Lajm.co

Kurti: Me fitoret në Prishtinë e Prizren shmangëm një të keqe të madhe

Deputeti i Vetëvendosjes, Albin Kurti ka thënë se me fitoret e Vetëvendosjes në Prishtinë dhe Prizren është shmangur një e keqe e madhe në dy komunat më të mëdha të Kosovës

Pas numërimit të votave me kusht, të personave me nevoja të veçanta, si dhe atyre me postë Vetëvendosje u konfirmua për katër vitet e ardhshme në udhëheqjen e Prishtinës dhe Prizrenit, transmeton Koha.net.

“Urime fitorja, qytetarë të komunave të Prishtinës e të Prizrenit! Sot festa është e kuptueshme, sepse e shmangëm një të keqe të madhe në dy komunat më të mëdha të Kosovës”, ka shkruar Kurti në Facebook.

Ai më tutje ka shtuar se, “prej nesër festa shndërrohet në punë, dhe ajo punë do të jetë jo veç shmangie e së keqes, por edhe ndërtim i së mirës. I së mirës me program e sipas ligjit. E mirë që duhet të jetë në shërbim të të gjithëve, edhe në shërbim të votuesve të partive të tjera”.

Kurti gjithashtu ka thënë se në tri komunat që Vetëvendosja udhëheqë do të qeveriset gjithnjë me qytetarin.

“Nga nesër Shpendi në Prishtinë, Mytaheri në Prizren, Qëndroni në Dardanë, do të jenë kryetarë të të gjithë qytetarëve e për të gjithë qytetarët, pa dallim moshe e gjinie, pa dallim feje, etnie e partie, pa dallim prejardhjeje e pasurie. Në këto tri komuna do të qeverisim gjithnjë me qytetarin në mendje e të cilin përgjithmonë e duam me zemër. Edhe një herë urime, me shumë dashuri’, ka shkruar ai.

Ahmeti: Nuk do të humbas kohë, sepse 100 punë i kemi

Pas numërimit të votave me kusht, me postë dhe personave me nevoja të veçanta, zyrtarët e Lëvizjes Vetëvendosje, përmes një konference për shtyp kanë konfirmuar fitoren e kandidatëve të tyre për kryetar të Prishtinës dhe Prizrenit

Deputeti i Lëvizjes Vetëvendosje, Dardan Molliqaj, tha se Vetëvendosje do të vazhdojë edhe për katër vitet e ardhshme të mirëqeverisë me Prishtinën, e cila sipas, tij do të vazhdojë edhe me qeverisjen e Prizrenit.

“Pas numërimit të votave me kusht dhe ato të diasporës, ne konfirmojmë fitoren e VV-së në Prishtinë dhe Prizren. Mirëqeverisja e Prishtinës do të vazhdojë edhe për katër vite. Po ashtu këtë qeverisje do ta vazhdojmë edhe në Prizren. VV do ta ç’kap këtë shtet nga pushteti që e ka kap”, ka thënë ai.

Ndërsa kryetari i komunës së Prishtinës edhe për katër vitet e ardhshme, Shpend Ahmeti ka falënderuar qytetarët e Prishtinës për një proces të rregullt e cila sipas tij që s’ka ndodhur asnjëherë më parë.

Ai theksoi se do të vazhdojë të luftojë korrupsionin si dhe do të vazhdojë reformat në qeverisjen e Prishtinës.

“Është koha e përmbushjes së 100 zotimeve dhe nuk dua të humbas kohë se 100 punë i kemi. Falënderim i shkon diasporës që nuk u ndal asnjëherë për të mirën e Kosovës”, potencoi Ahmeti.

Ai gjithashtu tha se synon që të krijojë koalicione me parti tjera politike, që ta ketë shumicën e Kuvendit Komunal në Prishtinë.

“Synojmë që të ndërtojmë shumicën e Kuvendit Komunal dhe për këtë do të bisedojmë edhe me partitë tjera politike. Në katër vitet e ardhshme pres koalicion stabil”, shtoi tutje Shpend Ahmeti.

Ahmeti ka ftuar të gjithë qytetarët që të vinë dhe të festojnë sonte në shesh, duke filluar nga ora 19:00.

Haskuka, kryetar i ri i Prizrenit edhe pas votave me kusht

Kandidati i Vetëvendosjes për kryetar të Komunës së Prizrenit, Mytaher Haskuka, është kryetar i ri i Komunës së Prizrenit, në bazë të rezultateve preliminare të KQZ-së

Ky konfirmim erdhi pas numërimit të votave me kusht, të atyre me postë dhe të personave me nevoja të veçanta, raporton Koha.net.

Kandidati i PDK-së, Shaqir Totaj, ndonëse pati më shumë vota në procesin e numërimit të votave me kusht, nuk ia doli të rrëzonte rezultatin e parë preliminar të KQZ-së për votat e rregullta.

Haskuka ka siguruar 329 vota në procesin e fundit të numërimit, ndërsa Totaj 368.

Shpend Ahmeti përfundimisht fiton garën

Në Prishtinë kandidati i Vetëvendosjes, Shpend Ahmeti, ka marrë më shumë vota më postë dhe me kusht sesa kandidati i LDK-së, Arban Abrashi

Nga votat që janë numëruar me postë dhe me kusht, Ahmeti ka fituar 861 vota, ndërsa Abrashi 733 vota.

Nga këto numërime përfundimisht Ahmeti e ka fituar mandatin për të udhëhequr me Prishtinën, por pritet certifikimi i rezultateve nga KQZ-ja.

Shpend Ahmeti afer fitores

Nga shtatë kuti të votave me kusht dhe kutia e votave me postë për rezultatin e Prishtinës, VV-ja ka marrë 676 vota ndërsa 549 vota për LDK-në. Apo 127 vota më shumë për VV-në

Shpend Ahmeti po vazhdon të jetë para Arban Abrashit edhe në votat me kusht dhe ato me postë. Në shtatë kutitë e numëruara, Ahmeti ka 364 vota më shumë se Abrashi, duke llogaritur edhe 237 votat e rezultatit preliminar.

Në shtatë kuti, Ahmeti ka marrë 676 vota, derisa Abrashi ka marrë 549 vota.

Ende pa u numëruar janë edhe rreth 500 vota.

Veteranët refuzojnë ftesën e Haradinajt për homazhe te varri i Rugovës

Kryeministri i Kosovës, Ramush Haradinaj, për nder të 28 Nëntorit – Ditës së Flamurit, bëri homazhe te shtatorja e Zahir Pajazitit dhe te varri i ish-presidentit të Kosovës, Ibrahim Rugova

Pas ceremonisë së vendosjes së luleve pranë shtatores së Zahir Pajazitit, Haradinaj teksa po përshëndetej me të pranishmit, i ftoi t’i bashkëngjiten për homazhe te varri i ish-presidentit Ibrahim Rugova, por si duket ata nuk iu përgjigjën pozitivisht ftesës së kryeministrit, raporton KP.

Haradinaj homazhet gjatë ditës i vazhdoi edhe në Prekaz te varrezat e familjes Jashari, e më pas do të vizitojë familjen Jashari.

Ndërsa homazhet që ishin paralajmëruar nga ora 13:00 e tutje janë anuluar për shkak të mbledhjes përgatitore në Korçë, njofton Zyra e Kryeministrit.

Numërimi i votave me kusht në Prishtinë, ja kush po prinë

Nga tavolina numër 6 e votave me kusht të numëruara për Prishtinën, 94 janë për VV-në, ndërsa 76 për LDK-në

Gjithsej 174 vota, VV 94, LDK 76 dhe 3 të pavlefshme.

Në një tavolinë tjetër, VV ka 68 vota ndërsa LDK 58, pastaj është edhe një rezultar ku Ldk ka 60 e VV 64 vota. Votat me postë i ka marrë thuajse të gjitha Shpend Ahmeti.

Numërohen votat me postë për Prizrenit, rezultat i papritur

Edhe votat me kusht, ato të personave me nevoja të veçanta dhe votat me postë për Prizrenin do të numërohen sot për ta nxjerrë kryetarin e kësaj komune

Për këtë komunë deri më tani janë numëruar votat me postë të cilat kanë nxjerrë një rezultat interesant.

Kandidati i Vetëvendosjes për Prizrenit i ka marrë të gjitha votat me postë, përderisa ai i PDK-së asnjë prej tyre.

Pas numërimit të këtyre votave, në proces të numërimit do të jenë ato me kusht.

Votat me postë i fiton Shpend Ahmeti

Tanimë kanë përfunduar numërimi i votave me postë, ku më shumti vota ka marrë Shpend Ahmeti i Lëvizjes Vetëvendosje

Ai ka marrë 89 vota, kurse, Arban Abrashi 6 vota me postë. Në këtë numërim ka qenë edhe një fletëvotim i pavlefshëm.

Kanë filluar të numërohen votat me kusht dhe ato të personave me aftësi të veçantë.

Gratz i kërkon Bosnjës heqjen e vizave për kosovarët

Përfaqësuesi i partisë social-liberale “Partia Jonë” (Nasa Stranka) në Parlamentin e Federatës së Bosnje e Hercegovinës, Dennis Gratz, ka kërkuar nisjen e procesit të heqjes së regjimit të vizave nga Bosnja për qytetarët e Kosovës

Gratz mendon se në vend të ‘deklaratave të zbrazëta’ për njohje e cila nuk mund të ndodhë pa mbështetjen e anëtarit të Presidencës që zgjidhet nga Republika e Serbisë, politika në Sarajevë duhet të veprojë drejt çështjeve konkrete – mundësimin e lirisë së lëvizjes mes qytetarëve të Kosovës dhe Bosnje e Hercegovinës, raporton agjencia e lajmeve “Fena”.

“Bosnja e Hercegovina, për shkak të kontekstit të mëhershëm specifik politik, praktikisht ka vendosur që të ndjek politikën e Serbisë në raport me Kosovën. Megjithatë, në praktikë, raportet me Prishtinën dhe Beogradin janë të qeta, dhe jemi ne ata që pengojmë”, ka thënë Gratz, transmeton Koha.net.

Ai shton se Kosova është një treg jashtëzakonisht i rëndësishëm i eksportit për Bosnjën dhe se mes qytetarëve të Bosnjës dhe të Kosovës ekzistojnë lidhje të pandashme biznesore, akademike e kulturore, por edhe lidhje të shumta familjare.

“Dhe përderisa politika zyrtare shpesh premton dhe flet për disa ndryshime të mëdha, unë do t’i lusja të nisin nga të voglat, të heqim regjimin e vizave me Kosovën”, ka kërkuar Gratz.

Përfaqësuesi i “Partisë Sonë” thotë se çështja e lirisë së lëvizjes nuk ka asnjë lidhje me atë që burokracia e quan “paragjykim në statusin e Kosovës”.

“Duhet ndërmarr ky hap sepse është në interes të bashkëpunimit ekonomik e shoqëror, dhe nuk i bën dëm askujt”, ka përfunduar Gratz.