Kurti: Motivi i Serbisë sa më afër Kosovës, motivi i pushtetarëve në Kosovë, sa më larg Gjykatës Speciale

Kryetari i Lëvizjes Vetëvendosje, Albin Kurti, ka vlerësuar se javët dhe muajt në vijim janë tejet të rëndësishëm për Kosovën. Gjersa foli për çështjen e dialogut dhe opsionin për shkëmbim territoresh me Serbinë, Kurti tha se ajo që mund të ngjajë pas disa javësh ose muajsh mund t’i sjellë Kosovës pasoja të pariparueshme

“Javët dhe muajt në vijim janë tejet të rëndësishëm. Ajo që mund të ndodhë në javët dhe muajt në vijim mund të ketë pasoja për vite të tëra, mos të thënë dekada. Andaj duhet të jemi të vëmendshëm”, deklaroi Kurti.

Në një tryezë të përbashkët me përfaqësuesit e Luginës së Preshevës, lideri i LVV-së ka thënë se shqiptarët e Luginës kanë paguar çmimin më të lartë përgjatë viteve.

“E keni paguar çmimin më të lartë sepse keni mbetur edhe jashtë Kosovës dhe jashtë Shqipërisë. Kosova ka një flamur ku nuk e shihni veten. Juve, edhe Tirana e edhe Prishtina iu ka më së shumti borxh”, shtoi ai.

Ndërkohë, teksa foli për opsionin e shkëmbimit të territoreve, Kurti tha se deklaratat e tilla ngjajnë sikurse termat e ekonomisë, të cilat sipas tij, janë të papranueshme.

“Besojmë që fjala shkëmbim, fjala këmbim, që i përket gjuhës së tregut në ekonomi, nuk është e pranueshme për një çështje jetike kombëtare, siç është ajo e Preshevës, Medvegjës e Bujanocit. Pra nuk do t’iu besojmë atyre pazargjinjvje në politikë, që flasin për tokat që i përkasin gjithë kombit”, potencoi ai.

Sipas tij, përcjell Zëri, opsioni për shkëmbim territoresh pos që është i papranueshëm, është edhe plotësisht i padrejtë për shqiptarët.

“Arsyeja pse neve po na duket që bëhet fjalë për një mashtrim të ri vjen nga fakti se gjithçka po tregon se ideja e shkëmbimit të territoreve apo e korrigjimit të kufijve më shumë është në funksion të një lloj të krijimit të atmosferës ku një status special për veriun e Kosovës bëhet më i kollajshëm në emër të një premtimi për kompensim në Preshevë, Medvegjë e Bujanoc, gjë që nuk po duket askund në horizont. Është e rëndësishme të theksohet se paralelizmat e tillë nuk janë të drejtë”, ka theksuar ai.

Kjo pasi sipas tij, shqiptarët janë vendas sikurse në Kosovën Lindore, ashtu edhe në veri të Ibrit.
“Shqiptarët janë autoktonë edhe në veri të Ibrit edhe në Kosovën Lindore. Një qasje e tillë e pazarit nuk mendoj që na nevojitet. E kur këtë e thonë ata të cilët nuk iu kanë marrë as në bisedime të Rambujesë, as të Vjenës, as të Brukselit, besoj që nuk ka nevojë të kuptohet që mashtrimi i ri është nga dallavergjinjtë e vjetër”, ka potencuar ai.

Kurti tutje, ka konsideruar se motivi i Serbisë është të jetë sa më afër BE-së, kurse motivi i pushtetarëve në Kosovë siç ai është shprehur, është që të jenë sa më larg gjykatës Speciale.

Në tryezën e organizuar nga Vetëvendosje, ku po diskutohet për të drejtat e shqiptarëve në Luginë, kryetari i Preshevës, Shqipërim Arifi, deklaroi se i vetmi lider i Kosovësr i cili ka qenë i hapur për të biseduar për problemet e shqiptarëve në luginë, ishte Albin Kurti.

“I vetmi që na ka ftuar për të dëgjuar për problemet tona, ishte Albin Kurti, pas zgjedhjeve ai na ka thënë se për çfarë do që të keni nevojë, deputetët e Vetëvendosjes, janë edhe të juajit”, tha Arifi gjatë diskutimit.

Një shqiptare mes 10 kompozitorëve më të mirë në botë

Kompozitorja fituese e festivalit së RTsh me këngën “Përrallë”, Olsa Toqi, është duke marrë pjesë në një nga evenimentet më të rëndësishme të zhanerit operistik kontemporan, siç është “Internacional Opera Giaccomo Puccini” që u mbajt në Lucca

Toqi është përzgjedhur ndër shumë kompozitorë pjesëmarrës nga e gjithë bota në 10-shen më të mirë me anë të projektit të saj operistik! Nën kujdesin e kompozitorit Girolamo D’eraco, Drejtor i Clauster Italia, Toqi ka kompozuar Operan ‘Meladrama’ .

Në Shqipëri opera e parë shqiptare “Mrika”, u kompozua më 1958, pak vite më vonë vijoi Skenderbeu dhe më pas nuk pati kompozime të tjera. Pas kaq vitesh Toqi eshte kompozitorja parë shqiptare që po kompozon Opera.

Bedri Pejani: Kujtimet e Luftës së Dytë Botërore në Kosovë

Para shtatëdhjetë viteve, përfundoi Lufta e Dytë Botërore dhe filloi beteja për ta kontrolluar kujtesën e kësaj lufte. Në Kosovë, kujtime të ndryshme paraqiten si kujtimet e vetme të vërteta të luftës: ekziston një kujtesë e rezistencës anti-fashiste, një kujtesë e vrasjeve etnike të partizanëve, njëjtë sikur që ekzistojnë edhe tregimet mitike të jetës ndër okupimin italian dhe gjerman ja si idilike, ja si tragjike. Secila prej tyre, në kohëra të ndryshme u bë kujtesë zyrtare, duke i lënë kështu kujtimet tjera nën radar

Me këtë ekspozitë ne duam të sfidojmë idenë së ekziston vetëm një e vërtetë e historisë së Kosovës gjatë Luftës së Dytë Botërore, apo se vetëm një grup – qofshin shqiptarët apo serbët, nacionalistët apo socialistët – e posedon këtë të vërtetë. Nuk ka të vërtëta në kujtime homogjene që bazohen në një nocion abstrakt të popullit. Kujtimet homogjene janë të pavërteta sepse nuk janë kritike dhe i mohojnë të vërtetat e pakëndshme, si për shembull krimet e luftës që bëhen nga populli respektiv. Por ato janë veçanërisht të pavërteta sepse nuk e njohin shumëllojshmërine që ekziston brenda cilitdo grup.

Këtë na e lejon historia gojore: të thejmë monopolin e së vërtetës – pa marrë parasysh a e ka këtë monopol shteti, kombi, apo një grup politik – në mënyrë që t’i dëgjojmë rrëfimet që ekzistojnë nën radar. Këtu ju prezantojmë rrëfime të shkurtra për individë që qëlluan të jenë protagonistë në ngjarje të mëdha. Ata identifikoheshin me grupe më të mëdha se vetja, por bënë zgjedhje individuale kur ishte gati e pamundur për të zgjedhur lirshëm, në një kohë kur lëvizje më të mëdha të popujve dhe ideve rrëmbyen Kosovën. Ndonjëherë ata e gjetën veten të tërhequr në anë të kundërta prej besnikërive të ndryshme që kishin ndaj ideve apo vendeve. Duke i ritreguar rrëfimet e tyre, ata apo familjet e tyre, na tregojnë se çka u është imponuar, dhe si t’i interpretojmë edhe rrëfimet e tyre por edhe vet Historinë.

Bedri Pejani (1885-19460 u lind si Bedri Thaçi, por morri emrin e vendlindjes siç ishte zakon në atë kohë. Ishte anëtar prominent i lëvizjes kombëtare shqiptare gjatë sundimit osman. Ai ishte i pranishëm në nënshkrimin e Deklaratës së Pavarësisë Shqiptare në vitin 1912. Ai përfaqësoi Kosovën në Konferencësn e Versajës në 1919. Bedri Pejani ishtë njëri ndër themeluesit e Komitetit të Kosovës dhe udhëhoqi Partinë e Popullit, të themeluar nga Fan Noli.

Derisa ishtë në ekzil pasi që u dënua me vdekje nga Ahmet Zogu në vitin 1924, ai u bë udhëheqës i Komitetit Mbrojtja Kombëtare e Kosovës, me përkrahjen politike dhe financiare të Ndërkombëtares Komuniste (Komintern). Nën okupimin fashist italian të Shqipërisë ai u arrestua si bolshevik dhe u mbajt deri në kapitullimin e Italisë më 1943. Kur gjermanët erdhën në fuqi, Pejani nisi Lidhjen e Dytë të Prizrenit e Xhafer Devën dhe përkrahjen e okupatorëve. Lidhja e Dytë e Prizrenit ishte përgjegjëse për një valë të përzënieve të dhunshme të kolonëve serbë dhe malazezë, të cilëve u ishtë falur tokë pas Luftës së Parë Botërore. Pejani u arrestua në 1946ën nga partizanët. Pas një kohe të shkurtë, supozohet se është helmuar në spital, ku edhe është mbajtur për arsye shëndetësore. /oralhistorykosovo/

/oralhistorykosovo/

Arsyetimi cinik i Thaçit

Presidenti i vendit Hashim Thaçi, në konferencën e parafundit për media, tha se deri kah fundi i vitit duhet të arrihet një marrëveshje përfundimtare me Serbinë, e cila do të jetë obligative për të dyja vendet dhe që do të rezultojë me anëtarësimin e Kosovës në OKB

Caktimin e këtij afati kohorë, ai e arsyetoi me atë se kah mesi i vitit të ardhshëm, pritet të mbahen zgjedhjet e ardhshme për Parlamentin Evropian.

Këto zgjedhje mund të sjellin në parlament deputetë të partive populliste që suksesin e tyre politik po e shohin duke kundërshtuar Bashkimin Evropian, sepse aktualisht në Bruksel mbizotërojnë dy mendime të kundërta të krahëve politik.

Njëri krah politik mendon se përforcimi i Bashkimit Evropian, ndihmon edhe në stabilitetit e shteteve anëtare sa i përket sigurisë publike, zhvillimit ekonomike dhe social. Kurse, krahu tjetër politik mendon se disa rregulla strikte të BE-së po e pengojnë zhvillimin e shteteve anëtare.

Partitë popullsite në pushtet, janë në Austri, Hungari dhe vendet tjera. Madje, këto subjekte politike dyshohet se financohen nga Rusia e Putinit në mënyrë që përmes tyre të dobësohet Bashkimi Evropian. Viktor Urban, disa herë ka mbajtur takime me Putinin dhe haptas e shpreh admirimin e tij nda presidentit rus.

Por, pavarësisht frikës së ndryshimit të pushtetit në organet e Bashkimit Evropian, kjo nuk ia jep të drejtën presidentit Thaçi që turrë e vrap të shkojë në Bruksel për tu takuar me Vuçiqin.

E para është sa i përket mandatit. Kuvendi i Kosovës në vitin 2012 ka miratuar një strategji që autorizon kryeministrin e vendit për të udhëhequr bisedimet politike në Bruksel. Në bazë të kësaj strategjie Hashim Thaçi në cilësinë e kryeministrit hyri në bisedimet me Serbinë.

Në këto bisedime ai pranoi që Kosova të nënshkruaj marrëveshjen e vitit 2013 për normalizimin e marrëdhënieve me shtetin e Serbisë. Njëra nga pikat e kësaj marrëveshjeje është edhe themelimi i Asociacionit të komunave me shumicë serbe.

Këto bisedime i vazhdoi edhe pasuesi i tij Isa Mustafa. Ai në vitin 2015 nënshkroi marrëveshjen e gushtit të vitit 2015 për kompetencat që do t’i ketë Asociacioni i komunave.

Kurse, tashmë Kosova po fillon një fazë të re të bisedimeve, e ato po tenton t’i udhëheq Thaçi pa u miratuar një dokument në Kuvend që tekstualisht e autorizon atë për ta bërë këtë gjë.

E dyta është se presidenti i vendit nuk shihet person i duhur dhe kredibil për t’i udhëhequr këto bisedime. Ai deri më tani ka nënshkruar disa marrëveshje me Serbinë që e kontestojnë pavarësinë e Kosovës.

Kurse, tash po lajmëron se në bisedimet e ardhshme do të ketë vështirësi edhe më të mëdha dhe po paralajmëron se do të ketë kompromise të dhimbshme, pa treguar se cilat do të jenë ato.

Ndërkohë, mediumet ndërkombëtare po raportojnë se ai është i pajtimit që të hyjë në bisedime me Vuçiqin për të negociuar edhe për ndarjen e pjesës veriore të Kosovës.

Përpos këtyre dëmeve që konsiderohet se ai ia ka bërë vendit, i pari i shtetit në një farë mënyrë ndihet edhe i kërcënuar edhe nga Gjykata Speciale, sepse në raportin e Dick Martit, Thaçi është personi i parë që dyshohet se është i përfshirë në krime gjatë dhe pas luftës.

Kështu që presidenti duke u thirrur në mbajtjen e zgjedhjeve parlamentare në BE, pa e marrë një mandat nga Kuvendi i Kosovës, po dëshiron të nënshkruaj një marrëveshje me Serbinë që askush ende nuk e din se për çka do të bisedohet dhe cilat kompromise e ka ndërmend t’i bëj.

VV: Manipulimi i Thaçit me përfaqësuesit politik nga Lugina e Preshevës

Deputetja e Vetëvendosjes në Kuvendin e Kosovës, Albulena Haxhiu e ka quajtur presidentin e vendit një “politikan sharlatan”

Kjo pasi që sipas saj, përcjell Telegrafi, Hashim Thaçi, “nga frika se mos ai del keq para opinionit publik, në tryezën e organizuar sot nga Vetëvendosje në Kuvendin e Republikës së Kosovës për të drejtat e shqiptarëve në Preshevë, Medvegjë e Bujanoc, i mori nga shkallët e Kuvendit disa përfaqësues të Luginës që po vinin në tryezë, duke shfrytëzuar pozitën e tij të Presidentit, e duke i vendosur përfaqësuesit e Luginës në një pozicion krejtësisht të pafavorshëm”.

“Hashimi i mbajti këta përfaqësues në mbledhje dhe i nxori në konferencë për shtyp, për të mbuluar faktin se asnjëherë nuk e ka ngritur çështjen e të drejtave të tyre në dialogun me Serbinë. Si gjithmonë Thaçi i ka shfrytëzuar interesat e kombit shqiptar vetëm për pushtetin e tij!”, ka shkruar Haxhiu në Facebook.

“Sikur LV të mos e kishte organizuar këtë tryezë, Thaçi kurrë nuk do t’i kishte ftuar në takim dhe as nuk do ta mbante këtë konferencë ku edhe njëherë ai foli me formula retorike boshe!”, ka përfunduar Haxhiu.

Bushati takon Nënsekretarin e Shtetit: Shqipëria faktor konstruktiv në rajonin e Ballkanin Perëndimor

Ministri për Evropën dhe Punët e Jashtme gjendet në Uashington DC për të marrë pjesë në Ministerialin mbi “Lirinë Fetare” me ftesë të Sekretarit të Shtetit, Mike Pompeo

Gjatë qëndrimit në Uashington DC, Ministri Bushati zhvilloi një takim me Nënsekretarin e Shtetit për Çështjet Politike, Stephen Mull. Në takimin me Nënsekretarin Mull, Ministri Bushati vlerësoi mbështetjen e vazhdueshme të SHBA-ve për sa i përket zbatimit të reformave të brendshme e kryesisht asaj në gjyqësor, si dhe në garantimin e sigurisë e stabilitetit në rajonin e Ballkanit.

SHBA-të duhet të vazhdojnë të jenë prezentë në BP, theksoi Bushati, jo vetëm si faktor paqeje dhe sigurie por dhe si kundërbalancues i ndikimit të fuqive të treta në rajon. Nga ana e tij, Nënsekretari Mull falënderoi Shqipërinë për kontributin e çmuar si në kuadër të NATO-s ashtu dhe si faktor konstruktiv në rajonin e Ballkanin Perëndimor.

Nënsekretari Mull theksoi rëndësinë strategjike që SHBA-të i japin integrimit të Shqipërisë në BE dhe vazhdimit të zbatimit të reformave të brendshme. Nënsekretari Mull njohu po ashtu Ministrin Bushati me mesazhet kryesore të Samitit të Helsinkit si dhe me pikëpamjet e Departamentit të Shtetit mbi zhvillimet më të fundit në Bashkimi Evropian.

Ministri Bushati zhvilloi dhe një takim me Senatorin Roger Wicker, Kryetari i Komisionit OSCE-Helsinki. ​

Ofertat “mashtruese” për punësim në Gjermani

Përmes rrjeteve sociale dhe aplikacioneve të ndryshme, kryesisht atij Viber, qytetarët në Kosovë kanë filluar të marrin së fundmi mesazhe, në të cilat u ofrohet mundësi punësimi – dhe atë në Gjermani

Radio Evropa e Lirë ka kontaktuar njërën nga këto që veten e quajnë agjenci punësimi. Në përgjigjen e dërguar përmes aplikacionit Viber, thuhet se ofrojnë kontratë pune për profesione të ndryshme në Gjermani.

Mesazhi i dërguar nga agjencia e punësimit

Përfaqësuesit e kësaj agjencie thonë se pas kompletimit të dokumentacioni kontrata e punës bëhet brenda 21 ditësh. Sipas përgjigjes me shkrim, kjo agjenci thotë se ofron vende pune për profesionet si: kamerier, shofer, shitës, ndihmës në ndërtimtari, elektricist dhe profesione të tjera.

Por, sa janë të besueshme këto agjenci dhe a mund të arrihet një kontrate pune në Gjermani përmes tyre?
Në Policinë e Kosovës, sipas zëdhënësit, Daut Hoxha janë paraqitur raste të mashtrimit që kompani apo agjenci të tilla u kanë bërë qytetarëve.

“Policia e Kosovës, konkretisht Drejtoria për hetimin e krimeve ekonomike dhe korrupsionit se fundi ka pranuar dy rastem një në Prishtinë dhe një në Prizren ku një numër i madh i shtetasve te Republikës së Kosovës janë mashtruar duke dhënë para në këmbim të një kontrate jo valide për punësim ne Gjermani”, thotë Hoxha.

Ai shton se për të gjitha rastet e raportuara, Policia e Kosovës i ndërmerr veprimet e nevojshme ligjore të parashkruara me Kodin Penal të Kosovës. Idriz Sadiku, qytetar nga Prishtina thotë të ketë pranuar një mesazh të tillë, por që nuk mendon se është i besueshëm.

“Po kam marr një mesazh përmes Viber-it, nuk jam interesuar fare mund edhe të mos jetë i besueshëm. Unë mendoj se këto kompani po e shfrytëzojnë nivelin e lartë të papunësisë në Kosovë dhe po mashtrojnë qytetarët me gjëra të tilla dhe për përfitimi të tyre”, thotë ai.

Ndërsa, Nita Sylejmani thotë se edhe ndoshta do ta provonte një mundësi të tillë nëse siç shprehet ajo nuk do të kushtonte shumë. “Po ndoshta edhe mund të sigurojnë një vend pune, do të kishte qenë mundësi e mirë për neve në Kosovë, nuk jam e informuar shumë për këto kompani kam dëgjuar diçka nga miqtë e mi, por ekziston edhe frika se mund të mashtrohemi”, thotë ajo.

Në anën tjetër, zyrtarë të Ministrisë së Punës dhe Mirëqenies Sociale thonë të mos jenë në njohuri për këtë mënyrë të ofrimit të vendeve të punës përmes aplikacioneve të teknologjisë së menduar, përkatësisht përmes Viber-it.

Mimoza Kqiku, këshilltare për informim e Ministrit të Punës dhe Mirëqenies Sociale, thotë për Radion Evropa e Lirë se si ministri bashkëpunojnë vetëm me agjenci që janë të licencuara në Kosovë dhe jo me agjenci të cilat veprojnë në shtete të caktuara.

Ajo thekson se për dy vjet që prej kur ka nisur procesi i licencimit, Ministria e Punës dhe Mirëqenies Sociale ka licencuar 17 agjenci të cilat ofrojnë shërbime të punësimit apo ndërmjetësim në punësim si brenda vendit ashtu edhe jashtë.

“Kur jemi tek ndërmjetësimi në punësim dhe agjencitë që ofrojnë këto shërbime, ekziston një procedurë e rregullt e cila duhet të ndiqet nga Ministria dhe agjencitë që ofrojnë shërbime. Të gjitha këto agjenci duhet të licencohen pranë Ministrisë në bazë të legjislacionit në fuqi, ndërsa sa i përket agjencive të cilat operojnë në shtetet përkatëse, ato kanë të drejtë në mënyrë të pavarur të ofrojnë shërbimet e tyre, por Ministria bashkëpunon vetëm agjenci që licencohen”, thotë ajo.

Sa i përket punësimit në vendet e Bashkimit Evropian, Kqiku thotë se Ministria e Punës është në përpjekje të nënshkrimit të marrëveshjes për punësim sezonal në disa nga vende të BE-së.

“Sa i përket marrëveshjeve për punësim sezonal aktualisht nuk kemi ndonjë marrëveshje, por jemi në përpjekje të vazhdueshme që së shpejti të kemi një marrëveshje të tillë. Mund të konfirmojë se jemi në negociata të ngushta më disa shtete dhe deri në fund të vitit do të kemi një ose më shumë marrëveshje për punësim sezonal”, thekson Kqiku.

Papunësia është një nga problemet më të mëdha që ka përcjellë shoqërinë kosovare viteve të fundit. Shkalla e papunësisë në Kosovë, sipas të dhënave zyrtare është mbi 30 për qind.

Në tregun e punës në Kosovë, sipas të dhënave zyrtare, çdo vit hyjnë 25 deri në 30 mijë të rinj, të cilët konsiderohen të aftë për punë.

Vuçiq: Të gjithë serbët e dinë se Kosova është humbur

Kryetari i Serbisë Aleksandar Vuiçiq ka deklaruar se të gjithë serbët e dinë se Kosova është humbur, porse ai do t’i bëjë të gjitha që të kthejë atë mundet

“Të gjithë serbët e dinë se e kanë humbur Kosovën, porse unë do të bëj çdo gjë që është në fuqinë time që të kthehet ajo që mund të kthehet dhe që në fund të mos dalë si disfatë e plotë ose humbje e tërësishme”, ka thënë Vuçiq për “globusin” e Zagrebit, transmeton Koha.net.

Ai ka shtuar se “e sulmojnë të gjithë dhe se në këto sulme nuk zgjidhen as fjalë dhe as mjete e asnjëri nga sulmuesit në fakt nuk dëshiron që problemi i Kosovës të zgjidhet”.

“Nëse shoh ndonjë gjë të mirë për Serbinë, unë do ta shtyj përpara pa marrë para sysh pasojat. Shikoni, po arrij disa rezultate të prekshme, sidomos në planin ekonomik .Borxhi publik i Serbisë po zvogëlohet dhe me masa të vështira po arrihen rezultate të prekshme. Ndërsa ata që mendojnë se kanceri mund të shërohet me aspirinë, ata ose ia duan të keqen Serbisë, ose janë budallenj”, ka thënë Vuçiq deklarata e të cilit është pjesë e tekstit në të cilin analizohen ngjarjet në vijën Beograd-Prishtinë .

Autori i tekstit Darko Hudelist, thekson se Vuçiq mbron konceptin me të cilin përpiqet të “mbrojë” veriun e Kosovës, përkatësisht vlerëson se “veriu i Kosovës është vija e fundit e mbrojtjes me atë që tash e një vit në zhargonin politik ndërkombëtar quhet marrëveshje gjithëpërfshirëse e normalizimit të marrëdhënieve të Serbisë e Kosovës”.

“Thënë thjeshtë: Po, do ta njohim Kosovën (por pa aktin eksplicit të njohjes juridike ndërkombëtare), dhe për kompensim do “ta tregtojmë” veriun e Kosovës . Nuk do t’ua japim atyre (shqiptarëve në Kosovë) të gjitha sepse do t’ia dalim që diçka të ndalim për vete”, ka thënë autori i tekstit.

Autori përkujton se shpesh po shkruhet për konceptin e Vuçiqit të ashtuquajtur këmbim territoresh, përkatësisht konceptit të korrektimit të kufijve, ose siç thotë autori, koncepti i kompromisit, fjalë kjo që në kohë të fundit nga Vuçiqi po përdoret më së shumti.

Thaçi premton përkrahje për qytetarët e Luginës

Presidenti Hashim Thaçi ka pritur sot në takim përfaqësuesit e Luginës së Preshevës, Medvegjës e Bujanocit, me të cilët ka biseduar për gjendjen e shqiptarëve që jetojnë atje

Pas takimit, Thaçi ka mbajtur një konferencë për media, në të cilën ka thënë se u informua për zhvillimet në Luginë dhe problemet e qytetarëve të atjeshëm. Thaçi ka premtuar ndihmë dhe mbështetje nga të gjitha institucionet e Kosovës për shqiptarët që jetojnë atje.

Më poshtë pjesë nga fjalimi i Thaçit:

Ne mbaruam një takim pune njëherë veçmas me secilin, e pastaj bashkë, ishte takim përmbajtjesor, e që është vazhdimësi e takimeve të mëhershme. Ky takim ka qëllim të informimit për sfidat dhe problemet me të cilat përballen qytetarët që jetojnë në këto lugina.

Unë ju siguroj se kemi obligim që jo vetëm të përcjellim me vëmendje cilat janë problemet që i shqetësojnë qytetarët atje, por edhe të ndërmarrim veprime konkrete për t’i zgjidhur ato, gjithmonë në përputhje me standardet evropiane.

Serbia si çdo tjetër, e aq më tepër si një shtet me pretendime për tu anëtarësuar në BE e ka për obligim të respektoj të drejtat e qytetarëve atje.

Serbia fatkeqësisht është larg përmbushje së standardeve të qytetarëve të Luginës së Preshevës. E këtë gjendje të vështirë, ma konfirmuan sot në takim përfaqësuesit shqiptar të luginës.

Sot ju premtoj të gjithë qytetarëve të luginës se institucionet do të përdorin çdo mjet legjitim dhe demokratik për të mbrojtur të drejtat elementare e kombëtare të tyre.

Dua të besoj se autoritetet në Beograd do të mirëpresin interesimin tonë dhe do të respektojmë atë që ne i respektojmë në Kosovë të drejtat e serbëve.

Pres një koordinim më të madh, përfshirë edhe BE-në që të adresoj kërkesat dhe shqetësimet e qytetarëve të luginës. BE nuk mund të aplikoj standarde të dyfishta kur është në pyetje çështja e komuniteteve.

Qeveria Haradinaj kundërshton ndarjen dhe shkëmbimin e territoreve

Kabineti i kryeministrit të Kosovës, Ramush Haradinaj, e përjashtoi mundësinë e diskutimeve dhe negociatave për ndarjen e Kosovës apo shkëmbimin e territoreve me vendet fqinje

“Ndarja e territorit të Kosovës, shkëmbimi i territorit apo çfarëdo opsioni që ka si qëllim ndryshimin e kufijve nuk është opsion fare për Qeverinë e Kosovës, është vijë e trashë e kuqe dhe e pakalueshme për ne”, tha për Radion Evropa e Lirë Avni Arifi, këshilltar i kryeministrit Haradinaj.

“Do të thotë, kjo është një vijë e pakalueshme për ne”, theksoi ai. “Ata që tentojnë, mendojnë që duke ndryshuar kufij, (me) shkëmbim territoresh, duke sjellë tema të tilla në tavolinë në këtë formë, ata njerëz vërtet synojnë që ta kthejnë Ballkanin në periudhën e errët”, tha Arifi.

Sipas tij, Qeveria e Kosovës nuk do të hyjë në asnjë mënyrë në një proces të ridizajnimit të kufijve në Ballkan.

Komentet e Arifit pasojnë deklaratat e presidentit të Serbisë, Aleksandar Vuçiq, sipas të cilit, për Serbinë do të ishte “më mirë diçka sesa asgjë”.

Ndarja e Kosovës është përmendur në disa raste publikisht edhe nga ministri i Jashtëm serb, Ivica Daçiq.