Lajm.co

Deda për rastin Blakaj: Nuk ka krim më të rëndë se sa dorëzimi para krimit

Deputeti i Alternativës, Ilir Deda ka thënë se rasti i dorëheqjes së prokurorit Elez Blakaj më së miri shpërfaq gjendjen reale të Kosovës

Sipas tij, Policia do të duhej të bënte arrestimin e kërcënuesve të Blakajt në mënyrë që të tregonte se shteti është më i fortë se çfarëdo kërcënuesi.

“Policia e Kosovës do të duhej t’i arrestonte kërcënuesit ndaj prokurorit special Elez Blakaj, dhe të tregojë që shteti është më i fortë se çfarëdo kërcënuesi, ndërsa Elez Blakaj ta kryente punën e tij. Dorëzimi kaq i lehtë para banditërisë kërcënuese tregon më së miri gjendjen reale të Kosovës, plotësisht jonfuksionale me “drejtësi” të dështuar”, ka shkruar Deda në Facebook.

Ai ka shtuar se, “qe gati dy dekada jetojmë të lirë me institucionet tona, që të gjithë i lanë të jenë të tilla çfarë janë. Për këtë nuk na ka faj askush tjetër jashtë nesh. Nuk ka krim më të rëndë se sa dorëzimi para krimit”.

Mungesa e konsensusit mes partive mund ta çojë vendin në zgjedhje deri në fund të vitit (Video)

Mungesa e konsensusit politik për zgjedhje, mund të rezultojë me një ngërç politik, e vetëm pastaj të mund të organizohen zgjedhjet e reja. Kështu vlerësojnë njohësit e çështjeve politike

Mospajtimet për dialogun me Serbinë, mund ta çojë në bllokadë politike vendin. Kështu thotë për RTV Dukagjinin profesori i Shkencave Politike, Bekim Baliqi. “Dyshoj se do të arrihet një konsensus mes forcave politike në Kosovë. Pastaj do të varet prej mënyrës se si do të zhvillohen negociatat mes subjekteve politike. Nëse nuk ka një bashkëpunim mes institucioneve, gjasat janë që të ketë një krizë të re politike”, thotë Bekim Baliqi – profesor i Shkencave Politike.

E, si rezultat i kësaj, mund të kemi edhe zgjedhje brenda këtij viti. “Nëse negociatat fillojnë dhe nuk ka një koordinim apo bashkërendim mes institucioneve, së paku në parim të merren vesh për llogaridhënien në këtë proces, sepse mundë të ketë një krizë e cila mund të dërgojë drejt zgjedhjeve të reja parlamentare gjatë vjeshtës, apo në fund të vitit”, shton më tej Baliqi, përcjell Telegrafi.

Jemir Bakija, nga Demokracia Plus, thotë se partitë kanë humbur besimin te njëra-tjetra prandaj mungon edhe konsensusi mes tyre. “Nuk duket se do të ketë një konsensus sepse mungon besimi në mes të pozitës dhe opozitës. Pa pasur besim mes tyre nuk mund të ketë konsensus”, thotë Jetmir Bakija nga Demokraca Plus.

Mirëpo sipas tij nëse veç mund të ketë zgjedhje atëherë partitë do të duhej garonin për platformën më të mirë në dialog, e jo për tjetër. Raundi i ri i bisedimeve në Brukes mes Kosovës dhe Serbisë është paralajmëruar të filloi në shtator, në atë që është quajtur edhe si faza finale e dialogut mes dy shteteve./Telegrafi/

Prokurori i dorëhequr, Elez Blakaj, thuhet se ka ikur në Amerikë

Prokurori i Prokurorisë Speciale të Kosovës, Elez Blakaj, është larguar nga Kosova. Ai dyshohet se gjatë muajit të kaluar ka shkuar në Amerikë. Prokurori i Prokurorisë Speciale të Kosovës, Elez Blakaj ka dhënë dorëheqje për shkak të kërcënimeve që ka marrë në lidhje me punën e tij

Prokurori Blakaj, ishte duke hetuar dyshimet për keqpërdorime në listat e veteranëve të UÇK-së ndërsa është marrë edhe me disa raste të gjykimeve për terrorizëm. Burime të RTV21 thonë se prokurori Blakaj bashkë me familjen e tij ka ikur në Amerikë. Blakaj kohë më parë kishte kryer edhe shkollimin në SHBA.

Për dorëheqjen e prokurorit special, Elez Blakaj, ka reaguar edhe Ambasada amerikane në Prishtinë.
Ambasadori amerikan, Greg Delawie, thotë se është e dhimbshme që një nga prokurorët e vendit detyrohet të japë dorëheqje për shkak të kërcënimeve.

Në reagimin e amerikanëve thuhet se prokurori i tërhequr nga detyra e tij, kishte përkrahjen e Qeverisë Amerikane. Elez Blakaj, më 11 korrik 2018, e ka ngritur aktakuzën ndaj profilit të lartë të veteranëve, lëndë kjo e cila konsiderohet si një ndër lëndët më voluminoze dhe të ndjeshme, por e cila është duke qëndruar në Prokurori Speciale dhe ende nuk është dërguar në Gjykatë.

Prokuroria Speciale, me dorëheqjen e Blakajt, mbetet me 12 prokurorë, ndërsa në shtator edhe dy prej tyre mbërrijnë moshën e pensionimit, përderisa Këshilli Prokurorial është në proces rekrutimi për 5 prokurorë.

Si e njoha Thaçin? Rrëfen shoku i studimeve

Opinionisti Sali Rexhaj, ish shok i studimeve i presidentit aktual të Kosovës, Hashim Thaçi, përmes një postimi në facebook, ka treguar se si është njohur me Thaçin gjatë studimeve. Rexhaj, në rrëfimin e tij shkruan se Thaçi ishte suspenduar nga posti i prorektorit student sepse ishte zbuluar se kishte falsifikuar certifikatën e notave, ku notat e ulëta si 6,7… i kishte bërë krejt 10-she

Më tej, shoku i studimeve të Thaçit, shkruan se presidenti për pushtet e para i vë flaken Kosovës.
“Loja me anulim te Gjykatës Speciale, formim te ushtrisë, kidnapimi i qytetareve turq ne territorin e Kosovës dhe bashkëpunim i AKI e policia e Kosovës me agjent te Erdoganit, ndërrimi i territoreve dhe kontestimi i kufijve te Kosovës… Hashimi vuan per pushtet e para, per to i ve flaken Kosoves. Nuk njeh ligj, kushtetute as Zot. Ky njeri duhet te ndalet sa me pare nga partite, Qeveria e Kuvendi”, shkruan ndër tjerash Rexhaj, përcjellë “Bota sot”.

Ky është postimi i plotë:

Si e njofta Hashim Thaqin!

Sali Rexhaj

Me ka rene ne sy diku gjate protestave te studenteve ne perkrahje te minatoreve gjate vitit 1989.
Por saktesishte me te jam takuar dhe kemi pire kafe ne fillim te vitit 1990 dhe kemi vazhduar me shoqerim e bashkepunim deri ne vitin 1994 kur u largua nga Kosova.

Per here te pare ka ardhe te une per te kerkuar pejkrahje ne qershor te vitit 1991. Ishte fjala per nje fondacion te cilin e kishin formuar nje grup aktivistesh, mes tyre edhe e fejuara, tani bashkeshortja ime. Ky fondacion kishte tubuar disa qindramija marka nga te cilat ndante bursa per student. Por meq Hashimi ne kete kohe ishte nder studentet aktiv, ishte ne kryesi te Unionit te Pavarur te Studenteve, kryetar ishte Mehe Uka. Hashimi kerkoj nga una qe te ndikoja te anetaret e ketij fondacioni qe parat ti dorezoheshin UPS. U befasova shume.

-Nuk eshte e mundur te ndodhe kjo-i thash. Ata i kan tubuar parat dhe ata i menagjojne. Hashimit ne asnje menyre nuk i mbushej mendja, me çdo kusht ngulte kembe se keto para duhet ti dorezohen atij.

Me vone, gjate vitit 1991/92 Hashimi u zgjodh prorektor student, pozite e cila paguhej, kurse une anetar i kryesise se PPK. Aty mu dha detyre qe pos tjerash te bashkepunoja me organizata rinore, ne Kosove dhe vise tjera. Shume parti kishin sekcione per te rinje. Ne LDK-e ishte Forumi Rinor edhe ne Shqiperi PD e formoj ate ku mora pjese ne themelim kah fundi i gushtit 1991 ne Tirane.

Ne fund te vitit 1992 vendosem qe te fillojme me akcione te armatosura ne Kosove, u ulem bashk ne Seli te LDK-es Zenun Pajaziti kryetar i FR te LDK-es, Fisnik Cukaj kryetar i UPS ne kete kohe, Hashimi nga pozita e prorektorit student. dhe une ne emer te PPK. Ne PPK tani me i kishim kater grupe te tilla.

Takoheshim rregullisht, po per gjera e akcione konkrete nuk diskutonim, duhej mbajte sekret te gjitha veprimet. Ne perkrahnim grupet e vogla te shtrira ne Kosove, secili aty ku kishte ndikim.

Pas pak kohesh kryetar i UPS u burgos shkaku i nje mbledhje ne Ujmir, keshtu qe kontaktet u reduktuan shume. Ne kete mbledhje kishte marre pjese edhe Hashimi, po nuk kishte diskutuar dhe nuk u kIshte rene ne sy spiuneve te infiltruar aty.

Ne fund te vitut 1993 me than se po me kerkonte Rektori Ejup Statovci, njihesha mire me te per faktin se bashkepunoja shume me UP rreth gjetjes se objekteve per mesim, pas largimit te studenteve e profesoreve nga objektet e tyre. E dinte se e kam mik te mire Hashimin.

Ma tregoj nje ngjarje te hidhur.

Hashimin e kishte suspenduar nga posti i prorektorit student sepse ishte zbuluar se kishte falsisfikuar çertifikaten e notave, ku notat e ulta si 6,7… i kishte bere krejte 10-she. Me pyeti a mos e dija edhe une kete pune. I tregova se nuk kisha lidhje me kete falsifikim.

E kerkova Hashimin po nuk e gjeta me kurre. U zhduk nga Prishtina e Kosova.

Deri ne tetor te vitit 1998 kur u takua me ambasadorin Hill ne Dragobil te Malisheves, dhe kete takim e publikuan mediat, nuk e dija se ku ndodhet. Tani ishte Drejtor i Drejtorise Politike te UÇK-es. Mbante uniforme dhe nje fletore e nje laps gjate takimit.

Lojerat me mos nenshkrim te marreveshjes se Rambujes, duke kushtezuar marrjen e qeverise dhe fondin e Bukshit. Veprim i cili i dha kohe Serbise qe te sjelle forca te medha ushtarake dhe na kushtoj me mijera viktima te pafajshme. Plaqkitjet, vrasjet e hajnit gjate e pas luftes. Marrja e pushtetit me vrasje e dhune.

Pastaj luften se kush do ta lexoj deklaraten e pavaresise me 17.2.2008 duke u kercnuar se ose e kexon ai ose nuk shpallet pavaresia fare, per mua ishin gjera te njohura.

Loja me anulim te Gjykates Speciale, formim te ushtrise, kidnapimi i qytetareve turq ne territorin e Kosoves dhe bashkepunim i AKI e policia e Kosoves me agjent te Erdoganit, nderrimi i territoreve dhe kontestimi i kufinjeve te Kosoves…

Hashimi vuan per pushtet e para, per to i ve flaken Kosoves. Nuk njeh ligj, kushtetute as Zot.
Ky njeri duhet te ndalet sa me pare nga partite, Qeveria e Kuvendi. E ka humbe rrugen ne oborr. Ka dale plotesisht nga kontrolli i institucioneve tona e miqeve dhe aleateve tane.

Vjosa Osmani me akuza të rënda ndaj Thaçit: Po e përkrah krijimin e shtetit të dytë serb në Ballkan

Deputetja e Lidhjes Demokratike të Kosovës, Vjosa Osmani ka thënë se Serbia përmes idesë së ndryshimit të territoreve me Kosovën dëshiron të hapë ‘Kutinë e Pandorës’ për të inkurajuar pavarësinë e Republika Srpskas

Për më tepër, përmes një postimi në Facebook, Osmani ka shkruar se presidenti i Kosovës Hashim Thaçi mbetet i vetmi politikan në rajon (krahas Vuqiqit dhe Dodikut) që përkrahë këtë politikë të rrezikshme për Kosovën dhe rajonin.

Postimi i plotë:

Milorad Dodik, lideri i Republika Srpska në Bosnje- një produkt i politikave gjenocidale — me ndihmën e Rusisë po vazhdon të armatosë forcat paramilitare serbe në këtë entitet. Diskursi i tij për ndarje dhe ndryshim të territoreve është në sinkron me atë të mentorëve të tij në Beograd (Vuqiq e Dacic) dhe në Rusi (Putin e Lavrov) dhe në përputhje me politikën e jashtme të Serbisë për krijimin e Serbisë së Madhe dhe politikën e jashtme Ruse për krijimin e konflikteve të ngrira dhe zonave jostabile në Ballkan.

Pa dyshim se Serbia përmes idesë së ndryshimit të territoreve me Kosovën dëshiron të hapë ‘Kutinë e Pandorës’ për të inkurajuar pavarësinë e Republika Srpskas dhe përmes saj, krijimin e shtetit të dytë serb në Ballkan. Hashim Thaçi mbetet i vetmi politikan në rajon (krahas Vuqiqit dhe Dodikut) që pëkrahë këtë politikë të rrezikshme për Kosovën dhe rajonin. Mesazhi fundit i Kancelares Merkel është një dush i ftohtë më se i mirëpritur për kokat destruktive e destabilizuese të Ballkanit.

Rusët në panikë, aeroplanët e NATO-s vendosen 60 km larg Rusisë

Në Lituani, vetëm 60 kilometra nga kufiri me Rusinë, fusha e parë e aviacionit ushtarak po ndërtohet sipas standardeve të NATO-s. Si kundërpërgjigje, Rusia mund të vendosë sisteme mbrojtëse shtesë antiajrore në rajonin e Kaliningradit, thonë ekspertët rusë, megjithëse Flota Baltike ruse tashmë ka sisteme të mbrojtjes ajrore S-400

Sipas shërbimit për shtyp të Ministrisë lituaneze të Mbrojtjes, poligoni do të ndërtohet së shpejti në qytetin lituanez të Kazlu Ruda dhe do të jetë fusha e parë e aviacionit ushtarak në vendet baltike.
Poligoni do t’u mundësojë vendeve të Aleancës Perëndimore të bëjnë sulme ajrore mbi objektivat e tokës, si dhe trajnimin e personelit ushtarak për Forcën Ushtarake Ajrore.

Ndërtimi i poligonit të aviatorëve filloi vitin e kaluar dhe përfundimi i punimeve është planifikuar për në vjeshtë. Ndërtimi është bërë nga një njësi inxhinierike e Forcave Ajrore të Ushtrisë Amerikane “Hors Red”. Projekti financohet nga Iniciativa Evropiane e Riedukimit.

Ministria e Transportit dhe Postë Telekomunikacionit e Lituanisë ka krijuar një zonë për fluturimin e trafikut ajror civil nëpërmjet këtij poligoni të aviacionit.

Këto lëvizje në Moskë konsiderohen si një provokim dhe ekspertët ushtarakë thonë se Rusia tani do të jetë e detyruar të krijojë sisteme të mbrojtjes ajrore sa më afër kufirit dhe drejtpërdrejt në rajonin e Kaliningradit, si dhe disa sisteme të tjera detare të PVO.

Ekspertët rusë paralajmërojnë gjithashtu se ngritja e një poligoni të ri ushtarak në një distancë aq të shkurtër nga kufijtë rusë shkel Marrëveshjen e Forcave të Armatosura në Evropë, nënshkruar më 19 nëntor 1990 në Paris.

Ndryshe, në rajonin Baltik në vitet e fundit ka pasur një grumbullim të trupave të NATO-s, për shkak të kërcënimit të pretenduar rus. Moska kategorikisht refuzon akuza të tilla, duke i quajtur të pabazuara dhe duke iu kundërvënë veprimeve të ndërmarra nga NATO në kufijtë rusë.

Presidenti rus Vladimir Putin më herët tha se Rusia do të reagonte në mënyrë adekuate dhe proporcionale në kufijtë e Rusisë. Sipas tij, çelësi për të siguruar sigurinë dhe stabilitetin në Evropë përfshin zgjerimin e bashkëpunimit dhe rivendosjen e besimit, në vend të vendosjes së bazave të reja të NATO-s dhe infrastrukturës ushtarake në kufijtë e Rusisë.

Sjellja e çuditshme e një sateliti rus shqetëson amerikanët

Një satelit misterioz rus, që paraqet një “sjellje anormale” ka ngritur alarmin në SHBA. BBC citon një zyrtar të Departamentit të Shtetit, i cili është shprehur se ka shumë paqartësi rreth objektit

“Nuk e dimë me siguri se çfarë është dhe nuk ka asnjë mënyrë për ta verifikuar”, tha Yleem Poblete në një konferencë në Zvicër, më 14 gusht. Ajo la të kuptohej ky objekt mund të jetë edhe një lloj arme. Ndërsa në Rusi, komentet e Poblete u cilësuan si akuza të pabaza.

Sateliti në fjalë është lëshuar në tetor të vitit të kaluar. “Mënyra se si lëviz në orbitë është ndryshe nga sa kemi parë ndonjëherë gjatë inspektimit të një orbite”, tha Poblete gjatë një konference të mbajtur në Zvicër mbi çarmatimin.

“Synimet ruse në lidhje me këtë satelit janë të paqarta dhe janë padyshim një zhvillim shumë shqetësues”, shtoi ajo, duke cituar komentet e fundit të komandantit të Forcave Hapësinore të Rusisë, i cili është shprehur se vënia në zbatim e “prototipeve të reja të armëve” është objektiv kryesor për forcën ruse.

Por Aleksandër Deynko, një diplomat i lartë rus, i tha agjencisë së lajmeve Reuters se komentet këto janë thjesht shpifje të bazuara në dyshime dhe u bëri thirrje SHBA-ve të kontribuojnë në një traktat ruso-kinez, që synon të parandalojë një garë armësh në hapësirë.

“Armët hapësinore mund të jenë të dizajnuara për të shkaktuar dëme në mënyra më delikate sesa armët tradicionale si armë, të cilat mund të shkaktojnë shumë mbeturina në orbitë”, shpjegon Alexandra Stickings, një analiste hulumtimi në Institutin e Shërbimeve Mbretërore të Bashkuara.

“Ato mund t’i ndalojnë punën një sateliti përkohësisht ose ta çaktivizojnë atë përgjithmonë pa e shkatërruar ose prishur përmes zhurmës”, tha ajo.

Sipas saj, është shumë e vështirë të merret vesh çfarë teknologjie është vënë në dispozicion, pasi informacioni mbi kapacitetin hapësinor është i klasifikuar.

Milionat e diasporës shkojnë në konsum

Burim i rëndësishëm i të hyrave të ekonomive familjare në Kosovë vazhdojnë të jenë edhe dërgesat e emigrantëve. Në vit, vlera e parave të dërguara nga diaspora sipas të dhënave zyrtare të Bankës Qendrore të Kosovës arrin shumën e rreth 600 milionë euro. Këto mjete vazhdojnë të shfrytëzohen kryesisht për konsum familjar

Mërgimtarët të cilët pushimet i kalojnë në Kosovë, thonë se shpenzojnë vlera të konsiderueshme të mjeteve materiale kur janë në Kosovë, por ata thonë, se gjatë tërë vitit dërgojnë para te familjarët e tyre.

Merita Berisha jeton dhe punon në Gjermani. Ajo thotë se pushimet i kalon çdo herë në Kosovë te familja e saj, për të cilët, siç thotë ajo, dërgon çdo muaj para.

“Ne si familje çdo herë kemi dërguar para në Kosovë, përafërsisht në muaj i dërgojmë nga 300 euro. Ato para ata (familja) i shpenzojnë për ushqim, veshmbathje, thjesht gjëra bazike. Tani që jam këtu në Kosovë unë i shpenzoj deri në 3 mijë euro për dy apo tre javë sa do të qëndrojë këtu”, thotë ajo.

Ismet Sadiku i cili po ashtu jeton jashtë vendit dhe për pushime ka ardhur në Kosovë thotë se shpenzon shumë gjatë qëndrimit të tij në vendlindje.

“Të gjitha kursimet i shpenzoj në Kosovë kur vi për pushime. Gjatë tërë kohës kam ndihmuar familjen time që jeton këtu. Ata kanë nevojë pasi që dihet se këtu në Kosovë ka papunësi të madhe dhe nuk arrijnë të mbulojnë shpenzimet me pagat që ata marrin”, thotë ai.

Një shumë e madhe e mjeteve diaspora kosovare sipas të dhënave zyrtare i investon edhe në blerjen e patundshmërive në Kosovë.

Bazuar në shënimet zyrtare, janë mes 700 – 800 mijë qytetarë të Kosovës që jetojnë në vende të ndryshme të Evropës dhe botës.

Zëdhënësi i Bankës Qendrore të Kosovës, Kushtrim Ahmeti, thotë për Radion Evropa e Lirë se remitencat krahasuar me vitin e kaluar kanë shënuar rritje.

“Në periudhën janar – maj vlera e parave të dërguara nga mërgimtarët ka arritur shumën e mbi 300 milionë eurove. Kjo shumë krahasuar me periudhën e njëjtë të vitit 2017 ka një rritje prej 18.3 milionë euro. Një pjesë e madhe e këtyre e mjeteve shkojnë për konsum pastaj në investime, kryesisht në blerje të patundshmërive”, thotë Ahmeti.

Në remitencat që pranohen në Kosovë, shton Ahmeti vijnë nga Gjermania, Zvicra, SHBA-ja, Italia, Austria, Franca dhe shtete të tjera.

Shuma e dërgesave të emigrantëve në vit konsiderohet të jetë edhe më e lartë, pasi që një pjesë e mjeteve hyjnë në Kosovë edhe përmes formave tjera të cilat mund të mos përfshihen në të dhënat zyrtare të Bankës Qendrore të Kosovës.

Në anën tjetër, ekspertë të fushës vlerësojnë se marrëdhënia me diasporën kosovare duhet të kalojë nga një marrëdhënie e solidaritetit në një marrëdhënie të ekonomisë së tregut, ku emigrantët do të investojnë fondet e tyre.

Naim Dedushaj nga Rrjeti i Bizneseve Shqiptare në Diasporë, thotë për Radion Evropa e Lirë se diaspora kosovare po vazhdon të kontribuojë në ekonominë e vendit, por që parave të dërguara të cilët kryesisht shpenzohen për konsum, duhet t’i ndërrohet orientimi.

“Edhe këtë vit si çdo herë diaspora kosovare dëshmoi se dëshiron të kontribuojë në Kosovë. Ata vazhdojnë të vijnë me familjet e tyre për pushime në Kosovë. Sa i përket dërgimit të parave tek familjet e tyre mendoj se nuk është edhe e qëlluar pasi që me këto para do të ishte më mirë të fillohet me ndonjë biznes të vogël, në mënyrë që të motivojnë familjarët e tyre që të kenë perspektivë dhe të mos varen nga remitencat”, thotë Dedushaj.

Ndryshe, remitencat përgjatë viteve kanë pasur një rol të rëndësishëm në ekonominë e vendit, duke nxitur rritjen ekonomike dhe duke siguruar të ardhura shtesë për familjet me të ardhura më të vogla.

Turqë nga Stambolli bëjnë hulumtime ilegale tek varret e vjetra në jug të Kosovës

Një profesor nga Stambolli i Turqisë së bashku me dy shoqërues, këto ditë po bejnë hulumtime në varrezat e vjetra të fshatrave të treves së Gorës në jug të Kosovës. Ky hulumtim po bëhet për të satën herë në mënyrë klandestine dhe të pa autorizuar nga autoritetet përkatëse të Kosovës. Për këtë hulumtim të profesorëve nga Turqia nuk është njoftuar dhe nuk di askush as në Akademinë e Shkencave në Prishtinë, as në Institutin Albanologjik dhe as Institutin e Arkeologjisë ne Prishtinë

Profesorët nga Turqia këto ditë kanë dalë ne terren dhe po hulumtojnë dhe deshifrojnë epitafet (mbishkrimet) e varrezave të trevës së Gorës. Një qytetar nga Dragashi që i ka shoqëruar profesorët nga Turqia, Tair Refkija Asimi, në Facebookun e tij ka publikuar një postim me fotografi ku shkruan:

” Gora 13.08.2018. Sot në hulumtim të “Nishanëve” të vjetra të mbishkrimëve mbivarrore në fshatrat tona, ndoshta kemi gjetur nishanin më të vjeter sipas kalendarit të Hixhrit, viti 1051 dhe viti 1067. Autenticitetin e ka vertetuar profesori nga Stambolli i Turqisë së bashku me dy shoqëruesit e tij me të cilët kam qenë edhe unë në terren. Me këtë material të mbledhur në Gore do të shkruhet libër. Nga disa dhjetëra fotografi, i kam veçuar këto dyjat”, ka shkruar qytetari Tair Refkija Asimi nga Dragashi, Kosova jugore.

Ndërsa kjo mënyrë klandestine e hulumtimit po konsiderohet e parregullt dhe se mund të rezultojë me shtrembërim të fakteve të historisë mesjetare të Kosovës. Nuk është hera e parë që kërkime të tilla klandestine janë bërë në zonën e Dragashit, nga “hulumtues” që kanë ardhur nga jashtë Kosovës.

Kurti paralajmëron shkarkimin e Thaçit me demonstrata(video)

Kryetari i Lëvizjes Vetëvendosje, Albin Kurti, ka kërkuar nga presidenti Hashim Thaçi që të mos bëjë pazare me territorin e Kosovës. Përndryshe, Kurti paralajmëron shkarkimin e Thaçit me demonstrata

Kreu i Vetëvendosjes ka thënë se nuk e pranojnë asnjë marrëveshje që nënshkruhet ndërmjet presidentit të Kosovës dhe të Serbisë, sepse, sipas tij, presidenti Thaçi nuk ka legjitimitet as autorizim nga Kuvendi që ta përfaqësojë Kosovën në bisedimet me Serbinë.

Lidhur me idenë e presidentit Thaçi për korrigjim të kufijve me Serbinë, Albin Kurti tha se korrigjimi i kufijve është shprehje e gabueshme me pasoja të dëmshme.