Lajm.co

Kurti pyet kush e beson se arrestimi e deportimi i turqve u bë pa dijeninë e Thaçit

Kryetari i Lëvizjes Vetëvendosje, Albin Kurti, ka reaguar pas deportimit të gjashtë shtetasve turq nga autoritet e Kosovës. Kurti ka thënë se shkarkimin e shefit të AKI-së, Driton Gashi, dhe ministrit të Brendshëm Flamur Sefajn, kryeministri Ramush Haradinaj, e bëri vetëm që të mos dorëheqet vet

Postimi i Kurtit në Facebook:

Gjashtë persona do ndjekin autorin?

Pardje gjashtë nënshtetas të Turqisë u kapën nga shteti i kapur i Kosovës. Nuk e dinim ku ndodhen. Nuk është e qartë pse i morën. Fare pak njerëz tejet të fuqishëm po tallen me Republikën ku asnjëri s’është i sigurt.

Këto dy shkarkime që bëri kryeministri nuk mjaftojnë. Madje ato janë zëvendësim i dyfishtë. Zëvendësim për dorëheqjen e kryeministrit Haradinaj – ai shkarkon dy të tjerë që të mos dorëhiqet vetë. Dhe, zëvendësim për denoncimin e duetit Hashim Thaçi & Shpend Maxhuni – ai ekspozon një ministër që do t’i harrohet emri para se t’ia mësojmë mirë që të ngelin në prapavijë presidenti i shtetit me drejtorin e tij të policisë.

Çështja nuk është thjesht as te arrestimi dhe as te deportimi. Çështja është kush ka dhënë urdhër ose plotfuqishmëri që të bëhen dosje nga AKI për këta persona. Aty nis rasti. Sepse porsa të fillojë krijimi i dosjes i klasifikuar te rrezikshmëria, terrorizmi e të tjera si këto, është çështje kohe kur kapen e deportohen njerëzit. Pse janë skeduar këta njerëz dhe me urdhër të kujt? Këtu fillon arbitrariteti dhe cenimi kushtetues (përfshirë konventën evropiane për të drejtat e njeriut) dhe mandej me radhë ligjet. Dhe, sërish, kush e beson se këto dosje u bënë pa dijeni të Presidentin ose pa qenë i informuar ai?

E, megjithëkëto, Kuvendi i Kosovës dje refuzoi të debatojë për këtë çështje. Kishte shumë lot krokodili të deputetëve për rrëmbimin me të cilin nuk donin të merreshin.

Nuk është çështja të mbajmë qëndrim mbi konfliktin e brendshëm në Turqi, as mbi fajësinë ose jo të gjashtë të dëbuarve. Por duhet dënuar kidnapimi i tyre, dhe dëbimi e dorëzimi në një shtet tjetër, pa gjyq, pa transparencë, pa njoftuar institucionet, dhe në analizë të fundit, pa dashur të marrë përgjegjësi askush.

Kosova është Republikë Parlamentare, që ka president despotik e abuziv, dinak e persekutues, i cili ka marrë me qera një kryeministër i cili krejt çfarë ka dashur tashmë e ka. Demokraci e drejtësi do të thotë që këta gjashtë persona t’ia kthejnë ndjekjen autorit.

Londra përkrahë rajonin e Ballkanit në ҫështjet e sigurisë

Samiti i ardhshëm në kuadër të Procesit të Berlinit, do të zhvillohet në Londër, në korrik. Me samitin e Londrës mbyllet cikli i dertanishëm i Procesit të Berlinit dhe pritet të hapet një tjetër

Andrew Page

I nisur në verën e vitit 2014, si një nismë diplomatike ndërqeveritare e kancelares Angela Merkel, ky proces synon të ndihmojë zhvillimin e Ballkanit Perëndimor (BP) për të bërë progres drejt hyrjes në BE përmes investimeve në infrastrukturë dhe forcimit të bashkëpunimit rajonal. Procesi i Berlinit kërkon të rigjallërojë lidhjet shumëpalëshe mes vetë vendeve të Ballkanit Perëndimor (BP) me njëri–tjetrin dhe me vendet më të fuqishme anëtare – Gjermani, Francë, Itali, Austri, Kroaci – për t’i dhënë impulse të reja perspektivës së anëtarësimit të BP në BE.

Por të gjitha palët e përfshira në procesin e Berlinit mendojnë se ky process duhet të vazhdojë edhe pas samitit të Londrës. Gjermania, inisiatore e këtij procesi, ka propozuar formulën “Berlin Proces Plus”. Britania e Madhe edhe pse po përgatitet të dalë nga BE, vitin që vjen dëshiron të vazhdojë zotimin e saj ndaj mbështetjes së perspektivës europiane të BP, duke u bërë vendi mikpritës i samitit të pestë të Procesit të Berlinit.

Prioritetet në Samitin e Londrës

Diplomati britanik, Andrew Page, koordinatori i këtij samiti, publikoi prioritetet e këtij samiti. Në vizitën e tij në Tiranë, dje (29.03.2018) ai bëri të njohura për gazetarët 3 prioritetet kryesore të Samitit të Londrës. „Stabiliteti ekonomik, siguria e brendshme – krimi i organizuar, korrupsioni, lufta kundër terrorizmit dhe radikalizmit fetar – dhe prioriteti i tretë mosmarrveshjet rajonale. Anëtarësimi i BP në BE sjell stabilitet në Europë. Strategjia e Komisionit Europian që këto mosmarrveshje të zgjidhen para anëtarësimit të vendeve të BP në BE është e qartë”, tha në Tiranë, koodinatori i Samitit të Londrës, Andrew Page.

Katër samitet e deritanishme të Procesit të Berlinit – Berlin 2014, Vienë 2015, Paris 20156 dhe Triestë 2017 – kanë prodhuar rezultate konkrete. Një nga arritjet më të shënuara është ngritja dhe funksionimi i RYCO – Zyra Rajonale për Bashkëpunimin Rinor- me seli në Tiranë, e cila promovon pajtimin dhe bashkëpunimin mes rinisë në rajon përmes programeve të shkëmbimeve rinore. Vendet e BP kanë nënshkruar një marrveshje për zgjidhjen e mosmarrveshjeve dypalëshe dhe po ecet drejt krijimit të Zonës Ekonomike të Ballknait Perëndimor ku mallra, shërbime dhe punëtorë të kualifikuar do të lëvizin në rajon pa pengesa.

Interesi i Britanisë së Madhe dhe perspektiva europiane

Koordinatori i Samitit të Londrës, Andrew Page theksoi në Tiranë se “interesi i Britanisë së Madhe ndaj perspektivës europiane të BP nuk do të ndalet dhe as do të ndryshojë”. Çfarë do t’i ofrojë Britania e Madhe rajonit në Samitin e Londrës për të konkretizuar vazhdimin e angazhimit të saj drejt perspektivës europiane?

„Përvojën në çështjet e sigurisë. Samiti i Londrës do të fokusohet në ndjekje se ku shkojnë paratë nga korrupsionit. Pra, nga faza e parandalimit të korrupsionit të avancojmë tek ajo e ndëshkimit. Kjo do të thotë ndjekje e parave të fituara dhe pasurive të pajustifikuara përmes korrupsionit dhe krimit të organizuar. Britania e Madhe do të ndihmojë agjensitë ligj-zbatuese në BP, ato të inteligjencës përfshirë edhe ato të hetimit duke vënë në dispozicion përvojën e saj në luftën kundër korrupsionit”, tha në Tiranë Andrew Page.

Rreziqet në Ballkanin Perëndimor

Edhe pse BP po jeton në paqe pas luftrave të përgjakshme të 1990-s në vendet e ish-Jugosllavisë, siguria dhe stabiliteti i tij është i cënueshëm nga rrjetet e krimit të organizuar, korrupsioni dhe radikalizmi fetar. Dhe nga përpjekjet në rritje për ndikim të Rusisë, Kinës apo Turqisë.

„Britania e Madhe është e ndërgjegjshme se nëse vendet e BP nuk ecin drejt anëtarësimit në BE dhe NATO, atëherë ka vende të tjera që kërkojnë të kenë ndikim në këtë rajon, që jo gjithmonë kanë të njëjtat vlera dhe qëllime si BE. Nëse qeveritë dhe popujt e BP dëshërojnër të shkojnë drejt BE, Britania e Madhe ka dëshirë të ndihmojë. Një vend tjetër nuk duhet ta pengojë këtë”, tha në Tiranë Andrew Page duke nënkuptuar Rusinë.

Ai theksoi se Britania e Madhe edhe pse largohet nga BE, nuk ka ndryshuar qëndrim, për të qënë një vend mik dhe partner me Ballkanin Perëndimor. Sfida e Britanisë së Madhe në Samitin e Londrës duket se do të jetë mbështetja e BP ndaj perspektivës europiane të anëtarësimit në BE kur ajo vetë është në prag të largimit nga ky bashkim./DW

Ripushtimi i Kosovës nga ushtria serbe më 1918

Në përfundim të Luftës së Parë Botërore me largimin e forcave austro-hungareze në tetor-nëntor 1918 Kosova dhe trevat e tjera të banuara me shqiptarë, të cilat Konferenca e Londrës e vitit 1913 ua kishte dhuruar Serbisë e Malit të Zi, u ripushtuan nga ushtria serbe

Shpresat e shqiptarëve se përfundimi i luftës dhe marrëveshjet paqësore do t’i korrigjonin vendimet e padrejta të fuqive ishin të kota, shkruan Armend Mehmeti në numrin e sotëm të Kohës Ditore.

Fuqitë e Mëdha jo vetëm që njohën sovranitetin e Serbisë mbi këto vise, por ata duke u nisur nga Traktati i Fshehtë i Londrës i vitit 1915 synonin ta copëtonin edhe më tej Shqipërinë e vitit 1913 duke iu ofruar territore shqiptare Italisë, Greqisë e Serbisë.

Në këtë mënyrë, shqiptarët e Kosovës dhe të viseve të tjera shqiptare pas Luftës së Parë Botërore mbetën nën sundimin serb, tani nën emrin e ri Mbretëria serbe-kroate-sllovene, e shpallur më 1 dhjetor 1918 pas bashkimit të serbëve, kroatëve dhe sllovenëve në një shtet të përbashkët.

Por, pavarësisht krijimit të një mbretërie të re, e cila pretendonte të ishte një shtet modern i kohës, qëndrimi negativ ndaj shqiptarëve nuk ndryshoi aspak. Vazhdoi politika e njëjtë serbe e persekutimit dhe dëbimit të shqiptarëve nga viset e tyre. Në fakt Mbretëria SKS nuk i konsideronte shqiptarët as si një pakicë etnike edhe pse e kishte nënshkruar më 10 shtator 1919 Traktatin e Sen Zhermenit për pakicat, në veçanti neni 2 theksonte: “shteti serb-kroat-slloven obligohet që të gjithë banorëve të saj t’u sigurojë mbrojtje të plotë dhe të përgjithshme të jetës dhe lirisë pavarësisht nga origjina, gjuha, etnia, raca apo besimi fetar”, dhe neni 7: “asnjëlloj kufizimi nuk do të kenë në përdorimin e cilësdo gjuhë nga secili qytetar i shtetit serbo-kroat-slloven qoftë në raportet private apo tregtare, të religjionit apo të shtypit e takimeve publike”, që kishin të bënin drejtpërdrejt me shqiptarët.

Zbulohen pamje kur gylenistët me duar të lidhura dëbohen nga Kosova

Askush nuk kishte informacion se a u larguan nga Kosova ditën kur u arrestuan. Lajmi.net, ka shfaqur disa video ku shihen gylenistët duke bërë kontrolelt e fundit në aeuroportin e Prishtinës për t’u dërguar pastaj në Turqi

Deri më tani gjithçka ishte e mjegullt se çfarë ka ndodhur me gjashtë shtetasit turk që u arrestuan më 29 mars në Kosovë dhe pikëpyetja më e madhe ishte se a u deportuan në Turqi?

Familjarët e të arrestuarve këmbëngulnin se të arrestuarit gjenden në Kosovë, konkretisht në pjesën e vjetër të aeroportit të Prishtinës. Mirëpo, lajmi.net ka siguruar pamje ku të arrestuarit shihet tek sa lënë Kosovën. Ata kalojnë nga pjesa e zonës VIP e Aeroportit të Prishtinës për të kaluar më pas tek aeroplani i Inteligjencës turke ku po i priste në pistë.

Të arrestuarit shihen se janë të shoqëruar nga policia e Kosovës dhe, në video shihen qartë se ata kanë kaluar në zonën VIP të Aeroportit të Prishtinës rreth orës 10:00 minuta të mëngjesit, raporton lajmi.net. Gjithashtu pamjet e tjera tregojnë një kombi-bus që i ka shoqëruar deri të aeroplani turk për t’i nisur më pas në Turqi. Nga ana tjetër, mediat turke, raportojnë se të deportuarit tash janë duke u marr në pyetje nga prokuroria turke.

Kujtojmë, se me insistimin e familjarëve, mbrëmë (e premte) Aeroporti i Prishtinës u kontrollua nga EULEX-i për të vërtetuar se a janë deportuar nga Kosova gjashtë shtetasit turq të arrestuar mëngjesin e së enjtes. EULEX-i gjatë kontrollues nuk gjeti asgjë.

Përveç kësaj krerët e institucioneve shtetërore, presidenti Hashim Thaçi, kryeministri Ramush Haradinaj, kryetari i Kuvendit Kadri Veseli, nuk kanë qenë në dijeni dhe nuk kanë poseduar informacion se çfarë ka ndodhur konkretisht me të arrestuar, së paku kështu janë deklaruar para familjarëve (ku i priti në takim kryeministri Haradinaj) dhe para mediave.

Megjithëkëtë, krerët e shtetit nuk kanë qenë në dijeni, siç u deklaruan, se si ka ndodhur arrestimi i gylenistëve. Pas këtij ‘skandali’, kryeministri Haradinaj ka shkarkuar nga detyra ministrin e Punëve të Brendshme, Flamur Sefajn dhe Drejtorin e Agjencisë se Inteligjencës së Kosovës. Të arrestuarit janë identifikuar si Cihan Özkan, Kahraman Demirez, Hasan Hüseyin Günakan, Mustafa Erdem, Osman Karakaya dhe Yusuf Karabina.

Ndryshe, pas puçit të 15 korrikut të viti 2016, Turqia akuzon Fethullah Gylenin, krerikun mysliman që jeton në SHBA për orkestrim të grushtshtetit dhe e ka deklaruar lëvizjen e tij si terroriste.

Sadiku: Hashim Thaçi i bëri një favor Turqisë, mund të kërkojë strehim kur ta kërkojë Specialja

Opinionisti Fatlum Sadiku beson se prapa deportimit të 6 gylenistëve turq që jetonin në Kosovë, qëndron presidenti i shtetit, Hashim Thaçi

Sipas tij, presidenti po e bën këtë me një arsye, ngaqë është i vetmi vend që do ta strehonte Thaçin po që se do të kërkohej për t’u arrestuar nga Gjykata Speciale.

Sadiku thotë se Turqia kishte strehuar shumë hebrenj që përndiqeshin nga ish-diktatori gjerman Adolf Hitler dhe kështu mund të bëj edhe me presidentin Thaçi, i cili përflitet si një ndër njerëzit e parë që mund të ngarkohet me aktakuza për krime lufte nga Gjykata Speciale.

“Në rast të rrezikut prej Speciales po pandeh që njëmend ka me kërku edhe vet strehim n’Turqi. Klima për diçka të tillë u ndreq: evropianët nuk ia kanë transferu gylenistat Turqisë, na po.

Tash n’rast rreziku, pse mos me u kthy e mira me të mirë? Hashimi tjetërkund s’ka derë (po n’daltë Vuçiqi ma zemërgjerë se Erdogani). Turqia ka strehu plot hebrenj t’përndkjekun prej Hitlerit, e ka pas strehu familjen e Barzanit të Irakut verior, pse jo edhe Thaçin”, ka shkruar në Facebook Sadiku.

Kidnapimi i gylenistëve lë Kosovën pa liberalizim të vizave

Arrestimi dhe deportimi mistik i 6 turqve gylenistë, duket se do të prodhojë shumë efekt në dëm të Kosovës. Kështu, të paktën, po thonë njohës të integrimeve, të cilët për ngjarjen e djeshme në Kosovë po thonë se do të ketë disa mesazhe nga Evropa, shkruan gazetametro.net

Naim Rashiti, drejtori i Grupit Ballkanit të Politikave, ka thënë se kidnapimi i 6 turqve, përveç që është skandal, ai do të rëndoi edhe agjendën për liberalizim të vizave.

“Do t dihet shpejt e lehtë se çka ka ndodhur me rastin e kidnapimit të 6 turqve… Përveç që është një skandal i madh ku një numër eksponentësh janë përfshirë dhe janë korruptuar për të ndihmuar këtë aksion, shteti e rëndoi fort agjendën e liberalizimit të vizave”, ka thënë Rashiti.

Ndërkohë, ai ka thënë se për këtë çështje Kosova do të marrë disa mesazhe nga vendet e BE-së dhe Parlamenti Evropian. “Vendet e BE-së dhe parlamenti evropian do të ketë së shpejti ca mesazhe për ne…”, ka shtuar Rashiti.

Ndryshe, arrestimi dhe deportimi i turqve gylenistë nxiti shumë reagime në Kosovë. Tre liderët kryesorë janë shprehur se nuk kanë ditur asgjë rreth kësaj ngjarje, ndërkohë që kanë nisur shkarkimet nga pozitat që mendohet të jenë përgjegjëse.

EULEX kontrollon Aeroportin, pengjet nuk janë në Kosovë

Gjashtë shtetasit turq të arrestuar gjatë ditës së djeshme nuk janë në Kosovë. Gazeta Express ka mësuar nga burimet e veta se EULEX ka kontrolluar Aeroportin e Prishtinës dhe ata nuk janë gjetur aty

Aeroportin e Prishtinës pak minuta më parë e ka kontrolluar EULEX’i për të vërtetuar se a janë deportuar nga Kosova gjashtë shtetasit turq të arrestuar gjatë ditës së djeshme. Gazeta Express ka mësuar nga burimet e veta se pas kësaj kontrolle është vërtetuar se turqit nuk janë në Kosovë dhe ata nuk gjenden edhe në zyrat e Aeroportit të Prishtinës.

Për Express pak më herët njeri nga familjaret e turqve të arrestuar ka thënë se gjatë ditës së sotme i ka parë tre nga ta në Aeroport.

“Turqit e arrestuar nga Policia nuk janë deportuar nga Kosova. Ata janë duke qëndruar të ngujuar në Aeroportin e Prishtinës dhe në Ambasadën e Turqisë. Unë gjatë ditës së sotme tre nga ta i kam parë në një zyre në Aeroport. Sot atyre u kanë shkuar ekipe mjekësore për t’i kontrolluar”, ka treguar për Express njëri nga familjarët e të arrestuarve.

Të arrestuarit janë identifikuar si Cihan Özkan, Kahraman Demirez, Hasan Hüseyin Günakan, Mustafa Erdem, Osman Karakaya dhe Yusuf Karabina.

Lëvizja Gyleniste operon me shkolla në 160 vende nga Afganistani e deri në SHBA. Javët e fundit Kosova ka qenë në presion nga Turqia për të ndërmarrë një aksion kundër këtyre shkollave të themeluara nga Lëvizja Gyleniste.

Turqia akuzon Gylenin, krerikun mysliman që jeton në SHBA për orkestrim të grushtshtetit të 15 korrikut të vitit 2016 dhe e ka deklaruar lëvizjen e tij si terroriste ./Gazeta Express/.

Thaçi, një ujk që po e çojnë në kafaz

Nga Ilir Babaramo

Sulltani nuk kishte kaq dorë të lirë në pashallëkun e Shkodrës apo atë të Janinës sa kishte këtë të enjte Erdogani në Kosovën e Hashim Thaçit. Rrëmbimi I pesë mësuesve dhe një doktori me shtetësi turke, me leje të rregullt qëndrimi në Kosovë, në rrethana ende të pasqaruara plotësisht dhe më pas deportimi I tyre në Turqi ka topitur gjithë opinionin publik në Prishtinë. Rrëmbimi I tyre ka ndodhur në shkelje të rëndë të cdo të ligji e kodi , përfshirë dhe atë zakonor.

Të gjithë e dinë se gjithë këtë katrahurë që e ktheu Kosovën në një territor zulush e ka gatuar Hashim Thaçi. Parlamenti I Kosovës duhet të nisë menjëherë procedurën e impeachment ndaj presidentit të republikës, jo thjesht për atë që ka ndodhur, por për të izoluar një njeri që përgatitet të bëjë thagma të tjera vetëm të shpëtojë lëkurën.

Kosova ka legjislacionin më të mirë në Evropë. Ka ligjet që mbrojnë më shumë se kudo të drejtat e njeriut. Të gjitha përfunduan në një letër pa vlerë kur zarat e Thaçit që kanë pushtuar gjithë institucionet e Kosovës në periudhën e mbretërimit të klanit “Pronto”, rrëmbyen pa asnjë procedurë , pa I cuar më parë në gjykatë, pa u dhë asnjë mundësi mbrojtjeje gjashtë intelektualëve të cilët rrezikohen të dënohen me vdekje nga një regjim që I ka shpallur luftë gjithë perëndimit. Procesi I deportimit përcaktohet qartë me ligj. Të deportuarit duhet ti nënshtrohen të paktën dy shkalle gjykimi dhe më pas duhet të frimosë ministri I drejtësisë për dëbimin e tyre. Asgjë e tillë nuk ndodhi. Hashim Thaçi e ktheu Kosovën në një republikë gangsterash.

Nuk mjafton vetëm shkarkimi I zyrtarëve që zbatuan këtë skenar. Ata duhet të arrestohen dhe dënohen për shpërdorim detyre dhe shkelje të të drejtave themelore të njeriut. E megjithatë dhe kjo masë do ishte e pamjaftueshme. Parlamenti I Kosovës duhet tëe nisë procedurën që ti japë fund ciklit aventurier në të cilën Hashim Thaçi po e fut Kosovën.

Që prej dhjetorit, Thaçi ndihet si një ujk që po e fusin në kafaz. Por gjithmonë ka vepruar si dhelpër , duke hedhur gurin dhe fshehur dorën. Fillimisht tentoi të anullojë ndryshimet kushtetuese që mundësojnë krijimin e Gjykatës Speciale. E mbani mend reagimin e Perëndimit. Ambasadori britanik foli për “natën më të errët në Kosovën e pasluftës”, ndërkohë që ai amerikan mblodhi “komandantët” dhe ua bëri të qartë se nëse anullohet gjykata speciale marinsat do hynin në Parlament. Kaluan ca kohë dhe Thaçi bashkë me mediat e oligarkëve nuk e përmendin më këtë nismë. Megjithatë krijimi I gjykatës qëndron si shpata e Damokleut, ndërsa të gjithë bëjnë sikur nuk e shikojnë. Në të gjitha proceset e mëparshme kundër komandantëve të UÇK Thaçi ia ka hedhur paq. Rramushi , Fatmiri me shokë kanë bërë dhe burgun e tij. Këtë herë duket se nuk do ia dalë pa lagur. Për këtë arsye nuk gjen qetësi. Ka zgjedhur të përdorë taktikën e Haxhi Qamilit : me kaos zgjidhet gjithçka.

Në pak muaj ka përdorur gjithçka për ti dëshmuar perëndimit se është I domosdoshëm, duke provokuar kriza të njëpasnjëshme dhe për të treguar më pas se vetëm ai mund ti zgjidhë. Hodhi në tregun mediatik përmes altoparlantëve gagaçë të tij idenë e ndarjes së Kosovës, tezën e Qosiçit, tezë që e ka aq për zemër Vuçiç , I cili thotë se duhet një marrëveshje që dhe Serbia të fitojë diçka. Po përmes zarave të tij hodhi idenë e çmendur të kombit kosovar, sipas të cilës askush tjetër veç tij duhet të flasë për Kosovën me Serbinë.

Aventura më e fundit ishte ajo e shoët mediatik që bëri me Gjuriç. Tashmë të gjithë në Prishtinë e dinë se ajo ishte një mise en scene me regji të përbashkët me Vuçiç. Të dy do përfitojnë: Thaçi statusin e paprekshëm që duhet të gëzojë babai I kombit kosovar, ndërsa Vuçiç të maksimalizojë kërkesat e tij në negociata, bisedime në të cilat presidenti I Kosovës ka hyrë pa një mandat nga parlamenti, të cilat zhvillohen në mungesë totale transparence.

Kriza më e fundit e provokuar nga Thaçi duhet të shërbejë si shtysë për ti dhënë fund ballos me maska që po luhet nga partitë e Kosovës. I pari që duhet ta mbështesë impeachment duhet të jetë Kadri Veseli. Vetëm në këtë mënyrë do jetë I besueshëm kur lë të kuptohet se kërkon të dalë nga hija e “gjarpërit” apo se kërkon ta pastrojë PDK nga klani “Pronto”. Nëse nuk bëhet pjesë e këtij procesi atëherë dëshmon se gjithçka është farsë dhe fati I tij është I lidhur me atë të Thaçit si ai I dy vëllezërve siamezë. Albin Kurti duhet të jetë patjetër në vijën e parë të këtij procesi. Me apo pa të drejtë , gjithmonë e ka vizatuar presidentin si të keqen më të madhe të politikës së Kosovës.

LDK-së I krijohet mundësia të dëshmojë nëse ka qenë vërtet viktimë e intrigave të Thaçit apo kënaqej me ca poste ministrash në bashkëqeverisje. Testi mbetet më I vështirë për deputetët e Grupit të Pavarur, të cilët duhet të dëshmojnë se nuk janë vegla që Thaçi, devollët dhe argati i tyre medialë përdorën për të përçarë partinë më të madhe , të vetmen hapësirë politike që nuk kontrollohet nga oligarkët. Për Ramushin nuk besohet se do ketë dilemë. Politikanin që mendohej se do drejtonte më dorë të fortë qeverinë, gjatë javës së fundit , Hashimi e katandisi në njeriun më të pafuqishëm politikisht, madje më pak të informuar se dhe Adem Grabovci qeverinë e mëparshme.

Mbi të gjitha, përtej çdo kalkulimi politik, klasa politike duhet të tregojë një minimum përgjegjshmërie, jo vetëm për të mbrojtur Kushtetutën por dhe Kosovën nga një president që shkel kushtetutën, nga një njeri që ndihet si ujk që po e mbyllin në kafaz.

Njerëzit e Haradinajt të përfshirë në deportimin e ‘gylenistëve’

Ministria e Infrastrukturës, e drejtuar nga Pal Lekaj, ka shkelur rregullat, kur i ka dhënë leje për aterrim në Aeroportit të Prishtinës, aeroplanit i cili u shfrytëzua nga shërbimi sekret turk MIT për të deportuar gjashtë ‘gylenistët’

Nga kryeqyteti turk, Ankaraja, aeroplani i kompanisë ajrore, Birlesik Insaat ishte nisur në drejtim të kryeqytetin kosovar dhe në orën 7 e 15 të mëngjesit kishte ateruar në Aeroportin Ndërkombëtar të Prishtinës, Adem Jashari.

Ai kishte arritur 30 minuta më herët sesa ishte paraparë në agjendën e fluturimeve të Agjencisë së Shërbimeve të Navigacionit Ajror, për ditën e 29 marsit, raporton KTV.

Misioni i tij i vetëm mendohet se ka qenë marrja e 6 shtetasve turq të arrestuar nga Polica e Kosovës dhe AKI-ja, në një aksion që sipas kryeministrit, Haradinaj nuk ka zgjatur më shumë se 2 orë.

Kthimi i tij prapa ishte paraparë të bëhet ne orën 10, por në fakt largimi i tij nga hapësira ajrore e Kosovës kishte ndodhur vetëm në orën 17 e 30 minuta.

Ministria e Infrastrukturës nuk ka dhënë shumë detaje për fluturim misterioz që mendohet se me vete mori 6 turqit e arrestuar nga Policia e Kosovës.

Në një përgjigje elektronike, këshilltari i ministrit Pal Lekaj, Argjend Zenaj ka treguar se aeroplani i Birlesik Insaat kishte aplikuar për leje fluturimi jo te rregullt/charter 48 orë para fluturimit.

“Kompania ajrore Birlesik Insaat ka aplikuar për leje fluturimi jo të rregullt/charter më dt 27.03.2018, MI-ja i ka lëshuar leje fluturimi me dt 28.03.2018. Aeroplani ka ateruar në ANP Adem Jashari më dt. 29.03.2018 në orën 07:15 min, me kthim në orën 10:00, por është kërkuar shtyrje e kthimit për në orën 17:30 min. Dhe kjo është e tëra çfarë mund të themi ne si Ministri e infrastrukturës”, ka thënë Zenaj.

Në insistimin e KTV-së, për ta ditur se cila ka qenë arsyeja e aterimit në Kosovë të kësaj kompanie, pasi sipas rregullores për aprovimin fluturimeve charter dhe Taxi Jo-HPEA, kompanitë duhet të shpjegojnë arsyet e aterrimit, Zejna është përgjigjur shkurt, duke thënë se është çështje biznesi.

Ndryshe, kjo leje e lëshuar nga Ministria e Infrastrukturës është në kundërshtim me këtë rregullore.

Kjo, pasi aty përcaktohet se kompania duhet të aplikojë për leje operimi 78 orë para nisjes së fluturimit, e jo 48 orë siç ka ndodhur në rastin konkret.

Fluturim i Charter i Birlesik Insaat, nuk është regjistruar fare se ka kaluar në hapsirën ajrore të Kosovës.

Sidoqoftë, nuk është hera e parë që Shteti i Turqisë ka kërkuar nga Kosova ekstradimin e pjesëtarëve të organizatë “Feto” që udhëhiqet nga Fetullah Guleni.

Në dhjetorin e kaluar Turqia kishte bërë kërkesën për ekstradim të shtetasit të saj Ugur Toksoy, por autoritetet e Kosovës kishin zhvilluar të gjitha procedurat ligjore.

Gjykata Themelore në Prishtinë e liroi atë, pasi shteti i Turqisë nuk kishte ofruar prova për të mbështetur kërkesën për ekstradimin e tij, përkundër insistimit të Prokurorisë Speciale.

Tentim grusht-shteti i korrikut 2016 në Turqi, përveç që la mbi 200 viktima, ka rezultuar edhe me arrestimin e 55 mijë e 665 turqve, si të dyshuar lidhur me të.

Gruaja e gylenistit të deportuar: Policët që arrestuan burrin tim nuk ishin shqiptarë

Gjashtë shtetasit turq të arrestuar në Kosovë mund të mos jenë prangosur nga policë të Kosovës. Kështu thotë gruaja e njërit prej të arrestuarve e cila ishte prezent kur policia i mori burrin

Gruaja e të arrestuarit Jusuf Karabina, thotë se policët që i prangosën burrin nuk ishin shqiptarë. Thotë se ata ishin të dërguar nga shërbimet sekrete turke. “Policia nuk na ka dhënë asnjë informacion”, thotë ajo për Euronews. “Ata nuk ishin policë të Kosovës por njerëz të shërbimit sekret turk”, shpjegon ajo më tej. “Na morën me forcë dhe më lanë shenja në duar mua dhe djalit në gjoks”, tregon Karabina.

Të arrestuarit janë identifikuar si Cihan Özkan, Kahraman Demirez, Hasan Hüseyin Günakan, Mustafa Erdem, Osman Karakaya dhe Yusuf Karabina. Lëvizja Gyleniste operon me shkolla në 160 vende nga Afganistani e deri në SHBA. Javët e fundit Kosova ka qenë në presion nga Turqia për të ndërmarrë një aksion kundër këtyre shkollave të themeluara nga Lëvizja Gyleniste.

Ankaraja thotë se gjashtë të arrestuarit në Kosovë të enjten janë përgjegjës për rekrutime në rrjetin e Gylenit dhe se janë ndihmuar njerëz të akuzuar për prishje rendi në Turqi. Turqia akuzon Gylenin, krerikun mysliman që jeton në SHBA për orkestrim të grushtshtetit të 15 korrikut të vitit 2016 dhe e ka deklaruar lëvizjen e tij si terroriste. Ndërkohë, ai ka dënuar çdo lidhje me rastin.