Lajm.co

Janjiq: Vuçiqi me strategji për ta shtyrë çështjen e Kosovës 15 vjet

Drejtori i Forumit për marrëdhënie etnike Dushan Janjiq ka thënë se kryetari i Serbisë Aleksandar Vuçiq po e ndërton të ashtuquajturën exit strategy (strategji dalëse) sipas të cilës lihet mundësia që zgjidhja e problemit të Kosovës të shtyhet për disa vite

“Tani po zhvillohet dialogu politik në të cilin po marrin pjesë presidentët e Qeveria po i zbaton përfundimet. Tani janë disa detyra:

E para, të regjistrohen të gjitha marrëveshjet të cilat nuk janë zbatuar.

E dyta, ekziston një shkallë e lartë pajtueshmërie për mbrojtjen e objekteve kulturore dhe të manastireve të cilat i ka paraparë plani Ahtisaari e të cilat ne s’i kemi pranuar.

E treta, ajo që i intereson sidomos Thaçit, është demarkacioni i kufirit në mënyrë që saktë të përcaktohet se ku janë kufijtë. Paralelisht me këtë, Vuçiq po e ndërton një exit strategy, që lë mundësinë që zgjidhja përfundimtare të mos arrihet menjëherë, porse ajo të bëhet, për shembull pas 10 ose 15 vjetësh. Në mënyrë hipotetike, Serbia për 15 vjet mund të jetë në BE e ndoshta edhe në NATO.

Pastaj, në kuadër të këtyre sistemeve të mëdha, do të mund të flitej për ndarjen eventuale të veriut nga Kosova. Atëherë Perëndimi nuk do të na shikonte si kërcënim për sigurinë ose hapësirë ku ndikimi rus të jetë i fuqishëm, por si pjesë të bashkësisë së tij. Ndoshta atëherë nuk do të ketë probleme as në Maqedoni e Bosnjë e Hercegovinë dhe kjo e lehtëson pozicionin”, citon javorja serbe ekspres të ketë thënë Janjiq.

Sipas fjalëve të tij, edhe pse Vuçiqi është i ashpër dhe shpesh nervoz në paraqitjen publike, në thelb është politikan pragmatik. “Ai e ka kuptuar se për 10 ose 15 vjet mund të jemi në pozitë më të mirë se sa tash. Kur arrin te “këndi vdekur”, të shprehem me fjalor futbolli, ti ndërton një strategji afatgjate dhe nëse është e domosdoshme, mund të ndryshosh ekipin. Ai mund ta bëjë këtë, sepse ka fuqi politike tek opinioni vendor, nuk ka problem me autoritetin siç ka Thaçi në Kosovë.

Kështu, ai do të shpëtojë që gabimet t’i lihen atij dhe prapë të nxjerrë më së shumti atë që është e mundur këto rrethane. Tregimi për këmbimin e territorit është thjesht një retrospektivë, sepse Beogradi është i vetëdijshëm se është bërë gabim kur u negociua për marrëveshjen e dytë të Brukselit në vitin 2015 për ta zgjeruar Asociacionin e Komunave serbe (AKS-në) në 10 komuna, dhe jo vetëm për katër komuna në veri, siç ishte konceptuar fillimisht. Tani është e mundur të negociojmë ridefinimin e AKS-së, në drejtim të marrjes së kompetencave më të mëdha, por për një numër më të vogël komunash. Ky është një “AKS plus”, ka thënë Janjiq.

Adem Gllavica: Mos u mbështesni më te Shqipnija, Tirana ësht Belgrad, e Belgradi ësht Tiranë

Shemsi Reçica, profesor i filozofisë, ka publikuar në profilin e tij në Facebook një letër të vitit 1990, të cilën ia kishte dërguar Adem Gllavica, kryetar i Rinisë Nacionaliste Shqiptare për Mbrojtjen e Kosovës dhe njëri ndër organizatorët kryesorë të Lidhjes së Dytë të Prizrenit

Në letër, Gllavica i këshillonte kosovarët që të mos llogarisnin më mbështetjen e Shqipërisë. Ai e akuzonte regjimin e Enver Hoxhës për tradhti kombëtare dhe tregonte përvojën e tij të vitit 1943 me përfaqësues të Partisë Komuniste të Shqipërisë, të cilët ishin rreshtuar në krah të Partisë Komuniste të Jugosllavisë dhe kundër forcave nacionaliste që luftonin për bashkimin e Kosovës dhe Shqipërisë.

Ai tregonte se në takimin e mbajtur në fshatin Cërnillë, përfaqësuesit e Partisë Komuniste të Shqipërisë u kishin kërkuar forcave nacionaliste shqiptare në Kosovë që të hiqnin dorë nga lufta për bashkimin e trohejeve shqiptare dhe të dorëzoheshin, duke theksuar se, siç i citonte ai, “Tirana ësht Belgrad, e Belgradi ësht Tiranë“.

“Ne, n’at koh kemi luftue per bashkimin me Shqipni, por fatkeqsisht Shqipnija le që sna perkrahi, por na e këtheu pushken e u detyrumë me u vra vlla me vlla. E vazhdumë luften me shpresë se qeverija e Shqipnisë do ta shef gabimin e tradhtinë që po i ben Kombit Shqiptar, por ajo ne nji takim qi patem me perfaqësuesit e Shqypnise në katundin Crnillë, na tha kjartas ‘Tirana ësht Belgrad, e Belgradi ësht Tiranë’ e ju dorzonu se keni ku me shkue”, shkruante Adem Gllavica.

Letra e plotë autentike e Adem Gllavicës:

I dashuni Shemsi, Letren tënde (3/3) e morra. Per Ty kam ndigjue se ke vujt shum neper burgje. Nuk i dij mendimet politike tuat, e dij vetëm se janë shum rryma politike në mess Kosovarve, sa me Jugosllavi, sa me Stalinin, sa me Enverin, e sa i mëshojnë thumit e sa potkonit.

Unë e dij vetem nji gja: Ne, n’at koh kemi luftue per bashkimin me Shqipni, por fatkeqsisht Shqipnija le që sna perkrahi, por na e këtheu pushken e u detyrumë me u vra vlla me vlla. E vazhdumë luften me shpresë se qeverija e Shqipnisë do ta shef gabimin e tradhtinë që po i ben Kombit Shqiptar, por ajo ne nji takim qi patem me perfaqësuesit e Shqypnise në katundin Crnillë, na tha kjartas “Tirana ësht Belgrad, e Belgradi ësht Tiranë“ e ju dorzonu se keni ku me shkue.

Ahere, ne vendosum me dalë në Greqi e kështu e ndalem luften. Deri sa dij unë, Shqipnia hala se ka pohue gabimin e tradhtinë që bëni, prandaj Juve Kosovaret duhet të shkoni me hapa të mbatun; mos u bazoni në Shqipni, por bazoni vetëm në forcat e juja, me nji fjal “U se i u svoje kluse“.

Si që po e shef unë po të shkruj nga Perth-i 4000 Km. nga Tatura vendi ku banoj. Këtu jam qe 6 javë dhe do t’qindroj edhe nja 6-7 jave e masandej fluturoj për në Evropë – Munchen. Adresa e ime në Munchen: A. Selimi, Tannenstrasse 31, 8014 Neubiberg Ëest Germany.(TemA)

Statuti i Asociacionit në proces të përkthimit në shqip

Qeveria e Kosovës ende është duke e shqyrtuar raportin e punës së ekipit menaxhues, i cili është i ngarkuar për hartimin e statutit të Asociacionit të Komunave me shumicë serbe. Koordinatori i Qeverisë së Kosovës në dialogun teknik me Serbinë, Avni Arifi, tha për Radion Evropa e Lirë, se ende Qeveria nuk ka një qëndrim lidhur me atë se çka përmban ai raport i dorëzuar

Ekipi menaxhues, përbëhet vetëm nga pjesëtarë të komunitetit serb, andaj drafti i është dorëzuar Qeverisë në gjuhën serbe, me shkronja dhe alfabet cirilik. Andaj, tani Qeverisë së Haradinajt i duhet kohë për përkthim të tekstit. “Ai dokument është në përkthim e sipër dhe sapo të përfundojë, do të deklarohemi për përmbajtjen e tij”, u shpreh Arifi.

Ai nuk deshi të komentojë asgjë në lidhje me përmbajtjen e këtij draft-statuti, i cili është në proces e sipër. “Këto procesverbale, janë nga takimet dhe nuk i takon Qeverisë të deklarohet për takime të brendshme, të cilat kanë ndodhur. Mirëpo, presim se si do të jetë draft-statuti “, shtoi Arifi.

Kurse, duke folur për përbërjen e ekipit hartues të statuti të Asociacionit, Arifi tha se përbërja e tij nuk ka mundur të ndryshohet dhe nuk mund të ndryshojë, pasi që një përbërje e tillë parashihet me marrëveshjen e arritur në Bruksel.

“Është marrëveshje ndërkombëtare që ekipi menaxhues të ketë vetëm katër serbë dhe asnjë shqiptar, dhe ky ka qenë insistim i ndërkombëtarëve dhe palës serbe që marrëveshja e nënshkruar nga përfaqësuesit e Kosovës, që kanë qenë, të respektohet”, sqaroi Arifi.

Nga ana tjetër, analisti politik, Imer Mushkolaj, tha për Radion Evropa e Lirë, se duke pasur parasysh përbërjen e trupit, i cili ka përgatitur statutin për themelimin e Asociacionit të Komunave me shumicë serbe, nuk është që pritet se ai do të jetë një statut, i cili këtë organizëm, pra Asociaconin, do ta shohë, apo do ta parashikojë si një organizatë pa kompetenca ekzekutive.

“Nuk është dashur të pritet, në fakt është utopi të pritet se duke pasur parasysh që ata janë të etnitetit serb, do të mund të hartonin një statut ndryshe nga ai që është hartuar. Ne e dimë se statuti duhet të dërgohet në Gjykatën Kushtetuese, po ashtu, kur të jetë gati, mirëpo kjo qasje e këtyre ekspertëve që e kanë hartuar statutin duhet parë në përpjekjet e Beogradit që të themelojë Asociacion me kompetenca ekzekutive brenda territorit të Kosovës, që realisht do të ishte një lloj autonomie, respektivisht një lloj nivel i tretë i pushtetit”, vlerësoi Mushkolaj.

Mushkolaj tha se vetë nënshkrimi i marrëveshjes në Bruksel e ka bërë të qartë se ky Asociacion ka kompetenca ekzekutive. “Kishim edhe aktgjykimin e Gjykatës Kushtetuese se 23 nene ishin në kundërshtim me frymën kushtetuese. Mirëpo, mos të harrojmë se së fundi kishte një thirrje nga Bashkimi Evropian që Asociacioni të themelohet sipas marrëveshjes së Brukselit, pra harrohej fare kjo pjesa që thuhej në disa prej komunikimeve zyrtare të Bashkimit Evropian se duhet themeluar edhe sipas aktvendimit të Gjykatës Kushtetuese, dhe unë besoj se trupi që e ka hartuar statutin e Asociacionit, e ka pasur parasysh marrëveshjen e Brukselit”, theksoi Mushkolaj.

Megjithatë, Mushkolaj konsideron se në rast se grupi për hartimin e statusit të Asociacionit ka punuar në kundërshtim me rregullat dhe jashtë kornizave të paracaktuara, duhet të ndëshkohet nga Qeveria e Kosovës. “Në anën tjetër, nëse ata arsyetojnë se këtë statut e kanë hartuar duke u bazuar në marrëveshjen e Brukselit, atëherë këtu nuk e besoj se ka shumë çfarë të diskutohet, gjithnjë duke pasur parasysh se ajo marrëveshje është nënshkruar nga atëherë kryeministri i Kosovës, tash presidenti Hashim Thaçi”, shtoi Mushkolaj.

Ministria e Administrimit të Pushtetit Lokal javën e kaluar i ka dorëzuar një raport kryeministrit të Kosovës, Ramush Haradinaj, në lidhje me punën e ekipit menaxhues. Formimi i Asociacionit të komunave serbe nga Beogradi zyrtar dhe përfaqësuesit e serbëve të Kosovës, shihet si çështja kyçe në bisedimet ndërmjet Prishtinës dhe Beogradit në Bruksel. Ndërkaq, institucionet e Kosovës po këmbëngulin në zbatimin e të gjitha marrëveshjeve të arritura, të cilat, sipas Prishtinës, janë bllokuar nga Beogradi.

Haradinaj: Mirënjohjen e kemi kthyer në miqësi të përjetshme me SHBA -të

Kryeministri i Kosovës, Ramush Haradinaj, ka thënë se “SHBA na qëndroi përkrah Kosovës në rrugëtimin historik. Haradinaj ka shtuar se mirënjohjen e përjetshme e kemi shndërruar në miqësi të përhershme

“Në pritjen e organizuar nga ambasadori amerikan në Kosovë, Greg Delawie, në shënim të ditës së pavarësisë së ShBA-së. ShBA na qëndroi përkrah, në rrugëtimin tonë historik dhe mirënjohjen e përjetshme e kemi shndërruar në miqësi të përhershme! Ideali amerikan i lirisë na motivon që ta gjejmë burimin e fuqisë në shpirtin kolektiv. Zoti e bekoftë Amerikën dhe popullin e saj”, ka shkruar Haradinaj në profilin e vet në Facebook.

Presidenti i Komisionit Evropian jep shenja pozitive për liberalizimin e vizave

Presidenti i Komisionit Evropian, Jean-Claude Juncker, ka kthyer përgjigje për gazetën “Bota sot”, në lidhje me mundësinë që Kosova të marrë rekomandimin pozitiv për Liberalizimin e vizave

Juncker ka thënë se, Komisioni tani është duke e përgatitur vlerësimin e tij mbi “standardin në rrugë të mbarë”, i cili do t’i paraqitet Këshillit dhe Parlamentit Evropian në kohën e duhur. Tutje Presidenti Evropian, ka theksuar se, nëse vlerësimi është pozitiv, atëherë do të jetë për Këshillin dhe Parlamentin Evropian të marrë vendimin përfundimtar mbi propozimin. “E kuptojmë plotësisht rëndësinë e liberalizimit të vizave për Kosovën. Më 4 maj 2016,

Komisioni Evropian i propozoi Këshillit të Bashkimit Evropian dhe Komisionit Evropian, që Parlamenti Evropian do të heqë kërkesat për viza për popullin e Kosovës dhe transferimin e Kosovës në listën pa viza për qëndrime të shkurtra në zonën Shengen”, ka thënë Juncker.

Presidenti Juncker, në përgjigjen dhënë Gazetës “Bota sot”, ka rikujtuar faktin se Kosova i ka përmbushur kushtet për liberalizimin e vizave, duke përfshirë këtu edhe miratimin e marrëveshjes për Demarkacionin e Kufirit me Malin e Zi. “Në këtë propozim, Komisioni konfirmoi se Kosova kishte përmbushur të gjitha kërkesat e saj

udhërrëfyese për liberalizimin e vizave, me qëllim që deri në ditën e miratimit të Marrëveshjes së Ohrit propozimi nga Parlamenti Evropian dhe Këshilli, Kosova do ta kishte ratifikuar gjithashtu

demarkacionin me Malin e Zi dhe përforcuan të dhënat e saj në luftë kundër krimit të organizuar dhe korrupsionit, dy etapat përfundimtare. Më 21 mars 2018, Kuvendi i Kosovës ratifikoi marrëveshjen e demarkacionit të kufirit. Komisioni tani është duke e përgatitur vlerësimin e tij mbi standardin në rrugë të mbarë i cili do t’i paraqitet Këshillit dhe Parlamentit Evropian në kohën e duhur”, është shprehur ai.

Si rrjedhojë e kësaj, Presidenti Jean-Claude Juncker, ka thënë se, nëse vlerësimi është pozitiv, atëherë i takon Këshillit dhe Parlamentit Evropian të marrë vendimin përfundimtar mbi propozimin.

“Nëse vlerësimi është pozitiv, atëherë do të jetë për Këshillin dhe Parlamentin Evropian të marrë vendimin përfundimtar mbi propozimin.. Komisioni mbetet plotësisht i angazhuar për të quar këtë proces përpara”, ka përfunduar presidenti i Komisioni Evropian, Jean Claude Juncker për gazetën “Bota sot”.

Ndryshe, Komisioni Evropian pritet të tregojë më 28 qershor nëse Kosova i ka përmbushur kriteret për liberalizimin e vizave, në bazë të të cilit raport institucionet e BE-së do të marrin vendim për heqjen ose jo të vizave.

Këtë datë e konfirmoi ditë më herët, ministri i Punëve të Jashtme, Behgjet Pacolli, por evropianët deri më tani s’kanë treguar ndonjë datë.

E derisa pritja vazhdon, zyrtarët shtetërorë insistojnë se ky vit do të jetë koha kur vendi do ta gëzojë liberalizimin e vizave.

Megjithatë, atyre po u kërkohet që të mos japin premtime për afate, pasi liberalizimi nuk do të ndodhë këtë vit.

Artikulli që pushtoi rrjetin në pak orë: Po rrisim një brez ku*vash

Një artikull provokues në një tabloid popullor rus, trondit femrat, pasi në këtë shkrim ato cilësohen si ‘ku*va’ për mikpritjen dhe romancën e tyre me tifozët e huaj gjatë Kupës Botërore, shkrim ky që ka hasur në shumë kritika dhe në debate

Pjesa e diskutueshme, ishte që në titull të shkrimit, i cili ishte: “Koha e k*rvave: gratë ruse poshtërojnë vendin e tyre dhe veten gjatë Botërorit”, çka i ka sjellë “Moskovsky Komsomolets” më shumë se gjysmë milion klikime në më pak se një ditë dhe duke u ripublikuar gjerësisht në mediat sociale.

Autori, Platon Besedin, shkruante se, ndërkohë që trajnerët dhe futbollistët vlerësuan organizimin e Kupës së Botës, dhe tifozët që e kanë vizituar Rusinë pretendojnë se, të jetë një vend i tmerrshëm me gratë ruse po punojnë shumë për të ruajtur stereotipin e trishtuar që “ato janë për shitje”.

“Jo të gjithë janë të tillë, natyrisht, por delja e zezë sjell turp në të gjithë tufën. Dhe le të jemi të sinqertë, ka mjaft dele të zeza”, pohoi Besedini, duke shtuar se mediat sociale janë plot me video mes s tifozëve të huaj dhe grave vendase, të cilët “sillen si shtylla të vjetra me përgjegjësi të ulët sociale”.

“Ne kemi ngritur një brez “ku*rvash”, gati për të hapur këmbët e tyre për të huajt. Dhe nëse ata u kanë dhënë qoftë edhe një dollar, atëherë është absolutisht e përkryer për to,” tha ai./Burimi: RT

Disa ministra ia bëjnë ‘bllok’ pagës me rritje

Disa ministra në Qeverinë e Kosovës, kryesisht nga radhët e Partisë Demokratike të Kosovës, po refuzojnë vendimin e Qeverisë dhe kryeministrit Ramush Haradinaj, për rritjen e pagave. Rrjedhimisht, disa nga këta ministra kanë deklaruar se nuk do ta marrin pagën me rritje. I pari që kishte sfiduar vendimin e kryeministrit Haradinaj, ishte ministri i Financave, Bedri Hamza

Po ashtu, edhe një ministër tjetër i PDK-së, i ka konfirmuar Radios Evropa e Lirë se do ta refuzojë pagën me rritje. Kurse, ministra të tjera nuk kanë dashur të komentojnë për këtë çështje. Ndërkohë, ministrja e Integrimit Evropian, Dhurata Hoxha, në një konferencë për media, kishte deklaruar se janë duke diskutuar me ministrat tjerë se a do ta pranojnë apo ta refuzojnë pagën me rritje.

“Patjetër që këtë jemi duke e diskutuar me ministrat dhe do të marrim një vendim në lidhje me këtë”, kishte thënë Hoxha. Në anën tjetër, ministrat nga partitë tjera të koalicionit, nuk e shohin problem rritjen e pagave.

Ministri i Tregtisë dhe Industrisë, Bajram Hasani, nga Nisma Socialdemokrate, ka thënë për Radion Evropa e Lirë, se e respekton vendimin e Qeverisë së Kosovë dhe se nuk ka diskutuar me asnjë ministër për këtë çështje.

​Në dhjetor të vitit të kaluar, Qeveria e Kosovës, e drejtuar nga Ramush Haradinaj, mori vendim që t’ia rrisë pagat për kabinetin qeveritar. Vendimi ishte pezulluar për disa muaj, pasi Agjencia Kundër Korrupsionit e kishte cilësuar të jashtëligjshëm.

Ndërkaq, partitë opozitare vendimin e Haradinajt për rritjen e pagave e kishin dërguar edhe në Gjykatën Kushtetuese për interpretim. Por, më 11 qershor Gjykata Kushtetuese, e cila pavarësisht pretendimeve të opozitës, nuk e kishte cilësuar atë si jokushtetuese.

Andaj, tani, nga 1 korriku, janë plotësuar parakushtet që të zbatohet vendimi për rritjen e pagave.
Megjithatë, Lëvizja Vetëvendosje vazhdon të besojë se ishte “skandal dhe abuzim me paratë e taksapaguesve” vendimi i Gjykatës Kushtetuese për lejimin e rritjes së pagave për kabinetin qeveritar.

Të premten, kjo Lëvizje ka dorëzuar kallëzim penal ndaj kryeministrit të Kosovës, Ramush Haradinaj, dhe 17 zyrtarëve të lartë, të përfshirë në procesin e marrjes së vendimit për rritjen e pagave.

Deputetja Albulena Haxhiu, pas dorëzimit të kallëzimit penal, ka thënë se vendimi për rritje të pagave paraqet konflikt interesi dhe ka kërkuar nga Prokuroria që të hetojë mënyrën se si ka ndodhur rritja e pagave.

“Unë i bëj thirrje Prokurorisë që hetojë se si ka ardhur Gjykata Kushtetuese deri te ky vendim. Ne kemi dyshime se ka pasur një kurdisje, që është marrë ky vendim skandaloz. Kemi parasysh që kanë kaluar më shumë se katër muaj derisa Gjykata Kushtetuese ka nxjerrë vendim, e që është paprecedent për një çështje kaq të thjeshtë të marrë katër muaj. Gjatë kësaj kohe, ne kemi pasur informacione se ka pasur presione mbi gjyqtarët e Gjykatës Kushtetuese”, ka thënë Haxhiu. Me gjithë kundërshtimet nga opozita, por edhe një pjesë e shoqërisë civile, sipas ekspertëve ligjorë, mënyra e vetme për ta rregulluar çështjen e pagave mbetet miratimi i Ligjit për pagat e zyrtarëve të lartë.

Ndryshe, sipas vendimit të Qeverisë, paga e kryeministrit nga 1,500 euro sa ka qenë, do të bëhet 2,950 euro, kurse e zëvendëskryeministrave nga 1,300 euro, arrin në 2,500 euro.

Paga e një ministri ka qenë rreth 1,200 euro, ndërkaq, sipas këtij vendimi, do të jetë 2,000 euro. Kurse, mbi 70 zëvendësministra, të emëruar në Qeverinë Haradinaj, do të pranojnë pagë mujore nga 1,150 euro.

Pavarësisht, asaj se kush e refuzon apo pranon pagën me rritje, Ministria e Financave njofton se të premten ka bërë ekzekutimin e pagave për muajin qershor, madje kabineti qeveritar pagën e merr me rritje në mënyrë retroaktive nga 20 dhjetori i vitit të kaluar.

Scott vitin 2018 e quan vendimtar për zgjidhjen e çështjes së Kosovës

SHBA dëshiron që Beogradi dhe Prishtina zyrtare të arrijnë zgjidhjen me kompromis të çështjes së Kosovës, ndërsa ky është viti vendimtar për zgjidhjen e saj, nëse Serbia dëshiron integrim në BE, deklaroi ambasadori amerikan në Beograd, Kyle Scott

Në pyetjen se çfarë përfiton Serbia, nëse mund të fitojë, ambasadori Scott deklaroi se sa i përket asaj se çfarë përfiton Serbia e çfarë Kosova, kjo në të vërtetë është pjesë e kompromisit dhe dialogut, njoftojnë mediet serbe.

”Ne vetëm duam të inkurajojmë palët që t’i shpejtojnë konsultimet, të jenë të hapura për secilin propozim, të arrijnë deri aty sa të arrihet marrëveshja në mes të Kosovës e Serbisë, ne do të jemi të gatshëm të shikojmë pozitivisht, pavarësisht se cila marrëveshje mund të jetë e pranueshme për të dyja palët”, deklaroi ambasadori Scott, transmeton RTK.

Ambasadori Scott shtoi se dialogu tani po hyn në fazën intensive dhe takimi i javës së kaluar i të dy liderëve, Thaç-Vuçiq, ishte pozitiv.

Më tej, ambasadori Scott mendon se dialogu duhet përshpejtuar që të mund të arrihet një zgjidhje e përhershme në mes të dyja vendeve.

”Ne duam inkurajojmë Prishtinën e Beogradin që të arrijnë deri te kompromisi, sepse nuk do të ketë marrëveshje pa kompromis”, theksoi ndër të tjera ambasadori amerikan në Beograd, Kyle Scott.

Mogherini-Hahn: Shqipëria, në rrugë të pakthyeshme drejt BE-së

Përfaqësuesja e lartë për Punët e Jashtme dhe Politikën e Sigurisë, Federica Mogherini dhe komisioneri për Politikat Europiane të Fqinjësisë dhe Negociatat e Zgjerimit, Johannes Hahn në një artikull të publikuar sot në të përditshmen “Panorama” theksojnë se Shqipëria është në një rrugë të pakthyeshme drejt Bashkimit Evropian

“Këtë javë, vizioni ynë për një Evropë vërtet të bashkuar vjen një hap më pranë. Shtetet anëtare të BE-së përcaktuan një udhë të qartë drejt hapjes së negociatave të anëtarësimit me Shqipërinë në qershor 2019. Kjo është në sajë të përparimit mbresëlënës që Shqipëria arriti gjatë vitit të kaluar, jo vetëm në rrugën e saj drejt Bashkimit Evropian, por edhe për të përmirësuar jetën e përditshme të popullit të saj”, shkruajnë dy zyrtarët e lartë europianë.

“Ne dëshirojmë të përgëzojmë popullin shqiptar dhe institucionet shqiptare për rezultatet e arritura. Një kapitull i ri i punës sonë të përbashkët fillon sot: Komisioni Evropian nisi menjëherë përgatitjet dhe ne kemi besim se ju do të ruani gjithashtu të njëjtën vendosmëri mbresëlënëse dhe punë të madhe.

Progresi në fushën e Reformës në Drejtësi është i dukshëm dhe tashmë ka bërë një ndryshim të prekshëm dhe pozitiv. Sistemi i vetingut, i cili është në thelb të Reformës në Drejtësi dhe përfshin rivlerësimin e gjyqtarëve dhe prokurorëve, po prodhon rezultatet e para. Kjo kërkonte guxim politik dhe unitet në vend. Ndryshimet kushtetuese u miratuan njëzëri për të mundësuar një paketë reformash gjyqësore në vitin 2016.

Ky nuk është thjesht një transformim ligjor, por edhe shoqëror. Ju keni mjete të reja për ta bërë udhëheqjen tuaj të përgjegjshme në fushën e drejtësisë, por edhe në fusha të tjera. Sa më shumë që Shqipëria të bëjë për nevojat e kërkesat e popullit të saj, aq më shumë do të përparojë drejt anëtarësimit në BE.

Ju keni bërë një zgjedhje të ndërgjegjshme: më shumë se 80 përqind e shqiptarëve e mbështesin projektin evropian. Dhe ne kemi vërtet nevojë për entuziazmin dhe përkushtimin tuaj ndaj projektit evropian. Tani është koha që Shqipëria të mbështetet në progresin e bërë dhe të vazhdojë të punojë me të njëjtën vendosmëri, veçanërisht për reformën gjyqësore dhe luftën kundër korrupsionit dhe krimit të organizuar. Puna gjatë vitit që vjen është një investim në integrimin tuaj në BE.

Çdo hap ka rëndësi. Ecja në këtë rrugë jo vetëm që ju lejon të hapni negociatat, por edhe ta bëni këtë në mënyrën më efektive të mundshme. Në çastin kur negociatat të hapen zyrtarisht, ju do të jeni tashmë duke vrapuar. Ky do të jetë një vit pune për BE-në gjithashtu. Komisioni tashmë ka filluar punën e nevojshme përgatitore drejt qershorit 2019, duke përfshirë, ndër të tjera, kuadrin e ardhshëm negociues. Gjithkush ka një rol për të luajtur në këtë proces historik.

Të gjitha grupet politike dhe partitë, autoritetet vendore dhe shoqëria civile duhet të punojnë së bashku më shumë se kurrë për t’u përgatitur për hapjen e negociatave të anëtarësimit dhe për të marrë përgjegjësinë e plotë të këtij procesi. Dyert e Bashkimit tonë janë të hapura. Rruga juaj drejt Bashkimit Evropian është bërë e pakthyeshme.

Tani varet nga ju që të ecni përpara në këtë rrugë drejt një të ardhmeje të prosperitetit dhe sigurisë së përbashkët. Është vendimi i lirë dhe sovran i popullit tuaj, i askujt tjetër. Ëndrra jonë e përbashkët për një kontinent europian të bashkuar është në duart tuaja”, theksojnë në shkrimin e tyre Përfaqësuesja e Lartë për Punët e Jashtme dhe Politikën e Sigurisë, Federica Mogherini dhe Komisioneri për Politikat Europiane të Fqinjësisë dhe Negociatat e Zgjerimit, Johannes Hahn.

Ramush Tahiri: Presidenti Thaçi mosnjohës i politikës dhe i historisë

Deklaratat e presidentit Hashim Thaçi, që nuk do të ketë vija të kuqe në dialogun me shtetin serb, kanë nxitur reagime të shumta

Shefi i Grupit Parlamentar të PSD-së, Dardan Sejdiu,ka deklaruar se marrëveshjet që mund t’i bëjë Thaçi nuk do të implementohen, dhe që ai mund të flasë vetëm në emër të vetin, dhe jo në emër të Republikës së Kosovës.“Besoj se Presidenti Thaçi e di se marrëveshjet e tij nuk mund dhe nuk do të implementohen. Ai mund të merret vesh në emër të vetin, jo të shtetit tonë. Republika e Kosovës nuk mund ta mirëmbajë funksionalitetin kushtetues e institucional nëse shkohet vetëm një hap tutje aranzhimeve aktuale. Aq më tepër ajo nuk mund të ekzistojë nëse i ndahet territori”, është shprehur Sejdiu për “Gazeta Blic”.

Sejdiu shtoi, se çfarëdo diskutimi për ndarje të Kosovës, duhet të ketë vija të kuqe.“Çfarëdo diskutimi të Kosovës ose për thellim të ndarjes së brendshme sipas parimit etnik janë vija të kuqe të cilat assesi nuk bën të tejkalohen”, tha ai.

Deklaratat e Thaçit për dialogun Kosovë-Serbi, i ka cilësuara si të pamatura, edhe politologu Ramush Tahiri.

Ai tha se presidenti duhet ta respektojë Kushtetutën edhe ligjin, dhe jo të bëjë deklarata të tilla, të cilat nuk janë aspak optimiste.“Deklaratat e Presidentit të Kosovës Thaçi duken të pamatura dhe të paarsyeshme që nuk sjellin optimizëm dhe vullnet dhe ne këtë moment janë të pakuptueshme arsyet pse u thanë.

Prej Presidentit të vendit pritet që të respektojë dhe ta mbrojë Kushtetutën dhe ligjin për të cilën gjë edhe është i mandatuar e nuk priten opsione politike e as pikëpamje filozofike që e zhbëjnë apo e venë në dyshim lirin dhe pavarësinë e popullit si dhe sovranitetin, integritetin territorial dhe subjektivitetin ndërkombëtar të shtetit të Kosovës”, sqaroi Tahiri.

Tahiri, ka kritikuar presidentin Thaçi, për krahasimet që ai i ka bërë gjatë ditës së djeshme, se nëse nuk arrihet ndonjë marrëveshje me shtetin serb, Kosova rrezikon të ketë fatin e njëjtë sikur Palestina dhe Qiproja Veriore. “Me krahasu Kosovën sot me Palestinën dhe me Qipron Veriore dhe këtë me e bërë hiq më pak se Presidenti dhe këtë në një konferencë të posaçme për medie i bije mos me marr erë në politikë dhe në çështje të historisë. Së paku kjo tregon përveç mosnjohje të thellë edhe një mosbesim në kauzën e drejtë të çështjes së Kosovës, si pjesë e zgjidhjes së drejtë të çështjes shqiptare në Ballkan, por edhe si një zgjidhje qytetare, evropiane e civilizuese e të drejtave kolektive të njeriut si e drejtë themelore qytetare për të jetuar i lirë dhe i dinjitetshëm në trojet e veta.

Ndër të tjera Tahiri ka theksuar se Serbia nuk mund të vendosë për fatin e Kosovës, dhe çfarëdo marrëveshje e paqes që mund të arrihet duhet t’i përmbushë kriteret themelore, dhe vetëm në këtë mënyrë të mos përsëritet tragjedia.“Me e lënë fatin e Kosovës dhe të ardhmen e saj në duart e vullnetit të Serbisë në kohën kur shtetin e Kosovës e kanë njohur së paku 115 shtete që është më shumë se gjysma e shteteve anëtare të Kombeve të Bashkuara, duhet me pas një presion të madh për me dalë kundër vullnetit të popullit.

Serbia si shtet mundet me qenë vetëm përgjegjëse për luftën dhe për krimet e luftës dhe për shkatërrimet në Kosovë, por kurrsesi nuk mund të ketë status të privilegjuar që me vendos për fatin e Kosovës e assesi me qenë përpara SHBA-ve dhe vendeve të BE-së. Pra e ashtuquajtura marrëveshje e paqes duhet ti përmbushë kriteret themelore të njohë agresorin dhe çlirimtarin, të njohë fajtorin dhe pasojat që duhet ti ketë në mënyrë që tragjedia të mos përsëritet”, ka thënë Tahiri.

Në fund, politologu Tahiri tha se krahasimet që presidenti Thaçi i ka bërë, nuk janë asgjë tjetër, veç se mohim i rrugës së kaluar deri tash, e cila ka sakrifica të shumta për liri.“Me hy sot në kompromis të dhimbshëm që ndryshon karakterin e brendshëm të shtetit duke kërcënuar me pozitën e Qipros Veriore dhe të Palestinës ashtu siç kërconte në Konferencën e Rambujesë një pjesë e delegacionit me mbetjen e Kosovës në pozitat e popullit kurd , është se paku mohim i rrugës se kaluar deri tash, i përpjekjeve e sakrificës shekullore edhe luftës së popullit per liri , të UÇK-së gjatë viteve 1998-99 por edhe të vet angazhimit të NATO-s dhe të gjithë Bashkësisë Ndërkombëtare për me e larguar Serbinë dhe sundimin e saj përgjithmonë nga Kosova, duke e çliruar popullin e Kosovës dhe duke e njohur pavarësinë dhe sovranitetin e saj si shtet dhe duke vënë marrëdhënie diplomatike”, ka përfunduar Tahiri.

Ndërkohë, Thaçi edhe gjatë ditës së sotme ka përsëritur se duhet të ndodhë marrëveshja historike me shtetin serb. Sipas tij, nëse dialogu dështon, BE-ja do ta fajësojë shtetin e Kosovës.