Lajm.co

Për dialogun pritet të diskutohet edhe në SHBA

Presidenti i Kosovës, Hashim Thaçi, dhe kryeministri Ramush Haradinaj kanë udhëtuar për në Shtetet e Bashkuara të Amerikës (SHBA) për të marrë pjesë në punimet e Asamblesë së Përgjithshme të Organizatës së Kombeve të Bashkuara (OKB)

Me këtë rast krerët shtetërorë të Kosovës do të kenë mundësi të takohen me liderë të vendeve tjera.
Në takimet bilaterale që do t’i ketë me përfaqësuesit ndërkombëtarë në SHBA kreu i shtetit Hashim Thaçi pritet që si temë të diskutimit ta hapë edhe idenë e korrigjimit të kufirit me Serbinë, gjegjësisht të kërkojë përkrahje lidhur me këtë çështje.

Kështu vlerësojnë njohësit e çështjeve politike në vend, të cilët megjithatë mbeten skeptikë se kreu i shtetit do ta sigurojë këtë mbështetje, veçmas kur kihet parasysh fakti që disa shtete me ndikim si Gjermania e Britania tashmë janë deklaruar fuqishëm disa herë kundër këtij opsioni.

Në anën tjetër Violeta Haxholli, hulumtuese në Institutin Demokratik të Kosovës (KDI), në kuadër të projektit për dialog ka vlerësuar se presidenti i Kosovës Hashim Thaçi në takimet që do t’i ketë me krerët e shteteve të ndryshme të botës në SHBA do ta hapë edhe çështjen e dialogut, respektivisht idenë e korrigjimit të kufirit me Serbinë.

“Me siguri që liderët e shtetit tonë në takime, sidomos me përfaqësuesit e Shteteve të Bashkuara, të Gjermanisë etj., do t’i përmendin këto përpjekjet e tyre për ta arritur një marrëveshje me Serbinë në kuadër të dialogut. Ndoshta do të përmendet edhe ideja e presidentit Thaçi lidhur me korrigjimin e kufijve. Por ta shohim pastaj se cilat do të jenë mesazhet që do t’i marrin nga këto takime”, ka theksuar ajo për “Zërin”.

Sipas Haxhollit, qëndrimi i Gjermanisë lidhur me idenë e korrigjimit të kufirit tashmë dihet se është kundër, ndërkohë ai i SHBA-së ende nuk është i kristalizuar.

“Momentalisht Gjermania është deklaruar kundër kësaj ideje. Sekretari Bolton ka deklaruar që e përkrah çdo marrëveshje që Kosova e arrin me Serbinë, por ende nuk ka ndonjë sinjal konkret nga SHBA-ja se a e përkrahin këtë ide”, ka theksuar ajo.

Deputeti i pavarur i del në mbështetje protestës së VV-së

Korab Sejdiu, deputeti i pavarur i Kuvendit të Kosovës, ka bërë thirrje për përkhrahjen e protestës që do të organizohet me 29 shtator nga Lëvizja Vetëvendosje. Sejdiu përmes një statusi në rrjetin social Facebook, ka thënë që të gjithë jemi të obliguar që t’i dalim në mbështetje çdo nisme të njerëzve të vullnetit të mirë kundër këtij skenari të kobshëm, përfshirë edhe këtë Protestë

Lexoni më poshtë statustin e plotë:

Të veprojmë sot, se nesër do të jetë vonë!

FTESË PUBLIKE PËR PROTESTË PAQËSORE!

Të dashur qytetarë,

Kohë më parë kam bërë thirrje publike për organizim të protestave paqësore si mjet për mbrojtjen e vendit nga shkatërrimi. Më 29 shtator 2018, në ora 14:00, PROTESTA e qytetarëve të Kosovës po ndodhë!

Të gjithë kemi përgjegjësi që të revoltohemi ndaj komplotit të planifikuar nga disa kriminelë pushtetarë për shkatërrimin e Republikës. Të gjithë ne–qytetarë, politikanë, shoqëri civile, studentë, pensionerë, profesionistë, diasporë, e njerëz të pavarur–jemi të obliguar që t’i dalim në mbështetje çdo nisme të njerëzve të vullnetit të mirë kundër këtij skenari të kobshëm, përfshirë edhe këtë Protestë.

Në këtë kohë kur po intensifikohet zaptimi i shtetit, dhe çdo institucion i rregullt shtetëror mbetet i bllokuar nga kjo kastë e kriminalizuar politike e dirigjuar nga Beogradi, reagimi qytetar është i domosdoshëm. Jemi dëshmitar të rrëshqitjes së Kosovës drejt të qenurit shtet diktatorial dhe duhet të veprojmë tani sa nuk është vonë. Po e shohim intensifikimin e cenimit serioz të Kushtetutës nga Presidenti, një Qeveri dhe kastë në pushtet që po e falimentojnë dhe ndajnë shtetin, dhe “liderë” të papërgjegjshëm në pushtet që po e shkatërrojnë shtetësinë e Kosovës. Prandaj, reagimi i pavonuar qytetar është jetik për Kosovën! Dhe i vetmi institucion kushtetues i mbetur në dispozicion për ne si qytetarë dhe opozitarë kundër të keqes mbetet PROTESTA!

Në këtë frymë, ju njoftoj që do t’i bashkëngjitem Protestës paqësore të datës 29 shtator 2018. Njëheri, i ftoj të gjithë qytetarët e Republikës që të marrin pjesë masovikisht në këtë protestë, për ti dalë Zot vendit. T’i dërgojmë porosi të zëshme të gjithëve, brenda dhe jashtë Kosovës, se për Kosovën vendosin qytetarët e saj dhe askush tjetër. Se interesat personale nuk janë më të rëndësishme se interesat kombëtar. Se Kosova është shtet, dhe do të mbetet shtet! Se ne nuk nënshtrohemi!

Poashtu, bëj apel publik që protesta të jetë paqësore, sepse dhuna i shkon në favor zaptuesëve të shtetit.

Shihemi te vendi, më 29 shtator në ora 14:00!

Mjekët paralajmërojnë bojkot nëse nuk u rriten pagat

Mjekët që punojnë në sektorin publik kanë thënë se nëse qeveria nuk merr parasysh kërkesat e tyre për rritje të pagave, atëherë do të ketë kolaps në sektorin e shëndetësisë dhe se ata do ta bojkotojnë punën. Mjeku specialist në Kosovë paguhet për punën që kryen me rreth 600 euro në muaj, derisa infermierët me rreth 400 euro në muaj

Si në shumë fusha tjera, edhe sektori i shëndetësisë vuan nga mosdefinimi i kategorizimit të pagave dhe si rrjedhojë e kësaj gjendjeje, mjekët kanë deklaruar se nuk është korrekte që pagat e tyre të jenë lineare, por ato duhet të kategorizohen.

Udhëheqësi i Federatës Sindikale të Shëndetësisë, Blerim Syla, thotë se janë duke punuar në atë drejtim që të gjitha pagat në sektorin e shëndetësisë të ngriten, por gjithashtu të ketë edhe kategorizime.

“Ditën e martë fillon debati mes Sindikatës dhe grupeve parlamentare, por edhe mjekëve nga parti të ndryshme. Nga qeveria kem informatë, që koeficienti në të cilën na kanë kategorizuar, nuk jemi të pajtimit. Jemi në koeficientit 5 për specialistë dhe 4.5 mjekët e tjerë, por infermierët janë kategorizuar shumë më poshtë. Ne nuk jemi të pajtimit”, tha Blerim Syla, kryetar i Federatës Sindikale të Shëndetësisë.

“Çdo veprim do të merret së bashku me punëtorët shëndetësorë. Nëse ata nuk janë të pajtimit me kategorizim, kam frikë se situata do të përkeqësohet. Janë duke pritur qe katër vjet t’u ngritën pagat. Janë ngufatur dhe mendoj që do të ketë bojkot”, shton Syla.

Sipas mjekëve, rrogat e tyre janë më vogla sesa të kolegëve të tyre në rajon. Basri Lenjani, mjek specialist i emergjencës ka deklaruar se Ligji për pagat, i cili tashmë pritet të shkojë në Kuvendin e Kosovës , shpreson të kalojë pa ndonjë problem, dhe siç thotë ai, njëherë e përgjithmonë t’u kthehet dinjiteti punëtorëve shëndetësorë.

“Shëndetësia në Kosovë, menjëherë pas luftës, ballafaqohet me një pagesë minimale e që ka shënuar rritje ndër vite. Por, në pesë vjetët e fundit pagesat e mjekëve dhe infermierëve janë më të ulëta krahasuar me gjitha shtetet përreth. Mendoj se rritja e pagesës do të bëhet konform ligjit, e që duhet të kalojë në Kuvendin e Kosovës. Me ngritje të pagave do të ngritet edhe mirëqenia e mjekut dhe familjes së tij. E neve na mbetet që të vazhdojmë punën, t’u ofrojmë kujdes shëndetësorë gjithë qytetarëve”, thotë Lenjani.

Mjekët shpresojnë se në kohën kur në Kosovë të fillojë të aplikohet sigurimi shëndetësor, atëherë ata do të paguhen në bazë të performancës së tyre. Drejtori i Shërbimit Spitalor Klinik Universitar të Kosovës, Basri Sejdiu në një intervistë për Radion Evropa e Lirë, ka thënë se do të ketë kategorizim pagashm por edhe rrezikshmëria në punë do të paguhet më mirë se deri tani. Ai ka thënë se tashmë është bërë një grup punues pikërisht për këtë çështje.

“Ne kemi bërë një grup punues për sistematizim të vendeve të punës, si dhe rrezikshmëria në punë do të paguhet më mirë. Shihet një dritë e gjelbër se do të ketë përmirësim, por ajo që do të ndikojë dukshëm pozitivisht janë sigurimet shëndetësore, e që në bazë të performancës do të rritet edhe pagesa. Me çështjen e pagave më shumë është marrë Sindikata e Shëndetësisë, por ne kemi informata se pagat me rritje do të jenë të pranueshme për stafin shëndetësor”, ka thënë Sejdiu.

Punëtorët shëndetësorë në vazhdimësi kanë insistuar në realizimin e kërkesës së kamotshme për rritjen e pagave. Në Ministrinë e Shëndetësisë tashmë kanë deklaruar se në proces janë disa reforma në shëndetësi, ku edhe rritja e pagave është një prej të rejave që mund të sjellin këto reforma.

Kryepeshkopi i Greqisë, Jeromenos pranon që është shqiptar: Jemi vëllezër, gjaku nuk bëhet ujë

Gjatë takimit me vëllezërit e tij të gjakut dhe të gjuhës së mëmës dhe shpirtit Kryepeshkopi i Greqisë, Jeromenos tha “ghiaku UI Nen bëghet”, që do të thotë “gjaku nuk bëhet ujë”

Nga Arben Llalla

Kryepeshkopi i Kishës Ortodokse të Greqisë, Jeromenos ditë më parë zhvilloi një takim me përfaqësuesit e kishës unitare të Kalabrisë, e cila njeh autoritetin e Vatikanit. Kjo është kisha bizantine e arbëreshëve.

Delegacioni përbëhej nga shkëlqesia e tij Donato Oliverio, papa Antoni Belushi, e të tjerë. Gjatë takimit me vëllezërit e tij të gjakut dhe të gjuhës së mëmës dhe shpirtit Kryepeshkopi i Greqisë, Jeromenos tha “ghiaku UI Nen bëghet”, që do të thotë “gjaku nuk bëhet ujë.”

Kjo frazë e tij i referohet historisë së arbërit që pas tragjedisë së luftërave kundër ormanëve emigruan nga Morea-Peloponezi për në Kalabri, Siçili, e gjetkë.

Deklarata e klerikut të lartë të ortodoksisë së Greqisë vërteton edhe një herë se ishin shqiptarët ata që vunë themelet e Greqisë së Re, nga heronjtë, presidentët, kryeministrat, akademikët, aktorë, e kështu me radhë. Por, në Greqi përherë ka ekzistuar një luftë e ashpër kundër arvanitasve, të cilët janë sulmuar nga qytetarët grekë me origjinë sllave nga Azia e Vogël dhe vllehët, të cilët duan të shiten për autoktonë në Greqi. E vërteta është se vetëm shqiptarët që njihen me emrin arvanitas janë vendas, autoktonë të Greqisë së Lashtë dhe të Re.

Kryepeshkopi i Greqisë dhe i Athinës, Jerome Eminence Donato falënderoi për vizitën dhe tha se do të propozojë që të Sinodit të Shenjtë të Kishës së Greqisë të dërgojë në Kalabri një komision historianësh, teologësh dhe peshkopët për të studiuar historinë e greko-italiane.

Ndërsa arbëreshët me këtë rast thanë një vajtim “oh një Bella Morea”: “Që kur kam lënë, kam lënë atje dhe babai im, ku kam lënë nënën time atje dhe u largua vëllai im. Të gjithë nën tokë.”

Bashkimi Evropian po shpërbëhet

Në një vendim të papritur të mërkurën e shkuar, Parlamenti Europian vendosi të nxisë një procedurë, për të ndëshkuar një nga shtetet e saj anëtare:Hungarinë. Beteja për të ardhmen e Europës është e hapur. Kur kanë mbetur vetëm 9 muaj deri në zgjedhjet e Parlamentit Europian, disa përçarje po shfaqen në peizazhin politik të kontinentit

Nga Bill Wirtz

Një gjë është e qartë:çështja e emigracionit, do të jetë në ballë të debateve të ardhshme. Kjo temë do të ndajë progresistët, të cilët dëshirojnë centralizimin e mëtejshëm të Bashkimit Europian, nga populistët, të cilët kundërshtojnë delegimin e më shumë kompetencave tek Brukseli.

Vitin e shkuar, presidenti francez Emanuel Makron identifikoi 2 vende si pengesa për integrimin e mëtejshëm europian:Poloninë dhe Hungarinë. Që atëherë, që të dyja vetëm sa janë bërë më të zëshme në kundërshtimin e tyre ndaj burokracisë së Brukselit. Duhet thënë se shumica konservatore në ato vende të Europës Qendrore, e kanë kundërshtuar BE-në në rrafshin e kulturës, trashëgimisë dhe traditës, shumë më tepër sesa të euros, programeve të mëdha të shpenzimeve qeveritare, dhe harmonizimit të sistemit fiskal.

Në fakt, Hungaria dhe Polonia ushqejnë shtetet e zgjeruara të mirëqenies sociale, me pak shqetësime për qëndrueshmërinë e shpenzimeve të tyre, kështu që baza e tyre e përbashkët me konservatorët amerikanë, ekziston kryesisht mbi vlerat shoqërore.

Retorika agresive e Makron ndaj Polonisë dhe Hungarisë, përkeqësoi marrëdhëniet e tyre me elitën drejtuese të Europës, edhe para se ai të merrte detyrën. Dhe i tiji është nga çdo lloj matje, zëri më i fortë i BE-së. Makron ka sugjeruar plane për reformimin e unionit, që do të rrisin buxhetin dhe aftësitë e Brukselit, dhe do të thellojnë përçarjen ndërmjet atyre që besojnë tek centralizimi, përkundrejt atyre që mbrojnë të drejtat kombëtare.

Nga ana tjetër, kryeministri hungarez Viktor Orban, beson se BE-ja ka komplotuar kundër vlerave dhe kulturës evropiane. Ai ka kritikuar në mënyrë specifike politikat liberale të emigracionit të kancelares gjermane Angela Merkel dhe investitorit miliarder dhe filantropist Xhorxh Soros, i njohur gjerësisht për financimin e OJQ-ve të majta, si në Europë ashtu edhe në Shtetet e Bashkuara.

Për këtë qëllim, vetë qeveria ka nisur fushata publike me moton:”Mos lejoni që Xhorxh Soros të qeshë i fundit”. (Ndonëse është e vërtetë që Sorosi, ka ndërhyrë që Hungaria të pranojë më shumë emigrantë, këta të fundit janë duke e përdorur këtë vend si tranzit për të shkuar në Gjermani).

Bashkimi Europian, ka qenë kritik ndaj Orbanit, sepse ndër arsyet e tjera, për shkak të përpjekjes së tij për të çrrënjosur atë që ai e quan “ndërhyrje e huaj”, Budapesti ka goditur liritë civile. OJQ-të që marrin para nga jashtë Hungarisë, përballen me sfida të mëdha, duke përfshirë edhe projektligjin e qeverisë së ashtuquajtur “Stop Sorosit”, që imponon një taksë prej 25 përqind

mbi donacionet e huaja ndaj OJQ-ve që mbështesin emigracionin.

OJQ-të e cilësuara si një “kërcënim për sigurinë kombëtare”, mund të nxirren tërësisht jashtë ligjit. Ideja se në një vend njihet e drejta e shprehjes së lirë, nuk gjen “miq” aktualisht në Budapest. Para zgjedhjeve parlamentare në Hungrari më 8 prill, Orban e mprehu tonin e tij populist, për të siguruar një shumicë tjetër absolute në parlament.

Në lidhje me kundërshtarët e tij ideologjikë që financohen nga Soros, ai tha:Ne po luftojmë kundër një armiku që është ndryshe nga ne. A nuk shfaqet hapur, por qëndron i fshehur; është jo i drejtpërdrejtë, por dinak; jo i ndershëm, por mashtrues; jo kombëtar por ndërkombëtar; nuk beson tek puna, por spekulon me paratë; nuk ka vendlindjen e vet, por mendon se zotëron tërë botën.

Kjo lloj retorike, nuk ka vend në fushën e demokracive liberale. Dhe kjo ndoshta nuk e shqetëson Orbanin, i cili në vitin 2014, tha se donte të krijonte një shtet joliberal. Hungaria ka patjetër problemet e saj. Por procedura e nisur nga Parlamenti Europian, nuk ka të ngjarë të përmirësojë situatën atje.

Neni 7 i Traktatit të Lisbonës (i cili ka diktuar funksionimin e BE-së që nga viti 2009), i lejon Parlamentit Europian të nisë një procedurë kundër një shteti anëtar, që nuk përmbush kriteret mbi të cilat ka rënë fillimisht dakord kur u bë pjesë e unionit. Pasi nis procedura, Komisioni Europian heton situatën.

Këshilli Europian (i cili përfaqëson shtetet anëtare të BE), voton pastaj nëse do t’i heqë vendit në fjalë të drejtën e votës brenda këshillit. Propozimi mund të miratohet, vetëm nëse vendet e tjera votojnë në favor me një shumicë prej 4/5(Hungaria nuk mund të votojë për veten).

Fakti që është evokuar neni 7, tregon mosbesimin e BE-së ndaj Hungarisë, veprim që vetëm sa do ta distancojë më shumë Budapestin nga Brukseli. Nëse Bashkimi Europian do të donte realisht të zhdukte frikën e Hungarisë nga ndërhyrjet e huaja, duke treguar se emigracioni jashtë BE-së do të mbetet kompetencë e shteteve anëtare, mund ta bënte këtë thjesht duke e ripohuar këtë parim.

Por Brukseli nuk e bën këtë, sepse është aktualisht nën presion nga Italia, e cila dëshiron të shpërndajë emigrantët në të gjithë Europën. Kjo do t’i bënte të ndiheshin të justifikuar hungarezët, që besojnë në goditjen e lirisë së tubimit dhe fjalës së lire, për të parandaluar ndërhyrjen e huaj. Çfarë do të thotë kjo?

Bashkimi Europian është në pikën e përçarjes. Emanuel Makron, po bën thirrje për reformat e tij ambicioze të së ardhmes. Angela Merkel gjendet në mesin e një zenke të brendshme politike mbi emigracionin, që do ta bëjë atë t’i rezistojë këtyre reformave. Qeveria italiane, po kërkon ndryshime të thella mbi emigracionin, dhe kërcënon të ndërpresë financimin për BE.

Dhe vendet e Europës Qendrore, janë gjithnjë e më skeptike për centralizimin e pushteteve në Bruksel. E gjitha kjo po ndodh përkrah Brexit, i planifikuar në marsin e vitit të ardhshëm, dhe negociatave për pranimin e Maqedonisë, Malit të Zi, Shqipërisë dhe Serbisë, të cilat nuk janë ende gati për t’iu bashkuar unionit, sipas vëzhguesve të vet BE-së.

Në vend se të merret me këto çështje në një mënyrë racionale, dhe duke pasur parasysh se BE-ja thjesht mund të ketë shumë pushtet, dhe duhet të zvogëlojë kompetencat e saj në fusha të ndryshme, duke ripohuar të drejtat kombëtare, Brukseli tani po kërkon të përjashtojë anëtarët e saj nga vendimet e mëdha.

Debati është ende me tone të ulta, pasi kushdo që guxon të pajtohet me këtë vendim quhet racist dhe nacionalist, përfshirë ata që kanë shqetësime legjitime për sjelljen e qeverisë hungareze dhe në Bashkimin Europian. BE, i ka shpallur luftë Hungarisë për të gjitha të drejtat, dhe për të gjitha arsyet e gabuara. Ajo mund ta fitojë këtë luftë, vetëm nëse i lejon shtetet anëtare të debatojnë hapur.

Burimi: “American Conservartive”

Vrasja e baronëve të heroinës për t’i hapur rrugë mariuanës dhe kokainës

Lufta e përgjakshme e mafias shqiptare në vitet 1997-1999 ka qenë një nga më të rëndat dhe më traumatiket që la shumë pasoja në vend. Këto ishin pasoja jo vetëm në rendin publik por edhe në kriminalizimin e asaj pjese të politikës rilevante që kishte mbetur në vend

Një shqiptar nga Gostivari, një prej personave më të kërkuar në botë, Daut Kadriovski u strehua në Tiranë për një kohë të gjatë me mbrojtje të rëndësishme politike ku dhe pagoi shumë. Kadriovski qëndronte në Golem, në një nga vilat që po mbinin si kërpurdha në pyllin e pamatë pranë detit Adriatik.

“Ujku”, siç e thërrisnin kundërshtarët arriti të njohë me hollësi të gjithë rrjetin shqiptar të drogës, njerëzit dhe fuqinë e tyre në politikë. Ishte ai që i sugjeroi kapove të mëdhenj shqiptarë që të linin heroinën, e cila jo vetëm kishte firo rrugës por kostoja e transportit bashkë me rreziqet shkaktonte telashe, dhe të përqëndroheshin tek prodhimi i hashashit, i cili ishte shumë e thjeshtë dhe pa problem ta shpërndaje në botë, por sugjeroi edhe një hyrje të fortë në tregun e kokainës.

Por që të bëhej kjo do të duhej të eleminoheshin krerët e mëdhenj të trafikut të heroinës në vend. Të parët u vranë vëllezërit Borova: Ergys dhe Ervin Borova. Pastaj Denis Gina, kapoja i grupit, Median Shehu, financier, e më pas Alban Dani, i cili ishte shpërndarësi perfekt.

Po këta ishin vetëm VIP-at e grupit të Rrugës së Kavajës, që ishin kthyer në legjenta, në idhuj të rinisë së kryeqytetit dhe fatkeqësisht media shqiptare nuk shkruante asnjë gërmë, pasi kronikanët e krimeve shkruanin vetëm ç’i thoshte Arben Rakipi, Pashk Tusha e Fatos Klosi.

Vrasje të tmerrshme ndodhnin në mes Tiranës. Për ironinë e fatit një kryepolic që sot si pensionist mburret se ka luftuar kriminelët, i ndodhte thuajse përditë që çunat e Rrugës së Kavajës të vriteshin para syve të tij. Ngaqë pinin kafe pranë Drejtorisë së Policisë, sepse puna e tyre ishte më shumë me oficerët e policisë.

Ata ishin të lidhur ngushtë pasi paguheshin prej narkotrafikantëve për të mbyllur e hapur dosje, si edhe për të përgjuar telefonata për llogari të tyre. Madje para drejtorisë së policisë të Tiranës ndodhi një ngjarje e tmerrshme që tronditi për herë të parë opinionin publik. Trafikantët që ishin kthyer edhe në gjoja luftëtarë western që përdornin pistoletën kudo vranë pa dashje dhe një shitës misrash pranë urës tek Drejtoria e Policisë.

Nejse kjo ngjarje ishte episod i një lufte ku nga gërmadhat e saj dolën dy personazhe të fortë që morën më pas kontrollin e gjithçkaje. Të dy sot janë personazhe shumë të rëndësishëm të jetës së nëntokës në vend. Të dy e filluan si ushtarë të përkëdhelur të krerëve. Prej asaj dite kur u vra misraxhiu, u vendos që të mos përdoren më njerëz pa përvojë në operacione të posaçme por profesionistë.

Në vitin 1999, tregu i vrasësve me pagesë për llogari të narkotrafikantëve arriti kulmin. Njerëz të trupave speciale të policisë dhe ushtarë komando u bënë ekzekutuesit e urdhërave të shefave të karteleve, të cilët realisht ishin shumë lart në politikë.

Daut Kadriovski hante darka me ministra, deputetë e këshilltarë të Fatos Nanos në vilën e tij në Golem ku nuk dilte asnjëherë. Edhe kur e bënte atë nuk i thoshte asnjëriu, por me një Fiat Panda udhëtonte drejt Tiranës për të shijuar një akullore tek një pastiçer mjeshtër nga Tetova.

Kadriovski ishte strategu që ëndëronte “Shqipërinë Etnike” në tregun e narkotrafikut. Ai kishte plan që i gjithë rrjeti shqiptar i shpërndarjes së heroinës të jetë i gatshëm për t’i hyrë rrugës super më fitimprurëse-kokainës. Për të shkatërruar të gjitha kartelët e heroinës, Dauti merrte përsipër financimin e blerjes së miellit të bardhë, që e pinte aq shumë sa ua mësoi me radhë të gjithë këtyre birbove të politikës që tani e kanë bërë ves.

Por dikush e pengoi. Kush thoni ju? Sali Berisha! Edhe pse në opozitë ai dha alarmin për planin e tij, edhe pse kishte marrë miliona si financim në fushatat elektorale. Por nuk ishte vetëm Sali Berisha që po frikësohej nga fuqizimi i Kadriovskit, i cili po bëhej një “Mekë” ku faleshin të gjithë , por edhe politikanët e tjerë, të cilëve u shijoi plani i Dautit plak për kokainën.

Po ku do të gjendeshin paratë për të financuar blerjen e kokainës? Natyrisht thesari i shtetit dhe floriri i Kërrabës. Por për këtë do të flasim në numrat e ardhshëm./Pamfleti

Kurti: President Pinokio – zgjeron rrenën, jo territorin

Kryetari i Vetëvendosjes, Albin Kurti në një postim në Twitter ka shkruar se presidenti i Kosovës, Hashim Thaçi po e zgjeron rrenën, e jo territorin

Presidenti Pinokio, siç e ka quajtur Kurti, po e përdor si karrem Preshevën, Medvegjën dhe Bujanocin në aventurat e tij, sipas kreut të VV-së.

“Për të përfshirë të tjerët në aventurat e tij për shkëmbimin e territorit me Serbinë, Thaçi së pari tentoi të përdorë ulësen e Kosovës në OKB si karrem, dhe po vazhdon ta bëjë, sërish, duke tentuar ta përdorë regjionin e Preshevës, Medvegjës dhe Bujanocit si karrem. Një zgjerim i rrenave, jo i territorit. President Pinokio?”, ka shkruar Kurti në Twitter.

Vrasja e 29-vjeçarit: Reportazh nga shtëpia e viktimës në Deçan

Vritet në Deçan një 29 vjeçar. Dyshohet se vrasja në vendin e punës ishte aksidentale. Ky është vendi ku deri të dielën punonin bashkë, i ndjeri Agonis Tetaj, dhe i dyshuari për vrasjen e tij, Sh.G.

Por pasditen e 23 shtatorit, 29 vjecari, u qëllua me armë nga kolegu i tij i punës. Familja Tetaj nga fshati Llukë e Ulët, kanë mbetur të shokuar nga ngjarja që i ka goditur. Edhe pse nuk ishin në gjendje të flasin para kamerës, ata kanë treguar që familjari i tyre nuk kishte problem me askënd, e aq me pak me një 18 vjecar. Babai i Agonisit thotë se nuk di asgjë për detajet e vrasjes së të birit, por shpreson që e shtëna që i mori jetën të e djalit të tij të jetë aksidentale.

Edhe një dëshmitar i ka thënë T7 se vrasja ka qenë aksidentale. 29 vjecari nga Lluka e Decanit ka lënë pas vetës gruan dhe dy djem binjakë të moshës tre vjeçare. Në pritje për ta mësuar të vërtetën e këtij akti makabër familjarët i janë drejtuar Policisë së Kosovës. Këta të fundit thonë se janë duke hetuar rastin dhe se i dyshuari është arrestuar.

Sipas burimeve që ka Televizoni T7 i dyshuari për vrasje është djali i pronarit të kompanisë ku punonte Agonis Tetaj. 18 vjecari i dyshuar për vrasje me vendim te prokurorit te shtetit është dërguar në mbajtje për 48 orë, për të vazhduar me procedura të mëtutjeshme ligjore.

Kurse viktima ka mbërri në spitalin e Pejës pa shenja jete dhe me urdhër të prokurorit të shtetit trupi I pajete u dërgua në Institutin e Mjekësisë Ligjore për obduksion.

Heiko Maas: Evropa dëshiron më tepër koordinim me SHBA-të

Ministri i Punëve të Jashtme të Gjermanisë, Heiko Maas tha se Evropa duhet të përgatitet për ndryshimet strukturore në marrëdhëniet transatlantike

Maas në një deklaratë për Agjencinë Gjermane të Lajmeve DPA tha se për disa vendime të SHBA-ve njoftohen nga rrjeti social Twitter. Ai shtoi se ka një përshtypje se edhe një pjesë e madhe e opinionit në SHBA vendimet e Shtëpisë së Bardhë i mësojnë nga Twitter-i.

Maas, i cili nesër do të udhëtojë në New York për të marrë pjesë në Asamblenë e Përgjithshme të OKB-së, rikujtoi se në të kaluarën për të gjitha çështjet e rëndësishme bëheshin konsultime intensive me SHBA-të, por që tanimë këto konsultime janë zvogëluar.

Sipas tij, qeveria gjermane dëshiron që përsëri të ketë më shumë koordinim dhe dialog me SHBA-të.

Ai thekson se shumë persona kanë një mendim të tillë se gjithçka pas presidentit amerikan Donald Trump do të jetë e njëjtë si në të kaluarën. “Në marrëdhëniet transatlantike ka ndryshime strukturore. Këto nuk do të zhduken edhe pas Trumpit. Në Gjermani dhe sidomos në Evropë duhet të jemi gati për këtë”, tha Maas.

Shefi i diplomacisë gjermane kërkoi nga Bashkimi Evropian (BE) të tregojë qëndrim më me vetëbesim ndaj SHBA-ve. “Ne evropianët nuk duhet të qëndrojmë si lepuri përpara gjarprit, duke pritur se çka do të shpërndahet ditën e nesërme nga Twitter-i”, tha ai.

Maas shtoi se partneriteti transatlantik duhet të përshtatet me kushtet e vitit 2018, sidomos sipas tij duhet të përgatitet për të ardhmen.

Pas ardhjes së Trumpit në pozitën e presidentit të SHBA-ve dolën në shesh dallimet në marrëdhëniet Gjermani-SHBA, sidomos në opinionet për politikat e tregtisë, marrëveshjes bërthamore me Iranin, ndryshimet klimatike dhe shpenzimet në mbrojtje.

Japonia lanson në hapësirë kapsulën kargo

Japonia ka lansuar sot një kapsulë kargo pa ekuipazh, e cila nga qendra kërkimore Tanegashima duhet të mbërrijë në Stacionin Hapësinor Ndërkombëtar (ISS)

Agjencia amerikane për aviacion dhe kërkim (NASA), bëri të ditur se agjencia japoneze për kërkim në hapësirë (JAXA) ka lansuar me sukses kapsulën në të cilën ka ushqime, pajisje për eksperimente dhe bateri të reja.

Pritet që kapsula pas katër ditësh të mbërrijë në ISS. Lansimi i kapsulës në fjalë duhej të realizohet dy javë më parë, por lansimi është shtyrë nga shkaku i kushteve të këqija të motit dhe një problemi teknik.