin e Shqipërisë për të importuar dhe eksportuar gaz, si dhe do të lehtësojnë zhvillimin e projektit të gazifikimit të vendit në një të ardhme të afërt.

Gazsjellësi TAP është një investim prej 5 miliardë eurosh, që do të transportojë gazin e Kaspikut në Bashkimin Europian përmes territorit turk, grek dhe shqiptar.

Sipas parashikimeve të Universitetit të Oksfordit, ai do të jetë në gjendje të përshpejtojë rritjen ekonomike të Shqipërisë me 1%, përgjatë 10 viteve që pasojnë vënien në punë të gazsjellësit.

Gjithashtu, TAP do të gjenerojë disa mijëra vende pune në Shqipëri./Lexo.al

Rritet kontrabanda në veri të Kosovës

Edhe pas dhjetë vjetëve institucionet e Kosovës ballafaqohen me normën e lartë të informalitetitit, i cili llogaritet të jetë 31.7 për qind e Bruto Produktit Vendor

Kështu u tha në një tryezë të organizuar nga Oda Ekonomike Amerikane në Kosovë me temë “Luftimi i informalitetit, hapat e deritanishëm dhe rruga përpara”, ku u theksuar se në veri po rritet .

Drejtori i Administratës Tatimore të Kosovës, Sakip Imeri, tha se në luftimin e dukurisë së ekonomisë jo formale, gjitha institucionet që kanë inspektorate kanë përgjegjësit e tyre që t’i ndihmojnë ATK-së.

Sipas tij, vetëm puna e përbashkët me institucione tjera me inspektoratin e punës, shëndetësisë dhe inspektorate tjera që vënë rregull në administrimin e tyre mund të bëjnë të lehtë konkurrencën dhe luftimin e ekonomisë jo formale.

“31 për qind të Bruto Produktiv Vendor, sigurisht që është një përqindje jashtëzakonisht e lartë që lenë shumë punë për institucionet, për ATK-në, përparësi e këtij studimi është se ka përcaktuar vendet dhe sektorët ku ka më shumë për in formalitetin. Prej sektorëve ku është vlerësuar risku më i madh është vlerësuar aty ku dominon paraja e gatshme, ku dominon keshi, ku puna e institucioneve duhet të jetë e përbashkët për me mund me menaxhua. Vlerësohet diku përafërsisht 9 milionë euro humbje që krijohet nga sektori i ndërtimtarisë, vetëm nga puna e pa deklaruar, përfshirja e punëtoreve të cilët nuk janë të deklaruar në sistemin e tatimeve”, tha Imeri.

Sipas tij, ka diskrediton të madh mes sektorit të tregtisë i cili merr kredi më shumë me norma të kthimit të shpejta, ndërsa nuk orientohet se për çka merret kredia që është një rriskë për ATK dhe institucionet tjera.

Kryetari i OEAK, Arian Zeka, ka thënë se pavarësisht vënies nën kontroll të pikave kufitare 1 dhe 31 të pjesës veriore, në këto zona kontrabanda është duke u rritur.

“Ekonomia jo formale ka qenë një prej preokupimeve kryesore prej bizneseve serioze në këtë vend. Kjo ka ndikuar natyrisht jo vetëm në një konkurrence të pa barabartë por ka ndikuar në shkurtim të hyrave të cilat janë mbledhur për buxhetin e vendit ….Ankesat të cilat i marrim prej bizneseve anëtare vazhdimisht sugjerojnë që ka një prani të madhe të ekonomisë jo formale. Ajo çka kemi vënë re është se gjatë dy viteve të fundit pavarësisht vënies në kontroll të dy vendkalimeve kufitare edhe në pjesën veriore të vendit të njohura si pika 1 dhe 31 kemi vënë re dhe nga informatat që i kemi marrë nga bizneset një rritje të kontrabandës nga kjo pjese e këto produkte natyrisht përfundojnë në pjesën jugore të vendit .”, tha Zeka.

Sipas tij, një pjesë e madhe e këtyre produkteve janë sërish karburante ose produkte të tjera që sjellin përfitim më të madh për kontrabanduesve.

Kestrin Kumonova nga kompania Gekos, ka thënë se gjysma e bizneseve mbesin të pa fiskalizuara e që kjo ndikon në rritjen e normës së infomalitetit.

“Mos fiskalizimi i gjitha bizneseve nga gjitha institucionet përgjegjëse nuk ka pasur një gatishmëri që për tetë vite ta përmbyllin procesin e fiskalizimit. Fiskalizimi është dashur të përmbyllet diku 3-5 vite pas fillimit, mirëpo po hymë në vitin e 9-të dhe fiskalizimi ende nuk është i përfunduar. Aktualisht të fisklizuara janë rreth 26 mijë biznese me diku rreth 34 mijë pajisje fiskale, ndërsa biznese të regjistruara në ATK janë rreth 50 mijë. Diku gjysma e bizneseve janë të pa fiskalizuara dhe kjo sigurisht kontribon në shkallën e lartë të in formalitetit”, tha Kumnova.

Sipas tij çështja e naftëtarëve ka qenë më problematike për tre vite e që problem mbetet mos fiskalizimi i taksive të cilat kanë rreth 6 milionë euro qarkullim, KEDS-i e cila sipas tij është e liruara për lëshim të kuponëve fiskale të energjisë elektrike e të tjera.

Ndërsa, Hyesn Lajçi nga kompania HIP Petrol ka thënë se shifrat e in formalitetit 31.7 % të BPV-së ka të bëjë me in formalitetin është vërtet një shifër shumë e madhe në krahasim me atë që Kosova është një ekonomi shumë vogël, jo konkurrente e pa fuqishme në krahasim me ekonomitë regjionale. Ai tha se importi i vajrave që përdoret për ngrohjeje po e dëmton ndotjen e po ashtu edhe tregun e naftës.

Brenda 10 vitesh BE ndau 9 miliardë euro për Ballkanin: Kush mori më së shumti

Me përshpejtimin e procesit të integrimit të vendeve të Ballkanit nga arkat e Brukselit do të rrjedhin më shumë para, parashikon «Frankfurter Allgemeine Zeitung»

Gazeta gjermane «Frankfurter Allgemeine Zeitung» (FAZ) parashikon se strategjia e re e BE-së ndaj vendeve të Ballkanit do të kushtojë shumë para. Në dokumentin e BE-së theksohet se për të përkrahur një proces të papenguar të kalimit nga faza e kandidimit në atë të anëtarësimit në BE është e pashmangshme rritja e mjeteve financiare. Andaj Komisioni i BE-së propozon që deri në vitin 2020 të ndahen më shumë mjete për ndihmën para anëtarësimit (IPA).

Deri më tani, sipas gazetës gjermane, mes viteve 2018-2020 kanë qenë të parapara 1,7 miliardë euro. Në dokumentin strategjik thuhet se 1,07 miliardë euro do të harxhohen gjatë vitit 2018, kështu që 600 milionë eurot e mbetura duhet të rriten për vitet 2019 dhe 2020.

«Frankfurter Allgemeine Zeitung» shkruan se në periudhën e IPA I nga viti 2007 deri më 2013 për vendet e Ballkanit janë ndarë 4,1 miliardë euro. Për IPA II nga viti 2014 deri 2020 janë planifikuar 3,9 miliardë. Këtyre duhet shtuar edhe programet transnacionale, kështu që Komisioni i BE-së thekson se mes viteve 2007-2017 rajoni ka marrë gati 9 miliardë euro.

Përfituesi më i madh i ndihmave financiare të BE-së është Serbia: IPA I kishte paraparë 1,4 miliardë euro dhe IPA II 1,5 miliardë euro, mesatarisht 207 milionë euro në vit. Paratë e BE-së rrjedhin në Ballkan për të forcuar adminsitrarën, sundimin e ligjit, zhvillimin e përtëritshëm ekonomik, konkurrencën, demokracinë dhe qeverisjen e mirë. Çuditërisht, shkruan gazeta e Frankfurtit, këto janë fushat që Komisioni i sheh deficitet më të mëdha – përkundër ndihmës shumëvjeçare me miliona. FAZ citon ekspertin e Ballkanit të London School of Economics, William Bartlett, i cili thotë se përvojat e deritanishme me Slloveninë dhe Kroacinë si anëtare të BE-së janë përgjithësisht pozitive. Ato, sipas tij, janë objekte më të mira për referencë, andaj eksperti nga Londra thekson se është e drejtë që vendeve të Ballkanit t’u jepet një perspektivë e qartë e anëtarësimit.

Gazeta gjermane shkruan se në krahasim me Turqinë, e cila ka katër herë më shumë banorë se Ballkani (18 milionë), vendet e rajonit marrin dukshëm më shumë para nga Brukseli. Për Kosovën në kuadër të IPA II mes viteve 2014-2020 janë paraparë 645,2 milionë euro.
E.R.

Kosovë – Shqipëri, shumë politikë por pak ekonomi

Me gjithë pretendimin e të dy qeverive se ka pasur përparim, mbledhja e katërt e përbashkët që u mbajt në Korçë ndërmjet Kosovës dhe Shqipërisë duket si përsëritje e takimeve të mëparshme, të cilat nuk sollën një bilanc të qartë të arritjeve

Albert Spahiu

Dhe në takimin e katërt, qeveritë e dy vendeve sërish premtuan heqje të barrierave kufitare për tregtinë dhe për këtë nënshkruan 12 Marrëveshje, Memorandume e Protokolle. Që prej janarit të vitit 2014 kur u realizua takimi i parë në Prizren, numri i marrëveshjeve të nënshkruara në këto takime arriti në 43.
Është e paqartë se sa kanë ndikuar këto marrëveshje për të përmirësuar bilancin tregtar ndërmjet dy vendeve, ku sipas Agjencisë së Statistikave të Kosovës (ASK) nuk është vërejtur ndonjë ndryshim rrënjësor prej fillimit të takimeve.

Sipas të dhënave statistikore shkëmbimet mes dy vendeve mbeten minimale. Raporti i fundi i Tregtisë së Jashtme, publikuar nga ASK për muajin dhjetor 2017, tregon një rritje të eksporteve kosovare në drejtim të Shqipërisë prej 0.9 për qind krahasuar me periudhën e njëjtë të vitit të kaluar.

Vetëm në dhjetorin e vitit 2017, kompanitë kosovare në drejtim të tregut shqiptar eksportuan 5.2 milionë euro nga 4.1 milionë që ishte një vit më herët. Krahasuar me vendet e CEFTA-së, Shqipëria merr pjesë me 17.7 për qind të eksporteve, ndjekur nga Maqedonia me 9.6 për qind, Serbia me 5.5 për qind dhe Mali i Zi me 5.5 për qind, nga totali prej 11.9 milionë euro.

Gjatë vitit 2016, eksportet kosovare drejtë Shqipërisë kanë qenë 42 milionë euro. E kundërta po ndodh me importet shqiptare drejt tregut të Kosovës. Gjatë dhjetorit të 2016-së, nga Shqipëria janë importuar 10.88 milionë euro. Importet nga vendet e CEFTA-së në këtë muaj arritën në 79.6 milionë euro. Serbia vazhdon të mbetet vendi me pjesëmarrje më të lartë për import më 15.7 për qind, pasuar nga Maqedonia me 4.2 për qind, Shqipëria me 3.7 për qind dhe Bosnja dhe Hercegovina me 2.7 për qind.

Në vitin e kaluar, vlera totale e importeve shqiptare drejt Kosovës kanë qenë 115.79 milionë euro.
Berat Rukiqi, këshilltar në Odën Ekonomike të Kosovës (OEK), për Telegrafi ka thënë se bashkëpunimi ndërmjet Shqipërisë dhe Kosovës nuk po funksionon për shkak që ka mungesë të vullnetit politikë, sidomos nga ana e institucioneve të Shqipërisë.

“Sa i përket bashkëpunimit me Shqipërinë nuk po funksionon për shkak që ka mungesë të vullnetit politikë, sidomos nga ana e institucioneve të Shqipërisë, të cilat me vite janë njoftuar për barrierat tregtare të cilat janë ngritë për produkte kosovare. Këto nuk janë adresuar kurrë seriozisht por vetëm deklarativisht dhe jo me veprime dhe masa konkrete”, thotë Rukiqi për Telegrafi.

Rukiqi takimet ndërmjet qeverive i sheh si qëllim mediatik, por ai sugjeron që këto takime duhet të përcillet me veprime konkrete. “Takimet e qeverive kanë më shumë qëllim mediatik që të tregohet që ka një lloj bashkëpunimi, por kjo duhet të përcillet me veprime konkrete të cilat nuk kanë ndodhur deri tani”, thotë ai.

Gjithashtu ai thotë se ka barriera tregtare ndaj kompanive kosovare, ndërsa nuk ka ndonjë ankesë të kompanive shqiptare në tregun e Kosovës. “Në baza sezonale, kompanitë kosovare kanë barriera. Ka një rritje të eksportit të kompanive shqiptare drejtë Kosovës, ndërsa nuk po ndodh e njëjta në raport me Shqipërinë. Nuk ka ndonjë barrierë të identifikuar që Shqipëria e ka ngritur drejtpërdrejt në aspekt bilateral apo në kuadër të CEFTA-së. Nuk ka ndonjë ankesë të kompanive shqiptare në tregun e Kosovës”, thotë Rukiqi.

Njëjtë mendon dhe drejtori ekzekutiv i Klubit të Prodhuesve të Kosovës, Astrit Panxha. Panxha në një intervistë për Telegrafi, ka thënë se tregu i Shqipërisë nuk është mikpritës i mirë për produktet që prodhohen në Kosovë dhe se bashkëpunimi ekonomik dhe tregtar në mes Kosovës dhe Shqipërisë është më i dobët se ai në rrafshin politik.

“Kosova me Shqipërinë ka një Marrëveshje për tregtinë e lirë, që është e bazuar në marrëveshjen e CEFTA-së. Problemi është që kemi problem me zbatimin e Marrëveshjes nga pala shqiptare. Patatja e Kosovës ka probleme për të depërtuar në Shqipëri, pastaj birra e Pejës, mielli, barnat dhe shumë produkte tjera”, ka theksuar Panxha.

Sipas tij, marrëveshja në Korçë, respektivisht zhvendosja e doganës në Portin e Durrësit nuk ndikon në rritjen e shkëmbimit tregtar. “Gjatë verës nëse ne i vonojmë frutat nëpër dogana, ato mund të prishen shumë shpejt. Keq që akuzohen bizneset e Kosovës që po bëjnë probleme në aspektin e bashkëpunimit”, ka theksuar ai.

Eksportet kosovare në muajin dhjetor 2017, me të gjitha vendet, ishin 29.4 milionë euro, ndërsa importi 297.3 milionë euro, krahasuar me periudhën e njëjtë të vitit 2016 është një rritje prej 20.2 për qind për eksport dhe 9.5 për qind për import.

Shkelja e dyfishtë me HEC-et; AKZM: Ka mospërputhje të vendndodhjeve

Një ditë pasi Top Channel publikoi dokumente ekskluzive të një koncesioni të fshehtë për dy hidrocentrale mbi një zonë të mbrojtur si “Monument Natyre” në Kanionet e Osumit, skandali thellohet më tej. Siç rezulton nga një dokument i Agjencisë së Zonave të Mbrojtura, hidrocentralet kanë një mospërputhje të vendndodhjes sipas koordinatave, me lejet e marra

Skandali i hidrocentraleve mbi Kanionet e Osumit thellohet më tej. Agjencia Kombëtare e Zonave të Mbrojtura deklaron se leja mjedisore për HEC-et ka parregullsi ligjore dhe madje ka ndryshuar koordinatat ku do të ndërtohen hidrocentralet. Skandali zbulohet nga një memo zyrtare që Agjencia e Zonave të Mbrojtura i dërgon Ministrisë së Mjedisit.

AKZM-ja ka vërejtur disa parregullsi ligjore që lidhen me mospërputhjen e vendndodhjes sipas koordinatave me lejet e marra.

Kjo është njësoj sikur një ndërtues të zhvendosë një pallat përtej gjurmës së lejuar apo sikur të shtojë kate shtesë mbi lejen e miratuar. Vetëm se në përmasa më të mëdha, sepse ka të bëjë me një hidrocentral në një mjedis ligjërisht të mbrojtur.

Vlerësimi i ndikimit mjedisor është një nga lejet më të rëndësishme për miratimin e një projekti. Kjo leje lëshohet nga agjencia kombëtare e mjedisit dhe duhet të certifikojë projekti për impaktin mjedisor.

Sipas dokumenteve, rezulton se leja për dy HEC-et mbi kanionin e Osumit është dhënë në mars të vitit 2015 me firmën e ish drejtorit Julian Beqiraj. Por sipas Agjencisë së zonave të mbrojtura parregullsitë ligjore në leje dhe ndërrimi i koordinatave ku do të ndërtohen HEC-et bëjnë lejen të paligjshme.

Të martën Top Channel publikoi ekskluzivisht dokumentet që faktojnë se qeveria në mënyrë të heshtur ka miratuar ndërtimin e dy hidrocentraleve mbi Kanionet e Osumit duke rrezikuar kështu shkatërrimin e një prej atraksioneve më të bukura turistike në vend.

Top Channel

Tregu i përbashkët, BE kërkon të kufizojë Britaninë

Bashkimi Europian kërkon të jetë në gjendje të kufizojë qasjen e Britanisë në tregun e përbashkët, nëse do të ketë kontradikta pas “Brexit”

Sipas BBC-së, e cila siguroi një dokument konfidencial të BE-së, aftësia për të pezulluar përfitime të caktuara do të ketë fuqi gjatë periudhës së tranzicionit “post-Brexit”, para se marrëveshjet finale të hyjnë në fuqi.

Sipas medieve, kjo përmendet edhe në marrëveshjen e tërheqjes së Britanisë nga BE-ja, që nuk është finalizuar ende. Sipas Londrës, dokumenti thjesht reflekton direktivat e BE-së, por shumë njerëz në Britani, sidomos përfaqësuesit e partisë pro “Brexit”, UKIP, shfaqën zemërim se marrëvëshja për tranzicionin krijon një Britani “Vichy”, një referencë ndaj qeverisë franceze gjatë luftës që komandohej nga nazistët.

Periudha e tranzicionit nis menjëherë pasi Britania del nga BE-ja, më 29 mars 2019, dhe mbaron më 31 dhjetor 2020.

Londra thotë se kjo periudhë i lejon bizneset t’i përshtaten marrëdhënies së re. Brukseli, nga ana tjetër, kërkon që gjatë kësaj kohë të vlejnë ende rregullat e BE-së, si dhe vendimet e Gjykatës europiane të Drejtësisë.

Në dokumentin e zbuluar nga mediet shkruhet se, nëse një çështje në Gjykatën europiane zgjat, marrëveshja siguron mekanizmin që lejon unionin të pezullojë disa përfitime të Britanisë nga tregu i përbashkët.

Një pjesë e konsiderueshme politikanësh në Britani nuk janë të kënaqur me idenë që Britania do të ndjekë rregullat e BE-së, por s’do të ketë zë te to, ndërsa paralajmërojnë se kur të ndodhë “Brexit” në mars të vitit 2019, do të jetë thjesht në letër.

Top Channel

Drejtori i Doganës tregon efektet e MSA-së

Marrëveshja e Stabilizim-Asociimit ka pasur shumë efekte pozitive në vitin e parë të saj të plotë, sipas drejtorit të Doganës, Bahri Berisha

Për Express Intervistën, Berisha ka thënë se si rrjedhojë e Marrëveshjes së Stabilizim-Asociimit mes Kosovës dhe BE-së janë rritur shkëmbimet tregtare, por ka shtuar se eksporti e mbulon për vetëm 10 për qind importin.

“Efekti i MSA-së është i shumëfishtë në ekonomi. Është rritur tregtia mes vendeve të BE-së dhe Kosovës. Sigurisht vetë efekti i MSA-së gjeneron kërkesa më të mëdha tregtare që nënkupton zhvillim më të madh ekonomik. Janë rreth 5 për qind shkëmbime tregtare”, ka thënë Berisha.

Sipas tij, edhe masat e qeverisë në fund të vitit të shkuar për heqjen e pagesave shtesë në dogana për prodhuesit vendorë kanë shtuar interesimin e prodhuesve kosovarë.

Berisha ka shtuar se Dogana ka pasur performancë të mirë vitin e shkuar duke shënuar rritje prej 7 për qind në krahasim me vitin paraprak. Sipas tij, Dogana ka siguruar 13 milionë euro më shumë se parashikimet. Provizioni i vitit 2017 ishte 1 miliardë e 108 milionë euro, ndërsa Dogana kaloi 1 miliardë e 120 milionëshin.

Drejtori i Doganës thotë se ky institucion nuk ka politikë toleruese ndaj korrupsionit, si dhe ka shtuar se Dogana nuk është përgjegjësja e vetme për kontrollimin kufitar. Ai ka thënë se kontrollimi kufitar bëhet edhe përmes policisë dhe Agjencionit të Ushqimit. Berisha ka folur edhe për deklaratën e deputetit të PDK-së, Xhavit Haliti që pati thënë se nafta dhe cigaret nuk kontrollohen gjatë kalimit të kufirit.

“Kemi një qendër kombëtare që kujdeset për monitorimin e kufijve. Është pjesë e ministrisë së Brendshme. Kjo qendër e monitorimit është një prej veglave. Dogana nuk posedon sistem të kamerave. Nëse dikush ka dyshime të tilla mund të marrë informata nga kjo qendër në Ministrinë e Brendshme. Kufijtë e Kosovës janë mirë të kontrolluar”, ka thënë ai.

Interkonjeksioni 400 kV Kosovë-Shqipëri tash një vit e gjysmë i bllokuar nga Serbia

U.d kryeshefi ekzekutiv i KOSTT, z.Kadri Kadriu, me bashkëpunëtorë, pritën sot ambasadorin e Republikës së Shqipërisë në Kosovë, z.Qemal Minxhozi

Sipas njoftimit për media, në takim ata u diskutua rreth bashkëpunimit në sektorin e energjisë në mes të Kosovës dhe Shqipërisë, progresit në krijimin e tregut të përbashkët të energjisë elektrike si dhe procesit të themelimit të bursës shqiptare të energjisë (APEX), ku Kosova përmes KOSTT do të jetë aksionare.

Në kuadër të takimit, në veçanti u diskutua rreth sfidave në drejtim të fillimit të implementimit të Marrëveshjes së Kyçjes KOSTT-ENTSO-E me të cilën është e ndërlidhur edhe vënia në operim e linjës së re interkonektive 400 kV Kosovë-Shqipëri, projekt kapital i cili u bashkëfinancua me Qeverinë Gjermane përmes Bankës Gjermane për Zhvillim (KfW).

Ambasadori Minxhozi si dhe u.d. kryeshefi ekzekutiv i KOSTT z.Kadriu shprehën shqetësimin e tyre për bllokimin nga Serbia të funksionalizimit të linjës 400 kV Kosovë-Shqipëri tashmë një vit e gjysmë nga inaugurimi i projektit, si dhe u pajtuan që është e nevojshme zgjidhja e këtij ngërçi, i cili do të mundësonte valorizimin e këtij projekti kapital me interes si për sigurinë e furnizimit me energji elektrike ashtu dhe për sigurinë dhe besueshmërinë e sistemeve elektroenergjetike të Kosovës, Shqipërisë dhe rajonit në përgjithësi.