Lajm.co

Driton Selmanaj: Me emërimin e Shpend Maxhunit në AKI po konsolidohet kapja e shtetit

Deputeti i Lidhjes Demokratike të Kosovës, Driton Selmanaj, ka reaguar lidhur me emërimin e Shpend Maxhunit në postin e drejtorit të Agjencisë Kosovare të Inteligjencës (AKI)

Selmanaj ka thënë se me emërimin e Maxhunit, në postin e drejtorit të AKI-së Thaçi dhe Haradinaj po tregojnë se nuk po duan ta ç’kapin shtetin sipas tij në këtë mënyrë kapja e shtetit po konsolidohet.

“Pse Raporti i Progresit thotë se institucionet e Kosovës janë të kapura. Para dy orëve presidenti së bashku me kryeministri emëron Shpend Maxhunin drejtor të AKI-së, ne kërkonim që Maxhuni të shkarkohet për shkak të përfshirjes së tij në arrestimin e gylenistëve dhe çka ndodhë Thaçi dhe Haradinaj na tregojnë se le që se kemi ndërmend me e ç’kap shtetin por kapja e shtetit po konsolidohet”, ka thënë ai gjatë seancës së Kuvendit të Kosovës.

Maxhuni më herët kishte qenë drejtor i Përgjithshëm i Policisë së Kosovës, ndërsa do ta zëvendësojë Driton Gashin në postin e drejtorit të AKI-së i cili dha dorëheqje pas kërkesës së Haradinajt për shkarkim lidhur me rastin e gjashtë gylenistëve.

Kush është biri i kurv*s, i nënës dhe i njerkës?!

Nga Andrea Danglli

Sa “argëtuese”! Dhjetëra burra dhe gra të veshur fisshëm kanë mësyrë nëpër ekrane televizive për të gjetur se cili është “bir ku*ve”, cili është “bir nëne” dhe cili “bir njerke”.

Mes përleshje fjalësh, “mendjet e zgjuara” të atdheut po analizojnë çdo shtrat politik se ku kanë fjetur dhe ku janë zgjuar ata që njëherë pështyhen, njëherë kafshohen, pastaj puthen, lëpihen, më vonë lëmohen, shtrëngohen dhe në fund mbushin valixhet dhe i nisin atje ku të nderojnë me titullin “bir ku*ve” nëse i çon pa gjemb në këmbë.

Kjo është tabloja e parë që më dha mbrëmja e së enjtes depresive që ca mezi e presin të vijë dhe ca mezi e përtypin të ikë.

Realisht, përpos dëshirës, sado që u përpoqa, nuk munda të kuptoj dot konkluzionet që dolën prej tyre dhe sa i shërbyen këto debate publikut shqiptar.

Jam kureshtar të di se çfarë mundi të përfitojë ai që interesohet për politikat ekonomike, iniciativat integruese, projektet kulturore, shërbimet shtetërore, implementimi i reformave, ushqimet e shportës, portofoli familjar, etj…

Për të mos folur pastaj se ç’i hyn në xhep kjo “gam-gam-ekran”, atij që numëron thërrimet e kotheres mbi tryezë dhe peshon kokën mbi duar për gjetur zgjidhjen se si mund të fshijë ndonjë radhë në listën e borxheve.

Kërkuan për birin e nënës së “mirë” dhe ndokush do mendojë që s’ka ndonjë qeder të madh, por ama duhet të kujtojmë dhe kuptojmë se misioni i Parlamentit nuk ka lidhje me zhvendosjen e karriges së deputetit nëpër studio televizive dhe hajde të bilbilosim ndonjë frazë për t’u dukur interesant. (majtas, djathtas apo qendrës qoftë)

Nuk jam aq naiv sa të mendoj se ata e kanë harruar detyrën, por ama s’mund t’i lejojmë që njëherë të veshin uniformën e politikanit, pastaj të gazetarit, pastaj të prokurorit, avokatit, gjykatësit, rojës së burgut dhe… “birit të kurv*s”.

Nëse bashkarisht do të realizonim një sondazh se sa është informimi publik mbi ligjet e miratuara së fundmi në Kuvend, unë jam i bindur që pjesa dërrmuese e popullsisë nuk e di. Disa do thuan “peshqit e mëdhenj”, ca “rekomandimi i KE-së” një pjesë “ujë, miell dhe vezë” dhe mjaft të tjerë “lironi kukësianët”.(I kuptoj)

Kjo vlen edhe për mjaft ligjvënës që ecin drejt dyerve të Kuvendit të pa informuar me teorinë e nxënësve rebelë të 9 vjeçares që “detyrat i bëj në 5 minutësh”. (Është e testuar)

Këtu nuk bëhet fjalë për faj të qytetarit të zakonshëm pasi ai/ajo ha çfarë i servir televizori dhe rrjedhimisht ngel i painformuar. Fjala është për papërgjegjshmërinë e politikës dhe medias që merren më shumë me pigmentin sesa cilësinë, më shumë me muret se sa çfarë ka brenda, më shumë me kostumin sesa me njeriun që e ka veshur.

Se cili ishte mesazhi i deputetit dhe ish-ministrit Saimir Tahiri pak rëndësi ka dhe s’përbën ndonjë interes të madh përpara çështjes së tij që duhet përpiluar me hodhësi dhe duhet garantuar që procesi i drejtësisë të përdorë një “peshore” të ngjashme me mjaft vende europiane të cilat i shohim si model.

Kjo e fundit është kryefjala që duhet të ketë çdo fjali e kësaj teme dhe jo investigimi banal për të gjetur se kush është “djali i mirë me mami të bukur”.

Debati i iniciuar për të gjetur se kush është “biri i kurv*s, i nënës dhe i njerkës” na largon tepërmi nga realiteti apo çështjet e ndezura për drejtësi të fortë, demokraci të shëndetshme dhe mirëqenie që për pjesën e gjerë të popullsisë është ku thërret e ulërin kiameti.

Logjika e ndjekur dukshëm na ka dërguar drejt situatës ku lloj-lloj gojësh e gjuhësh prodhojnë veç tym, mjegull dhe dioksid karboni që pushton edhe ato pak gjëra që po shihen qartë.

Thuhet se “ujqërit” këtë klimë duan dhe ne mirë-keq s’bëjmë dot pa ta. Duket sikur na mbrojnë kur në fakt kanë zhveshur lëkurët tona dhe presin të shqyejnë çdo kënd që i bllokon udhët. (Thjesht e vërteta)

Teksa po largohej e enjtja dhe po gdhinte e premtja i hoqa këto mendime dhe fika televizorin tim llafazan para se ai të më fikte mua! E dini? Ekrani është bir kur*ve…

P.S; E vetmja mënyrë për të mos u depresionuar nga klima politike dhe mediatike që prodhohet, është të mos e marrësh atë seriozisht. Edhe kështu mund ta luftosh sistemin që “bijtë e nënave i shndërron kaq shpejt dhe kaq egër në bij kurv*sh”.

Shpend Maxhuni emërohet drejtor i ri i AKI-së

Presidenti i Republikës së Kosovës, Hashim Thaçi, bashkë me kryeministrin e vendit, Ramush Haradinaj, sot kanë emëruar drejtorin e ri të Agjencisë së Kosovës për Inteligjencë (AKI)

Presidenti Thaçi dhe kryeministri Haradinaj, morën vendim për emërimin e Shpend Maxhunit, Drejtor i Agjencisë së Kosovës për Inteligjencë, transmeton Koha.net.

Siç njofton komunikata nga presidenca, emërimi u bë duke u bazuar në Nenin 84 (21), në Nenin 94 (8) dhe Nenit 129 (3) të Kushtetutës së Republikës së Kosovës, si dhe Nenin 5 (3 dhe 5) të Ligjit nr. 03/L-063 për Agjencinë e Kosovës për Inteligjencë.

Është bërë e ditur gjithashtu se Maxhuni u emërua për një mandat pesë vjeçar, i cili mund të vazhdohet edhe një herë.

Drejtor i AKI-së ishte Driton Gashi, i cili ka ofruar dorëheqjen e kërkuar nga kryeministri i Kosovës Ramush Haradinaj. Gashit i ishte kërkuar ta lirojë pozitën javë më parë, pas skandalit të dëbimit të 6 shtetasve turq nga Kosova.

Shpend Maxhuni aktualisht është drejtor i Policisë së Kosovës.

Kush po na e bën “ferr“ Shqipërinë?

Nga: Xhevat Mustafa

Në të vërtetë Shqipëria jonë “e bekuar“ dhe “e mallkuar“ ka ndryshuar ndjeshëm. Por, ishin të gjitha resurset dhe mundësitë për të ndryshuar shumë më tepër e për shumë më mirë, për t’iu afruar më shumë Zvicrës, Suedisë, Danimarkës… se sa Italisë, Kolumbisë, Meksikës…

Nuk përbën risi dhe diçka të pashpjegueshme që e majta, komunisto-socialiste është akoma masivisht e mbështetshme dhe e votueshme në Shqipëri. Kjo nuk mund të shpjegohet si meritë ekskluzive e lidershipit aktual të PS-së apo “Rilindjes“. Në mënyrë figurative mund të cilësohet edhe një prodhim “Made in Albania“ e “Made in Katovica“, pse jo, edhe “Made in Soros“. Paradoksalisht kjo ndodh edhe në këto vite kur e majta klasike apo historike, përgjithësisht ka pësuar humbje të rënda në betejat zgjedhore, si p.sh. në SHBA, Britaninë e Madhe, Francë, Gjermani, Holandë, Danimarkë, Norvegji, Itali, Zvicër, Austri, Luksemburg, Spanjë, Portugali, Poloni, Hungari, Bullgari, Çeki, Kroaci, …Një hartë, mediat, rrjetet sociale… ndihmojnë të konstatohet se tifozllëku ndaj të majtës vazhdon të jetë më i lartë në gjithnjë e më pak vende, në Shqipëri, Serbi, Rusi, Kinë, Korenë e Veriut, Kubë, Venezuelë….

Falë partishmërisë gjenetike apo të trashëguar, angazhimit aktiv të kontingjenteve partiake, ushtarake, policore, të ish-sigurimit, etj… PS-ja vazhdon të ketë mbështetje masive edhe jashtë vendit, në diasporë dhe emigracion. Kuptohet se mbështetja për të majtën nga rreth 765 mijë votues nga 2.876.591 banorë më 1 janar 2017 ose afro 25% e popullsisë, pa llogaritur sa është në të vërtetë përqindja e votave të vjedhura e të blera, krahas trashëgimisë, idealizmit apo nostalgjisë, diktohet jo pak edhe nga pragmatizmi apo interesat jetike, profesionale, të karrierës, përfitimeve…Ndërsa për ata që kanë ikur herët apo më vonë si emigrantë dhe janë integruar në vendet ku janë vendosur mund të përjashtohen interesat e ngushta individuale e familjare. Kështu që për kontingjentin e të majtëve në këtë komunitet mbeten përcaktues trashëgimia, idealizmi, nostalgjia, pra lidhjet shumëformëshe me të shkuarën komuniste…

Shumica e këtyre i fshehin këto si me gjethe fiku duke u kapur tek alergjia apo urrejtja patologjike që kanë ndaj të djathtës tradicionale apo historike në përgjithësi si dhe PD-së dhe Sali Berishës, në mënyrë të veçantë. Sidomos në kohë zgjedhjesh dëgjon jo pak të majtë që shprehen, pa ua vënë në diskutim sinqeritetin: “E shikojmë, e kuptojmë dhe e pranojmë se “Rilindja“ dhe Edi Rama nuk po qeverisin mirë dhe na kanë zhgënjyer, por përsëri për PS-në do të votojmë, sepse nuk na hyjnë kurrë në zemër PD-ja dhe Sali Berisha…Sa të jetë gjallë Saliu ne do të votojmë vetëm të majtën“. Por, nëse do të bëhet thellë dhe objektivisht analiza nuk është e vështirë të arrihet, të paktën në dy përfundime. I pari, kështu ata viktimizojnë gjatë edhe vetveten, sepse nuk lejojnë rrotacionin politik, nga i cili mund të vinte një qeverisje e re, qoftë edhe 10% më e mirë se ekzistuesja. I dyti, në qoftë se do ta analizojnë me ftohtësi rolin dhe veprimtarinë e Sali Berishës mund të dalë se ai, me ato që ka bërë dhe nuk ka bërë gjatë 27 vjetëve, jo padashje e nga mungesa e përvojës, por për skenarin e Katovicës, i ka shërbyer më shumë të majtës se sa të djathtës.

Mbështetja vullnetare e qeverisë, edhe kur nuk ka të drejtë e po gabon, u vu re edhe disa ditë më parë, në kundërvënien e qindra qytetarëve të Kukësit për taksën në Rrugën e Kombit. Nga brenda dhe jashtë vendit nuk qenë të paktë zërat që u kapën fort tek djegia e disa barakave për vjeljen e një takse arbitrare, antihumane, antisociale dhe i përmbytën kuksianët me akuzat për “dhunë të patolerueshme e të dënueshme, për vandalizma…“. Këta “avoketër vullnetarë“ të qeverisë “harruan“ se edhe vendimi qeveritar shpreh pastër e qartë arrogancë, autoritarizëm, prepotencë, pashpirtësi njerëzore dhe sociale, dhunë psikologjike, financiare, fizike… Mjafton të llogaritet se, për të pasuruar edhe më shumë ortakët dhe vetveten, do t’u merreshin 10 euro në ditë qytetarëve kuksianë, më të varfrit në vend, me rreth 50 – 60 euro apo dollarë në muaj mbështetje sociale, me rreth 100-150 euro apo dollarë në muaj pensione, me rreth 200-300 dollarë apo euro paga mesatare, me të cilat, më së shumti, mbijetojnë familje me 4-6 anëtarë.

“Harruan”, gjithashtu, se protesta me dhunë ka organizuar jo rrallë edhe PS-ja, duke u dhënë të drejtë kundërshtarëve të tyre të mendojnë se për socialistët dhe tifozët e tyre “dhuna dhe revolucioni janë e drejtë, liri, traditë dhe ekskluzivitet vetëm i të majtës, kur është në opozitë“. Edhe qeveria, edhe avoketërit e saj “harruan“ edhe përvojën e një vendi fqinj, të Maqedonisë, ku taksa për autostradë është rreth 50 denarë apo rreth 1 euro. “Harruan“ edhe faktin se në vendet ku vilen taksa për udhëtime nëpër autostrada, krahas tyre, janë në gjendje shumë të mirë dhe jo të pakta rrugët dytësore apo alternative, që numërohen me gishtërinjtë e njërës dorë tek ne dhe janë në gjendje të mjerueshme. Këto vërtetë mund të jenë pak më të gjata e jo aq komode, por gjithsesi janë të leverdisshme financiarisht…“Harruan“ edhe se jo shumë larg nesh, gjeografikisht dhe në kohë, demonstrata dhe protesta të dhunshme ka pasur edhe në kryeqytetet e demokracisë botërore, në Athinë, Romë, Paris, Bruksel…

Shpreh më shumë se partishmëri, pragmatizëm apo njëanshmëri, t‘u kërkosh mbi 2 milionë shqiptarëve, që nuk kanë votuar fare apo kanë votuar kundër Edi Ramës më 25 qershor 2017 dhe që kanë 1001 vërejtje dhe kritika ndaj tij, që t’i durojnë të gjitha veprimet e tij antisociale dhe arbitrare. Në të kundërt, ata që nuk e duan dhe nuk e mbështesin, nënkuptohet se mbeten të jenë antidemokratë, antiintegrim, antishqiptarë?!!! Apo flaken nga partia si Ben Blushi dhe Mimoza Hamizi, pa u merakos fare se janë intelektualë elitarë dhe me kontribute të ndjeshme për PS-në. Por, mund t’u vihen edhe prangat, si djemve të Kukësit.

Sipas logjikës së korit të rilindasve në vend dhe në diasporë, të hapur, të fshehtë apo të mbuluar me qethe fiku, mund të nënkuptohet edhe thirrja apo mesazhi: duajeni, durojeni dhe mbajeni sa më gjatë mbi kokë Edi Ramën me shokë e shoqe, me gjithë zullumet që po bëjnë, vetëm që të mos rikthehen në pushtet PD-ja dhe Sali Berisha! ! Mund të nënkuptohet edhe thirrja:“ lërini sa më gjatë në pushtet “rilindasit“, sepse ata i do miliarderi Soros, presidenti Erdogan, disa komunisto-socialistë në Bruksel e Strasburg…Apo sepse i do Ornela Vorpsi dhe disa adhurues të tjerë të tij shqiptarë nëpër botë. Për reciprocitet apo provokim edhe të djathtëve u lind e drejta t‘u kërkojnë të pamundurën dhe qesharaken këtij kori dhe të gjithë të majtëve: Duajeni Sali Berishën dhe Lulzim Bashën, sepse i duam ne dhe, sepse Edi Ramën nuk e duam ne, nuk e do edhe Donald Trump…!

Do t’i ftoja tifozët e “Rilindjes“ dhe personalisht të Edi Ramës, që jetojnë jashtë, të vijnë të jetojnë të paktën 1 muaj në Shqipëri, duke iu uruar sinqerisht të mos kenë fatin e keq të shtrohen qoftë edhe një ditë në spitale, ku me shumë gjasa mund të lemerisen. Me siguri, shumica e tyre do të shikojnë dhe kuptojnë se sa janë shtuar korrupsioni, kriminaliteti, të papunët, të falimentuarit, të varfrit, lypsët, rrëmihësit e përditshëm nëpër kazanët e plehrave, të depresuarit, të divorcuarit, të droguarit, të çmendurit, të pashpresët, të vetëvrarët, njerëzit që flasim me vete rrugëve, hajdutët e xhepave, të shtëpive, prostitutat…

Do të gjejnë plot të gatshëm për të ikur ku të mundin nëpër botë, të bindur se Shqipëria e sotme për nga mjerimi i ngjan jo pak asaj të viteve 1989 -1992…Natyrisht do të shikojnë dhe kuptojnë lehtë e shpejt edhe se disa ortakë të qeverive janë pasuruar marramendshëm, edhe më shpejt e më lehte se Trumpi dhe Sorosi. Kur të vijnë, do të bënin mirë të mos shikonin vetëm sheshet, fasadat, betonet, kullat, sheshin “Skënderbej”, Parkun e Liqenit, pedonalet në qytetet bregdetare, por të shkojnë përtej tyre, në lagjet e periferisë, në qytetet e vegjël, në zonat e thella, ku mbretëron mjerimi.

Gjithashtu, do t’u sugjeroja apo këshilloja që të mos shikojnë vetëm ekspozitat e Ornela Vorpsëve në hollin e kryeministrisë, e shndërruar disa herë në galeri për ekspozita pikturash ekstravagantë…në kohë krize e mjerimi apo „kolere“, por realitetin e përditshëm, ekspozitën gjigande e të pakufi të varfërisë! Në qoftë se do ta shikojnë realitetin me sytë e tyre dhe jo të Edi Ramës dhe Lulzim Bashës, nuk do ta kenë të vështirë për të kuptuar se klasa politika dhe qeverisëse në Shqipëri ka punuar shumë më tepër për veten, familjet, ortakët se sa për Shqipëri dhe shqiptarë. Kjo do t’i ndihmojë edhe për të kuptuar se cilit skenar i kanë shërbyer shumica e tyre, duke bërë masiv tek shumica e shqiptarëve opinionin dhe deklarimin se “këtu nuk jetohet“, se “ky vend është i mallkuar e nuk bëhet“, se “këtu nuk krijohet shtet i vërtetë“… Së fundmi, kjo do t‘i ndihmojë edhe të kuptojnë se Shqipëria po qelb botën jo nga “kazani mediatik“, por nga “haleja“ politike dhe qeverisëse“.

Ishte e pritshme që Shqipëria do të katandisej në këtë ditë, për deri sa në kohë krize na u vetëzgjodh si kryeministër një piktor dhe ish-basketbollist, dhe si ministër i Financave ai gjeti me qiri dhe emëroi një mësues anglishteje. Sipas vizionit, skenarit apo interesave të Edi Ramës grupi parlamentar i PS-së, sidomos në mandatin e parë, u mbush me burgaxhinj e të inkriminuar me shumë emra dhe pseudonime dhe qeveritë e “Rilindjes” u mbushën me partiake dhe partiakë të bindur dhe jo me personalitete me karrierë dhe përvojë të pasur, çka nuk e gjen në asnjë vend tjetër të Evropës. Ata që jetojnë në Amerikë duhet ta dinë se mosha mesatare e qeverisë së Presidentit Trump, që po tregohet e suksesshme, sidomos në fushën e ekonomisë, është afro 20 vjet më e lartë se e qeverive Rama 1 dhe 2.

Mund t’u kujtoj të gjithëve edhe se Kancelarja gjermane Angela Merkel e mbajti për shumë vjet Wolfgang Schäublen si ministër të Financave, edhe duke lëvizur me karrige, sepse ai ishte një nga specialistët më të mirë në botë në fushën e financave…dhe jo thjeshtë si një militant partiak…Prandaj, për deri sa tallemi dhe bëjmë eksperimente fatale me vetveten, duke bërë kryeministra doktorë e piktorë apo çuna 30-vjeçarë, Shqipëria do të katandiset kështu si është, për t’i qarë hallin dhe për t‘iu larguar një ditë e me parë, me çdo rrugë dhe faturë. Së fundmi, për të shmangur pesimizmin apo skepticizmin, deri në lemeri nga jeta apo realiteti në Shqipërinë e sotme, dëshiroj të theksoj se nuk është as e vërtetë dhe as e drejtë përralla që përhapin kafeneve, rrugëve dhe trotuareve disa “komisarë“ të vjetër e të rinj se “dikur ishim më mirë“. Në të vërtetë Shqipëria jonë “e bekuar“ dhe “e mallkuar“ ka ndryshuar ndjeshëm.

Por, ishin të gjitha resurset dhe mundësitë për të ndryshuar shumë më tepër e për shumë më mirë, për t’iu afruar më shumë Zvicrës, Suedisë, Danimarkës… se sa Italisë, Kolumbisë, Meksikës… Kuptohet, në qoftë se nuk do të ekzistonte “Katovica“…si skenar dhe jo si qytet… Ndoshta kjo ka ndodhur edhe për kënaqësinë e fqinjëve, të Sorosit, etj. se dhjetëra milionat e dollarëve, të investuar prej tyre, kanë dhënë frytet e planifikuara, duke e bërë Shqipërinë siç është, e jo siç duhej të ishte.
Burimi: http://www.gsh.al

A po përhapet anti liberalizmi në Evropë

Presidenti francez Emmanuel Macron paralajmëroi këtë javë se ndasitë mes demokracisë dhe autoritarizmit në Evropë po kthehen në një “luftë civile”. Në një fjalim para Parlamentit Evropian në Strasburg, ku ai parashtroi vizionin e tij për një Bashkim Evropian të reformuar, Presidenti Macron i bëri thirrje bllokut që t’i rezistojë këngës së sirenës së populizmit

Komentet e zotit Macron vijnë pasi populistët euroskeptikë fituan zgjedhjet në Hungari dhe Itali dhe Brukseli përballet qeverinë e djathtë polake lidhur me shtetin ligjor. “Nuk dua të lejoj që ky iluzion i turpshëm që ka çuar kontinentin tonë buzë humnerës, të hedhë rrënjë: Iluzioni i pushtetit të fuqishëm, i nacionalizmit, i heqjes dorë nga liritë. E refuzoj idenë që po përhapet në Evropë se demokracia do të bëhet e pafuqishme. Përballë autoritarizmit që na rrethon ngado, përgjigjia nuk është demokraci autoritare por autoriteti i demokracisë”, tha ai.

Në të dyja anët e Atlantikut po flitet shpesh për rreziqet e iliberalizmit dhe autokracisë, veçanërisht në Evropën Qendrore dhe Lindore dhe se çfarë do të thotë kjo për të ardhmen e kontinentit. Në Uashington, analistë evropianë dhe amerikanë folën për këto rreziqe në një diskutim në Qendrën për Studime Strategjike dhe Ndërkombëtare, por ofruan një tablo më me nuanca.

Democraci iliberale apo populizëm?

Kryeministri populist hungarez, Viktor Orban, partia e të cilit Fidesz dhe aleatët e saj siguruan një fitore të thellë këtë muaj, e parashtroi vizionin e tij për liberalizmin në vitin 2014. “Një demokraci nuk ka pse të jetë domosdoshmërisht liberale. Edhe nëse diçka nuk është liberale, nuk do të thotë që nuk është demokraci”, citohet të ketë thënë zoti Orban.

Radek Sikorski, ish-ministër i jashtëm i Polonisë thotë se ndërsa pa dyshim që mund të ketë edhe demokraci kur joliberalët fitojnë, populistët janë ndryshe sepse propozojnë zgjidhje të thjeshta për probleme komplekse dhe gjithmonë duan të identifikojnë armiq. “Kundërshtarët e tyre, rivalët e tyre për pushtet nuk janë thjesht konkurrentë, janë gjithmonë armiq, janë djallëzorë dhe me këtë interpretim, janë anti-pluralistë dhe kjo i bën populistët iliberalë”, tha ai.

“Që të fitojnë, populistët duhet të përqenrohen fillimisht tek një temë që është popullore dhe atë bënë. U përqendruan tek një çështje që ishte në vëmendjen e gjithë opinionit publik në Evropë: Imigracioni”, vazhdon ai.

Ish-Ministri i Jashtëm polak, përmend gjithashtu edhe rrogat e ulëta dhe përdorimin e identitetit kulturor si metoda për tërheqjen e votuesve në Poloni. Ai thotë se kur institucionet demokratike gërryhen dhe vendosen nën kontrollin partiak, vjen një pikë kur është e vështirë të kesh zgjedhje konkurruese.

Charles Gati, profesor i studimeve Evropiane dhe Euroaziatike në Fakultetit të Studimeve të Avancuara Ndërkombëtare në Universitetin “Johns Hopkins”, thotë se shumica e vendeve të Evropës Lindore dhe Qendrore që janë pranuar në Bashkimin Evropianë janë të rrugë të mbarë.

“Kur bëhet fjalë për Hungarinë dhe Poloninë dhe ndoshta Bullgarinë nuk më pëlqen të përdor shprehjen ‘kanë bërë hapa prapa’. Mendoj se duhet të kuptojmë që ato nuk janë demokraci që po bëjnë hapa prapa, janë regjime autoritare dhe gjysmë-autoritare që ruajnë fasadën e proceseve demokratike”, thotë ai.

Heather Conley, e Qendrës për Studime Strategjike dhe Ndërkombëtare thotë se faktorë të tjerë janë pabarazia, pakënaqësitë historike dhe korrupsioni. “Opozita e dobët e shoqëruar me politika dhe struktura që me qëllim dobësojnë opozitën, për mua janë tiparet e kësaj prirjeje drejt iliberalizmit”, thotë ajo.

Disa thonë se është e pamundur të parashikohet se kur do të jetë fundi demokracisë iliberale të kryeministrit hungarez Orban dhe se kjo formë autoritarizmi ka lindur brenda vetë kornizës demokratike.

Prirje Evropiano-Qendrore apo Globale?

Por Gati, autor i librit “Iluzione të dështuara: Moska, Uashingtoni, Budapesti dhe Revolta humgareze e 1956-ës”, parashikon se në mungesë të presionit ndërkombëtar, regjimi i kryeministrit Viktor Orban do të vazhdojë në Hungari. “Sepse opozita është e dobët, e përçarë, nuk ka fonde të mjaftueshme, nuk ka qasje tek shtypi, veçanërisht në zonat rurale”.

Në kontekstin më të gjerë të Evropës Qendrore, Sikorski se nuk duhen vënë etiketa rajonale. “Kjo nuk është një dukuri e Evropës Qendrore. Është një dukuri gjithë perëndimore”. Dhe numri i fundit i revistës “Foreign Affairs”, shtron në kopertinë pyetjen “A po vdes demokracia? – Një raport Global”, ku analizohet jo vetëm Evropa, por edhe Shtetet e Bashkuara, Kina dhe vende të tjera.

David Frum, redakor në revistën “Atlantic”, thotë se është e rëndësishme që të mos krijohen konfuzione nga kujtesa e rasteve flagrante të dështimit të demokracisë në histori, si Italia dhe Gjermania.
“Mendoj se është më e dobishme ta shohim demokracinë moderne si një llampë drita e së cilës bëhet më e shndritshme ose më e zbehtë, sesa që ndizet ose fiket”.

Ai thotë se është e mundur të kesh një demokraci funksionale siç kishin Shtetet e Bashkuara në vitet 1930 dhe njëkohësisht t’u mohosh votën miliona njerëzve, mbi bazën e ngjyrës së lëkurës. “Nëse është e mundur të bëhesh demokraci liberale në një drejtim, mund të bëhesh gradualisht një demokraci më pak liberale, pa arritur në pikën e përmbysjes së shtetit”, thotë ai.

Pasoja më të gjera

Por zoti Sikorski ngre shqetësimin se prirjet joliberale në vendet ish-komuniste mund të kenë pasoja më të gjera. “Mendoj se fatkeqësisht dënimi që ne Evropa Qendrore po i imponojmë vetes me këtë largim nga standartet demokratike, është se kemi rizgjuar disa stereotipe të rajonit që pothuajse ishin zhdukur dhe kemi kontribuar në mungesën e vullnetit të Evropën Perëndimore për të konsideruar mundësinë e zgjerimit të mëtejshëm të BE-së në Lindje”.

Ndërsa 10 vjet më parë, ai thotë se anëtarësimi i Ukrainës në vitin 2020 ishte i përfytyrueshëm, sot nuk është më. “Për shkak të asaj që ndodhi në Ukrainë, por edhe sepse dëshira për zgjerim, për sjelljen e më shumë problemeve, siç shihet në Evropën Perëndimore, është zbehur dhe ky është ndëshkimi i vërtetë”.

A mund të kthehet mbrapsht kjo prirje?

Në të njëjtën kohë kur Presidenti Macron paralajmëronte për iliberalizmin, në një letër të hapur për Kancelaren gjermane, Angela Merkel, akademikë, shkrimtarë dhe aktivistë, e kritikonin atë se nuk e kishte ngritur zërin kundër Orbanit për demokracinë hungareze.

Por zoti Sikorski thotë se Bashkimi Evropian nuk mund të bëjë shumë sepse e gjithë konfederata është e bazuar në idenë e besimit reciprok mes institucioneve të vendeve individuale. “Nëse ky mekanizëm i besimit thyhet, atëherë pasojat janë shumë të thella për të gjithë Bashkimin”.

Megjithatë Profesor Gati thotë se botës nuk po i vjen fundi. “Ajo që sheh në Poloni, në Francë dhe në Angli, ajo që sheh në Shtetet e Bashkuara është dallimi i thellë mes qyteteve të mëdha dhe zonave rurale”.

E megjithëse hungarezët protestuan në masë fundjavën e kaluar kundër atij që e quajtën sistem të padrejtë zgjedhjesh që i dha Orbanit një tjetër fitore, ai thotë se iliberalizmi në Hungari duhet luftuar në kutinë e votimit. “Mendoj se është e mundur që vitin e ardhshëm në zgjedhjet vendore, opoizta do të fitojë në Budapest”.

Dhe zoti Frum thotë se nuk duhet të konsiderohet patologjike ajo që po ndodh në Evropën Qendrore dhe dhe Lindore. “Është një grip që ka rënë në rajon, diku është më i rëndë se diku tjetër dhe disa kanë imunitet më të dobët se të tjerë, por duhet të kuptohet se të gjithë na ka zënë i njëjti grip”. Por qoftë grip, apo epidemi, një gjë është e sigurt: Nuk ka ende kura të qarta.

Vendvarrimi i Skënderbeut i mbuluar me shkurre (video)

Jemi në vitin e Skënderbeut, por vizitorët vendas dhe të huaj në memorialin e Skënderbeut në Lezhë, gjejnë një pamje që vlen për të dëshiruar

“Është e sikletshme për ne, jo për turistët që vijnë. Ata vijnë këtu është shumë e sikletshme kur ngrejnë kokën dhe e shohin në këtë gjendje”, shprehet Paulin Zefi, përgjegjës i memorialit të Skënderbeut.

Ndërhyrja e fundit pranë memorialit është kryer në vitin 1981 por tashmë Ministria e Kulturës ka gati projektin për restaurimin e vend-varrimit të Skënderbeut, në vlerën 38.4 mln lekë.

“Problematika kryesore ka të bëjë me mbulesën. Material ii përdorur në 2002 ka përqindje të larta termike dhe nuk lejohet që të përdorej, por ka nevojë edhe për disa ndërhyrje të tjera”, thotë Zefi.

Numri i vizitorëve pranë memorialit është rritur por këtë vit mungesa e afateve për nisjen e punimeve, ka vënë në pikëpyetje të gjithë sezonin turistik.

Shqetësim ende mbetet mungesa e orientimit në këtë memorial, ku mungojnë tabelat. Madje turistët e nisin gabim rrugëtimin e tyre deri tek memoriali, nga sheshi I shtruar në 2015 dhe jo nga Antic Gate, 1 nga 12 portat hyrëse të Lisusit të Lashtë për të kaluar në parkun arkeologjik e deri tek memoriali.

Top Channel

Letra e aleatëve për Kongresin amerikan

Treqind parlamentarë nga Britania, Franca dhe Gjermania i kanë bërë thirrje Kongresit amerikan që të mos e lejojë Presidentin Trump të braktisë marrëveshjen me Iranin, duke paralajmëruar se do të minonte vetë konceptin e diplomacisë dhe çdo negociatë në të ardhmen

Letra, e shkruar nga britaniku britanik Richard Bacon dhe homologët e tij gjermanë dhe francezë, Omid Nouripour dhe Delphine O, u botua në “The Guardian” të enjten.

Në letër, ata argumentojnë se marrëveshja ka qenë e vetmja menyre per te pasur kontroll efektiv rreth ambicjeve bërthamore të Teheranit dhe ka ndihmuar në parandalimin e një konflikti potencialisht shkatërrues në Lindjen e Mesme.

“Ne ishim në gjendje të impononim një kontroll të rreote për programin bërthamor të Iranit, të shkatërronim shumicën e objekteve të tyre të pasurimit bërthamor dhe të zvogëlonim në mënyrë drastike rrezikun e një gare të armëve bërthamore”, – shkruan ata nder te tjera.

“Braktisja e marrëveshjes do të zvogëlonte vlerën e çfarëdo premtimi apo kërcënimi të bërë nga vendet tona”, shkruan ata.

“Rreziku afatgjatë është edhe më serioz: dëmtimi i kredibilitetit tonë si partnerë ndërkombëtarë në negociata dhe, në përgjithësi, në diplomacinë si një mjet për të arritur paqen dhe për të siguruar sigurinë”, raporton RT, shkruan Panorama.

“Ne kemi disa nga prostitutat më të bukura në botë”

Pas përballjes së ashpër mes presidentit Donald Trump dhe ish-shefit të FBI-së James Comey, mediat amerikane kanë publikuar një dokument prej 18 faqesh që nxjerr në dritë bisedat e kreut të Shtëpisë së Bardhë me presidentin rus Vladimir Putin

Në shënimet e tij, Comey shkruan se gjatë një takimi në Shtëpinë e Bardhë në 2017-tën, pak javë pas inaugurimit të tij si president, Trump i tha se “historia e prostitutave është një budallallëk”.

Ai po i referohej një dosjeje mbi një takim të supozuar mes Trump dhe disa prostitutave në një hotel në Moskë.

Lidhur me komentet e Putin, Comey shkruan se ai i kishte thënë: “Ne kemi disa nga prostitutat më të bukura në botë”.

Pasazhet gjithashtu tregojnë edhe për “rezervat” e Trump për këshilltarin e tanishëm kombëtar të sigurisë, Michael Flynn.

Publikimi i shënimeve të Comeyt, të enjten nga Asociated Press, vjen pasi Departamenti i Drejtësisë i dërgoi ato në Komisionin e Mbikëqyrjes dhe Inteligjencës në Kongres.

Por me anë të një postimi në Twitter, Trump i cilëson dokumentet e publikuara “gjueti shtrigash”.

“Dokumentet e James Comey sapo u publikuan dhe tregojnë shumë qartë që nuk kishte asnjë marrëveshje të fshehtë dhe asnjë pengesë. Ai gjithashtu zbuloi një informacion të klasifikuar. A do të vazhdojë ende ‘gjuetia e shtrigave?”

Trump e ka quajtur vazhdimisht ish-shefin e FBI gënjeshtar, njëherësh dhe drejtorin më të keq që inteligjenca amerikane ka pasur ndonjëherë.

Përplasja mes Trump dhe ish-shefit të FBI është thelluar pas shkarkimit të Comey në maj të vitit 2017.

Pak ditë më parë, Comey e cilësoi Trump si një njeri “moralisht të papërshtatshëm për të qenë president”.

Shqetësimi amerikan: Po e nënvlerësoni se sa të angazhuar jemi…

Një vit pasi mbajti një seancë dëgjimore, që prodhoi lajme ditët e fundit në Shqipëri, Nënkomisioni për Evropën i Dhomës së Përfaqësuesve të Kongresit amerikan, iu rikthye sërish Ballkanit

Në seancën e vjetshme doli edhe letra e famshme e ish-kryeprokurorit Adriatik Llalla, ku thuhej se ambasadori amerikan i ka kërkuar arrestimin e Ilir Metës.

Sivjet, seanca ishte më shumë e fokusuar tek frika se Ballkani Perëndimor po largohet nga Perëndimi.

Në fokus ishte sidomos situata në Bosnje. Kongresmenët shprehën shqetësim se mund të ketë një konflikt të ri, por zyrtari i DASH tha se akoma gjërat nuk janë në atë pikë.

Shtetet e Bashkuara duhet të vazhdojnë angazhimin për të ndihmuar vendet e Ballkanit Perëndimor, u shprehën pjesëmarrësit.

Ligjvënësi demokrat Gregory Meeks theksoi se mbështetja e Komisionit Evropian për hapjen e negociatave për anëtarësim për Shqipërinë dhe Maqedoninë është një zhvillim inkurajues. Por, sipas tij, rajoni përballet me një ngadalësim të përparimit në procesin e integrimeve euroatalntike dhe me një rritje të ndikimit negativ nga jashtë.

“Banorët e vendeve të Ballkanit Perëndimor nuk janë më aq të bindur mbi përfitimet nga anëtarësimi në BE dhe Nato, si dikur, dhe aktorët e jashtëm si Turqia dhe Rusia janë gjithnjë e më të interesuar dhe më të gatshëm për të ndërhyrë në mënyrë të dëmshme, duke rrezikuar investimet që Shtetet e Bashkuara kanë bërë drejt paqes demokratike në rajon”.

“Liderët në rajon e nënvlerësojnë se sa SHBA është e angazhuar për demokraci, zbatimin e ligjit dhe paqen,” tha ai.

Së fundmi ka spekulime se SHBA nuk është shumë e angazhuar në rajon. Për më tepër, thuhet se përfaqësuesit e SHBA në këto vende, nuk ndjekin axhendën e Departamentit të Shtetit.

Times publikon listën e personave me më së shumti ndikim më 2018

Revista Time ka publikuar listën e 100 personave me më së shumti ndikim në botë, duke përfshirë në numër rekord të 45 grave dhe 45 personave nën moshën 40 vjeçare

“Lista e 100 personave me më së shumti ndikim është gjithmonë reflektim i momentit derisa tani duket shumë më ndryshe se në të kaluarën”, ka thënë kryeredaktori i revistës Time, Edward Felsenthal duke treguar se si ka zgjedhur revista personat e listuar.

“Ndikimi nuk njeh kode postale dhe moshë minimale”, ka thënë ai.

Në këtë numër të revistës janë përfshirë edhe kontribuuesit duke dhënë sqarime për personat e zgjedhur.

Ish-presidenti amerikan, Barack Obama ka thënë të jetë inspiruar nga të mbijetuarit e sulmit në Florida, të cilët kanë organizuar marshe për masa më të rrepta për armët.

Në mesin e 45 grave të zgjedhura kanë qenë edhe Tarana Burke, që ka themeluar fushatën kundër ngacmimit seksual, #edheunë si dhe aktivistja për të drejtat e njeriut, Nice Nailantei Leng’ete, e cila ka punuar për dhënien fund të gjymtimit gjenital femëror në Kenia.

Në këtë listë përfshihen edhe presidenti i Shteteve të Bashkuara, Donald Trump, trashëgimtari i fronit në Arabinë Saudite, princi Mohammed bin Salman, udhëheqësi i Londrës, Sadiq Khan, presidenti i Kinës, Xi Jinping, lideri verikorean, Kim Jong un dhe shumë të tjerë.