OBT: Gjendemi në prag të luftërave tregtare

Organizata Botërore e Tregtisë paralajmëron se po shtohet rreziku i luftërave botërore nga tarifat e reja të vendosura nga SHBA, si dhe nga zemërimi i vendeve si Kina

“Luftërat komerciale mund të shpërthejnë në çdo kohë dhe në mënyra që nuk presim”-tha drejtori i përgjithshëm i OBT-së, Hobert Azevedu, duke folur për Agjencinë Gjermane në Gjenevë.

“Ajo që nuk duhet është që një anëtar të miratojë masa që një anëtar tjetër mund t’i konsiderojë të njëanshme, dhe kështu të reagojë në mënyrë të paarsyeshme, duke nisur hakmarrjen”– shtoi Azevedo.

Në janar, Uashingtoni njoftoi se po imponon tarifa të larta për lavatriçe të mëdha të importuara si dhe panele diellore, për mbrojtjen e vendeve të punës në SHBA.

Kina, Koreja e Jugut, Bashkimi Evropian dhe të tjerët kanë reaguar ndaj tarifave të vendosura nga Uashingtoni, duke kërkuar kështu konsultime me OBT-në.

Uashingtoni mund të përballet me masa ndëshkuese, nëse mosmarrëveshjet nuk zgjidhen. Megjithatë, Drejtori i Përgjithshëm i Organizatës ka siguruar se ai nuk e sheh mundësinë që SHBA të largohet nga OBT.

Kosova i ka borxh mbi 1 miliard euro

Borxhi publik i Kosovës ka arritur shifrën e përgjithshme mbi një miliard euro. Sipas të dhënave të Bankës Qendrore, borxhi publik në vitin 2016, ishte 852.7 milionë euro ose 13.9 përqind më i lartë se në vitin 2015-të

Por përkundër rritjes, ky nivel i borxhit e mbanë Kosovën në pozitën e vendit me shkallën më të ulët të borxhit publik, krahasuar me vendet e rajonit.

Lulzim Rafuna, këshilltar i ministrit të Financave, ka thënë për KosovaPress se borxhi është rritur gradualisht për dhjetë viteve e fundit.

“Kosova ka borxhin më të vogël publik, është një borxh i cili në qoftë se e masim gjatë dhjetë viteve që nga dita e shpalljes së pavarësisë deri më sot është një borxh që është rrit gradualisht, i cili e kap vlerën e 998 milionë euro, ose kthyer në përqindje kap 15.6 % të GDP-së, që është një borxh që ende është i ulët krahasuar me normën të cilën e parasheh ligji“, tha Rafuna.

Sipas tij, ligji për borxhin publik e parasheh që ky borxh mund të shkojë deri në 40 % të Bruto Produktit Vendor, ndërsa thotë se borxhi është i trashëguar nga viti 2008-të.

Ai ka shtuar se nëse menaxhohet mirë nuk paraqet ndonjë rrezik.

“Borxhin e kemi trashëguar në fillim të viteve 2008-2009-të, pas shpalljes së pavarësisë dhe pas anëtarësimit në Bankën Botërore. Që nga ajo periudhë ka filluar për arsye se kemi trashëguar disa borxhe nga Banka Botërore, kështu që është rrit gradualisht por ende është në masën shumë të ulët…. Rrezik asnjëherë nuk ka në qoftë se menaxhohet në mënyrë të mirë siç është duke u menaxhuar tani. Në qoftë se merret një borxh i cili më pas investohet dhe ai borxh ose ajo kredi kthehet në zhvillim ekonomik, asnjëherë nuk paraqet problem për ta menaxhuar“, tha Rafuna.

Ish-ministri i financave, tash shef i grupit parlamentar të LDK-së, Avdullah Hoti, ka thënë se sa ishte në Qeveri kanë ndërruar ligjin në mënyrë që të mos ketë mundësi asnjë qeveri të hy shpejt në borxh publik i cili mund të jetë në të ardhmen barrë për buxhetin e shtetit.

“Tek borxhi publik ne e kemi bërë sa kemi qenë në Qeveri ndërrimin e ligjit dhe e kemi futë atë klauzolë të investimeve në mënyrë që të mos ketë mundësi asnjë qeveri që të hy shpejt në borxh publik i cili mund të jetë në të ardhmen barë për buxhetin e shtetit. Normalisht me ligjin ekzistuese ne e kemi të kufizuar me 40 % po me këtë klauzolë investimeve ne e kemi kufizuar edhe në maksimumin në 30 % në 10 vitet e ardhshme ose nga 2 % çdo vit sa mund të rritet borxhi publik. Ajo që mbetet të punohet në këtë drejtim në rregullimin, zhvillimin, implementimin më të mirë të këtyre stabilizatorëve ekonomik. Atëherë u patëm munduar që ta diversifikojmë pak borxhin publik ta balancojmë mes huazimit të brendshëm dhe atë të jashtëm”, tha Hoti.

Ndërsa, anëtari i Komisionit për Buxhet dhe Financa, Naser Osmani, thotë se Kosova llogaritet si vendi që nuk ka shumë borxh publik. Jemi diku 14 deri në 15 % të Bruto Produktit Shoqëror që konsiderohet që është në limitet e ulëta të borxhit publik.

“Fatmirësisht Kosova llogaritet si vendi që nuk ka shumë borxh publik. Ne jemi diku 14 deri në 15 % të Bruto Produktit Shoqëror që konsiderohet që jemi në limitet e ulëta të borxhit publik. Shumë projekte janë marrë për investime kapitale sidomos këto të fundit për ndërtimin e disa rrugëve, për ndërtimin e impianteve, për pastrimin e ujërave, që ishte kjo e fundit me franceze dhe disa projekte që janë të domosdoshme të cilat nuk kemi mund me i mbulua me buxhet të Kosovës. Po ajo që është shumë e rëndësishme projektet kryesore, projektet më të mëdha të infrastrukturës rrugore janë mbulua me mjetet nga buxheti i Kosovës”, tha ai.

Ndryshe sipas të dhënave të Bankës Qendrore të Kosovës, në fund të vitit 2009, është miratuar Ligji për Borxhin Publik që i mundëson Qeverisë së Kosovës të hyjë në obligime kreditore për të financuar deficitin eventual buxhetor, si dhe i bënë të mundur emetimin e letrave me vlerë. Në bazë të këtij ligji, borxhi publik i Kosovës nuk mund të kalojë shumën prej 40 përqind të PBB-së.

Mollët shqiptare më natyralet dhe më të pastrat në rajon

Nëse ekziston një frut që të bën shumë mirë ajo është molla. Nëse është mollë shqiptare, akoma më mirë. Molla njihet për vlera dhe përbërës të jashtëzakonshëm ushqimorë që të mbrojnë nga një sërë simptomash dhe sëmundjesh

Dy zonat që mbahen për prodhimin më të lartë të mollëve në vendin tonë janë Korça dhe Dibra. Varietetet që prodhohen më së shumti në Shqipëri janë dy derivatet e Red Delicious, Red Chief dhe Starking.

Të dyja janë të referuara lokalisht si “Starking” madje përbëjnë 52% të pemëve drurëve frutorë, plus mollët e varietetit Golden Delicious që përbëjnë 42%.

Shumica e përbërësve antioksidantë gjenden tek lëkura e mollës. Ndaj këshillohet konsumimi i mollëve, të cilat kanë më pak pesticide dhe kimikate.

Por me rëndësi është fakti që falë klimës së zonave ku rriten mollët shqiptare në Kosovë dhe Shqipëri, spërkatja me pesticide është 10 herë më e ulët se vendet e tjera prodhuese të mollëve në Ballkan dhe 15 herë më e ulët se në vendet e Evropës Qendrore.

Karakteristikat e kultivarëve të mollëve të tokave shqiptare drejtohen nga cilësia dhe qëndrueshmëria ndaj insekteve dhe sëmundjeve, por ndihmesë jep edhe përbërja e tokave.

Nëse kërkon mbrojtje totale, bli mollët tradicionale shqiptare në treg, por lëri për pak minuta në një enë me uthull ose sodë buke dhe ujë si zgjidhje që ndihmojnë në largimin përfundimtar të pesticideve dhe baktereve.

Cilat janë vlerat shëndetësore të mollës?

Mbron trurin

Mollët mbrojnë qelizat bazë të sistemit nervor nga neurotoksinat dhe ulin ndjeshëm rrezikun e çrregullimeve mendore, siç është edhe sëmundja e Alzheimerit .

Ul rrezikun ndaj Ishemisë

Studimet kanë treguar që konsumimi i mollës ul ndjeshëm rrezikun e goditjeve në tru.

Kundër Diabetit

Duke konsumuar tre mollë në ditë, krah rrushit dhe boronicës ul me 7 përqind rrezikun e shfaqjes së diabetit të tipit 2.

Roli që ka molla në këtë rast është rregullimi i nivelit të sheqerit në gjak. Sipas kërkimeve të AgroWeb.org, molla ndihmon sistemin tretës të përthithë më pak glukozë.

Ajo gjithashtu stimulon qelizat beta të pankreasit të prodhojnë insulinë natyrale.

Lufton tumoret

Molla ka përbërës të mrekullueshëm që mund të reduktojnë rreziqet nga kanceri.

Në disa studime të publikuara nga Planta Medica shkruhej se mollët, sidomos ato jeshile, janë efektive në luftën kundër kancerin e zorrës së trashë, kancerit të lëkurës dhe kancerit të mushkërive.

Mbron zemrën

Mollët ulin rrezikun e vdekshmërisë nga sëmundjet e zemrës, për shkak të përbërësve të lartë antioksidantë.

Lëngu i mollës mund të jetë i shijshëm, me vitamina dhe antioksidantë, por magjia qëndron tek fruti i plotë. Vetëm ai të ofron një tufë me fibra dhe vlera ushqimore ashtu siç ka dashur nëna natyrë.

Ata që kanë kujdes për peshën duhet të konsumojnë një mollë të plotë para çdo vakti. Kështu marrin 15% më pak kalori.

AgroWeb tregon që mushkëritë funksionojnë më mirë nëse konsumon mollë. Kjo për shkak të flavonoidëve që gjenden në frut të cilat ulin rrezukun ndaj atakut në zemër.

A e dini?

Molla është në fakt një ‘kushërirë’ e trëndafilit. Ky frut i shijshëm së bashku me pjeshkët, qershitë dhe luleshtrydhet janë të gjithë pjesë e familjes bimore Rosacea apo Trëndafilore.

Turqia nuk e la të kërkojë gaz, dëbohet përfundimisht nga ujrat e Qipros anija-sondë italiane

Anija sondë e kompanisë italiane Eni Sapiem 12000 largohet përfundimisht nga ujrat pranë Qipros, duke ndërprerë çdo mundësi shpimi për naftë

Siç bën të ditur La Repubblica, sonda e cila prej ditësh ishte bllouar nga marina turke tashmë ka lëvizur drejt Marokut. Mediat greko-qipriote kanë shkuar se sonda italiane u largua pasi marina turke e kërcënoi se do ta përplasë.

Sipas versionit të mediave qipriote, komandanti i anijes sondë ka rritur fuqinë e motorave dhe ka tentuar të kapë me shpejtësi bllokun 5 të shpimit, por dy motovedeta të marinës turke i janë afruar gati për t’u karromboluar.

Nga ana tjetër marina italiane e mohon këtë fakt dhe thekson se nuk ka pasur asnjë tentativë nga ushtria turke për t’u përplasur.

Në zonë, me mirëkuptimin e Marinës turke ka mbërritur fregata Zeffiro. Dhe pas komunikimit në radio me autoritetet turke është larguar për furnizim në portin qipriot të Limassol dhe më pas u nis për në Marok.

Claudio De Scalzi, drejtori ekzekutiv i Eni-t tha se tashmë sonda do të nisë shpimet në ujrat pranë Marokut.

Vendimi për largim u mor pasi Turqia nuk lejoi në asnjë sekondë që në mënyrë të njëanshme të kërkohet gaz, pikërisht në ujrat e Qipros së Veriut.

Kjo pjesë është e shkëputur nga Qipro greke, derisa kjo e fundit të pranojë një plan të OKB-së për administrimin e ishullit.

Qindra miliona euro të investuara nuk e nxorën Kosovën nga kriza energjetike

Qindra miliona euro llogariten investimet që janë realizuar në termocentralet e Korporatës Energjetike të Kosovës, që nga viti 2013 kur edhe është privatizuar rrjeti kosovar i shpërndarjes dhe furnizimit me energji elektrike nga konsorciumi turko-amerikan “Çalik -Limak”

Vjetërsia e termocentraleve vazhdimisht është përmendur si arsye kryesore e mungesës së këtij produkti që prodhohet në këtë korporatë.

Vetëm nga buxheti vetanak i KEK-ut, pas privatizimit, thuhet se janë investuar 76 milionë euro në dy termocentralet “Kosova A” dhe “Kosova B”.

Skënder Bucolli, zyrtar për informim në Korporatën Energjetike të Kosovës, në një përgjigje për Radion Evropa e Lirë, thotë se në Termocentralin “Kosova B”, investimet janë bërë kryesisht në gjenerator dhe pompat furnizuese me avull.

“Kurse, investime me vlera më të mëdha janë realizuar në Termocentralin ‘Kosova A’, kryesisht në pjesët që kanë pasur për qëllim rritjen e performancës dhe zvogëlimin e ndotjes së ambientit”, thotë Bucolli.

Nuk është vetëm kjo shumë e investimeve që janë bërë në këto termocentrale. Për Radion Evropa e Lirë, më herët nga zyrtarë të KEK-ut, është thënë se që nga viti 2003 e deri në vitin 2016, më shumë se 400 milionë euro janë investuar në këto dy termocentrale, kurse nuk dihet se sa është vlera e donacioneve.

Në anën tjetër, përfaqësues të shoqërisë civile konsiderojnë se që nga përfundimi i luftës janë investuar mbi 1.2 miliardë euro në sektorin e energjisë.

Përfaqësues të organizatave joqeveritare, ndërkaq, theksojnë se pavarësisht investimeve milionëshe në termocentralet e KEK-ut, përmirësime në terren nuk po vërehen.

Kushtrim Puka, nga Konsorciumi Kosovar i Shoqërisë për Energji (KOSID), thotë për Radion Evropa e Lirë, se në Kosovë ka ende jostabilitet me energji elektrike, por edhe ndotje të ambientit nga termocentralet.

“Vetë problemi i ndotjes së ajrit në Prishtinë, sidomos në komunën e Obiliqit, tregon se nuk është bërë investim i mirëfilltë në këtë drejtim, duke marrë parasysh edhe faktin se termocentralet janë shumë të vjetra”, thotë Puka për Radion Evropa e Lirë.

Pavarësisht investimeve, Termocentrali “Kosova A” që përbëhet nga pesë blloqe, do të mbyllet së funksionuari në vitin 2023, kur pritet të përfundojë dhe vihet në funksion Termocentrali “Kosova e Re”.

Investimet e deritashme në termocentralin “Kosova A”, Kushtrim Puka i quan të gabuara. Ai rikujton se Qeveria e Kosovës ishte zotuar se për shkak të vjetërsisë dhe pamundësisë për t’ia ulur nivelin e ndotjes, në fillim të vitit 2017, do të mbyllet së funksionuari ky termocentral.

Ky ishte zotimi i Qeverisë së Kosovës në Sekretariatin e Komunitetit të Energjisë së Vjenës dhe Bashkimit Evropian, në kuadër të zbatimit të standardeve të Bashkimit Evropian për emetimin e gazrave.

“Këto investime janë të gabuara, për vetë faktin se një termocentral mbi 30 vjet i vjetër, është dashur të dekomisionohet. Ky ka qenë edhe plani fillestar dhe premtim i qeverive të kaluara që ky termocentral do të mbyllet. Është humbur edhe mbështetja e Komisionit Evropian për procesin e dekomisionimit që mund të kushtojë mbi 50 milionë euro, mjete këto që më vonë do të barten te konsumatorët”, shpjegon Puka.

Ndryshe, pas më shumë se një dekadë përgatitjesh në fund të vitit të kaluar Qeveria e Kosovës ka arritur të nënshkruajë marrëveshjen komerciale më kompaninë amerikane “Contour Global”, për ndërtimin e Termocentralit “Kosova e Re”.

Ky termocentral, sipas ministrit të Zhvillimit Ekonomik, Valdrin Lluka, Kosovës i garanton pavarësi energjetike dhe siguri të vazhdueshme me energji elektrike, duke sjellë efekte të mëdha anësore në krijimin e vendeve të punës.

Ndërtimi i këtij termocentrali, që sipas Llukës, kap vlerën prej rreth 1.3 miliard eurosh, do të jetë një katalizator i fuqishëm i zhvillimit ekonomik të vendit. Gjatë fazës së ndërtimit pritet të punësohen rreth 10 mijë persona, kurse pas përfundimit të fazës së ndërtimit, në punë do të mbesin 500 punëtorë.

“New York Times”: Pse Shqipëria është mundësi e shkëlqyer për investitorët

Mëngjesin e sotëm, kreu i qeverisë Edi Rama për të bërë përshëndetjen e zakonshme, ka zgjedhur ta shoqërojë më një tjetër artikull të huaj që flet për vendin tonë

Në një shkrim të “New York Times”, tregohen mundësitë që kanë investitorët e huaj në Shqipëri.

“Mirëmëngjes dhe me këtë artikull të New York Times për mundësitë e shkëlqyera që u ofron sot Shqipëria investitorëve të huaj përmes taksave më të ulëta dhe burokracive të reduktuara ndjeshëm, ju uroj një ditë të mbarë,” shkruan Rama.

Në artikullin që e gjeni këtu, promovohen lehtësitë dhe mundësitë me të cilat përballen investitorët e huaj, mes tyre taksat e ulëta.

Në artikull shkruhet se Italia është investitori dhe partneri më i mirë në Shqipëri, duke investuar 3.5 bilionë euro.

Marrëveshja për tregti, kyçe në bashkëpunimin BE- Britani pas Brexitit

Ministri britanik për Brexit, David Davis, ka thënë sot se Britania dhe Bashkimi Evropian mund të arrijnë një marrëveshje për të krijuar qasje në tregjet e njëra-tjetrës, transmeton Reutes

“Kjo do të jetë një pjesë vendimtare e marrëveshjes, përmes së cilës synojmë të sigurojmë, që partneriteti ynë ekonomik të mbetet i hapur dhe çështjet e tregtisë të jenë të pakufizuara”, ka thënë Davis.

Ai akualisht po kryen disa vizita në kryeqytetet evropiane, derisa Britania e Madhe kërkon të arrijë një marrëveshje të re për tregti me BE-në.

Në të njëjtën kohë, Britania dëshiron që përveç marrëveshjes me Bashkimin Evropian, të jetë e lirë në arritjen e marrëveshjeve të tjera të këtij lloji edhe me vendet e tjera në botë.

Mirëpo liderët evropianë kanë paralajmëruar, se Britania nuk mund të jetë edhe e liruar nga rregullorja e bllokut edhe të ketë tregti të pakufizuar.

Ministri britanik ka thënë se vendi i tij dëshiron të punojë me BE-në, për të krijuar rregulla me standardin më të lartë në botë, duke cituar të drejtat e punëtorëve dhe rregulloret financiare, si fushat të cilat kanë hapësirë për përmirësim.

Komentet e tij kanë qëllim uljen e shqetësimeve të politikanëve evropianë, për atë se Britania mund të ndërprejë taksat dhe rregulloret për të tërhequr biznese globale.

Mbështetësit e Brexitit, kanë vlerësuar, se eliminimi i shpenzimeve të vëna nga BE-ja, do të jetë njëri nga përfitimet kryesore të Britanisë, sapo të largohet nga blloku.

Nënshkruhet me SHELL marrëveshja e kërkimit për naftë në bllokun nr.4

Ministri i Infrastrukturës dhe Energjisë z. Damian Gjiknuri dhe përfaqësuesi i kompanisë SHELL z. Jon-Henk van Konijnenburg firmosën sot marrëveshjen hidrokarbure për kërkim nafte në bllokun nr.4 në tokë

Një proces gare dhe më pas një periudhë intensive 2 vjeçare negociatash e paraprinë firmosjen e kësaj marrëveshjeje me ndarje prodhimi. Në ceremoninë e zhvilluar në zonën e Shpiragut, aty ku SHELL po kryen operacione kërkimi në kuadër të marrëveshjeve për blloqet nr.1 dhe nr.2, ishte i pranishëm edhe Kryeministri z. Edi Rama.

“Kjo marrëveshje përbën një ndarje nga koha kur buxheti i shtetit përfitonte prej tyre vetëm rentën minerare. Tani kemi një marrëveshje që është një garanci e qartë dhe afatgjatë për përfitim reciprok patjetër në interes të kompanisë, por dhe në interes të popullit shqiptar”, u shpreh Kryeministri Rama.

Sipas tij, marrëveshja që firmoset është rezultat i një procesi interesi të ndërsjelltë dhe një këmbëngulje e ndërsjelltë për të arritur në një proces ku jo vetëm garantohen përfitime reciproke po sigurohet gjenerimi që në vitet e para e qindra vendeve të punës, ndërkohë që tërësia e projektit vlerësohet të ketë një impakt me një rëndësi të jashtëzakonshme në ekonominë shqiptare.

Ministri Gjiknuri vlerësoi ecurinë e deritanishme të investimit të SHELL në kërkimin e naftës për marrëveshjen e bllokut nr.1 dhe nr.2. Në këtë drejtim, ai tha se ceremonia e sotme përbën një fazë të re të rritjes së vëmendjes së kompanisë për Shqipërinë.

“Kjo kontratë është e para në fakt që SHELL e bën drejtpërdrejtë me qeverinë shqiptare. Është një shenjë besimi që investitorët seriozë kanë ndaj mjedisit të biznesit në Shqipëri. Sektori hidrokarbur në vendin tonë vazhdon të zgjojë interesin e kompanive të tilla dhe ky është një lajm shumë i mirë.

Ka interes dhe nga kompani të tjera. Prezanca e SHELL në Shqipëri dhe vazhdimi i operacioneve të kërkimit do të ndikojë edhe në ardhjen e kompanive të tjera. Ne angazhohemi se do të bëjmë më të mirën të mirëpresim këto kompani që të investojnë në Shqipëri”, theksoi Gjiknuri.

Ministri tha se operacionet hidrokarbure nuk kanë rëndësi vetëm për fazën e parë të investimit por mbi të gjitha shpresojmë që ky operacion i suksesshëm dhe vlerësimet e pritshme për këtë fushë nafte do ta kthejnë Shqipërinë në një aktor jo vetëm në rajon.

“Edhe kjo kontratë e re që po nënshkruhet ka disa elementë shumë më të mirë se sa kontratat e mëparshme. Kemi patur një negociatë të gjatë, disa vjeçare me kompaninë SHELL dhe kjo kontratë bën të mundur që nëse do të dalë naftë dhe do ketë edhe në bllokun nr.4, qeveria shqiptare që në fillim merr diçka nga fuçia e parë e naftës. Kjo nuk ka qenë në kontratat e tjera dhe ne duam që këtë model të mirë për qeverinë shqiptare por edhe investitorët e huaj ta promovojmë edhe në fushat e tjera”, vlerësoi Gjiknuri.

Zv.Presidenti i SHELL, përgjegjës për operacionet e eksplorimit në Evropë z.Max Brouëers deklaroi se “nënshkrimi i bllokut nr.4 është shumë i rëndësishëm, është kontrata e parë ndërmjet qeverisë shqiptare dhe kompanisë SHELL. Ky dokument parashikon se si do punojmë sëbashku shpresoj në dekadat që vijnë. Fazat e para të punës do të jenë përgatitja dhe planifikimi për të kuptuar më mirë potencialin e nëntokës. Më pas do kalojmë tek eksplorimi dhe shpimi e nëse ato janë të suksesshme atëherë do jetë fillimi i investimeve të rëndësishme ekonomike dhe infrastrukturore të cilat krijojnë përfitime ekonomike në gjithë vendin”.

Të dhënat teknike për marrëveshjen:

Në mënyrë të përmbledhur ja çfarë përfaqëson kjo Marrëveshje: Kërkimi i naftës në këtë Bllok do të kryhet në 3-faza;

– Gjatë Fazës së Parë e cila do të zgjasë 3 vjet do të kryhen 125 km punime seismike 2D dhe ripërpunim i 125 km profileve seismike 2D. Angazhimi financiar minimal për Fazën e Parë shkon në rreth 8.5 milion USD.

– Faza e Dytë do të zgjasë 2 vjet. Gjatë kësaj faze do të kryhen 300 km punime seismike 2D dhe ripërpunim i 200 km profileve seismike 2D. Gjatë kësaj faze është opsional shpimi i një pusi kërkimi me thellësi 3000 m. Angazhimi financiar minimal për Fazën e Dytë shkon në rreth 20 milion USD.

– Faza e tretë do të zgjasë 2 vjet. Gjatë kësaj faze do të kryhet shpimi i një pusi kërkimi me thellësi minimale 3000 m dhe Angazhimi financiar minimal për këtë fazë arrin në 14 milion USD.

Kohëzgjatja e Kontratës për rastin nese do të kemi një zbulim të ri, pra periudha e Zhvillim-Prodhimit, do të jetë deri në 25 vjet me të drejtë zgjatje.

Të dhëna për kompaninë SHELL:

Royal Dutch Shell përfaqëson një kompani lider në botë në sektorin e hidrokarbureve, me kapacitete dhe potenciale të jashtëzakonshme, që zotëron ekspertizën e nevojshme dhe mundësitë financiare për tu angazhuar në operacione kërkimi. Royal Dutch Shell e themeluar në vitin 1907 është sot një nga shoqëritë më të mëdha në botë në fushën e energjisë dhe ushtron veprimtarinë e saj në më shumë se 70 shtete. Historia e Shell në Shqipëri nis në vitin 1994 me marrjen për eksplorim të dy blloqeve “B” dhe “F”. Shell Upstream Albania B.V. përfundoi kërkimet sizmike, por nuk arriti të shpojë puse për shkak të trazirave të vitit 1997, të cilat e detyruan Shell që për arsye madhore ta zgjidhte kontratën e vet me ndarje prodhimi.

Në vitin 2012, Shell Upstream Albania B.V. u rikthye në Shqipëri për të kërkuar naftë në dy blloqe kërkimi, ato 2 dhe 3, fillimisht me 50% të interesave bashkë me Petromanas dhe më pas, që nga marsi 2016, Shell operon i vetëm duke pasur 100% të interesave në këto blloqe. Në një kohë kur Shell tkurri aktivitetin në shumë vende të botës si rezultat i uljes drastike të çmimit të naftës, kjo nuk ndodhi me Shqipërinë ku vazhdoi investimin dhe tashmë po zgjerohet edhe me një tjetër bllok kërkimi.

Autostrada Adriatiko-Joniane, projekti diskutohet gjatë misionit italian të biznesit në Shqipëri

Misioni italian i biznesit në Shqipëri do të sjellë në vendin tonë një delegacion sipërmarrësish nga përtej Adriatikut, të cilët do të njihen me klimën e biznesit dhe mundësitë që ofron Shqipëria

Në takimin që do të zhvillohet në datat 18, 19 dhe 20 shkurt do të diskutohet edhe për një projekt strategjik dhe inovativ si Autostrada Adriatiko Joniane. Autostrada synon të lidhë Europën Qendrore dhe Italinë me Ballkanin Perëndimor, çka do të përbënte një burim të çmuar në kuadrin e bashkëpunimit dhe të investimeve.

Krahas përfaqësuesve më të lartë të biznesit në Itali, në takime do të marrin pjesë përfaqësues të kabinetit qeveritar shqiptar si kryeministri Rama, Ministrat Bushati, Gjiknuri, Klosi, por edhe kryebashkiaku Veliaj.

Në tryezat e rrumbullakta, temat e bisedimeve do të jenë sektori i infrastrukturës, energjia dhe teknologjitë e gjelbra, si edhe makineritë agroushqimore dhe procesimi.

Në këtë perspektivë, grupet e biznesmenëve do të vizitojnë Bulevardin e Ri të Tiranës, Portin e Durrësit, Nënstacionin e Kasharit, TEC-in e Vlorës, si dhe dy ndërmarrje të mëdha të përpunimit të mishit dhe peshkut në Tiranë dhe Lezhë.

Kosova përfiton 38.5 milionë euro për rehabilitimin e hekurudhave

Korniza e Investimeve për Ballkanin Perëndimor ka ndarë për Kosovën 38.5 milionë euro për projektin për rehabilitimin e linjës hekurudhore 10 të Kosovës

Ky projket do të realizohet me mbështetje të Bashkimit Evropian, Bankës Evropiane për Rindërtim dhe Zhvillim dhe Bankës Investive Evropiane.

Marrëveshja për projektin për rehabilitimin e linjës hekurudhore 10 të Kosovës është nënshkruar të enjten ndërmjet Kosovës dhe Bankës Evropiane për Rindërtim dhe Zhvillim, e cila do të zbatoj grantin e Kornizës për Investimeve për Ballkanin Perëndimor.

Projekti hekurudhor 10 i Kosovës është pjesë e rrjetit hekurudhor kryesor të Ballkanit Perëndimor, një zgjerim i Rrjeteve Trans-Evropiane të Transportit, e cila është pjesë e përpjekjeve më të gjera të BE për të promovuar lidhjen e transportit në Ballkanin Perëndimor.

Drejtori i Komisionit Evropian për Fqinjësi dhe Negociata për Zgjerim Christian Danielsson, theksoi se kjo hekurudhë i mundëson Kosovës që të lidhet me vendet fqinje dhe Bashkimin Evropian.

“Kjo hekurudhë lidh Kosovën me vendet fqinje dhe për këtë sot kemi nënshkruar një kontratë qe ka të bëjë më ndërlidhshmërinë e hekurudhës nga Prishtina në jug. Është pjesa e ndërlidhshmërisë me Ballkanin Perëndimor. Në momentin kur kjo linjë të jetë e instaluar do të lejojë lidhje më të mirë dhe mundësi të mira për njerëzit për ti mbajtur kontaktet”.

“Do të bëhet edhe i tërë rindërtimi i korridorit hekurudhor nëpërmjet Kosovës, Bullgarisë dhe Greqisë. E tëra kjo përfshin një program ambicioz për tërë Ballkanin dhe për realizimin e këtij projektikemi dedikuar 1 miliardë euro për këtë qëllim specifik”, theksoi Danielsson.

Ministri i Financave Bedri Hama tha se financimi i ndërtimit të linjës kryesore hekurudhore, e cila na lidh në të dy drejtimet me Bashkimin Evropian, do të realizohet me mbështetje të Bashkimit Evropian, BERZH-it dhe Bankës Investive Evropiane kapë vlerën prej 195. 5 milion euro dhe do të realizohet në tri faza.

“Faza e parë e projektit pritet të fillojë ndërtimin sivjet përshkon 64 kilometra nga Hani i Elezit deri në Fushë Kosovë. Bashkimi Evropian do të financojë 38.5 milion me donacion, BERZH-i dhe Banka Investive Evropiane me nga 19.2 milion kredi. Ndërsa për Fazën e dytë, e cila përshkon linjën nga Fushë Kosova deri në Mitrovicë me 35 kilometra, nga BE-ja janë ndarë mjete në vlerë prej 17.2 milion euro për punët fizike dhe për këtë do të nënshkruajmë marrëveshje në muajt në vijim”, thotë ministri Hamza.

Ai bëri të ditur se Ministria e Financave bashkë me Ministrinë e Integrimit Evropian dhe Ministritë e linjës përmes Këshillit Kombëtar të Investimeve do të aplikojë për financimin e fazës së tretë, e cila përshkon segmentin prej 42 kilometrave nga Mitrovica deri në kufi me Serbinë.