Lajm.co

Franca partner i rëndësishëm i Kosovës

Kryeministri Ramush Haradinaj, është takuar sot me sekretaren e Shtetit pranë Ministrit të Forcave të Armatosura të Francës, Genevieve Darrieussecqe, me të cilën bisedoi për zhvillimet në fushën e sigurisë si dhe aspekte të tjera të bashkëpunimit të mëtutjeshëm, njofotn kumtesa qeveritare

Kosova është mirënjohëse për kontributin e dhënë ndër vite nga Franca dhe është e përkushtuar që të çoj përpara partneritetin politik, ekonomik dhe diplomatik”, tha Haradinaj me këtë rast. Ai kërkoi mbështetjen e Francës në procesin e liberalizimit të vizave dhe anëtarësimin e Kosovës në organizatat ndërkombëtare, me theks të posaçëm në INTERPOL dhe UNESCO.

Gjatë takimit, kryeministri Haradinaj e njoftoi sekretaren Darrieussecqe, për tranzicionin e FSK-së në Forcë të Armatosur të Kosovës. “Synimi ynë strategjik është të bëhemi pjesë e BE-së dhe NATO-s dhe Francën e shohim si partner në këtë rrugëtim”, tha kryeministri Haradinaj.

Sekretarja e Shtetit pranë Ministrit të Forcave të Armatosura të Francës, Genevieve Darrieussecqe, siguroi kryeministrin Haradinaj që shteti francez edhe më tutje do të jetë përkrahës i fuqishëm i të gjitha zhvillimeve në Kosovë, me theks të veçantë atyre të sigurisë.

Rrëzohet Kryeministri i Spanjës Rajoy, kundërshtari i ashpër i pavarësisë së Kosovës

Parlamenti spanjoll ka votuar një mocion mosbesimi ndaj Kryeministrit Mariano Rajoy nga Partia Popullore për shkak të një skandali korrupsioni. Me 180 vota, Parlamenti ka miratuar shkarkimin e tij. Rajoy njihet për qëndrimet e ashpra kundër pavarësisë së Kosovës

Mariano Rajoy, është parë dikur si i mbijetuari i madh i skenës politike spanjolle, është shkarkuar sot, pasi disa ish anëtarë të partisë së tij janë dënuar për korrupsion. Postin e kryeministrit do ta marrë Pedro Sanchez, lideri socialist i PSOE opozitës spanjolle, i cili kishte iniciuar mocionin e mosbesimit ndaj Mariano Rajoy.

Mocioni i Sanchez ka fituar mbështetjen e 180 deputeteve të Parlamentit, 4 më shumë se që nevojiteshin për shkarkimin e tij. Parlamenti i Spanjës ka gjithsej 350 deputetë, nga të cilët 169 kanë votuar kundër shkarkimit të Mariano Rajoy.

Rajoy i është drejtuar parlamentit spanjoll me këto fjalë “Ka qenë një nder i madh të jem kryeministër i Spanjës,” vetëm pak para se të ndodhte votimi.

“ Është një nder i madh që po e lë një Spanjë më të mirë se që e gjeta. Shpresoj që zëvendësuesi im do të mund të i thotë të njëjtat fjalë kur koha e tij të vijë.”
Ai ka thënë se ka kryer në mënyrën më të mirë detyrën e tij si kryeministër, si dhe ka shtuar se “Falënderimet e mia për popullin spanjoll, që më dhanë mbështetjen e tyre si dhe mirëkuptimin për qeverisje të vendit.Shumë fat të gjithëve për të mirën e Spanjës” ka përfunduar ai.

Rajoy është ballafaquar me referendumin për pavarësi të Katalonjës duke interventuar me polici në këtë rajon. Ai njihet si kundërshtar i pavarësisë së Kosovës ndërkohë që qëndrimin e tij e ka shfaqur në Samitin e Sofjes që u mbajt muajin e kaluar. Ai ka marrë pjesë në ditën e dytë të samitit BE-Ballkani Perëndimor duke refuzuar të fotografohet me Presidentin e Kosovës Hashim Thaçi si dhe ka refuzuar ta nënshkruaj deklaratën pas aty ka firmosur edhe Hashim Thaçi.

U lind në burg të Serbisë, u rrit e përndjekur, jeton e harruar

Advije Morina u lind në burg pasi nëna e saj ishte e burgosur politike. E njohin në Pejë si çika e burgut. Nuk ka si të quhet ndryshe Advie Morina e cila nisi jetën në njëren prej qelive të burgut në Serbi

Historia e saj e dhimbjes nis qysh në momentin kur ajo erdhi në jetë nga nëna Zymë e dënuar nga regjimi jugosllav për shkak se ajo i takonte Lëvizjes Nacional Demokratike Shqiptare. Sot pas gati 70 vjetësh, Advija e lindur në skutat e një stalle të kafshëve në burgun e Kovillovës tregon për FRONTAL, fillimisht për historinë e nënës së saj.

Aktivitetet në Lëvizjen Nacional Demokrate të atëhershme bënë që anëtarët e familjes Morina nga Peja të arrestoheshin, e shtëpia e tyre të mbyllej. Advijen e kishin përcjell vujtjet qysh para se të lindte.

Pos lindjes dhe rritjes së fëmijën në burg, nëna e Advijes ishte përballë edhe me presione tjera ndërkohë që bashkë me të ishte arrestuar edhe bashkëshorti i saj.

Kur ishte dy vjet Advija bashkë me prindërit dolën në liri. Vazhduan jetën nën llupen e regjimit por kurrë nuk e ndalen përpjekjen e tyre për qështjen kombëtare. E para që bënë prindërit e tyre shkolluan fëmijët.

Advija u bë studente e juridikut kurse fëmijët tjerë morën profesione të ndryshme. Të edukuar për dashurinë për atdheun, vëllau i saj, Haki Morina iu bashkua edhe luftë së UCK-së.

Krenar për kontributin që dha familja e saj për lirinë e Kosovës, Advie Morina që ka arritur moshën e pensionit sot jeton ne një banesë me qira pa ndonjë ndihmë nga shteti por krenare për ata që familja e saj bëri për shtetin e Kosovës.

Haradinaj: Fëmijëve do t’iu garantojmë rritë të qetë dhe të lirë

Kryeministri Ramush Haradinaj po merr pjesë në konferencën në kuadër të shënimit të Ditës Ndërkombëtare të fëmijëve me temë “Çdo Ditë është 1 Qershori”, njofton kumtesa qeveritare

Konferenca u organizua nga Zyra për Qeverisje të Mirë e Zyrës së Kryeministrit në bashkëpunim me Organizatat Syri i Vizionit dhe Save the Children zyra në Kosovë.

“Jemi të vetëdijshëm për realitetin tonë dhe nuk është një realitet më i miri, i kemi disa probleme bazike, por, fëmijëve do t’iu garantojmë dhe sigurojmë një rritje sipas të gjitha konventave ndërkombëtare, që të rriten të qetë dhe të lirë”, tha me këtë’ rast Haradinaj, transmeton Koha.net.

Duke treguar një ndodhi të tijën me një fëmijë, i cili kujdesej për ambientin, ai i porositi të gjithë fëmijët që të luftojnë për një ambient të pastër. “Nuk ka asgjë në jetë më mirë sesa të kujdesemi për ambientin ku jetojmë”, tha Haradinaj.

Edhe Avdullah Hoti bindet që Thaçi të jetë udhëheqës i dialogut

Shefi i Grupit Parlamentar të LDK-së, Avdullah Hoti, ka arsyetuar qëndrimet e nënkryetarëve të partisë, të cilët nuk e kanë kundërshtuar udhëheqjen e dialogut nga presidenti Thaçi. Hoti thotë se nuk ka lidhje kush e udhëheq dialogun, po çfarë formati ka ai

LDK është afër ndërrimit të qëndrimit që kishin para disa muajve ndaj Hashim Thaçit. As Avdullah Hoti nuk ka kundërshtuar udhëheqjen e dialogut nga Thaci. Sipas tij, kjo nuk është cështje e rëndësishme se kush e drejton Kosovën në dialog.

“Nuk është çështje dhënia e mandatit të askujt, atë që kanë thënë zyrtarët e lartë të LDK’së është se nuk do t’iu ikim përgjegjësive shtetërore, siç nuk i kemi ikur as me Demarkacionin, as me tema tjera të mëdha. Para të hënës ne do të diskutojmë gjerësisht dhe do të merret qëndrimi”

“Tema se kush duhet t’i udhëhiqet bisedimet nuk është tema më e rëndësishme, dëshirojmë të dakordohemi për formatin, temat që diskutohen”, tha Hoti.

Edhe këtë javë, Hoti foli për pafuqinë që, sipas tij, ka Qeveria Haradinaj. Shefi i GP të LDK’së ka thënë se kjo pafuqi është dëshmuar kur Haradinaj është shprehur i gatshëm t’ia delegojë udhëheqjen e dialogut LDK’së.

Hoti thotë se do të ishin të gatshëm për ta udhëhequr dialogun, kur t’i marrin mandatin me votat e qytetarëve. Ai po ashtu ka pasur kritika për platformën e fazës finale të dialogut me Serbinë, që është proceduar në Kuvend.

Shpend Ahmeti e humbi shumicën në Kuvendin Komunal, drejtori i VV-së ka një propozim

Asambleistët e Lëvizjes Vetëvendosje kanë votuar të enjten për herë të parë kudnër preferencave të kreytarit Shpend Ahmeti, duke dhënë kështu shenja se qeverisja komunale nuk e ka më shumicën e në Kuvendin Komunal

Qëndrim Sahiti është shkarkuar nga Bordi Aksionar i Ndërrmarrjet Publike Banesore, me votat e asamblistëve të LDK’së, PDK’së e Lëvizjes Vetëvendosje, e cila kështu doli për herë të parë me një vendim kundër Ahmetit.

Madje në votimin e mbajtur të enjten, asamblistët e Partisë Socialdemokrate të Shpend Ahmetit së bashku me ato të partive të pozitës braktisën sallën para se të mbahej votimi, ndërsa 26 asamblistë ishin prezentë dhe 25 votuan për shkarkimin e Sahitit.

Pas kësaj njëri ndër drejtorët e Komunës së Prishtinës nga Vetëvendosje, Yll Rugova, tha se ajo që ndodhi sot në Kuvendin Komunal të Prishtinës tregon se është i domosdoshëm formalizimi i një koalicioni të mirëfilltë të PSD-së edhe me Vetëvendosjen në Komunën e Prishtinës.

“Pas shkëputjes së kryetarit të komunës nga Vetëvendosja, dhe ndërprerjes së bashkëpunimit për implementim të programit të përbashkët zgjedhor në Prishtinë, është e domosdoshme të bëhet kjo marrëveshje e re. Për këtë program kanë votuar qytetarët dhe për këtë program bashkarisht kemi garuar në zgjedhje”, ka shkruar Rugova.

“Nuk kemi hesap që për inate politike të sakrifikojmë projektet qenësore për qytetarët e Prishtinës. Udhëheqja e cila nuk e mundëson këtë koalicion është udhëheqje e cila s’e ka prioritet qytetarin. Prishtina nuk ka kohë për inate personale, Prishtina ka nevojë për punë serioze drejt ndërtimit të kryeqytetit të Kosovës”, ka shkruan më tej Rugova në Facebook.

Pas ndarjes së një grupi deputetësh nga VV’ja, dhe aderimin e tyre në PSD, njëjtë vepruan edhe asamblistë nëpër komuna të ndryshme. Si pasojë e kësaj, Shpend Ahmeti, që u zgjodh kryetar i PSD’së nuk e ka numrin e asambleistëve në Kuvendin Komunal të Prishtinës. /gazetametro.net

Vuçiq: Asgjë nuk do të fshihet para serbëve lidhur me Kosovën, ndoshta do të kemi një referendum

Presidenti i Serbisë, Aleksandar Vuçiq, ka siguruar serbët se kur bëhet fjalë për çështjen e Kosovës, institucionet e Serbisë nuk do të fshehin asgjë para tyre

Ai, duke folur në lidhje me zgjidhjen e statusit të Kosovës, ka thënë se “askush nuk do të fsheh diçka” para qytetarëve të Serbisë. Madje, sipas mediave serbe, përcjell Telegrafi, Vuçiq ka shtaur se edhe një referendum është një nga mënyrat e mundshme të shprehjes së qytetarëve për këtë çështje.

“Nga njerëzit askush nuk dëshiron për të fshehur diçka. Kur ne do të kemi diçka t’ua tregojmë njerëzve, ne do të shkojmë përpara kombit dhe një nga mënyrat është referendumi. Nëse ju doni për të ndryshuar Kushtetutën, do të duhet të shkojmë përmes një referendumi”, citohet të ketë thënë Vuçiq për Radiotelevizionin e Serbisë.

Po sipas mediave serbe, përcjell Telegrafi, presidenti i Serbisë, ka thënë gjithashtu se “ai është i shqetësuar thellë nga ngjarjet e fundit në Kosovë” përkatësisht “rreth sigurisë së serbëve në Kosovë”.

Akuza të rënda ndaj Thaçit e Veselit dhe porosi për Sylë Hoxhën

Naim Miftari, ish agjenti i SHIK-ut dhe G2-ZKZ, në faqen e tij në facebook, vazhdon të publikojë shkrime me të cilat kërkon përgjegjësi dhe hedhë akuza të rënda ndaj presidentit aktual, Hashim Thaçi dhe kryeparlamentarit, Kadri Veseli

Së fundi, përmes një postimi në faqen e tij ën facebook, Miftari ka porositur kryeprokurorin Sylë Hoxha, që të marrë bë pyetje Thaçin dhe Veselin për vrasjen e Bahadin Hallaqit dhe Shaban Shalës.

“Por sa shumë kohë kot tenton të merret me mua dhe sa tenton të na frikëson dhe rrezikon kinse përmes ligjit të Maliqi, më mirë t’i pyes shefat urdhëruesit e tij Thacin dhe Veseli rreth kësaj teme si u vra Bahadin Hallaqi, Shaban Shala dhe nga kush u vranë mbi gjithat pse u vranë…

Sipas disa të dhënave Behajdin Hallaçi dhe Shaban R. Shala janë marr nga burgu nga dora e Thaçit dhe Veselit, dhe nuk janë gjetur kurrë më, madje as kufomat e tyre nuk u zbuluan asnjëherë”, shkruan Miftari në faqen e tij në facebook, përcjellë “Bota sot”.

Ky është postimi i plotë:

Ali Hoxha Hoxh Alija …

Para disa vitesh;

Sylë Haxha kryprokurori publikisht para ca vitesh para televizionit deklaron, ato vrasje që i ka bërë shteti nuk gjurmohen vrasjet politike aludon në SHIK-un, por cili shtet vret pa vendim gjyqësor pos Koresë Veriore plus në atë kohë për të cilën flet ne nuk ishim shtet as nuk kishim shtet tonin as shërbim kombëtar.! 2018 i paska ra rruga rasisht…të merret me mua.!?

Sylë Hoxhen prokuror apo kryeprokuror special ….nuk muj të thërras të tillë kurrsesi pasi nuk është i till, nuk është zyrtar që mbron ligjin por si sekser me ca tjer mbron interesin e Hashim Thaçit.

Por sa shumë kohë kot tenton të merret me mua dhe sa tenton të na frikëson dhe rrezikon kinse përmes ligjit të Maliqi, më mirë t’i pyes shefat urdhëruesit e tij Thacin dhe Veseli rreth kësaj teme si u vra Bahadin Hallaqi, Shaban Shala dhe nga kush u vranë mbi gjithat pse u vranë…

Sipas disa të dhënave Behajdin Hallaçi dhe Shaban R. Shala janë marr nga burgu nga dora e Thaçit dhe Veselit, dhe nuk janë gjetur kurrë më, madje as kufomat e tyre nuk u zbuluan asnjëherë.

Murat Jashari tani i burgosur , vëllai i komandantit të vrarë Ismet Jashari, i njohur me nofkën komandant “Kumanova”, kohë më parë nëpërmjet një letre të hapur, ka akuzuar Hashim Thaçin për vrasjen e Behajdin Hallaçit.

“Në fillim të korrikut 1998 natën duar lidhur vrave Behajdin Hallaqin dhe ditën më 30 tetor 1998 në Komunikatën Nr.61 të SHP të UÇK-së e shpallët dëshmor të kombit, sa për humbur gjurmë.

Ose le ti pyet Bosat e vet për një temë tjetër të dytë si tentuan ta organizonin përmes një ndihmësit të LULIT vrasjen e gazetarit, publicistit i Bota Sot, atdhetarit ish i dënuarit politik shumë vite nga Serbia, Shefqet Jasharin dhe vrasjen tjetër të një komandant të luftës pran UÇK, U.H pasi ky kishte shkuar si truprojë e armatosur ta ruante Ibrahim Rugovën të cilin i njëjti Hashim Thaçi sot çuditërisht ……po e dekoron e nderon për së vdekuri….!

Pyeti lirisht edhe pse këta dy persona “të këqij” janë gjallë edhe sot kush është “fajtor” për kët ..!

Belegu: Në PTK e KEK, 900 veta marrin pagë pa shkuar në punë

Eroll Belegu, këshilltar i kryeministrit Ramush Haradinaj, ka thënë se gjendja në kompanitë publike si PTK dhe KEK është shumë e rëndë. Zgjidhja më e mirë që duhet të bëjë Qeveria sipas tij është privatizimi i këtyre ndërmarrjeve

“Kompanitë publike e kanë një shpëtim, është privatizimi. Atë gabim që e kemi bë me AXOS’in besoj që nuk do t’a bëjmë më”, ka thënë Belegu për tërheqjen e Qeverisë së Kosovës nga privatizimi i PTK’së.

“Po mundohemi mi menaxhu sa ma mirë, edhe mi përgatit për privatizim sa më mirë. Në KEK i ke 900 vetë që nuk shkojnë në punë dhe marrin rrogën”, deklaroi ai në TV Dukagjini.

Ai tha se Kosova ka problem me thithjen e investimeve të huaja, edhe për shkak të imazhit që ka te investitorët.

Belegu bëri të ditur se kryministri tashmë është në kontakt me disa kompani të telefonisë, blerës të mundshëm të Telekomit të Kosovës që tani po operon me 15 milionë euro humbje në vit. /gazetametro.net

Një udhërrëfyes për partitë politike dhe institucionet, që kërkojnë besimin e njerëzve

Po ta mendosh mirë, i gjithë sistemi ynë i ndërlikuar i marrëdhënieve personale dhe sistemi shumë më i ndërlikuar i marrëdhënieve ekonomike dhe shoqërore, në të cilat, duam apo nuk duam, jemi të zhytur gjatë gjithë rrjedhës së jetës sonë, janë të bazuar në besimin

Nga Annamaria Testa -Eksperte komunikimi

Të kesh besim, do të thotë të sigurohesh se diçka ose dikush, pavarësisht nga kontrolli ynë, do ta realizojë në të ardhmen një pritshmëri tonën aktuale, apo që diçka ose dikush ka bërë ose është duke bërë tani, pikërisht atë që do të jetë pozitive për ne, më vonë. E gjithë kjo bazohet mbi disa supozime: që dikushi të jetë i ndershëm, simpatik dhe i aftë. Dhe që diçkaja të jetë funksionale, efikase dhe të mos ndikohet nga mekanizma të kundërt.

Gjendje shpirtërore komplekse

Kështu, i besojmë një recete të mjekut, apo këshillës së shitëses (shiko, të rri shumë mirë!). I besojmë orarit të trenave (përndryshe nuk do të ishim aty, në stacion). I besojmë bankës ku kemi hapur një llogari rrjedhëse, apo klientit që angazhohet të na paguajë “pas 60 ditësh”.

I besojmë kamerierit që na propozon një pjatë ekzotike. Kamionistit të panjohur, që nget makinën krah nesh në autostradë. Dhe inxhinierit të panjohur, i cili ka projektuar urën mbi të cilën po kalojmë. Politikanit që votojmë, premtimeve dhe vlerësimeve të tij.

I besojmë kompanisë online, që do të na dërgojë pikërisht mallin për të cilin kemi paguar. I besojmë djalit apo vajzës, që na sigurojnë se nuk do të kthehen në shtëpi pas mesnatës, dhe dashurisë së jetës sonë, që na betohet se nuk do të na tradhëtojë kurrë. I besojmë Uikipedias. Apo blogut që betohet se po na thotë të gjitha të vërtetat, për të cilat të tjerët heshtin.

Besimi është një emocion. Një gjendje shpirtërore komplekse, për ta prodhuar atë kombinohen instikti dhe arsyetimi, llogaritja dhe nuhatja, pritja dhe shpresa, eksperiencat e të kaluarës (edhe ato të largëtat, fëmijërore) dhe pritshmëritë e të ardhmes. Kur kemi besim, ndjehemi të qetë, larg prej risqeve.

Ashtu si të gjitha emocionet, besimi që kemi është i lidhur me temperamentin dhe karakterin tonë. Dhe kjo do të thotë që njerëz të ndryshëm, në situata të caktuara, mund të ndjehen besimplotë, të matur, ose mosbesues.

Eshtë shkalla jonë e besimit, ajo që na motivon të bëjmë (apo të mos bëjmë) zgjedhje të caktuara dhe të kryejmë (dhe mos kryejmë) veprime të caktuara, si dhe përcakton ndërveprimet tona me të tjerët, si edhe sjelljet tona.

Ndonjëherë, besojmë seriozisht. Ndonjëherë, na duhet të bëjmë sikur besojmë, sepse nuk kemi alternativa më të mira: për shembull, për të arritur që të kërkojmë një nder, duhet të kemi besim se mundemi ta marrim. Ndonjëherë jemi besimplotë me arsye, e ndonjëherë krejt rastësisht.

Eshtë fakt se ne jemi të prirur neurologjikisht, që të provojmë besim (themeli i vërtetë i sjelljes bashkëpunuese, mbi të cilin ngrihet jeta jonë shoqërore), dhe se kur ndjejmë besim, truri ynë na shpërblen dhe na dhuron një ndjesi të kënaqshme, që më tej krijon mirëqenie.

Mungesa totale e besimit, para se të jetë shkatërrimtare, është paralizuese. E vetmja rrugëdalje nga paraliza dhe nga ankthi që na shkakton të qënit totalisht mosbesues, është shpesh herë më e rrezikshmja: i japim besim mashtruesit më të parë, magjistarit, shtriganit, rrugaçit që ndeshim, i cili megjithatë di të na japë atë buzëqeshje që na hap zemrën përsëri, atë premtim që na bën të shohim një të ardhme më të mirë, pikërisht në momentin kur kemi shumë nevojë.

Dhe ja ku mbërrijmë në temë: ndaj kujt jemi të prirur të ofrojmë besim? Faktorët absolutisht më të rëndësishëm janë dy: afërsia dhe empatia. I besojmë më kollaj personit apo gjësë që e ndjejmë pranë, në gjendje të na kuptojë. Në thelb, besojmë pikësëpari ashtu si një vogëlushe i beson nënës së vet.

Së dyti, kemi prirjen t’i besojmë atyre që na flasin në mënyrë të kuptueshme dhe përfshirëse, sidomos kur na shpjegojnë argumenta, për të cilët kuptojmë pak, ose aspak. Në thelb, kemi prirjen të besojmë, ashtu si një vajzë i jep të drejtë mësueses së preferuar.

Së treti, kemi prirjen t’u besojmë atyre që na shfaqen të ndershëm, origjinalë dhe transparentë. Në thelb, besojmë ashtu si të rriturit i besojnë një miku të mirë. Një pasojë interesante e gjithë kësaj është që, të japësh besim, do të thotë edhe të bëhemi të hapur dhe të brishtë, siç mund të jetë një vogëlushe apo një vajzë, apo një i rritur kur ndodhet në shoqërinë e një miku të mirë. Pasoja tjetër është që, çdo tradhëti e besimit është një plagosje e vërtetë, fort e dhimbshme.

Institucionet

Përse në këta faktorë që favorizojnë besimin, nuk renditen aftësia dhe besueshmëria? E qartë: pothuaj gjithmonë, nuk kemi as rastin, as kohën, as instrumentat e nedojshëm për t’i verifikuar seriozisht. Për ne, këtë duhet ta bëjnë institucionet, që megjithatë shfaqen të mangët ndaj tre faktorëve që përmenda më sipër. Rezultati: institucioneve u besojmë gjithmonë e më pak.

Kështu, në ruletën për të dhënë besim, mbështetemi gjithmonë e më shumë në komponentet instiktivë dhe intuitivë, në dëm të llogaritjeve dhe arsyetimit. Si pasojë, riskojmë gjithnjë e më shumë të mbetemi të zhgënjyer, të lënduar, dhe më të prirur për t’i dhënë të drejtë, të parit mashtrues që ndeshim.

Nga ana tjetër, nëse një institucion, një parti, një kompani (apo një individ) do të donin të rindërtonin besimin e thyer, duhet që t’ia nisin pikërisht nga faktorët e sipërpërmendur. Janë të thjeshtë për t’u kuptuar, por aspak të lehtë për t’u praktikuar. Dhe po, duhet shumë durim, përkushtim dhe kohë. / Burimi: “Internazionale” – Bota.al