Lajm.co

Asociacioni rrezikon ta paralizojë vendin nga brenda

“Asociacioni me kompetenca ekzekutive e bën Kosovën jofunksionale, ngase kemi të bëjmë me autonomi për serbët. Kjo nuk duhet të lejohet. Kosova mund t’i ketë kufijtë e përcaktuar por, nëpërmjet Asociacionit, Serbia do të jetë e pranishme në Kosovë dhe vendi do të paralizohet nga brenda”, thotë analisti politik Imer Mushkolaj

Në Bruksel, pritet që të fillohen bisedimet ndërmjet Kosovës dhe Serbisë me një temë jashtëzakonisht të ndjeshme për shqiptarët. Kësaj radhe, me kërkesën e Brukselit, raundi i ri i dialogut do të jetë vetëm për Asociacionin e Komunave me shumicë serbe. Por, një kërkesë të tillë Serbia e ka refuzuar. Autoritetet e Serbisë, përfshirë edhe përfaqësuesit politikë të serbëve të Kosovës, në vazhdimësi kanë insistuar që Asociacioni i Komunave me Shumicë serbe, duhet të ketë kompetenca ekzekutive.

Ndërsa, kryeministri i Kosovës, Ramush Haradinaj, ka theksuar se ky Asociacion do të formohet sipas Kushtetutës dhe ligjeve të Kosovës. Megjithatë, ende është e paqartë për qytetarët e Kosovës, se çfarë do të ndodhë me Asociacionin. Por, për një dialog të tillë po kërkohet të formohet një grup i unitetit në mënyrë me dialog mos të udhëheq presidenti Hashim Thaçi pasi opozita nuk po i beson. Anash kësaj, krijimi i Asociacionit me shumicë serbe do të jetë i frikshëm për Kosovën.

Çka do të humb Kosova me krijimin e Asociacionit?

Politologu Mentor Tahiri thotë se, Asociacioni i Komunave Serbe është de-facto një autonomi territoriale e ndërtuar mbi baza të vijave etnike, ashtu siç sugjeron në mënyrë eksplicite edhe vetë emërtimi.

“Në anën tjetër pavarësisht debatit të brendshëm politik që ngjallë krijimi i Asociacionit, ai është në fakt një kompromis politik i arritur qysh në vitin 2007 në bisedimet që i paraprinë përpilimit të Planit Ahtisaari, duke qenë edhe pjesë integrale e këtij plani. Mu për këtë ka edhe një asimetri në kompetencat që kanë komunat si njësi të pushtetit lokal. Komunat me shumicë etnike serbe të popullatës, qysh tani me ligjet e Kosovës kanë kompetenca në fusha si arsimi, kultura, shëndetësia, planifikimi hapësinorë dhe pjesërisht në politika financiare. Skena politike e Kosovës ka dështuar që opinioni t’ia transmetoj këtë si duhet, kurse ajo që do të ndodhë në të vërtetë me krijimin e asociacionit është bartja e kompetencave aktuale që kanë komunat me shumicë serbe në një trup të vetëm institucional si asociacioni”, thotë Tahiri për gazetën “Bota sot”.

Specifikat e termit ASK

Sipas tij, ajo që pala politike e Kosovës ka mundur ta evitojë, por këtë nuk e ka bërë në mungesë të pjekurisë dhe taktit politik, është vetë emërtimi eksplicit etnik i etnitetit në të cilin do të përshihen komunat me shumicë serbe.

“Jemi dëshmitarë në rastin e Bosnjë-Hercegovinës se si emërtimi një etnik “Republika Srpska” po bie ndesh me frymën integruese në të cilën ka shkuar ky shtet që nga përfundimi i luftës. Përfaqësuesit politik të Kosovës është dashur të jenë më të pjekur në këtë drejtim sa i përket emërtimit etnik, ngase nesër ky emërtim do t’i humb çdo kuptim konceptit qytetar mbi të cilin ekziston edhe vetë fryma kushtetuese në Kosovë”, përfundon politologu Mentor Tahiri.

Ndërsa, ish-kandidati i pavarur për president, Seremb Gjergji thekson se, asociacionet, jo vetëm një por disa janë të lejuara me ligje dhe Kushtetutë. “Por, termi Asociacioni i Komunave Serbe është i ndaluar. Kushtetuta e Kosovës është Multietnike, jo Mono-etnike. Ligjërisht, çdo asociacion i përgjigjet Kushtetutës dhe ligjeve të Kosovës”, thotë Gjergji për gazetën “Bota sot”.

Sipas tij, në Bruksel nuk e quajnë Asociacioni i Komunave Serbe, por vetëm Asociacioni. “NE këtë term e kemi kopjuar nga mediat Serbe. Ky asociacion mund të quhet Asociacioni i Komunave Multietnike apo vetëm Asociacioni”, pohon ai. Ai thotë se, fuqia ligjore dhe vendimmarrëse e secilit asociacion që krijohet, është lokale dhe nuk prekë kufijtë, hapësirën ajrore, ujore apo tokësore të vendit tonë. “Nëse dikush nga politikanët e Kosovës vepron në kundërshtim me ligjin dhe Kushtetutën dhe akordohet për diçka tjetër, atëherë është tradhti kombëtare”, thotë Gjergji.

Ish-kandidati për president thekson se, marrëveshja e parë për Asociacion e arritur në Bruksel është antikushtetuese dhe antiligjore dhe si e tillë është e papranueshme dhe pa e arsyetueshme. “Ata që insistojnë të aplikojnë të njëjtën, besoj se shumë shkelin mbi gjakun e luftëtarëve dhe të rënëve të Kosovës”, shton ai.

Gjergj tutje deklarohet se, për ta kthyer Asociacionin në Mono-etnicitet, duhet të ndryshohen Kushtetuta dhe 5 ligjet themeltare të Shtetit të Kosovës. Kjo sipas tij, do të ishte tradhti e madhe, duke menduar që në një pako do të ndryshonin edhe pika të tjera në Kushtetutë.

“Mendoj se një veprim i tillë është shumë i rrezikshëm dhe ndarja e Kosovës është e pashmangshme. Andaj, nëse nuk dëshirojmë ta shohim Serbinë tek ura e Ibrit, këtë model aktual të Asociacionit duhet ta kundërshtojmë e assesi as të diskutojmë për të – le ma ta pranojmë”, potencon Seremb Gjergji.

Ndërsa, analisti politik Imer Mushkolaj thotë se, ky asociacion me kompetenca ekzekutive e bën Kosovën jofunksionale, pasi nëpërmjet Asociacionit Serbia do të jetë e pranishme në Kosovë.

“Asociacioni me kompetenca ekzekutive e bën Kosovën jofunksionale, ngase kemi të bëjmë me autonomi për serbët. Kjo nuk duhet të lejohet. Kosova mund t’i ketë kufijtë e përcaktuar por, nëpërmjet Asociacionit, Serbia do të jetë e pranishme në Kosovë dhe vendi do të paralizohet nga brenda”, thotë analisti politik Imer Mushkolaj.

Rama beson në një zgjidhje të shpejtë ndërmjet Serbisë dhe Kosovës

Kryeministri Edi Rama, i cili ndodhet në Bruksel për samitin e NATO-s dha një intervistë për agjencinë serbe të lajmeve “Tanjug” ku ka shprehur pikëpamjet e tij në lidhje me ecurinë e negociatave mes Serbisë dhe Kosovës

“Unë mendoj se çdo gjë është në dorë të dy presidentëve dhe të dy palëve, sigurisht që Shqipëria është shumë e interesuar për të gjetur një zgjidhje dhe natyrisht që Shqipëria nuk flet kurrë në emër të Kosovës, por për Kosovën dhe sërish unë e di që këndvështrimi ynë nuk është se është i kënaqshëm, kur dëgjohet nga Beogradi, por opinioni ynë mbetet opinioni ynë me njohje të plotë dhe një zgjidhje përfundimtare do të ishte më e mira për fëmijët në Serbi, në Kosovë dhe në Ballkan”, thotë Rama.

“Unë shpresoj shumë se do të përfundojë së shpejti, unë i vlerësoj shumë përpjekjet e presidentit serb, Vuçiç, përpjekjet e vështira për të vazhduar në këtë proces dhe për të arritur një zgjidhje dhe ndërkohë që të gjithë janë në dijeni se ne kemi pranuar për mos të rënë dakord për të, sepse sipas këndvështrimit tim njohja e plotë mbetet e vetmja alternativë për të zgjidhur këtë çështje që ka zgjatur për një kohë të gjatë dhe e vetmja mënyrë për të lënë pas vështirësitë e të kaluarës së përgjakshme dhe konfliktuale”, deklaroi kryeministri në këtë intervistë.

“Nga këndvështrimi juaj në Beograd, Prishtina bën një hap para dhe dy hapa mbrapa. Edhe nga këndvështrimi i njerëzve në Prishtinë, Serbia bën një hap para dhe dy hapa mbrapa, gjë që tregon se dialogu nuk është i lehtë sepse është një dialog i vërtetë dhe shumë i vështirë”, theksoi ai.

“Kështu që, unë mendoj se të gjitha këto që po ndodhin janë pjesë e rrugës ku asgjë nuk do të jetë e lehtë, por sërish shpreh besimin se atje ku ka vullnet do të ketë një zgjidhje dhe në të njëjtën kohë përsëris se, unë e di që nuk është e lehtë për mikun tim, presidentin e Serbisë por njëkohësisht unë e respektoj për përpjekjet e tij dhe gjithashtu e respektoj për faktin që ai e ka njohur atë përfundimisht, duke qenë se kjo është një çështje që nuk mund të qëndronte në këto kushte dhe se të vazhdohet në mënyrën e vjetër nuk do të çonte askënd në një horizont të ri”, vazhdoi kryeministri.

“Sërish, unë do të doja të inkurajoja të dyja palët, për të vazhduar më tej dhe se ne e mbështesim dialogun dhe jemi në dijeni që nuk është i lehtë dhe shpresoj shumë që serbët në Kosovë dhe shqiptarët në Kosovë do të kenë një jetë më të mirë më vonë. Si dhe shpresoj shumë të shoh Shqipërinë të respektohet në Serbi ashtu siç serbët respektohen në Kosovë, që nuk është rasti, meqë ra fjala”, përfundoi kryeministri Rama.

Nismës Socialdemokrate i bashkohen dy deputetë

Nismës Socialdemokrate nga nesër pritet t’i bashkohen dy deputetë. Burime të Indeksonline brenda partisë së Fatmir Limajt bëjnë më dije se nesër në mëngjes Grupit Parlamentar të Nismës pritet t’i bashkohen dy deputetë

Kësisoj, Nisma nga gjashtë deputetë sa ka aktualisht do të numëroj tetë përfaqësues të popullit. “Tani për tani nuk mund të zbuloj se për cilët deputetë bëhet fjalë, por ajo që dihet është se nesër qysh në mëngjes do të bëhet zyrtarizmi i këtyre dy deputetëve që i bashkohen Nismës”, ka thënë për Indeksonline një burim i sigurt i Nismës në kushte anonimiteti.

Nisma ditë më parë ka mbajtur Kuvendin e Dytë të Punës. Kjo parti përveç postit të zëvendëskryeministrit udhëheq me tri ministri në Qeverinë e Kosovës.

Hahn ‘tremb’ mediat greke: Do të ndryshojnë kufijtë me Shqipërinë

Një deklaratë e komisionerit për Zgjerim Johannes Hahn është cilësuar nga mediat greke si e “çuditshme”. Gazeta “Kathimerini” shkruan se “komisioneri ka thënë në një konferencë në Londër se po të arrihet marrëveshja ndërmjet Shqipërisë dhe Greqisë, do të ketë edhe ristrukturim të kufijve”

Po të njëjtën deklaratë, gazeta “Proto Thema” e cilëson si “të pabesueshme”. Kjo gazetë e ka interpretuar në këtë mënyrë deklaratën e Hahnit: “Me pak fjalë, komisioneri ka paralajmëruar që në rast se negociatat Kotzias-Tsipras me kryeministrin shqiptar Edi Rama finalizohen, do të ketë ndryshim kufijsh.”

“Proto Thema” shton të thotë se kjo është një deklaratë tejet serioze dhe pritet me interesi reagimi i qeverisë greke dhe i Ministrisë së Jashtme greke.

Komisioneri Johannes Hann ka folur në konferencën me temë “Përtej Berlinit; Çfarë presim në dekadën e ardhshme për Ballkanin Perëndimor”, organizuar nga Instituti Mbretëror i Çështjeve Ndërkombëtare, ose siç njihet gjerësisht, Catham House.

Ndërkohë, këtë situatë e ka sqaruar zëdhënësi i Komisionerit, i cili iu përgjigj interesit të “Kathimerini”. “Në asnjë mënyrë komisioneri Hahn nuk i referohet një ndryshimi kufitar”, tha zëdhënësi.

“Duke theksuar nevojën për zgjidhjen e çështjeve të hapura dypalëshe përpara ndonjë zgjerimi të ardhshëm, ai u referohej bisedimeve të vazhdueshme greko-shqiptare mbi zonën ekskluzive ekonomike, e cila mund të arrihet vetëm në bazë të një marrëveshjeje të pranueshme reciproke mes dy vendeve,” shtoi ai.

Kroacia shkruan historinë, shkon në finale

Kroacia është në finale të Rusia 2018 pasi që ka mposhtur Anglinë më rezultat 2-1, pas 120 minutave lojë. Kroacia ka shkruar historinë. Kombëtarja kroate ka arritur në finale të një Botërori për herë të parë në histori të këtij shteti

Pjesa e parë fillojë më sulme të pareshtura të Anglisë dhe në minutën e katër, Modric shkaktoi faul.
E nga goditja e lirë një predhë u lansua nga Trippier që nuk i la asnjë mundësi Subasic për ta pritur.
Rezultati 1-0 që në minutën e pestë demoralizoi kroatët që filluan të organizojnë aksione që ndërpreheshin nga anglezët. Kane e pati një mundësi ideale për të shënuar në minutën e 29’të por Subasci veproi shumë mirë për ta pritur atë. Pjesa e parë përfundoi më rezultat 1-0 për Anglinë.

Në pjesën e dytë ndeshja fillojë ashtu sikurse kishte nisur, me anglezët që prapë kishin mundësi për të shënuar golin e dytë në minutën e 56’të, por prapë Subasic ishte në vend. Megjithatë posedimi i topit dhe gjysmëaksionet ishin të Kroacisë që nga fillimi i pjesës së dytë.

Perisic e kishte një mundësi të mirë për të barazuar në minutën e 65’të por pa sukses, Walker bllokoi goditjen e tij. Ky posedim ju shpërblye kroatëve të cilët arritën që në minutën e 68’të të barazojnë rezultatin. Vrsajlko bën një harkim të mirë dhe Perisic e shndërron në gol të bukur.

Kroacia ka mundur të kalojë në epërsi në minutën e 71 ku Perisic përsëri godet shtyllën pas një gabim të mbrojtjes angleze. Kroacia vazhdonte që ta mbante topin dhe lehtë mund të kishte shënuar edhe golin e dytë në minutën e 83, pas një goditje te Mandzukic. 90 minutat e rregullta përfunduan më rezultat të barabartë 1-1 dhe u deshën vazhdimet për ta përcaktuar fituesin e gjysmefinalës se dytë.

Pjesa e parë e vazhdimeve ishte më e mirë për Anglinë dhe ishte afër të shënuar në minutën e 98’të por Vrsaljko largoi topin me kokë nga vija e portës. Në pjesën e dytë prapë ishte Kroacia që dominojë dhe shënojë arriti që të shënon gol në minutën e 107’të.

E këtu ishte përvoja dhe mençuria e Mario Mandzukic që gjithmonë ka ditur që të shënojë në ndeshje të mëdha. Kroacia do të luaj në finale kundër Francës të dielën më 15 korrik, kurse Anglia ka edhe një ndeshje para se të udhëtojë në Angli pasi që të shtunën do të luan kundër Belgjikës për vendin e tretë!

Haziri: Qëndrimi i LDK-së ka evoluar, duam zgjedhje para fillimit të bisedimeve

Lutfti Haziri, nënkryetar i Lidhjes Demokratike të Kosovës (LDK), njëherësh kryetar i Gjilanit, ka thënë se qëndrimi i LDK-së ka ndryshuar, dhe kjo parti tash kërkon zgjedhje të reja parlamentare para fillimit të dialogut

“Kërkesa e LDK-së ka evoluar, duam zgjedhje politike para dialogut. Për kryesinë e LDK-së legjitimiteti i dialogut po vihet në pikëpyetje”, ka deklaruar Haziri në “Debat Plus” me Ermal Pandurin në RTV Dukagjini.

Nënkryetari i LDK-së ka thënë se në çdo tryezë të partive politike zgjedhjet kanë dalë si një prioritet.
“Sa herë që jemi ulë në tryezat e organizuara nga partitë politike, zgjedhjet kanë dalë prioritet, e tani të mos flasim për zgjedhje nuk është në rregull”, tha ai, përcjell Telegrafi.

Sipas tij, LDK-ja ka synim për të marrë pushtetin vetëm me zgjedhje dhe është logjike të kërkoj zgjedhje.
“Ne si LDK, nuk kemi asnjë kërcënim tjetër përpos me zgjedhje të marrim pushtetin”.

I pari i Gjilanit ka thënë se legjitimiteti në pikëpyetje i dialogut, duhet të shqetësoj institucionet.
“Legjitimiteti në pikëpyetje i dialogut, duhet të jetë një alarm, për institucionet qeveritare”, ka deklaruar Lutfi Haziri./Telegrafi/

Hekurudha kufiri i ri shqiptaro – serbë

Prolongimi i zgjidhjes së statusit rrezik si për ndarjen e Kosovës, ashtu edhe për Luginën e Preshevës. Kur u përurua aksi rrugorë Lluçan-Miratoc ( Kufiri me Maqedoninë ), të gjithë shprehën një dozë gëzimi. Politikanët lokal shqiptarë këtë projekt e cilësuan si një meritë dhe kontribut të tyre, kurse përfaqësuesit e Bashkësisë Ndërkombëtare dhe Qeveria serbe dhanë mjete të majme për realizimin e tij, ndërsa qytetarët ishin të lumtur ngase ju hap edhe një rrugë e re për qarkullim

Shkruajnë: Jeton Ismaili & Baki Rexhepi

Është fakt se ky ishte një aks rrugorë i dobishëm sa i përket aspektit infrastrukturorë, por në atë kohë askujt nuk iu kujtua prapavija politike e “ asfaltit të ri “. Shtyerja e zgjidhjes së statusit të Kosovës dhe paralajmërimi i negociatave të reja, që tani kanë filluar të hapin edhe çështjet mjaft të përfolura për vite më radhë ndër njerëz, -ndryshimin e kufinjëve ekzistues. Derisa dikur këto llafe ishin të përfolura vetën ndër qytetarë të thjeshtë, tashmë ato si duket janë pjesë serioze e propozimeve të kancelarive të qendrave të mëdha të vendosjes.

Ndarja dhe këmbimi i territoreve rrënjët i ka në Beogard

Nga ana tjetër, idea dihet se ku i ka rrënjët. Duke e patur parasysh faktin se Serbia nuk mund t’i mbaj nën kontroll mëse dy milonë shqiptarë në supet e saja, meqë janë një barrë e rëndë, pushteti serbë që moti kishte përgatitur plane për ndarjen e Kosovës.

Mbase, një projket i tillë ishte hartuar edhe nga ish-kryeministri serb, Zoran Xhinxhiq, të cilin vdekja e pengoi që atë ta promovonte publikisht para faktorit ndërkombëtarë. Madje, edhe vet akademiku serb, Dobrica Qosiq, i njohur për apetitet e tij nacionaliste, kishte pranuar se Zoran Xhinxhiq kishte një vizon të qartë dhe mjaft perfekt për ndarjen e Kosovës, gjë që sipas tij, një projketi të tillë nuk do t’i thoshte JO as Bashkësia Ndërkombëtare. Mirëpo, atentati ndaj ish-kryeministyri serb, Xhinxhiq, për një kohë e la anash idenë e ndryshimit të kufinjëve, për ta riaktualizuar tani, pas dështimit të miartimit të Rezolutës në KS të OKB-së për statusin e Kosovës.

Kërcënimi i Rusië për Veto ka trimëruar mjaft Beogradin zyrtar që ta ndiej vetën të fuqishëm në këto çaste, kur është në pyetje pozita e tij në Ballkan. Nga ana tjetër edhe pjesa dërmuese e Bashkësië Ndërkombëtare tashmë përflitet se ndryshimin e kufinjëve e sheh si një opcion real, duke patur parasyshë mos gatishmërinë e Prishtënës dhe Beogradit që të arrijnë marrëveshje nëpërmjet dialogut.

Shumë qarqe diplomatike dhe analitikë të ndryshëm nuk ngurrojnë të pohojnë se Veriu i Kosovës ( nga lumi Ibër, me Mitrovicën Veriore ) do t’i bashkangjitet Serbisë, kurse disa nga pjesët e mbetura me shumicë serbe në pjesën tjetër të Kosovës do të fitojnë një llojë vetëqevrisje të lartë lokale, si model i një autonomie substancilae. Ndërsa, shqiptarët si një “ kundërshpërblim “ do të fitojnë Luginën e Preshevës.
Mirëpo, është brengosë fakti, ngase deri më tash askush nuk ia ka shpjeguar opinioit se çka në të vërtetë nënkuptohet me territorin e Luginës së Preshevës, i cili do t’ bashkangjitet Kosovës?

Serbët kanë fituar betejën rreth Koridorit 10

Burime nga qartet diplomatike, organizatat me renome të lartë ndërkombëtare si dhe ato, të cilat janë ngushtë të lidhura me pushtetin serbë, kategorikisht mohojnë disa pohime se gjoja vetëm pjesa e Leposaviqit do të shkëputet nga Kosova, kurse Lugina e Preshevës si tërësi do t’i bashkangjitet Kosovës.
Këto burime, me një siguri të lartë thonë se skenari, i cili është duke u përgatitur është që si kundërvlerë për shkëputjen e veriut të Kosovës dhe vetqevrisjen e lartë lokale për serbët e mbetur, vetëm një pjesë e Luginës…. në të ardhmen të quhet Kosovë.

Për shkak të rëndësisë së Koridorit 10-të, serbët kanë arritur të sigurojnë mbështetjen e faktorit ndërkombëtarë që kjo pjesë të mbetet në kuadër të shtetit të tyre.Për këtë dëshmon edhe përkrahja që kanë siguruar në ndërtimin e bazës ushtarake “ Cepotin “, apo të qujatur ndryshe “ Bondstili serbë “ si dhe ndërtimi i kompleksit të binesit “ Interspeed “, në kufi me Maqedoninë.Tek projketi i fundit, madje është shprehur publikisht gatishmëria e Serbisë për ta ndërtaur atë, e cila i dërgoi edhe forcat e Xhandarmërisë në lokacionin ndërtimor për t’u ballafaquar me aktivitet e ndërmmara për pengimin e punëve që koinistonin me konkluzat e Kuvendit Komunal në Preshevë.

Burimet tona, të cilat me çdo kusht dëshirojnë ta ruajnë anonimitetin, shumë qartë sqarojnë se si do të vajnë punët rreth ndarjes, kësaj here edhe të Luginës së Preshevës. Krijimi i Komunave të Tërnocit, Stacionit Hekurudhor-Preshevë dhe Banjës së Sijarinës copton Luginën… Mundësia e ndryshimit të ligjit zgjedhorë, aplikimi i sistemit të shumicës në zgjedhjet lokale, fillimisht do të reflektohet me mos arritjen e marrëveshjes për ndarjen e njësive zgjedhore. Duke e pasur parsyhë këtë si dhe përçarjet brenda faktorit politik shqiptarë do të intervenojë qeveria serbe, duke shpallur tri komuna të reja, atë të Tërnocit, Stacionit Hekurudhor të Preshevës dhe Banjës së Sijarinës .

Komunave të reja do tu bashkangjiten të gjitha vendbaimet, të cilat janë në anën e djathtë të hekurudhës, dmth, të cilat janë jashtë korridorit 10-të, ndërsa Banjës së Sijarinës fshatrat shqiptare të komunës së Medvegjës. Në këtë rast, fshatrat e banuara me shqiptarë, të cilët janë në anën e majtë të korridorit-10-të si: Bilaçi, Somolica, Negoci, Bushtrani, Lerani, Golemidolli, Gerajt, Çukarka, Bukuroci dhe Zhunica do të mbesin pjesë e komunave ku shqiptarët do të jenë pakicë dhe të cilat do të qeverisen nga serbët.

Bujanoci do t’i takojë Serbisë

Qyteti i Bujanocit do të jetë përsëri qendra komunale, por kësaj here do të qeveriset nga serbët, kurse shqiptarët do të jenë pakicë, ngase do të krijohet komuna e Trënocit, me qendër në Tërnoc dhe me këto vendbanime tjera: Turinë, Lluçanin, Konçulin, Dobrosinin, Bresiqin, Nesalcën, Letovicën, Maltërnocin, Breznicën, Muhocin si dhe fshatrat e Malësisë së Bujanocit.

Ndërkohë, vendbanimet shqiptare, të cilat do t’i takojnë Kosovës, aksin rrugorë Lluçan-Miratoc ( që e përmendëm në fillim të tekstit ) do ta kanë të vetmin në dispozicion për rrugëtimin e tyre në Maqedoni.

Krijimi i komunave të reja, sipas burimve tona, do të krijoj një realitet krejtësiht të ri. Përfudnimi i zgjidhjes së çështjes së Kosovës, i cili parashihet të bëhet me organizimin e një Konference Ndërkombëtare do t’i ketë parasyhë këmbimet midis Veriut të Kosovës dhe pjesës së Luginës së Preshevës. Duke pasur parasyshë reagimet që mund të pasojnë për shkak të “ vizatimit “ të rinj të kufinjëve në Ballkan, diplomacia që tani po punon që kjo çështje të kaloj fshehurazi.

Kështu që, në anekset e Marrëveshjes, nuk do të figurojë termi këmbim territori, por demarkacion i kufirit ( si në rastin me Maqedoninë ), për t’iu shmangur kështu efektit zinxhiror që mund të pasojë me shqiptarët e Maqedonisë dhe serbët e Bonjes.

Zhvendosja humanitare e popullatës tejet e dhimbshme

Pa dyshim, edhe burimet tona pajtohen, se humbësit më të madh me rastin e këmbimit të territoreve do të jenë shqiptarët. Ngase, ata përveç humbjes së korridorit 10-të do t’i pres edhe zhvendosja humanitare. Kështu që siç parashhohin burimet tona, nga periudha pas mbajtjes së Konferencës Ndërkombëtare për Kosovën e deri në një afat kohor prej dy vitesh, shqiptarët e pjesës së majtë të kooridorit 10-të do të shpërngulen në Kosovë, saktësisht në zonat, të cilat tani janë të banuara me serbë në Kosovën Qendrore dhe Anamoravë, kurse serbët e këtyre vendbaimeve do të vendosen në trevat shqiptare nga Bilaçi deri në Strezoc.

Burimet tona theksojnë se zhvendosja nuk do të jetë e dhunshme, por ajo do të behet detyrimisht nga shqiptarët, ngase atyre do të mbyllen të gjitha perspektivat në Serbi. Përveç diskrimkinimit ekonomik, ata nuk do të kenë mundësinë e shkolllimit të mesëm, ngase nuk do të kenë numër të caktuar nxënësish për themelimin e një shkolleje , kaudri mësimorë do të mungojë gjithashtu, në aspektin shëndetësorë do të mungojë personeli adekuat për trajtim, kurse për shkak të bazës ushtarake “ Cepotin “ ana e majtë e korridorit do të militarizohet aq shumë saqë shqiptarët e mbetur mund të jenë të ekspounar edhe ndaj provokimeve të çdoditshme. Të gjitha këto do të çojnë në zhvendosjen e shqiptarëve si dhe në këmbimin e pronave me serbët e mbetarur në zonat e lartë theksuara të Kosovës.

Spektri politik shqiptarë i Luginës i pafuqishëm –rreziku nga epshet e pangopura të politikanëve të etur për pushtet që humbjen klasike ta cilësojnë si fitore triumfale Nëse vërtetë vie deri tek kjo zgjidhje, të cilën e parashikojnë burimet tona të informuara mirë, është fakt se shqiptarët e Luginës së Preshevës vërtetë do të jenë humbës më të mëdhenj. Edhe pse spektri politik shqiptarë, sidomos tek ne nuk është fare në këtë “ lojë “, ai nuk është në gjendje as të ndërmarrë diç.

Shumë herë deri më tash klasa jonë politike ka dëshmuar se është mjaftë e paaftë për ti zgjidhur edhe problemet më të vogla, e lërë më çështjet më madhore. Dëshmi për këtë është mosgadishmëria e formimit të Këshillit Nacional, etj.
Por, mbi të gjitha se në një rajon me 70.000 banorë kemi 10 parti politike shqiptare ,flet më së miri për “ unifikimin e qëndrimeve “.

Këtë përçarje më së miri mund ta shfrytëzojë pushteti serbë, duke i realizuar skenerat e veta në mënyrën më perfekte. Rreziku tjetër mund të vie nga një pjesë e subjekteve politike shqiptare, të cilët edhe përkundër humbjes katastrofike të territoreve, me etjet e tyre të pangopura për pushtet,bashkangjitjen e një pjese të territorit të Luginës së Preshevës –Kosovës do ta vlerëosjnë si një triumf të madh.

Megjithatë, është momenti i fundit që faktori politik shqiptarë në Luginë… të unifikohet dhe t’i hap sytë mirë kundrejt këtyre lojërave të rrezikshme, të cilat po zhvillohen fshehurazi në korriz të popullatës shqiptare.
Në rradhë të parë, duhet që në asnjë mënyrë mos t’ju prijë deklarimeve, të cilat rrezikojnë pavarësinë e Kosovës në kufinjtë aktual. Por, nëse ndryshimi i kufinjëve është i pashmënagshëm, atëherë assesi nuk duhet lejuar që edhe Lugina të ndahet. Ajo ose në tërësi duhet t’i takojë Kosovës, ose më mirë të mbetet ashtu siç është, por me një status të veçantë të garantimit të të drejtave të shqiptarëve.

Nuk guxon askush të luaj as me gjakun e dëshmorëve të të gjitha luftërave, të cilët u flijuan, por nuk guxon të luhet as me djerësn dhe mundin e baballarëve dhe stërgjyshëve tanë që për vite ndërtuan rrugë e hekurudha, fabrika e uzina, e tash për një moment tërë këtë pasuri ta gëzojë tjetër kush, kurse viset shqiptare të ngelin vetëm rrëzë maleve, të cilat edhe ashtu po digjen.

VV: Çështjet kombëtare as nuk shuhen dhe as nuk marrin zgjidhje përfundimtare me integrimin në BE

Lëvizja Vetëvendosje ka organizuar sot në Tiranë tryezën e dytë me titullin “Shqiptarët dhe integrimi evropian”, si vazhdim i tryezës të mbajtur më 15 maj 2018 në Prishtinë me po të njëjtin titull e temë

Ashtu si në Prishtinë, edhe në këtë tryezë morën pjesë akademikë, studiues, artistë, gazetarë, aktivistë të shoqërisë civile, profesionistë të fushave të ndryshme dhe përfaqësues të subjekteve politike, bëhet e ditur përmes një komunikate për media, transmeton Koha.net.

Më tutje bëhet e ditur se Tryeza u hap nga kryetari i Vetëvendosjes, Albin Kurti, i cili, ndër të tjera, shpjegoi edhe 5 konkluzat e dala nga tryeza në Prishtinë: (1) nevoja për një proces integrimi që shihet e vlerësohet si proces i bërjes anëtar dhe jo i vajtjes në BE; (2) rëndësia strategjike e integrimit të njëkohshëm të vendeve të Ballkanit Perëndimor; (3) zhvillimi ekonomik dhe drejtësia si prioritet; (4) harmonizimi i një politike të jashtme të përbashkët Shqipëri-Kosovë dhe e shqiptarëve në përgjithësi; dhe (5) puna me pesë shtetet anëtare të BE-së që ende nuk e njohin Kosovën.

Pjesëmarrësit e tryezës në Tiranë shprehën dakordësinë me konkluzat e nxjerra nga tryeza në Prishtinë, duke shtuar edhe konkluza të tjera si në vijim:

1. Çështjet kombëtare as nuk shuhen dhe as nuk marrin zgjidhje përfundimtare me integrimin në BE. Rasti aktual i Katalunisë në Spanjë është shembull që e vërteton këtë fakt.

2. Një nga pengesat më të mëdha të integrimit të shqiptarëve në procese më të gjera, përfshirë atë në BE ka qenë statu quo-ja në përfaqësimin politik shqiptar, e cila duhet të ndryshojë duke ndryshuar edhe cilësinë e përfaqësuesve në Parlamente.

3. Keqkuptimi dhe keqinterpretimi i Bashkimit Evropian vetëm si proces teknik nga jashtë dhe si mbikëqyrje formale standardesh nuk e ka lejuar shoqërinë shqiptare të shprehet aktivisht në bazë të elementeve dhe aftësive përbërëse të integrimit.

4. Një nga shtysat më të rëndësishme të integrimit evropian nis me njohjen sa më të plotë të aftësive si kolektivitet kombëtar, dh jo si përdorim instrumental i aktorëve civilë, politikë dhe ndërkombëtarë.

5. Bashkërendimi dhe bashkimi i tregjeve dhe prodhimeve të Kosovës e Shqipërisë.

6. Integrimi kulturor mbarëkombëtar është domosdoshmëri që duhet të realizohet paralelisht me integrimin evropian.

7. Platforma e çështjes kombëtare nuk mungon, siç këmbëngulet në të folurin mbizotërues, por ajo është shpallur që në Lidhjen e Prizrenit, ndaj sot nuk duhet të reduktohet në ekskluzivitet qeveritar, por në një akt të përbashkët intelektual politik.

Në të dy tryezat e organizuara deri më sot për këtë temë, nga Lëvizja Vetëvendosje, është dalluar qartë nevoja e madhe që kanë shqiptarët për të diskutuar hapur e përmbajtësisht lidhur me integrimin evropian, përtej formulave gjuhësore të ngurta e të përcipta, teknike dhe burokratike, që përdoren shpesh për këtë temë nga elitat politike shqiptare dhe zyrtarët e BE-së në vendet tona. Ne do të vijojmë të mundësojmë diskutimin pa komplekse sipas idesë dhe jo sipas interesave të ngushta që e zhbëjnë vetë politikën.

Familja Geci nga Llausha akuzon Hashim Thaçin

Familja Geci ka kohë që kërkon ta dij autorin që ka shkruar Komunikatën nr.59 në emër të Shtabit të Përgjithshëm të UÇK-së

Postimi i plotë:

Të nderuar qytetarë të Republikës së Kosovës edhe sot me datën 11.07.2018 në orën 16:13 kemi marr konfirmim të fuqishëm nga gazetari dhe deputeti Milaim Zeka, se komunikatën nr.59 në emër të shtabit të përgjithshëm të UÇK-ës e kundër vllaut tonë Gani Gecit dhe familjes sime e ka shkruar me dorë të vet Hashim Thaçi.

Sipas tre dëshmitarëve që Milaim Zeka i përmend me emër dhe mbiemër:1.) Jakup Krasniqi2.) Rexhep Selimi3.) Fatmir Limaj, Komunikatën nr.59 e ka shkruar Hashim Thaçi. Sipas Milaim Zekës,Hashim Thaqi ia ka lexuar Rexhep Selimit në telefon satelitor komunikatën nr.59 dhe Rexhep Selimi i ka thënë Hashim Thaçit se këto shpifje unë nuk i përkrah ndërsa Hashimi ka thënë „ e di por po du me ja fut“.

Edhe Jakup Krasniqi zëdhënësi i UÇK-së edhe Fatmir Limaj e kanë konfirmuar të njejtën gjë se Komunikatën nr.59 e ka shkruar Hashim Thaçi.

Tani e tutje me personin që e ka shkruar Komunikatën nr.59 në emër të Shtabit të Përgjithshëm të UÇK-së do të ballafaqohemi në të gjitha instancat gjyqësore vendore dhe ndërkombëtare. Unë Fadil Geci, disa ditë pas publikimit të kësaj komunikate (në fund të 1998-ës) kam shkuar në shtëpinë e Hashim Thaçit në Burojë dhe kam kërkuar nga Haxhi Thaçi që të kontaktoj djalin e tij Hashim Thaçin dhe të sqarohemi se çfarë argumentesh ka për vëllaun tim dhe kush e ka shkruar këtë komunikatë.

Vëllau i Hashim Thaçit, Gani Thaçi më ka thënë se do të kontaktojmë brenda një muaji dhe do të përgjigjemi, por nuk u përgjigjën kurrë. Për familjen tonë dallimi në mes të atij që e ka shkruar komunikatën nr.59 dhe Sllobodan Millosheviqit është vetëm gjuha, Millosheviqi fliste serbisht ndërsa shkruesi i komunikatës fliste shqip dhe mendonte serbisht.

Ne emer te familjes Geci
Fadil Geci

A do të shtyhet liberalizimi për vitin tjetër

Pas deklaratës së Komisionerit Johannes Hahn, se raporti i Komisionit Europian për vizat do të publikohet para pushimeve të verës, Ministrja e Integrimeve Evropiane, Dhurata Hoxha, ka thënë se institucionet e Kosovës i kanë përmbushur obligimet e veta karshi BE’së. Por, ajo, nuk ka pranuar të thotë se Brukseli ka vonuar Kosovën duke e vonuar publikimin e raportit për vizat

Komisioneri Johannes Hahn, ka thënë të martën se raporti i Komisionit Europian për liberalizimin e vizave do të publikohet para pushimeve të verës. Ndërkohë që të martën, me 10 korrik, është paraparë që ky raport të jetë pjesë e rendit të ditës në Komitetin LIBE të Parlamentit Evropian, por kjo gjë nuk ka ndodhur, pasi nuk ka ardhur ende njoftimi nga Komisioni Evropian se Kosova i ka përmbushur të gjitha kriteret.

Ministrja e Integrimeve Evropiane, Dhurata Hoxha, ka thënë se institucionet e Kosovës kanë përmbushur obligimet e veta karshi BE’së. Ndërsa tani e tutje i mbetet kësaj të fundit që të konfirmojë këtë përmbushje në një raport, i cili pritet të publikohet para pushimeve të verës.

“Institucionet e Republikës së Kosovës kanë përmbushur obligimet e veta karshi BE-së duke përmbushur të gjitha kriteret për liberalizimin e vizave. Tash i mbetet BE-së që të konfirmojë këtë përmbushje në një raport që siç ka thënë edhe Komisioneri Hahn, pritet të publikohet para pushimeve të verës”, ka thënë Hoxha.

Ndërsa sa i përket vonesës së këtij raporti, Hoxha ka thënë se Kosova është ajo që është vonuar me ratifikimin e kufirit me Malin e Zi, ndërsa institucionet e BE’së e kanë kryer punën e tyre ngjashëm sikurse me vendet e rajonit, të cilat tashmë gëzojnë lëvizjen pa biza në zonën e Schengenit.

“Nëse flasim për vonesa, atëherë duhet përmendur që jemi ne që jemi vonuar me ratifikimin e marrëveshjes së kufirit me Malin e Zi, ndërkohë që institucionet e BE-së kanë kryer punën e tyre pothuaj ngjashëm sikurse kanë vepruar me vendet e rajonit, të cilat tashmë gëzojnë udhëtimin pa viza në hapësirën e Schengenit”, ka theksuar Hoxha.

Ajo gjithashtu ka thënë se nuk duhet harruar se procesi i konsultimeve të brendshme dhe votimit në Parlamentin Evropian është proces politik dhe duke ditur se është i tillë nuk mund të flasim për vonesa, por për procedura të brendshme të këtij institucioni.

Hoxha po ashtu ka shpjeguar se pas votimit në Parlamentin Evropian, pro liberalizimit, atëherë kjo çështje hidhet te Këshilli për Çështje të Drejtësisë dhe të Brendshme, në të cilin ulen ministrat e brendshëm dhe ata të drejtësisë, të vendeve anëtare të BE-së.

Këshill ky, i cili takohet 6 herë në vit dhe zakonisht takimet mbahen në tetor dhe në fund të nëntorit, ose në fillim të dhjetorit. Gjithashtu ajo ka thënë se duhet pasur parasysh që publikimi i raportit pozitiv nga Komisoni Europian është motori që vë në lëvizjë si Parlamentin Evropian, po ashtu edhe Këshillin.