Lajm.co

Jeremiq: Kosova do të anëtarësohet në OKB, mund të bashkohet me Shqipërinë

Kryetari i Partisë Popullore serbe, Vuk Jeremiq, pretendon se presidenti i Serbisë Aleksandar Vuçiq, po përshpejton negociatat për demarkacionin e kufirit me Kosovën, në mënyrë që marrëveshja e Vuçiqit me presidentin e Kosovës Hashim Thaçi, të finalizohet në katër muajt e parë të vitit 2019

Siç raporton FoNet, Jeremiq ka thënë se “Demarkimi i kufijve do të thotë se në anën tjetër të kufirit të mbetet 90 për qind e territorit të Kosovës, por edhe pjesët jugore të Serbisë, të cilën shqiptarët e quajnë Lugina e Preshevës”.

Ai gjithashtu tha se Kosova do të bëhet anëtare e plotë e Kombeve të Bashkuara, siç është Serbia sot dhe se nuk do të ketë pengesë në të drejtën ndërkombëtare për t’u bashkuar me Shqipërinë, përcjell Telegrafi.

“Kur flas për Shqipërinë e Madhe nuk flas përmendësh”, shtoi Jeremiq.

Ish-shefi i diplomacisë serbe, Jeremiq, theksoi se Serbia mund të përballet me kërkesa të reja territoriale “nëse ajo sot pajtohet që në paqe t’ia vizatojnë kufijtë e saj”.

“Vuçiq është i vetëdijshëm për këtë, por vizioni i tij për Serbinë është një ‘gardh’ i mallkuar”, thotë Jeremiq, duke shtuar se “presidenti serb është në konflikt me moralin dhe ndërgjegjen”.

Katalogu serb i luftës dhe i “paqes”

Nga Enver Bytyçi

Shumë herë më shtrohet pyetja këto kohë se “Pse nuk duhet të pajtohemi me serbët”? Qëndrimet e mia kundër ndryshimit të territorit duket se interpretohen ose lexohen si qëndrime antiserbe. Nuk po flas për reagimet e presidentit të Kosovës, i cili kritikëve të tij, përfshi dhe kryeministrit Haradinaj, u adresohet me fjalinë e njohur: “Ju nuk e doni dialogun”!

Në fakt kundërshtitë për mos ndryshimin e kufijve të Kosovës në favor të Serbisë nuk kanë të bëjnë me dialogun apo nevojën e pajtimit me Serbinë. Ato kanë të bëjnë me principet e dialogut, me zbatimin e rregullave morale e politike të pajtimit midis dy popujve. Që këto principe nuk merren parasysh, ky fakt është i njohur dhe tashmë i argumentuar në reagime të shumta rreth çeshtjes në fjalë. Por ajo që më shqetëson ka të bëjë me faktin se politikanë dhe njerëz të shumtë të medias, kulturës dhe shkëncës në Shqipëri besojnë shpejt e bëhen pre e shfaqjes teatrale të diplomacisë dhe politikës së Beogradit. Ndaj për ta kuptuar këtë do të përshkruaj karakterin serb të luftës e të paqes.

Elita serbe kur përgatitet për luftë flet shumë për paqen. E glorifikon paqen deri në atë masë sa ta bindë tjetrin se lufta është domozdoshmëri për paqe. Por luftën e fillojnë në momentet më të favorshme të mundshme. Më tej ata në luftë nuk zbatojnë asnjë lloj principi. Vrasin, masakrojnë, dhunojnë e përdhunojnë pa dallim moshe, kategorie shoqërore, gjinie, besimi, feje, mjafton që të ekzekutuarit të jenë “armiqtë potebncialë” të Serbisë! Djegin e shkatërrojnë gjithçka. Viktimat i zhdukin, i lënë pa varr, sepse nuk duan që të dokumentohen krimet që bëjnë. Pas masakrave mburren në sy të njëri – tjetrit. Bëjnë masakra edhe me baste. Madje vrasin fëmijën e tyre, mjafton që të akuzojnë psh shqiptarët për atë vrasje. Raste të tilla i përshkruan deri në imtësi kronikani i Luftës së Parë Ballkanike, Aleksandër Leo Freundlich.

Nëse e humbasin luftën politikanët dhe diplomatët serbë menjëherë të ftojnë në bisedime. Ngrejnë flamurin e bardhë dhe thonë “Jo, ne jemi për paqe, duamm të bisedojmë”! E glorifikojnë dialogun dhe kërkojnë pajtim. Por e kushtet e tyre. Ti nuk mund të vendosësh asnjë kusht! Qëllimi është ta fitojnë në paqe atë që kanë humbur në luftë. Fillimisht flasin për bisedime me qëllim “përmirësimin e jetës së qytetarëve”. Më vonë vendosin kushte politike derisa të arrijnë të territori. E zgjasin procesin në pafundësi, gjithnjë në kërkim të kohës së përshtashme për ta. Në momentin që ulesh e bisedon ata të bëjnë lajka të çuditshme. Të ofrojnë gjithçka të parëndësishme për interesat serbe. Ofrojnë edhe marrëveshje në dukje të favorshme për ty.

Nuk harrojnë që në takimet me viktimën e vet të regjistrojnë ditëlindjet e bashkëbiseduesve, të planifikojnë biseda në ditëlindjen tënde e më pas të marrin mandolinën apo firzamonikën e të të këndojnë serenate serbisht. Të dehin e të turbullojnë në tru, aq sa të duket vetja fajtor pse ke luftuar kundër këtyre “qingjave kaq të butë”, edhe pse janë të njëjtët.

Sapo të ta kenë tatuar pulsin, fillojnë e të bëjnë elozhe, ta përkëdhelin ambicjen, të lëvdojnë publikisht, nuk ngurojnë të të hapin rrugën si “i parë” e për këtë vdesin sidomos shqiptarët! Duket sikur ata të vijnë mbrapa, por nga mbrapa thurin të gjitha intrigat! E ti nuk e ke aftësinë të shohësh me bythë intrigën serbe.

Aq shumë të afrohen, sa ti harron se para disa kohësh të kanë vrarë, masakruar, djeg e përdhunuar. Sigurisht ata afrohen kur ti i lejon vetë të të vijnë afër. Kur joshesh dhe prej fjalëve, lëvdatave, mburrjeve që të bëjnë.

Joshjen e vijojnë shkallë-shkallë, derisa të bëhesh njësh me ta. I lëshojnë gjërat si pa vënë re, të intimidojnë me slloganet e paqes, derisa të të mbushin mendjen se “Ti nuk mund t’i fitosh të gjitha dhe unë asgjë”! Ti harron se atë që e ke fituar me luftë është e jotja nga çdo lloj pikëpamje e së drejtës. Harron, se e ke mendjen te joshjet, te serenatat, te fjalët e ëmbla, te mburrjet, ndoshta edhe të bukuroshja, me të cilën ke kaluar natën me të!

Për të të bundur plotësisht se “E drejta është në anën e dhunuesit”, diplomatët dhe politikanët serbë të thonë: ”Shiko, ne e dijmë se e kemi humbur luftën me ju, por ne jemi para një presioni të madh të opozitës, të nacionalistëve, të ekstremistëve, prandaj na duhet kompromisi”. Ti harron se si nacionalistët ashtu dhe këta bashkëbiseduesit e tu janë të njëtët. Dhe fillon e dyshon te vetja, aq sa të vjen keq që bashkëbiseduesi që ke përballë “ndodhet në një situatë kaq të vështirë”. “Ej, të thonë, Xhinxhiq u vra, a doni që dhe ne të pësojmë fatin e tij, nëse nuk marrim asgjë nga ju”?! E përsërisin këtë derisa ti t’i ofrosh nga vetja jote, tashmë territoret e tua!

Dhe kështu diplomatët e politikanët serbë erdhën deri te kërkesa për territore. Fillimisht e bindën kryeministrin e Shqipërisë, Edi Rama, pasiqë ky nuk kishte e nuk ka ndonjë sentiment antiserb, madje as pro Kosovës! Pastaj përmes Ramës e futën në thes Hashim Thaçin. Këtij të fundit nuk i ofruan vetëm joshje. Ia tundën edhe kërbaçin. Madje presioni i erdhi gjithashtu nga Rama. Thonë se Rama në prani të Batonit tregon histori të sajuara me biseda me amerikanë, të cilët paskan vendosur ta dërgojnë në Gjykatën Speciale Hashim Thaçin. E këto biseda Batoni i transmeton me mburrje në Prishtinë, sepse hobi i tij është të dëshmojë se “di shumë”!.

Prandaj jemi në këtë pikë të hallit, kur jo vetëm shqiptarët, por edhe bota po tallet me presidentin dhe kryeministrin terrtorndarës të shqiptarëve, pasi ky është një rast ky unik në historinë e shteteve sovrane të botës! Ndërkohë që Tereza Mmay thotë: “Serbisë i duhet ndaluar hyrja në BE, sepse ajo është Kali i Trojës i Rusisë në Europë”, ne harrojmë shpejt, kemi harruar jo vetëm të kaluarën e largët, por edhe atë të sotmen! Disa madje mburren si moderatorë, kur predikojnë “pajtimin” me falje territoresh ndaj Serbisë!

Kryeministër, kur po e shkarkon Zëvendësministrin e zënë të zhytur në ryshfet

Në Qeverinë e Ramush Haradinajt u rrit edhe për një numri i të atyre që po dyshohen si shkelës të ligjit. Policia e Kosovës ka arrestuar mbrëmë një zëvendësministër, që vjen nga radhët e AAK’së. Bëhet fjalë për Musa Cenën, i cili akuzohet se ka marrë ryshfet. Cena ende nuk është shkarkuar derisa Kryeministri dhe Zyra e tij kanë heshtur

Zëvendësministri i Zhvillimit Rural, Musa Cena, është arrestuar mbrëmë pasi dyshohet se ka marrë ryshfet dhe ka keqpërdorur detyrën dhe autoritetin zyrtar. Kur kanë kaluar më shumë se 12 orë prej arrestimit s’ka asnjë reagim nga Qeveria dhe Kryeministri Haradinaj.

I dyshuari për marrje ryshfeti ende nuk është shkarkuar dhe as pezulluar. Nga Prokuroria Themelore e Prishtinës kanë konfirmuar për Gazetën Express se do të kërkojnë një muaj paraburgim për zv.ministrin e arrestuar.

Cena dyshohet se veprat penale i ka kryer përgjatë punës së tij në Ministrinë e Zhvillimit Rajonal. Kësisoj kryeministrit më nuk i qëndron justifikimi që përdorte për qeveritarë të tjerë se ‘nuk po akuzohen për vepra penale të kryera gjatë detyrave në Qeverinë e tij’.

Gazeta Express ka pyetur stafin e Kryeministrit nëse shefi i Qeverisë do të marrë masa për zv.ministrin që dyshohet se mori ryshfet, megjithatë nuk ka marrë asnjë përgjigje.

Kryeministri Haradinaj është pyetur nga gazetarët për secilin zyrtar të lartë të Qeverisë që është akuzuar për vepra penale, nëse do t’i lironte nga detyrat e tyre.

Haradinaj nuk e ka shkarkuar asnjë ministër a zëvendësministër ndaj të cilit është ngritur aktakuzë, ndonëse diçka të tillë pati paralajmëruar krejt në fillim, kur e formoi Qeverinë.

Rrugës, Kryeministri zbuti kriteret e tij për njerëzit që do ta përbënin kabinetin qeveritar. Ndaj tre ministrave të tij u ngritën aktakuza dhe secili prej tyre vazhdoi punën e tij.

Ministri i Inovacionit, Besim Beqaj, është në listën e të akuzuarve për aferën “Pronto”. Ndak ministrit të Infrastruktutrës, Pal Lekaj, është ngritur aktakuzë në muajin prill të këtij viti për keqpërdorim të detyrës zyrtare dhe përvetësim në detyrë sa ishte kryetar i komunës së Gjakovës. Lekaj është liruar nga një pjesë e Ndërsa ministri i FSK’së, Rrustem Berisha, akuzohet për mashtrimet në listat e veterënave të luftës. Ministri i Zhvillimit Ekonomik, Valdrin Lluka, ka

Ndërsa, ashtu sikurse ministri Berisha, edhe zëvendësministri i FSK’së, Agim Çeku, akuzohet për mashtrimet në listat e veteranëve,pasi kishte udhëhequr komisionin që ka bërë njohjen dhe verifikimin e statusit të veteranëve.

Musa Cena u arrestua mbrëmë nga Policia e Kosovës, bashkë me dy persona të tjerë, të dyshuar se janë involvuar në veprat penale ‘Marrje e Ryshfetit’ dhe ‘Keqpërdorim i Pozitës apo autoritetit Zyrtar”. /Express

Rrjeti i bizneseve shqiptare në Austri i gatshëm të përkrahë prodhuesit kosovarë

Rrjeti i bizneseve shqiptare në Austri bën të ditur se nga institucionet e Kosovës kanë vetëm përkrahje morale, ndërkohë kërkon nga prodhuesit të rrisin cilësinë

Ky rrjet u themelua para katër viteve dhe tashmë funksionon me katër degë dhe afro 200 kompani anëtare.
Yll Blakaj, kryetar i këtij rrjeti, thotë se përmes këtij rrjeti kanë për qëllim ta rrisin bashkëpunimin mes bizneseve shqiptare në Austri, dhe jo vetëm.

“Si qëllim parësor është krijimi i besueshmërisë në mes të bizneseve, mes shqiptarëve ku veprojnë edhe punojnë, si qëllim primar për funksionalizimin e kontratave të ndryshme për marrëveshje të ndryshme për veprime të përbashkëta. Qëllim tjetër, shumë esencial, është bashkëpunimi me këto biznese dhe me partnerët e tyre në forma të ndryshme, që t’i investojmë në Kosovë dhe në Shqipëri, edhe të mundësojmë që bizneset tona të shtrihet edhe nëpër vendet e origjinës”, thotë Blakaj në një intervistë për KosovaPress.

Blakaj deklaron se me institucionet shqiptare kanë raporte të mira, por sipas tij, përkrahja më e madhe prej tyre po mungon.

“Përkrahja është deri tash morale, për të cilën e theksova, është shumë e vogël. Ne duke e ditur se gjysma e popullsisë së Kosovës është në diasporë, gjegjësisht në Gjermani, në Zvicër, i kemi edhe në Austri diku rreth 1 milion shqiptarë në dhjetëra mijëra firma atje, këtu jemi të përfaqësuar shumë pak. S’jemi hiq të përfaqësuar vetëm në nivelin e shoqatave. Kjo nuk është ajo që na duhet neve, sigurisht që nëse na përfaqësohemi ma mirë, ne edhe ma lehtë funksionojmë, ta bijmë atë mentalitet të punës këtu, që e kemi kriju me merita në vende tona, ta bijmë këtu”, thotë ai.

Megjithatë, Blakaj thotë se bashkëpunimi me bizneset ndërkombëtare dhe vendore nuk mungon, dhe njofton që ata po planifikojnë themelimin e një banke të diasporës.

“Në Europë i kemi diku rreth 1,000 firma anëtare të rrjeteve të bizneseve të cilat komunikojnë, shkëmbejë kontrata të ndryshme, shkëmbejnë kontrata të ndryshme, shumica edhe kanë plane ideore, siç është plani i bankës së diasporës edhe shumë plane tjera, të investojnë në Kosovë, domethënë është bashkëpunimi tepër i madh. Ne gjatë këtij katërvjeçari kemi mbajt takime shumë të rëndësishme ekonomike këtu në Prishtinë, në Tiranë edhe gjetiu. Kemi bashkëpunim tepër të ngushtë edhe me shoqatat e bizneseve këtu, të prodhuesve, shoqatën amerikane, shoqatat e prodhuesve të Shqipërisë, domethënë jemi ngushtë edhe me bizneset vendore”, deklaron Blakaj.

Njofton se puna e Rrjetit të bizneseve shqiptare po vlerësohet edhe nga Oda Ekonomike e Asutrisë.
“Javën e kaluar, Rrjeti i bizneseve në Austri, kishte një takim të të gjitha degëve me anëtarësinë e vet ku niqkoqir ishte Oda Ekonomike e Austrisë, e cila me të vërtetë u befasua me organizimin tonë, edhe me të arriturat tona. Domethënë ne po bashkëpunojmë ngushtë edhe me institucionet atje edhe dita-ditës po forcohemi si rrjet dhe si firma shqiptare”, thotë Blakaj. /kp

Orientalisti francez: Shqiptarët i gjen gjithkund në orient

Mathias Énard, orientalisti dhe shkrimtari francez, fitues i Çmimit Goncourt më 2015, ka thënë se shqiptarët i gjen gjithkund në orient

Duke folur për kulturën orientale te shqiptarët, në emisionin CODEX të KTV-së, Énard, i cili është ndër shkrimtarët më të shquar francezë sot, ka thënë “Shqiptarët janë gjithkund në historinë e Perandorisë Osmane. Ndër të tjera, të gjithë pashallarët e Egjiptit, e gjithë dinastia e Pavarësisë së parë të Egjiptit, prej shekullit XIX, prej ekspeditës së Egjiptit të Napoleonit, janë familje shqiptare.

Dhe për shkak të varësisë së madhe të Perandorisë Osmane prej Ballkanit, luftëtarët me prejardhje shqiptare janë të fuqishëm dhe të rëndësishëm në Perandorinë turke. Pra kemi shqiptarë gjithkund dhe ajo që është shumë interesante është se janë njerëz shumë të ndryshëm prej Egjiptit deri ne Lindje të Turqisë, në Azerbajxhan, në Ballkan, kemi ambasadorë, është një popull, të cilin në atë kohë e gjejmë gati gjithkund në Lindjen e Mesme, në mes shek XVI dhe XIX”.

Në intervistë, Énard ka folur për tri romane të tij: “Tregoju për betejat, mbretërit dhe elefantët”, “Busull” dhe “Zonë”.

Kërcënimet e Vuçiçit dhe paradat e Irinejit

Nga:Leonard KOMANI

Vuçiq vjen në Kosovë dhe lapidarizon Millosheviçin si hero që ka gabuar, ngase humbi Kosovën.Gaboi ish tirani serb që nuk dogji edhe natyrën pasi dëboi dhe masakroi gjithë njerëzit? Irinej, patriarku i kishës ortodokse sllave të Serbisë është njëri nga shovinistët më radikal dhe luftënxitësit më të rrezikshëm të rajonit. Ky thotë se Kosova është tokë e shenjtë e serbëve dhe s’mund të jepet.Gjë që implikon se ky Kosovën e konsideron jo shtet të pavarur por pronë të kishave dhe manastireve të tij – jo vetëm ato toka ku janë ato, por Kosovën, prandaj s’mund të jetë shtet i shqiptarëve apo qytetarëve tjerë aty.

Vulin, Gjuriç dhe Daçiç kërcënojnë për çdo ditë, ore-çast. Herë pas here kërcënon edhe Vuçiç, sidomos kur gjendet në vizitë tek presidenti rus Putin apo në linjë telefonike me homologun turk të të parit Erdogan.Iniciativës së ambasadores amerikane që zyra e fundit dhe jofunksionale e UNMIK të braktis përfundimisht Kosovën Vuçiç i reagoi me një kërcënim që nuk lë asnjë vrimë hapur për ndonjë spekulim për ta interpretuar ndryshe se si ç’tha: ai u betua se po ndodhi ikja e UNMIK, shtetit të tij nuk i mbetet gjë tjetër veçse t’i intervenojë për t’i mbrojtur serbët në Kosovë. Me çka mbrohen serbët në Kosovë, Kroaci, Bosnjë apo Mal të Zi, kur ata nuk sulmohen nga askush dhe kur gjenden në një territor të huaj? Me ushtrinë e Vulinit? Po. Ky ishte mesazhi konkret i presidentit serb.Kështu u kuptua nga të gjithë. Megjithatë nuk reagoi askush. As NATO, as BE, as SHBA dhe as ndonjë shtet tjetër – ndërkaq qeveria kosovare si ashtu nuk reagon zyrtarisht pothuaj asnjëherë.

Këtyre ditëve Kosovën e shkeli kryqe-tërthor edhe Patriarku Irinej. Kryepopi i kishës ortodokse serbe është luftënxitës: mohon shtetin që me eskortën e të tij e ka bërë poligon për radikalizim murgjish e fetarësh. Pronësinë e Kosovës e shpjegon me vullnetin e perëndisë së tij. Çdokush e di që shovinizmi, nacionalizmi religjioz nuk është vetëm më primitivi, por edhe më i rrezikshmi për paqen e çdo shteti të kësaj bote. Nuk shpallet person non grata, apo nuk i ndalohet hyrja se është prift?Nëse kjo do ishte arsyeja atëherë del qesharake dhe paradoksale: Kosova kur u desh arrestoi – edhe pse nuk i dënoi sipas veprës – klerikët e saj radikalë. Pse qenkan popët racistë e nacionalistë ortodoks më pak të rrezikshëm se imamët mjekër-hutuar wahabistë të Kosovës?

Jo s’janë fare. Një profil kanë – vëllezër të së njëjtës luftë janë!Pse pra nuk reagojnë qeveria, shoqëria, opozita dhe mediat? Jo duke i ndjekur me sëpata nëpër Kosovë, por asnjë protestë, asnjë notë verbale, asnjë ndalesë për popët e çartur që thonë se tokat e tjerëve të jenë varret e tyre të shenjta siç bëjnë gjithë maniakët ultranacionalistë të këtij planeti? Nuk reagojnë por nga ana tjetër ka një koprodhim të psikopolitikës antikosovare serbe; çdo gjë që është kundër Kosovës transmetohet në ballina me shkronja të zeza, por ashtu siç thuhet e pa asnjë reagim.Kjo donë të thotë mëso çka thotë dhe kërkon tjetri dhe mbylle!Qeveria e Kosovës as ndaj Vuçiçit as ndaj paradave morbide të Irinejit nuk reagoi.

Kuvendi si ashtu nuk ka kohë se duhet të paqësoj ish-komandantët që sillen si kauboj në parlament duke kërcënuar njëri tjetrin. Asnjë notë verbale për institucionet e involvuara të botës aty nuk e bëri. Me gjasë është bërë imune ndaj këtij poshtërimi.Ndryshe si shpjegohet mosreagimi kur dikush u vjen mu në mes të Kosovës dhe u thotë në sy se Millosheviçi është hero i tij. Le ta themi troç: Qeveri impotente në tru e fuqi i thonë kësaj! Le ta nënvizojmë edhe pak këtë realitet duke zgjeruar radiusin: shoqëri, shtet e qeveri – as opozita apo dikush tjetër nuk reagon – që po mos të ishin gratë si Vasfije Krasniqi, Kroacia dhe ndonjë tjetër, qe një ditë pas lufte do t’i kishte harruar të gjitha dhe do ishin edhe shumë më servile ndaj Vuçiçit dhe tjerëve se sa që janë tash.Ky është portreti i Kosovës në relacion me Serbinë siç perceptohet vetë nga shumica e qytetarëve të saj në shprehje dhe siç trajtohet edhe nga vetë serbët dhe ndërkombëtarët – pa dinjitet, pa kurriz, servile dhe atë jo vetëm si shtet por si tërësi.

Afërmendsh se aksionet spektakolare, qëllimisht të mediatizuara, si ato me atë funksionarin marionetë Gjuriç nuk janë të denja për një shtet. Nuk kërkohet kjo nga shtetit i Kosovës.Por diçka tjetër: ndër elementet më bazike që manifestojnë legjitimitetin e një sovraniteti është kontrolli i kufijve, e drejta e kombit, shtetit për të vendosur se kujt i „jep vizë“ të hyjë brenda e kujt jo.Thonë se me Serbinë çështja është më e komplikuar. Natyrisht. Por komplikimet i kanë bërë vetë: pse lejon që të hyjnë e dalin Irinej e Vuçiç, Gjuriç që thonë se s’ka pasur gjenocid, as dhunime? A nuk rrezikojnë këta sigurinë nacionale të një vendi – që në perëndim është alarmi suprem për të shpallur madje edhe gjendje të jashtëzakonshme? Qenka Qeveria aq e sigurt se qytetarët e saj deri dje të masakruar e dhunuar mezi i presin vizitave e këtyre provokuesve permanentë dhe mohues radikal të ekzistencës së shtetit që shkelin kur t’iu teket?Jo. Shteti, por edhe shoqëria e Kosovës duhet të mësojë që mos i shkel ligjet e saja, sovranitetin e saj jo vetëm kundër të korruptuarve dhe radikalëve të vetë por dhe atyre nga jashtë. Veçanërisht të tyre që lere se s’janë qytetarë të atyshëm por vrasësit më agresiv të shtetësisë së saj.

Nexhat Daci u përgjigjet akuzave për plagjiaturë

Akuzave për plagjiaturë dhe kritikave për mospunën e Akademisë së Shkencave dhe Arteve të Kosovës (AShAK), u është përgjigjur kryeakademiku Nexhat Daci, ka thënë se nuk merret me polemikat e organizatave joqeveritare, për të cilat tha se janë të pabaza

Në mbledhjen e 8 tetorit 2018 të Komisionit për Arsim, Shkencë, Teknologji dhe Kulturë, anëtarë të organizatës “Integra”, e cila së fundmi ka monitoruar punën e AShAK-ut, kanë akuzuar këtë institucion për “gërryerje” të parasë publike.

Këto akuza i janë drejtuar AShAK-ut, për shkak të të gjeturave të hulumtimit “Kriza në akademi”, autor i të cilit është Shkëlzen Gashi nga organizata “Integra”.

Të gjeturat e këtij hulumtimi, anëtarë të kësaj organizate i kanë cilësuar si brengosëse dhe neveritëse, sepse, sipas të dhënave, nga 4 projekte të mëdha të këtij institucioni, vetëm një ka përfunduar, tre anëtarë të saj janë të akuzuar për plagjiaturë, shumica e librave janë ribotime, etj.

Lidhur me akuzat për cilësinë e botimeve dhe të projekteve të Akademisë, kryeakademiku Daci i tha Ekonomia Online se ky institucion ka botimet më të rëndësishme të projekteve dhe librave.

Ai shtoi se Akademia do t’u ndihmojë gjithmonë institucioneve shtetërore, siç tha, për të mirën e qytetarëve dhe të rinisë.

“Unë nuk polemizoj me OJQ-të, faktografinë që e kanë dhënë për botimin e veprave shkencore janë gënjeshtra, të pasakta. Shteti e ka bërë ndërtesën dhe Akademia gjatë gjithë viteve ka botimet më të rëndësishme të projekteve dhe librave. Çka bëjnë të tjerët është çështje e tyre. Unë kurrë nuk kyçem në polemika të cilat nuk i konsideroj, por Akademia do të jetë gjithmonë ndihmesë e institucioneve shtetërore për të mirën e qytetarëve të Kosovës dhe të rinisë, këto të tjerat.., burimet financiare e bëjnë që një organizatë lobon për diçka dhe tjetra për diçka, Akademia nuk e çan fare krytë për atë punë”, tha Daci për E.O.

I pyetur lidhur me një nga të gjeturat e hulumtimit “Kriza në akademi”, e cila thotë se nga 22 anëtarë të rregullt të AShAK-ut, vetëm 3 kanë nga 3 punime të publikuara në revista akademike ndërkombëtare, ndërkaq prej 16 anëtarëve korrespodentë, 8 prej tyre kanë punime të publikuara në revista akademike ndërkombëtare, 3 nga 1 punim, 3 nga 3 punime dhe 2 të tjerë i kanë nga 6 përkatësisht 8 punime, Daci përsëriti qëndrimin e tij se nuk “kyçet në polemika të tilla pa bazë”.

“Në librin që është, është mirë të gjitha organizatat me e pa se është CV e shkurtë dhe shumë e gjatë e kryetarit të Akademisë dhe atje e shihni se sa janë punime të botuara jashtë vendit, sa libra dhe për të gjithë, ka shumë veprimtari në Akademi, nuk ju intereson, por vetëm presin se çka munden me sha, jo vetëm akademinë por të gjitha, prandaj unë nuk kyçem në polemika të tilla pa bazë”, tha Daci.

Daci është përgjigjur edhe për deklaratat e anëtarëve të organizatës “Integra”, të cilët në Komisionin për Arsim, të mbajtur më 8 tetor 2018, kanë thënë se Akademia e Shkencave ka qenë më aktive në kohën e Millosheviqit sesa tani.

“Unë nuk i kam dëgju, ata qenkan nostalgjikë atëherë të etapës së Millosheviqit. Akademia e ka shkruar deklaratën kushtetuese, deputetët e asaj periudhe e kanë lexuar atë që e ka shkruar Akademia, Kushtetuta e Kaçanikut po ashtu është prej akademisë, ndërsa kush ka nostalgji për Millosheviqin udha e mbarë i qoftë bashkë te Millosheviqi”, ka thënë Daci.

Shkëlzen Gashi, nga organizata “Integra”, njëherësh autor i hulumtimit “Kriza në Akademi” ka thënë se Akademia e Shkencave dhe e Arteve e Kosovës që nga viti 2007 buxhetit të Kosovës i ka marrë afro 10 milionë euro dhe nga 4 projekte që ka pasur vetëm dy prej tyre janë realizuar.

Sipas Gashit, dy projektet e realizuara kanë shumë vërejtje dhe janë të punuara në mënyrë joprofesionale.
Ai shtoi se prej 10 milionëve, 2/3 e buxhetit kanë shkuar për paga dhe mëditje të akademikëve.

Gashi përmendi akademikët të cilët, sipas tij, kanë bërë plagjiaturë dhe se askush nuk ka ndërmarrë kurrfarë mase rreth kësaj çështjeje.

“I kemi 3 njerëz që kanë bërë plagjiaturë, e kemi Nexhat Dacin që ka bërë plagjiaturë prej Musa Limanit, e kemi Sabri Hamitin që ka bërë plagjiaturë edhe e kemi Arsim Morinën që është po ashtu prej fushës së mjekësisë. Janë tre pjesëtarë të Akademisë për të cilët kanë dalë fakte të forta në medie ndër vite, kryesisht pas luftës për plagjiaturën e tyre dhe Akademia nuk ka ndërmarrë kurrfarë mase”, shtoi Gashi.

Në hulumtimim “Kriza në Akademi”, ndër të tjera shkruan: “Në vitin 2018, Kuvendi i AShAK-ut për kryetar zgjodhi akademik Nexhat Dacin, i cili më 10 nëntor 2010 ishte dënuar nga Gjykata e Qarkut në Prishtinë me 18 muaj burg me kusht për shpërdorim të detyrës zyrtare. Ky vendim ishte konfirmuar edhe nga një trup gjykues i Gjykatës Supreme, me dy gjykatës vendorë e një të EULEX-it”.

Majko: Kosova duhet të ketë kujdes në dialog me Serbinë

Ish-kryeministri i Shqipërisë, Pandeli Majko ka mirëpritur miratimin në parim të tri ligjeve për shndërrimin e Forcës së Sigurisë së Kosovës në ushtri, dhe ka thënë se siguria kombëtare e Shqipërisë dhe Kosovës janë të pandashme

Ish kryeministri, tash ministër i Diasporës në Qeverinë e Shqipërisë, në një intervistë për KosovaPress ka thënë se ushtria e Kosovës e bënë më të fortë edhe Shqipërinë.

“Është çështje e një forme ligjore e cila duhet të mbyllet përfundimisht dhe Kosova të ketë të drejtë të blejë armatim të rëndë, ashtu siç blejnë të gjitha kombet dhe shtetet natyrshëm të Evropës, sepse Kosova është shtet i cili po ndërton politikën e vet të sigurisë kombëtare. Ajo që është e rëndësishme ta them unë është që siguria kombëtare e Shqipërisë dhe Kosovës janë të pandashme. Në qoftë se Kosova ftohet apo sëmuret, ne andej kollitemi dhe anasjelltas”, ka thënë Majko.

Majko ka komentuar zhvillimet e fundit politike në Kosovë, duke thënë se Kosova duhet të ketë kujdes në dialogun Kosovë-Serbi, sepse serbët kanë prodhuar një politikë mjaft të qëndrueshme dhe janë pjesë e një loje që nuk fillon dhe mbaron në Beograd.

“Në qoftë se serbët kanë ndryshuar…le të shohim, por unë nuk hy te njerëzit që mendojnë se serbët janë një komb që ndryshojnë shpejt. Ata janë njerëz që kanë prodhuar një politikë goxha të qëndrueshme dhe janë pjesë e një shahu që nuk fillon dhe mbaron në Beograd. Megjithatë, të shohim”, theksoi ai.

Pandeli Majko nuk ka dashur ta komentoi idenë e presidentit Thaçi për korrigjimin e kufirit Kosovë-Serbi, sepse siç tha ai dy presidentët e tij, Ilir Meta dhe Hashim Thaçi kanë mendime të kundërta për këtë çështje. Megjithatë, ai mendon se me kohë do të arrihet e mira për Kosovën.

“Do më mirëkuptoni si agjenci që unë nuk do bëj debat për këtë çështje me presidentin e Kosovës, që është edhe presidenti im, bashkë me presidentin Meta. Dy presidentë që kanë mendime krejtësisht të ndryshme për këtë çështje, kështu që, unë nuk dua t’i fus më shumë në sherr ata, por do mbaj qëndrim duke heshtur pozitivisht, në një çështje për të cilën mendoj do të bëhet më e mira. Besoj që koha, koha është ‘doktoresha’ më e mirë në këtë drejtim”, ka thënë Majko.

Ndërkaq, Majko ka folur edhe për bashkëpunimin Kosovë-Shqipëri, i cili tha se duhet të ndodhë në mënyrë praktike, edhe në fushën e ekonomisë./kp

Vetëvendosje po përgatit projektligjin për dokumentimin e krimeve të luftës në Kosovë

Lëvizja Vetëvendosje është në përgatitje të Projektligjit, i cili do t’i dokumentonte krimet e Serbisë gjatë luftës së viteve 1998-1999

Deputetja e kësaj partie, Albulena Haxhiu, ka thënë se është fatkeqësi dhe gabim i madh që asnjëherë nuk ka pasur të dhëna zyrtare sa u përket krimeve që Serbia i ka kryer në Kosovë.

“Nuk e kuptoj se si kanë mundur këta njerëz që kanë drejtuar institucionet në Kosovë të mos e ndërmarrin asnjëherë këtë veprim. Ka shumë vende ku krimet i kanë të dokumentuara edhe në faqet e tyre zyrtare. Për neve është e papranueshme që nuk kanë ndërmarrë asgjë në këtë drejtim”, ka deklaruar Haxhiu, për Ekonomia Online.

Haxhiu theksoi se ka pasur shumë organizata të shoqërisë civile vendore dhe ndërkombëtare që kanë dhënë informacione për krimet, masakrat dhe dëmet e tjera të Serbisë në Kosovë.

“Prandaj, kemi konsideruar që të kemi një projektligj të tillë, jemi në fazat fillestare, por po ashtu kjo vjen edhe pas mbylljes së institutit për krime të luftës që ekziston në kuadër të Ministrisë së Drejtësisë. Ky institut nuk ekziston dhe pa asnjë shpjegim është mbyllur”, ka shtuar ajo.

Haxhiu vlerëson se në këtë drejtim do të duhej që të ekzistojë një ligj edhe për një institut të ri që do ta fuqizonte atë, por edhe për muzeun e krimeve të luftës.

“Të gjitha këto jemi duke i diskutuar në strukturat e Vetëvendosjes për shkak se ne duhet të ndërmarrim veprime për ta dokumentuar atë që Serbia e ka bërë në Kosovë”, tha ajo.

Kush do të fitojë, Shqipëria etnike apo Serbia pushtuese?

Vetëm ushtria e Kosovës si armatë moderne dhe me 40 mijë ushtarë, i jep Kosovës njohjen nga Beogradi. Kosova e vendosi ngritjen e ushtrisë me 101 vota në Parlamentin e saj. Po Shqipëria? Duhet edhe Shqipëria të formojë sa më shpejt armatën e saj

Nga Spartak Ngjela

I. E gjithë trazira në Ballkanin Perëndimor vjen nga fakti që të dy shtetet shqiptarë nuk kanë ushtritë e tyre.

Pa ushtri nuk mund të ketë as pavarësi të sigurt dhe as politikë reale. Të dy shtetet shqiptarë janë pa ushtri. Si shpjegohet kjo?

Kosova është shtet i ri dhe sigurisht që ka qenë dhe është nën suzerenitet ndërkombëtar dhe i mbrojtur nga UNMIK-u.

Por ka ardhur koha e sovranitetit. Sovranitet pa ushtri kombëtare nuk mund të ketë për Kosovën. Ajo duhet ngritur sa më shpejt që të jetë e mundur.

II. Edhe Shqipëria është pa armatën e saj. Si ka mundësi? Aktualisht nuk duhet të merremi me analiza: Shqipëria duhet të ngrejë menjëherë armatën e saj të kompletuar për mbrojtjen e territorit.

Kohët kanë ndryshuar. Gjendja dhe situata në Ballkanin Perëndimor është në një konflikt në rritje. Rritja e konfliktit vjen si pasojë e konkurencës ndërkombëtare Amerikë- Rusi në lidhje me Ballkanin Perëndimor.

Është politika amerikane që po kërkon ta ngrejë Shqipërinë dhe Kosovën si aks politik kryesor në Ballkanin Perëndimor dhe është politika ruse që këtë po kërkon ta bëjë me Serbinë. Prandaj pyetja që ngrihet tani është kjo: kush do të fitojë forcën në Ballkanin Perëndimor, Shqipëria e plotë etnike apo Serbia pushtuese e territoreve shqiptarë?

Kjo do të varet shumë nga lidërshipët që do të drejtojnë në Shqipëri menjëherë pas Reformës në Drejtësi. Por edhe nga armata shqiptare e kompletuar me armë moderne dhe me një ekip ushtarak profesional.