Lajm.co

Mund të jesh sekssimbol dhe 50 vjeç

Vitet për të janë si vera, është 50 vjeç, me një të dashur 18 vjet më të vogël, futbollistin Adil Rami

Duket se në Marsejë është verë për Pamela Anderson. Ish ylli i “Baywatch”, e cila ka pasur tre burra, dy djem dhe tashmë aktore e kthyer në aktiviste përfshi mbrojtjen e kafshëve, mjedisin dhe refugjatët.

Futbollisti Adil është baba i dy djemve binjakë nga martesa e tij e mëparshme me një modele franceze.

Është disi e komplikuar, por Pamela dhe Adil janë takuar verën e kaluar dhe nuk janë ndarë që atëherë. “Nuk dua të flas për të. Ne duam të mbrojmë dashurinë tonë”, ka thënë ajo. Prej 6 muajsh ajo jeton në Marsejë me dashurinë e saj “të çmendur”, për të cilin ka lënë dhe Malibunë.

Shkencëtarët: Katastrofa do të na vijë nga nëntoka

Ngjan si një skenar filmi: një forcë magnetike e padukshme që mbron jetën në tokë kundër rrezeve vrasëse të hapësirës dobësohet. Shpërthimet e rrezatimit shkatërrojnë satelitët tanë të komunikimit, dhe bën black out energjitik në Tokë

Mbizotëron kaosi. Kanceri tek njerëzit shumëfishohet pasi rrezatimi i pambrojtur nga Dielli shkatërron AND-në e njerëzve. Miliarda krijesa në të gjithë botën vdesin për shkak të pasi hutohet aftësia e tyre për të migruar për shkak të ndryshimeve të fushës magnetike të planetit.

Në fund të fundit, vetë atmosfera e Tokës largohet për shkak të erërave diellore, siç ndodhi shumë kohë më parë me planetin Mars, kur fusha magnetike e tij u shpërnda.

Por ky nuk është një film fantastiko-shkencor. Shkencëtarët paralajmërojnë se kjo mund të ndodhë vërtetë për shkak të një revolucioni të menjëhershëm të brendësisë së Tokës, shkruan Daily Mail.

Ekipi i monitorimit me teknologji të lartë tregon mjaft shenja se polet magnetike të tokës po ndryshojnë, dhe kjo për shkak të ndryshimeve të thelbit të hekurit në zemër të planetit tonë. Nëse kjo ndodh, fusha magnetike e Tokës do të rrokullisej. Gjatë një mijë vjetësh kjo do të ndryshojë tërësisht, mbrojtja jonë jetësore magnetike do të bëhej më e dobët, dhe për rrjedhojë me pasoja katastrofike.

Shkencëtarët parashikojnë se ajo mund të dobësohet me 1/10 e forcës së saj magnetike të zakonshem, duke zvogëluar rrënjësisht mbrojtjen e Tokës kundë rrezatimit dhe grimcave të ngarkuara të energjisë që vijnë nga erërat diellore.

Dëshmia në shkëmbinjtë e hershëm, tregon se ndryshimet në fushën magnetike të Tokës kanë ndodhur dhe më parë. Nën mbulesën e ngurtë të Tokës është një shtresë e hekurit të lëngshëm që mbahet i tillë për shkak të nxehtësisë që depërton nga sipërfaqja e Tokës. Janë pikërisht rrymat e lëvizshme të këtij metali që veprojnë si një elektromagnet gjigant.

Sipas Agjencisë Europiane të Hapësirës, (ESA) procesi besohet të marrë disa shekuj në terma njerëzorë.

Dëshmia tregon se ndryshimi i ardhshëm është tashmë në proces. Mburoja magnetike e Tokës aktualisht po dobësohet dhjetë herë më shpejt se sa mendohet më parë, në 5 përqind për dekadë, sipas të dhënave satelitore të mbledhura nga ESA.

Fusha magnetike po dobësohet veçanërisht në Amerikën e Jugut, një zonë që shkencëtarët e quajnë anomalia e Atlantikut të Jugut.

Të dhënat nga monitorimi i ESA kanë zbuluar gjithashtu ‘aktivitet të shqetësuar’ në rrymat e hekurit të lëngshëm nën sipërfaqen e Tokës, gjë që sugjeron se fusha mund të jetë gati të ndryshojë.

Deputetët gjermanë: Sanksionet ndaj Rusisë, të gabuara

Për një vizitë 6-ditore në Krime kanë ardhur të shtunën tetë deputetë që përfaqësojnë parlamentet e landeve federale të Nordhein-Westfalen, Berlinit dhe Brandenburgut dhe që janë anëtarë të partisë “Alternativa për Gjermaninë”

“Dëshirojmë të njihemi në terren me situatën në Krime. Na interesojnë sidomos pasojat e sanksioneve të vendosura kundër Rusisë, ngaqë Krimeja ka qenë shkaku i tyre”, u shpreh deputeti Roger Beckamp. “Mendojmë se miratimi i sanksioneve ka qenë një gabim, se ato kanë shkaktuar një impakt negativ si për Rusinë, ashtu edhe për Gjermaninë”.

“E shohim si shumë të rëndësishme një bashkëjetesë frytdhënëse me Rusinë”, theksoi deputeti Hugh Bronson. “Me këtë vizitë duam të dërgojmë një sinjal pozitiv”. “Kompanitë gjermane i kanë si orientim parësor interesat e tyre ekonomike dhe ato vetë duhet të vendosin a do të punojnë në Krime apo jo. Sanksionet nuk kanë sjellë kurrë asnjë rezultat dhe qëndrimi ynë ndaj tyre është tepër kritik. Nga sanksionet vuajnë qytetarët e thejshtë, jo politikanët”.

Siç u shprehën deputetët, janë në dijeni se pas vizitës në Krime atyre do t’u ndalohet hyrja në Ukrainë, por nuk i tremben aspak kësaj gjëje. Sipas politikanëve gjermanë, shpresojnë ta vizitojnë sërish gadishullin.

Deputetët e kanë vizituar tashmë qytetin e Jaltës dhe planifikojnë të shohin Kampin Ndërkombëtar për Fëmijë “Artek”, si edhe Sevastopolin. Gjatë takimit me udhëheqjen e Krimesë do të diskutohen mundësitë për heqjen e sanksioneve dhe zgjerimin e bashkëpunimit dypalësh. Gjithashtu, pjesëtarët e delegacionit gjerman do të vendosin kurora me lule në një varrezë memoriale dhe do të zhvillojnë homazhe në vendprehjen e ushtarëve të rënë. Delegacioni do të qëndrojë në Krime deri në datë 9 shkurt.

Marrë nga “Rossijskaja Gazeta”

Strategjia e re e BE-së: Vetëm Serbia dhe Mali i Zi marrin afate kohore

Serbia dhe Mali i Zi janë të vetmet vende të Ballkanit Perëndimor, të cilat në Strategjinë e Komisionit Evropian do të marrin afat të qartë kalendarik për pranim të mundshëm në BE në vitin 2025, ndërsa datat e integrimit evropian të vendeve të tjera të rajonit nuk do të përmenden

Kështu thuhet në versionin përfundimtar të Strategjisë për Perspektivën e Besueshme të Ballkanit Perëndimor, teksti i së cilës u miratua të hënën në takimin e shefave të kabinetit të Komisionit Evropian.

Në dokumentin që ka siguruar Radio Evropa e Lirë, Mali i Zi dhe Serbia identifikohen sërish si lidere ne rajon dhe pranimi i tyre në BE parashihet të bëhet për shtatë vjet.

“Negociatat për pranim janë duke u zhvilluar me Malin e Zi dhe Serbinë. Me vullnet të fuqishëm politik, me reforma reale dhe të qëndrueshme, si dhe me zgjidhje përfundimtare të kontesteve me fqinjët, këto dy vende do të jenë potencialisht të gatshme për anëtarësim në vitin 2025”, thuhet në tekstin e Strategjisë së Komisionit Evropian, e cila do të publikohet të martën në Strasburg.

Vendet e tjera të Ballkanit Perëndimor nga ky dokument do të sigurojnë vetëm perspektivën për integrim evropian, pa afate kalendarike për pranimin e tyre të mundshëm.

“Komisioni është i gatshëm të përgatisë rekomandime për hapjen e negociatave të anëtarësimit me Shqipërinë dhe Ish-Republikën Jugosllave të Maqedonisë, në bazë të kushteve të plotësuara. Me përpjekje dhe angazhim të vazhdueshëm, Bosnja dhe Hercegovina mund të bëhet kandidate për anëtarësim. Kosova ka mundësi të bëjë përparim të qëndrueshëm me zbatimin e Marrëveshjes së Stabilizim-Asociimit dhe të avancojë në rrugën e saj evropiane kur të lejojnë rrethanat objektive”, thuhet në Strategji.

Në këtë dokument, Bashkimi Evropian ka ashpërsuar gjuhën në kapitullin për sundimin e ligjit. Ai qartë paralajmëron se vendet e rajonit do të bëhen anëtare të BE-së, “por jo në gjendjen ku janë sot”.

“Sot, vendet tregojnë elemente të qarta të shteteve ‘të kapura’, përfshirë lidhje me krimin e organizuar dhe korrupsionin në të gjitha nivelet e qeverisë dhe administratës, si dhe përzierje të fuqishme të interesave publikë dhe privatë”, thuhet në Strategji.

Strategjia po ashtu vë në dukje se në rajonin e Ballkanit Perëndimor ekziston “ndërhyrje e gjerë politike në media dhe kontroll mbi to”.

“Gjyqësori i fuqishëm dhe i pavarur, si dhe qeveritë dhe administratat e përgjegjshme janë të domosdoshme për të bërë ndryshime të qëndrueshme shoqërore, të cilat janë të nevojshme”, thuhet në dokument.

Strategjia për Ballkanin Perëndimor vë theksin mbi dy çështje të rëndësishme që ndikojnë në të gjithë rajonin dhe që duhet të zgjidhen përpara se ndonjë vend i rajonit t’i bashkohet BE-së: dialogu midis Kosovës dhe Serbisë dhe mosmarrëveshjet dypalëshe.

“Nuk mund të ketë qëndrueshmëri të përhershme në rajon pa normalizim efektiv dhe gjithëpërfshirës të marrëdhënieve midis Beogradit dhe Prishtinës, përmes dialogut që e ndihmon BE-ja. Një marrëveshje gjithëpërfshirëse dhe ligjërisht e detyrueshme për normalizimin e marrëdhënieve është urgjente dhe vendimtare, në mënyrë që Kosova dhe Serbia të përparojnë në rrugën evropiane”, thuhet në tekstin e Strategjisë, e cila parashikon që një marrëveshje e tillë të arrihet deri në fund të vitit 2019.

Rreth çështjeve të hapura dypalëshe midis vendeve të rajonit, Strategjia thotë se para pranimit të tyre në BE, ato duhet të gjejnë dhe ztatojnë “zgjidhje përfundimtare dhe të detyrueshme”.

“Bashkimi Evropian nuk mund dhe nuk do të prezantojë mosmarrëveshje dypalëshe”, thuhet në tekstin e Strategjisë.

Kur bëhet fjalë për problemet e pazgjidhura kufitare midis këtyre vendeve, Komisioni Evropian kërkon që palët “t’i dërgojnë në arbitrazh përfundimtar”, siç është Gjykata Ndërkombëtare e Drejtësisë.

Vendimet e arbitrazhit do të duhet pastaj t’i pranojnë dhe respektojnë të dyja palët, përpara se të futen në BE.

Komisioni Evropian ka vërejtje konkrete edhe në kapitullin për ekonominë, ku po ashtu thuhet se ka ndërhyrje politike.

“Pjesë kritike të ekonomisë në rajon janë jokonkurrente, me shumë ndërhyrje të panevojshme politike dhe me sektor të pazhvilluar privat”, thuhet në tekstin e Strategjisë.

Kurti agjencisë boshnjake “Patria”: Serbia do bosnjizimin e Kosovës, Ivanoviqin kishte interes ta vriste

Albi Kurti vazhdimisht ka qëndrim origjinal ndaj problemeve politike në Kosovë. Qysh student, në kohën regjimit të Millosheviqit, kaloi tri vjet burg në Lipjan e Pozharevac. Diagnostifikon dhe detekton politikën serbe, që sipas mendimit të tij prodhon kriza politike në rajon

Në intervistën dhënë agjencisë gazetare “Patria” të Bosnjës ai flet për ndikimin e Serbisë në Kosovë e BeH, politikën destabilizuese të Beogradit në rajon, motivet potenciale për vrasjen e Oliver Ivanoviqit, dhe se cili është fati i mëtejshëm i Ballkanit Perëndimor, transmeton Koha.net.

Ai i ka thënë kësaj agjencie se Vetëvendosje është subjekti parlamentar më i fuqishëm, me mbi 200 mijë vota të fituara, ose 27,49 për qind. Që do të thotë se përfaqësohet me 32 deputetë në Kuvendin e Kosovës me 120 deputetë (20 vende të garantuara për minoritetet). Por, meqë nuk ia dolëm të fitojmë shumicën mbi 50 për qind, qeveris koalicioni që përbëhet nga 16 parti, përfshirë aty edhe partinë e kryeministrit Haradniaj me 11 deputetë.

Lëvizja (VV) angazhohet për dialog nga poshtë lart, dialog me qytetarët e nacionalitetit serb të Kosovës për temat e brendshme që na lidhin, siç çshtçë papunësia dhe prodhimi, të drejtat qytetare dhe sundimi i të drejtës, lufta kundër korrupsionit dhe krimit të organizuar, dhe problemet e tjera jetike që e mundojnë qytetarin e thjeshtë të Kosovës të secilit nacionalitet. Dialogu me Serbinë deri sa Serbia të mos e njohë Kosovën, sa të ketë pretendime territoriale ndaj vendit tonë, deri sa të mos ketë kurrfarë pendimi për krimet gjatë luftës, as mund të jetë i barabartë, as i drejtë. Deri më tash është investuar shumë në dialogun me Serbinë nga bashkësia ndërkombëtare, por rezultati thuaja ka qenë i parëndësishëm sa i përket interesit të qytetarëve, ndërsa Kosova nuk ka mundur të imponojë njohjen nga Serbia. Në vazhdojmë të ndiejmë ndikimin e fuqishëm të Serbisë nëpër enklavat serbe, posaçërisht në veriun e Kosovës, dhe ky ndikim mohon sovranitetin dhe integritetin territorial të Kosovës. Shembull është partia më e madhe parlamentare serbe Srpska Lista, e krijuar dhe që drejtohet nga Beogradi.

Ndërkaq në lidhje me vrasjen e Oliver Ivanoviqit ai ka dy shpjegime.

“Sa i përket vrasjes së Oliver Ivanoviqit, janë dy shpjegime të mundshme: njëra se Serbia dëshiron të tregojë e të dëshmojë se ajo qeveris veriun e Kosovës dhe se askush nuk mendon që Kosova të jetë ndonjëherë të jetë Kosovë, dhe se aty pushtetin e ka Serbia me strukturat e saj të sigurisë, duke pasur parasysh profesionalizmin me të cilin u krye vrasja. Ndërsa shpjegimi tjetër është se Ivanoviq u vra nga se mori pjesë në krimet e luftës në formacione paramilitare, këtë e kanë identifikuar disa shqiptarë gjatë gjykimit të tij, kështu që ai ka mundur të jetë në të ardhmen dëshmitar potencial i atyre krimeve. Ka mundësi të jetë eliminuar si dëshmitar potencial aq më parë sepse ky kishte raporte shumë të këqija me Vuçiqin. Mendoj se vrasja e Ivanoviqit nuk do të ndryshojë raportet midis shqiptarëve e serbëve, meqë të gjithë janë të bindur se shqiptarët s’kanë lidhje me këtë vrasje, ndërsa sa u përket marrëveshjes me Serbinë, këta kanë përdorur shkaqe edhe më të vogla për të bllokuar proceset e ndryshme në Kosovë, transmeton Koha.net intervistën e Kurtit në Patria.

Bosnja e Hercegovina dhe Kosova janë vënë në të njëjtin rrafsh kur bëhet fjalë për integrimet euroatlantike, kështu që haptas pengohet pranimi në NATO dhe në Bashkimin Europian.

Agjencia Patria citon Kurtin, sipas të cilit Bosnja e Hercegovina fatkeqësisht është një shtet jofunksional, meqë një pjesë e saj, Republika Srpska, si një produkt i gjenocidit, nuk e njeh Bosnjën por synon shkëputjen prej saj dhe bashkimin me Serbinë. Një lloj i tillë i bosnjizimit të Kosovës u bë përpjekje të ndodhë duke krijuar komuna me shumicë serbe e më vonë edhe duke krijuar Bashkësinë e Komunave Serbe, që doli se me të po shkeleshin 23 nene të Kushtetutës së Kosovës. Edhe Bosnja e Hercegovina, edhe Kosova duhet të bëhen shtete funksionale, duke zbatuar sovranitetin e plotë në territoret e tyre. Në këtë udhëtimi të dy vendet i pengon politika shtetërore e Serbisë. Edhe Republika Srpska në Bosnjë, edhe Asociacioni në Kosovë janë projekte politike të Serbisë.

I pyetur se nga po shkon Ballkani, Kurti është përgjigjur se në Ballkanin Perëndimor janë të pranishme interesat e disa fuqive të mëdha, siç janë SHBA, BE (Gjermania, posaçërisht), Rusia, Turqia e të tjerë. Rusia është investitori më i madh në Republika Srpska, më i madh madje se Serbia. Po ashtu Turqia është investitor i madh në disa vende, siç është edhe Gjermani dhe SHBA. Varësisht nga prania politike dhe ekonomike është edhe ndikimi. Mendoj se vendet e Ballkanit Perëndimor do të duhej të shkonin në drejtim t ë integrimeve euroatlantike dhe europiane, si vende me sovranitet të plotë dhe me vullnetin e plotësuar për vetëvendosje, si një e drejtë universale e të gjithë popujve. Ai po ashtu ka përmendur edhe modelin e socialdemokracisë sipas të cilit rritja ekonomike kombinohet me të drejtën e sociale, që është rrugë e drejtë përpara.

Vazhdojnë ëndrrat në Beograd: Kosovës autonomi me Kushtetutë të Serbisë

Në kryeqytetin e Serbisë, në Beograd, nga politikanë të saj, vazhdon retorika kundër shtetësisë së Kosovës. Madje, atje propozohet edhe zgjidhje për Kosovën, sikur shqiptarët të mos ishin deklaruar për zgjidhje me luftë e me politikë

Kështu, ministri serb për Zhvillim teknologjik dhe inovacion Nenad Popoviq thotë se “autonomi më të gjerë të mundshme për shqiptarët, por nën ombrellën e Kushtetutës së Serbisë dhe të Rezolutës 1244, do të mundë të ishte zgjidhje e problemit të Kosovës”.

“Në planin e brendshëm ne duhet të merremi vesh çfarë duam dhe për këtë arsye dialogu i brendshëm është gjë e jashtëzakonshme. Me rëndësi është që bashkë, pa marrë para sysh dallimet politike, të japim zgjidhjet tona. Nuk i kuptoj ata që nuk dëshirojnë të marrin pjesë në dialog. Mendoj se i gjithë tregimi do të përfundojë me të drejtën e Zotit,e koha do ta dëshmojë këtë”, citon “Blic” i Beogradit të ketë thënë Popoviq.

Siç e thekson ai dëshirën ose ëndrrën e vet, kjo do të thotë se Kosova do të mbetet pjesë e Serbisë dhe se nuk ka dyshim që do të jetë ndryshe.

“Marrëveshja historike duhet të jetë ajo që mundëson për të jetuar me paqe në Kosovën që është serbe”, ka kërcënuar ai, transmeton Koha.net.

Në konstatimin se shumica shqiptare qe më shumë se 20 vjet nuk pajtohet me këtë, ai thotë:

“Ata janë këmbëngulës, disa ambasadorë më kanë thënë se ata nuk do të pajtohen me këtë. As ne nuk do të pajtohemi me ta. Pse ata të jenë më këmbëngulës se ne?”, është pyetur Popoviq.

Ai e mendon gjestin e Spanjës të jashtëzakonshëm lidhur me Kosovën.
“Pesë vende të BE-së s’e njohin Kosovën ashtu që faktori ndërkombëtar nuk ka fare qëndrim të përbashkët…”, thekson ai.

Popoviq pa keqardhje thotë se “edhe interesi i shqiptarëve është kompromisi që do t’iu mundësonte të zhvillohen, të punojnë, që në pushtet të kenë njerëz më cilësorë, porse e gjitha duhet pranuar në kufij të Kushtetutës së Serbisë”.

Në konstatimin se ata kanë dalë tashmë nga këta kufij, Popoviq thotë:

“Ata nuk kanë dalë sepse ekziston Rezoluta 1244. Po të mos ishte kështu, mentorët e tyre perëndimorë do të bënin presion ndaj nesh për të nënshkruar marrëveshje. Nuk ka kornizë për atë shtet të rremë… Derisa ne të mos pajtohemi me këtë, ata mund të flasin çfarë të duan, ata nuk janë shtet”, ka thënë ai.

Të dorëhequrit e VV-së me parti të re, u bashkohet edhe Ahmeti

Vetëvendosje në zgjedhjet e këtij viti krenohej me rezultatin që ua solli grupin më të madh parlamentar dhe me dy komuna të reja të fituara, duke mbajtur ndërkohë edhe për një mandat kryeqytetin. Por, ky triumf u thye, pas akuzave e fyerjeve që do të bëjnë që VV-ja të humbë edhe këta dy kryetarë, 10 deputetë, ndër ta edhe themelues, ish-kryetarë e figura që morën mijëra vota në zgjedhje

Nga fillimi i dhjetorit kur edhe u bë publik mesazhi ofendues që deputetja Aida Dërguti ia dedikonte Albin Kurtit, në kohën kur ai po arrestohej nga policia, kanë plasur tensione brenda partisë, që kanë rezultuar me dorëheqje e fyerje të shumta.

Por, i pari i Komunës së Prishtinës, Shpend Ahmeti, ishte ai që qëndronte i papërcaktuar në këtë situatë, duke mos bërë publik qëndrimin e tij. Si duket, mospërcaktimi i Ahmetit është edhe arsyeja pse partia e përfolur nga Dardan Molliqaj e Visar Ymeri ka vonuar.

Gazeta Express mëson nga burimet e veta se tashmë të gjithë anëtarët dhe ish-anëtarët e partisë janë të informuar se nga VV do të krijohet një parti e re dhe do të ndahet grupi parlamentar.

Mirëpo, në Kuvendin e Kosovës për Express kanë deklaruar se një kërkesë të tillë ende nuk e kanë marrë.

Por, mesazhi që ka dërguar kryetari i kryeqytetit me fshirjen e të gjitha fotove nga rrjetet sociale që kishte me ‘babën’ e partisë, tregon që ai veç se është rreshtuar së bashku me Molliqaj e Ymerin.

Njëjtë si ai, edhe kryetari i komunës së Kamenicës, Qëndron Kastrati radhitet në anën e të dorëhequrve.

Me këtë Vetëvendosje humb dy komuna, pa përmendur Prizrenin, kryetari i të cilës Mytaher Haskuka radhitet në anën e Kurtit.

Express kishte raportuar se arsyeja pse Ahmeti kishte marrë qëndrim neutral ishte për të mbajtur një balancë brenda asamblesë komunale, edhe pse kishte numër më të madh të përkrahësve se sa i pari i partisë.

Express ka tentuar të kontaktojë edhe dy grupet, por ata tash e një kohë po i ikin mediave.

Analisti politik, Imer Mushkolaj tha për Gazetën Express se në Vetëvendosje tani e dinë që Ahmeti do të largohet.

“Në opinionin publik është krijuar përshtypja që Ahmeti i përket këtij grupi dhe do të largohet për t’i bashkuar këtij grupi, edhe VV-ja tashmë e di që ai do të largohet nga ky grup. Subjekti i ri nuk do ta ketë rëndësinë e njëjtë, nëse Ahmeti nuk del aty, ai do të mund ta kompletonte dhe do t’i jepte fuqi kësaj partie. Në anën tjetër, ajo dëmton Vetëvendosjen”, deklaron ai.

Sipas, Mushkolajt nëse veç Ahmeti del nga VV-ja, kjo nuk do ta dëmtojë atë brenda komunës, sepse, tani më ai ka koalicion me disa parti, duke përfshirë edhe parti të vogla dhe gëzon numër më të madh të asambleistëve se krahu i Kurtit./Express

Zëri i Amerikës zbardh dokumentin e Brukselit: Shteti ligjor në rend të parë

Komisioni Evropian pritet të paraqesë nesër Strategjinë për Zgjerimin me vendet e Ballkanit Perëndimor. Dokumenti, një kopje të të cilit Zëri i Amerikës e ka siguruar, ripërcakton nga njëra anë detyrimet kryesore që vetë vendet e rajonit duhet të përmbushin, me përqendrim të veçantë në Shtetin ligjor dhe zgjidhjen e mosmarrëveshjeve dypalëshe mes tyre, ndërsa nga ana tjetër, flet për një angazhim në rritje të vetë Bashkimit Evropian për t’i mbështetur më shumë këto vende në rrugëtimin e tyre

Që në hyrje të Strategjisë për Zgjerimin, saktësohet se vendet e Ballkanit Perëndimor do të bëhen pjesë e Bashkimit Evropian “por jo në kushtet në të cilat ato janë aktualisht”. Dokumenti njeh përparimin e bërë ndër vite “por në mënyrë që vendet të përmbushin të gjitha kushtet e anëtarësimit dhe të forcojnë demokracitë e tyre, ende kërkohen reforma gjithëpërfshirëse dhe bindëse në fusha vendimtare” duke veçuar tre drejtimet kryesore: sundimin e ligjit, konkurrueshmërinë dhe bashkëpunimin rajonal e pajtimin.

I një rëndësie parësore për BE-në konsiderohet “forcimi i ndjeshëm i Shtetit ligjor”. Panorama e sotme që vizatohet nga dokumenti paraqitet problematike, ndërsa flitet për “elemente të qarta të kapjes së shtetit, duke përfshirë lidhjet me krimin e organizuar dhe korrupsionin në të gjitha nivelet e qeverisë dhe administratës, si dhe një përzierje të fortë mes interesave publike dhe atyre private”, gjë e cila “ushqen një ndjenjë të mosndëshkimit dhe pabarazisë”. Dokumenti flet për ndërhyrje të gjera politike dhe kontroll të medieve. Shteti ligjor, te drejtat themelore dhe qeverisja e mirë konsiderohen si “një pikë kyçe referimi në bazë të së cilës vendet do të gjykohen nga BE-ja”, ndërsa vihet theksi te nevoja për reformat në sistemin gjyqësor që do të sigurojnë “funksionimin e pavarur, cilësor dhe efikas të tij”.

Ekonomia është fusha tjetër e rëndësishme ku sipas BE-së kërkohen transformime rrënjësore. “Sektorët kritik të ekonomive të rajonit janë jo-konkurruese, me shumë ndërhyrje të panevojshme politike dhe një sektor privat të pazhvilluar. Asnjë prej ekonomive të Ballkanit Perëndimor, aktualisht nuk mund të konsiderohet një ekonomi tregu funksionale dhe as të ketë kapacitetin për të përballuar trysninë konkurruese dhe forcat e tregut në Bashkimin Evropian”, vlerëson Strategjia.

Për Bashkimin Evropian ka një rëndësi të dorës parë që para ndërsa vendet e rajonit përgatiten për t’iu bashkangjitur, ato të kenë lënë pas të gjitha problemet mes tyre, përmes zgjidhjeve përfundimtare. “Ende ekzistojnë mosmarrëveshje të rëndësishme dypalëshe midis vendeve të rajonit të cilat mbeten për t’u zgjidhur. BE-ja nuk do të pranojë të importojë këto mosmarrëveshje dhe paqëndrueshmërinë që mund të sjellin”. Në dokumentin e siguruar nga Zëri i Amerikës përmendet specifikisht situata mes Serbisë dhe Kosovës. “Pa një normalizim efektiv dhe gjithëpërfshirës të marrëdhënieve Beograd-Prishtinë nëpërmjet dialogut të lehtësuar nga BE-ja, nuk mund të ketë stabilitet të qëndrueshëm në rajon. Një marrëveshje gjithëpërfshirëse dhe normalisht e detyrueshme për normalizimin është urgjente dhe vendimtare në mënyrë që Serbia dhe Kosova të përparojnë në rrugët e tyre evropiane”.

Por, ndërsa përcakton rrugën që duhet të ndjekin vendet e rajonit, Komisioni Evropian flet dhe për një angazhim të rritur të Brukselit ndaj Ballkanit Perëndimor në mbështetje të rrugëtimit të tij të integrimit. “BE-ja duhet të mbetet e besueshme, e vendosur dhe e drejtë, duke përmirësuar politikat e saj për të mbështetur më mirë procesin e transformimit në rajon. Dhe duhet të përmbushë angazhimet e veta, ndërsa Ballkani Perëndimor i përmbushë ato, në interesin e vet strategjik të Evropës”, përcakton dokumenti.

Sipas Strategjisë së Zgjerimit, “BE duhet të forcojë politikat e saj të angazhimit kundrejt Ballkanit Perëndimor, duke u përqendruar në fusha me interes të përbashkët, siç janë drejtësia dhe çështjet e brendshme, duke përfshirë sigurinë dhe luftën kundër krimit të organizuar, ekonominë dhe tregun e vetëm, energjinë, transportin dhe politikat digjitale, politikën sociale si dhe në çështjet e jashtme dhe të mbrojtjes. Bashkëpunimi në këto fusha – saktëson dokumenti – do të mbështetet nga pjesëmarrja më e madhe e Ballkanit Perëndimor në Këshillat joformale, si dhe në kontaktet e rregullta të nivelit Ministror. Komisioni, nga ana e tij, do të përfshijë, sipas rastit, Ballkanin Perëndimor në komitetet teknike dhe grupet punuese të Komisionit. Pas samitit të Ballkanit Perëndimor në Sofje në maj 2018, Udhëheqësit e BE-së duhet të vazhdojnë të angazhohen me homologët e tyre në Ballkanin Perëndimor”.

Komisioni Evropian flet edhe për nevojën e një mbështetje më të madhe financiare ndaj rajonit. “Politikat e brendshme të BE-së dhe programet e financimit duhet të shtrihen më tej në Ballkanin Perëndimor si dhe mbështetja që ofrohet, në këtë mënyrë ata do të përdorin më mirë pjesëmarrjen ekzistuese në këto programe dhe rrjetet e BE-së. Komisioni do të rrisë ndihmën e tij teknike për të gjitha vendet e Ballkanit Perëndimor për t’i ndihmuar ata të përafrohen me legjislacionin e BE-së dhe për të siguruar zbatimin e saj efektiv në praktikë”. Strategjia parashikon një Plan Veprimi me masa konkrete në një seri fushash.

Dokumenti i cili pritet të paraqitet nesër nënvizon se “anëtarësimi në BE është një zgjedhje. Ajo ka nevojë për konsensus politik dhe shoqëror dhe mbështetje të zemrave dhe mendjeve të njerëzve. Nuk mund të ketë paqartësi nga udhëheqësit rreth përkatësisë së Ballkanit Perëndimor dhe drejtimit në të cilin po shkon. Kjo – thekson Strategjia e Zgjerimit – është e domosdoshme për të siguruar dhe mbështetjen e qytetarëve të tyre dhe të qytetarëve të BE-së, dhe duhet të pasqyrohet në komunikimin e liderëve dhe në kontakt me qytetarët”./VOA

KMDLNj letër të hapur kryetarit të Prishtinës, Shpend Ahmeti

Këshilli për Mbrojtjen e Drejtave dhe Lirive të Njeriut (KMDLNJ) i ka dërguar letër të hapur kryetarit të Prishtinës, Shpend Ahmeti lidhur me gjendjen e varrezave në Prishtinë

KMDLNj thekson se janë jashtëzakonisht të shqetësuar me gjendjen e varreze e varrezave të të gjithë besimtarëve në Prishtinë.

Më poshtë mund ta lexoni të plotë letrën e KMDLNJ-së:

“Siguroni kushte për varrim dinjitoz dhe trajtim të dinjitetshëm të varrezave!

I nderuari kryetar Ahmeti,

KMDLNj është jashtëzakonisht i shqetësuar me gjendjen e varrezave (të të gjithë besimtarëve) në komunën e Prishtinës që udhëhiqet nga Ju. Mirëmbajtja dhe kujdesi për varrezat ortodokse dhe të krishtera (katolike) është kryesisht e natyrës politike dhe kujdesi për to rritet vetëm kur ato dhunohen apo vandalizohen e që kryesisht, pa përfunduar hetimet cilësohen të natyrës politike dhe etnike. Ose, pas ndërhyrjeve të ndërkombëtarëve ato rregullohen sa për të thënë sikur që edhe ndahet lokacioni për bashkësi fetare të reja.

Kurse, gjendja e varrezave ku varrosen apo prehen besimtarët islam është katastrofale , e turpshme dhe nën çdo dinjitet. Kjo vlen sidomos në Lagjen Arbëria ku, për shkak të punimeve ndërtimore apo të reshurave atmosferike ka pasur dëmtime të varreve dhe shembje të tyre.

KMDLNj është i vetëdijshëm se qyteti i Prishtinës, për shkak të mbipopullimit dhe ngushtimit të hapësirës tokësore, e ka të vështirë sigurimin e një lokacioni të ri për varrezat e besimit islam e që do të ishte në përputhje me standardet e kërkuara infrastrukturore. Për këtë çështje janë zgjeruar hapësirat e lokacionit ekzistues për varreza në lagjen Arbëria e që nuk i plotëson as kushtet minimale për varrim të dinjitetshëm dhe trajtim të dinjitetshëm të këtyre varrezave. Ky degradim mjedisor në lokacionin ku janë varrezat e besimtarëve islam sidomos është i theksuar gjatë dimrit dhe në kohën e të reshurave atmosferike e që nënkupton një periudhë thuaja 6- mujore.

Nëse e bëni nje inspektim të varrezave apo e përcillni ceremoninë e varrimit në këtë kohë duhet të pajiseni me çizme gome deri në gjunjë dhe të keni kondicion t’i bartni 6-8 kg baltë që kapet për çizme. Është nën çdo dinjitet dhe e pamoralshme të varrosni të vdekurin në ato kushte sikur edhe që është e mundimshme dhe nën dinjitet për pjesëmarrjen në varrim po në ato kushte.

Varrezat e besimit islam në lagjen Arbëria, sidomos në kohën e dimrit i ngjajnë një terreni nga dokumentarët për mbijetesë në kushte ekstreme. Nëse në këta dokumentarë luftohet në rërën e gjallë, në varrezat në lagjen Arbëria luftohet me baltën e gjallë. Këto varreza , por edhe të tjerat janë nën përgjegjësinë e komunës që e udhëhiqni, qytetarët e së cilës janë taksapagues të rregullt me shpresë se do të ofroni shërbime të mira, në përputhje me taksat që i siguroni.

Nëse komuna e Prishtinës nuk ka kapacitet për mirëmbajtje të varrezave, atëherë duhet të kërkojë buxhet shtesë nga Qeveria e Kosovës. Komuna e Prishtinë duhet ta marrë si shembull komunën e Gjakovës apo të Pejës se si duhet të mirëmbahen varrezat.

Komuna duhet t’i ndërmerr të gjitha veprimet që të ndërpritetky degradim i hapësirës së varrezave, duke krijuar hapësira të gjelbra, duke mbjellë fidanë të reja dhe duke hapur shtigje në tërë këtë hapësirë nëse dëshiron ta eliminojë baltën, papastërtinë dhe dukuritë tjera degraduese.

Komuna e Prishtinës mbanë përgjegjësi për këto varreza duke krijuar kushte për trajtim të dinjitetshëm dhe duke mos e fyer për së vdekuri ata që varrosen, familjen, miqtë dhe pjesëmarrësit në varrim.

Nëse dëshironi ta dini të vërtetën e keni shumë lehtë, mjafton të merrni pjesë në një varrim por jo në pjesën ku varrosen VIP-të apo ata që më herët kanë siguruar lokacion për varrezat familjare dhe që vet i mirëmbajnë”.

Prokuroria interviston familjarët e Enver Malokut. Nisin hetimet për vrasjen e zyrtarit të LDK-së

Prokuroria Speciale e Kosovës ka nisur hetimet për zbardhjen e një prej atentateve më enigmatike të historisë së Kosovës; vrasjen e Enver Malokut, gazetarit dhe bashkëpunëtorit të ngushtë të Presidentit Ibrahim Rugova

Të shtunën, sipas burimeve të Gazetës Express, është intervistuar Hava Maloku, bashkëshortja e Enver Malokut. Ky rast, për dy dekada nuk ishte shqyrtuar nga asnjë prokuror vendor e ndërkombëtar.

Duket absurde, por dikujt në Prokurorinë Speciale i ka rënë ndërmend që të merret me një prej vrasjeve më të bujshme në Kosovë, atë të Enver Malokut, gazetarit të njohur dhe bashkëpunëtorit të Presidentit Rugova.

Burime të Gazetës Express thonë se Prokurori Reshat Millaku ka hapur këtë rast dhe tashmë ka marrë në pyetje dëshmitarët dhe familjaret e Malokut.

Të shtunën është intervistuar e veja e Malokut, Hava, e cila në zyrën e Prokurorit shoqërohej nga vajza, Doruntinë Maloku, e cila njëherësh është deputete e LDK’së në Kuvendin e Kosovës.

“Të shtunën është intervistuar zonja Hava Maloku, e cila ka rrëfyer për ngjarjen e kobshme të janarit 99, kur para banëses i ishte vrarë bashkëshorti”, ka treguar në kushte anonimiteti për Express një zyrtar i Prokurorisë Speciale.

Është shumë e çuditshme se pse kjo vrasje po fillon të hetohet pikërisht tani. Siç dihet, familjarët kanë shpresuar se ky rast mund të zbardhet në Gjykatën Speciale, meqenëse për gjithë këto vite asnjë prokuror vendor dhe ndërkombëtar nuk kishte marrë guxim që ta hetonte.

Burime të Gazetës Express sqarojnë se hetimet për vrasjen e Enver Malokut kanë filluar pas një postimi në Facebook të gazetarit Bajrush Morina.

“Ne pervjetorin e 19 te vrasjes se intelektualit te guximshëm Enver Malokut, kisha dashte me i pa me duar lidhur e te nisur per ne Speciale, nje deputet te Kuvendit te Kosoves dhe bashkeshorten e tij!”, kishte shkruar Morina.

Menjëherë pas këtij postimi kishin reaguar institucionet e drejtësisë, duke e thirrur në intervistë gazetarin.

Burime të Gazetës Express thonë se pikërisht pas këtij postimi dhe intervistimit të Bajrush Morinës, kanë hapur këtë rast.

Enver Maloku (1954-1999) ka qenë një nga themeluesit e QIK-ut dhe prej vitit 1993 e deri në vdekje e drejtoi këtë Qendër. Gjatë kohës kur në krye të QIK-ut ishte Enver Maloku, përveç në shqip, kjo Qendër emitonte lajme edhe në anglisht, frëngjisht dhe gjermanisht dhe ishte burimi më i shpejtë, më i saktë dhe më i besueshëm i informimit në vend dhe në botë për ngjarjet e stuhishme në Kosovë. Tërë veprimtaria gazetareske e publicistike e Enver Malokut e viteve ’90 i kushtohet lirisë e pavarësisë së Kosovës.

Enver Maloku, pasi i shpëtoi një atentati në korrik të vitit 1998, u vra në një atentat të organizuar më 11 janar të vitit 1999.