Lajm.co

Haradinaj kërkon pastrim gjeneral të bërllokut, e quan turp të Kosovës

Kryeministri Ramush Haradinaj ka thënë se nuk është i kënaqur me gjendjen e ambientit në vend, ndonëse kanë marrë veprime. Këtë deklarim ai e ka bërë në Konferencën e Nivelit të Lartë mbi Zhvillimin e Qëndrueshëm, pjesë e së cilës është edhe shefja e zyrës së BE-së në Kosovë, Natalia Apostolova

Sipas Haradinajt, është koha e fundit që duhet të kuptohet rëndësia e ambientit për jetën. “Një punë që dua ta them sot dhe shpresoj se edhe Albena Reshitaj do të më ndihmojë së bashku me BE-në, KFOR-in, FSK-në e Policinë, në vjeshtë ta bëjmë një pastrim gjeneral kudo nga mbeturinat që janë hedhur në këto 20 vite dhe këto janë turpi Kosovës. Kam pas dëshirë ta bëjmë në pranverë por në vjeshtën e vonë nga shtatori deri në dhjetor kur bie vegjetacioni duhet t’i largojmë ato mbeturina”, tha Haradinaj.

Nataliya Apostolova, duke shprehur vazhdimin e përkrahjes BE-së për Kosovën me qëllim të përmirësimit të ambientit, përcolli tri mesazhe. Në këtë konferencë ajo po ashtu tha se Kosova duhet që të ndryshojë perceptimin e saj sa i përket mbrojtjes së ambientit.

“BE është investuesi më i madh në Kosovë. Më shumë se 15 milionë euro para të taksapaguesve janë investuar në 10 vitet e fundin në mjedisin. Kjo është njëra prej brengave më të mëdha që politika e energjisë në Kosovë duhet të vendoset në një kontekst më të gjerë dhe plan konkret”, u shpreh ajo, transmeton KsP.

Ministrja e Mjedisit dhe Planifikimit Hapësinor, Albena Reshitaj, tha se synim kanë përmirësimin e gjendjes në mjedis fuqizimin e planifikimit hapësinor, rritjen e qasjes së banimit të përballueshëm, fuqizimin e inspektoratit.

Ajo tutje shtoi se si ministre i ka vënë vetës mision që të pastrojë dhe të gjelbërojë vendin dhe për këtë ajo kërkoi rritje të buxhetit.

Ardhja masive e rusëve për pushime në Shqipëri, alarmon amerikanët

Heqja e vizave për qytetarët e disa vendeve të Lindjes për sezonin turistik ka alarmuar shërbimet e NATO-s të cilat kanë marrë në dorë të gjitha pikat kufitare të Shqipërisë

Siç bësohet nga burime në agjencitë ligjzbatuese, shërbimet sekrete të NATO-s por edhe Mossad-i izraelit do të vëzhgojë me kujdes turistët që mund të vizitojnë Shqipërinë gjatë verës.

Pak muaj më parë, qeveria shqiptare mori një vendim për të hequr vizat ndaj qytetarëve të Rusisë dhe disa vendeve lindore, ndër ta edhe të Lindjes së Mesme për sezonin turistik.

Sipas parashikimeve paraprake është menduar që një numër i madh rusësh të kalojnë pushimet në bregdetin shqiptar.

Në mënyrë jo direkte, të gjithë ata që do të hyjnë në pikat kufitare shqiptare do të kalojnë në një sitë të fortë kontrolli. Ky kontroll bëhet në dy rrugë: si indirekte por edhe në pikat kufitare.

Agjencive turistike shqiptare u është kërkuar që përveç emrave të njerëzve që kanë prenotuar pushimet, të dërgohen nga vendet ardhëse elementët identifikues të pasaportave, si dhe fotografitë.

Të gjitha do të shqyrtohen me hollësi nga analistët e agjencive inteligjente.

Nga ana tjetër, në pikat kryesore kufitare ku pritet të vijnë shumica e turistëve do të jenë edhe oficerë të posaçëm amerikanë që do të analizojnë çdo të dhënë.

Edhe zyra e Mossad-it në Tiranë mësohet se do të filtrojë të gjithë kontigjentin që ata e shikojnë të rrezikshëm.

Siç mësohet, shqiptarët të Republikës, por edhe të trevave që kanë marrë pjesë në luftën civile siriane shikohen me shqetësim nga Izraeli, kryesisht grupime që kanë rënë kontakt me segmentet iraniane në Siri, siç është brigada e Gardës Revolucionale e drejtuar nga gjenerali Qazim Sulejmani.

Qeveria shqiptare i ka kërkuar zyrtarisht Uashingtonit, gjatë vizitës së ministres së Mbrojtjes Olta Xhaçka, që në Shqipëri të instalohet një bazë e NATO-s për të parandaluar fluksin e elementëve që mund të destabilizojnë vendin.

NATO pritet që për të verifikuar nëse janë kushtet për ta hapur një bazë të tillë, kanë instaluar një zyrë analize në lidhje me të huajt që hyjnë në Shqipëri.

Ndërkaq, gjatë një vizite tjetër të znj. Xhaçka në Izrael, u ra dakord që shërbimi inteligjent izraelit të hapë një zyrë analize në Tiranë.

Nëse shërbimet amerikane do të arrijnë të dallojnë elemente që ushqejnë shqetësimin e Tiranës për ndërhyrje të huaj në vend, atëherë ka mundësi që Uashingtoni t’i hapë dritën jeshile vendosjes së një baze ushtarake të NATO-s në Shqipëri.

Pikat kufitare të Shqipërisë prej kohësh janë kthyer në zyra ku gëlojnë oficerët e huaj.

Në vitin 2014 e deri më sot atje punojnë oficerët gjermane për të parandaluar një largim të shqiptarëve për azil në Gjermani dhe po për të njëjtën arsye kanë mbërritur në pikat kufitare edhe oficerë të policisë franceze.

Me ardhjen e amerikanëve dhe izraelitëve, prania e policëve shqiptarë i jep atyre thjesht rolin e dispeçerisë, pra vetëm regjistrimin e të dhënave.

Nga 1 prilli në Shqipëri hyjnë pa viza qytetarët e Rusisë, Bjellrusisë, Kinës, Tajlandës, Bahrenit, Omanit dhe Katarit.

Uashingtoni ka shprehur disa herë shqetësimin se influenca ruse në Ballkan po vjen e po bëhet gjithnjë e më agresive, sidomos pas 27 prillit të vitit të shkuar, kur në Parlamentin e Maqedonisë u rrah Zoran Zaev dhe Zijadin Sela për të ndaluar zgjedhjet e Telat Xhaferit në krye të Kuvendit. /tesheshi.com/

Një koordinator për rasoj, aman!

Mbi paroditë e përditshme kosovare

Nga Enver ROBELLI

Është e vërtetë: puna ia siguron njeriut të rëndomtë ekzistencën (në disa vende, jo në Kosovë), puna ia mundëson njeriut të thotë se ka dinjitet (jo në Kosovë, sepse dinjiteti i njeriut shkelet çdo ditë nga çizmet e pushtetit), megjithatë ka punë që janë aq armiqësore ndaj njeriut, qytetarit taksapagues, saqë duhet mallkuar punën.

Për shembull çfarë pune është të jesh zëvendësministër në Kosovë? Për të shpjeguar këtë duhet filluar muhabetin në Zvicër. Ky shtet ka një problem: ka shumë para dhe i ka vetëm shtatë ministra. Asnjë zëvendësministër. Kosova nuk ka para, por ka miliona probleme dhe për çdo problem ka një ministër (mbi 20), për çdo nënproblem një zëvendësministër ose disa zëvendësministra (mbi 80), por tani, pasi Ramush Haradinaj, më në fund, i kaloi 100 ditë në post, është shpikur edhe një post i ri – koordinator për ndryshime klimatike, për sport (a hyn këtu edhe loja «gugjas»?), për ahishte dhe lajthishte, turshi, rasoj, sepse një popull që shampanjë e ka rasojin nuk bën pa një koordinator përkatës. Nëse fjalët e fundit të një poeti të dobët gjerman kanë qenë «Më shumë dritë», në Kosovë dilema shekspiriane do të jetë: «Më shumë koordinatorë apo më shumë rasoj»?

Përse jo edhe një koordinator nacional për çelikosje muskujsh, përse jo një koordinator nacional për koordinimin e të shtënave nëpër bankete, përse jo një koordinator nacional për bujtje në një hotel në St. Moritz, përse jo një koordinator nacional për marrjen me qira të avionëve privatë në relacionin Zürich-Engadin Airport (ata që kanë qenë në St. Moritz e dinë ku është Engadini), përse jo një koordinator nacional për eksplorimin e plazheve në bregdetin shqiptar, përse jo një koordinator nacional për shpjegimin e fjalisë «qenke bërë tërë rërë» në plazhin e Durrësit, përse jo një koordinator nacional për… për çka të doni…

A nuk e ka thënë historiani romak Gaius Sallustius Crispus se një shtet i cili nga pakujdesia nuk i respekton vlerat e veta dhe me terpillëk harxhon para nga arka e shtetit, një ditë do ta thyejë qafën, sepse shpëtim nuk ka. Meqë jemi te romakët: perandori Kaligula e pati bërë konsull një gomar, ndonëse edhe kjo nuk është aq e sigurt, sepse ka njerëz që thonë se Kaligula e bëri kosull kalin e tij, ndërsa gomari ende pret emërimin. Për shembull në Kosovë? A nuk ishte edhe Kosova provincë romake? A nuk është tani Kosova provincë e Vatikanit pas vizitës së fundit të padishahut gjokoist? A nuk ka Kosova tani partneritet strategjik me Vatikanin?

Ngutuni tani se na duhet edhe një koordinator për koordinimin e marrëdhënieve me Vatikanin. Kur në Jaltë (gjatë Luftës së Dytë Botërore) kryeministri britanik Winston Churchill i propozoi Stalinit një aleancë me Vatikanin, i cili bukur fort ia kishte mbajtur anën Hitlerit, kasapi sovjetik u përgjigj me cinizmin e tij të njohur: «Në rregull, por ju, zotërinj, e dini se luftërat fitohen me ushtarë, topa dhe tanke. Sa divizione i ka Papa?» Përgjigjen në këtë pyetje me siguri e di koordinatori kosovar për rasoj!

Shtrenjtimi astronomik i 200 llojeve të barnave për dy vjet

Rreth 200 lloje të barnave të listës esenciale të cilat për pacientët është e obliguar t’i blejë Ministria e Shëndetësisë, nga viti 2015 pësuan rritje të çmimeve nga 100 deri në 2000 për qind, shkruan sot Koha Ditore

Nga të njëjtat kompani, e me sasi të njëjta në vitet 2016 dhe 2017, ato janë pagur shumëfish më shtrenjtë. Ministria e Shëndetësisë në këta dy vjet asnjëherë nuk ka arritur t’i furnizojë institucionet shëndetësore me të gjitha produktet që janë pjesë e listës esenciale. Edhe tani shumë produkte të kësaj liste mungojnë, ndonëse buxheti i barnave për këtë vit është rritur për 8 milionë euro.

Një hulumtim i Institutit Columbus, i cili është prezantuar të martën, ka treguar se si dy vjetët e shkuar miliona euro të dedikuara për barna nuk i kanë mjaftuar Ministrisë së Shëndetësisë që të përmbushë asnjëherë furnizimin e rregullt dhe të plotë nga lista esenciale.

“Opozita duhet të marrë përgjegjësi në dialogun me Serbinë”

Nënkryetari i Lidhjes Demokratike të Kosovës (LDK), Agim Veliu, ka thënë se në fazën finale të dialogut me Serbinë secili institucion duhet të marrë pjesë në këtë proces

Në këtë intervistë dhënë për gazetën “Epoka e re”, Veliu ka theksuar se, përveç institucioneve shtetërore, një rol të jashtëzakonshëm në këtë proces duhet ta ketë edhe opozita. Ai ka thënë se LDK-ja si parti institucionaliste nuk lidhet shumë me emra se kush do ta udhëheqë dialogun me Serbinë.“Kjo është një prej çështjeve madhore që e kemi diskutuar në tryezë bashkërisht.

Siç po duket, kjo faza e fundit e dialogut final do të jetë një proces jo i lehtë për Kosovën. Ne si LDK edhe në këtë aspekt kemi qenë të hapur të diskutojmë në mënyrë që përgjegjësinë ta marrin edhe institucionet kushtetuese në bazë të përgjegjësive që kanë, por një rol të jashtëzakonshëm në këtë proces ta luajë edhe gjithë opozita”, ka thënë Veliu. Veliu ka mohuar mundësinë që brenda LDK-së të ketë ndarje të mëdha rreth asaj nëse duhet që presidenti Hashim Thaçi ta udhëheqë këtë proces.Sipas tij, qëndrimi zyrtar i LDK-së për këtë çështje do të përkrahet nga çdo zyrtar i saj.

Fëmijët, viktima të dhunës në familje, shkollë e rrugë

Shumë fëmijë vazhdojnë të jenë viktima të dhunës, qoftë në familje, shkolla apo në rrugë. Si pasojë e dhunës në familje, këtë vit është raportuar vdekja e një djaloshi 14 vjeçar

Në përgjithësi, sipas statistikave të organeve të rendit, si pasojë e dhunës, në vitin 2016 janë evidentuar katër raste, kurse në vitin 2017 pesë raste të vrasjeve të rënda në familje.

Ndërkohë që janë raportuar gjithsej 1269 raste të dhunës në familje gjatë vitit 2017 dhe 281 raste për periudhën janar –mars të këtij viti. Nga këto të dhëna, një numër i konsiderueshëm i viktimave të dhunës janë fëmijët.

Daut Hoxha, zyrtar për informim në Policinë e Kosovës bëri të ditur se bazuar në autorizimet dhe kompetencat që ka Policia e Kosovës në kuadër të fushëveprimit të saj, një rëndësi të veçantë i kushtohet edhe trajtimit të dhunës në familje, si në aspektin parandalues, po ashtu edhe trajtimit aktiv të rasteve që raportohen.

“Zyrtarët kompetent policor përveç aspektit parandalues, iu përgjigjen të gjitha rasteve të dhunës familjare të raportuara, duke iu dhënë prioritet këtyre rasteve dhe veprimet kryesore që ndërmerren, përveç ofrimit të ndihmës ndaj viktimave, përfshijnë edhe bashkëpunimin me subjektet tjera siç janë: Njësia për Mbrojtje dhe Përkrahje të Viktimave, Qendrat për Punë Sociale, Qendrat Mjekësore, Shoqata të ndryshme jo qeveritare që ofrojnë strehim etj”, tha Hoxha.

Në anën tjetër, Arbnora Kllokoqi, zyrtare në Koalicionin e Organizatave Joqeveritare për Mbrojtjen e Fëmijëve (KOMF) tha për Radion Evropa e Lirë, se tashmë kanë dërguar një letër kryeministrit të Kosovës, Ramush Haradinaj, duke kërkuar që të bëhet aprovimi sa më parë i projektligjit për mbrojtjen e fëmijëve, si dhe parashikimit dhe ndarjes së buxhetit të nevojshëm për këtë projektligj, në mënyrë që të gjejë zbatim efikas dhe të ndikojë në mbrojtjen dhe mirëqenien e fëmijëve në Republikën e Kosovës.

“Fëmijët në Kosovë po ballafaqohen me situata mjaft të vështira, ku po kanoset edhe siguria e tyre. Për pasojë kemi edhe rastet me fatalitet. Rasti i fundit që ka ndodhur në Kosovë është dhuna deri në vdekje, që kanë tronditur gjithë opinionin. Këto raste duhet nënkuptojnë alarm për Qeverinë dhe institucionet, familjet dhe gjithë shoqërinë. Për më tepër rreth 61.4 për qind e fëmijëve në Kosovë deri në moshën 14 vjeç, kanë deklaruar se kanë pësuar nga dhuna psikologjike apo fizike”.

“Duke u nisur nga ky fakt Koalicioni për Mbrojtjen e Fëmijëve – KOMF përmes një letre të hapur ka kërkuar edhe nga kryeministri që të rris vëmendjen ndaj këtyre ngjarjeve dhe sigurisë së fëmijëve dhe në të njëjtën kohë të adresojë me prioritet absolut sigurinë dhe mbrojtjen e fëmijëve në Kosovë, në kuadër të qeverisjes së tij”, theksoi Kllokoqi.

Sidoqoftë dhuna ndaj fëmijëve përpos në familje, është e shprehur edhe në shkollat e Kosovës, e që përbën një shqetësim të madh.

Në Policinë e Kosovës thonë se gjatë vitit 2017, janë raportuar 216 raste, ndërsa në periudhën e njëjtë të vitit 2018, janë raportuar 207 raste.

“Bëhet fjalë për të gjitha llojet e rasteve që kanë ndodhur në shkolla, apo përreth tyre. Në periudhën janar-prill 2017, janë evidentuar 58 raste të lëndimeve të lehta dhe 13 raste të lëndimeve të rënda trupore, ndërsa në periudhën e njëjtë të vitit 2018, kemi 43 raste të lëndimeve të lehta dhe 15 raste të lëndimeve të rënda trupore”, tha Daut Hoxha, zëdhënës i Policisë së Kosovës.

Të dhënat e organizatave për mbrojtjen e të drejtave të fëmijëve flasin për shkallë të lartë të dhunës së përdorur në familje, ku 61.4 për qind e fëmijëve deri në moshën 14 vjeç, kanë deklaruar të kenë pësuar nga dhuna psikologjike dhe fizike. 10.7 për qind e fëmijëve në Kosovë janë të përfshirë në punë përderisa 6.8 për qind e fëmijëve punojnë në kushte të rrezikshme.

Raportet qeveritare dhe joqeveritare tregojnë edhe për rritjen e përfshirjes së fëmijëve në sjellje që janë në kundërshtim me ligjin, përfshirë dhunën, pasojat e së cilës në disa raste kanë qenë fatale për vetë fëmijët. Vetëm gjatë vitit 2016, janë shqiptuar 1159 masa dhe dënime alternative ndaj të miturve në konflikt me ligjin.

Vuçiq si kurrë më parë: Mund të kemi kompromis të ‘dhimbshëm’ me Kosovën!

Presidenti i Serbisë, Aleksandër Vuçiq deklaroi se duhet të arrihet një kompromis përfundimtarë ndërmjet Prishtinës dhe Beogradit, në bisedimet që po zhvillohen në Bruksel

Në një intervistë për gazetën “Novosti”, ai theksoi se Kosova duhet ta kuptojë se nuk do të ketë të ardhme në rast se nuk ka marrëveshje që iu konvenon dy palëve.

Mirëpo, numri një i Serbisë u shpreh optimist se në një të ardhme të afërt shteti i tij do të mund të pranojë kompromise, edhe nëse të njëjta mund të jenë të ‘dhimbshme’ për dikë.

“… se Serbia është gjithçka, pa marrë asgjë, nuk është realiste e as e mundur. Është e vështirë që të dalim me një propozim të ri, sepse fuqitë e mëdha perëndimore thonë se çështja territoriale e Kosovës është zgjidhje që s’duhet diskutuar dhe ata nuk do të heqin dorë prej saj”, ka deklaruar ai, transmeton Indeksonline

Megjithatë, Vuçiq theksoi se Beogradi zyrtar duhet të përpiqet të gjej një alternativë se çfarë mund të fitojë.

“Si për serbët në Kosovë dhe Metohisë, por edhe për Serbinë, shumë njerëz e harrojnë këtë. Kjo nuk është vetëm një çështje e serbëve të Kosovës. Ata janë të rëndësishëm, mirëpo ne duhet t’i shikojmë edhe interesat e përgjitshme për banorët që jetojnë në Serbi”, deklaroi ai.

Shtypi gjerman: EULEKS-i nuk do t’i mungojë askujt

Shtypi gjerman i kushton vëmendje të posaçme situatës në Kosovë, largimit të Eulexit dhe rrugëve të reja të refugjatëve në Ballkan

“Ajo që pushtetmbajtësit kërkojnë kaherë në Kosovë do të ndodhë në qershor: Misioni i Eulexit do të largohet, por do të mbetet një mision i vogël këshillues”. Ministri i Drejtësisë Abelard Tahiri thotë se tani ata edhe vet mund t’i kryejnë këto punë. “Nuk kemi nevojë për një mision tjetër të huaj me të drejta ekzekutive”. Kështu fillon tekstin e tij në Neue Zürcher Zeitung gazetari Andreas Ernst.

„Eulexi ka qenë misioni më i madh i Bashkimit Evropian deri tani. Dikur ka pasur në Kosovë deri në 2000 policë, gjykatës dhe doganierë, ndërsa buxheti vjetor ka qenë rreth 200 milionë euro. Misioni është zvogëluar shumë herë, ndërsa aktualisht në Kosovë ka rreth 800 nëpunës, me një buxhet prej 60 milionë. Kosovarët e kanë përshëndetur ardhjen e Eulexit me shpresë se misioni do të vendosë barazinë para gjyqeve dhe do të mundësojë ndarjen e pushtetit. Pas heqjes së autonomisë së Kosovës në vitin 1989 nga autoritetet e Serbisë, në Kosovë nuk ka pasur shtet juridik. Ndërsa raporte demokratike nuk ka pasur as më parë. Misioni kishte paralajmëruar në fillim se do të ndiqen të gjithë, pavarësisht funksionit politik që kryejnë. Ato thoshin se do të peshkojnë edhe “peshq të mëdhenj”.

„Por shumë shpejt erdhi dëshpërimi. Proceset spektakolare munguan. Ankesat ndaj punës së Eulexit për mungesë aftësish dhe kompetencash u shtuan. Por edhe për pagesat e mëdha të personave që shumë pak i njohin rrethanat lokale. Kryetari i bashkisë në Prishtinë është ankuar se prokurorët e Eulexit nuk interesohen shumë për dokumentat e tyre që dëshmojnë korrupsionin në dhënien e tenderëve. Shumë shpejt erdhën edhe akuzat për korruptimin e vet Eulexit […] Shkrimet negative të mediave për Eulexin ishin po ashtu pjesë e fushatës kundër tij. Këtë fushatë e kanë nisur qarqet politike në Kosovë, por edhe opozita majtiste, e cila këtë mision e sheh si një instrument të represionit kolonialist.”

„Në verën e vitit 2014, prokurorja e Eulexit, Maria Barnie doli në opinion me pohimet për korruptimin dhe ryshfetin e marrë nga dy kolegë të saj nga mafia e Kosovës. Kjo rezultoi me kërkesën e raportit të detajuar. Juristi francez Jean Pole Jeake konstatoi se akuzat e saj janë të pabaza, por kërkoi reforma. Reformat përfunduan vetëm me ndërrimin e funksioneve dhe uljen e numrit dhe të kompetencave të autoriteteve të Eulexit.”

„Ish-shefi i sektorit ekonomik Andrea Kapusela ka shkruar në vitin 2015 një libër ku thuhet se prokurorët e misionit u kanë ikur hetimeve të ndjeshme, ku ishin të përzier edhe krerët e politikës. Ai konstaton se ky ishte çmimi i ruajtjes së stabilitetit politik në Kosovë. Me fjalë të tjera, ndjekja e denjë penale do të thoshte edhe ‘regime change’ (ndryshimin e pushtetit). Përfaqësuesit e BE nuk kanë dashur t’i futen këtij rreziku”, shkruan NZZ.

Rrugët e reja të refugjatëve

E njëjta gazetë shkruan edhe për rrugët e reja të refugjatëve që po krijohen në Ballkan dhe shqetësimet e Austrisë me këtë fakt. Kancelari Sebastian Kurz ka deklaruar se tani “po krijohet një rrugë e re e refugjatëve në Ballkan”. Refugjatët po kalojnë pëmes “rrugës shqiptare”, prej Greqisë nëpër Ballkanin Perëndimor e deri në Slloveni dhe Evropën Perëndimore. Gazeta citon autoritetet e Austrisë se rrugët do të mbyllen në mënyrë hermetike, në qoftë se vazhdohet me këtë intensitet.

„Në Austri kanë ardhur deri në mars të këtij viti rreth 4.000 persona që kanë kërkuar azil. Këto ta kujtojnë kohën e krizës së vitin 2015, kur në Austri kanë kërkuar gjatë gjithë vitit azil rreth 90.000 vetë.”

Ndërsa gazeta “Süddeutsche Zeitung” shkruan se qeveria e Austrisë po fokusohet tek çështja e refugjatëve dhe ndihmat sociale që duhet të jepen. Kancelari Kurz thotë se ata do të përpiqen të ruajnë sistemin social, sepse shumë persona vijnë atje vetëm për të kërkuar ndihma sociale.

Lekë Dukagjini ia vrau burrin – Princesha Jerina përfundon në manastir. Jeta tragjike e saj

Jerina Dushmani, padyshim ishte princesha më e bukur shqiptare, sipas rrëfimeve të historianëve. Të paktën, shkrimet e shekullit XV apo dhe më pas, tregojnë për një bukuri të rrallë, duke e krahasuar atë me Helenën e Trojës

Në fakt, edhe historia e tyre është paksa e ngjashme. Jerina ishte e bija e princit shqiptar Lekë Dushmani. Bukuria dhe historia e saj, që prej shekujsh u përcoll brez pas brezi, ka edhe tragjedi brenda saj. Bukuria e saj, ishte shkaku e konfliktit mes dy princave më të fuqishëm shqiptarë: Princit Lekë Dukagjini dhe Princit Lekë Zaharia.

Jerina u dashurua me princin Lekë Zaharia, por kjo zgjedhje e saj nuk u pranua nga Lekë Dukagjini. Duke dashur që të hakmerret, Lekë Dukagjini, vrau Zaharinë. Pas vdekjes së princit Lekë Zaharia, Jerina e Dushmanëve nuk pranoi të martohet me Lekë Dukagjinin. Ajo jetoi e mbyllur si murgeshë në ishullin e Sardenjës në Itali. Para vdekjes ajo la amanet, që trupi i saj të sillet në Danjë, pranë varrit të dashurisë së sajë të përjetshme, Princit Lekë Zaharia.

Kush ishte Lekë Zaharia?

Data e lindjes e Lekë Zaharisë nuk dihet, ndërkohë që ai vdiq më 1445. Ai ishte një fisnik shqiptar nga familja Zaharia. Ai ishte biri i vetëm i Koja Zaharias.

Lekë Zaharia ishte pjesë e fisnikërisë arbërore, një nga themeluesit e Lidhje e Lezhës dhe bashkëluftëtar i Skënderbeut. Ai mori pjesë në Kuvendin e Lezhës dhe ishte anëtar i Lidhjes Shqiptare. Vrasja e Lekë Zaharisë, i cili nuk kishte trashëgimtar, ngriti çështjen e trashëgimit të qytetit të rëndësishëm dhe zotërimeve të tij të Dejës. Venediku, duke bërë për vete nënën e të vrarit, u përgatit për të vënë dorë mbi këtë qendër të rëndësishme doganore.

Skënderbeu dërgoi pranë saj Vrana Kontin për ta bindur që ta vinte qytetin në mbrojtje të Lidhjes Shqiptare të Lezhës. Pushtimi i qytetit nga venedikasit dhe lajmet diskredituese që kishin përhapur ata se Skënderbeu kishte gisht në vrasjen e Lekë Zaharisë, u bënë shkak për shpërthimin e luftës që ndërmori Lidhja e Lezhës kundër sundimit të Venedikut mbi qytetet shqiptare.

Sipas Marin Barletit, në 1445 gjatë ceremonisë së martesës së motrës së Skënderbeut Mamica Kastriotit, ai pati një grindje me Lekë Dukagjini. Arsyeja e kësaj grindjeje ishte një grua me emrin Irenë Dushmani, nga familja fisnike e Dushmanëve.

Si duket ajo preferoi Zaharian, gjë e cila nuk u pranua nga Dukagjini. Në një luftim të ndodhur në dasmë Lekë Dukagjini mbeti i plagosur, dhe shpëtoi vetëm me ndërhyrjen e Vrana Konti. Më pas, Lekë Zaharia u vra në një pritë dhe Lekë Dukagjini u akuzua për këtë vrasje.

Gjykata Speciale dhe paralajmërimi i Halitit për “verën e nxehtë”

“Besoj se Haliti edhe vet i frikësohet Gjykatës Speciale, por para se kjo gjykatë të fillojë punën besoj se po përgatitin diçka kundër LDK-së, pasi dihet se Gjykata Speciale do merr në pyetje personat edhe për vrasjet e figurave të larta të LDK-së. Kosovën e pret një verë e nxehtë, e cila pritet të jetë vepër e Halitit dhe shokët e tij”, tha për gazetën “Bota sot”, analisti politik, Faton Mehmeti

Muajt e verës priten të jenë mjaftë të nxehtë për shumë çështje në Kosovë. Kështu lënë të nënkuptohen deklaratat e nënkryetarit të Kuvendit të Kosovës dhe anëtarit të Kryesisë së PDK-së, Xhavit Haliti.
Paralajmërimet e Halitit se brenda tre muajve do të qartësohet shumëçka në vend, kanë ngritur shumë mëdyshje. E, njëra prej tyre është se a do të fillojë Gjykata Speciale me ngritjen e aktakuzave të para.

Haliti këto deklarime i kishte bërë në një intervistë, të dhënë në njërin prej televizioneve vendore.
Gazeta “Bota sot”, ka dërguar pyetje me shkrim nënkryetarit të Kuvendit të Kosovës, Xhavit Haliti, për të marrë informata shtesë lidhur me paralajmërimin e tij, mirëpo ky i fundit ishte i paqasshem.

Lidhur me këtë çështje, gazeta “Bota sot” ka kontaktuar edhe Zyrën e Prokurorit të Specializuar (ZPS) të Gjykatës Speciale, e këta të fundit për gazetën kanë deklaruar se nuk i komentojnë deklaratat e politikanëve dhënë në media.

Deputetja nga radhët e opozitës thotë se keqpërdoruesit duhet të dalin para drejtësisë. Ndërsa, njohësi i zhvillimeve politike në vend konsideron se Kosovën e pret një verë e nxehtë, e cila pritet të jetë vepër e Halitit dhe shokëve të tij.

“Keqpërdoruesit para drejtësisë”

Deputetja e Lidhjes Demokratike të Kosovës, Valentina Bunjaku-Rexhepi, në një prononcim për gazetën “Bota sot”, tha se keqpërdoruesit duhet të dalin para drejtësisë. E, lidhur me deklaratën e Halitit, Bunjaku-Rexhepi thotë se nuk ka idenë se çka ka dashur të paralajmërojë nënkryetari i Kuvendit të Kosovës. “Nuk kam ndonjë ide se çka ka dashur të paralajmërojë zotëri Haliti. Veç një dua ta theksoj qe kush ka keqpërdorë në këtë Kosovë, le të del para drejtësisë”, u shpreh Bunjaku-Rexhepi.

Tutje, deputetja e LDK-së deklaroi se Kosova nuk ka kohë të humbasë më shumë me këtë qeveri, siç e quan ajo, të degraduar. “E potencoj se nuk ka Kosova kohë me humb kotë me këtë qeveri të degraduar”, ishte përgjigja e shkurtër e deputetes së Lidhjes Demokratike të Kosovës, Valentina Bunjaku-Rexhepi, për gazetën “Bota sot”.

Përgjigja e Gjykatës Speciale

Ekskluzivisht për “Bota sot”, Zyra për Informim e Gjykatës Speciale, përmes formës elektronike dha sqarime lidhur me këtë çështje. Nga Zyra për Informim e Gjykatës Speciale, thonë se nuk mund të spekulojnë lidhur me kontekstin e deklaratave të politikanëve dhënë në media. “Ne nuk mund të spekulojmë lidhur me kontekstin e deklaratave të politikanëve në media”, thuhet në përgjigjen nga Zyra për Informim e Gjykatës Speciale.

“Sa i përket pyetjes suaj lidhur me arrestimet – Ligji për Dhomat e Specializuara dhe Zyrën e Prokurorit të Specializuar si dhe Rregullorja e Procedurës dhe e Provave (të disponueshme në faqen tonë të internetit) rregullojnë procedurat në raste të tilla. Sidoqoftë, për të gjitha pyetjet rreth akuzave ose aktakuzave ju lutemi kontaktoni Zyrën e Prokurorit të Specializuar (ZPS), institucion i ndarë nga Dhomat e Specializuara të Kosovës, përmes zëdhënësit Christopher Bennett”, thuhet në përgjigjen e Gjykatës Speciale.

Zyra e Prokurorisë Speciale nuk ka dhënë detaje për kohën se kur mund të ngritën aktakuzat e para nga Gjykata Speciale. Gazeta “Bota sot” ka kontaktuar edhe zëdhënësin Christopher Bennett për të marrë ndonjë përgjigje lidhur me këtë paralajmërim dhe me datën se kur mund të ngritën aktakuzat e para.

Bennett në një prononcim ekskluzive për gazetën “Bota sot”,tha se nuk e komentojnë statusin e hetimeve për arsye ligjore, profesionale dhe etike. “Zyra e Prokurorit të Specializuar është i vetmi burim i besueshëm i informatave për punën tonë. Sidoqoftë ne nuk e komentojmë statusin e hetimeve tona për arsye ligjore, profesionale dhe etike”, është shprehur Christopher Bennett për gazetën “Bota sot”.

“Po përgatitet diçka kundër LDK-së”

Ndërsa, analisti politik, Faton Mehmeti, duke komentuar deklaratën e nënkryetarit të Kuvendit, tha se Haliti po paralajmëron diçka të frikshme për vendin. “Besoj se Xhavit Haliti po paralajmëron diçka të frikshme për vendin, mbase Gjykatën Speciale. Ose mund të ndodh që të del ndonjë individ si Nazim Bllaca, por që do të mund të akuzonte krerët e LDK-se për vrasjet e pasluftës, e gjithë kjo si mundësi që të jetë i paguar dhe përgatitur nga SHIK-u për të futur përçarje brenda kësaj partie. Pasi e ndan Lëvizjen Vetëvendosje, tani ia kanë mësyer përsëri LDK-së, e të cilët me intriga dhe shantazhe po mundohen që ta përçajnë përsëri”, është shprehur Mehmeti.

Tutje, Mehmeti thotë se Kosovën e pret një verë e nxehtë, e cila pritet të jetë vepër e Halitit dhe shokëve të tij. “Nuk përjashtohet asnjë mundësi nga deklarata e Halitit, nga këta njerëz pritet çdo gjë, por vetëm të mira jo. Besoj se Haliti edhe vet i frikësohet Gjykatës Speciale, por para se kjo gjykatë të fillojë punën besoj se po përgatitin diçka kundër LDK-së, pasi dihet se Gjykata Speciale do merr në pyetje personat edhe për vrasjet e figurave të larta të LDK-së. Kosovën e pret një verë e nxehtë, e cila pritet të jetë vepër e Halitit dhe shokët e tij”, shtoi për gazetën “Bota sot”, analisti politik, Faton Mehmeti.

Kujtojmë se kanë kaluar tre vite që kur Gjykata Speciale është themeluar nga Kuvendi i Kosovës. Kjo gjykatë do të hetojë krimet e ndodhura në Kosovë në periudhën 1998-2000. Më saktë është 3 gushti i vitit 2015, kur deputetët e parlamentit të Kosovës miratuan me shumicë votash ndryshimet kushtetuese, që kishin mundësuar themelimin e Gjykatës Speciale. 82 deputetë kishin votuar pro Gjykatës, 5 ishin kundër dhe një abstenoi.