Energjia e rinovueshme do të dominojë prodhimin e energjisë në vitin 2050

Raporti i ri pasqyrues i tranzicionit energjetik tregon se 80 për qind e energjisë elektrike në mesin e këtij shekulli do të prodhohet nga burimet e rinovueshme

Prodhimi i energjisë së rinovueshme do të përbëjë 80 për qind të prodhimit global të energjisë elektrike në vitin 2050, sipas një raporti pasqyrues të tranzicionit të energjisë të publikuar të hënën. I publikuar nga kompania norvegjeze globale e sigurimit të cilësisë dhe menaxhimit të rrezikut, DNV GL, raporti thotë se qymyri, nafta dhe gazi nuk do të jenë më dominues në furnizimin global të energjisë primare deri në vitin 2050.

Panelet diellore, mullinjtë me erë në tokë, hidroenergjia dhe fermat e erës në det do të përbëjnë 80 për qind të prodhimit global të energjisë elektrike në mesin e shekullit tonë, thotë raporti, duke shtuar se kjo energji në shkallë të gjerë do të prodhohet, nga panelet diellore dhe nga ferma të erës në det të hapur.

Raporti tregon se panelet diellore dhe fermat e erës do të rriten me shpejtësi, duke arritur shpërndarjen prej 40 dhe 29 për qind, deri në vitin 2050.

“Pavarësisht prodhimtarisë së energjisë elektrike që rritet me një faktor prej rreth 2.5 gjatë kësaj periudhe, gjenerimi nga lëndët djegëse fosile ka shënuar një rënie me rreth 60 për qind të totalit të saj në vitin 2017”, thuhet në raport.

-Shitjet e makinave elektrike do të rriten

Raporti parashikon gjithashtu një rritje të madhe të numrit të automjeteve elektrike në rrugë për shkak të përparimeve të fundit në elektrifikimin e automjeteve të rënda dhe qelizat e karburantit me hidrogjen që hyjnë në përzierjen e energjisë së automjetit.

“Analiza jonë tregon se rritja e makinave elektrike do të përshkojë një lakore të formës S, për shembull të ngjashëm me tranzicionin e shpejtë të kamerës së parë digjitale” thuhet më tej, duke u shtuar se vetëm pas vitit 2025 gjysma e totalit të makinave të reja të shitura në Evropë do të jenë makina elektrike.

Kjo pikë do të arrihet pak para vitit 2030 për rajonet e Amerikës së Veriut, Paqësorit, dhe Kinës, dhe vetëm pas vitit 2030 për nënkontinentin indian, sipas vlerësimeve të DNV GL. Pjesa tjetër e botës nuk do të arrijë këto nivele para vitit 2040, thuhet në raport.

Sipas DNV GL, autobusët dhe mjetet tjera transportuese komunale do të ndjekin trendin, si dhe do të ketë një shkallë elektrifikimi të mjeteve të transportit detarë për disa anije të linjave të shkurtra, duke krijuar një kërkesë për infrastrukturën e mbushjes në porte.

“Edhe sistemi hekurudhor mund të elektrifikohet, kjo do të ndodhe deri në vitin 2050. Presim që edhe elektrifikimi i trafikut ajror të fillojë në këtë periudhë”, shtohet në raport.

Rritja ekonomike që nuk po sjell ndryshim

Autoritetet vendore dhe ato ndërkombëtare prezantojnë shifra të ndryshme në lidhje me shkallën e rritjes ekonomike në Kosovë gjatë këtij viti. Banka Botërore në raportin e saj të fundit për ekonominë në Ballkanin Perëndimor, potencon se rritja ekonomike në Kosovë për vitet 2018-2020 parashihet të arrijë në 4.8 për qind

Në anën tjetër, parashikimet e Bankës Qendrore të Republikës se Kosovës, parashikojnë që norma reale e rritjes ekonomike do të luhatet në një interval prej 4.2 deri në 4.4 për qind.

Por, pavarësisht shifrave, ekspertë për çështje ekonomike dhe përfaqësues të komunitetit të biznesit, theksojnë se kjo rritje është e pamjaftueshme në aspektin e zhvillimit afatgjatë të Kosovës.

Në termat ekonomik, rritja ekonomike është rritja e prodhimtarisë, kapaciteteve prodhuese dhe të gjithë përbërësve tjerë të një ekonomie. Po ashtu, rritja ekonomike vjen për shkak të rritjes së fuqisë punëtore ose kapitalit.

Muhamet Mustafa, këshilltar i lartë në Institutin për Hulumtime Zhvillimore “RIINVEST”, thotë se viteve të fundit ka pasur një trend të rritjes, por dyshon se ky nivel i rritjes ekonomike mund të përmirësohet gjatë këtij viti për shkak të situatës aktuale politike.

“Frikësohem se nuk do mundësohet rritje më e madhe. Në rend të parë për shkak të një aktiviteti investiv, pasi ka shenja se investimet e huaja janë në rënie e gjithashtu edhe investimet vendore nuk janë në dinamikën e duhur“, thotë Mustafa.

“Në ekonomi, një rëndësi shumë të madhe e kanë pritjet e konsumatorëve dhe pritjet e bizneseve lidhur situatën ekonomike lidhur më stabilitetin politik dhe ekonomik”, thekson Mustafa për Radion Evropa e Lirë.

Edhe drejtori ekzekutiv i Odës Ekonomike Amerikane në Kosovë, Arian Zeka, thotë se është inkurajues fakti se Kosova që nga shpallja e pavarësisë në vitin 2008, ka pasur nivel më të lartë të rritjes ekonomike.

Madje vitin e kaluar norma e rritjes ekonomike në Kosovë, ka qenë më e lartë, krahasuar me vendet e rajonit.

Por, sipas tij, në ekonominë e Kosovës ka qenë e padukshme kjo rritje për shkak se Kosova ka bazën më të ulët nga kalkulohet rritja ekonomike.

Pavarësisht kësaj, shprehet ai, norma mesatare e rritjes ekonomike, e parashikuar për këtë vit është e pamjaftueshme dhe pa ndikim në mirëqenien e qytetarëve të Kosovës.

​“Vendi duhet të bëjë shumë më tepër në aspektin e tërheqjes së investimeve të huaja direkte, të shfrytëzojë të gjitha potencialet e saja ekzistuese për të tërhequr investimet e huaja direkte dhe më pas të performojë tutje me listën e të bërit biznes dhe të eliminojë problemet të cilat janë raportuar për gjithë vitet”, shprehet Zeka.

Në anën tjetër, për të pasur një zhvillim më të qëndrueshëm ekonomik, ulje të shkallës së papunësisë dhe rritje të eksportit të produkteve vendore, rritja ekonomike duhet të arrijë deri në shtatë për qind, thotë Muhamet Mustafa.

“Për Kosovën është me rëndësi një rritje deri në shtatë për qind, rritje kjo që do të zgjaste më tepër se një dekadë në mënyrë që Kosova ta dyfishojë Bruto Produktin Vendor (BPV)”, thekson Mustafa.

“Me dyfishimin e Bruto Produktit Vendor, Kosova kalon në zonën e vendeve të zhvilluara, u ikë tipareve të një ekonomie të pazhvilluar, merr tipare të një ekonomie evropiane dhe adreson me sukses problemet e saj zhvillimore dhe problemet e saj sociale”, shprehet Mustafa.

Në mënyrë që të ketë rritje më të madhe ekonomike, Arian Zeka, thotë se institucionet kompetente duhet të krijojnë ambient më të përshtatshëm për të bërë biznes.

“Është çështje shumë relative nëse flasim për 0.5 për qind më shumë ose më pak. Por, ajo çka duhet të bëhet dhe vërehet është të kemi një rritje ekonomike tetë për qind ose atë që ekspertët gjithmonë thonë një shifër dy shifrore”, thotë Zeka.

Ndryshe, në një raport të Bankës Botërore, të publikuar vitin e kaluar, është thënë se vendeve të Ballkanit Perëndimor,përfshirë edhe Kosovën, do t’iu duhen deri në gjashtë dekada, në mënyrë që nivelet e të ardhurave të kapin ato të Bashkimit Evropian.

KEDS apo Qeveria të kompensojë dëmet që po u shkaktohen bizneseve

Oda e Afarizmit të Kosovës, ka reaguar ashpër lidhur me ndërprerjet e pa paralajmëruara dhe të shumta të energjisë elektrike që janë duke ndodhur në Kosovë dhe humbjet dhjetëra milionëshe që po u shkaktohen bizneseve nga jostabiliteti me furnizim elektrik, duke kërkuar nga KEDS dhe nga Qeveria që të marrë masa në parandalimin e tyre

Oda e Afarizmit të Kosovës nëpërmjet një komunikate ka kërkuar nga KEDS apo Qeveria që për të gjitha dëmet që është duke i shkaktuar energjia elektrike, bizneseve të kompensohen.

“OAK kërkon gjithashtu që bizneseve të ju hiqet maxigrafi si një ngarkesë shumë e rëndë, sidomos tani që për çdo ndërprerje tarifa shkon duke u shumëfishuar. Vetëm gjatë javës së kaluar ka pas raste që brenda një dite të vetme pune të ndërprehet katër herë energjia elektrike, dhe e tërë kjo pa asnjë paralajmërim të bërë nga ana e KEDS-it. Duke pas parasysh, që kompani të tilla serioze, me investime që kalojnë miliona euro dhe që gjithashtu punësojnë një numër të madh të punëtorëve janë të nevojshme për vendin tonë, Oda e Afarizmit të Kosovës kërkon që sa më shpejt të ofrohet një zgjidhje për këtë problem. Furnizimi jo i rregullt me energji elektrike, çmimi i lartë, tarifa jostabile, ndërprerja e paparalajmëruar dhe mos shfrytëzimi potencial i duhur i energjisë janë vetëm disa nga pengesat në zhvillimin e bizneseve në Kosov”, thuhet në komunikatën e odës.

Sipas OAK, probleme të tilla bazike po ndikojnë negativisht në zhvillimin e vendit, rritjen e punësimit dhe po e pamundësojnë ardhjen edhe largimin e pak investitorëve të huaj që janë në Kosovë.

Trepça në prag të falimentimit

Kombinati metalurgjik Trepça aktualisht po përballet me vështirësi të mëdha të funksionimit, me nivel të ulët të prodhimit dhe me mos menaxhim të duhur. E gjithë kjo situatë, thuhet se po sjell ndërmarrjen në krizë dhe afër falimentimit

Ministri i Zhvillimit Ekonomik në Qeverinë e Kosovës, Valdrin Lluka, thotë për Radion Evropa e Lirë se ka probleme në kombinatin metalurgjik Trepça dhe kjo do të vazhdojë edhe për një kohë. “Momentalisht Trepça po kalon në një periudhë të vështirë. Ka problem me prodhim, ka probleme me kapacitete prodhuese, ka probleme me menaxhim, ka probleme me sindikatë. Edhe pse jemi mundur dhe kemi shikuar mundësitë e kapaciteteve prodhuese, por kjo nuk po ndodh në mënyrë të kënaqshme”, thotë Lluka.

Lluka shton si u kanë dhënë mundësitë menaxhmentit të Trepçës që së bashku me sindikatën t’i rishikojnë vendet e punës, që të lëvizin një pjesë të personelit nga ato pozita që janë të ndryshme dhe në mënyrë vullnetare t’i fusin në minierë, pasi që siç thotë Lluka “sa më shumë punëtorë në minierë rezulton edhe me rritje të prodhimit”.

Afër dy vjet që nga miratimi i Ligjit për Trepçën, ende nuk janë përmbyllur të gjitha procedurat për fillimin e rimëkëmbjes dhe zhvillimin e kombinatit. Kjo ndërmarrje, nënvizoi ministri Lluka, është duke kaluar në procese të shumta ligjore dhe se beson që në muajin tetor të kalojë miratimi i statusit të Trepçës në Kuvendin e Kosovës dhe të regjistrohet si shoqëri aksionare.

“Në momentin që kemi ardhur në Qeveri kemi shtuar dinamikën që të përfundojmë këtë aspekt ligjor, por kemi hasur në disa probleme mes sindikatës dhe bordit, ku rezultojë me një grevë nga sindikata. Por, jemi ulur dhe kemi arritur një pajtim që brenda tre muajve t’i zgjidhim ato problem. Komisionet për zgjidhjen e problemeve janë formuar para një muaj dhe janë në fillim të punës dhe kemi kohë që brenda dy muajve të arrihet marrëveshja”, thotë Lluka.

Përfundimi i të gjitha proceseve ligjore me kombinatin Trepça, shton ministri Lluka, do t’i hapë rrugë zhvillimit shumë më të lehtë të “Trepçës” përmes investime private kapitale.

Minatorët e Trepçës në muajin e korrik patën hyrë në grevë për disa ditë për shkak të mospajtimeve që ata kishin pasur me draft-statutin e kombinatit Trepça, të miratuar nga Qeveria e Kosovës. Shyqri Sadiku, kryetar i sindikatës së Trepçës, tha për Radion Evropa e Lirë se institucionet kanë neglizhuar proceset për rimëkëmbjen e Trepçës.

Ai thotë se në formën si po menaxhohet Trepça, po shkohet drejt falimentimit. Sadiku shton se më të gjithë këto probleme janë të njoftuar institucionet kompetente, por që askush nuk ka vullnet që të merret me zgjidhjen e tyre.

“Trepça që nga viti 2014 është duke punuar me rënie të prodhimit, ka rënie drastike. Krahasuar vitin 2016 me vitin 2017, kemi gati për 27 për qind më pak prodhim, kjo është shqetësuese dhe e kemi potencuar. Fatkeqësisht edhe viti 2018, krahasuar me vitin 2017 ka rënie. Për vitin 2018 vetëm në minierën e Stantërgut janë planifikuar prodhim 184 mijë tonë, por që ky plan nuk realizohet më shumë se 60 për qind”, thotë Sadiku.

Sipas të dhënave zyrtare, nga viti 1945 e deri në periudhën para vitit 1990, miniera prodhonte rreth 600 mijë tonë xehe në vit. Kurse sot, nga aty nxirren më shumë se 150 mijë tonë xehe. Kombinati metalurgjik Trepça, gjendet në komunën e Mitrovicës. Sektorët e tij gjenden në pjesën veriore dhe atë jugore të qytetit.

Përveç aseteve në Kosovë, 31 prona të këtij kombinati gjenden në republikat e ish-Jugosllavisë, duke përfshirë këtu fabrika, zyra dhe objekte tjera. Trepça ishte në mesin e ndërmarrjeve më të mëdha në ish-Jugosllavi. Por, që nga pas lufta është përballur me probleme të shumta që asnjëherë nuk arriti të rimëkëmbet. /REL/

Lufta tregtare SHBA-Kinë, Apple mesazh publik Trumpit: Ja si do ta pësojnë amerikanët

Donald Trump ka paralajmëruar se ka gati për miratim një varg të ri tarifash, që do të mbulonin virtualisht të gjitha mallrat kineze që hyjnë në SHBA, teksa Apple njoftoi se lufta tregtare mes Amerikës dhe Kinës do t’i bëjë produktet e saj më të shtrenjta për konsumatorët amerikanë

Paketa e tarifave me vlerë 200 miliardë dollarë është shumë afër miratimit ndaj importeve kineze në SHBA, ndërsa raundi i ri i sugjeruar nga Trump do të përshkallëzonte ndjeshëm luftën tregtare me Kinën.

Shumë ekspertë ekonomie dhe investitorë janë të shqetësuar se kjo betejë do të ndikojë edhe në ekonominë globale. Kina ka kërcënuar të hakmerret, gjë që do të përfshinte edhe veprime kundër kompanive amerikane që operojnë atje.

Trump, i cili ka kërkuar prej kohësh që Pekini të bëjë ndryshime drastike në politikat e tij ekonomike, tregtare dhe ato të teknologjisë, u tha reporterëve në bordin e “Air Force One” se po tregohet “kaq i ashpër me Kinën dhe kështu duhet”.

“Tarifat 200 mld dollarëshe për të cilat po flasim mund të marrin efekt shumë shpejt, në varësi të asaj që ndodh me ata. Në një masë të caktuar, kjo do të jetë në duart e Kinës, – tha Trump. – E urrej ta them këtë, por përveç këtij kësti, kemi edhe një varg tarifash me vlerë 267 mld dollarë që mund të hyjnë në fuqi me një të rënë të lapsit, nëse do të dua unë. Kjo do ta ndryshonte tërësisht ekuacionin”.

Komentet e tij erdhën teksa Apple paralajmëroi se produktet e prodhuara në Kinë, si për shembull “Apple Ëatch” apo kufjet e “Air Pods” do të kushtonin më shumë, nëse Donald Trump do të përvijonte me tarifat 200 mld dollarëshe.

Në një letër drejtuar zyrtarëve amerikanë, si pjesë e konsultave mbi këto masa, kompania tha se edhe disa prej produkteve të tjera të saj do të prekeshin rëndë nga taksat.

“Shqetësimi ynë me këto tarifa është se, Shtetet e Bashkuara do të goditen më rëndë dhe kjo do të rezultojë në rënien e rritjes ekonomike të Amerikës dhe konkurrencës, sikurse edhe në çmime më të larta për konsumatorët amerikanë”, shkruan në letër kompania Apple.

Deri më tani, iPhone-t i kanë bërë bisht taksave, por nëse paketa e re 267 mld dollarëshe do të hynte në fuqi, ajo do të ndikonte edhe pajisjet më të shitura të Apple, që sjellin gati dy të tretat e të ardhurave prej 229 miliardë dollarësh të kësaj kompanie, referuar vitit të fundit fiskal.(tch)

Hulumtimi tregon se MSA-ja nuk ndikoi në rritjen e afarizmit në Kosovë

Mungesa e lidhjeve biznesore dhe imazhi jo i mirë i Kosovës te vendet evropiane shihen si pengesë në eksportin e mallrave

Që nga nënshkrimi i Marrëveshjes së Stabilizim Asociimit, është rritur importi i produkteve nga BE-ja, duke kaluar vlerën e 1.2 miliard eurove gjatë vitit 2017.

Por bazuar në statistika, eksporti ka shënuar trend negativ. Në bazë të hulumtimit të Odës Amerikane me bizneset në vend, rezulton se te 60 përqind, MSA-ja nuk ka pasur ndikim të theksuar në afarizmin e tyre.

Por reformat fiskale kanë ndikuar në përmirësimin e gjendjes krahasuar me 3 vjet më parë. Rezultatet janë arritur pas anketimit të 500 bizneseve nga shtatë rajone të vendit.

Bizneset në Kosovë kanë pak njohuri për përfitimet e MSA-së

Bizneset në Kosovë nuk kanë njohuri të mjaftueshme për përfitimet që sjell Marrëveshja e Stabilizim Asociimit në veprimatarinë e tyre, ka njoftuar Oda Ekonomike Amerikane në Kosovë

Kjo organizatë ka prezantuar të enjten të gjeturat e një studimi lidhur me njohuritë e bizneseve për këtë Marrëveshje, e cila njëherësh shënon paktin e parë kontraktual të nënshkruar mes Kosovës dhe Bashkimit Evropian.

Udhëheqësi i Institutit për Hulumtime Ekonomike në Odën Amerikane, Visar Hapçiu ka thënë se të gjeturat janë bazuar në anketimin e 500 bizneseve në shtatë rajone të Kosovës.

Ministri i Financave në Kosovë, Bedri Hamza në anën tjetër ka përgëzuar Odën Amerikane për këtë studim duke thënë se “publikime të tilla na ndihmojnë të adresojmë çështje, të cilat mund të ndikojnë pozitivisht në operimet e bizneseve”.

Ndërkohë, Kryesues i Komitetit të Prodhimit në Odën Amerikane, Kujtim Gjevori ka vënë theksin në rritjen e dialogut mes sektorit privat dhe atij publik në mënyrë që të mbrohen produktet vendore në tregjet ndërkombëtare.

Borxhi publik i Kosovës rritet në 1.03 miliard euro

Banka Qendrore e Republikës së Kosovës (BQK) ka njoftuar se sektori fiskal u karakterizua me rritje të të hyrave dhe shpenzimeve buxhetore prej 6.3 përkatësisht 10.3 për qind

“Duke pasur parasysh rritjen më të lartë të shpenzimeve buxhetore krahasuar me të hyrat, buxheti i Kosovës deri në qershor 2018 regjistroi deficit primar buxhetor prej 27.1 milionë euro (2.8 milionë euro suficit në periudhën e njëjtë të vitit 2017)”, thuhet në raportin e BQK-së për Vlerësimin tremujor të zhvillimeve makroekonomike, transmeton televizioni publik.

Borxhi publik në TM2 2018 ka arritur në 1.03 miliard euro, që është për 9.2 për qind më i lartë krahasuar me TM2 2017. “Rritja e borxhit publik në Kosovë i atribuohet rritjes së borxhit të brendshëm përderisa borxhi i jashtëm publik u karakterizua me rënie”, ka njoftuar BQK-ja.

Shqipëria nuk e preferon miellin e Kosovës

Barrierat ekonomike ndërmjet Kosovës dhe Shqipërisë vazhdojnë të mbeten probleme që pengojnë thellimin e bashkëpunimit ndërmjet këtyre dy vendeve. Autoritetet në Shqipëri së fundi kanë bllokuar 30 tonë miell gruri të ardhur nga Kosova. Bllokimi thuhet se është bërë në kuadër të masave të përforcuara për sigurinë e cilësinë ushqimore, të produkteve që importohen

Të kontaktuar nga Radio Evropa e Lirë, zyrtarë të Ministrisë së Tregtisë dhe Industrisë në Qeverinë e Kosovës, nuk janë prononcuar rreth kësaj çështje. Por, që sipas përfaqësues të Shoqatës së Mullisëve kjo ndalesë nuk ka të bëjë me cilësinë e miellit, por për shkak të konkurrencës.

Muhamet Ferizi, kryetar i kësaj Shoqate thotë për Radion Evropa e Lirë se mielli i Kosovës është cilësorë dhe plotëson standardet.

“Pas luftës në Kosovë është hapur tregu i Shqipërisë për produktin e miellit dhe ata e panë rrezikun nga konkurrenca, për atë edhe bëjnë ndalesa të tilla. Edhe pse ekziston marrëveshja për Tregti të Lirë CEFTA, Shqipëria ka miratuar edhe një vendim tjetër për produktin e miellit, e që ai vendim nuk ka të bëjë as me standardet tona, e as të Shqipërisë, e as të Bashkimit Evropian. Niveli i proteinës që rezultoi të ishte në miell mbi 11 për qind, ne themi se i plotëson standardet, por Shqipëria thirret në vendimet e tyre vetëm që të mos të kenë konkurrencë. Ne kemi biseduar, por bisedat nuk kanë dhënë efekt”, thotë Ferizi.

Barrierat që Shqipëria ka vendosur për produktin e miellit, thotë Ferizi, janë të vazhdueshme dhe se vështirë se mund të bëhet një zgjidhje.

“Këtë pengesë që kemi do ta kemi përsëri pasi që bisedat e përfaqësuesve të Kosovës dhe Shqipërisë nuk janë korrekte. Kosova duhet të veprojë me masa të ngjashme dhe të ndalojë produktet e Shqipërisë në tregun e Kosovës”, thotë Ferizi.

Në anën tjetër, Flamur Keqa, ish-drejtor i Departamentit të Tregtisë në kuadër të Ministrisë së Tregtisë dhe Industrisë, tha për Radion Evropa e Lirë se në tregtinë ndërkombëtare duhet të respektohen rregullat dhe cilësia për të cilat dakordohen pjesëmarrësit në atë marrëdhënie tregtare.

Sipas tij, nëse cilësia nuk ka qenë në nivelin e duhur bëhet edhe refuzimi, por nëse bëhet për qëllime të tjera, atëherë është shkelje tregtare.

“Në marrëdhëniet tregtare duhet të ketë korrektësi dhe duhet të përmbushen obligimet që dalin nga marrëveshja tregtare. Por, nëse Shoqata e Mullisëve ka deklaruar se mielli që e ka pasur për dedikim tregun e Shqipërisë ka qenë i cilësisë së duhur dhe shteti shqiptar e ka refuzuar dhe ka krijuar pengesë në tregtimin e këtij malli, atëherë kjo është e papranueshme”, thotë Keqa.

Ai thotë se edhe përkundër marrëveshjeve dhe takimeve të shpeshta të qeverive të Kosovës dhe Shqipërisë, barriera tregtare ka shumë mes dy vendeve.

Kosova dhe Shqipëria, shton ai, do të duhej të intensifikonin raportet tregtare. “Kosova dhe Shqipëria duhet të kenë një treg të përbashkët, një treg të lirë dhe edhe pengesat më të vogla që dalin gjatë tregtimit, ato duhet të eliminohen dhe të dy shtet të zhvillohen në aspektin tregtar dhe ekonomik”, thotë Keqa.

Shqipëria, jo rrallë herë ka vendosur barriera tregtare prodhimeve kosovare, duke dëmtuar kështu ekonominë e Kosovës. Ndërkohë, për të pasur një bashkëpunim më të lehtë ekonomik ndërmjet Kosovës dhe Shqipërisë, janë investuar miliarda euro në infrastrukturë rrugore.

Përveç kësaj, ndërmjet Kosovës dhe Shqipërisë janë nënshkruar disa marrëveshje për bashkëpunim ekonomik. Republika e Kosovës dhe ajo e Shqipërisë së fundi po planifikojnë të liberalizojnë lëvizjen e mallrave dhe unifikimin e doganave. Për këtë çështje, të dy qeveritë janë duke harmonizuar dokumentacionet e nevojshme për mallrat që qarkullojnë mes Kosovës dhe Shqipërisë.

Sipas procedurave të reja që janë në përgatitje e sipër, planifikohet që të mos kërkohen dokumente të panevojshme, por të njihen në mënyrë reciproke dokumentet e të dyja shteteve.

Erdogan propozon tregti pa dollarin amerikan

Presidenti i Turqisë, Recep Tayyip Erdoğan, propozon tregti pa dollarin amerikan. “Varësia e tregtisë ndërkombëtare ndaj dollarit amerikan ka filluar të bëhet pengesë përballë nesh. Prandaj ne propozojmë të fokusohemi mbi alternativën e bërjes tregti me valutat tona”, tha Erdoğan në Samitin e 6-të të Këshillit Turkik në Kirgistan, raporton Anadolu Agency

“Disa vende përpiqen t’i nxjerrin në plan të parë kërcënimet, shtypjet dhe shantazhin, në vend të diplomacisë, dialogut dhe multilateralizmit në zgjidhjen e çështjeve ndërkombëtare.

Si pasojë e metodave si kufizimet tregtare, tarifat doganore dhe sanksionet, marrëveshjet që janë vepër e shumë viteve mund të bëhen të pakuptimta për një çast”,- tha presidenti turk.

Erdoğan theksoi se Turqia do të vazhdojë të mbrojë dialogun, diplomacinë dhe drejtësinë në solidaritet me komunitetin ndërkombëtar.

Ai shtoi se bashkëpunimi dhe solidariteti mes shteteve turkike do të kontribuojë në funksionimin e drejtë të sistemit ndërkombëtar, shtoi Erdoğan. Presidenti i Turqisë theksoi Ballkanin, Afrikën e Veriut dhe Palestinën nuk i konsiderojnë jashtë botës turkike.

“Derisa çështja palestineze të mos arrijë një zgjidhje të drejtë dhe të përhershme, as vendosja e sigurisë dhe stabilitetit ndërkombëtar nuk do të jetë e mundur”,- deklaroi Erdoğan, duke riafirmuar zotimin për të vazhduar përpjekjet për paqe dhe drejtësi në rajonet si Palestina, Siria, Iraku, Jemeni dhe Afganistani.

Samiti mbahet në mikëpritje të presidentit të Kirgistanit Sooronbay Jeenbekov në Qendrën Kulturore Rukh Ordo. Krahas presidentëve të Turqisë, Azerbajxhanit, Kazakistanit dhe Uzbekistanit, edhe Hungaria si shtet vëzhgues është përfaqësuar nga kryeministri i saj.