Lajm.co

Lekaj: Ndaj secilit që s’kryen punë në Ministri do të merren masa

Ministri i Infrastrukturës, Pal Lekaj, ka thënë se të gjitha veprimet e mëtutjeshme të Ministrisë që ai udhëheq do të jenë në frymën e rritjes së cilësisë në infrastrukturë rrugore, hekurudhore dhe atë të aviacionit civil

Ai ka thënë se ndaj secilit që nuk do të arrijë të jetë në krye të detyrës në kuadër të kompetencave, do të ndërmerren veprime ndaj tij.

“Duke dashur të jemi koherent me dinamikën dhe programin e Qeverisë e të Kryeministrit, z. Haradinaj, realizuam punëtori rreth riorganizimit të brendshëm të Ministrisë së Infrastrukturës, në kuadër të së cilës diskutuam raportin vjetor të secilit Departament për vitin 2017. Po ashtu diskutuam gjerë e gjatë, planifikimet për vitin 2018, për regjistrin e shfrytëzuesve të brezit rrugor në gjithë Republikën e Kosovës, për regjistrimin e pronave të Ministrisë dhe hapësirave reklamuese, për të gjitha Udhëzimet Administrative të cilat janë në proces të përpilimit dhe nënshkrimit dhe në fund diskutuam për organogramin e funksionimit të të gjitha departamenteve dhe divizioneve brenda Ministrisë”, ka thënë Lekaj.

“Duke i falënderuar për kontributin e tyre secilin nga udhëheqësit e departamenteve për idetë që dhanë, i siguroj qytetarët e vendit se veprimet tona të mëtutjeshme do të jenë të gjitha në frymën e rritjes së cilësisë në infrastrukturë rrugore, hekurudhore dhe atë të aviacionit civil. Gjithsecili që nuk do të arrijë të jetë në krye të detyrës në kuadër të kompetencave, do të ndërmerren veprime ndaj tij/saj. Jemi të vendosur të sjellim rregull dhe të ngrisim në nivelin e duhur respektimin e institucioneve”, ka shtuar më tej.

Aliu: Dalja në zgjedhje ka tejkaluar çdo votim të brendshëm në Lëvizje

Deputeti i Lëvizjes Vetëvendosje, Liburn Aliu, ka thënë se dalja në zgjedhjet për kryetar të kësaj lëvizje është më e madhja ndonjëherë

“Nga vizitat që jam duke bërë gjithandej nëpër vendvotime dhe nga informatat që po më vijnë nga qendrat e LVV, nga shifrat e daljeve në votime deri më tani është tejkaluar cilido votim i brendshëm në lëvizje.

Reformës së shumëkërkuar organizative po i hapet rruga”, ka shtuar ai në Facebook.

Kush po luan “Poker” me fatin e Kosovës

Ambasadori Amerikan, Greg Delawie ditë më parë, iu adresua Kosovës lidhur me Gjykatën Speciale, ku ka paralajmëruar se do të përballën me pasoja të gjithë ata që e përkrahin shfuqizimin e Speciales, duke shtuar se SHBA-ja përkrah fuqishëm fuqizimin e saj

Njohësit e çështjeve politike dhe profile të ndryshme nga subjekte politike vlerësojnë se kërkesa e z. Delawie duhet kuptuar me seriozitet të plotë sepse Ambasadori amerikan flet në emër të SHBA-ve.

Avdyli: Kosova e vogël nuk guxon të luajë “Poker”, me fatin e vet

Deputeti i LDK-së, Haxhi Avdyli, konsideron se porosia më e qartë e cila është thënë ndonjëherë e Ambasadorit Amerikan Greg Delawie është kjo porosi që ka thënë tash.

“Sot nëse klasa politike e Kosovës ka luksin që të mos merr parasysh këto porosi të miqve tanë, do të ishte sjellje tipike e liderëve diktatorial që ose e kanë izoluar vendin e tyre ose e kanë mbaruar me turp të burgosur ose të eliminuar nga vet populli i vet. Kosova e vogël dhe e brishtë nuk guxon të luaj “Poker”, me fatin e vet por rrugëtimin për shtet ndërtim filluar me SHBA-në duhet ta vazhdojë edhe me tutje”, është shprehur deputeti i LDK-së Haxhi Avdyli.

Ai ka thënë, se Kosova nuk ka aleat rezervë të SHBA-ve, dhe ajo bashkë me Evropën e solli Kosovën deri tek ky stad i shtet ndërtimit, andaj dhe kjo aleancë është qenësore të mbijetojë, në mënyrë që Kosova të ec sa më shpejt përpara. “Ardhmëria e Shtetit të Kosovës, është më e rëndësishme se fati i secilit qytetar të Kosovës veç e veç”, ka thënë deputeti Avdyli.

Makolli: Rrezikim i madh i ardhmërisë sonë

Sekretari i Përgjithshëm në AKR, Vesel Makolli, konsideron është për tu çuditur pasi pikërisht ata që e bënë Gjykatën tani po kërkojnë ta zhbëjnë.

“Shteti është mbi të gjitha, andaj ne assesi nuk bënë të vëmë në pikëpyetje ardhmërinë e shtetit tonë dhe të fëmijëve tanë. Për këtë shtet dhe për këtë liri të pritur me shekuj, dihet se janë flijuar e sakrifikuar me dhjetëra e mijëra njerëz (shqiptar shtetas të Kosovës), andaj ti vësh në rrezik marrëdhëniet tona me ata që patën fjalën kryesore për njohjen ndërkombëtare të shtetësisë sonë, sidomos me amerikanët është një non-sens dhe një rrezikim i madh i ardhmërisë sonë”, ka thënë Makolli.

Ai ka thënë se, deklaratat e Ambasadorit Amerikan Greg Delawie nuk nënkupton që ata persona do të burgosen, por përkundrazi ata do të vazhdojnë jetën normale.

“Nga kjo konkludojmë se nuk po burgosen individët por po “burgoset” Kosova . Pra do të “burgosen” shtetasit e saj që edhe ashtu janë në një lloj “Getoje”, por ndëshkimi që do të vijë do të ketë pasoja edhe për ardhmërinë tonë. Pasi Serbia me ndihmën e Rusisë po thur projekte dhe skenarë për zhbërjen e shtetësisë së Kosovës, gjegjësisht për ndarjen e saj. Prandaj, ne të gjithë duhet të jemi syçelë dhe mos t’u japim as më të voglin shans që armiqve tanë t’ju hapim rrugë për ti realizuar qëllimet e tyre djallëzore”, ka thënë Makolli.

Gjykata Speciale mund të egërsohet

Nga ana tjetër analisti politik, Skënder Zogaj, ka thënë se Ambasadori amerikan në Kosovë, Greg Delawie zëshëm dhe me këmbëngulje po kërkon, që të mos ndodh zhbërja e Gjykatën Speciale, sepse Kosova dhe shtetasit e saj do të përballen me pasoja tepër të rënda.

“Udhëheqja e Kosovës është mirë ta kujtoj kërkesën e dikurshme të SHBA-ve drejtuar Millosheviçit, i cili mospërfilljen e kërkesës e pagoi me bombardimet 78 ditësh dhe me dorëzimin e turpshëm e me pasoja të rënda. Më keq se kaq, do të ndodh me udhëheqjen e Kosovës nëse vendos kundër Gjykatës Speciale, të cilën nuk mund ta ndaloj, pos që do ta egërsojë Gjykatën Speciale, e cila pa Amerikën krah Kosovës, ajo do të jetë edhe më e rreptë në kuadër të Këshillit të Sigurimit të OKB-së. Tashmë nuk ka asnjë dilemë, kundërshtuesit e Gjykatës janë kundër interesit historik të popullit Kosovës, por edhe kundër vetvetes, sepse kanë zgjedhur rrugën më të gabuar dhe më të kushtueshmen”, është shprehur analisti politik Zogaj.

Prirje e qëllimshme djallëzore

Publicisti Faton Abdullahu, ka thënë për gazetën “ Bota sot” se nuk ka gjë më të keqe e më të dëmshme sot për Kosovën, se kur krijohet një rrethanë e re, që në një mënyrë lë të kuptohet, se patriotizmi shqiptarë ndërlidhet me domosdo për ta kundërshtuar SHBA-në dhe miqtë e tjerë ndërkombëtar të Kosovës.

“Me Gjykatën Speciale, disa individë e kanë sjell një realitet të tillë të ri që determinueshëm nënkupton – të jesh patriot duhet ta kundërshtosh Gjykatën Speciale, sepse ajo po themelohet për ta gjykuar luftën e UÇK-së, edhe pse rrjedhimisht duhet edhe të mos hezitosh poqe nevoja ta kundërshtosh, për këtë shumë edhe SHBA-n dhe miqtë e tjerë perëndimor. Në historinë e pasluftës, një realitet i tillë i ri kundërthënës dhe regresiv është determninuar nga disa politika që kanë udhëhequr disa konceptualistë në Lëvizjen Vetëvendosje dhe disa të tjerë të njohur si islamistë politik. Pra në këtë renditje, kjo është hera e tretë kur u krijua ky realitet i ri në historinë tonë të pasluftës, nga disa njerëz që do të duhej të jenë më së shumti mirënjohës për ndihmën e SHBA-së dhe njohësit më të mirë të rëndësisë vitale të kësaj ndihme”, është shprehur Abdullahu.

Ai ka thënë se në këtë pikë, sikur duket se ka një prirje të qëllimshme djallëzore këtu për t’i vënë në kundërshtim njëra me tjetrën patriotizmin shqiptarë shtet ndërtimin tonë dhe demokracinë dhe raportet e mira me SHBA-të.

“Kjo është e keqe që duhet të ndalet sa më shpejtë dhe shfuqizimi i këtij realiteti të cilin po e ndërton një klan i caktuar njerëzish më së miri bëhet me fuqizimin e Gjykatës Speciale e cila tashmë s’ka alternative”, është shprehur publicist Abdullahu.

Qytetarët e Kosovës janë në krah të SHBA dhe jo të politikaneve

Edhe njohësi i çështjeve politike, Artur Roshi, ka thënë se shtetet e Bashkuara te Amerikës janë të interesuara që në Kosovë të ketë një fillim të ri, për një epokë të re të shtetit të së drejtës.

“Kam bindjen e thellë se qytetarët e Kosovës janë në krah të SHBA dhe jo të politikaneve. Këtu mbaron historia. Gjykata Speciale nuk mund të shfuqizohet. Politikanet penetrojnë kur nuk është qëndrimi i qytetarëve i njëmend, ndërsa në këtë rast që kemi një mendim qytetar të njehsuar politikanëve ju duket vetja të vetmuar”, ka thënë Roshi.

Ai mendon, se kaq shumë intuitë kanë politikanët e Kosovës saqë nuk kanë shteg për të dalë, dhe në këto raste ka vetëm një drejtim pa kthim me shpresë se do gjejnë rrugëzgjidhje.

“SHBA-ja funksionon mbi ligjshmëri ku janë të përputhura ” e drejta natyrore” dhe “ligji pozitiv”, dhe si të tillë nëpërmjet diplomacisë i largojnë si fillim nga pushteti, e më vonë nga politika, dhe në fund me pafuqinë e politikanit apo si qytetar i nënshtrohet drejtësisë e cila vendos se ata izolohen, ose jo ani pse vitet e tyre mund të kenë kaluar në fashën e moshës së tretë”, është shprehur njohësi i çështjeve politike Roshi.

Tillerson nis vizitën evropiane, Irani pritet të dominojë diskutimet

Sekretari amerikan i Shtetit, Rex Tillerson, pritet të arrijë në Londër gjatë ditës së sotme, në kuadër të javës së tij në Evropë. Përveç Londrës ai do të vizitojë edhe Parisin, Varshavën si dhe do të jetë pjesëmarrës në Forumin Botëror të Ekonomisë në Zvicër

Një zyrtar amerikan, duke folur në kushte anonimiteti, ka thënë se Irani do të dominojë takimin e Tillersonit me aletët amerikanë. Kjo vizitë vjen në mesin e negociatave të prapa skenës, lidhur me fatin e marrëveshjes bërthamore që Irani ka me fuqitë botërore.

Sipas këtij pakti, Irani duhet të frenojë aktivitetet e saj bërthmore në shkëmbim të lehtësimit të sanksioneve kundër Teheranit.

“Siç e dini ne kemi bashkëpunim të ngushtë me Britaninë dhe Francën në përpjekjet tona për të përmbushur hapësirat e marrëveshjes dhe hapat e ardhshëm, në atë se si të kufuzojmë ndikim iranian në këtë rajon”, u ka thënë gazetarëve, zyrtari i Departamentit amerikan të Shtetit më 19 janar.

“Kështu që mendoj se do të jetë prioritet i lartë në këto bisedime”.

Më herët gjatë këtij muaji, presidenti amerikan, Donald Trump ka thënë se dëshiron të punojë me aleatët evropianë dhe me Kongresin për të rregulluar ato që, ai i ka cilësuar “të meta të tmerrshme”, të marrëveshjes bërthamorë të vitit 2015.

Trump ka paralajmëruar se Uashingtoni mund të largohet nga pakti, nëse ai nuk ndryshohet brenda katër muajsh.

Në Londër, Tillerson pritet ta takojë ministrin e Jashtëm britanik, Boris Johnson dhe këshilltarin e sigurisë kombëtare, Mark Sedwill, për të diskutuar bashkëpunimin në Iran, Siri, Libi, Korenë Veriore dhe Ukrainë.

Më 23 janar në Paris, Tillerson do të takohet me zyrtarë të lartë francezë për të diskutuar çështjet e njëjta.

Për dy ditë të tjera ai do të jetë në Davos të Zvicrës për të përcjellur presidentin Trump në vizitën e tij të parë si president në forumin ekonomik vjetor.

Më 26 janar, Tillerson do të jetë në Poloni për të diskutuar me zyrtarët e lartë të këtij vendi për çështje të sigurisë dhe ekonomisë.

Zyrtari amerikan ka thënë se Tillerson do të diskutojë prezencën e ushtrisë amerikane në Poloni, të cilat janë vendosur aty me trupa të vendeve të tjera aleate, pas vendimit të Rusisë për të aneksuar Krimenë nga Ukraina më 2014, si dhe për mbështetjen ruse për separatistët në lindje të Ukrainës.

Erdogan, para mijëra qytetarëve në Bursa: Shqiptarët dhe turqit janë një popull

Presidenti i Republikës së Turqisë, Recep Tayyip Erdogan ka folur para mijëra qytetarëve në qytetin e Bursës

Erdogan ka folur rreth operacionit kundër militantëve kurd në Siri, ku ka filluar të bombardojë përmes aeroplanëve caqet e tyre.

“Ne do ta përfundojmë operacionin në një kohë shumë të shkurtër”, tha Erdogan rreth operacionit në Afrin.

Erdogan, i cili dha mesazhin e unitetit, nuk harroi shqiptarët dhe boshnjakët.

“Ja çfarë dua nga ju. Le të mos e harrojmë Rabia’rim. Përmbajtja e kësaj Rabia është shumë e rëndësishme. Nuk ka ndarje këtu. Këtu ka vetëm unitet. Këtu ekziston vetëm një komb. Ne jemi 80 milionë turq, kurd, laz, çerkez, gjeorgjian, romë, boshnjak dhe shqiptar”, tha lideri turk.

Nesër Kryesia e Kuvendit, hiqet nga rendi i ditës zhbërja e Speciales

Kryesia e Kuvendit të Kosovës, do të mblidhet nesër dhe në rend dite të shqyrtimit janë 18 pika.Në asnjërën pik nuk përmendet shfuqizimi i Gjykatës Speciale, që ishte iniciuar me nënshkrimin e disa deputetëve

Kjo kishte bërë që të kishte reagime të ashpra nga ambasadorët e akredituar në Kosovë.Kuvendi njofton se mbledhje e Kryesisë do të mbahet të hënën në ora 11:00.Njoftimi i plotë i Kuvendit:Mbledhja e Kryesisë së Kuvendit, me kryetarët e grupeve parlamentare

Tre liderët kosovarë, Hashim Thaçi, Kadri Veseli e Ramush Haradinaj, javë më parë, morën iniciativë që ta shfuqizojnë Specialen, nismë kjo që mori mbështetjen e 43 deputetëve.

Kadri Veseli menjëherë pas përfundimit të festave të fundvitit doli me një shkrim autorial ku fliste rreth zhvillimeve për Specialen dhe tërheqjen e tij ndaj kësaj situate, dukë thënë se kjo gjykatë nuk mund të ndalohet. Ai tha se iniciuesit dështuan, përfshirë edhe veten. “Nuk menduan për reaksionet”, u shpreh mes tjerash kreu i PDK-së.

Edhe një herë zhëbrja e Speciales u dërguar në Kryesi, por dështoi të shkojë mëtutje për shkak të mungesë së kuaorimit. Ambasadorët e vendeve të BE’së dhe SHBA’së kanë bërë thirrje të mos shfuqizohet Specialja. Kanë thënë se kjo gjykatë do t’i ndjekë vetëm ata që kanë bërë krime lufte.

Njoftimi i Kuvendit

Luten te gjithë gazetarët, fotoreporterët dhe kameramanët e redaksive të akredituar në Kuvendin e Kosovës, që me rastin e përcjelljes së takimeve dhe ngjarjeve të tjera, për të cilat ftohen të raportojnë, të vijnë 15 minuta para se të fillojnë takimet.

Rendi i ditës1. Miratimi i procesverbaleve nga mbledhjet e mëparshme,

2. Përgatitjet për seancë plenare:

3I. Pikat e papërfunduara nga Seanca plenare e mbajtur më 14 dhjetor 2017:

1. Votimi i Raportit të Institucionit të Avokatit të Popullit për vitin 2016,

2. Shqyrtimi i Raportit vjetor të Fondit të Kursimeve Pensionale të Kosovës për vitin 2016,

3. Shqyrtimi i kërkesës së Fondit të Kursimeve Pensionale të Kosovës për miratimin e taksave vjetore për vitin 2018,4. Formimi i Komisionit Ad-hoc për përzgjedhjen e kandidatëve për anëtarë të Bordit të Radiotelevizionit të Kosovës,5. Formimi i Komisionit Ad-hoc për përzgjedhjen e kandidatëve për një (1) anëtar të Bordit për Ankesa.

II. Përgatitjet për seancën plenare të radhës:

1. Koha për deklarime jashtë rendit të ditës,

2. Koha për pyetje parlamentare,3. Miratimi i procesverbalit nga seanca e mëparshme,4. Interpelanca e Kryeministrit Ramush Haradinaj, sipas kërkesës së Grupit Parlamentar të Lidhjes Demokratike të Kosovës, për ta informuar Kuvendin në lidhje me gjuajtje me armë nga z. Dardan Gashi, zëvendëskryeministër dhe ministër i Diasporës dhe Investimeve Strategjike,

5. Shqyrtimi i Propozim-rezolutës për miratimin e objektivave për zhvillim të qëndrueshëm – Agjenda 2030 për Kosovën,

6. Shqyrtimi i parë i Projekt Kodit të Drejtësisë për të Mitur,

7. Shqyrtimi i parë i Projektligjit për kontrollin e brendshëm të financave publike,

8. Shqyrtimi i parë i Projektligjit për parandalimin e konfliktit të interesit në ushtrimin e funksionit publik,9. Shqyrtimi i parë i Projektligjit për Trajtimin e Ndërtimeve pa Leje,

10. Shqyrtimi i parë i Projektligjit për ndryshimin dhe plotësimin e Ligjit Nr. 04/L-034 për Agjencinë Kosovare të Privatizimit, i ndryshuar dhe i plotësuar me Ligjin Nr. 04/L-115 dhe me Ligjin Nr. 05/L-080,11. Shqyrtimi i parë i Projektligjit për Azil,

12. Shqyrtimi i dytë i Projektligjit për Standardizim,

13. Shqyrtimi i Raportit vjetor të Autoritetit Rregullator të Komunikimeve Elektronike dhe Postare për vitin 2016,14. Shqyrtimi i Raportit vjetor të Agjencisë së Statistikave të Kosovës për vitin 2016,

15. Shqyrtimi i Strategjisë së Energjisë të Republikës së Kosovës 2017-2026,

16. Zgjedhja e një (1) kandidati për anëtar joekzekutiv të Bordit të Bankës Qendrore të Republikës së Kosovës,17. Zgjedhja e 5 (pesë) zëvendësve të Avokatit të Popullit,

18. Propozimi i Grupit Parlamentar të PDK-së për zëvendësimin e anëtarit në Komisionin për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit.

III. Shqyrtimi i propozimeve dhe kërkesave

Trupat turke depërtojnë në rajonin e kurdëve në Siri

Kryeministri turk, Binali Yildirim, ka thënë se trupat turke kanë kaluar kufirin sirian në ditën e dytë të operacionit të Ankarasë në territorin e udhëhequr nga kurdët

Yildirim ka thënë sot se trupat kanë kaluar në rajonin Afrin, i cili kontrollohet nga Njësitet Kurde për Mbrojtjen e Popullit (YPG), kanë raportuar mediat turke. Nuk është specifikuar numri i ushtarëve turq të përfshirë në këtë operacion.

Yildirim është cituar të ketë thënë se operacioni ka qëllim, krijimin e një zone të sigurisë 30 kilometra në brendi të Sirisë. Forcat turke janë nisur më 20 janar një operacion për larguar kurdët e mbështetur nga Shtetet e Bashkuara nga territori Afrin, pavarësisht paralajmërimeve të SHBA-së se një lëvizje e tillë mund të destabilizojë rajonin.

Turqia akuzon kurdët në Siri se kanë lidhje me Partinë e Punëtorëve të Kurdistanit, e cila zhvillon kryengritje në juglindje të Turqisë në më shumë se 30 vite. Kjo parti konsiderohet grup terrorist nga Turqia, Shtetet e Bashkuara dhe Bashkimin Evropian.

Zyrtarët e milicisë kurde kanë thënë më herët se të paktën 10 persona, kryesisht civilë janë vrarë në sulmet ajrore të Turqisë drejt rajonit Afrin.

Zyrtarët turq kanë thënë se ministri i Jashtëm, Mevlut Cavusoglu, ka folur në telefon me sekretarin amerikan të Shtetit, Rex Tillerson dhe se gjenerali i lartë i Turqisë, Hulusi Akar, ka informuar homologun e tij amerikan dhe atë rus për operacionin.

Ministria e Jashtme ruse ka thënë sot, se ministri i Jashtëm rus, Sergei Lavrov dhe sekretari amerikan i Shtetit, Rex Tillerson kanë diskutuar përmes telefonit lidhur me konfliktin në Siri, në veçanti për atë si të arrihet stabiliteti në veri të shtetit.

Lëvizjet turke kundër Njësiteve Kurde për Mbrojtjen e Popullit (YPG), mund të rrisin tensionet me Shtetet e Bashkuara.

SHBA mbështetet tek YPG për të luftuar militantët e Shtetit Islamik në Siri dhe ka njoftuar për planet e krijimit të një forceje të sigurisë prej 30,000 personash në veri të Sirisë, ku do të ketë edhe luftëtarë të YPG-së.

Ministria e Mbrojtjes në Rusi ka thënë se është duke tërhequr trupat e saj nga rajoni Afrin për “të parandaluar ndonjë provokim eventual dhe të largojë rrezikun për jetën e ushtrisë ruse”.

Rusia i ka dhënë mbështetje vendimtare presidentit sirian, Bashar al-Assad, ushtria e të cilit ka lënë të vdekur mijëra persona dhe ka detyruar shpërnguljen e miliona personave, pas shpërthimit të konfiliktit në mars të vitit 2011.

Me gjoba të larta, Policia tenton t’i ulë aksidentet

Gjoba shumë të larta është duke aplikuar Policia e Kosovës ndaj çdo personi që thyen rregullat në komunikacion. Aplikimi i këtyre gjobave ka filluar nga 1 janari i këtij viti. “Qëllimi ynë për zbatimin e ligjit të ri për trafikun rrugor është krijimi i një sigurie më të madhe në trafik”, ka thënë për Radion Evropa e Lirë, zëdhënësi i Policisë së Kosovës Daut Hoxha

“Ne kemi parë se vitin e kaluar janë rritur aksidentet me fatalitet, andaj kemi marrë masa për ta ndryshuar situatën”, ka shtuar ai.

Që nga një janari Policia e Kosovës ka shqiptuar 15,092 gjoba bazuar në rregullat e reja të komunikacionit rrugor, prej tyre 14,230 persona janë dënuar deri në 500 euro.

Në gjashtë raste policia ka shqiptuar gjoba deri në 1000 euro, ndërkohë që në 856 raste shkelësit e rregullave të komunikacionit policia i ka dërguar në gjykatë.

Policia thotë se 214 personave i u është ndaluar drejtimi i automjeteve. Mbi 500 ngasës kanë pësuar nga heqja e pikëve pasi ata kishin shkelur rregullat e parapara me ligjin për trafik.

Njeriu, ideja dhe sendërtimi i idesë

Në kohën e planetarizmit apo të shekullit XXI, duket se ne shqiptarët kemi shumë « hesape » të pa mbyllura me shekujt e kaluar, apo ndryshe ende do të “ vuajmë” shumë nga të “vdekurit”

Nga Bejtush Isufi

Njëra nga dëshmitë që po përsëritet për ditë është pamundësia për të kuptuar dallimin në mes idesë dhe individit (liderit) dhe mungesa e këtij dallimi është bërë një pengesë e madhe për të ardhmen, një pengesë për të ngritur shtetin dhe institucionet e tij.

Nuk mund të mos ketë lidhje të fuqishme, e jo vetëm ngjashmëri sipërfaqësore me të kaluarën historike fakti i besimit të përhapur te ne shqiptarët se udhëheqësit janë shpëtimi ynë, e jo institucionet tona.

Kështu ishte për shembull gjatë periudhës së pushtimit të Kosovës, që ishte pak më e kuptueshme, por edhe pas çlirimit mbetët shumë i përhapur besimi se vlerat e luftës së UÇK-së mund të mbrohen vetëm duke i pasur në udhëheqje njerëzit e sajë, pra luftëtarët, mbase duke dyshuar se atëherë kur brezi i pjesëmarrësve të luftës do të largohet, lufta do të harrohet dhe nuk do të ketë më kush ta mbroj atë?!

Nëse një luftë nuk arrin të mishërohet me kujtesën dhe ndërgjegjen e një populli, pra të “gravoj” porosinë e sajë në kujtesën kolektive, ajo luftë është e humbur, pra ky “mësim “ kurrë nuk do të përvetësohet vetëm për shkak se i kemi fizikisht dhe në pushtet bartësit e sajë.

Është mësim klasik se si “mbillen”, “ujiten” dhe “kultivohen” vlerat shpirtërore, historike dhe kombëtare dhe para se ti mësojmë të tjerët si duhet ta bëjnë këtë, ne duhet të dëshmojmë se kemi mësuar diçka nga shkenca e shtetformimit, përkatësisht të shohim si të tjerët e kanë bërë këtë tashmë.

Në përvjetorin e madh të Skënderbeut, doemos do të na kujtohet porosia e tij e madhe me rastin e hyrjes së tij në Krujë; “Lirinë nuk ua solla unë, por e gjeta në mes jush” ( në këtë kontekst nuk ka rëndësi se a ishte kjo thënie e vetë Skënderbeut apo e biografëve të tij) dhe pastaj të kthehemi në realitetin e sotëm shqiptar për të kuptuar se e kundërta e thënies së mësipërme po trumbetohet me zë të lartë. Shumë ngjashëm, ashtu siç shihej Enver Hoxha, shiheshin më vonë Sali Berisha e Ibrahim Rugova, ndërsa kështu shihen edhe sot udhëheqësit e luftës së UÇK-së, ndërsa tani edhe Albin Kurti. Jo misioni apo ideja, por lideri. Sa më gjatë që të vazhdoj kjo jehonë ahistorike në ajër, aq më të “mëdha” do të jenë “të korrat” e sajë në tokë.

Edhe pse shkruhet e flitet sot për përmbajtjet bashkëkohore politike, kur kthehemi e shohim jetën tonë të përditshme, vendimet, sjelljet dhe metodat e veprimit politik, kuptohet se nuk kemi hequr aspak dorë nga e kaluara, përkundrazi, qytetarëve vazhdon tu servohët “ menyja” e vjetër dhe ata po ashtu vazhdojnë të “konsumojnë” atë, e pastaj kuptohet se nuk pritet që ata të sillen ndryshe nga modeli i shërbyer.

Pavarësisht se cilët janë udhëheqësit dhe cilat janë partitë politike apo liderët politik, kudo në tokat shqiptare, të gjithë pa përjashtim nuk do të ndërrojnë veprimet e tyre pushtetore, përderisa të mos kemi një qytetari aktive dhe të emancipuar politikisht, e cila do të çlirohet nga e kaluara, pra nga identifikimi i idesë me individin-liderin. Ky identifikim është edhe kufiri por edhe dëshmia më e mirë se “sëmundjet” e shekujve që menduam se i hodhëm pas shpine, ende nuk i kemi tejkaluar. Kuptohet se nëse pritet që ky ndryshim të vijë vetëm prej partive politike, ai ndryshim do të vonohet shumë apo nuk do të arrij kurrë.

Qytetarët, intelektualët, shoqëria civile dhe rinia duhet të bëjnë luftën e përditshme të zhvillimit të ideve përparimtare dhe bashkëkohore të cilat ide duhet të bëhen “lëndë djegëse” për institucionet bashkohore dhe demokratike, të cilat pastaj duhet të çlirohen nga tutela partiake dhe ti shërbejnë misionit të madh të çlirimit dhe të mirëçenies, të demokracisë dhe vetëvendosjes.

Rusia ia ndalon importimin Serbisë

Mashtrimet që Serbia ia ka bërë Rusisë, duke i shitur mollët me origjinë nga Polonia, duket së do të iu shkaktojë mjaft probleme prodhuesve vendor të mollëve në Serbi, pasi me një vendimi të shtetit rus, pas datës 22 janar do të ndalohet importimi i tyre

Pas kësaj ndodhie ka reaguar edhe Ministria e Bujqësisë së Republikës së Serbisë, e cila ka pohuar faktin se kjo gjë do të shkaktojë jashtëzakonisht dëm të madh për prodhuesit vendor të mollës, dhe ka ftuar autoritetet që të merren me zbardhjen e rastit, shkruan B92, transmeton Periskopi.

Sipas tyre kjo gjë e ka dëmtuar jashtëzakonisht reputacionin e Serbisë, dhe për këtë gjë Inspektorati duhet të gjej fajtorët dhe t’i sanksionojë.

“Ministria dënon veprimet e aktorëve të caktuar në këtë biznes dhe thekson se rasti ka shkaktuar dëme të mëdha për prodhuesit vendas, si dhe ka dëmtuar dhe reputacionin e Republikës së Serbisë “, thuhet në reagimin e ministrisë për ngjarjen.

Ndërkohë Federata e Rusisë e ka konsideruar këtë si një dëm të madh.

Mollët ishin blerë në Polonisë, ishin paketuar në Republikën e Serbisë, dhe ishin eksportuar në Rusi si prodhim i Serbisë.